“Kamata ke Folau Tahi ʻi ha Afā”

ʻIKAI te ke vakai ki ha fakatuʻutāmaki pehē ko ha taimi kovi, fakavalevale, pea malava ke fakatuʻutāmaki? Kae kehe, ʻoku tuiaki atu ʻa e niʻihi ki ha tuʻunga pehē ʻi ha founga fakaefakatātā. ʻO anga-fēfē? Naʻe pehē ʻe he tangata faʻu-tohi Pilitānia ko Thomas Fuller he senituli hono 17: “ʻOua ʻe fai ha meʻa ʻi ha ʻita lahi. Ko e kamata ia ke folau tahi ʻi ha afā.”

Ko hono fai ha meʻa he lolotonga ʻo ha ʻita taʻemapuleʻi ʻe lava ke hoko ai ha ngaahi nunuʻa fakamamahi. ʻOku fakapapauʻi ʻeni ʻi ha meʻa naʻe hiki ʻi he Tohitapú. Ko Simione mo Līvai, ko e ongo foha ʻo e pēteliake ʻo e kuonga muʻá ko Sēkopé, naʻá na fai ha meʻa ki hono fakamālohiʻi ʻo hona tuofefine ko Tainá ʻaki hono fai ʻa e ʻohofi ʻi ha ʻita lahi ʻaupito. Ko hono nunuʻá ko e fakapō mo e ʻave fakamālohi lahi ʻo e koloá. ʻOku ʻikai ha ofo ʻi hono fakahalaiaʻi ʻe Sēkope ʻena ngāue koví, ʻi heʻene pehē: ‘Kuó mo fakatupu mamahi kiate au, ʻi hoʻomo fakanamukuuʻi au ʻi he lotolotonga ʻo e kakai ʻo e fonuá.’​—Senesi 34:​25-30.

ʻOku fakapotopotó, he ʻoku fakahinohino mai ʻe he Folofola ʻa e ʻOtuá, ko e Tohitapú, ʻa e ʻalunga fehangahangai. ʻOku pehē ai: “Maʻuā ʻa e mamahi, pea tukuange ʻa e ʻita: ʻOua ʻe haʻaki hohaʻa; ʻe iku kovi pe ia.” (Sāme 37:8) Ko e muimui ki he faleʻi ko iá ʻoku lava ke taʻofi ai ha ngaahi angahala lahi.​—Koheleti 10:4; toe sio ki he Palovepi 22:​24, 25.