Falala Kakato kia Sihova ʻi he Ngaahi Taimi ʻo e Faingataʻá

“Ko e hufanga ʻa e ʻOtua kiate kitautolu, mo ha malohi, ko e tokoni ʻi he mamahi [“faingataʻa,” NW] matuʻaki ofi.”​—Sāme 46:1.

1, 2. (a) Ko e hā ʻa e fakatātā ʻoku fakahaaʻi ai ʻoku ʻikai feʻunga pē ke fai ha taukaveʻi ʻoku tau falala ki he ʻOtuá? (e) Ko e hā kuo pau ai ke tau fai ha meʻa lahi ange ʻi he pehē pē ʻoku tau falala kia Sihová?

KO E meʻa ia ʻe taha ke taukaveʻi ʻoku tau falala ki he ʻOtuá. Ko e toe meʻa mātuʻaki kehe ia ke fakahaaʻi ia ʻi heʻetau ngaahi ngāué. Ko e fakatātaá, ko e kupuʻi lea “ʻOku ʻi he ʻOtuá ʻEtau Falalá” kuo fuoloa ʻene hā ʻi he paʻanga pepa mo e ngaahi koini U.S.a ʻI he 1956, naʻe fakapaasi ai ʻe he Fale-Alea U.S. ha lao ʻo fakahaaʻi ai ʻa e kupuʻi lea ko iá ko e moto fakafonua ia ʻa e ʻIunaite Seteté. Ko e meʻa fakaolí, ko e kakai tokolahi—ʻikai ʻi he fonua pē ko iá ka ʻi he kotoa ʻo e māmaní—ʻoku nau tuku ʻa e falala lahi ange ia ki he paʻangá mo e koloa fakamatelié ʻi heʻenau falala ki he ʻOtuá.​—Luke 12:​16-​21.

² ʻI he tuʻunga ko e kau Kalisitiane moʻoní, kuo pau ke tau fai ʻa e meʻa lahi ange ia ʻi he pehē pē ʻoku tau falala kia Sihová. Hangē tofu pē ko e “mate ʻa e tui ʻo ka mavahe mo e ngaue,” ʻoku pehē pē foki ʻa e taʻeʻuhinga ha taukaveʻi ʻoku tau falala ki he ʻOtuá kae ʻoua kuo poupouʻi ʻaki ia ʻetau ngaahi ngāué. (Semisi 2:26) ʻI he kupu ki muʻá, naʻa tau ako ai ko ʻetau falala kia Sihová ʻoku fakaeʻa ia ʻi he taimi ʻoku tau hanga ai kiate ia ʻi he lotú, ʻi he taimi ʻoku tau kumi tataki ai mei heʻene Folofolá, pea ʻi he taimi ʻoku tau hanga ai ki heʻene kautahá ki ha tatakí. Tau vakai angé he taimí ni ki he founga ʻe lava ke tau fou ai ʻi he sitepu ʻe tolu ko iá ʻi he ngaahi taimi ʻo e faingataʻá.

Taimi ʻOku Mole Ai ha Ngāue pe Tāiʻi ʻa e Paʻanga Hū Maí

 3. Ko e hā ʻa e ngaahi tenge fakaʻekonōmika ʻoku fehangahangai mo e kau sevāniti ʻa Sihová ʻi he “ngaahi taimi faingataʻa” ko ení, pea ʻoku anga-fēfē ʻetau ʻilo ʻoku loto-lelei ʻa e ʻOtuá ke tokoniʻi kitautolu?

³ ʻI he “ngaahi taimi faingataʻa” ko ení, ko kitautolu ʻi he tuʻunga ko e kau Kalisitiané ʻoku tau fehangahangai mo e ngaahi tenge fakaʻekonōmika tatau mo ia ʻoku hoko ki he kakai kehé. (2 Timote 3:1) Ko ia ai, ʻe fakaʻohovale pē nai kuo tau ʻilo kuo mole ʻetau ngāué. Pe ko e ʻikai nai haʻatau toe fili ʻe fai ka ko e ngāue ʻi ha ngaahi houa lōloa ki ha vāhenga siʻisiʻi. ʻI he malumalu ʻo e ngaahi tuʻunga peheé, te tau ʻiloʻi nai ʻoku faingataʻa ke ‘tokonaki ki hotau kaigá.’ (1 Timote 5:​8, PM) ʻOku loto-lelei ʻa e ʻOtua Fungani Māʻolungá ke tokoniʻi kitautolu ʻi he ngaahi taimi peheé? ʻAupito! Ko e moʻoni, ʻoku ʻikai ke maluʻi kitautolu ia ʻe Sihova mei he faingataʻa kotoa pē ʻo e moʻui ʻi he fokotuʻutuʻu ko eni ʻo e ngaahi meʻá. Kae kehe, kapau ʻoku tau falala kiate ia, ko e ngaahi lea ʻo e Sāme 46:1 ʻe fakamoʻoniʻi ʻoku moʻoni ia ʻi hotau tuʻungá: “Ko e hufanga ʻa e ʻOtua kiate kitautolu, mo ha malohi, ko e tokoni ʻi he faingataʻa matuʻaki ofi.” Kae kehe, ʻe lava fēfē leva, ke tau fakahāhā ʻoku tau falala kakato kia Sihova ʻi he ngaahi taimi ʻo e faingataʻa fakaepaʻangá?

 4. ʻI he fehangahangai mo ha ngaahi palopalema fakaepaʻanga, ko e hā ʻoku lava ke tau lotu fekauʻaki mo iá, pea ʻoku anga-fēfē ʻa e tali ʻa Sihova ki he ngaahi lotu peheé?

⁴ Ko e founga ʻe taha ke fakahāhā ai ʻetau falala kia Sihová ko e hanga kiate ia ʻi he lotu. Ka ko e hā ʻe lava ke tau lotu fekauʻaki mo iá? Sai, ʻi he fehangahangai mo e ngaahi palopalema fakaepaʻangá, te tau fiemaʻu nai ha poto ʻoku ʻaongá ʻi he taimí ni ʻo laka ange ʻi ha toe taimi. Ko ia ai, lotu leva fekauʻaki mo ia! ʻOku fakapapauʻi mai ʻe he Folofola ʻa Sihová kia kitautolu: “Kapau ko e poto ʻoku masiva ai ha taha, ke ne kole mei he ʻOtua, ʻa ia ʻoku ne foaki ʻataʻatā pe ki he kakai kotoa pe, ʻo ʻikai ʻatu mo e lau; pea ʻe foaki ia ki ai.” (Semisi 1:5) ʻIo, kole kia Sihova ki ha poto​—ʻa e malava ko ia ke ngāueleleiʻaki ʻa e ʻiló, mahinó, mo e ʻiloʻiló ​—koeʻuhi ke fai ha ngaahi fili lelei mo ha ngaahi fili totonu. ʻOku fakapapauʻi mai ʻe heʻetau Tamai fakahēvani ʻofá kia kitautolu te ne fanongo ki he ngaahi lotu peheé. ʻOkú ne loto-lelei ai pē ke fakatonutonu ʻa e ngaahi ʻalunga ʻo e faʻahinga ko ia ʻoku nau falala kiate ia ʻaki ʻa e kotoa ʻo honau lotó.​—Sāme 65:2; Palovepi 3:​5, 6.

5, 6. (a) Ko e hā ʻoku lava ai ke tau hanga ki he Folofola ʻa e ʻOtuá ki ha tokoni ke fekuki ai mo e ngaahi palopalema fakaʻekonōmiká? (e) Ko e hā ʻe lava ke tau fai ke fakasiʻisiʻi ai ʻa e loto-moʻuá ʻi he taimi ʻoku tau fehangahangai ai mo e mole ʻo ha ngāué?

⁵ Ko e hanga ki he Folofola ʻa e ʻOtuá ki ha tatakí ko ha toe founga ia ʻe taha ʻo hono fakahāhaaʻi ʻoku tau falala kia Sihová. Ko ʻene ngaahi fakamanatu fakapotopoto ʻoku maʻu ʻi he Tohitapú kuo fakamoʻoniʻi “ʻe ala falala ʻaupito ki ai.” (Sāme 93:5) Neongo naʻe kakato ia ʻi he taʻu ʻe 1,900 tupu kuo maliu atú, ko e tohi fakamānavaʻi ko iá ʻoku ʻi ai ʻa e faleʻi alafalalaʻanga mo e vavanga lahi ʻoku lava ke ne tokoniʻi kitautolu ke fekuki lelei ange ai mo e ngaahi tenge fakaʻekonōmiká. Fakakaukau atu ki he ngaahi fakatātā ʻe niʻihi ʻo e poto faka-Tohitapú.

⁶ Naʻe fakatokangaʻi ʻe Tuʻi Solomone Poto ʻi he kuohilí: “Oku fiemalie ae mohe ae tagata gaue, ne ogo be oku jii be oku lahi a ene kai: ka koe lahi oe mea ae koloaia koia oku ikai ke nau faa mohe ai.” (Koheleti 5:​12, PM) ʻOku fiemaʻu ʻa e taimi mo e paʻanga ke monomono, fakamaʻa, tauhi, mo maluʻi ʻetau ngaahi koloa fakamatelié. Ko ia ʻi he fehangahangai mo ha mole ʻo ha ngāué, te tau maʻu nai ai ha faingamālie ke toe sivisiviʻi ai ʻetau sīpinga moʻuí, ʻo feinga ke fakafaikehekeheʻi ʻa e ngaahi meʻa ʻoku fiemaʻu moʻoní mo ia ʻoku ʻikai loko fiemaʻú. Ke fakasiʻisiʻi ʻa e loto-moʻuá, ʻe fakapotopoto nai ke fai ha ngaahi liliu. Ko e fakatātaá, ʻoku ala lava ke fakafaingofuaʻi ʻetau moʻuí, mahalo ko ha hiki ki ha nofoʻanga siʻisiʻi ange pe ko hono toʻo atu ʻa e ngaahi koloa fakamatelie ʻoku ʻikai loko fiemaʻú?​—Mātiu 6:22.

7, 8. (a) Naʻe anga-fēfē ʻa e fakahāhā ʻe Sīsū ʻa ʻene lāuʻilo ko e faʻahinga taʻehaohaoa ʻo e tangatá ʻoku nau hehema ke hoko ʻo loto-hohaʻa tōtuʻa fekauʻaki mo e ngaahi meʻa fakamatelié? (Toe sio ki he fakamatala ʻi laló.) (e) Ko e hā ʻa e faleʻi fakapotopoto naʻe ʻomai ʻe Sīsū fekauʻaki mo e founga ke kalofi ai ʻa e loto-moʻua tōtuʻá?

⁷ ʻI he Malanga he Moʻungá, naʻe akonaki ai ʻa Sīsū: “ʻOua naʻa mou lotomoʻua koeʻuhi ko hoʻomou moʻui, ha meʻa te mou kai pe ha meʻa te mou inu; ʻumaʻā homou sino, ki ha meʻa te mou ʻai ki ai.”b (Mātiu 6:25) Naʻe ʻiloʻi ʻe Sīsū ko e faʻahinga taʻehaohaoa ʻo e tangatá ʻoku nau hohaʻa fakanatula fekauʻaki mo hono maʻu mai ʻa e ngaahi fiemaʻu tefito ki he moʻuí. Ka ʻe malava fēfē leva, ke ‘ʻoua ʻe loto-moʻua’ fekauʻaki mo e ngaahi meʻa ko iá? “Fuofua kumi ae buleaga,” ko e lea ia ʻa Sīsuú. Tatau ai pē pe ko e hā ha palopalema ʻoku tau fehangahangai mo ia, kuo pau ke tau hokohoko fakamuʻomuʻa ʻa e lotu ʻa Sihová ʻi heʻetau moʻuí. Kapau te tau fai pehē, pea tā ko ʻetau ngaahi fiemaʻu fakaʻahó “e fakalahi” mai ia kia kitautolu ʻe heʻetau Tamai fakahēvaní. ʻI ha faʻahinga founga pē, te ne tokonaki mai ʻa e meʻa ʻoku tau fiemaʻú.​—Mātiu 6:​33, PM.

⁸ Naʻe ʻomai ʻe Sīsū ʻa e toe faleʻi ko ení: “ʻOua te mou lotomoʻua koeʻuhi ko e ʻapongipongi, he ʻe moʻua ʻa e ʻapongipongi ʻi he meʻa ko ia.” (Mātiu 6:34) ʻOku ʻikai fakapotopoto ke hoko ʻo loto-moʻua tōtuʻa fekauʻaki mo e meʻa ʻe hoko mai nai ʻapongipongí. ʻOku pehē ʻe ha mataotao ʻe taha: “Ko e kahaʻu ʻo e meʻa ʻoku hoko moʻoní ʻoku tātātaha ke kovi ia ʻo hangē ko e kahaʻu ʻo ʻetau ngaahi manavaheé.” ʻI he fai anga-fakatōkilalo ki he faleʻi ʻa e Tohitapú ke tokangataha ki he ngaahi meʻa ʻoku fakamuʻomuʻá pea ke moʻui ʻi he ʻaho pē taha ʻi he taimi ʻe lava ke tokoni ia kia kitautolu ke kalofi ai ʻa e loto-moʻua tōtuʻá.​—1 Pita 5:​6, 7.

 9. ʻI he fehangahangai mo e faingataʻa fakapaʻangá, ko e hā ʻa e tokoni ʻoku tau maʻu nai ʻi he ʻū tohi ʻa e “tamaioeiki agatonu mo boto”?

⁹ ʻI he fehangahangai mo e faingataʻa fakaepaʻangá, ʻe lava ke tau toe fakahāhā ʻa e falala kia Sihová ʻaki ʻa e sio ki he ngaahi tohi ʻa e “tamaioeiki agatonu mo boto” ki ha tokoni. (Mātiu 24:​45, PM) Mei he taimi ki he taimi, ko e makasini Awake! ʻoku fakaeʻa ai ʻa e ngaahi kupu ʻoku ʻi ai ʻa e ngaahi faleʻi mo e ngaahi fokotuʻu ʻaonga ke feangainga ai mo e ngaahi faingataʻa fakaʻekonōmiká. Ko e kupu “Taʻemaʻu Ngāué​—Ko e Hā ʻa e Ngaahi Fakaleleiʻangá?” ʻi he ʻīsiu ʻo ʻAokosi 8, 1991, naʻe fakahaaʻi mai ai ʻa e ngaahi fakahinohino ʻaonga ʻe valu kuó ne tokoniʻi ʻa e tokolahi ke tauhi maʻu ʻa e tuʻumaʻu fakaepaʻanga mo fakaeongo ʻi he taimi ʻoku fehangahangai ai mo ha vahaʻa taimi ʻo e taʻemaʻu ngāué.c Ko e moʻoni, ko e ngaahi fakahinohino peheé kuo pau ke mafamafatatau ia mo ha vakai totonu ki he mahuʻinga moʻoni ʻo e paʻangá. Naʻe fai ʻa e lāulea ki he meʻá ni ʻi he kupu ko e “Meʻa ʻOku Mātuʻaki Mahuʻinga Ange Ia ʻi he Paʻangá,” ʻa ia naʻe hā ʻi he ʻīsiu tatau.​—Koheleti 7:​12.

Taimi Faingataʻaʻia ʻi he Ngaahi Palopalema ʻi he Moʻuí

10. ʻOku anga-fēfē hono fakahaaʻi ʻe he fakatātā kia Tuʻi Tēvitá ʻa e totonu ke falala kia Sihova ʻi he fehangahangai mo ha puke lahí?

¹⁰ ʻOku totonu ke falala kia Sihova ʻi he fehangahangai mo ha puke lahí? ʻAupito! ʻOku ongoʻi ʻe Sihova ʻa e faʻahinga ʻoku puke ʻi he haʻohaʻonga ʻo hono kakaí. ʻIkai ngata aí, ʻokú ne loto-lelei ke tokoni. Ko e fakatātaá, vakai kia Tuʻi Tēvita. Ko ia tonu naʻá ne puke lahi nai ʻi he taimi naʻá ne tohi ai fekauʻaki mo e ngaahi feangainga ʻa e ʻOtuá mo ha tokotaha puke faitotonu. Naʻá ne pehē: “Ko Sihova te ne poupou ia ʻi he tokaʻanga, heʻene ngaluvai: ʻoku ke fakalelei hono mohenga kotoa heʻene mahaki.” (Sāme 41:​1, 3, 7, 8) Ko e falala ʻa Tēvita ki he ʻOtuá naʻe mālohi ai pē, pea iku ʻo sai ʻa e tuʻí mei hono mahakí. Ko ia, ʻe lava fēfē ke tau fakahāhā ʻa e falala ki he ʻOtuá ʻi he taimi ʻoku tau faingataʻaʻia ai ʻi he ngaahi palopalema ʻi he moʻuí?

11. ʻI hono taaʻi ʻe ha mahaki, ko e hā ʻe lava ke tau kole ki heʻetau Tamai fakahēvaní?

¹¹ ʻI hono taaʻi ʻe he mahakí, ko e taha ʻo e founga ke fakahaaʻi ai ʻetau falala kia Sihová ko e kōlenga kiate ia ʻi he lotu ki ha tokoni ke kītaki. ʻE lava ke tau kole kiate ia ke ne tokoniʻi kitautolu ke tau ngāueʻaki ʻa e “poto ʻaongá” koeʻuhí ke tau kumi ai ki he tuʻunga ʻo e moʻui leleí ʻa ia ʻoku malava totonu ʻe hotau ngaahi tuʻungá. (Palovepi 3:​21, NW) ʻE toe lava ke tau kole kiate ia ke ne tokoniʻi kitautolu ke tau ngāueʻaki ʻa e kātakí mo e kītakí koeʻuhi ke tau fekuki ai mo e mahakí. Hiliō he meʻa kotoa, te tau loto ke kole ke fakaivia kitautolu ʻe Sihova, ʻo ʻomai kia kitautolu ʻa e mālohi ke hanganaki faitōnunga ai kiate ia pea ʻikai mole ʻetau mafamafatataú, neongo pe ko e hā nai ʻa e meʻa ʻe hokó. (Filipai 4:​13) Ko hono tauhi maʻu ʻetau anga-tonu ki he ʻOtuá ʻoku toe mahuʻinga ange ia ʻi hono fakatolonga ʻetau moʻui lolotongá. Kapau te tau tauhi ʻetau anga-tonú, ko e Tokotaha Fakapale Lahí te ne foaki kia kitautolu ha tuʻunga taʻengata ʻo e moʻui haohaoa mo e moʻui lelei.​—Hepelu 11:6.

12. Ko e hā ʻa e ngaahi tefitoʻi moʻoni Fakatohitapu ʻe lava ke ne tokoniʻi kitautolu ke fai ha ngaahi fili fakapotopoto ʻi he taimi ʻoku hoko mai ai ki he founga fakafaitoʻó?

¹² Ko ʻetau falala kia Sihová ʻoku toe ueʻi ai kitautolu ke kumi ki heʻene Folofolá, ʻa e Tohitapú, ki ha tataki ʻaonga. Ko e ngaahi tefitoʻi moʻoni ʻoku maʻu ʻi he ngaahi Konga Tohitapú ʻe lava ke ne tokoniʻi kitautolu ke fai ha ngaahi fili fakapotopoto ʻi he taimi ʻoku hoko mai ai ki he meʻa fakafaitoʻó. Hangē ko ení, ʻi hono ʻiloʻi ʻoku fakahalaiaʻi ʻe he Tohitapú ʻa e “fai fakahaʻele faʻahikehe,” te tau fakaʻehiʻehi ai mei ha founga sivi pe ngāue fakafaitoʻo ʻa ia ʻoku felāveʻi mo e fakahaʻele faʻahikehé. (Kaletia 5:​19-21, NW; Teutalonome 18:​10-12) Ko e fakatātā eni ʻe taha ʻo e poto alafalalaʻanga ʻi he Tohitapú: “Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.” (Palovepi 14:15) Ko ia ai, ʻi he fakakaukau ki he founga fakafaitoʻó, ʻoku fakapotopoto ke tau kumi ki ha fakamatala alafalalaʻanga kae ʻikai ko e “tui ki he lea kotoa.” Ko e “aga fakabotoboto” peheé ʻe lava ke ne tokoniʻi kitautolu ke fakakaukau lelei ki heʻetau ngaahi filí pea ke fai ha fili ʻiloʻilo pau.—Taitusi 2:​12, PM.

13, 14. (a) Ko e hā ʻa e ngaahi kupu fakatupu-ʻilo fekauʻaki mo e ngaahi meʻa ki he moʻuí kuo pulusi ʻi he ngaahi makasini Taua Leʻo mo e ʻĀ Hake!? (Sio ki he puha ʻi he peesi 17.) (e) Ko e hā ʻa e faleʻi fekauʻaki mo e feangainga mo ha ngaahi mahamahaki fuoloa naʻe ʻomai ʻi he Awake! ʻo Sanuali 22, 2001?

¹³ Te tau toe fakahāhā nai ʻetau falala kia Sihová ʻaki ʻa e fekumi ʻi he ʻū tohi ʻa e tamaioʻeiki anga-tonú. Ko e ngaahi makasini Taua Leʻo mo e ʻĀ Hake! kuo pulusi mai ai ʻi he taimi ki he taimi ʻa e ngaahi kupu fakatupu-ʻilo ʻi he ngaahi tafaʻaki lahi kehekehe fekauʻaki mo e ngaahi palopalema pau ʻo e moʻuí mo e ngaahi mahakí.d ʻI he taimi ʻe niʻihi, ko e ngaahi pepá ni kuo fakaeʻa mai ai ʻa e ngaahi kupu ʻe he faʻahinga tāutaha kuo nau fekuki lavameʻa mo e ngaahi mahaki, puke, mo e ngaahi faingataʻaʻia kehekehe. Tānaki atu ki ai, kuo ʻomai ʻi he ngaahi kupu ʻe niʻihi ʻa e ngaahi fokotuʻu Fakatohitapu pea pehē ki he faleʻi ʻaonga ki he founga ke moʻui ai fakataha mo e ngaahi tuʻunga mahamahaki fuoloa.

¹⁴ Ko e fakatātaá, ko e ʻīsiu ʻo e Awake! ʻo Sanuali 22, 2001, naʻe fakaeʻa mai ai ha ngaahi kupu hokohoko fekauʻaki mo ia ʻi he takafí “Fakafiemālie ki he Kau Puké.” Naʻe ʻomai ʻi he ngaahi kupú ʻa e ngaahi tefitoʻi moʻoni faka-Tohitapu ʻaonga pea pehē ki he fakamatala hangatonu naʻe maʻu mei he ngaahi fakaʻekeʻeke ʻo e kau ʻilo meʻa ʻa ia kuo nau moʻui mo e faingataʻaʻia fakasinó ʻi he ngaahi taʻu lahi. Ko e kupu “Moʻui Lavameʻa mo Ho Mahakí—Anga-Fēfē?” naʻe ʻomai ai ʻa e faleʻi ko ení: Ako ʻa e meʻa lahi taha ʻi hoʻo malava tahá fekauʻaki mo ho puké. (Palovepi 24:5) Fokotuʻu ha ngaahi taumuʻa ʻaonga, ʻo kau ai ʻa e ngaahi taumuʻa ke tokoniʻi ʻa e niʻihi kehé, kae ʻiloʻi ʻe ʻikai nai te ke malava ke aʻusia ʻa e ngaahi taumuʻa tatau ʻa ia ʻe lava ʻe he niʻihi kehé. (Ngāue 20:35; Kaletia 6:4) Fakaʻehiʻehi mei he fakamavahevahe fakasōsialé. (Palovepi 18:1) ʻAi ʻa e ʻaʻahi atu kia koé ko ha meʻa fakafiefia ia ʻoku hokosia ʻe he niʻihi kehé. (Palovepi 17:22) Hiliō he meʻa kotoa, tauhi ha haʻi vāofi mo Sihova pea mo e fakatahaʻangá. (Nehumi 1:7; Loma 1:​11, 12) ʻIkai ʻoku tau houngaʻia ki he tataki alafalalaʻanga ʻoku tokonaki mai ʻe Sihova fakafou ʻi heʻene kautahá?

Taimi ʻOku Saingataʻa Ai ha Vaivaiʻanga Fakaekakano

15. Naʻe malava fēfē ʻa e ʻapositolo ko Paulá ke ikuna ʻi heʻene faitau fekauʻaki mo e ngaahi vaivaiʻanga ʻo e kakano taʻehaohaoá, pea ko e hā ʻa e fakapapau ʻe lava ke tau maʻú?

¹⁵ “ʻOku ou ilo oku ikai ha mea lelei e nofoia au i hoku kakano,” ko e tohi ia ʻa e ʻapositolo ko Paulá. (Loma 7:​18, PM) Naʻe ʻiloʻi fakahangatonu ʻe Paula ko e meʻa faingataʻa moʻoni ʻe lava ke hoko ʻi he fāinga mo e ngaahi holi mo e ngaahi vaivaiʻanga ʻo e kakano taʻehaohaoá. Kae kehe, naʻe toe maʻu ʻe Paula ha falala ʻe lava ke ne ikuna. (1 Kolinito 9:​26, 27) Anga-fēfē? ʻAki ʻa e falala kakato kia Sihova. Ko e ʻuhinga ia naʻe malava ai ʻa Paula ke pehē: “ʻOiaue! siʻi toki malaʻia kita! ko hai tū te ne hamusi au mei he sino ʻoku mei ai ʻa e mate ni? Fakafetaʻi ki he ʻOtua, ʻa ia kuo ne fai ʻia Sisu Kalaisi ko hotau ʻEiki!” (Loma 7:​24, 25) Fēfē kitautolu? Mo kitautolu foki ʻoku ʻi ai ʻetau faitau mo e ngaahi vaivaiʻanga fakakakanó. ʻI heʻetau fāinga ke feangainga mo e ngaahi vaivaiʻanga peheé, ʻoku faingofua ke mole ʻa e falalá, ʻo hoko ʻo tuipau ʻe ʻikai ʻaupito te tau lavameʻa. Ka ʻe tokoniʻi kitautolu ʻe Sihova, kapau te tau hangē ko Paulá, ʻo falala moʻoni kiate Ia ʻo ʻikai ki hotau mālohi pē ʻotautolú.

16. ʻI he taimi ʻoku saingataʻa ai ha vaivaiʻanga fakaekakano, ko e hā ʻoku fiemaʻu ke tau lotu fekauʻaki mo iá, pea ko e hā ʻoku totonu ke tau faí kapau ʻoku tau toe foki ʻo vaivai?

¹⁶ ʻI he taimi ʻoku saingataʻa ai ha vaivaiʻanga fakaekakano, ʻe lava ke tau fakahāhā ʻoku tau falala kia Sihova ʻaki ʻa e kole fakamātoato kiate ia ʻi he lotu. ʻOku fiemaʻu ke tau kole, naʻa mo e fakatangi kia Sihova ki he tokoni ʻa hono laumālie māʻoniʻoní. (Luke 11:​9-13) ʻE lava ke tau kole tautefito ki he māpuleʻi-kitá, ʻa ia ko e konga ia ʻo e fua ʻo e laumālie ʻo e ʻOtuá. (Kaletia 5:​22, 23) Ko e hā ʻoku totonu ke tau faí kapau ʻoku tau toe foki ʻo vaivai? Ko e moʻoni, ʻoku totonu ke ʻoua te tau foʻi. ʻOua ʻaupito te tau fiu ʻi he lotu anga-fakatōkilalo ki hotau ʻOtua mohu mēsí, ʻo kole ʻene fakamolemolé mo ʻene tokoní. ʻE ʻikai ʻaupito talitekeʻi, pe tafoki ʻa Sihova mei ha loto ʻoku “lavea mo mafesifesi” ʻi he māfasia ʻo ha konisēnisi halaia. (Sāme 51:17) Kapau te tau kōlenga kiate ia ʻi ha loto ʻoku totonu mo fakatomala, ʻe hanga ʻe Sihova ʻo tokoniʻi kitautolu ke tauʻi ʻa e ngaahi ʻahiʻahí.​—Filipai 4:​6, 7.

17. (a) Ko e hā ʻoku tokoni lahi ai ke fakakaukau ki he anga ʻo e ongoʻi ʻa Sihova fekauʻaki mo ha vaivaiʻanga tefito ʻoku tau faitau nai mo ia? (e) Ko e hā ʻa e ngaahi konga Tohitapu ʻe lava ke tau fakamanatu kapau ʻoku tau faitau ke māpuleʻi ha ʻita vave? ke leʻohi hotau ʻeleló? ke talitekeʻi ha hehema fekauʻaki mo e fakafiefia ʻoku ʻikai leleí?

¹⁷ ʻE toe lava foki ke tau fakahāhā ʻoku tau falala kia Sihova ʻaki ʻetau kumi ki heʻene Folofolá ki ha tokoni. ʻI hono ngāueʻaki ha konikōtieni faka-Tohitapu pe ko e Watch Tower Publications Index, ʻe lava ke tau kumi ai ki he tali ʻo e fehuʻi, ‘ʻOku anga-fēfē ongoʻi ʻa Sihova fekauʻaki mo ha vaivaiʻanga tefito ʻoku ou faitau mo ia?’ ʻI he fakakaukau ki he anga ʻo e ongoʻi ʻa Sihova fekauʻaki mo e meʻa ko iá ʻe lava ke fakaivia ai ʻetau holi ke fakahōifua kiate iá. Ko ia ai, ʻe lava ke tau ongoʻi ʻo hangē ko ʻene ongoʻí, ʻo fehiʻa ki he meʻa ʻokú ne fehiʻa ki aí. (Sāme 97:10) Kuo ʻilo ʻe he niʻihi ʻoku tokoni lahi hono fakamanatu ha ngaahi konga Tohitapu ʻoku ngāueʻaki ki ha vaivaiʻanga tefito ʻoku nau faitau mo ia. ʻOku tau fāinga ke māpuleʻi ha ʻita vave? Tā ʻoku lelei ke tau fakamanatu ʻa e ngaahi konga tohi hangē ko e Palovepi 14:17 mo e Efeso 4:31. ʻOku tau ʻilo ʻoku faingataʻa ke leʻohi hotau ʻeleló? ʻE lava ke tau fakamanatu ʻa e ngaahi konga tohi hangē ko e Palovepi 12:18 mo e Efeso 4:29. ʻOku tau hehema fekauʻaki mo e fakafiefia ʻoku ʻikai leleí? ʻE lava ke tau feinga ke manatuʻi ʻa e ngaahi veesi hangē ko e Efeso 5:1 (Efeso 5:​3, PM) mo e Kolose 3:5.

18. Ko e hā ʻoku totonu ai ke ʻoua te tau fakaʻatā ʻetau maá ke ne taʻofi kitautolu mei he kole ki he kau mātuʻá ki ha tokoni ke ikuʻi hotau vaivaiʻangá?

¹⁸ Ko e kumi ki he tokoni mei he kau mātuʻa kuo fakanofo ʻe he laumālié ʻi he fakatahaʻangá ko ha toe founga ia ʻe taha ke fakahāhā ai ʻetau falala kia Sihová. (Ngāue 20:28) He ko e moʻoni, ko e ‘foaki meʻaʻofa ʻi he kau tangata’ ko ení ko ha tokonaki ia meia Sihova fakafou ʻia Kalaisi ke maluʻi mo tokangaʻi ʻene fanga sipí. (Efeso 4:​7, 8, 11-14) ʻI heʻene peheé, ʻe ʻikai nai faingofua ke kole ki ha tokoni ʻi he feangainga mo ha vaivaiʻanga. Te tau mā nai, ʻo manavasiʻi heʻikai loko saiʻia mai ʻa e kau mātuʻá ia ʻia kitautolu. Ka ʻoku ʻikai ha veiveiua ko e kau tangata matuʻotuʻa fakalaumālie ko ení te nau tokaʻi kitautolu ʻi heʻetau maʻu ʻa e loto-toʻa ke kole tokoní. ʻIkai ko ia pē, ko e kau mātuʻá ʻoku nau feinga mālohi ke tapua atu ʻa e ngaahi ʻulungaanga tonu ʻo Sihová ʻi heʻenau feangaianga mo e tākangá. Ko ʻenau akonaki fakafiemālie mo ʻaongá, mo e fakahinohino mei he Folofola ʻa e ʻOtuá ko e meʻa pē nai ia ʻoku tau fiemaʻu ke fakaivia feʻunga ʻetau fakapapau ko ia ke ikuʻi hotau vaivaiʻangá.​—Semisi 5:​14-16.

19. (a) ʻI he founga fē ʻoku kumi ai ʻa Sētane ke ngāueʻaki ʻa e muna ʻo e moʻui ʻi he fokotuʻutuʻu ko ení? (e) Ko e hā ʻoku felāveʻi mo e falalá, pea ko e hā ʻoku totonu ko ʻetau fakapapau mālohí ia?

¹⁹ ʻOua naʻa ngalo ʻoku ʻiloʻi ʻe Sētane ʻoku toe siʻi hono taimí. (Fakahā 12:12) ʻOkú ne loto ke ngāueʻaki ʻa e muna ʻo e moʻui ʻi he māmani ko ení ke ne fakalotosiʻi kitautolu mo ʻai kitautolu ke tau foʻi. ʻOfa ke tau maʻu ha falala kakato ki he meʻa ʻoku fakahaaʻi mai ʻi he Loma 8:​35-39: “Ko hai tū ha taha te ne motuhi kitautolu mei he ʻofa ʻa Kalaisi? ʻa mamahi? ʻa faingataʻa? ʻa fakatanga? ʻa honge? ʻa takape? ʻa tuʻutamaki? ʻa heleta? . . . ʻIkai; ka ʻi he ngaahi meʻa ni kotoa pe ʻoku tau ikuna noa pe ʻiate ia ne ne ʻofaʻi kitautolu. Seuke, ʻoku te tui, ʻe ʻikai lava ʻe he mate, pe ko e moʻui, pe ko ha kau angelo, pe ko ha kau pule, pe ko ha ngaahi meʻa ʻoku lolotonga ni, pe ko ha ngaahi meʻa ka hoko mai, pe ko ha ngaahi malohi, pe ko ha maʻolunga, pe ko ha loloto pe ko ha meʻa ʻe taha ʻi Natula, ʻe ʻikai te ne lava ke motuhi kitautolu mei he ʻofa ʻa e ʻOtua, ʻa ia ʻoku ʻia Kalaisi Sisu ko hotau ʻEiki.” He fakamatala lelei moʻoni ē ʻo e falala kia Sihová! Kae kehe, ko e falala peheé, ʻoku hulu atu ia ʻi ha ongoʻi pē. ʻI hono kehé, ko e falala ia ʻoku felāveʻi mo e ngaahi fili kuo fakaʻuhingaʻi lelei ʻoku tau fai ʻi heʻetau moʻui fakaʻahó. Ko ia ai, tau fai ha fakapapau mālohi ke falala kakato kia Sihova ʻi he ngaahi taimi ʻo e faingataʻá.

[Fakamatala ʻi lalo]

ʻOkú Ke Manatuʻi

• ʻI he fehangahangai mo e ngaahi palopalema fakaʻekonōmiká, ʻi he ngaahi founga fē ʻe lava ke tau fakahāhā ai ʻoku tau falala kia Sihova?

• ʻE lava fēfē ke tau fakahāhā ha falala ki he ʻOtuá ʻi he taimi ʻoku tau faingataʻaʻia ai ʻi ha ngaahi palopalema ʻo e moʻuí?

• ʻI he taimi ʻoku saingataʻa ai ha vaivaiʻanga fakaekakano, ʻe lava fēfē ke tau fakahāhā ʻoku tau falala moʻoni kia Sihova?

[Puha ʻi he peesi 17]

ʻOkú Ke Manatuʻi ʻa e Ngaahi Kupu ko Ení?

ʻI he taimi ʻoku tau faingataʻaʻia ai ʻi he ngaahi pole ki heʻetau moʻuí, ʻoku fakalototoʻa ke lau fekauʻaki mo e niʻihi ko ia kuo nau fekuki lavameʻa mo e ngaahi mahaki, puke, pe faingataʻaʻia fakaesinó. ʻOku hoko hake heni ʻa e ngaahi kupu ʻe niʻihi ʻa ia kuo pulusi ʻi he ngaahi makasini Taua Leʻo mo e ʻĀ Hake!

“Fekuki mo Hoku Ngaahi Vaivaiʻangá” ʻoku fakatefito ia ʻi he feangainga mo e fakakaukau taʻepaú mo e loto-mafasiá.​—The Watchtower, Mē 1, 1990.

“Naʻa mo ha Maʻamaʻa Ukamea Naʻe ʻIkai Lava Ke Ne Taʻofi ʻEne Malangá.”​—Awake!, Sanuali 22, 1993.

“Ko ha Foʻi Mahafu Naʻá Ne Liliuʻi ʻEku Moʻuí” ʻoku fakatefito ia ʻi he feangainga mo e mamateá.​—Awake!, ʻOkatopa 22, 1995.

“ʻOku ʻIkai Te Ke ʻIloʻi Pe ʻE Fēfē ʻa Hoʻo Moʻuí ʻApongipongi” ʻoku lāulea ai ki he fekuki mo e mahaki ʻāvanga femaleleaki.​—Ko e Taua Leʻo, Tīsema 1, 2000.

“Fononga ʻa Loida mei he Fakalongolongó” ʻoku fakatefito ia ʻi he feangainga mo e mahakiʻia ʻo e ʻutó.​—Awake!, Mē 8, 2000.

“Ko ʻEku Fāinga mo e Endometriosis.”​—Awake!, Siulai 22, 2000.

“Ko ʻEku Faitau mo e Scleroderma.”​—Awake!, ʻAokosi 8, 2001.

“Naʻá Ku Ikunaʻi ʻEku Faitau mo e Loto-Mafasia Hili ʻa e Fāʻelé.”​—ʻĀ Hake!, ʻOkatopa-Tīsema 2002.

[Fakatātā ʻi he peesi 15]

ʻI he fehangahangai mo e mole ʻo ha ngāué, ʻe fakapotopoto nai ke toe sivisiviʻi ʻetau sīpinga moʻuí

[Fakatātā ʻi he peesi 16]

ʻOku fakahā ʻe he talanoa ʻa Loida ʻa e anga ʻo e tokoniʻi ha taha ʻe he falala kia Sihová ke kītakí. (Sio ki he puha ʻi he peesi 17)

[Fakatātā ʻi he peesi 18]

ʻOku fiemaʻu ke ʻoua te tau mā ʻi he kole ki ha tokoni ke ikuʻi hotau ngaahi vaivaiʻangá