Founga Pule Fakateokalati ʻi he Kuonga ʻo e Kalisitiané

“Fakatatau ai pe ki he meʻa naʻe ha lelei kiate ia . . . ke falute ʻa e meʻa kotoa pe ʻia Kalaisi, ʻa e ngaahi meʻa ʻoku ʻi langi, mo e ngaahi meʻa ʻoku ʻi mamani.”​—EFESO 1:​9, 10.

 1, 2. (a) Naʻe anga-fēfē ʻa e hoko atu ʻa hono fakatahatahaʻi “ʻa e ngaahi meʻa ʻoku ʻi langi,” ʻo kamata ʻi he 33 T.S.? (e) Kuo anga-fēfē ʻa hono fakahāhā ʻe he kau Kalisitiane paní ʻa e laumālie ʻo Mōsese mo ʻIlaisiaá talu mei he 1914?

KO E fakatahatahaʻi ko ʻeni ʻo e “ngaahi meʻa ʻoku ʻi langi” naʻe kamata ia ʻi he 33 T.S., ʻi he taimi naʻe fanauʻi mai ai ʻa e “Isileli faka-ʻOtua.” (Kaletia 6:16; Aisea 43:10; 1 Pita 2:​9, 10) ʻI he hili ʻa e ʻuluaki senituli T.S., naʻe hōloa ai ʻa e fakatahatahaʻí ʻi he hoko ʻa e kau Kalisitiane moʻoní (naʻe ui ʻe Sīsū ko e “uite”) ʻo kāsia ʻe he tafoki mei he moʻoní ko e “ngaahi tea” naʻe tūtuuʻi ʻe Sētané. Ka ʻi he tuʻunuku ʻa e “taimi fakamui,” naʻe toe hā mai ai ki he vakai ʻa e faʻahinga ʻo e tangatá ʻa e ʻIsileli faka-ʻOtua moʻoní pea ʻi he 1919 naʻe fakanofo ai ke pule ki he kotoa ʻo e ngaahi meʻa ʻa Sīsuú.a​—Mātiu 13:​24-30, 36-43; 24:​45-47; Taniela 12:4.

² ʻI he lolotonga ʻa e ʻuluaki tau ʻa e māmaní, naʻe fakahoko ai ʻe he kau Kalisitiane paní ʻa e ngaahi ngāue mālohi, ʻo hangē pē ko ia naʻe fai ʻe Mōsese mo ʻIlaisiaá.b (Fakahā 11:​5, 6) Talu mei he 1919 mo ʻenau malangaʻi ʻa e ongoongo leleí ʻi ha māmani fakafili, ʻo fai ia ʻaki ʻa e loto-toʻa ʻa ʻIlaisiaá. (Mātiu 24:​9-14) Pea talu mei he 1922 mo ʻenau fanongonongo ʻa e ngaahi fakamaau ʻa Sihova ki he faʻahinga ʻo e tangatá, ʻo hangē tofu pē ko hono tuku atu ʻe Mōsese ʻa e ngaahi mala ʻa e ʻOtuá ki ʻIsipite ʻo e kuonga muʻá. (Fakahā 15:​1; 16:​2-17) Ko e toenga ʻo e kau Kalisitiane pani ko ʻení ko e uho ia he ʻahó ni ʻo e sōsaieti maama foʻou ʻo e Kau Fakamoʻoni ʻa Sihová.

Ngāue ʻa ha Kulupu Pule

 3. Ko e hā ʻa e ngaahi meʻa ʻoku nau fakahaaʻi naʻe fokotuʻutuʻu maau lelei ʻa e muʻaki fakatahaʻanga Kalisitiané?

³ Mei he kamataʻangá, naʻe fokotuʻutuʻu maau ʻa e kau muimui pani ʻo Sīsuú. ʻI he fakaʻaʻau ke tokolahi ʻa e kau ākongá, naʻe fokotuʻu ʻa e ngaahi fakatahaʻanga fakalotofonua pea fakanofo ki ai ʻa e kau mātuʻa. (Taitusi 1:5) ʻI he hili ʻa e 33 T.S., naʻe ngāue ʻa e kau ʻaposetolo ʻe toko 12 ko ha kulupu pule maʻu mafai tefito. ʻI heʻene peheé, naʻa nau takimuʻa taʻemanavahē ʻi he ngāue fakamoʻoní. (Ngāue 4:​33, 35, 37; 5:​18, 29) Naʻa nau fokotuʻutuʻu maau ʻa hono tufotufa ʻa e meʻakaí ki he kau masivá, pea naʻa nau fekau atu ʻa Pita mo Sione ki Samēlia ke na ngāue ki he mahuʻingaʻia ʻi he ngaahi līpooti mei aí. (Ngāue 6:​1-6; 8:​6-8, 14-17) Naʻe ʻave ʻe Pānepasa ʻa Paula kiate kinautolu ke fakapapauʻi ko e tokotaha fakatanga ʻeni ki muʻá kuó ne hoko ko ha tokotaha muimui ʻo Sīsū. (Ngāue 9:27; Kaletia 1:​18, 19) Pea ʻi he hili ʻa e malanga ʻa Pita kia Koliniusi mo hono falé, naʻá ne foki ki Selusalema ʻo fakamatala ki he kau ʻaposetoló mo e ngaahi tokoua Siutea kehé ʻa e anga hono fakahaaʻi ʻe he laumālie māʻoniʻoní ʻa e finangalo ʻo e ʻOtuá ʻi he meʻá ni.​—Ngāue 11:​1-18.

 4. Ko e hā ʻa e feinga naʻe fai ke tāmateʻi ʻa Pitá, ka naʻe anga-fēfē ʻa hono fakahaofi ʻa ʻene moʻuí?

⁴ Naʻe hoko leva ʻo ʻohofi anga-fakamanu ʻa e kulupu pulé. Naʻe tuku pilīsone ʻa Pita, pea naʻe toki fakahaofi pē ʻa ʻene moʻuí ʻi he ngāue mai ʻa ha ʻāngelo. (Ngāue 12:​3-11) Ko e ʻuluaki taimi leva ʻeni, ke hā ha taha tuku kehe ʻa e kau ʻaposetolo ʻe toko 12 ʻi ha tuʻunga māʻolunga ʻi Selusalema. ʻI hono tukuange mai ʻo Pita mei he pilīsoné, naʻá ne tala ange ki ha kulupu naʻe fakatahataha ʻi he fale ʻo e faʻē ʻa Sione Maʻaké: “Mou tala ʻa e meʻa kia Semisi [ko e tokoua faʻē taha ʻo Sīsuú] mo e kainga.”​—Ngāue 12:17.

 5. Naʻe anga-fēfē ʻa e liliu ʻa e faʻunga ʻo e kulupu pulé ʻi he hili ʻa e mate fakamāʻata ʻa Sēmisí?

⁵ ʻI muʻá, hili ʻa e taonakita ʻa Siutasi ʻIsikaliote, ko e ʻaposetolo anga-lavakí, naʻe fai leva ʻa e tokanga ki ha fiemaʻu ke ʻoange “ʻene lakanga leʻo” ʻi he tuʻunga ko ha ʻaposetoló ki ha taha naʻe ʻosi feohi mo Sīsū he lolotonga ʻo ʻene ngāue fakafaifekaú peá ne sio tonu ʻi heʻene pekiá mo ʻene toetuʻú. Kae kehe, ʻi hono tāmateʻi ʻo Sēmisi, ko e tokoua ʻo Sioné, naʻe ʻikai ha taha ke ne fetongi ia ʻi he hoko ko ha taha ʻo e toko 12. (Ngāue 1:​20-26; 12:​1, 2) Neongo ia, ko e lave Fakatohitapu hono hoko ki he kulupu pulé ʻoku hā mai ai naʻe ʻosi fakalahi ia. ʻI he taimi naʻe malanga hake ai ha fakakikihi pe ʻoku totonu ki he kau Senitaile naʻe muimui ʻia Sīsuú ke nau moʻulaloa ki he Lao ʻa Mōsesé, naʻe ʻoatu ʻa e meʻa ke fai ki ai ʻa e filí ki he “kau abosetolo moe mātua i Jelusalema.” (Ngāue 15:​2, 6, 20, 22, 23; 16:4, PM) Ko e hā naʻe kau ai ʻi he kulupu pulé ʻi he taimi ko iá ʻa e “mātua” ʻo hangē ko ia naʻe hā mahino mai? ʻOku ʻikai fakahā ia ʻe he Tohitapú, ka naʻe ʻi ai hano ʻaonga hā mahino. Ko e mate ʻa Sēmisí pea mo hono tuku pilīsone ʻo Pitá naʻe hā mei ai ʻe ʻi ai nai ha ʻaho ʻe tuku pilīsone pe tāmateʻi ai ʻa e kau ʻaposetoló. ʻI he tuʻunga taʻeʻiloa peheé, ko e ʻi ai ʻa e kau mātuʻa taau kehé, ʻo taukei ʻi he ngaahi founga ngāue ʻa e kulupu pulé, ʻe fakapapauʻi ai ʻe kei hokohoko maau atu ʻa e tuʻunga tauhí.

 6. Naʻe anga-fēfē ʻa e hokohoko atu ʻa e ngāue ʻa e kulupu pulé ʻi Selusalemá, naʻa mo e taimi naʻe ʻikai ke kei ʻi he kolo ai ko iá ʻa hono muʻaki kau mēmipá?

⁶ ʻI he taimi naʻe haʻu ai ʻa Paula ki Selusalema ʻi he taʻu 56 T.S. nai, naʻá ne fai ha fakamatala kia Sēmisi, pea ʻoku pehē ʻe he Tohitapú, pea “nae katoa ae kau mātua kotoabe” ai. (Ngāue 21:​18, PM) Ko e hā naʻe ʻikai ke fai ai ha lave ki he kau ʻaposetoló ʻi he fakatahá ni? ʻOku ʻikai ha toe lau ki ai ʻa e Tohitapú. Ka naʻe fakamatala ki mui ʻa e faihisitōlia ko Eusebius ʻo pehē ʻi ha taimi ki muʻa ʻi he 66 T.S., “ko e toenga ʻo e kau ʻaposetoló, ne nau mavahe mei Siutea tupu mei he fakatuʻutāmaki hokohoko mei he ngaahi faʻufaʻu fakapoó. Ka ke akoʻi ʻenau pōpoakí, naʻa nau fononga ki he fonua kotoa pē ʻi he mālohi ʻo Kalaisí.” (Eusebius, Book III, V, v. 2) ʻOku moʻoni, ko e ngaahi lea ʻa Eusebius ʻoku ʻikai ko ha konga ia ʻo e lēkooti fakamānavaʻí, ka ʻoku nau fetāiaki mo e meʻa ʻoku leaʻaki ʻe he lēkooti ko iá. Ko e fakatātaá, ʻi he 62 T.S., naʻe ʻi Pāpilone ai ʻa Pita​—mamaʻo mei Selusalema. (1 Pita 5:13) Kae kehe, ʻi he 56 T.S., pea ʻoku ngalingali naʻe aʻu mai ki he 66 T.S., naʻe hā mahino ai ʻa e ngāue longomoʻui ʻa ha kulupu pule ʻi Selusalema.

Founga Pule ʻi he Ngaahi Taimi ʻi Onopooní

 7. ʻI hono fakahoa atu ki he kulupu pule ʻo e ʻuluaki senitulí, ko e hā ʻa e faikehekehe tuʻu-ki-muʻa ʻoku ʻi ai ʻi he faʻunga ʻo e Kulupu Pule ʻo e ʻaho ní?

⁷ Mei he 33 T.S., ʻo aʻu mai ki he fakamamahi ʻi Selusalemá, ʻoku hā mahino naʻe fokotuʻu ʻa e kulupu pulé ʻaki ʻa e kau Kalisitiane Siu. ʻI he lolotonga ʻo ʻene ʻaʻahi ʻi he 56 T.S., naʻe ʻilo ai ʻe Paula ko e tokolahi ʻo e kau Kalisitiane Siu ʻi Selusalemá, neongo ʻa e “fai ʻaki ʻa e tui hotau ʻEiki ko Sisu Kalaisi,” naʻe kei “mamahiʻi kotoa pē tokua ʻa e Lao [ʻa Mōsesé].”c (Semisi 2:1; Ngāue 21:​20-25) Mahalo naʻe faingataʻa ki he kau Siu ko iá ke fakakaukau atu ki ha Senitaile ke ʻi he kulupu pulé. Ka neongo ia, ʻi he taimi ʻi onopooní, kuo hoko ha toe liliu ʻe taha ʻi he faʻunga ʻo e kulupu ko ʻení. ʻI he ʻahó ni, ʻoku fokotuʻu fakakātoa ia ʻaki ʻa e kau Kalisitiane Senitaile pani, pea kuo tāpuakiʻi lahi ʻe Sihova ʻenau ngāue tauhí.​—Efeso 2:​11-15.

 8, 9. Ko e hā ʻa e ngaahi laka ki muʻa kuo hoko ʻi he Kulupu Pule ʻi he taimi ʻi onopooní?

⁸ Mei he kamataʻanga ʻo e kautaha ʻo e Watch Tower Bible and Tract Society of Pennsylvania ʻi he 1884 ʻo aʻu mai ki he 1972, naʻe maʻu ai ʻe he palesiteni ʻo e Sōsaietí ʻa e mafai lahi ʻi he kautaha ʻa Sihová, lolotonga iá ko e Kulupu Pulé naʻe fekauʻaki vāofi mo e poate ʻo e kau talēkita ʻa e Sōsaietí. Ko e ngaahi tāpuaki naʻe fiefia ai he lolotonga ʻo e ngaahi taʻu ko iá ʻoku fakamoʻoniʻi ai naʻe tali ʻe Sihova ʻa e fokotuʻutuʻu ko iá. ʻI he vahaʻa ʻo e 1972 mo e 1975, naʻe fakalahi ai ʻa e Kulupu Pulé ki he kau mēmipa ʻe toko 18. Naʻe ngaʻunu ofi ʻa e ngaahi meʻá ki he fokotuʻutuʻu ʻi he ʻuluaki senitulí ʻi he lahi ange ʻa e mafai naʻe ʻoange ki he kulupu fakalahi ko ʻení, ko e niʻihi ʻo kinautolu ko e kau talēkita ʻo e Watch Tower Bible and Tract Society of Pennsylvania.

⁹ Talu mei he 1975 mo e ʻosi atu ʻa e niʻihi ʻo e toko 18 ni mei honau ʻalunga ʻi he māmaní. Kuo nau ikuna ʻa e māmaní pea kuo nau ‘nofo hifo mo Sīsū ʻi hono taloni fakahēvaní.’ (Fakahā 3:21) ʻI he ʻuhinga ko ʻení mo e ngaahi ʻuhinga kehe, kuo maʻu ʻe he Kulupu Pulé ʻa e kau mēmipa ʻe toko hongofulu he taimí ni, ʻo kau ai ʻa e tokotaha naʻe tānaki atu ki ai ʻi he 1994. Ko e tokolahi taha ʻo kinautolú ʻoku nau taʻumotuʻa ʻaupito. Kae kehe, ʻoku ʻoange ʻa e tokoni lelei ki he ngaahi tokoua pani ko ʻení ʻi heʻenau fakahoko honau ngaahi ngafa mafatukitukí. ʻOku maʻu ʻi fē ʻa e tokoni ko iá? Ko ha kiʻi fakasio ki he ngaahi laka ki muʻa ʻi onopooni ʻi he lotolotonga ʻo e kakai ʻa e ʻOtuá ʻokú ne tali ʻa e fehuʻi ko iá.

Poupou ki he ʻIsileli Faka-ʻOtuá

10. Ko hai kuo kau atu ki he kau paní ʻi he ngāue ʻa Sihová ʻi he ngaahi ʻaho fakaʻosí ni, pea naʻe anga-fēfē hono kikiteʻi ʻa e meʻá ni?

¹⁰ ʻI he 1884 naʻe meimei ko e kotoa ʻo e faʻahinga naʻe fekauʻaki mo e ʻIsileli faka-ʻOtuá ko e kau Kalisitiane pani. Kae kehe, naʻe faai mai pea kamata ke hā hake ha kulupu ʻe taha, pea ʻi he 1935 naʻe fakapapauʻi ai ko e kulupú ni ko e “fuʻu kakai lahi” ia ʻo e Fakahā vahe 7. ʻI hono maʻu ʻa e ʻamanaki ki he māmaní, ʻoku fakafofongaʻi ʻe he faʻahingá ni ʻa e “ngaahi meʻa ʻoku ʻi mamani” ʻa ia ʻoku fakataumuʻa ʻe Sihova ke fakatahatahaʻi fakataha ʻia Kalaisí. (Efeso 1:10) ʻOku nau fakafofongaʻi ʻa e “fanga sipi kehe” ʻo e talanoa fakatātā ʻa Sīsū ki he ongo lotoʻā sipí. (Sione 10:16) Talu mei he 1935, mo e ʻaukolo mai ʻa e fanga sipi kehé ki he kautaha ʻa Sihová. Kuo nau “puna hange ko e ʻao, pe hange ko e fanga lupe ki honau ngaahi tupa.” (Aisea 60:8) Koeʻuhi ko e tupulaki ʻi he fuʻu kakai lahí pea mo e faai hifo ʻi he kalasi paní ʻi he ʻosi atu ʻa e tokolahi mei honau ʻalunga ʻi he māmaní ʻi he maté, kuo hoko ai ʻa e fanga sipi kehe ʻoku tāú ʻo ngāue ʻi he ngafa ʻoku tupulekina ʻi he ngaahi ngāue faka-Kalisitiané. ʻI he ngaahi founga fē?

11. Ko e hā ʻa e ngaahi monū, naʻe ʻuluaki fakangatangata pē ia ki he kau Kalisitiane paní, kuo ʻoange ki he fanga sipi kehé?

¹¹ Ko hono fanongonongo atu ʻa e ngaahi lelei ʻo Sihová kuo hoko maʻu pē ia ko e ngafa makehe ʻo e “kakai tapu” ʻa e ʻOtuá. Naʻe lave ki ai ʻa Paula ʻo pehē ko ha feilaulau ʻi he temipalé, pea ki he faʻahinga te nau hoko “ko e tuʻunga taulaʻeiki fakatuʻi,” naʻe ʻoange ki ai ʻe Sīsū ʻa e fekau ke malanga mo faiako. (Ekisoto 19:​5, 6; 1 Pita 2:​4, 9; Mātiu 24:14; 28:​19, 20; Hepelu 13:​15, 16) Kae kehe, ʻi he tatau ʻo e The Watchtower ʻo ʻAokosi 1, 1932, naʻe fakalototoʻaʻi makehe ai ʻa e faʻahinga naʻe tomuʻa fakatātaaʻi ʻe Sionatapí ke nau kau ki he ngāué ni. Ko hono moʻoní, naʻe ʻosi fai ia ʻe he tokolahi ʻo e fanga sipi kehe ko iá. ʻI he ʻahó ni, ʻoku meimei ko e kotoa ʻo e ngāue fakamalangá ʻoku fai ia ʻe he fanga sipi kehé ʻi he tuʻunga ko ha konga tuʻu-ki-muʻa ia ʻo ʻenau “tauhi [ki he ʻOtuá] ʻi hono temipale ʻi he ʻaho mo e po.” (Fakahā 7:15) ʻI he founga meimei tatau, ʻi he muʻaki konga ʻo e hisitōlia ʻi onopooni ʻo e kakai ʻa Sihová, ko e kau mātuʻa ʻi he fakatahaʻangá ko e kau Kalisitiane pani, ko e ngaahi “fetuʻu” ʻi he nima toʻomataʻu ʻo Sīsū Kalaisí. (Fakahā 1:​16, 20) Ka ʻi he tatau ʻo e The Watchtower ʻo Mē 1, 1937, naʻe fanongonongo ai ko e fanga sipi kehe ʻoku tāú ʻe lava ke nau hoko ko e kau sevāniti kautaha (kau ʻovasia tauhi). Neongo kapau naʻe ala maʻu ha kau tangata pani, naʻe malava ke ngāueʻaki ʻa e fanga sipi kehé ʻo kapau naʻe ʻikai malava ʻe he kau tangata paní ke fua ʻa e fatongia ko ʻení. ʻI he ʻahó ni, ʻoku meimei ko e kotoa ʻo e kau mātuʻa ʻi he fakatahaʻangá ʻoku mei he fanga sipi kehé.

12. Ko e hā ʻa e ngaahi meʻa ki muʻa Fakatohitapu ʻoku ʻi ai ki hono maʻu ʻe he fanga sipi kehe tāú ʻa e ngaahi fatongia fakaekautaha mafatukitukí?

¹² ʻOku hala ke ʻoange ha ngaahi fatongia mafatukituki pehē ki he fanga sipi kehé? ʻIkai, ko e muimui pē ki he meʻa naʻe hoko fakahisitōlia ki muʻá. Ko e niʻihi ʻo e kau ului mulí (kau nofo fonua muli) naʻa nau maʻu ha ngaahi tuʻunga māʻolunga ʻi ʻIsileli ʻo e kuonga muʻá. (2 Samiuela 23:​37, 39; Selemaia 38:​7-9) ʻI he hili ʻa e fakaheeʻi ki Pāpiloné, naʻe ʻoange ki he kau Netinimi naʻe tāú (kau sevāniti temipale ʻikai ko e ʻIsileli) ha ngaahi monū ʻo e ngāue ʻi he temipalé ʻa ia naʻe kaunga ia ki muʻa ki he kau Līvaí pē. (Esela 8:​15-20; Nehemaia 7:60) Tānaki atu ki ai, ko Mōsese, ʻa ia naʻe hā ʻi he vīsone ʻo e fakakehé fakataha mo Sīsuú, naʻá ne tali ʻa e akonaki lelei naʻe ʻoange ʻe he tokotaha Mitiani ko Setelō. Ki mui ai, naʻá ne kole ki he foha ʻo Setelō ho Hōpapí ke ne tataki kinautolu ʻi he toafá.​—Ekisoto 18:​5, 17-24; Nomipa 10:29.

13. ʻI he anga-fakatōkilalo ʻo ʻoatu ʻa e fatongiá ki he fanga sipi kehe ʻoku tāú, ko e laumālie lelei ʻo hai kuo faʻifaʻitaki ki ai ʻa e kau paní?

¹³ ʻI he ofi ki he ngataʻanga ʻo e taʻu ʻe 40 ʻi he toafá, ko Mōsese, ʻi heʻene ʻilo heʻikai te ne hū ki he Fonua ʻo e Talaʻofá, naʻá ne lotu kia Sihova ke ʻomai ha fetongi. (Nomipa 27:​15-17) Naʻe folofola ʻa Sihova kiate ia ke fekau mai ʻa Siosiua ki he ʻao ʻo e kakaí kotoa, pea naʻe fai ia ʻe Mōsese, neongo naʻá ne kei mālohi fakaesino pea naʻe ʻikai te ne tuku ʻi he taimi pē ko iá ʻene tauhi ʻa ʻIsilelí. (Teutalonome 3:28; 34:​5-7, 9) ʻI ha laumālie anga-fakatōkilalo meimei tatau, kuo fakalahi atu ai ʻe he kau paní ʻa e ngaahi monū tupulekina ki he kau tangata taau mei he lotolotonga ʻo e fanga sipi kehé.

14. Ko e hā ʻa e ngaahi kikite ʻoku tuhu ki he ngafa fakaekautaha tupulekina ʻo e fanga sipi kehé?

¹⁴ Ko e ngafa fakaekautaha tupulekina ʻo e fanga sipi kehé ʻoku toe fekauʻaki ia mo e kikité. Naʻe tala ki muʻa ʻe Sākalaia ʻe ʻi ai ʻa e kau Filisitia ʻikai ko ha ʻIsileli ʻe “hange ha hingoa ʻeiki ʻi Siuta.” (Sakalaia 9:​6, 7) Ko e kau ʻeikí ko e kau houʻeiki fakaematakali, ko ia ai, naʻe pehē ʻe Sākalaia ko e fili ki muʻa ʻo ʻIsilelí te ne ohi ʻa e lotu moʻoní pea te ne hoko ʻo hangē ha houʻeiki fakaematakali ʻi he Fonua ʻo e Talaʻofá. ʻIkai ko ia pē, ʻi he lave ki he ʻIsileli faka-ʻOtuá, naʻe pehē ʻe Sihova: “ʻE tuʻu ʻa e kau muli ʻo fafanga hoʻomou ngaahi takanga, pea ko e hakoʻi kehe ʻe fakaʻuli hoʻomou palau, mo tauhi hoʻomou ngaahi ngoue vaine. Ka ʻe ui kimoutolu ko e kau taulaʻeiki ʻa Sihova: ʻe lau kimoutolu ko e kau tauhi ʻo hotau ʻOtua.” (Aisea 61:​5, 6) Ko e “kau muli” mo e “hakoʻi kehe” ko e fanga sipi kehé ia. Kuo ʻoange ki he faʻahingá ni ʻa e ngaahi fatongia koeʻuhi ke nau fua ʻa e ngaahi ngāue lahi ange ʻi he ʻosi atu ʻa e ʻalunga ʻi māmani ʻo e toenga ʻo e kau pani taʻumotuʻá ka nau ō ke ngāue ʻi he ʻuhinga kakato ko e “kau taulaʻeiki ʻa Sihova” ʻi hēvani, ʻo takatakai ʻi he temipale lāngilangi ʻo Sihová ʻi he tuʻunga ko e “kau tauhi ʻo hotau ʻOtua.”​—1 Kolinito 15:​50-57; Fakahā 4:​4, 9-11; 5:​9, 10.

Ko e “Toʻutangata . . . ʻOku Laka Mai”

15. ʻI he taimi ko ʻeni ʻo e ngataʻangá, ko fē ʻa e kulupu ʻo e kau Kalisitiané kuo nau aʻu ki he “taʻu motuʻa,” pea ko e fē ʻa e kulupu ʻoku fakafofongaʻi ʻe he “toʻutangata . . . ʻoku laka mai”?

¹⁵ Kuo vēkeveke ʻa e toenga ʻo e kau paní ke akoʻi ʻa e fanga sipi kehé ki he ngaahi fatongia ʻoku tupulekina. ʻOku pehē ʻe he Sāme 71:18: “ʻOua foki, Elohimi, te ke liʻaki kita, ʻi he to mai ʻa e motuʻa mo e ʻuluhina; ʻoua ke u fakaha ki he toʻutangata ʻe taha hoʻo mafimafi, mo ho ivi ki he fuʻu fononga ʻoku laka mai.” ʻI he fakamatala ki he veesí ni, naʻe fakahaaʻi ʻe he Watchtower ʻo Tīsema 15, 1948, ʻo pehē ko e fakatahaʻanga ʻo e kau Kalisitiane paní kuo nau aʻu moʻoni ki he tuʻunga taʻumotuʻá. Naʻe hoko atu ʻo pehē ʻoku fiefia ʻa e kau paní ʻi heʻenau “fakatuʻamelie atu ʻi he maama ʻo e kikite ʻa e Tohitapú pea ʻoku nau sio atu ki ha toʻutangata foʻou.” ʻOku lave ʻeni ʻo tautefito kia hai? Naʻe pehē ʻe he The Watchtower: “Naʻe lea ʻa Sīsū ʻo fekauʻaki mo kinautolu ko ʻene ‘fanga sipi kehé.’” ‘Ko e toʻutangata ʻoku laka maí’ ʻoku ʻuhinga ia ki he faʻahinga ʻo e tangatá ʻa ia te nau nofo ʻi he malumalu ʻo e founga pule foʻou ʻi he māmaní ʻe puleʻi ʻe he Puleʻanga ʻo hēvaní.

16. Ko e hā ʻa e ngaahi tāpuaki ʻoku vēkeveke fakatuʻamelie ki ai ʻa e ‘toʻutangata ʻoku laka maí’?

¹⁶ ʻOku ʻikai ke tala mahino mai ʻe he Tohitapú ia ʻa e taimi ʻe tukuange ai ʻe he kau Kalisitiane paní kotoa ʻa honau ngaahi tokoua ko ʻeni ʻo e ‘toʻutangata ʻoku laka maí’ kae hoko atu ke fakalāngilangiʻi fakataha mo Sīsū Kalaisí. Ka ʻoku tui pau ʻa e kau pani ko ʻení ko e taimi ki he meʻá ni ʻoku tuʻunuku mai. Ko e ngaahi meʻa naʻe tala ki muʻa ʻi he kikite lahi ʻa Sīsū ʻo fekauʻaki mo e “taimi fakamui” kuo ʻosi kamata ke hoko ia talu mei he 1914, ʻo fakahaaʻi ai ko e fakaʻauha ʻo e maama ko ʻení ʻoku ofi. (Taniela 12:4; Mātiu 24:​3-14; Maake 13:​4-20; Luke 21:​7-24) ʻOku vavé ni, ke hanga ʻe Sihova ʻo ʻomai ha maama foʻou ʻa ia ‘ko e toʻutangata ʻoku laka maí’ te nau ‘hoko ki he puleʻanga [ko e feituʻu ʻi he māmaní] kuo toka teuteu moʻonautolu talu e tanu pou ʻo mamaní.’ (Mātiu 25:34) ʻOku nau fiefia-loto he fakatuʻotuʻa atu ki hono toe fakafoki mai ʻo e Palataisí pea mo hono fokotuʻu hake ʻo e laui miliona ʻo e kau maté mei Hētesi. (Fakahā 20:13) ʻE ʻi ai ʻa e kau paní ke talitali fiefia mai ʻa e kau toetuʻu ko ʻení? ʻI he 1925, naʻe pehē ai ʻe he Watch Tower ʻo Mē 1: “ʻOku ʻikai totonu ke tau lea fakapapauʻi fekauʻaki mo e meʻa ʻe fai pe ʻe ʻikai ke fai ʻe he ʻOtuá. . . . [Ka] ʻoku tataki kitautolu ki he fakamulituku ko e kau mēmipa ʻo e Siasí [kau Kalisitiane paní] ʻe fakalāngilangiʻi ia ki muʻa ʻi he toetuʻu ʻa e faʻahinga taau ʻo e kuonga muʻá [kau fakamoʻoni anga-tonu ki muʻa ʻi he kuonga ʻo e Kalisitiané].” Ko e fakamatala meimei tatau pe ʻe ʻi ai ha niʻihi ʻo e kau paní te nau kei ʻi heni ke talitali fiefia mai ʻa e kau toetuʻú, naʻe pehē ʻe he Watchtower ʻo Sepitema 1, 1989: “ʻE ʻikai fiemaʻu ia.”d

17. Ko e hā ʻa e ngaahi monū fakaofo ʻe kaungā-ʻinasi fakataha ai ʻa e kau paní, ʻi he tuʻunga ko ha kulupú, mo e Tuʻi maʻu taloni, ko Sīsū Kalaisí?

¹⁷ Ko e moʻoni, ʻoku ʻikai te tau ʻilo ʻa e meʻa ʻe hoko ʻi he fekauʻaki mo e tokotaha Kalisitiane pani taki taha. Ka ko e ʻi ai ʻa Mōsese mo ʻIlaisiā fakataha mo Sīsū ʻi he vīsone ʻo e fakakehé ʻoku fakahaaʻi ai ko e kau Kalisitiane pani ʻe toetuʻú ʻoku ʻamanekina te nau fakataha mo Sīsū ʻi heʻene hoko mai ʻi he lāngilangí ke “ʻange ki he tangata taki taha ʻo fakatatau ki heʻene ngāhi ngaue” ʻi hono fai mo fakahoko ʻa ʻene fakamāú. ʻIkai ko ia pē, ʻoku tau manatuʻi ʻa e talaʻofa ʻa Sīsū ʻo pehē ko e kau Kalisitiane pani ʻa ia ʻe ‘ikuná’ te nau kau fakataha mo ia ʻi he ‘pule ki he ngaahi kakaí ʻaki ha sepita ukamea’ ʻi ʻĀmaketone. ʻI he taimi ʻe hoko mai ai ʻa Sīsū ʻi hono nāunaú, te nau nofo hifo fakataha mo ia ke “fakamāu ʻa e matakali ʻe hongofulu ma ua ʻo Isileli.” ʻI he kau fakataha mo Sīsuú, te nau ‘laiki ʻa Setane ʻi honau lalo vaʻé.’​—Mātiu 16:​27–17:9; 19:28; Fakahā 2:​26, 27; 16:​14, 16; Loma 16:20; Senesi 3:15; Sāme 2:9; 2 Tesalonaika 1:​9, 10.

18. (a) Ko e hā ʻa e tuʻunga ʻoku fekauʻaki mo hono ‘falute ʻa e meʻa kotoa pe ʻoku ʻi langí ʻia Kalaisí’? (e) Ko e hā ʻoku lava ke tau leaʻaki ʻo kau ki hono ‘falute ʻa e ngaahi meʻa ʻoku ʻi mamaní ʻia Kalaisí’?

¹⁸ ʻI he fehoanaki mo ʻene founga pule ki he ngaahi meʻá, ʻoku ngaʻunu fakalakalaka atu ʻa Sihova “ke falute ʻa e meʻa kotoa pe ʻia Kalaisi.” ʻI he fekauʻaki mo e “ngaahi meʻa ʻoku ʻi langi,” ʻoku fakaʻau ke kakato ʻa ʻene taumuʻá. ʻOku ofí ni ʻa hono fakatahaʻi ʻo Sīsū mo e kotoa ʻo e toko 144,000 ʻi hēvani ki he “taʻane ʻa e Lami.” Ko ia ai, kuo lahi mo toe lahi ange ʻa e ngaahi tokoua moʻui fuoloa matuʻotuʻa ʻo e fanga sipi kehé, ʻoku nau fakafofongaʻi ʻa e “ngaahi meʻa ʻoku ʻi mamani,” kuo tuku kiate kinautolu ʻa e ngaahi fatongia mamafa ange ʻi hono tokoniʻi ʻa honau ngaahi tokoua paní. Ko ha taimi fakafiefia ē ʻoku tau moʻui aí! He fiefia-loto lahi ē ke sio ki he ngaʻunu atu ke fakahoko ʻa e taumuʻa ʻa Sihová! (Efeso 1:​9, 10; 3:​10-12; Fakahā 14:1; 19:​7, 9) Pea he fiefia lahi ē ka ko e fanga sipi kehé ke tokoni ki honau ngaahi tokoua paní ʻi he ngāue fakataha ʻa e ongo kulupú ʻi he tuʻunga ko e “takanga pe taha” ʻi he malumalu ʻo e “taha pe ʻa e tauhi” ʻi he anganofo ki he Tuʻí, ko Sīsū Kalaisi, pea ki he lāngilangi ʻo e Hau Fakaleveleva lahi, ko Sihova ko e ʻOtuá!​—Sione 10:16; Filipai 2:​9-11.

[Fakamatala ʻi lalo]

ʻE Lava ke Ke Fakamatalaʻi?

◻ Naʻe anga-fēfē ʻa e laka ki muʻa ʻa e kautaha ʻa e ʻOtuá ʻi he ʻuluaki senitulí?

◻ Kuo anga-fēfē ʻa e laka ki muʻa ʻa e Kulupu Pulé ʻi he hisitōlia ʻi onopooni ʻo e Kau Fakamoʻoni ʻa Sihová?

◻ Ko e hā ʻa e ngaahi Konga Tohitapu ʻoku nau fakamafaiʻi ʻa hono ʻoange ʻa e mafai ki he fanga sipi kehé ʻi he kautaha ʻa Sihová?

◻ Kuo anga-fēfē ʻa hono fakatahatahaʻi ʻia Kalaisi “ʻa e ngaahi meʻa ʻoku ʻi langi” mo e “ngaahi meʻa ʻoku ʻi mamani”?

[Fakatātā ʻi he peesi 16]

Naʻa mo e taimi naʻe ʻikai ke kei ʻi Selusalema ai ʻa hono muʻaki kau mēmipá, naʻe hokohoko atu ʻa e ngāue ai ʻa ha kulupu pule

[Fakatātā ʻi he peesi 18]

Kuo hoko ʻa e kau Kalisitiane pani matuʻotuʻá ko ha tāpuaki ki he kakai ʻa Sihová

C. T. Russell 1884-​1916

J. F. Rutherford 1916-​1942

N. H. Knorr 1942-​1977

F. W. Franz 1977-1992

M. G. Henschel 1992-