Ko Hai ʻe Lava Ke Ne Fakahaofi ʻa e Faʻahinga ʻOku Tangi ki ha Tokoní?
“ʻE Elohimi, foaki ki he tuʻi ho halanga fakamāu . . . He ʻoku ne fakahaofi ʻa e masiva ʻo ka tangi [ki ha tokoni].”—SĀME 72:1, 12.
1. ʻI he tuʻunga ʻo Tēvitá, ko e hā ʻoku tau ako fekauʻaki mo e meesi ʻa e ʻOtuá?
HE FAKALOTOMĀFANA moʻoni ko e ngaahi lea ko iá, ngalingali naʻe hiki ʻe Tuʻi Tēvita ʻo ʻIsileli ʻo e kuonga muʻá! ʻI he ngaahi taʻu ki muʻa ke hiki iá, naʻá ne hokosia ai ʻa e fakatomala hili ʻene fai ʻa e tono mo Patisepá. ʻI he taimi ko iá naʻe kōlenga ai ʻa Tēvita ki he ʻOtuá: “Ke ke tamateʻi ʻeku ngaahi angahala ke hoa mo e lahi ʻo hoʻo ʻaloʻofa [pe mēsí]. . . . ʻOku ma feʻao maʻu pe mo ʻeku angahala. . . . Vakai naʻe fanauʻi au mo e hia; ʻio naʻe tuʻituʻia ʻeku faʻe ʻiate au ko e meʻa angahala.” (Sāme 51:1-5) ʻI he faimēsí, ʻoku fakakaukauʻi ai ʻe Sihova ʻa hotau tuʻunga angahalaʻia tukufakaholó.
2. ʻOku lava fēfē ke tokoniʻi kitautolu ʻe he Sāme 72?
2 ʻOku mahinoʻi ʻe Sihova ʻa hotau tuʻunga fakaʻofá. Kae kehe, hangē ko ia naʻe tomuʻa talá, ko e Tuʻi pani ʻa e ʻOtuá te ne “fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni. Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui.” (Sāme 72:12, 13) ʻE tokonaki fēfē mai ʻa e fakafiemālié? ʻOku tala mai kia kitautolu ʻi he Sāme 72. ʻI hono faʻu ʻo fekauʻaki mo e tuʻunga tuʻi ʻo e foha ʻo Tēvita ko Solomoné, ko e hivá ni ʻoku tomuʻa fakaʻali mai ai ʻa e founga ʻe fakafiemālieʻi ai ʻe he pule ʻa e ʻAlo ʻo e ʻOtuá, ʻa Sīsū Kalaisi, ʻa e mamahi ʻa e faʻahinga ʻo e tangatá.
Tomuʻa Fakaʻali ʻo e Pule ʻa Kalaisí
3. Ko e hā naʻe kole ʻe Solomoné, pea ko e hā naʻe ʻoange kiate ia ʻe he ʻOtuá?
3 Hili ʻa e fakahaaʻi ke fakanofo tuʻi ʻa Solomoné, naʻe ʻoange ʻe he taʻumotuʻa ko Tēvitá kiate ia ʻa e ngaahi fakahinohino pau ʻa ia naʻe fakahoko faitōnunga ʻe Solomone. (1 Tuʻi 1:32-35; 2:1-3) Naʻe hā ki mui ʻa Sihova kia Solomone ʻi ha misi ʻo pehē: “Fai mai haʻo kole pe ko e ha te u ʻatu.” Naʻe fai ʻe Solomone ʻa e kole pē ʻe taha: “Ke ke foaki ki hoʻo tamaioʻeiki ko au ha loto tokanga, ke fakamāu ho kakai ni, ʻo sivi ʻa e lelei mo e kovi.” Ko ha ola ʻo e kole fakatōkilalo ʻa Solomoné, naʻe ʻoange kiate ia ʻe he ʻOtuá ʻa e meʻa naʻá ne kolé mo e meʻa lahi ange.—1 Tuʻi 3:5, 9-13.
4. Naʻe anga-fēfē hono fakamatalaʻi ʻa e pule ʻa Solomoné ʻe ha tokotaha pule ʻe taha ʻi hono taimí?
4 ʻI he tāpuaki ʻa Sihová, ko e pule ʻa Solomoné naʻe iku ai ki he vahaʻa taimi fakaofo taha ʻo e melino mo e lakalakaimonū kuo faifai ange pea hoko ʻi he malumalu ʻo ha founga-pule pē ʻi he māmaní. (1 Tuʻi 4:25) Naʻe kau ʻi he faʻahinga naʻe omi ke sio pe naʻe fēfē ʻa e pule ʻa Solomoné ʻa e kuini ʻo Sipá, fakataha mo ʻene fuʻu kau fononga tokolahi. Naʻá ne tala ange kia Solomone: “Ta ko e talanoa naʻa ku fanongo ki ai ʻi hoku fonua hoʻo ngaahi ngaue, pea mo hoʻo poto, ko e moʻoni pe. . . . Ta ko e vaeua naʻe ʻikai tala mai: ʻoku hulu atu hoʻo poto mo ho monuʻia ʻi he ongoongo naʻa ku maʻu.” (1 Tuʻi 10:1, 6, 7) Neongo ia, naʻe fakahāhā ʻe Sīsū ʻa e poto lahi mamaʻo ange, ʻa ia naʻe lava moʻoni ke ne lea fekauʻaki mo ia tonu: “Vakai ʻoku ʻi heni ha meʻa ʻoku lahi ʻia Solomone.”—Mt. 12:42.
Fiemālie ʻi he Malumalu ʻo e Solomone Lahi Angé
5. Ko e hā ʻoku fakahaaʻi ʻi he Sāme 72, pea ko e hā ʻoku tomuʻa fakaʻali mai aí?
5 Tau sivisiviʻi angé he taimí ni ʻa e ngaahi tafaʻaki ʻo e Sāme 72 fakataha mo e taumuʻa ke ako fekauʻaki mo e ngaahi tāpuaki ʻi he malumalu ʻo e pule ʻa Sīsū Kalaisí, ʻa e Solomone Lahi Angé. (Lau ʻa e Sāme 72:1-4.) Ko e saame ko ení ʻoku fakahaaʻi ai ʻa e anga ʻo e ongoʻi ʻa Sihova fekauʻaki mo e “puleʻanga” ʻo hono ʻAló, ko e “ʻEiki ʻo e Melino,” ʻa Sīsū Kalaisi. (Ai. 9:6, 7) ʻI he malumalu ʻo e tataki ʻa e ʻOtuá, ko e Solomone Lahi angé te ne ‘fakatonutonu e meʻa ʻa e kakai vaivaí, mo fakahaofi ʻa haʻa masiva.’ Ko ʻene pulé ko ha pule ʻo e melino mo e māʻoniʻoni. Lolotonga ʻene ʻi he māmaní, naʻe tomuʻa fakaʻali mai ai ʻe Sīsū ʻa e meʻa ʻe fakahoko ʻi heʻene Pule Taʻu ʻe Afe ka hoko maí.—Fkh. 20:4.
6. Ko e hā ʻa e ngaahi tomuʻa fakaʻali ʻo e ngaahi tāpuaki ʻi he malumalu ʻo e Puleʻangá naʻe ʻomai ʻe Sīsuú?
6 Fakakaukau angé ki he niʻihi ʻo e ngaahi ngāue ʻa Sīsū Kalaisi ʻoku tomuʻa fakaʻali mai ai kia kitautolu ʻa e meʻa te ne fai ki he faʻahinga ʻo e tangatá ʻi he fakahoko ʻo e Sāme 72. ʻOku maongo totonu kia kitautolu ʻa ʻene manavaʻofa lahi ki he faʻahinga naʻe faingataʻaʻiá. (Mt. 9:35, 36; 15:29-31) Hangē ko ení, ko ha tangata naʻe faingataʻaʻia ʻi he kiliá naʻá ne fakaofiofi kia Sīsū ʻo kōlenga: “Ka ne ke loto ke fai, te ke lava ke fakamaʻa au.” Naʻe tali ange ʻe Sīsū: “ʻOku ou loto pe; ke ke maʻa koe.” Pea naʻe moʻui ʻa e tangatá! (Mk. 1:40-42) Ki mui ai, naʻe fetaulaki ai ʻa Sīsū mo ha uitou ʻa ia ko hono foha pē tahá naʻe mate. ʻI he “langa hono fatu ʻi he ʻofa ki ai,” naʻe pehē ange ʻe Sīsū, “Ke ke tuʻu”! pea naʻe fai pehē ʻa hono fohá. Naʻá ne toe moʻui!—Luke 7:11-15.
7, 8. Ko e hā ʻa e fakamoʻoni ʻe niʻihi ʻo e mafai fakaefakamoʻui ʻo Sīsuú?
7 Naʻe fakamafaiʻi ʻe Sihova ʻa Sīsū ke ne fakahoko ʻa e ngaahi mana. Naʻe fakatātaaʻi eni ʻi he tuʻunga ʻo ha “fefine ʻe taha, kuo ʻau toto ʻo taʻu hongofulu mā ua.” Neongo naʻe “lahi ʻa e faitoʻo fakamamahi kuo fai kiate ia ʻe he kau faitoʻo tokolahi, pea kuo ʻosi atu siʻene koloa kotoa,” naʻá ne fakaʻaʻau moʻoni ki he toe kovi ange. Naʻe hū ʻa e fefiné ʻi ha fuʻu kakai ʻo ne ala kia Sīsū—ko hano maumauʻi ia ʻo e Laó ʻe ha taha ʻoku ne “ʻau toto.” (Liv. 15:19, 25) Naʻe ʻiloʻi ʻe Sīsū kuo mole meiate ia ʻa e mālohi pea ko ia naʻá ne ʻeke ai pe ko hai naʻe ala ange kiate iá. ʻI he “ilifia pē mo tetetete,” ko e fefiné naʻá ne “hinga ʻi hono ʻao, ʻo ne vete atu [hono] kotoa.” ʻI he ʻiloʻi kuo fakamoʻui ʻe Sihova ʻa e fefiné, naʻe tōʻongafai anga-ʻofa ʻa Sīsū kiate ia peá ne pehē: “Ngaʻata, kuo fakamoʻui koe ʻe hoʻo tui; ʻalu ʻo fiemālie pē ā, pea ke moʻui mei ho mamahiʻanga.”—Mk. 5:25-27, 30, 33, 34.
8 Ko e mafai fakaefakamoʻui ʻo Sīsū naʻe ʻoange ʻe he ʻOtuá naʻá ne fakamoʻui ai ʻa e mahakí ka ʻoku pau naʻe ʻi ai ʻene tākiekina mālohi ki he faʻahinga naʻe sio aí. Hangē ko ení, ʻoku ʻikai ha veiveiua naʻe maongo ki he tokolahi ʻa e taimi naʻa nau sio ai ki hono fakamoʻui ʻe Sīsū ʻa e kakaí ki muʻa ʻi heʻene Malanga ʻiloa ʻi he Moʻungá. (Luke 6:17-19) ʻI he taimi naʻe fekau atu ai ʻe Sione Papitaiso ʻa e ongo talafekau ke na kumi ha fakapapauʻiʻanga ko Sīsū ʻa e Mīsaiá, naʻá na maʻu atu Ia ʻokú ne “fakamoʻui ʻa e tokolahi mei he ngaahi mahaki, pea mo e ngaahi meʻa fakamamahi, mo e ngaahi faʻahikehe, ʻo ne ʻofa ki ha niʻihi kui, ʻo fakaʻā.” Naʻe tala ange leva ʻe Sīsū ki he ongo meʻá: “Fakahā kia Sione ʻa e ngaahi meʻa ʻoku mo mamata mo fanongo ki ai; ʻoku ʻa ʻa e kui, ʻeveʻeva ʻa e heke, fakamaʻa ʻa e kilia, ongo ʻa e tuli, fokotuʻu ʻa e pekia, pea ʻoku malangaʻaki ʻa e ongoongolelei ki he masiva.” (Luke 7:19-22) He pau moʻoni ē naʻe fakalototoʻaʻi ʻa Sione ʻe he pōpoaki ko iá!
9. Ko e ngaahi mana ʻa Sīsuú ko e tomuʻa fakaʻali ia ʻo e hā?
9 Ko e moʻoni, ko e fakafiemālie mei he faingataʻaʻiá naʻe ʻomai ʻe Sīsū lolotonga ʻene ngāue fakafaifekau ʻi he māmaní naʻe fakataimi pē. Ko e faʻahinga ko ia naʻe fakamoʻui pe fokotuʻu haké naʻa nau mate ki mui. Neongo ia, ko e ngaahi mana naʻe fakahoko ʻe Sīsū lolotonga ʻene ʻi māmaní ko e tomuʻa fakaʻali ia ʻo e fakafiemālie tuʻuloa ʻe maʻu ʻe he faʻahinga ʻo e tangatá ʻi he malumalu ʻo ʻene pule faka-Mīsaiá.
Palataisi mei Muʻa ʻi Māmani Lahi!
10, 11. (a) Ko e hā ʻa e fuoloa ʻo e ngaahi tāpuaki ʻa e Puleʻangá, pea ʻe fēfē ʻa e pule ʻa Sīsuú? (e) Ko hai ʻe ʻi ai mo Kalaisi ʻi Palataisí, pea ʻe malava fēfē ke ne moʻui taʻengata?
10 Feinga ke sioloto atu ki he tuʻunga ʻe ʻi ai ʻa e moʻuí ʻi Palataisi ʻi he māmaní. (Lau ʻa e Sāme 72:5-9.) Ko e kau lotu ʻa e ʻOtua moʻoni pē tahá te nau malava ke fiefia ʻi he moʻuí ʻi Palataisi lolotonga ʻa e ʻi ai ʻa e laʻaá mo e māhiná—ʻio, ʻo taʻengata! Ko e tuʻi ko Sīsū Kalaisí ʻe fakamoʻoniʻi ʻa ʻene fakaivifoʻou, ‘hange ko e hifo ha ʻuha ki he musie kuo ta mo e mahua ʻa e lovai ki he fonuá.’
11 ʻI hoʻo sioloto atu ki he fakahoko ʻo e saame ko ení, ʻikai ʻoku ueʻi ho lotó ʻe he ʻamanaki ʻo e moʻui taʻengata ʻi ha palataisi fakaemāmani? Ko e moʻoni ko e tokotaha faikovi naʻe tutukí naʻá ne fiefia ʻi hono tala ange ʻe Sīsū kiate ia: “Te ke ʻi Palataisi mo au.” (Luke 23:43) Lolotonga ʻa e Pule Taʻu ʻe Afe ʻa Sīsuú, ʻe toe fakafoki mai ai ki he moʻuí ʻa e tangata ko iá. Kapau ʻe fakamoʻulaloa ki he pule ʻa Kalaisí, te ne malava ke moʻui taʻengata ʻi he māmaní ʻi he moʻui lelei haohaoa mo e fiefia.
12. Lolotonga ʻa e Pule Taʻu ʻe Afe ʻa Kalaisí, ko e hā ʻa e faingamālie ʻe ʻatā ki he faʻahinga angahala ʻe toetuʻú?
12 ʻI he malumalu ʻo e pule ʻa e Solomone Lahi Angé, ʻa Sīsū Kalaisi, ʻe “toʻulu ʻa e maʻoniʻoni” ʻa ia ʻe tupu ʻāfaʻafa pe lakalakaimonū. (Sāme 72:7) Ko e ʻofa mo e tokanga fakaalaala ʻa Kalaisí ʻe lahi ʻi he taimi ko iá, ʻo hangē tofu pē ko ia ʻi he taimi naʻá ne ʻi māmani aí. ʻI he māmani foʻou ʻa e ʻOtuá naʻe talaʻofá, naʻa mo e “angahala” ʻa ia te nau toetuʻú ʻe ʻoange kia kinautolu ha faingamālie anga-ʻofa ke nau liliu ki he ngaahi tuʻunga ʻa Sihová pea moʻui. (Ng. 24:15) Ko e moʻoni, ko e faʻahinga ʻoku nau fakafisi ke ngāue ʻo fehoanaki mo e ngaahi fiemaʻu fakaʻotuá heʻikai fakaʻatā ke hokohoko atu ʻenau moʻui ʻo fakameleʻi ʻa e melino mo e nonga ʻi he māmani foʻoú.
13. Ko e hā e lahi ʻo e pule ʻa e Puleʻangá, pea ko e hā ʻe ʻikai ʻaupito ai ke veuki ʻa ʻene melinó?
13 Ko e pule ʻi māmani kotoa ʻa e Solomone Lahi Angé ʻoku fakahaaʻi ia ʻe he ngaahi lea ko ení: “Ke ne pule foki mei he tahi ki he tahi, pea mei he vaitafe [ʻIufaletesí] ki he ngataʻanga ʻo mamani. Ko e nofo toafa ʻe punou ʻi hono ʻao; pea ko hono ngaahi fili ʻe kai efu ʻaki honau ʻelelo.” (Sāme 72:8, 9) ʻIo, ʻe pule ʻa Sīsū Kalaisi ki he māmaní kotoa. (Sak. 9:9, 10) Ko e faʻahinga ʻoku nau fakamahuʻingaʻi ʻa ʻene pulé mo hono ngaahi tāpuakí te nau “punou” ʻi he fakamoʻulaloa loto-lelei. ʻI he tafaʻaki ʻe tahá, ko e kau angahala taʻefakatomalá ʻe tuʻusi, hangē ko e laú, ʻi ha “teau taʻu.” (Ai. 65:20) Te nau “kai efu ʻaki honau ʻelelo.”
Tokanga Kaungāongoʻi kia Kitautolu
14, 15. ʻOku anga-fēfē ʻetau ʻiloʻi ʻoku mahinoʻi ʻe Sīsū ʻa e ongoʻi ʻa e tangatá pea te ne ‘fakahaofi ʻa e masivá ʻo ka tangi ki ha tokoni’?
14 Ko e faʻahinga angahalaʻia ʻo e tangatá ʻoku nau ʻi ha tuʻunga fakaʻofa pea ʻoku nau fiemaʻu vavale ʻa e tokoni. Ka ʻoku ʻi ai ʻa e ʻamanaki kia kitautolu. (Lau ʻa e Sāme 72:12-14.) Ko Sīsū, ʻa e Solomone Lahi Angé, ʻokú ne ongoʻi kitautolu koeʻuhi ʻokú ne mahinoʻi ʻa hotau tuʻunga taʻehaohaoá. ʻIkai ngata aí, naʻe mamahi ʻa Sīsū koeʻuhi ko e māʻoniʻoní, pea naʻe fakaʻatā ʻe he ʻOtuá ke ne fehangahangai ʻiate pē mo e ngaahi ʻahiʻahí. He ko ē, naʻe tofanga ʻa Sīsū ʻi he mamahi lahi fakaeongo ʻo “hoko ʻene tautaʻa ʻo hange ko e ngaahi tulutā taʻataʻa, ʻo vangana ki [he] kelekele”! (Luke 22:44) Ki mui ai, ʻi he ʻakau fakamamahí, naʻá ne kalanga: “ʻE hoku ʻOtua, ʻe hoku ʻOtua, naʻa ke liʻaki au kae ha?” (Mt. 27:45, 46) Neongo e meʻa kotoa naʻá ne faingataʻaʻia aí, pea neongo ʻa e feingaʻaki e ʻosi tahá ʻe Sētane ke fakatafokiʻi ia meia Sihová, naʻe fakamoʻoniʻi ʻe Sīsū ʻa ʻene faitōnunga ki he ʻOtua ko Sihová.
15 ʻOku lava ke tau fakapapauʻi ʻoku ʻiloʻi ʻe Sīsū ʻa ʻetau mamahí pea te ne “fakahaofi ʻa e masiva ʻo ka tangi; Ko e vaivai foki mo ia ʻoku ʻikai hano tokoni.” ʻI he tokanga anga-ʻofa hangē ko ʻene Tamaí, ʻe ‘ongoʻi ʻe Sīsū ʻa e kau masivá’ pea ‘ko e lotomafesí te ne faitoʻo, pea haʻihaʻi honau ngaahi kafó.’ (Sāme 69:33; 147:3) Ko Sīsuú ʻoku ʻikai lava ke ne “taʻemalavea [pe kaungāongoʻi] ʻi hotau ngaahi vaivai,” he “kuo ʻosi ʻahiʻahi ʻi he meʻa kotoa pe, hange ko kitautolu.” (Hep. 4:15) He lelei ē ke ʻiloʻi ko e tuʻi ko Sīsū Kalaisí ʻoku lolotonga pule ʻi hēvani pea ʻokú ne vēkeveke ke ʻomai ʻa e fakafiemālie ki he faʻahinga faingataʻaʻia ʻo e tangatá!
16. Ko e hā naʻe malava ai ke ongoʻi ʻe Solomone ʻa e faʻahinga naʻá ne pule ki aí?
16 Koeʻuhi naʻá ne maʻu ʻa e poto mo e vavanga, ʻoku ʻikai ha veiveiua ko Solomoné naʻá ne ‘fakaʻatuʻi ʻa e tuʻutamakí.’ Tuku kehe ia, ko ʻene moʻuí naʻe fakaʻilongaʻiʻaki ʻa e ngaahi meʻa fakamamahi mo fakatupu loto-lavea. Ko hono tokoua ko ʻAmanoní naʻá ne tohotohoʻi ʻa hono tuofefine ko Temá, pea ko e tokoua ʻo Solomone ko ʻApisalomé naʻá ne tāmateʻi ʻa ʻAmanoni ʻi he hia naʻá ne faí. (2 Sam. 13:1, 14, 28, 29) Naʻe puke ʻe ʻApisalome ʻa e taloni ʻo Tēvitá, ka naʻe taʻelavameʻa ʻa ʻene palaní, pea naʻe tāmateʻi ia ʻe Sioape. (2 Sam. 15:10, 14; 18:9, 14) Ki mui ai, ko e tokoua ʻo Solomone ko ʻAtunaisá naʻá ne feinga ke hamu ʻa e tuʻunga tuʻí. Kapau naʻá ne lavameʻa, ne mei ʻuhinga moʻoni eni ko e mate kia Solomone. (1 Tuʻi 1:5) Ko e mahinoʻi ko ia ʻe Solomone ʻa e faingataʻaʻia ʻa e tangatá ʻoku hā ngali mahino ia koeʻuhi ko e meʻa naʻá ne leaʻaki ʻi he lotu ʻi hono huufi ʻa e temipale ʻo Sihová. ʻI he fekauʻaki mo e faʻahinga naʻá ne pule ki aí, naʻe lotu ʻa e tuʻí: “[ʻOku nau] ongoʻi taki taha hono ta mo hono mamahi . . . pea ke fakamolemole [Sihova], mo ʻange ki he tangata taki taha ʻa e tuha ʻo hono ngaahi ʻalunga.”—2 Kal. 6:29, 30.
17, 18. Ko e hā ʻa e mamahi naʻe pau ke fekuki mo e niʻihi ʻo e kau sevāniti ʻa e ʻOtuá, pea ko e hā kuó ne tokoniʻi kinautolu ke nau fai peheé?
17 ‘Ko hotau mamahí’ ko e tupu nai ia mei he nunuʻa ʻo e ngaahi meʻa moʻoni naʻe hoko he moʻuí ʻi he kuohilí. Ko Mele,a ko ha fakamoʻoni ʻa Sihova ia ʻi hono taʻu 30 tupú ʻokú ne tohi: “ʻOku ou maʻu ʻa e ʻuhinga kotoa ke fiefia ai, ka ʻoku faʻa ʻohake ʻe hoku kuohilí ʻa e ongoʻi mā mo e fakameʻapangoʻia. ʻOku tupu ai ʻa e loto-mamahi lahi, pea ʻoku hoko ai ʻou tangi, ʻo hangē ia naʻe toki hoko ʻa e meʻa kotoa pē ʻaneafí. Ko e ngaahi manatu kuo tongilotó ʻoku kei fakatupunga pē ai ʻa e ongoʻi taulōfuʻu ʻo e taʻemahuʻinga mo e halaia.”
18 Ko e tokolahi ʻo e kau sevāniti ʻa e ʻOtuá ʻoku lava ke nau ʻiloʻi ʻa e ngaahi ongoʻi ko ení, ka ko e hā ʻa e tokoni ʻe lava ke ʻoange ai kia kinautolu ʻa e mālohi ʻoku fiemaʻú koeʻuhi ke kātaki ai? “Ko e kaungāmeʻa moʻoní mo ha fāmili fakalaumālie ʻokú ne ʻomai kiate au he taimí ni ʻa e fiefia,” ko e lau ia ʻa Melé. “ʻOku ou toe feinga ke tokangataha ki he meʻa ʻoku talaʻofa ʻe Sihova ki he kahaʻú, pea ʻoku ou tuipau ko ʻeku tangi ki ha tokoní ʻe iku ki he tangi ʻi he fiefia.” (Sāme 126:5) ʻOku fiemaʻu ke tau tuku ʻetau falalá ʻi he tokonaki mai ʻe he ʻOtuá ʻa hono ʻAló, ʻa ʻene Pule kuo fakanofó. ʻI he fekauʻaki mo iá, naʻe tomuʻa tala: “Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui. ʻOku ne huhuʻi honau laumalie mei he maumau mo e fakamalohi, pea ʻoku mahuʻinga honau toto ʻi heʻene vakai.” (Sāme 72:13, 14) He fakafiemālie moʻoni ē ko ia!
Tatali Mai ha Māmani Foʻou Mahu
19, 20. (a) Hangē ko ia naʻe fakahaaʻi ʻi he Sāme 72, ko e hā ʻa e palopalema ʻe solova ʻe he pule ʻa e Puleʻangá? (e) Ko hai ʻoku totonu ke ʻalu tefito ki ai ʻa e lāngilangi ʻi he pule ʻa Kalaisí, pea ʻoku anga-fēfē hoʻo ongoʻi fekauʻaki mo e meʻa te ne fakahokó?
19 Toe feinga ke sioloto atu ki he kahaʻu ʻo e tangata faitotonú ʻi he māmani foʻou ʻa e ʻOtuá he malumalu e pule ʻa e Solomone Lahi Angé. “Ke mafola mai ʻa e koane ʻi he fonua,” ko e talaʻofa ia kia kitautolú. ʻE mahutafea “hono fua ʻi he funga moʻunga.” (Sāme 72:16) Koeʻuhi ko e koané ʻoku ʻikai anga-maheniʻaki ke tupu ʻi he funga moʻungá, ko e ngaahi lea ko ení ʻoku fakamamafaʻi ai ʻa e fua lahi ʻe hoko ki he māmaní. Ko hono fuá ʻe “hange ko Lepanoni,” ko ha feituʻu fua lahi ʻi he taimi ʻo e pule ʻa Solomoné. Fakakaukau atu pē! Heʻikai toe ʻi ai ha nounou fakameʻatokoni, heʻikai ha taha ʻe fasimanava, hala ha taha ʻe fiekaia! ʻE maʻu leva ʻe he tokotaha kotoa “ha katoanga meʻa lolo.”—Ai. 25:6-8; 35:1, 2.
20 Ko hai ʻe ʻalu ki ai ʻa e lāngilangí ʻi he kotoa ʻo e ngaahi tāpuaki ko ení? Ko e tefitó ki he Tuʻi Taʻengatá mo e Pule Fakalevelevá, ʻa Sihova ko e ʻOtuá. Ko hono moʻoní, ko kitautolu kotoa te tau fakakau fiefia atu ʻa hotau leʻó ki he konga fakaʻosi ʻo e hiva mālie mo fakalotomāfana ko ení: “Ke taʻengata hono huafa [ʻa e Tuʻi ko Sīsū Kalaisí]; ke huli hono huafa lolotonga ʻoku hanga mai ʻa e laʻa; ke lau ʻe he kakai ʻoku nau monuʻia ʻiate ia; ke tuku monū ki ai ʻa e ngaahi puleʻanga. Malo, Sihova Elohimi, ko e ʻOtua ʻo Isileli! ʻA ia toko taha ʻoku fai meʻa fakaofo lahi: Ke maloʻia ʻo taʻengata hono huafa langilangiʻia: Pea ke fonu ʻa mamani katoa ʻi hono kololia! Emeni mo Emeni.”—Sāme 72:17-19.
[Fakamatala ʻi lalo]
a Kuo liliu ʻa e hingoá.
ʻE Fēfē Haʻo Tali?
• Naʻe ʻomai fakaekikite ʻi he Sāme 72 ha tomuʻa fakaʻali ʻo e hā?
• Ko hai ʻa e Solomone Lahi Angé, pea ko e hā e lahi ʻo ʻene pulé?
• Ko e hā ʻokú ke ʻiloʻi ʻoku fakamānako fakafoʻituitui fekauʻaki mo e ngaahi tāpuaki naʻe tomuʻa tala ʻi he Sāme 72?
[Fakatātā ʻi he peesi 29]
Ko e hā naʻe tomuʻa fakatātaaʻi ʻe he lakalakaimonū naʻe maʻu he lolotonga e pule ʻa Solomoné?
[Fakatātā ʻi he peesi 32]
ʻOku tuha mo e feinga kotoa ke maʻu ʻa e moʻui ʻi Palataisi ʻi he malumalu ʻo e pule ʻa e Solomone Lahi Angé