9. Ko e hā naʻe fakatatau ki ai ʻe he tokotaha-tohi-sāmé ha taʻu ʻe afe ʻo e ʻi ai ʻa e tangatá?

⁹ Naʻe fakamānavaʻi ʻa e tokotaha-tohi-sāmé ke ne fakatatau ha taʻu ʻe taha afe ʻo e ʻi ai ʻa e tangatá ki ha kiʻi taimi nounou ʻaupito ʻi he meʻa ʻoku hokosia ʻe he Tokotaha-Fakatupu taʻengatá. ʻI he lea ki he ʻOtuá, naʻá ne tohi: “ʻOkú ke ʻai ʻa e tangata matengofuá ke foki ki he meʻa kuo laikí, peá ke pehē: ‘Foki, ʻa kimoutolu ngaahi foha ʻo e tangatá.’ He ko ha taʻu ʻe afe ʻi hoʻo vakaí ʻoku hangē pē ia ko e ʻaneafí ʻi heʻene maliu atú, pea hangē ko ha leʻo ʻi he lolotonga ʻo e poʻulí.”​—Sāme 90:​3, 4, NW.

11. Ko e hā ʻoku malava ai ke tau pehē ko ha taimi lōloa kiate kitautolu, ʻoku fuʻu nounou pē ia ki he ʻOtuá?

¹¹ Mei he vakai ʻa Sihová, naʻa mo Mētuisela taʻu 969 naʻe moʻui ia ʻo siʻi hifo pē ʻi he ʻaho ʻe tahá. (Senesi 5:27) Ki he ʻOtuá, ko e taʻu ʻe taha afé ʻoku hangē pē ia ko e ʻaneafí​—ko ha vahaʻa taimi ko e houa pē ʻe 24​—ʻi heʻene maliu atú. ʻOku toe lave ʻa e tokotaha-tohi-sāmé ʻo pehē ko ha taʻu ʻe afe ki he ʻOtuá ʻoku hangē pē ia ko e leʻo ʻa ha tangata leʻo ʻi he houa ʻe fā ʻi ha ʻapitanga he lolotonga ʻa e poʻulí. (Fakamaau 7:19) ʻOku hā mahino leva, ko ha taimi lōloa kiate kitautolu, ʻoku fuʻu nounou pē ia ki he ʻOtua taʻengatá, ʻa Sihova.