Ko Sihova ʻa Hotau Hūfangaʻangá

“Koeʻuhi naʻá ke pehē: ‘Ko Sihova ʻa hoku hūfangaʻangá,’ . . . ʻe ʻikai ha fakatamaki ʻe tō kiate koe.”​—SĀME 91:​9, 10, NW.

 1. Ko e hā ʻoku malava ai ke tau pehē ko Sihova ʻa hotau hūfangaʻangá?

KO SIHOVÁ ko ha hūfangaʻanga moʻoni ia ki hono kakaí. Kapau ʻoku tau līʻoa kakato kiate ia, te tau hoko nai ai ʻo ‘lōmekina ʻi he founga kotoa pē, kae ʻikai fihiatuʻu ʻo ʻikai toe ngaue; puputuʻu, kae ʻikai ke taʻe ʻi ai ha haoʻanga; fakatangaʻi, kae ʻikai liʻekina; lī ki lalo, kae ʻikai ʻauha.’ Ko e hā hono ʻuhingá? Koeʻuhí ʻoku tuku mai ʻe Sihova kiate kitautolu ʻa e “mālohi ʻoku mahulu atu ia ʻi he tuʻunga anga-mahení.” (2 Kolinito 4:​7-9, NW) ʻIo, ʻoku tokoniʻi kitautolu ʻe heʻetau Tamai fakahēvaní ke tau tuli ki ha moʻui anga-fakaʻotua, pea ʻoku malava ke tau tukulotoa ʻa e ngaahi lea ʻa e tokotaha-tohi-sāmé: “Koeʻuhi naʻá ke pehē: ‘Ko Sihova ʻa hoku hūfangaʻangá,’ kuó ke ʻai ʻa e Fungani Māʻolungá tonu ko ho nofoʻanga; ʻe ʻikai ha fakatamaki ʻe tō kiate koe.”​—Sāme 91:​9, 10, NW.

 2. Ko e hā ʻoku lava ke leaʻaki fekauʻaki mo e Sāme 91 pea ko e hā ʻokú ne talaʻofa maí?

² Ko e ngaahi lea ko ia ʻo e Sāme 91 naʻe tohi nai ia ʻe Mōsese. ʻOku ui ia ʻe he fakamatala ʻi ʻolungá ko e tokotaha-faʻu ʻo e Sāme hono 90, pea ʻoku hoko mai ai pē ʻa e Sāme 91 ʻo ʻikai ha toe lau ia ai ki ha tokotaha-tohi ʻe taha. Mahalo ko e Sāme 91 naʻe hivaʻi fetāliaki; ʻa ia, naʻe ʻuluaki hiva nai ʻa e tokotaha (91:​1, 2), pea tali mai leva ʻe ha kau hiva (91:​3-8). Naʻe ongona nai ʻa e leʻo ʻo e tokotaha hiva hono hokó (91:9a) pea naʻe tali atu ia ʻe ha foʻi kulupu (91:9e-13). Naʻe hivaʻi leva ʻe ha tokotaha hiva nai ʻe taha ʻa e ngaahi foʻi lea fakaʻosí (91:​14-16). Pe ko e hā pē ʻa e tuʻungá, ʻoku talaʻofa mai ʻe he Sāme hono 91 ha maluʻanga fakalaumālie ki he kau Kalisitiane paní ʻi he tuʻunga ko ha kalasí pea tokonaki mai mo e fakapapau meimei tatau ki honau takanga ʻosi fakatapuí ʻi he tuʻunga ko ha kulupu.a Tau vakai angé ki he sāmé ni mei he anga ʻo e vakai ʻa e kotoa ʻo e kau sevāniti ko ia ʻa Sihová.

Malu ʻi he ‘Botu Lilo ʻa e ʻOtuá’

 3. (a) Ko e hā ʻa e “botu lilo i he fugani maoluga”? (e) Ko e hā ʻoku tau hokosia ʻi he ‘nofo mau he malumalu oe Mafimafí’?

³ ʻOku hiva ʻa e tokotaha-tohi-sāmé: “Ko ia oku nofo i he botu lilo i he fugani maoluga, e nofo mau ia he malumalu oe Mafimafi. Teu behe, Ko Jihova, ko hoku hufaga [“hūfangaʻangá,”NW] ia mo eku kolo [“mālohí, NW]: ko hoku Otua; teu falala kiate ia.” (Sāme 91:​1, 2, PM) Ko e ‘botu lilo i he fugani maolugá’ ko ha feituʻu fakaefakatātā ia ʻo e maluʻanga kiate kitautolu, pea tautefito ki he kau paní, ʻa ia ko ha ngaahi tāketi makehe kinautolu ʻa e Tēvoló. (Fakahā 12:​15-17) Te ne fakaʻauha kotoa kitautolu kapau naʻe ʻikai te tau maʻu ʻa e maluʻanga ʻoku tau maʻu ʻi he tuʻunga ko e faʻahinga ʻoku nofo mo e ʻOtuá ko ʻene kau ʻaʻahi fakalaumālié. ʻI he ‘nofo mau he malumalu oe Mafimafí,’ ʻoku tau hoko ai ʻo ʻi he malumalu pe ungaʻanga fakaemaluʻi ʻo e ʻOtuá. (Sāme 15:​1, 2; 121:5) ʻOku ʻikai ha hūfangaʻanga malu ange pe ko ha kolo mālohi ikuʻingataʻa ange ʻe mahulu ange ia ʻi hotau ʻEiki Hau ko Sihová.​—Palovepi 18:10.

 4. Ko e hā ʻa e ngaahi filioʻi ʻoku ngāueʻaki ʻe he ‘tokotaha pō-manupuna,’ ko Sētané, pea ʻoku anga-fēfē ʻetau haó?

⁴ ʻOku tānaki mai ʻe he tokotaha-tohi-sāmé: “Te ne [ Sihova] fakahaofi koe mei he tauhele-puna ʻa e tokotaha pō-manupuná, mei he mahaki fakaʻauha ʻokú ne fakatupu ʻa e ngaahi faingataʻaʻiá.” (Sāme 91:​3, NW) Naʻe faʻa puke ʻe ha tokotaha pō-manupuna ʻi ʻIsileli ʻo e kuonga muʻá ʻa e fanga manupuná ʻi hono ngāueʻaki ʻa e ngaahi tauhele pe ngaahi tauhele-puna. ʻOku ʻi he lotolotonga ʻo e ngaahi tauhele ‘ʻa e tokotaha pō-manupuna,’ ko Sētané, ʻa ʻene kautaha koví mo ʻene ‘ngaahi ngāue olopoto kākaá.’ (Efeso 6:​11, NW, fakamatala ʻi laló) ʻOku tuku ʻa e ngaahi tauhele-puna fakafufuú ʻi hotau halá ke tohoaki ʻaki kitautolu ki he fulikivanú pea fakatupunga ai ʻetau ʻauha fakalaumālié. (Sāme 142:3) Kae kehe, koeʻuhi kuo tau talitekeʻi ʻa e taʻemāʻoniʻoní, ‘kuo hao hotau laumalié hange ha manupuna mei he tauhele-puná.’ (Sāme 124:​7, 8) He fakamālō lahi ē ko kitautolu ʻi hono fakahaofi kitautolu ʻe Sihova mei he ‘tokotaha pō-manupuna’ anga-fulikivanú!​—Mātiu 6:13.

5, 6. Ko e hā ʻa e “mahaki fakaʻauha” kuó ne fakatupunga ʻa e “ngaahi faingataʻaʻiá,” ka ko e hā ʻoku ʻikai tō ai ki ai ʻa e kakai ia ʻa Sihová?

⁵ ʻOku lave ʻa e tokotaha-tohi-sāmé ki he “ngaahi mahaki fakaʻauha ʻokú ne fakatupunga ʻa e ngaahi faingataʻaʻiá.” ʻI he hangē ha toʻu mahaki pipihí, ʻoku ʻi ai ʻa e meʻa ʻokú ne fakatupunga ʻa e “ngaahi faingataʻaʻia” ki he fāmili fakaetangatá pea ki he kau poupou ʻo e tuʻunga-hau ʻo Sihová. ʻI he meʻá ni, naʻe tohi ai ʻe he faihisitōlia ko Arnold Toynbee: “Talu mei he ngataʻanga ʻo e Tau II ʻa e Māmaní mo hono ʻai ʻe he mateakiʻi fonuá ʻo liunga ua ʻa e lahi ʻo e ngaahi feituʻu fakalotofonua ʻoku taki taha pule pē kiate kinautolú . . . Ko e fakakaukau lolotonga ʻa e faʻahinga ʻo e tangatá ʻoku tupulekina ʻene fakatupu māvahevahé.”

⁶ ʻI he kotoa ʻo e ngaahi senitulí, kuo tafunaki ai ʻe he kau pule ʻe niʻihi ke lahi ʻa e fekeʻikeʻi fakavahaʻapuleʻangá. Kuo nau toe kouna ke fai ange pē kiate kinautolu pe ki he ngaahi ʻīmisí pe ngaahi fakaʻilonga kehekehé ʻa e fakaʻapaʻapá. Ka kuo ʻikai ʻaupito ke fakaʻatā ʻe Sihova ʻa ʻene kakai loto-tōnungá ke nau tō ki ha “mahaki fakaʻauha” pehē. (Taniela 3:​1, 2, 20-​27; 6:​7-​10, 16-​22) ʻI he tuʻunga ko ha fetokouaʻaki fakavahaʻapuleʻanga anga-ʻofá, ʻoku tau ʻoatu ai kia Sihova ʻa e anga-līʻoa maʻataʻatā, tauhi maʻu ʻa e tuʻunga tuʻu-ʻatā Fakatohitapú, pea fakahaaʻi taʻefilifilimānako “neongo pē ko e fēʻia ʻa e kakai, ka ʻilonga ʻa ia ʻoku ʻapasia [ki he ʻOtuá], pea ngāue fai ki he totonu, ʻoku ngofua ke ne aʻu mai kiate ia.” (Ngāue 10:​34, 35; Ekisoto 20:​4-6; Sione 13:​34, 35; 17:16; 1 Pita 5:​8, 9) Neongo ʻoku tau tofanga ʻi he “ngaahi faingataʻaʻia” ʻi ha founga ʻo e fakatangaʻi he tuʻunga ko e kau Kalisitiané, ʻoku tau fiefia mo malu fakalaumālie “i he botu lilo i he fugani maoluga.”

 7. ʻOku anga-fēfē hono maluʻi kitautolu ʻe Sihova ʻaki “hono fulufulu”?

⁷ ʻI hono ʻai ʻa Sihova ke hoko ko hotau hūfangaʻangá, ʻoku tau maʻu ai ʻa e fakafiemālie mei he ngaahi leá ni: “Te ne ʻufiʻufi koe ʻaki hono fulufulu, pea te ke toi [“hūfanga,” NW] ʻi hono lalo kapakau: ko ʻene fai moʻoni ko ho pa mo fakaū.” (Sāme 91:4) ʻOku maluʻi kitautolu ʻe he ʻOtuá, ʻo hangē pē ko e lofa mai ʻa ha foʻi manupuna ko ha faʻē ʻo maluʻi hono ʻuhikí. (Aisea 31:5) ‘Te ne ʻufiʻufi kitautolu ʻaki hono fulufulú.’ ʻI hono fakalūkufuá, ko e “fulufulu” ʻo ha manupuna ko hono ongo kapakaú. ʻOku hanga ʻe ha foʻi manupuna ʻo ʻufiʻufi ʻaki kinaua ʻa hono ʻuhikí, ʻo maluʻi kinautolu mei he fanga manu fekaí. ʻI he hangē ha fanga kiʻi ʻuhikí, ʻoku tau malu ʻi he malumalu ʻo e fulufulu fakaefakatātā ʻo Sihová koeʻuhi kuo tau maʻu ʻa e hūfangaʻanga ʻi heʻene kautaha Kalisitiane moʻoní.​—Lute 2:12; Sāme 5:​1, 11.

 8. ʻOku anga-fēfē ʻa e hoko ʻa e “fai moʻoni” ʻa Sihová ko ha fuʻu pā mo ha fakaū lahí?

⁸ ʻOku tau falala ki he “fai moʻoni,” pe loto-tōnungá. ʻOku hangē ia ha fuʻu pā lahi ʻi he kuonga muʻá, ʻo faʻa meimei hangē ha matapaá ʻa hono fōtungá pea lahi feʻunga ke ne ʻufiʻufi ʻa e sino kotoa ʻo ha taha. (Sāme 5:12) Ko e falala ki he maluʻi peheé ʻokú ne fakatauʻatāinaʻi kitautolu mei he ilifiá. (Senesi 15:1; Sāme 84:11) ʻI he hangē ko ʻetau tuí, ko e fai moʻoni ʻa e ʻOtuá ko ha fuʻu pā fakaemaluʻi lahi ia ʻokú ne taʻofi ʻa e ngaahi ngahau vela ʻa Sētané pea paleʻi ʻa e ngaahi fana mai ʻa e filí. (Efeso 6:16) Ko ha toe fakaū ia, ko ha foʻi māʻolunga fakaemaluʻi mālohi ʻa ia ʻoku tau tuʻu maʻu mei mui ai.

‘E Ikai Te Tau Manavahe’

 9. Ko e hā ʻoku malava ai ke hoko ʻa e poʻulí ko ha taimi fakamanavaheé, ka ko e hā ʻoku ʻikai ke tau manavahē ai kitautolú?

⁹ ʻI he vakai atu ki he maluʻi ʻa e ʻOtuá, ʻoku pehē ʻe he tokotaha-tohi-sāmé: “E ikai te ke manavahe koeuhi koe mea fakailifia i he bo; be koeuhi koe gahau oku buna atu i he aho; Be koeuhi koe mahaki lahi oku eveeva i he bouli; be koeuhi koe fakaauha oku fakaojioji i he hoata.” (Sāme 91:​5, 6, PM) Koeʻuhi ʻoku fakahoko ʻa e ngaahi ngāue kovi lahi ʻo pulia ʻi he fakapoʻulí, ʻoku malava ai ʻa e poʻulí ke hoko ko ha taimi fakalilifu. ʻI he lotolotonga ʻo e fakapoʻuli fakalaumālie ʻokú ne ʻufiʻufi ʻa e māmaní he taimi ní, ʻoku faʻa hanga ai ʻa hotau ngaahi filí ki he ngaahi ngāue kākā ʻi ha feinga ke fakaʻauha hotau tuʻunga fakalaumālié pea taʻofi ʻetau ngāue fakamalangá. Ka ‘ʻoku ʻikai ke tau manavahe koeuhi ko e mea fakailifia i he bo’ koeʻuhí ʻoku maluʻi kitautolu ʻe Sihova.​—Sāme 64:​1, 2; 121:4; Aisea 60:2.

10. (a) ʻOku ʻuhinga nai ki he hā ʻa e “gahau oku buna atu i he aho,” pea ʻoku anga-fēfē ʻetau tali ki aí? (e) Ko e hā ʻa e natula ʻo e “mahaki lahi oku eveeva i he bouli,” pea ko e hā ʻoku ʻikai ke tau manavahē ai ki aí?

¹⁰ “Koe gahau oku buna atu i he aho” ʻoku hā ʻoku ʻuhinga ia ki he ʻohofi ʻaki ʻa e leá. (Sāme 64:​3-5; 94:20) ʻI heʻetau kīvoi ʻi hono ʻoatu ʻa e fakamatala moʻoní, ʻoku fakamoʻoniʻi ai ʻa e taʻeʻaonga ʻa e fakafepaki fakahāhā pehē ki heʻetau ngāue toputapú. ʻIkai ngata aí, ʻoku ʻikai ke tau manavahē ki he “mahaki lahi oku eveeva i he bouli.” Ko ha mahaki fakaʻauha fakaefakatātā ʻeni ʻoku mafola ʻi he lotolotonga ʻo e fakapoʻuli ʻo e māmani mahakiʻia fakaeʻulungaanga mo fakalotu ʻa ia ʻoku tokoto ʻi he mālohi ʻo Sētané. (1 Sione 5:19) ʻOkú ne fakatupu mai ha tuʻunga fakatupu mate ʻo e fakakaukaú mo e lotó, ʻo tuku ai ʻa e kakaí ʻi he fakapoʻuli ʻi he fekauʻaki mo Sihová, ko ʻene ngaahi taumuʻá, mo ʻene ngaahi tokonaki anga-ʻofá. (1 Timote 6:4) ʻI he lotolotonga ʻo e fakapoʻuli ko ʻení, ʻoku ʻikai ke tau manavahē, koeʻuhí ʻoku tau maʻu ʻa e maama fakalaumālie lahi fau.​—Sāme 43:3.

11. Ko e hā ʻoku hoko ki he faʻahinga ko ia ʻoku nau hokosia ʻa e ‘fakaojioji i he hoataá’?

¹¹ “Koe fakaauha oku fakaojioji i he hoata” ʻoku ʻikai foki te ne fakamanavaheeʻi kitautolu. ʻOku ʻuhinga nai ʻa e “hoata” ki he meʻa ʻoku taku ko e fakamaama ʻa e māmaní. Ko e faʻahinga ko ia ʻoku tō ki heʻene ngaahi fakakaukau fakamatelié ʻoku nau tofanga ʻi he ʻauha fakalaumālie. (1 Timote 6:​20, 21) ʻI heʻetau talaki loto-toʻa ʻa e pōpoaki ʻo e Puleʻangá, ʻoku ʻikai ai ke tau manavahē ki ha taha pē ʻo hotau ngaahi filí, he ko Sihova ʻa hotau Tokotaha-Maluʻí.​—Sāme 64:1; Palovepi 3:​25, 26.

12. ʻI he tafaʻaki ʻo hai ʻoku “tō” ai ʻa e toko laui afé, pea ʻi he founga fē?

¹² ʻOku hoko atu ʻa e tokotaha-tohi-sāmé: “ʻE to ʻi ho tafaʻaki ha toko afe, mo e tokoʻi mano ʻi ho toʻomataʻu e; kae ʻikai ofi kiate koe. Ngata pe te ke sio ʻaki ho mata, ʻo vakai ʻa e totongi ʻa e kau angahala.” (Sāme 91:​7, 8) Koeʻuhi ko e ʻikai te nau ʻai ʻa Sihova ko honau hūfangaʻangá, ʻoku “to” ai ʻa e tokolahi ʻi he mate fakalaumālie ʻi hotau “tafaʻaki.” Ko hono moʻoní, ko e “tokoʻi mano” kuo nau tō ʻi he “toʻomataʻu” ʻo e kau ʻIsileli fakalaumālie ʻi he ʻaho ní. (Kaletia 6:16) Kae tatau ai pē pe ko e kau Kalisitiane pani kitautolu pe ko honau ngaahi tākanga ʻosi fakatapuí, ʻoku tau malu ʻi he “botu lilo” ʻa e ʻOtuá. ʻOku tau ‘sio [pē] ʻo vakai ki he totongi ʻa e kau angahalá,’ ʻa ia ʻoku nau utu ʻa e mamahi ʻi he founga fakakomēsialé, fakalotú mo e ngaahi founga kehé.​—Kaletia 6:7.

‘ʻE ʻIkai ha Fakatamaki ʻe Tō Kiate Kitautolu’

13. Ko e hā ʻa e ngaahi fakatamaki ʻe ʻikai tō mai kiate kitautolú, pea ko e hā hono ʻuhingá?

¹³ Neongo ʻoku holafa ʻa e maluʻanga ʻo e māmani ko ʻení, ʻoku tau fakamuʻomuʻa ʻe kitautolu ʻa e ʻOtuá pea maʻu ʻa e loto-toʻa mei he ngaahi lea ʻa e tokotaha-tohi-sāmé: “Koeʻuhi naʻá ke pehē: Ko Sihova ʻa hoku hūfangaʻangá, kuó ke ʻai ʻa e Fungani Māʻolungá tonu ko ho nofoʻanga; ʻe ʻikai ha fakatamaki ʻe tō kiate koe, pea ʻe ʻikai ofi ki ho tēnití naʻa mo ha mala.” (Sāme 91:​9, 10, NW) ʻIo, ko Sihova ʻa hotau hūfangaʻangá. Kae kehe, ʻoku tau toe ʻai ʻa e Fungani Māʻolungá ko ‘hotau nofoʻanga,’ ʻa ia ʻoku tau maʻu ai ʻa e maluʻanga. ʻOku tau fakamālō kia Sihova ʻi hono tuʻunga ko e Hau Fakalevelevá, ‘nofo’ ʻiate ia ʻi hono tuʻunga ko hotau Matavai ʻo e maluʻangá, pea talaki atu ʻa e ongoongo lelei ʻo hono Puleʻangá. (Mātiu 24:14) Ko ia ai, ‘ʻe ʻikai ha fakatamaki ʻe tō kiate kitautolu’​—ʻe ʻikai ha taha ʻo e ngaahi fakatamaki naʻe fakamatalaʻi ki muʻa ʻi he saame ko ʻení. Naʻa mo e taimi ʻoku tau hokosia fakataha ai mo e niʻihi kehé ʻa e ngaahi fakatamaki hangē ko e ngaahi mofuiké, ngaahi afaá, ngaahi tāfeá, ngaahi hongé mo e ngaahi maumau ʻi he taú, ʻoku ʻikai ke fakaʻauha ʻe he ngaahi meʻá ni ʻetau tuí pe ko ʻetau malu fakalaumālié.

14. ʻI he tuʻunga ko e kau sevāniti ʻa Sihová, ko e hā ʻoku ʻikai ke uesia ai kitautolu ʻe he ngaahi mala fakatupu maté?

¹⁴ Ko e kau Kalisitiane paní ʻoku nau hangē ha kau muli nofo hili ʻoku nau nofo ʻi ha ngaahi tēniti ʻo mavahe mei he ngaahi meʻa ʻo e fokotuʻutuʻu ko ʻení. (1 Pita 2:11) ‘ʻE ʻikai ofi ki honau tēnití naʻa mo ha mala.’ Tatau ai pē pe ko ʻetau ʻamanakí ʻoku fakahēvani pe fakaemāmani, ʻoku ʻikai ko ha konga kitautolu ʻo e māmaní, pea ʻoku ʻikai uesia kitautolu ʻe he ngaahi mala fakatupu mate fakalaumālie ko ia hangē ko ʻene ʻulungaanga taʻetāú, tuli ki he meʻa fakamatelié, lotu loí mo e lotu ki he “manu fekai” mo hono “imisi,” ʻa e Ngaahi Puleʻanga Fakatahatahá.​—Fakahā 9:​20, 21; 13:​1-18; Sione 17:16.

15. ʻI he ngaahi tafaʻaki fē ʻoku tau maʻu ai ʻa e tokoni fakaeʻāngeló?

¹⁵ ʻI he fekauʻaki mo e maluʻi ʻoku tau maʻú, ʻoku tānaki mai ʻe he tokotaha-tohi-sāmé: “Te ne [ Sihova] kouna ʻene kau angelo telia koe, ke tauhi koe ʻi ho hala fuape. Te nau fataki nima koe, naʻa pakia ʻi he maka ho vaʻe.” (Sāme 91:​11, 12) Kuo tuku ʻa e mālohi ki he kau ʻāngeló ke nau maluʻi kitautolu. (2 Tuʻi 6:17; Sāme 34:​7-9; 104:4; Mātiu 26:53; Luke 1:19) ʻOku nau tauhi kitautolu ‘ʻi hotau hala fuape.’ (Mātiu 18:10) ʻOku tau maʻu ʻa e tataki mo e tauhi fakaeʻāngeló ʻi hotau tuʻunga ko e kau fanongonongo ʻo e Puleʻangá pea ʻoku ʻikai ke tau tūkia fakalaumālie. (Fakahā 14:​6, 7) Naʻa mo e ‘ngaahi maka’ hangē ko e ngaahi fakataputapui ki heʻetau ngāué kuo ʻikai te ne ʻai kitautolu ke tau tūkia ʻo mole ai ʻa e hōifua fakaʻotuá.

16. ʻOku anga-fēfē ʻa e kehekehe ʻa e ngaahi ʻohofi ʻoku fai ʻe ha ‘laione mui’ pea mo ha ‘ngata,’ pea ʻoku anga-fēfē ʻetau tali ki aí?

¹⁶ ʻOku hoko atu ʻa e tokotaha-tohi-sāmé: “Te ke molomoloki ae laione moe gata: koe laione mui moe talakone [“ngata lahí,” NW] te ke malaki hifo ia.” (Sāme 91:​13, PM) Hangē pē ko hono fai ʻe ha laione mui ha ʻohofi fakahangatonu mei muʻá, ko e niʻihi ʻo hotau ngaahi filí ʻoku nau fakahāhā ʻenau fakafepaki fakahāhaá ʻaki hono fakapaasi ha ngaahi lao naʻe faʻufaʻu ke ne taʻofi ʻetau ngāue fakamalangá. Tuku kehe ia, ʻoku toe fai mai kiate kitautolu ʻa e ngaahi ʻohofi taʻeʻamanekina hangē ko ia ʻoku fai ʻe ha ngata mei ha feituʻu fakapulipulí. ʻI he toitoi mei mui ʻo ʻikai ʻasi maí, ʻoku ʻohofi ai kitautolu ʻe he haʻa faifekaú ʻi he taimi ʻe niʻihi ʻo fakafou mai ʻi he kau faʻu laó, kau fakamāú, mo e niʻihi kehe. Ka ʻi he tokoni ʻa Sihová, ʻoku tau kumi ai ʻi he melino ki he fakangofua ʻi he ngaahi fakamāuʻangá, ʻo ‘taukapoʻi mo fokotuʻu fakalao ai ʻa e ongoongo leleí.’​—Filipai 1:​7, NW; Sāme 94:​14, 20-22.

17. ʻOku anga-fēfē ʻetau malaki hifo ʻa e ‘laione muí’?

¹⁷ ʻOku lea ʻa e tokotaha-tohi-sāmé fekauʻaki mo hono malaki hifo ʻo e ‘laione muí mo e ngata lahí.’ Ko e laione mui tangatá ʻoku malava ke mātuʻaki fekai ia, pea ko ha ngata lahi ʻoku malava ke pehē ko ha manu ngaolo lahi fau ia. (Aisea 31:​4, NW) Tatau ai pē pe ʻoku fēfē ʻa e fekai ʻa e laione mui tangatá ʻi he taimi ʻokú ne fai ai ha ʻohofi fakahangatonu mei muʻa, ʻoku tau malaki hifo fakaefakatātā ia ʻaki ʻa e talangofua ki he ʻOtuá kae ʻikai ki he kau tangata pe ngaahi kautaha hangē ha laioné. (Ngāue 5:29) Ko ia, ʻoku ʻikai ke hanga ʻe he “laione” fakatuʻutāmakí ia ʻo fakatupunga ke tau lavea fakalaumālie.

18. ʻOku hanga ʻe he “ngata lahi” ʻo fakamanatu mai kiate kitautolu ʻa hai, pea ko e hā ʻoku fiemaʻu ke tau faí kapau ʻoku ʻohofi kitautolu?

¹⁸ ʻI he Septuagint faka-Kalisí, ko e “ngata lahí” ʻoku ui ia “ko ha talākoni.” ʻOku fakamanatu lelei mai nai ʻe he meʻá ni kiate kitautolu “ʻa e Talakoni lahi . . . ko e Ngata ʻo ono ʻaho, ʻa e toko taha ʻoku ui ko e Tevolo mo Setane.” (Fakahā 12:​7-9; Senesi 3:15) ʻOku hangē ia ha fuʻu manu ngaolo fakalilifu ʻoku malava ke ne laiki mo folofua ʻa e manu ʻokú ne maʻú. (Selemaia 51:34) ʻI he taimi ʻoku feinga ai ʻa Sētane ke ne tauheleʻi kitautolú, ʻo laiki kitautolu ʻaki ʻa e ngaahi tenge ʻa e māmani ko ʻení, pea folofua kitautolú, tau fakaʻataʻatā kitautolu mei heʻene fakapōpulá pea malaki hifo ʻa e “ngata lahi” ko ʻení. (1 Pita 5:8) Ke kau ʻi hono fakahoko ʻo e Loma 16:20 kuo pau ke fai ʻe he toenga ʻo e kau paní ʻa e meʻá ni.

Ko Sihova​​—Hotau Matavai ʻo e Fakamoʻuí

19. Ko e hā ʻoku tau hūfanga ai ʻia Sihová?

¹⁹ ʻI he fekauʻaki mo e tokotaha lotu moʻoní, ʻoku fakafofongaʻi ʻe he tokotaha-tohi-sāmé ʻa e ʻOtuá ʻi he pehē: “Koeʻuhi kuó ne tuku ʻene ʻofá kiate au, te u tokonaki foki kiate ia ha haoʻanga. Te u maluʻi ia koeʻuhi kuó ne hoko ʻo ʻiloʻi hoku huafá.” (Sāme 91:​14, NW) Ko e kupuʻi lea “Te u maluʻi ia” ʻoku ʻuhinga fakaelea, “Te u ʻai ia ke māʻolunga,” ʻa ia, ʻe ʻikai fai ha aʻu ki ai. ʻOku tau hūfanga kia Sihova ʻi he tuʻunga ko ʻene kau lotú tautefito koeʻuhí ‘kuo tau tuku ʻetau ʻofá kiate ia.’ (Maake 12:​29, 30; 1 Sione 4:19) Ko ia ai, ʻoku hanga ʻe he ʻOtuá ʻo ‘tokonaki mai kiate kitautolu ʻa e haoʻanga’ mei hotau ngaahi filí. ʻE ʻikai ʻaupito ke fakaʻauha atu kitautolu mei he māmaní. ʻI hono kehé, ʻe fakahaofi kitautolu koeʻuhí ʻoku tau ʻilo ʻa e huafa fakaʻotuá pea ui ki ai ʻi he tui. (Loma 10:​11-13) Pea ʻoku tau fakapapauʻi ke ‘ʻalu ʻaki ʻa e huafa ʻo Sihová ʻo taʻengata.’​—Maika 4:5; Aisea 43:​10-12.

20. Hangē ko ia ʻoku fakaʻosiʻaki ʻe he Sāme 91, ko e hā ʻoku talaʻofa ʻaki ʻe Sihova ki heʻene sevāniti loto-tōnungá?

²⁰ Hangē ko ia ʻoku fakaʻosiʻaki ʻe he Sāme 91, ʻoku pehē ʻe Sihova ʻo kau ki heʻene sevāniti loto-tōnungá: “Te ne ui kiate au, pea te u tali; te u ʻiate ia ʻi he mamahi: te u hamusi ia mo fakalangilangiʻi. Te u ʻai ʻa e moʻui fuoloa ke ne topono ai, pea te u tuku ke ne [mātaʻi] ʻeku fakamoʻui.” (Sāme 91:​15, 16) ʻI he taimi ʻoku tau kole ai ki he ʻOtuá ʻi he lotu ʻo fakatatau ki hono finangaló, ʻokú ne ʻomai ʻa e tali kiate kitautolu. (1 Sione 5:​13-15) Kuo tau ʻosi paasi mai ʻi he mamahi lahi koeʻuhí ko e fakafili naʻe fakalanga ʻe Sētané. Ka ko e ngaahi foʻi lea ko ia “te u ʻiate ia ʻi he mamahi” ʻokú ne teuʻi kitautolu ki he ngaahi ʻahiʻahi ʻi he kahaʻú pea fakapapauʻi mai kiate kitautolu ʻe tokoniʻi kitautolu ʻe he ʻOtuá ʻi he taimi ʻe fakaʻauha ai ʻa e fokotuʻutuʻu fulikivanu ko ʻení.

21. Kuo anga-fēfē hono ʻosi fakalāngilangiʻi ʻa e kau paní?

²¹ Neongo ʻa e fakafepaki ʻita ʻa Sētané, ko e fika kakato ʻo e kau paní ʻi hotau lotolotongá ʻe fakalāngilangiʻi ia ʻi hēvani ʻi he taimi kuo kotofa ʻa Sihová​—hili ia ha “moʻui fuoloa” ʻi he māmaní. Neongo ia, ko e ngaahi faifakahaofi fakaofo ʻa e ʻOtuá kuó ne ʻosi ʻomai ʻe ia ʻa e fakalāngilangi fakalaumālie ki he kau paní. Pea ko ha lāngilangi lahi ē ka ko kinautolu ke takimuʻa ʻi he tuʻunga ko e Kau Fakamoʻoni ʻa Sihova ʻi he māmaní ʻi he ngaahi ʻaho fakaʻosí ni! (Aisea 43:​10-12) Ko e fakahaofi lahi taha ʻa Sihova ki hono kakaí ʻe hoko ia he lolotonga ʻa ʻene tau lahi ʻo ʻĀmaketoné ʻi heʻene fakatonuhiaʻi hono tuʻunga-haú mo fakamāʻoniʻoniʻi hono huafa māʻoniʻoní.​—Sāme 83:18; Isikeli 38:23; Fakahā 16:​14, 16.

22. Ko hai te ne ‘mātaʻi ʻa e fakamoʻui ʻa Sihová’?

²² Pe ko e kau Kalisitiane pani kitautolu pe ko honau ngaahi takanga ʻosi fakatapuí, ʻoku tau hanga ki he ʻOtuá ki he fakamoʻui. ʻI he lolotonga “ʻa e ʻAho ʻo Sihova, ʻa e ʻaho lahi mo fakalilifu,” ko e faʻahinga ko ia ʻoku nau tauhi mateaki ʻa e ʻOtuá ʻe fakamoʻui. (Sioeli 2:​30-32) Ko e faʻahinga ʻo kitautolu ʻe faʻuʻaki ʻa e “fuʻu kakai lahi” ʻo e kau hao moʻui atu ki he māmani foʻou ʻa e ʻOtuá pea ʻe kei loto-tōnunga ai pē ʻi he lolotonga ʻo ha ʻahiʻahi fakaʻosí te nau ‘topono ʻi he moʻui fuoloa meiate ia’​—ko e moʻui taʻeʻiai hano ngataʻanga. Te ne toe fokotuʻu hake ʻa e fuʻu kakai tokolahi ʻaupito. (Fakahā 7:9; 20:​7-15) Ko e moʻoni ʻe mokoi lahi ʻa Sihova ke ‘tuku kitautolu ke tau mātaʻi ʻa e fakamoʻuí’ fakafou ʻia Sīsū Kalaisi. (Sāme 3:8) ʻI he ngaahi ʻamanaki maʻongoʻonga pehē ʻoku ʻi muʻa ʻiate kitautolú, ʻai ke tau hanga maʻu pē ki he ʻOtuá ki ha tokoni ʻi hono lau hotau ngaahi ʻahó ki hono lāngilangí. ʻAki ʻetau ngaahi leá mo e ngaahi ngāué, ʻofa ke tau hokohoko atu ke fakamoʻoniʻi ko Sihova ʻa hotau hūfangaʻangá.

[Fakamatala ʻi lalo]

ʻE Anga-Fēfē Haʻo Tali?

• Ko e hā ʻa e “botu lilo i he fugani maoluga”?

• Ko e hā ʻoku ʻikai ke tau manavahē aí?

• ʻOku anga-fēfē ʻa e pehē ‘ʻe ʻikai ha fakatamaki ʻe tō kiate kitautolú’?

• Ko e hā ʻoku malava ai ke tau pehē ko Sihova ʻa hotau matavai ʻo e fakamoʻuí?

[Fakatātā ʻi he peesi 17]

ʻOkú ke ʻilo ʻa e founga ʻoku hoko ai ʻa e fai moʻoni ʻa Sihová ko ha fuʻu pā lahi kiate kitautolú?

[Fakatātā ʻi he peesi 18]

ʻOku tokoniʻi ʻe Sihova ʻa ʻene kau sevānití ke nau fakahoko ʻenau ngāue fakafaifekaú neongo ʻa e ngaahi ʻohofi taʻeʻamanekiná mo e fakafepaki fakahāhaá

[Maʻuʻanga]

Ngata: A. N. Jagannatha Rao, Trustee, Madras Snake Park Trust