Ngaahi Fehuʻi mei he Kau Lautohí

ʻOku fakahaaʻi ʻe he Sāme 102:26 ko e māmaní mo e ngaahi langí ʻe “ʻauha.” ʻOku ʻuhinga ʻa e fakamatala ko iá ʻe fakaʻauha ʻa e palanite ko Māmaní?

ʻI ha lotu kia Sihova, naʻe fakahaaʻi ai ʻe he tokotaha-tohi-sāmé: “ʻI he kamataʻanga naʻa ke tanupou ʻa mamani; pea ko e ngaue ʻa ho nima ʻa e ngaahi langi. Ko kinautolu ʻe ʻauha, kae tuʻu ai pe ʻa e ʻAfiona: ʻio, te nau fakaʻau kotoa ke motuʻa hange ko e kofu; pea te ke fetongi ia hange ha pulupulu: ʻio, ʻe fetongi pe kinautolu.” (Sāme 102:​25, 26) Ko e potutohí ʻoku fakahaaʻi ai ko e ongo vēsí ni ʻoku lau ia ʻo ʻikai fekauʻaki mo e fakaʻauha ʻo e foʻi māmaní, ka ʻoku fekauʻaki ia mo e tuʻunga ʻitāniti ʻo e ʻOtuá. ʻOku toe fakahaaʻi ʻe he potutohí ʻa e ʻuhinga ʻoku fakafiemālie ai ʻa e foʻi moʻoni mātuʻaki mahuʻinga ko iá ki he kau sevāniti ʻa e ʻOtuá.

Ko e tokotaha-tohi-sāmé, mahalo ʻi he fakaheeʻi ki Pāpiloné, ʻokú ne kamata ʻaki hono fakamatalaʻi ʻa ʻene ngaahi faingataʻaʻiá. ʻOkú ne tangilāulau ʻo pehē ko ʻene moʻuí ʻoku ʻalu vave ʻo hangē ko e “koto kohu pe.” Ko e loto-moʻua lahi fakaeongó ʻoku haveki ai hono sinó, ʻo ʻai hono ngaahi huí ke ongoʻi ‘ʻafu vela ʻo hange ha vaʻa fefié.’ ʻOkú ne ongosia, ʻo “mae hange ha musie,” pea ʻokú ne ongoʻi taʻelata, ʻo “hange ko ha fuleheu toko tefua ha tuʻafale.” Ko hono ngaahi ʻahiʻahí kuo ʻai ai ʻo mole meiate ia ʻa ʻene holi ke kaí, pea ko hono ngaahi ʻahó ʻoku fakaʻilongaʻiʻaki ʻa e mamahi. (Sāme 102:​3-​11) Naʻa mo ia, kuo ʻikai ke tukuange ʻe he tokotaha-tohi-sāmé ʻa e kotoa ʻo ʻene ʻamanakí. Ko e hā ʻoku ʻikai aí? Koeʻuhi ko e meʻa kuo talaʻofa ʻe Sihova ke fai ki Saione, pe Selusalemá.

Neongo kuo fakaʻauha ʻa Saione, kuo talaʻofa ʻa Sihova ʻe toe fakafoʻou ia. (Aisea 66:8) Ko ia ai, ʻoku pehē ʻe he tokotaha-tohi-sāmé ʻi he tuipau kia Sihova: “Te ke fakaʻatuʻi ʻa Saione; he ko e kuonga eni ke fai ʻofa, ʻio, kuo hokosia hono taimi kotofa; koeʻuhi ko e langa ʻa Saione ʻe Sihova.” (Sāme 102:​13, 16) ʻOku toe foki leva ʻa e tokotaha-tohi-sāmé ki he kaveinga ʻo ʻene faingataʻaʻia fakafoʻituituí. Ko hono moʻoní, ʻokú ne fakaʻuhinga kapau ko Selusalema kuo fakalalá ʻe lava ke toe fakafoʻou ʻe he mālohi ʻo e ʻOtuá, ʻoku malava lelei ʻe Sihova ke ne fakahaofi ia mei hono tuʻunga fakamamahí. (Sāme 102:​17, 20, 23) Pea ʻoku ueʻi ʻe ha toe meʻa kehe ʻa e tokotaha-tohi-sāmé ke tuku ai ʻene falala kakató kia Sihova. Ko e hā ia? Ko e moʻoniʻi meʻa ko ia ʻo e ʻi he tuʻunga taʻengata ʻa e ʻOtuá.

Ko e ʻi ai taʻengata ʻa Sihová ʻoku tuʻu ia ʻo kehekehe mataʻāʻā mei he tuʻunga nounou ʻo e moʻui tonu ʻa e tokotaha-tohi-sāmé. “Ko ho gaahi taʻu oku tologa ki he toutagata kotoabe,” ko ʻene lea ia kia Sihová. (Sāme 102:​24, PM) ʻOku hoko atu ʻa e tokotaha-tohi-sāmé ʻo fakahaaʻi: “ʻI he kamataʻanga naʻa ke tanupou ʻa mamani; pea ko e ngaue ʻa ho nima ʻa e ngaahi langi.”​—Sāme 102:25.

Neongo ia, naʻa mo e fuʻu kuonga ʻo e māmaní mo e ngaahi langí ʻoku ʻikai lava ke fakahoa ia ki he ʻi ai taʻengata ʻa Sihová. ʻOku tānaki mai ʻe he tokotaha-tohi-sāmé: “Ko kinautolu [foʻi māmaní mo e ngaahi langí] ʻe ʻauha, kae tuʻu ai pe ʻa e ʻAfiona.” (Sāme 102:26) Ko e foʻi māmaní mo e ngaahi langi matelié ʻoku ʻauhangofua. Ko e moʻoni, ʻoku fakahaaʻi ʻe Sihova ʻi ha toe feituʻu kehe te nau tuʻu ʻo taʻengata. (Sāme 119:90; Koheleti 1:4) Ka ʻe lava ke fakaʻauha kinautolu kapau naʻe pehē ʻa e taumuʻa ʻa e ʻOtuá. ʻI hono kehé, ʻoku ʻikai lava ke mate ʻa e ʻOtuá. Ko e ngaahi meʻa fakatupu fakamatelié ʻoku hanganaki “tuʻu maʻu ʻo lauikuonga” koeʻuhi pē ko hono tokangaʻi kinautolu ʻe he ʻOtuá. (Sāme 148:6) Kapau ʻe faifai ange pea tuku ʻe Sihova ʻene fakafoʻou ʻa e ngaahi meʻa fakatupu fakamatelié, te nau hoko leva ʻo “fakaʻau kotoa ke motuʻa hange ko e kofu.” (Sāme 102:26) Hangē pē ko e lōloa ange ʻa e moʻui ʻa ha tangata ʻi he tuʻunga ʻaonga ʻo hono ngaahi valá, ʻe pehē pē ʻa e lōloa ange ʻa e moʻui ʻa Sihová ʻi he tuʻunga ʻaonga ʻo ʻene meʻa fakatupú​—kapau naʻá ne fili ke fai pehē. Kae kehe, ʻoku tau ʻiloʻi mei he ngaahi konga Tohi Tapu kehé ʻoku ʻikai pehē ʻa hono finangaló. ʻOku fakapapauʻi mai ʻe he Folofola ʻa e ʻOtuá ko Sihová kuó ne fakapapauʻi ʻe tuʻumaʻu ai pē ʻo taʻengata ʻa e foʻi māmaní mo e ngaahi langí tonu.​—Sāme 104:5.

Ko ha matavai ia ʻo e fakafiemālie ke ʻiloʻi ko Sihová te ne ʻi ai maʻu pē ke fakahoko ʻa e kotoa ʻo ʻene ngaahi talaʻofá. Tatau ai pē pe ko e hā ʻa e ngaahi ʻahiʻahi ʻe tō mai nai kiate kitautolú, ʻi he taimi ʻoku tau tangi ai kiate iá, ʻe lava ke tau tuipau te ne “tokaga ki he lotu ae majiva bea e ikai manukiʻi e nau hu.” (Sāme 102:​17, PM) ʻIo, ko e fakapapauʻi mai ʻo e tokoni ʻa Sihova ʻoku maʻu ʻi he Sāme 102 ʻoku toe fefeka ange ia ʻi he foʻi māmani ʻoku tau tuʻu aí.