ʻOsi Hono Taimí Pe Muʻomuʻa ʻi Hono Taimí?

ʻOKU ʻIKAI KO HA TOHI AKO SAIENISI ʻA E TOHI TAPÚ, KA ʻOKU ʻI AI HA NGAAHI FAKAMATALA NAʻE ʻI MUʻA MAMAʻO IA ʻI HONAU TAIMÍ. FAKAKAUKAU KI HA NGAAHI FAKATĀTĀ.

Naʻe ʻi ai ha kamataʻanga ʻo e ʻuniveesi matelié?

Naʻe tui mālohi ʻa e kau saienisi mataotaó ko e talí ko e ʻikai. ʻI he taimi ní ʻoku nau meimei tali kotoa naʻe ʻi ai ha kamataʻanga ʻo e ʻunivēsí. Naʻe leaʻaki mahino ia ʻe he Tohi Tapú talu mei muʻa.​—Sēnesi 1:1.

ʻOku fuo fēfē ʻa e māmaní?

ʻI he kuonga muʻá, naʻe fakakaukau ai ʻa e tokolahi naʻe lafalafa ʻa e māmaní. ʻI he senituli hono nima K.M., naʻe pehē ai ʻe he kau saienisi Kalisí naʻe fuopotopoto ia. Ka ki muʻa fuoloa ai​—ʻi he senituli hono valu K.M.—​naʻe lave ai ʻa e tokotaha-tohi Tohi Tapu ko ʻAiseá ki he “takatakai ʻo e māmaní,” ʻo ngāueʻaki ha foʻi lea ʻoku lava ke toe liliu ko e “fuopotopoto.”​—ʻAisea 40:22; fakamatala ʻi lalo.

ʻOku fakaʻau ke taʻeʻaonga ʻa e ngaahi langi matelié?

Naʻe akoʻi ʻe he tokotaha saienisi Kalisi ko ʻAlisitōtolo, ʻo e senituli hono fā K.M., ko e fakaʻau ke taʻeʻaongá ʻoku hoko pē ia ʻi he māmaní, lolotonga ia ko e ngaahi langi fetuʻuá heʻikai ʻaupito liliu pe fakaʻau ia ke taʻeʻaonga. Naʻe lele mai ʻa e foʻi fakakaukau ko iá he laui senituli lahi. Ka ʻi he senituli hono 19, ne maʻu ai ʻe he kau saienisí ʻa e foʻi fakakaukau fekauʻaki mo e hōloa ʻa e ʻunivēsí. ʻOku fakahaaʻi mai ai ko e meʻa kotoa, pe ʻoku ʻi he langí pe ʻi he māmaní, ʻoku fakaʻau ke taʻeʻaonga. Ko e taha ʻo e kau saienisi naʻe tokoni ki hono langaʻi ʻa e foʻi fakakaukaú ni, ko Lord Kelvin, naʻá ne fakatokangaʻi ʻoku ʻi ai ʻa e lau ʻa e Tohi Tapú fekauʻaki mo e langí mo māmani: “ʻI he hangē tofu pē ko ha kofú te nau hoko kotoa ʻo popo.” (Saame 102:25, 26) Naʻe tui ʻa Kelvin, hangē ko ia ʻoku akoʻi mai ʻe he Tohi Tapú, ʻoku malava ʻe he ʻOtuá ke ne fili ke taʻofi ha fakaʻau ke taʻeʻaonga pehē mei haʻane fakaʻauha ʻEne ngaahi fakatupú.​—Tangata Malanga 1:4.

Ko e hā ʻokú ne pukepuke ʻa e ngaahi palanité hangē ko hotau māmaní?

Naʻe akoʻi ʻe ʻAlisitōtolo ko e kotoa ʻo e ngaahi naunau fakalangí naʻe takaiʻi ia ʻe ha ngaahi fuopotopoto kilisitala, ʻa ia ko e foʻi fuopotopoto taki taha naʻe fepikitaki hokohoko pē, pea ko e māmaní naʻe ʻi he foʻi fuopotopoto taupotu taha ki lotó. ʻI he aʻu mai ki he senituli hono 18 T.S., naʻe tali ai ʻe he kau saienisí ʻa e foʻi fakakaukau ko e ngaahi fetuʻú mo e ngaahi palanité ʻoku tautau ʻi he ʻataá. Ka ʻi he tohi ʻa Siopé, ʻo e senituli hono 15 K.M., ʻoku tau lau ai ko e Tokotaha-Fakatupú ʻokú ne “tautau ʻa e māmaní ki he halaʻataá.”​—Siope 26:7.

KO E TOHI TAPÚ, NEONGO ʻOKU ʻIKAI KO HA TOHI AKO FAKAFAITOʻO IA, ʻOKU ʻI AI HA NGAAHI TEFITOʻI MOʻONI ʻOKÚ NE FAKAHAAʻI MAI HA ʻILO TŌMUʻA KI HE MOʻUÍ.

Fakamavaheʻi ʻa e kakai puké.

Naʻe tuʻutuʻuni ʻi he Lao ʻa Mōsesé ke tauhi ʻa e kau kiliá ke mavahe mei he niʻihi kehé. Naʻe toki ako pē ʻa e kau toketā fakafaitoʻó ke ngāueʻaki ʻa e tefitoʻi moʻoni ko ení ʻi he tō ʻa e toʻumahaki ʻi he Kuonga Lotolotó, ʻa ia ʻoku kei ʻaonga ʻaupito ia.​—Livitiko, vahe 13 mo e 14.

Fanofano ʻi he hili ʻa e ala ki ha sino kuo mate.

Tuku kehe ʻa e konga ki mui ʻo e senituli hono 19, naʻe faʻa ngāue ʻa e kau toketaá ki he ngaahi ʻangaʻangá pea hoko atu ai pē ki he kau mahakí​—ʻo ʻikai fai ha fanofano ʻi he vahaʻa ʻo e ongo foʻi ngāue ko iá. Naʻe lahi ʻa e mate ko e tupu mei he tōʻonga ko iá. Kae kehe, naʻe fakahaaʻi ʻe he Lao ʻa Mōsesé ko ha taha pē naʻe ala ki ha sino kuo mate naʻá ne taʻemaʻa fakaeouau. Naʻe aʻu ʻo fakahinohinoʻi ai ke ngāueʻaki ʻa e vaí ki he fakamaʻa fakaeouau ʻi he ngaahi meʻa peheé. Ko e ngaahi tōʻonga fakalotu ko iá naʻe toe ʻaonga moʻoni ia ki he moʻui leleí.​—Nōmipa 19:11, 19.

Fakaʻauha ʻa e kinohaʻá.

ʻI he taʻu taki taha, ʻoku laka hake he vaeua milioná ʻa e fānau ʻoku mate ʻi he fakalelé, ko e ʻuhinga lahi ko hono uesia kinautolu ʻe he kinohaʻa mei he tangatá ʻa ia ʻoku ʻikai ke fakaʻauha ʻi he founga totonú. ʻOku pehē ʻi he Lao ʻa Mōsesé ko e kinohaʻa mei he tangatá ʻoku totonu ke tanu, pe fakaʻauha mamaʻo mei he nofoʻanga ʻo e kakaí.​—Teutalōnome 23:13.

Taimi tonu ʻo e kamú.

Naʻe tuʻutuʻuni ʻi he Lao ʻa e ʻOtuá ko ha kiʻi tama tangata ʻoku totonu ke kamu ia ʻi he ʻaho hono valu ʻo ʻene moʻuí. (Livitiko 12:3) ʻI he fanga kiʻi pēpē toki fanauʻí, ko e malava ko ia ʻa e totó ke fatu tuʻú ʻoku ʻiloʻi ʻoku ʻi he tuʻunga nōmolo ia ʻi he hili ʻa e ʻuluaki uiké. ʻI he taimi ʻo e Tohi Tapú, ki muʻa ke ala maʻu ʻa e ngaahi faitoʻo ʻoku fakalakalaká, ko e tatali ke ʻosi ha uike pea toki kamú ko ha maluʻi fakapotopoto ia.

Ko e fehokotaki ʻi he vahaʻa ʻo e moʻui lelei fakaeongó mo e moʻui lelei fakasinó.

ʻOku pehē ʻe he kau fakatotolo mo e kau saienisi fakafaitoʻó ko e ngaahi ongo ʻoku leleí hangē ko e fiefiá, ʻamanakí, houngaʻiá, mo e loto-lelei ke fakamolemolé ʻoku ʻi ai hono ola ʻaonga ki he moʻui leleí. ʻOku pehē ʻe he Tohi Tapú: “Ko ha loto-fiefia ko ha faitoʻo lelei, ka ko ha laumālie mafesi ʻokú ne fakamaha ʻa e ivi ʻo ha taha.”​—Palōveepi 17:22.