Ko e Hā ʻa e Moʻoni Fekauʻaki mo e Kau ʻĀngeló?

ʻOku loto ʻa Sihova ke tau ako fekauʻaki mo hono fāmili ʻi hēvaní. Ko e fāmili ko iá ʻoku kau ai ʻa e kau ʻāngeló, ʻa ia ʻoku ui ko e “ngaahi foha . . . ʻo e ʻOtuá.” (Siope 38:7) Ko e hā ʻoku akoʻi mai ʻe he Tohi Tapú fekauʻaki mo e kau ʻāngeló? ʻOku anga-fēfē ʻenau tākiekina ʻa e kakaí? Ko e kotoa ʻo e kau ʻāngeló ko e konga ia ʻo e fāmili ʻo e ʻOtuá?

1. Ko hai ʻa e kau ʻāngeló?

Naʻe fakatupu ʻe Sihova ʻa e kau ʻāngeló ki muʻa ke ne ngaohi ʻa e māmaní. Hangē ko iá, ko e kau ʻāngeló ʻa ia ko e ngaahi laumālie ʻoku nau nofo ʻi hēvani. (Hepelū 1:14) ʻOku laui miliona ʻa e kau ʻāngeló, pea ko e ʻāngelo taki taha ʻoku makehe. (Fakahā 5:11) ʻOku nau fai ki he folofola ʻa Sihová, “ʻo talangofua ki hono leʻó.” (Saame 103:20) ʻI he kuohilí, naʻe faʻa fekau atu ʻe Sihova ʻene kau ʻāngeló ke ʻoatu ʻa e ngaahi pōpoaki pea mo poupou mo fakahaofi hono kakaí. ʻI he ʻahó ni, ʻoku tataki ʻe he kau ʻāngeló ʻa e kau Kalisitiané ki he kakai ʻoku nau loto ke ako fekauʻaki mo e ʻOtuá.

2. Ko hai ʻa Sētane mo ʻene fanga tēmenioó?

Ko e kau ʻāngelo ʻe niʻihi naʻe ʻikai ke nau hanganaki faitōnunga kia Sihova. Ko e ʻuluaki ʻāngelo naʻe anga-tuʻú ko e tokotaha ia “ʻoku ui ko e Tēvoló mo Sētané, ʻa ia ʻokú ne takihalaʻi ʻa e kotoa ʻo e māmani kuo nofoʻí.” (Fakahā 12:9) Naʻe loto ʻa Sētane ke ne puleʻi ʻa e niʻihi kehé, ko ia ai naʻá ne tākiekina ʻa ʻĀtama mo ʻIvi, pea ki mui ai ʻa e kau ʻāngelo kehé, ke kau mo ia ʻi heʻene anga-tuʻú. Ko e kau ʻāngelo anga-tuʻu ko iá ʻoku ui ko e fanga tēmenioó. Naʻe kapusi kinautolu ʻe Sihova mei hēvani ki he māmaní pea ʻe fakaʻauha kinautolu.​—Lau ʻa e Fakahā 12:9, 12.

3. ʻOku anga-fēfē feinga ʻa Sētane mo e fanga tēmenioó ke takihalaʻi kitautolú?

Ko Sētane mo e fanga tēmenioó ʻoku nau takihalaʻi ʻa e kakai tokolahi fakafou ʻi he tōʻonga fakatēmenioó, pe fakahaʻele fakafaʻahikehé, ʻa ia ko e tōʻonga kovi ʻo e feinga ke fetuʻutaki mo e ngaahi laumālié. Ko e fakatātaá, ko e kakai ʻe niʻihi ʻoku nau fetuʻutaki mo e kau vavalo ki he fetuʻú, faʻahinga ʻoku nau tala ʻa e kahaʻú, kau faitoʻo fakamahaki pea mo e toketā fakafaimaná. Ko e niʻihi ʻoku nau kumi ki he ngaahi faitoʻo ʻoku kau ai ʻa e fakahaʻele fakafaʻahikehé. ʻOku toe kākaaʻi ʻa e kakaí ke tui ʻoku lava ke nau lea ki he kau maté. Ka ʻoku fakatokanga mai ʻa Sihova: “ʻOua naʻa tafoki ki he kau taula faʻahikehé, pea ʻoua ʻe kumi faleʻi ki he kau tala meʻa ki he kahaʻú.” (Livitiko 19:31) ʻOkú ne ʻomai kiate kitautolu ʻa e fakatokanga ko ení ke maluʻi kitautolu meia Sētane mo e fanga tēmenioó. Ko e ngaahi fili kinautolu ʻo e ʻOtuá pea ʻoku nau loto ke tau tō ki ha fakatuʻutāmaki.

KELI LOLOTO ANGE

4. ʻOku tokoniʻi ʻe he kau ʻāngeló ʻa e kakaí ke ako fekauʻaki mo Sihova

Ko e kau ʻāngelo ʻa e ʻOtuá ʻoku ʻikai ke nau malanga fakahangatonu ki he kakaí. Kae kehe, ʻoku nau tataki nai ʻa e kau sevāniti ʻa e ʻOtuá ki he kakai ʻoku nau loto ke ako lahi ange fekauʻaki mo iá. Lau ʻa e Fakahā 14:6, 7, pea lāulea leva ki he ngaahi fehuʻi ko ení:

• Ko e hā ʻoku tau fiemaʻu ai ʻa e tokoni mei he kau ʻāngeló ke malangá?

• ʻOku lava ʻa e kau ʻāngeló ke tokoniʻi kitautolu ke maʻu e kakai ʻoku nau kumi ki he moʻoní. Ko e hā hoʻo ongoʻi ki aí? Ko e hā hono ʻuhingá?

5. Talitekeʻi ʻa e fakahaʻele fakafaʻahikehé

Ko Sētane mo e fanga tēmenioó ko e ngaahi fili ʻo Sihova. Ko hotau fili foki ʻa kinautolu. Lau ʻa e Luke 9:38-42, pea lāulea leva ki he fehuʻi ko ení:

• Ko e hā ʻoku fai ʻe he fanga tēmenioó ki he kakaí?

ʻOku ʻikai ke tau loto ke fakaʻatā ʻa e fanga tēmenioó ke tākiekina kitautolu. Lau ʻa e Teutalōnome 18:10-12, pea lāulea leva ki he ngaahi fehuʻi ko ení:

• ʻI he ngaahi founga fē ʻoku feinga ai ʻa e fanga tēmenioó ke tākiekina kitautolu mo fetuʻutaki mai kia kitautolú? Ko e hā ʻa e ngaahi tōʻonga anga-maheni ʻi he feituʻu ʻokú ke nofo aí?

• ʻOkú ke fakakaukau ʻoku lelei hono taʻofi ʻe Sihova ʻa e tōʻonga fakahaʻele fakafaʻahikehé? Ko e hā hono ʻuhingá?

Huluʻi ʻa e VITIOÓ, pea lāulea leva ki he ngaahi fehuʻi hokó.

VITIŌ: “Talitekeʻi ʻa e Tēvoló” (5:02)

• ʻOkú ke fakakaukau naʻe fakatuʻutāmaki ʻa e vesa naʻe tui ʻe he pēpē ʻa Pesí? Ko e hā hono ʻuhingá?

• Ko e hā naʻe fiemaʻu kia Pesi ke ne faí ke malu ai mei he fanga tēmenioó?

Kuo fakafepakiʻi maʻu pē ʻe he kau Kalisitiane moʻoní ʻa e fanga tēmenioó. Lau ʻa e Ngāue 19:19 mo e 1 Kolinitō 10:21, pea lāulea leva ki he fehuʻi ko ení:

• Ko e hā ʻoku mahuʻinga ai ke fakaʻauha ha meʻa pē ʻokú ke maʻu ʻoku fekauʻaki mo e fakahaʻele fakafaʻahikehé?

6. Ikuʻi ʻa e faitau mo Sētane mo ʻene fanga tēmenioó

ʻOku puleʻi ʻe Sētane ʻa e fanga tēmenioó. Ka ko e kau ʻāngelo faitōnungá ʻoku tataki ʻe he ʻāngelo-pulé ʻa Maikeli, ko ha toe hingoa ʻe taha ʻo Sīsū. ʻOku mālohi fēfē ʻa Maikeli? Lau ʻa e Fakahā 12:7-9, pea lāulea leva ki he ongo fehuʻi ko ení:

• Ko hai ʻoku mālohi angé, ko Maikeli mo ʻene kau ʻāngeló, pe ko Sētane mo ʻene fanga tēmenioó?

• ʻOku totonu ke ilifia ʻa e kau muimui ʻo Sīsuú kia Sētane mo ʻene fanga tēmenioó?

ʻE lava ke ke ikuna ʻa e faitau mo Sētane mo ʻene fanga tēmenioó. Lau ʻa e Sēmisi 4:7, pea lāulea leva ki he fehuʻi ko ení:

• ʻE lava fēfē ke ke maluʻi koe meia Sētane mo e fanga tēmenioó?

FAKANOUNOU

ʻOku tokoniʻi kitautolu ʻe he kau ʻāngelo faitōnungá. Ko Sētane mo ʻene fanga tēmenioó ko e ngaahi fili ʻo Sihova, pea ʻoku nau ngāueʻaki ʻa e fakahaʻele fakafaʻahikehé ke takihalaʻi ʻa e kakaí.

Fakamanatu

• ʻOku anga-fēfē hono tokoniʻi ʻe he kau ʻāngelo ʻa Sihová ʻa e kakaí ke ako fekauʻaki mo iá?

• Ko hai ʻa Sētane mo ʻene fanga tēmenioó?

• Ko e hā ʻokú ke loto ai ke mavahe ʻaupito mei he fakahaʻele fakafaʻahikehé?

AKO LAHI ANGE

Sio angé pe ko e hā ʻoku tau ʻiloʻi ai ko Sīsū ʻa e ʻāngelo-pulé ʻa Maikeli.

“Ko Hai ʻa e ʻĀngelo-Pule ko Maikelí?” (Kupu ʻi he uepisaití)

Sio angé ki ha fakamoʻoni ko e Tēvoló ko ha tokotaha moʻoni.

“Ko ha Tokotaha Moʻoni ʻa e Tēvoló?” (Kupu ʻi he uepisaití)

Ako angé ki he anga ʻo e tauʻatāina ha fefine mei hono puleʻi ʻe he fanga tēmenioó.

“Naʻá Ne Maʻu ha Taumuʻa ʻi he Moʻuí” (Toʻo mei he Ko e Taua Leʻo)

Ako ki he anga ʻo hono ngāueʻaki ʻe Sētane ʻa e fakahaʻele fakafaʻahikehé ke kākaaʻi ʻa e kakaí.

“Ko e Moʻoni Fekauʻaki mo e Faimaná, Fakalouʻakaú mo e Fakahaʻele Faʻahikehé” (Hala ki he Moʻui Taʻengatá, konga 5)