Vahe 16

Kamata ʻa e Pule ʻa e Founga-Pule ʻa e ʻOtuá

 1. (a) Ko e hā ʻa e meʻa kuo fuoloa ʻa e fakatuʻotuʻa ki ai ʻa e faʻahinga ʻoku tuí? (e) Ko e hā ʻoku ui ai ʻa e puleʻanga ʻo e ʻOtuá ko ha “kolo”?

KUO LAUI AFE taʻu ʻa e fakatuʻotuʻa atu ʻa e faʻahinga ʻoku tui ki he founga-pule ʻa e ʻOtuá ki he taimi ʻe kamata ai ʻene pulé. Ko e fakatātaá, ʻoku pehē ʻe he Tohitapú ko e tangata angatonu ko ʻĒpalahamé “naʻa ne nofo ʻamanaki ki he kolo ʻoku oʻona ʻa e ngaahi tuʻunga, ʻa ia ko hono fakafuofua mo hono tufunga lahi ko e ʻOtua.” (Hepelū 11:10) Ko e “kolo” ko iá ko e puleʻanga ʻo e ʻOtuá. Ka ko e hā ʻoku ui ai heni ko ha “kolo”? Koeʻuhi ʻi he kuonga muʻá naʻe ngāuelahiʻaki ke pule ha tuʻi ki ha kolo. Ko ia naʻe faʻa fakakaukau ʻa e kakaí ki ha kolo ko ha puleʻanga.

 2. (a) Ko e hā ʻokú ne fakahaaʻi ko ha meʻa moʻoni ʻa e Puleʻangá ki he muʻaki kau ākonga ʻa Kalaisi? (e) Ko e hā naʻa nau fie ʻilo ʻo fekauʻaki mo iá?

² Ko ha meʻa moʻoni ʻa e puleʻanga ʻo e ʻOtuá ki he muʻaki kau muimui ʻo Kalaisí. ʻOku hā ʻeni ʻi heʻenau loto-fieʻilo ʻo fekauʻaki mo ʻene pulé. (Mātiu 20:​20-23) Naʻe ʻi heʻenau fakakaukaú leva ʻa e fehuʻi ni: ʻE kamata pule fakakū mai ʻa Kalaisi mo ʻene kau ākongá? ʻI he taimi ʻe taha ʻo ʻene hā ki heʻene kau ākongá hili ʻene toetuʻú, naʻa nau ʻeke: “Eiki, te ke toe age i he kuoga ni ae buleaga ki Isileli?” (Ngāue 1:​6, PM) Ko ia, ʻoku ke vēlevele ke ako ke ʻilo ʻo hangē ko e kau ākonga ʻa Kalaisí, pe ʻe kamata fakakū ke pule ʻa Kalaisi ko e Tuʻi ʻo e founga-pule ʻa e ʻOtuá?

KO E FOUNGA-PULE ʻOKU LOTU ʻA E KAU KALISITIANÉ ʻO FEKAUʻAKI MO IÁ

 3, 4. (a) Ko e hā ʻokú ne fakahaaʻi ʻoku pule maʻu pē ʻa e ʻOtuá ko e Tuʻi? (e) Ko ia ko e hā naʻe akoʻi ai ʻe Kalaisi ʻa hono kau muimuí ke nau lotu ke hoko mai ʻa e puleʻanga ʻo e ʻOtuá?

³ Naʻe akoʻi ʻe Kalaisi ʻa hono kau muimuí ke nau lotu ki he ʻOtuá: “Ke hoko hoʻo Pule [Puleʻanga, NW], ke fai ho finangalo, hange ko ia ʻi he langi ke pehe foki ʻi māmani.” (Mātiu 6:​9, 10) Ka ʻe ʻeke nai ʻe ha taha: ‘ʻIkai kuo pule maʻu pē ʻa e ʻOtua ko Sihová ko e tuʻi? Pea kapau kuó ne fai pehē, ko e hā ʻoku toe lotu ai ke hoko mai hono puleʻanga?’

⁴ Ko e moʻoni, ʻoku ui ʻe he Tohitapú ʻa Sihova ko e “Tuʻi itaniti.” (1 Tīmote 1:17) Pea ʻoku toe pehē: “Kuo fokotuʻu ʻe Sihova hono taloni ʻi he ngaahi langi na; pea ʻoku pule ʻe hono puleʻanga ki he meʻa kotoa.” (Sāme 103:19) Ko ia ʻoku hoko maʻu pē ʻa Sihova ko e Pule Māʻolunga Taupotu ki heʻene meʻa fakatupu kotoa pē. (Selemaia 10:10) Kaekehe, koeʻuhi ko e angatuʻu ʻi he ngoue ko ʻĪtení ki hono tuʻunga pulé, naʻe fokotuʻutuʻu leva ʻe he ʻOtuá ke ʻi ai ha founga-pule makehe. Ko e founga-pule eni ʻa ia naʻe akoʻi ki mui ʻe Sīsū ki hono kau muimuí ke nau lotu ʻo fekauʻaki mo iá. Ko hono taumuʻá ke fakangata ʻa e ngaahi palopalema naʻe fakatupunga ʻi he tafoki mei he tuʻunga-pule ʻa e ʻOtuá ʻa Sētane ko e Tēvoló mo e niʻihi kehe.

 5. Kapau ko e puleʻanga ʻo e ʻOtuá, ko e hā ʻoku toe ui ai ko e puleʻanga ʻo Kalaisi mo e puleʻanga ʻo e toko 144,000?

⁵ ʻOku maʻu ʻe he founga-pule Puleʻanga-fakatuʻi foʻou ko ení ʻa hono mālohí mo e totonu ke pulé mei he Tuʻi Lahi, ko e ʻOtua ko Sihová. Ko hono puleʻangá ia. Pea ʻoku toutou ui ia ʻe he Tohitapú ko e “puleʻanga ʻo e ʻOtua.” (Luke 9:​2, 11, 60, 62; 1 Kolinitō 6:​9, 10; 15:50) Kaekehe, ʻi hono fakanofo ʻe Sihova ʻa hono ʻAló ke hoko ko e Pule Lahí, ʻoku toe lave ki ai ko e puleʻanga ʻo Kalaisi. (2 Pita 1:11) Hangē ko ia kuo tau ako ki ai ʻi ha vahe ki muʻa, ʻe pule fakataha mo Kalaisi ʻi he puleʻanga ko iá ʻa e kakai ʻe toko 144,000 mei he faʻahinga ʻo e tangatá. (Fakahā 14:​1-4; 20:6) Ko ia ʻoku toe lave ki ai ʻa e Tohitapú ko “honau puleʻanga.”​—Tāniela 7:27, NW.

 6. Fakatatau ki he niʻihi, naʻe kamata ʻanefē ʻa e pule ʻa e puleʻanga ʻo e ʻOtuá?

⁶ ʻOku pehē ʻe he faʻahinga ʻe niʻihi naʻe kamata ʻa e pule ʻa e Puleʻangá ʻi he taʻu naʻe foki ai ʻa Sīsū ki hēvaní. ʻOku nau pehē naʻe kamata ʻa e pule ʻa Kalaisí ʻi he taimi naʻá ne huaʻi hifo ai ʻa e laumālie māʻoniʻoní ki hono kau muimuí ʻi he ʻaho ʻo e kātoanga faka-Siu ko e Penitekosí ʻi he taʻu 33 T.S. (Ngāue 2:​1-4) Ka naʻe ʻikai kamata ke pule ʻi he taimi ko ia ʻa e founga-pule Puleʻanga-fakatuʻi ʻa ia naʻe fokotuʻutuʻu ʻe Sihova ke ne fakangata ʻa e ngaahi palopalema kotoa naʻe fakatupunga ʻe he angatuʻu ʻa Sētané. ʻOku ʻikai ha meʻa te ne fakahā naʻe fāʻeleʻi pea kamata ke pule ʻi he taimi ko iá ʻa e ‘tama tangatá,’ ʻa ia ko e founga-pule ʻa e ʻOtuá mo Kalaisi ko e pulé. (Fakahā 12:​1-10) Sai, naʻe maʻu ʻe Sīsū ha puleʻanga ʻi ha faʻahinga founga pē ʻi he taʻu 33 T.S.?

 7. Kia hai kuo pule ki ai ʻa Kalaisi talu mei he 33 T.S.?

⁷ ʻIo, naʻe kamata ke pule ʻa Sīsū ʻi he taimi ko iá ki he fakatahaʻanga ʻo hono kau muimuí, ʻa ia ʻi he faai mai ʻa e taimí te nau fakataha mo ia ʻi hēvani. Ko ia ai, ʻoku lea ʻa e Tohitapú ʻo fekauʻaki mo kinautolu ʻi heʻenau kei ʻi māmaní, ʻo pehē ʻoku ʻave kinautolu ki he ‘puleʻanga ʻo e ʻAlo ʻofaʻanga ʻo e ʻOtua.’ (Kolose 1:13) Ka ko e pule pe “puleʻanga” ko ení ki he kau Kalisitiane ʻoku nau maʻu ʻa e ʻamanaki ki he moʻui fakahēvaní ʻoku ʻikai ko e founga-pule Puleʻanga-fakatuʻi ʻeni ia ʻa ia naʻe akoʻi ʻe Sīsū ki hono kau muimuí ke nau lotu ʻo fekauʻaki mo iá. Ko ha puleʻanga ʻeni ia ki he toko 144,000 pē ʻa ia ʻe pule fakataha mo ia ʻi hēvaní. ʻI he faai mai ʻa e ngaahi senitulí kuo nau hoko ko e faʻahinga pē ʻi hono malumalú. Ko ia ko e pule ko ení, pe ko e ‘puleʻanga ʻo e ʻAlo ʻofaʻanga ʻo e ʻOtua,’ ʻe ngata ia ʻi he taimi ʻe mate ai ʻa e tokotaha fakamuimui ʻo e faʻahinga ko eni ʻoku nau maʻu ʻa e ʻamanaki fakahēvaní pea te nau fakataha mo Kalaisi ʻi hēvaní. ʻE ʻikai te nau kei hoko ko e faʻahinga ʻi he malumalu ʻo Kalaisí, ka te nau hoko ko e ngaahi tuʻi fakataha mo ia ʻi he founga-pule Puleʻanga-fakatuʻi kuo fuoloa hono talaʻofa ʻe he ʻOtuá.

KO E KAMATA ʻA E PULÉ ʻI HE LOTOLOTONGA ʻO E NGAAHI FILÍ

 8. (a) Ko e hā ʻokú ne fakahaaʻi ko e hili ʻo e toetuʻu ʻa Kalaisí ʻe ʻi ai ha taimi ke talitali ai ki muʻa pea kamata ke ne pule? (e) ʻI he hoko ʻa e taimi ke pule ʻa Kalaisí, ko e hā naʻe leaʻaki kiate ia ʻe he ʻOtuá?

⁸ ʻI he foki ʻa Kalaisi ki hēvani hili ʻene toetuʻú, naʻe ʻikai te ne kamata pule ʻi he taimi ko iá ko e Tuʻi ʻo e founga-pule ʻa e ʻOtuá. Ka naʻe ʻi ai ha taimi ke tatali ai, ʻo hangē ko ia ʻoku fakamatala ʻe he ʻapositolo ko Paulá: “Ko e toko taha ni [Sīsū Kalaisi], hili ʻene ʻatu koeʻuhi ko e angahala ha foʻi feilaulau tofu pe taha ʻo taʻengata, naʻa ne nofo hifo mei he toʻomataʻu ʻo e ʻOtua; pea talunga ia mo ʻene nofoʻaki tali kaeʻoua ke ngaohi hono ngaahi fili ko hono tuʻunga vaʻe.” (Hepelū 10:​12, 13) ʻI he hoko ʻa e taimi ke kamata ke pule ai ʻa Kalaisí, naʻe fakahā kiate ia ʻe Sihova: “ʻI he lotolotonga ʻo ho ngaahi fili, pule [pe ikuna] pe koe.”​—Sāme 110:​1, 2, 5, 6.

 9. (a) Ko e hā ʻoku ʻikai fiemaʻu ai ʻe he tokotaha kotoa ʻa e puleʻanga ʻo e ʻOtuá? (e) ʻI he kamata ʻa e pule ʻa e founga-pule ʻa e ʻOtuá, ko e hā ʻoku fai ʻe he ngaahi puleʻangá?

⁹ ʻOku ongo ngali kehe ʻa e hoko ha taha ko ha fili ʻo e founga-pule ʻa e ʻOtuá? Ka ʻoku ʻikai fie nofo ʻa e tokotaha kotoa pē ʻi he malumalu ʻo ha founga-pule ʻoku ne tuʻutuʻuni ki he faʻahinga ʻi hono malumalú ke fai ʻa e meʻa ʻoku totonú. Ko ia ʻi he hili hono fakahā ʻa e founga ʻe fetongi ai ʻa e tuʻunga-pule ʻo e māmaní ʻe Sihova mo hono ʻAló, ʻoku pehē ʻe he Tohitapú, “naʻe ʻita ʻa e ngaahi puleʻanga.” (Fakahā 11:​15, 17, 18) ʻOku ʻikai tali lelei ʻe he ngaahi puleʻangá ʻa e Puleʻanga ʻo e ʻOtuá koeʻuhi ʻoku takiheeʻi kinautolu ʻe Sētane ke nau fakafetau ki ai.

10, 11. (a) ʻI he kamata ke pule ʻa e founga-pule ʻa e ʻOtuá, ko e hā ʻoku hoko ʻi hēvaní? (e) Ko e hā ʻoku hoko ʻi māmaní? (f) Ko ia ko e hā ʻa e meʻa mahuʻinga ʻoku fiemaʻu ke tau manatuʻí?

¹⁰ ʻI he taimi ʻo e kamata ʻa e pule ʻa e founga-pule ʻa e ʻOtuá, ʻoku kei nofo pē ʻa Sētane mo ʻene kau ʻāngeló ʻi hēvani. Koeʻuhi ko ʻenau fakafetau ki he pule ʻa e Puleʻangá, ʻoku fai leva ai ha tau. Ko hono ikuʻangá, ʻoku lī ki tuʻa mei hēvani ʻa Sētane mo ʻene kau ʻāngeló. ʻI he meʻa ni, ʻoku ongo mai ha leʻo lahi: “Kuo hoko ʻeni ʻa e fakamoʻui, mo e malohi, mo e puleʻanga ʻo hotau ʻOtua, pea mo e pule ʻa ʻene Kalaisi.” ʻIo, ʻoku kamata ʻa e pule ʻa e founga-pule ʻa e ʻOtuá! Pea ʻi hono tuli hifo ʻa Sētane mo ʻene kau ʻāngeló mei hēvaní, ʻoku hoko leva ʻi ai ha fiefia. ʻOku pehē ʻe he Tohitapú: “Ko ia mou fiefia ʻa e ngaahi langi, mo kimoutolu ʻoku nofo tapanekale ʻi ai.”​—Fakahā 12:​7-12.

¹¹ Ko ha toe taimi fiefia ia ki he māmaní? ʻIkai! Ka ko e taimi lahi taha ia ʻo e faingataʻa kuo aʻusia ʻe he māmaní. ʻOku tala mai ʻe he Tohitapú kiate kitautolu: “ʻOiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.” (Fakahā 12:12) Ko ia ko ha meʻa mahuʻinga eni ke manatuʻi: Ko e kamata ʻo e pule ʻa e puleʻanga ʻo e ʻOtuá ʻoku ʻikai ke ʻuhingá ko e hoko mai leva ia ʻa e melinó mo e maluʻangá ki he māmaní. ʻE toki hoko mai ʻa e melino moʻoní ʻamui ʻi hono puleʻi kakato ʻe he puleʻanga ʻo e ʻOtuá ʻa e māmaní. ʻE hoko eni ʻi he ngataʻanga ʻo e ‘toe siʻi ʻa e taimi,’ ʻi hono toʻo atu ʻa Sētane mo ʻene kau ʻāngeló ke ʻoua te nau toe malava ke fakatupunga ha faingataʻa ki ha tokotaha.

12. Ko e hā ke tau fakatuʻotuʻa ai ʻe fakahā ʻe he Tohitapú kiate kitautolu ʻa e taimi kamata ʻo e pule ʻa e puleʻanga ʻo e ʻOtuá?

¹² Ka ʻoku lī fakakū ʻa Sētane ki tuʻa mei hēvaní, ʻo ne fakatupunga ʻa e faingataʻa ki he māmaní ‘ʻi ha taimi ʻoku toe siʻi’? ʻOku kamata fakakū ʻa e pule ʻa e founga-pule ʻa e ʻOtuá? ʻOku ʻomai ʻe he Tohitapú ha tali? ʻOku totonu ke tau fakatuʻotuʻa atu ʻe pehē. Ko e hā hono ʻuhingá? Koeʻuhi he naʻe kikiteʻi fuoloa ki muʻa ʻe he Tohitapú ʻa e taimi ʻe ʻuluaki hā mai ai ʻa e ʻAlo ʻo e ʻOtuá ko ha tangata ʻi he māmani ke hoko ko e Mīsaia. Ko hono moʻoní, naʻe tuhu ʻa e Tohitapú ki he taʻu tofu pē ko ia ʻe hoko ai ko e Mīsaiá. Fēfē leva ʻa e meʻa mahuʻinga lahi angé ʻa ia ko e hoko mai ʻa e Mīsaiá, pe Kalaisí, ke kamata ʻa e pule ʻa hono Puleʻangá? Tā te tau fakatuʻotuʻa atu ʻe toe fakahā ʻe he Tohitapú kiate kitautolu ʻa e taimi ʻe hoko ai ʻení!

13. ʻOku anga-fēfē ʻa hono kikiteʻi ʻe he Tohitapú ʻa e taʻu tofu pē naʻe hā ai ʻa e Mīsaiá ʻi he māmaní?

¹³ Ka ʻeke nai ʻe ha taha: ‘Ko fē ʻi he Tohitapú ʻoku kikiteʻi ai ʻa e taʻu tofu pē ko ia naʻe hā ai ʻa e Mīsaiá ʻi he māmaní?’ ʻOku pehē ʻe he tohi Tānielá ʻi he Tohitapú: “Mei he ʻalu atu ʻa e fekau ke fokotuʻu foʻou mo langa ʻa Selusalema, ʻo aʻu kia Misaia ko e ʻEiki, ko e uike ʻe fitu mo e uike ʻe onongofulu ma ua,” pe uike fakakātoa ʻe 69. (Tāniela 9:25) Kaekehe, ʻoku ʻikai ko e ngaahi uike moʻoni eni ʻe 69, ʻa ia ko e ʻaho pē ia ʻe 483, pe laka siʻi hake pē he taʻu ʻe taha. Ka ko e ngaahi uike ʻe 69 ʻo e ngaahi taʻu, pe ngaahi taʻu ʻe 483. (Fehoanaki mo Nōmipa 14:34.) Ko e fekau ke toe fokotuʻu mo toe langa ʻa e ʻā ʻo Selusalemá naʻe fai ʻi he 455 K.M.a (Nehemaia 2:​1-8) Ko ia ko e ngaahi uike ko eni ʻe 69 ʻo e ngaahi taʻú naʻe ngata ia ʻi he hili ʻa e taʻu ʻe 483, ʻa ia ko e 29 T.S. Pea ko e taʻu tofu pē ia naʻe haʻu ai ʻa Sīsū kia Sione ke papitaiso! ʻI he taimi ko iá naʻe paniʻaki ai ia ʻa e laumālie māʻoniʻoní pea ne hoko ko e Mīsaia, pe Kalaisi.​—Luke 3:​1, 2, 21-23.

TAIMI KAMATA ʻO E PULE ʻA E FOUNGA-PULE ʻA E ʻOTUÁ

14. Ko e hā ʻoku fakatātaaʻi ʻe he fuʻu “ʻakau” ʻi he Tāniela vahe fā?

¹⁴ Ko ia ko fē ʻi he Tohitapú ʻoku kikiteʻi ai ʻa e taʻu ʻoku kamata pule ai ʻa Kalaisi ko e tuʻi ʻo e founga-pule ʻa e ʻOtuá? ʻOku ʻi he tohi tatau pē ʻi he Tohitapú ko e tohi ʻa Tānielá. (Tāniela 4:​10-37) ʻI aí ʻoku ngāueʻaki ai ha fuʻu ʻakau ʻoku aʻu ki hēvani ke fakatātāʻaki ʻa Tuʻi Nepukanesa ʻo Pāpiloné. Ko e pule fakaetangata māʻolunga taha ia ʻi he taimi ko iá. Kaekehe, naʻe fakamālohiʻi ʻa Tuʻi Nepukanesa ke ne ʻilo ʻoku ʻi ai ha tokotaha ʻoku pule ʻoku māʻolunga ange ai. Ko e tokotahá ni ko e “Fugani Maoluga,” pe ko e “Tuʻi ʻoe lagi” ko Sihova ko e ʻOtuá. (Tāniela 4:​34, 37, PM) Ko ia, ʻi ha founga mahuʻinga ange, ko e fuʻu ʻakau ko eni ʻoku aʻu ki hēvaní, ʻokú ne fakatātaaʻi ʻa e tuʻunga-pule fakaleveleva ʻo e ʻOtuá, tautefito ʻi heʻene fekauʻaki mo māmaní. Naʻe fakahaaʻi ʻa e tuʻunga-pule ʻo Sihová ʻi ha taimi ʻo fakafou mai ʻi he puleʻanga naʻá ne fokotuʻu ki he puleʻanga ʻo ʻIsilelí. Ko ia ai, ko e ngaahi tuʻi ʻo e hako ʻo Siutá ʻa ia naʻa nau pule ki he kau ʻIsilelí naʻe pehē ke nau “ʻafio . . . ʻi he taloni ʻo Sihova.”​—1 Kalonikali 29:23.

15. ʻI he taimi naʻe tā hifo ai ʻa e fuʻu “ʻakau,” ko e hā naʻe haʻi ai iá?

¹⁵ Fakatatau ki he fakamatala faka-Tohitapu ʻi he Tāniela vahe fā, naʻe tā hifo ʻa e fuʻu ʻakau naʻe aʻu ki hēvaní. Kaekehe, naʻe toe ʻa e tefitó, pea haʻiʻaki ia ʻa e ukamea mo e palasa. Ko e ʻai eni ke taʻofiʻaki ʻa e tefitó mei haʻane tupu kaeʻoua ke aʻu ki he taimi ʻa e ʻOtuá ke toʻo ai ʻa e haʻí pea fakaʻatā ke toe tupu. Ka naʻe fēfē pea ʻanefē naʻe tā hifo ai ʻa e tuʻunga-pule ʻa e ʻOtuá?

16. (a) Naʻe fēfē pea ʻanefē naʻe tā hifo ai ʻa e tuʻunga-pule ʻa e ʻOtuá? (e) Ko e hā naʻe fakahā ki he tuʻi fakamuimui ʻo Siuta naʻe nofo ki he “taloni ʻo Sihova”?

¹⁶ ʻI he faai atu ʻa e taimí, naʻe hoko ʻa e puleʻanga ʻo Siutá ʻa ia naʻe fokotuʻu ʻe Sihová ʻo kovi ʻaupito peá ne fakangofua ai ʻa e Tuʻi ko Nepukanesá ke ne fakaʻauha ia, ke tā hifo ia. Naʻe hoko eni ʻi he taʻu 607 K.M. ʻI he taimi ko iá naʻe fakahā kia Setekia ʻa ia ko e tuʻi fakamuimui ʻo Siuta naʻe nofo ʻi he taloni ʻo Sihová: “Hiki ʻa e kalauni . . . naʻa mo e pehe na ʻe ʻikai tuʻu, kaeʻoua ke haʻu ʻa e toko taha ʻoku oʻona totonu; pea te u foaki ia ki ai.”​—ʻIsikeli 21:​25-27.

17. Ko e hā ʻa e vahaʻa taimi naʻe kamata ʻi he 607 K.M.?

¹⁷ Ko ia ko e tuʻunga-pule ʻa e ʻOtuá, ʻa ia naʻe fakatātaaʻi ʻe he fuʻu “ʻakau,” naʻe tā hifo ia ʻi he 607 K.M. Naʻe ʻikai ke toe ʻi ai ha founga-pule ke ne fakafofongaʻi ʻa e tuʻunga-pule ʻa e ʻOtuá ʻi he māmaní. Ko ia, ʻi he 607 K.M. naʻe kamata ai ha vahaʻa taimi ʻa ia naʻe toki lave ki ai ʻa Sīsū ki mui ko e “ngaahi kuonga kotofa ʻo e ngaahi puleʻanga,” pe, “kuoga oe kakai Jenitaile.” (Luke 21:​24, NW; PM) Lolotonga ʻa e “ngaahi kuonga kotofa” ko ení naʻe ʻikai maʻu ʻe he ʻOtuá ha founga-pule ke ne fakafofongaʻi ʻa hono tuʻunga-pulé ʻi he māmaní.

18. Ko e hā ʻa e meʻa ʻe hoko ʻi he ngataʻanga ʻo e “ngaahi kuonga kotofa ʻo e ngaahi puleʻanga”?

¹⁸ Ko e hā ʻa e meʻa ʻe hoko ʻi he ngataʻanga ʻo e “ngaahi kuonga kotofa ʻo e ngaahi puleʻanga” ko ení? ʻE foaki ʻe Sihova ʻa e mafai ke pulé ki he Tokotahá ‘ʻoku ʻoʻona ʻa e totonu fakalao.’ Ko e Tokotahá ni ko Sīsū Kalaisi. Ko ia kapau te tau malava ʻo ʻilo ʻa e taimi ngataʻanga ʻo e “ngaahi kuonga kotofa ʻo e ngaahi puleʻanga,” te tau ʻilo ʻa e taimi kamata ke pule ʻa Kalaisi ko e tuʻí.

19. Ko e “kuonga” ʻe fiha ʻe taʻofi ai mei he māmaní ʻa e tuʻunga-pule ʻa e ʻOtuá?

¹⁹ Fakatatau kia Tāniela vahe fā, ko e “ngaahi kuonga kotofa” ko ení ko e “fituʻi kuonga.” ʻOku fakahā ʻe Tāniela ʻe ʻi ai ʻa e “fituʻi kuonga” ʻa ia ʻe ʻikai ngāue mai ki he māmaní ʻa e tuʻunga-pule ʻo e ʻOtuá ʻa ia ʻoku fakatātaaʻi ʻe he fuʻu “ʻakau.” (Tāniela 4:​16, 23) Ko e hā hono lōloa ʻo e “fituʻi kuonga” ko ení?

20. (a) Ko e hā hono lōloa ʻo e “kuonga” ʻe taha? (e) Ko e hā hono lōloa ʻo e “fituʻi kuonga”? (f) Ko e hā ʻoku tau lau ai ʻa e ʻaho ʻe tahá ko e taʻu ʻe taha?

²⁰ ʻIa Fakahā vahe 12, veesi 6 mo e 14, ʻoku tau ako ai ʻoku tatau ʻa e ʻaho ʻe 1,260 mo e “kuonga, mo e kuonga ʻe ua, mo e vaeua ʻo e kuonga.” Ko hono fakakātoa ko e kuonga ʻe 3¹/2. Ko ia ko e “kuonga” ʻe tahá ʻoku tatau ia mo e ʻaho ʻe 360. Ko ia ai, ko e “fituʻi kuonga” ko e fitu liunga 360, pe ʻaho ʻe 2,520. Kapau te tau lau ʻa e ʻaho ʻe tahá ko e taʻu ʻe taha, ʻo fakatatau ki he lao faka-Tohitapú, ʻoku tatau ʻa e “fituʻi kuonga” mo e taʻu ʻe 2,520.​—Nōmipa 14:34; ʻIsikeli 4:6.

21. (a) Ko fē ʻa e taimi kamata mo e ngataʻanga ʻo e “ngaahi kuonga kotofa ʻo e ngaahi puleʻanga”? (e) Ko fē ʻa e taimi kamata ʻo e pule ʻa e founga-pule ʻa e ʻOtuá? (f) Ko e hā ʻoku kei totonu ai ke tau lotu ke hoko mai ʻa e puleʻanga ʻo e ʻOtuá?

²¹ Kuo tau ʻosi ako ko e “ngaahi kuonga kotofa ʻo e ngaahi puleʻanga” naʻe kamata ʻi he taʻu 607 K.M. Ko ia ʻi hono lau ʻa e taʻu ʻe 2,520 mei he ʻaho ko iá, ʻoku tau aʻu mai ai ki he 1914 T.S. Ko e taʻu ia naʻe ngata ai ʻa e “ngaahi kuonga kotofa” ko ení. ʻOku laui miliona ʻa e kakai kei moʻui ʻoku nau kei manatuʻi ʻa e ngaahi meʻa naʻe hoko ʻi he 1914. ʻI he taʻu ko iá naʻe kamata ai ʻe he Tau I ʻa Māmaní ha vahaʻa taimi faingataʻa fakalilifu ʻa ia kuo hokohoko mai ʻo aʻu ki hotau kuongá ni. ʻOku ʻuhinga ení naʻe kamata ai ʻa Sīsū Kalaisi ke pule ko e tuʻi ʻo e founga-pule fakahēvani ʻa e ʻOtuá ʻi he 1914. Pea koeʻuhi kuo ʻosi kamata ʻa e pule ʻa e Puleʻangá, ko ha toki taimi totonu ē ʻa ʻetau lotu ke “hoko” mai ia ke ne tafi atu mei he māmaní ʻa e ngaahi meʻa ʻo e tuʻu kovi ko eni ʻa Sētané!​—Mātiu 6:10; Tāniela 2:44.

22. Ko e hā ʻa e fehuʻi ʻe ʻeke nai ʻe ha niʻihi?

²² Ka ʻeke nai ʻe ha taha: ‘Kapau kuo ʻosi foki ʻa Kalaisi ke pule ʻi he puleʻanga ʻo ʻene Tamaí, ko e hā ʻoku ʻikai ke tau mamata ai kiate iá?’

[Fakamatala ʻi lalo]

[Siate ʻi he peesi 140, 141]

ʻI he 607 K.M. naʻe ngata ai ʻa e puleʻanga ʻo e ʻOtuá ʻi Siutá.

ʻI he 1914 T.S. naʻe kamata ke pule ai ʻa Sīsū Kalaisi ko e tuʻi ʻo e founga-pule fakahēvani ʻa e ʻOtuá

607 K.M.—1914 T.S.

ʻOkatopa, 607 K.M.—ʻOkatopa, 1 K.M. = TAʻU ʻE 606

ʻOkatopa, 1 K.M.—ʻOkatopa, 1914 T.S. = TAʻU ʻE 1,914

KUONGA ʻE FITU ʻO E SENITAILÉ = TAʻU ʻE 2,520

[Fakatātā ʻi he peesi 134]

“Te ke toe age i he kuoga ni ae buleanga ki Isileli?”

[Fakatātā ʻi he peesi 139]

ʻOku fakatātaaʻi ʻe he fuʻu ʻakau ʻi he Tāniela vahe 4 ʻa e tuʻunga-pule fakaʻotuá. Naʻe fakahaaʻi ia ʻi ha taimi ʻo fakafou mai ʻi he puleʻanga ʻo Siutá

[Fakatātā ʻi he peesi 140, 141]

Naʻe tā hifo ʻa e fuʻu ʻakaú ʻi hono fakaʻauha ʻa e puleʻanga ʻo Siutá