Vahe 27

Faitotonú—Ko e Founga Lelei Tahá Moʻoni Ia?

KUO fakataueleʻi nai koe ʻi ha taimi ke ke loi? Naʻe tala ange ʻe Donald ki heʻene faʻeé naʻá ne ʻosi fakamaau ʻa hono lokí, ka ko hono moʻoní, naʻá ne laku ʻa e meʻa kotoa pē ki he lalo mohengá. Naʻe fai ʻe Richard ʻa e feinga fakavalevale tatau ke kākaaʻi ʻa ʻene ongo mātuʻá. Naʻá ne tala ange kiate kinaua naʻe tō ʻa ʻene kuleití, ʻo ʻikai koeʻuhi naʻe ʻikai te ne ako, ka koeʻuhí naʻe ‘ʻikai te ne felātani mo ʻene faiakó.’

ʻOku faʻa ʻiloʻi pē ʻe he ngaahi mātuʻá mo e kakai lalahi kehé ʻa e ngaahi faʻufaʻu mataʻāʻā peheé. Ka ʻoku ʻikai ke taʻofi ai ʻa e kau talavou tokolahi ia mei he feinga ke loí, pikoʻi ʻa e moʻoní, pe kākā fakaʻaufuli ʻi heʻene hā ngali maʻu ai ha leleí. Ko e meʻa ʻe taha, ʻoku ʻikai ke tali mokomoko maʻu pē ʻa e ngaahi mātuʻá ki he ngaahi tuʻunga fakatuʻutāmakí. Pea ʻi hoʻo haʻu ʻi he ʻosi ʻa e houa ʻe ua mei he taimi naʻe totonu ke ke haʻu aí, ʻe ngali fakatauele nai ke ke pehē naʻe ʻi ai ha fakatuʻutāmaki lahi ʻi he halá kae ʻikai ko hono tala ange ki hoʻo ongo mātuʻá ʻa e foʻi moʻoni fakamaá—naʻe ʻikai pē te ke ʻiloʻi ʻa e taimí.

Ko e akó te ne ʻomai nai ha toe pole ki he faitotonú. ʻOku faʻa ongoʻi ʻe he fānau akó ʻoku fuʻu hulu ʻa e homueká. ʻOku faʻa ʻi ai ʻa e feʻauʻauhi tau-tāmate. He ʻi he ʻIunaite Seteté, ʻoku hā mei he ngaahi saveá ʻoku laka hake he vaeua ʻo e fānau akó kātoa ʻoku nau kākā pe naʻa nau kākā. Kae lolotonga ʻoku matamata fakamānako nai ha loi pea ko e kākaá ʻa e founga faingofuá, ʻoku ʻaonga moʻoni ke taʻefaitotonu?

Loí—ʻUhinga ʻOku ʻIkai ʻAonga Aí

Ko e loi ke hao mei he tauteá ʻe hā ngali ʻaonga nai ʻi he taimi ko iá. Ka ʻoku fakatokanga mai ʻa e Tohi Tapú: “Ko ia ʻoku hoʻaki loi ʻe ʻikai hao.” (Palovepi 19:5) ʻOku ngalingali lahi ʻe fakaeʻa ʻa e loí pea ʻe kei fakahoko pē ʻa e tauteá ia. Pea ʻe ʻita ʻa hoʻo ongo mātuʻá ʻo ʻikai koeʻuhi pē ko hoʻo foʻi fehālaakí ka koeʻuhi foki ko hoʻo loi ange kiate kinauá!

Fēfē ʻa e kākā ʻi he akó? Ko e lau eni ʻa ha talēkita ʻo e ngaahi polokalama fakaefakamaau ʻi he ʻapiakó: “Ko ha tokotaha ako pē ʻokú ne fakahoko ha taʻefaitotonu fakaako te ne ʻi ha tuʻunga fakatuʻutāmaki lahi ʻo hono maumauʻi ʻa e ngaahi faingamālie ako mo ngāue ʻi he kahaʻú.”

Ko e moʻoni, ʻoku hā ngali ke hao pē ʻa e tokolahi ia. ʻE ʻoatu nai ʻe he kākaá ʻa e kuleiti ʻoku lavá, ka ko e hā ʻa e ngaahi ola lōloá? ʻOku ʻikai ha veiveiua te ke loto-tatau ʻe fakavalevale ke ke kākā ʻi ha kalasi ako kakau. He ko hai ʻoku fie nofo ʻi ʻuta lolotonga ʻoku fiefia ʻa e tokotaha kotoa ʻi he vaí! Pea kapau ʻe tekeʻi koe ki ha vai, ko hoʻo anga kākaá ʻe malava ke ke melemo ai!

Kae fēfē ʻa e kākā ʻi he fiká pe laukongá? Ko e moʻoni, ko hono ngaahi olá ʻe ʻikai nai ke fuʻu maeʻeeʻa—ʻi he ʻuluaki taimí. Ka ʻo kapau ʻoku teʻeki ai ke ke maʻu ʻa e ngaahi taukei fakaako tefitó, te ke hoko nai ʻo “paʻulu” ʻi he māketi ngāué! Pea ko ha tipiloma ʻoku maʻu fakafou ʻi he kākaá ʻe ʻikai loko hoko ia ko ha meʻa fakahaofi moʻui. ʻOku pehē ʻe he Tohi Tapú: “Ko e maʻu ha ngaahi fokotuʻunga koloa ʻaki ʻa e ʻelelo loi ko e muna.” (Palovepi 21:6) Ko ha ngaahi lelei pē ʻe ʻomai nai ʻe ha loi ʻoku taimi nounou pē ʻo hangē ko e maó. Hono lelei ange ke ke fakamātoato hifo ʻo ako kae ʻikai ko hoʻo loi mo kākā ʻi he akó! “Ko e ngaahi tuʻutuʻuni ʻa e faʻa ngaue ʻoku iku pe ki he maʻu ha meʻa,” ko e lau ia ʻa e Palovepi 21:5.

Loí mo Ho Konisēnisí

Ko ha kiʻi taʻahine ko Michelle naʻá ne tukuakiʻi loi ʻa hono tuongaʻané ki hano maumauʻi ha meʻa teuteu fale mahuʻinga neongo naʻe ueʻi mālohi ia ki mui ke ne fakahā ʻa ʻene loí ki heʻene ongo mātuʻá. “Naʻá ku ongoʻi kovi ʻaupito ʻi he lahi taha ʻo e taimí,” ko e fakamatala ia ʻa Michelle. “Naʻe falala mai ʻa ʻeku ongo mātuʻá kiate au ka naʻá ku fakalotomamahiʻi kinaua.” ʻOku fakamatalaʻi lelei ʻi he meʻá ni ʻa e hanga ʻe he ʻOtuá ʻo ʻai ʻi loto ʻi he faʻahinga ʻo e tangatá ʻa e tufakanga ʻo e konisēnisí. (Loma 2:​14, 15) Ko Michelle naʻe fakamamahiʻi ia ʻe hono konisēnisí ʻaki ʻa e ongoʻi tautea.

ʻOku moʻoni, ʻe malava ke fili ha taha ke tukunoaʻi ʻa hono konisēnisí. Ka ko e lahi ange ʻene loí, ko e lahi ange ia ʻene hoko ʻo ongonoa ki he halá—ʻo ‘hunuhunu hono konisēnisí aki ae ukamea vela.’ (1 Timote 4:​2, PM) ʻOkú ke fiemaʻu moʻoni ke ke maʻu ha konisēnisi mate?

Vakai ʻa e ʻOtuá ki he Loí

“Ko e ʻelelo loi” naʻe hoko pea ʻoku hoko ko e taha ʻo e ngaahi meʻa “ʻoku fehiʻa ki ai ʻa Sihova.” (Palovepi 6:​16, 17) He ko ē, ko Sētane tonu ko e Tēvoló ‘ko e tamai ia ʻo e loí.’ (Sione 8:44) Pea ʻoku ʻikai ke fakafaikehekeheʻi ʻe he Tohi Tapú ʻa e loí mo e loi ʻoku taku ko e loi fakamoʻuí. “ʻIlonga ha loi ʻoku ʻikai mei he moʻoni ia.”—1 Sione 2:21.

Ko ia ai, kuo pau ke hoko ʻa e faitotonú ko e foungá ia ki ha taha pē ʻoku fie hoko ko e kaumeʻa ʻo e ʻOtuá. ʻOku ʻeke ʻe he Sāme hono 15: “ʻE Sihova, ko hai ʻe ʻāunofo ʻi he teniti oʻou? Ko hai ʻe maʻu nofoʻanga ʻi ho moʻunga tapu?” (Veesi Sā 15:1) Tau vakai angé ki he tali ʻoku ʻomai ʻi he ngaahi veesi ʻe fā hono hokó:

“Ko ia ʻoku ne foua ʻa e haohaoa, mo feia ʻa e totonu, pea ko e moʻoni ʻo hono loto ʻoku ne aʻau.” (Veesi Sā 15:2) ʻOku ongo mai eni ʻo hangē ha tokotaha kaihaʻa falekoloá pe ko ha tokotaha kākā? Ko ha tokotaha eni ʻoku loi ki heʻene ongo mātuʻá pe fakangalingali? ʻIkai! Ko ia, ka ʻokú ke fie hoko ko ha kaumeʻa ʻo e ʻOtuá, ʻoku fiemaʻu ke ke faitotonu, ʻo ʻikai ʻi hoʻo ngaahi tōʻongá pē ka ʻi ho lotó foki.

“Ko ia ʻoku ʻikai ʻi hono ʻelelo ʻa e lauʻikovi, kuo ʻikai te ne fai kovi ki hono feʻiloaki, pea kuo ʻikai te ne tufi hake ha lau ki hono kaungaʻapi.” (Veesi Sā 15:3) Kuó ke fakaʻatā nai koe ke ke kau fakataha mo ha kau talavou ʻa ia naʻa nau fai ha ngaahi lea taʻeʻofa mo fakamamahi ʻo fekauʻaki mo ha taha kehe? Langa hake ʻa e loto fakapapau mālohi ke fakafisi ke kau ʻi he talanoa peheé!

“Ha taha ʻoku ha maʻamaʻa ki ai ʻa e tangata mousaʻa; ka ʻoku ne tokaʻi kinautolu ʻoku ʻapasia kia Sihova. Ha taha ʻoku ne fai ha fuakava ʻo iku ki haʻane kovi, ka ʻoku ʻikai te ne mioʻi.” (Veesi Sā 15:4) ʻOua ʻe tali ke hoko ko ha ngaahi kaumeʻa ha kau talavou pē ʻoku loi, kākā pe fakamafutofutaʻaki ʻa e ngaahi tōʻonga taʻetāú; te nau ʻamanekina koe ke ke fai ʻa e ngaahi meʻa tatau. Hangē ko e lau ʻa e talavou ko Bobby: “Ko ha kaumeʻa ʻokú ke loi fakataha mo ia te ke tō ai ki ha faingataʻa. ʻOku ʻikai ko ha kaumeʻa ia ʻe lava ke ke falala ki ai.” Kumi ʻa e ngaahi kaumeʻa ʻoku nau tokaʻi ʻa e ngaahi tuʻunga faitotonú.—Fakafehoanaki mo e Sāme 26:4.

Naʻá ke fakatokangaʻi ʻoku fakahoungaʻi pe “tokaʻi” ʻe Sihova ʻa e faʻahinga ʻoku nau fai ki heʻenau leá? Mahalo pē naʻá ke palōmesi te ke fai ha tokoni ʻi homou ʻapí ʻi he Tokonaki ko ení ka kuo fakaafeʻi koe ki ha vaʻinga ʻi he efiafi ko iá. Te ke fakamaʻamaʻaʻi ʻa hoʻo leá ʻo ke ʻalu mo ho ngaahi kaungāmeʻá kae tuku ʻa hoʻo ongo mātuʻá ke na fai ʻa e ngāué, pe te ke fai ki hoʻo leá?

“Ha taha ʻoku ʻikai ke ʻeke toloi ʻi haʻane tali no paʻanga, pe kuo ne tali ha koloa ke fakahalaiaʻi ʻa siʻi ʻataʻatā. ʻE ʻikai ueʻi ha taha pehe ʻo taʻengata.” (Veesi Sā 15:5) ʻIkai ʻoku moʻoni ko e mānumanú ko ha tupuʻanga lahi ia ʻo e kākaá mo e taʻefaitotonú? Ko e fānau ako ʻoku kākā ʻi he siví ʻoku nau mānumanu ki he ngaahi kuleiti naʻe ʻikai te nau ako ke maʻu. Ko e kakai ʻoku nau tali ʻa e totongi fufuú ʻoku nau fakamahuʻingaʻi ange ʻa e paʻangá ʻi he fakamaau totonú.

Ko e moʻoni, ʻoku tuhu ʻa e niʻihi ki he kau taki fakapolitikale mo fakaepisinisi ʻoku nau pikoʻi ʻa e ngaahi lao ʻo e faitotonú ke aʻusia ai ʻenau ngaahi taumuʻá. Ka ʻoku mālohi fēfē ʻa e lavameʻa ʻa e faʻahinga ko iá? ʻOku tali ʻe he Sāme 37:2: “He vave honau tuʻusi hange ko e musie, pea hange ko e mohuku mata ʻenau mae.” Kapau ʻe ʻikai maʻu ʻo fakamaaʻi ʻe he niʻihi kehé, ʻe iku atu ʻo nau fehangahangai mo e fakamaau ʻa Sihova ko e ʻOtuá. Kae kehe, ko e ngaahi kaumeʻa ʻo e ʻOtuá, ‘ʻe ʻikai ueʻi ʻo taʻengata.’ Ko honau kahaʻu ʻitānití ʻoku pau.

Langa Hake ha ‘Konisenisi ʻAtaʻatā’

ʻIkai nai ʻoku ʻi ai ha ʻuhinga mālohi ke fakaʻehiʻehi ai mei ha faʻahinga pē ʻo e loí? Naʻe pehē ʻe he ʻapositolo ko Paulá ʻo fekauʻaki mo ia pea mo hono ngaahi takangá: “ʻOku mau pehe ʻoku ʻataʻatā homau konisenisi.” (Hepelu 13:18) ʻOku ongongofua pehē ho konisēnisí ki he meʻa ʻoku ʻikai moʻoní? Kapau ʻoku ʻikai, akoʻi ia ʻaki hoʻo ako ʻa e Tohi Tapú mo e ngaahi tohi Fakatohitapu hangē ko e Taua Leʻo mo e ʻĀ Hake!

Kuo fai ia ʻe he talavou ko Bobby fakataha mo ha ngaahi ola lelei. Kuó ne ako ke ʻoua ʻe fūfuuʻi ʻa e ngaahi palopalemá ʻaki ha ʻotuʻotu loi. ʻOku ueʻi ia ʻe hono konisēnisí ke ne fakaofiofi ki heʻene ongo mātuʻá ʻo talanoaʻi faitotonu ʻa e ngaahi meʻá. ʻI he taimi ʻe niʻihi kuo iku ai ʻi he meʻá ni ki hano akonekina ai ia. Ka neongo ia, ʻokú ne fakahā ʻokú ne ‘ongoʻi lelei ange ʻi loto’ ʻi heʻene faitotonú.

Ko e lea moʻoní ʻoku ʻikai maʻu pē ke faingofua. Ka ko e tokotaha ʻokú ne fai ha fili ke tala ʻa e moʻoní te ne kei maʻu ai pē ha konisēnisi lelei, ha vahaʻangatae lelei mo hono ngaahi kaungāmeʻa moʻoní, pea funganiʻakí, ko e monū ʻo e hoko ko ha “ʻāunofo” ʻi he tēniti ʻo e ʻOtuá! Ko ia ai, ko e faitotonú ʻoku ʻikai ko e founga lelei tahá pē ia, ko e founga totonú ia ki he Kalisitiane kotoa pē.

Ngaahi Fehuʻi ki he Fetalanoaʻaki

◻ Ko e hā ʻa e ngaahi tuʻunga ʻa ia ʻe hā ngali fakatauele nai ai ke loi?

◻ Ko e hā ʻoku ʻikai ʻaonga ai ke loi pe kākaá? ʻE malava ke ke fakatātaaʻi eni mei ha meʻa naʻá ke mamata tonu ai pe hokosia?

◻ ʻOku anga-fēfē hono maumauʻi ʻe ha tokotaha loi hono konisēnisí?

◻ Lau ʻa e Sāme 15. ʻOku anga-fēfē hono ngāueʻaki ʻo e ngaahi vēsí ni ki he faitotonú?

◻ ʻE lava fēfē ʻe ha talavou ke ne langa hake ha konisēnisi ʻataʻatā?

[Fakamatala ʻi he peesi 212]

‘Ko ha tokotaha ako pē ʻokú ne fakahoko ha taʻefaitotonu fakaako te ne ʻi ha tuʻunga fakatuʻutāmaki lahi ʻo hono maumauʻi ʻa e ngaahi faingamālie ʻi he kahaʻú’

[Fakamatala ʻi he peesi 216]

ʻOku ʻikai ke fakafaikehekeheʻi ʻe he Tohi Tapú ʻa e loí mo e loi ʻoku taku ko e loi fakamoʻuí

[Fakatātā ʻi he peesi 214]

ʻE faʻa ʻiloʻi pē ʻe he ngaahi mātuʻá ʻa e ngaahi feinga ngāvaivai ke fakatonuhiaʻi ʻa e talangataʻá