Tauhi Maʻu Hoʻo Anga-Tonú!

 1. Naʻe anga-fēfē ʻa e hanganaki mateaki kia Sihova ha toko tolu ʻo e Kau Fakamoʻoni ʻa Sihová?

SIOLOTO atu ki he tuʻunga ʻe tolu ko eni ʻoku kau ai ha Kau Fakamoʻoni ʻa Sihova. (1) ʻOku ʻi he ʻapiakó ha kiʻi taʻahine pea kole ʻe he faiakó ki he fānau ako kotoa ʻi he kalasí ke nau kau ʻi hono kātoangaʻi ha ʻaho mālōlō. ʻOku ʻilo ʻe he kiʻi taʻahiné ko e ʻaho mālōlō ko ení ʻoku ʻikai fakahōifua ki he ʻOtuá, ko ia ʻokú ne fakafisi anga-fakaʻapaʻapa ke kau ki ai. (2) Ko ha kiʻi talavou anga-mā ʻokú ne malanga fale ki he fale. ʻOkú ne fakatokangaʻi ko ha taha mei heʻene ʻapiakó ʻoku nofo ʻi he ʻapi hono hokó​—ko ha kaungāako naʻá ne fakakataʻaki ʻa e Kau Fakamoʻoni ʻa Sihová ki muʻa. Ka ʻoku ʻalu atu pē ʻa e kiʻi talavoú ʻo tukituki he matapaá. (3) Ko ha tangata ʻokú ne ngāue mālohi ke tokonaki maʻa hono fāmilí, ka ʻi he ʻaho ʻe taha naʻe kole ange ʻe heʻene pule ngāué ke ne fai ha meʻa taʻefaitotonu pe taʻefakalao. Neongo ʻe lava ke mole ai ʻene ngāué, ʻoku tala ange ʻe he tangatá kuo pau ke ne faitotonu pea talangofua ki he laó koeʻuhí ko e fiemaʻu ia ʻa e ʻOtuá mei heʻene kau sevānití.​—Loma 13:1-4; Hep. 13:18.

 2. Ko e hā ʻa e ngaahi fehuʻi te tau lāulea ki aí, pea ko e hā hono ʻuhingá?

² Ko e hā ʻa e ʻulungaanga ʻokú ke vakai ki ai ʻi he toko tolu ko ení? Te ke fakatokangaʻi nai ʻa e loto-toʻá mo e faitotonú. Ka ʻoku ʻi ai ha ʻulungaanga ʻe taha ʻoku tautefito ʻene mahuʻingá​—ko e anga-tonú. Ko kinautolu taki taha ʻoku nau fakahāhā ʻa e mateaki kia Sihova. ʻOku nau fakafisi kotoa ke fakangaloku ʻa e ngaahi tuʻunga ʻa e ʻOtuá. ʻOku ueʻi ʻe he anga-tonú ʻa kinautolu kotoa ke nau fai pehē. Kuo pau pē ʻoku laukauʻaki ʻe Sihova ʻa kinautolu taki taha ʻi hono fakahāhā ʻa e ʻulungaanga ko iá. ʻOku tau loto foki mo kitautolu ke ʻai ʻetau Tamai ʻi hēvaní ke ne laukauʻaki kitautolu. Ko ia tau lāulea angé ki he ngaahi fehuʻi ko ení: Ko e hā ʻa e anga-tonu? Ko e hā ʻoku fiemaʻu ai kiate kitautolu ʻa e anga-tonú? Pea ʻe lava fēfē ke tau fakaivimālohiʻi ʻetau fakapapau ke tauhi maʻu ʻetau anga-tonú ʻi he ngaahi taimi faingataʻa ko ení?

 3. (a) ʻOku ʻuhinga ki he hā ʻa e anga-tonu? (e) Ko e hā ʻa e fakatātā ʻoku fakahaaʻi ai ʻoku mahuʻinga ʻa e kakató pe taʻemelé kiate kitautolu?

³ ʻI hono ngāueʻaki kiate kitautolu kau sevāniti ʻa e ʻOtuá, ko e anga-tonú ʻoku ʻuhinga ki he ʻofa ʻaufuatō mo e anga-līʻoa taʻemamotu kia Sihova ko ha Tokotaha, ko ia ʻe hoko ai ʻo tau fakamuʻomuʻa ʻa hono finangaló ʻi he kotoa ʻetau ngaahi filí. Tau vakai angé ki hono ngāueʻaki ʻa e anga-tonú ʻi he Tohi Tapú. Ko e ʻuhinga tefito ʻe taha ki he foʻi lea ʻi he Tohi Tapú ki he “anga-tonú”: Ko e kakato pe taʻemele. Ko e fakatātaá, naʻe ʻoatu ʻe he kau ʻIsilelí ʻa e feilaulau ʻo e fanga monumanu kia Sihova, pea naʻe pehē ʻe he Laó ko e fanga monumanú naʻe pau ke taʻemele.b (Liv. 22:21, 22) Naʻe ʻikai ngofua ki he kakai ʻa e ʻOtuá ke nau foaki ha monumanu naʻe mole hano vaʻe, telinga pe kui; pe lava ke nau foaki ha monumanu naʻá ne maʻu ha mahaki. Naʻe mahuʻinga kia Sihova ke kakato pe taʻemele ʻa e monumanú. (Mal. 1:6-9) ʻOku lava ke tau mahinoʻi ʻa e ʻuhinga ʻoku tokanga ai ʻa Sihova ki he taʻemelé pe kakató. ʻI heʻetau fakatau ha meʻa, heʻikai ke tau fakatau ha fuaʻiʻakau ʻoku pala pe ko ha tohi pe meʻangāue ʻoku puli hano konga. ʻOku tau fiemaʻu ha meʻa ʻoku kakato pe taʻemele. ʻOku maʻu ʻe Sihova ha ongoʻi meimei tatau ʻi he haʻu ki heʻetau ʻofa kiate iá, ʻa ʻetau mateakí. Kuo pau ke kakato pe taʻemele.

 4. (a) Ko e hā ʻe lava ai ke maʻu ʻe ha tokotaha taʻehaohaoa ʻa e anga-tonú? (e) Fakatatau ki he Saame 103:12-14, ko e hā ʻoku ʻamanekina ʻe Sihova meiate kitautolú?

⁴ ʻOku totonu ke tau fakamulituku ʻo pehē kuo pau ke tau haohaoa kae lava ke tau maʻu ʻa e anga-tonú? He ko ē, ʻoku tau ongoʻi nai ʻoku tau fai ʻa e ngaahi fehālaaki lahi pe lahi hotau ngaahi melé. Fakakaukau ki he ʻuhinga ʻe ua ʻoku fiemaʻu ai ke ʻoua te tau ilifia. ʻUluakí, ʻoku ʻikai ke tokangataha ʻa Sihova ki heʻetau ngaahi melé. ʻOku tala mai ʻe heʻene Folofolá: “Kapau ko e ngaahi faihalá ʻokú ke siofí, ʻe Iā, ko hai leva ai, ʻe Sihova, ʻe lava ke tuʻú?” (Saame 130:3) ʻOkú ne ʻiloʻi ʻoku tau taʻehaohaoa mo angahalaʻia pea ʻokú ne fakamolemoleʻi loto-lelei kitautolu. (Saame 86:5) Uá, ʻoku ʻiloʻi ʻe Sihova hotau ngaahi ngataʻangá pea ʻoku ʻikai te ne ʻamanekina ke tau fai ha meʻa lahi ange ʻi heʻetau malavá. (Lau ʻa e Saame 103:12-14.) ʻI he ʻuhinga fē leva ʻe lava ke tau hoko ai ʻo kakato pe taʻemele ʻi heʻene vakaí?

 5. Ki he kau sevāniti ʻa Sihová, ʻoku anga-fēfē hoko ʻa e ʻofá ko e kī ki he anga-tonú?

⁵ Ki he kau sevāniti ʻa Sihová, ko e kī ki he anga-tonú ko e ʻofa. Ko ʻetau ʻofa ki he ʻOtuá, ko ʻetau anga-līʻoa mateaki kiate ia ko ʻetau Tamai fakahēvaní, kuo pau ke hanganaki kakato pe taʻemele. Kapau ʻe hanganaki pehē ʻetau ʻofá naʻa mo hono ʻahiʻahiʻi kitautolú, ʻoku tau maʻu leva ʻa e anga-tonú. (1 Kal. 28:9; Māt. 22:37) Toe fakakaukau angé ki he toko tolu ʻo e Kau Fakamoʻoni ne tau lave ki ai he kamatá. Ko e hā naʻa nau fai pehē aí? Naʻe ʻikai fie fiefia ʻa e kiʻi taʻahiné ia ʻi he ʻapiakó, pe naʻe loto pē ʻa e kiʻi talavoú ia ke fakamaaʻi ia ʻi he matapaá, pe naʻe loto pē ʻa e tangatá ia ke mole ʻene ngāué? ʻIkai ʻaupito. ʻI hono kehé, ʻoku nau ʻiloʻi ʻoku ʻi ai ʻa e ngaahi tuʻunga māʻoniʻoni ʻa Sihova, pea ko ʻenau fakakaukaú naʻe tokangataha ki hono fakahōifuaʻi ʻenau Tamai fakahēvaní. Ko ʻenau ʻofa kiate iá ʻoku ueʻi ai kinautolu ke nau fakamuʻomuʻa ia ʻi he ngaahi fili ʻoku nau faí. ʻI he foungá ni ʻoku nau fakamoʻoniʻi ai ʻoku nau maʻu ʻa e anga-tonú.

 6. (a) Ko e hā ʻoku fiemaʻu ai kiate koe ʻa e anga-tonú? (e) Naʻe anga-fēfē ʻa e ʻikai malava ke fakahāhā ʻe ʻĀtama mo ʻIvi ʻa e anga-tonú?

⁶ Ko e hā ʻokú ne ʻai ke mātuʻaki mahuʻinga ʻa e anga-tonú ʻo fiemaʻu ai kiate kitautolu taki tahá? ʻOku fiemaʻu ʻa e anga-tonú kiate koe koeʻuhi kuo poleʻi ʻe Sētane ʻa Sihova, pea kuó ne poleʻi mo koe. Naʻe ʻai ʻe he ʻāngelo angatuʻu ko iá ʻa ia tonu ko Sētane, pe “Tokotaha Fakafepaki,” ʻi he ngoue ʻo ʻĪtení. Naʻá ne lauʻikoviʻi ʻa e huafa lelei ʻo Sihová ʻaki ʻene fakahuʻunga ko e ʻOtuá ko ha Tokotaha Pule kovi, siokita mo taʻefaitotonu. Ko e meʻa fakamamahí, naʻe kau ʻa ʻĀtama mo ʻIvi mo Sētane, ʻi he angatuʻu kia Sihová. (Sēn. 3:1-6) Ko e moʻui ʻi ʻĪtení naʻe ʻoange ai kiate kinaua ʻa e ngaahi faingamālie taʻefaʻalaua ke fakaivimālohiʻi ʻena ʻofa kia Sihová. Ka ʻi he taimi naʻe angatuʻu ai ʻa Sētané, ko ʻena ʻofá naʻe ʻikai kakato pea mele. Naʻe toe malanga hake ha fehuʻi: ʻE hanganaki mateaki ha taha ʻo e faʻahinga ʻo e tangatá kia Sihova ko e ʻOtuá makatuʻunga ʻi he ʻofa kiate iá? ʻI hono fakalea ʻe tahá, ʻoku malava e faʻahinga ʻo e tangatá ke fakahāhā ʻa e anga-tonú? Ko e fehuʻi ko iá naʻe malanga hake ʻi he tuʻunga ʻo Siopé.

 7. Hangē ko ia ʻoku hā ʻi he Siope 1:8-11, naʻe anga-fēfē ongoʻi ʻa Sihova fekauʻaki mo e anga-tonu ʻa Siopé? Naʻe anga-fēfē ongoʻi ʻa Sētane fekauʻaki mo iá?

⁷ Naʻe moʻui ʻa Siope ʻi he taimi naʻe ʻi ʻIsipite ai ʻa e kau ʻIsilelí. Naʻe makehe ʻa ʻene anga-tonú. Hangē ko kitautolú, naʻá ne taʻehaohaoa. Naʻá ne fai ʻa e ngaahi fehālaaki. Kae kehe, naʻe ʻofa ʻa Sihova ʻia Siope ko ʻene anga-tonú. Ngalingali naʻe ʻosi manukiʻi ʻe Sētane ʻa Sihova fekauʻaki mo e anga-tonu ʻa e faʻahinga ʻo e tangatá. Ko ia naʻe fakahanga ʻe Sihova ʻa e tokanga ʻa Sētané kia Siope. Ko e ʻalunga moʻui ʻa e tangata ko iá naʻe fakaeʻa ai ʻa Sētane ko ha tokotaha loi! Naʻe fiemaʻu ʻe Sētane ke ne ʻahiʻahiʻi ʻa e anga-tonu ʻa Siopé. Naʻe falala ʻa Sihova ki hono kaumeʻa ko Siopé, pea naʻá Ne fakaʻatā ʻa Sētane ke ne ʻahiʻahiʻi ia.​—Lau ʻa e Siope 1:8-11.

 8. Naʻe anga-fēfē hono fakamamahiʻi ʻe Sētane ʻa Siopé?

⁸ Ko Sētané ʻoku anga-fakamamahi pea ko ha tokotaha fakapō. Naʻá ne toʻo kotoa ʻa e koloa ʻa Siopé, tāmateʻi ʻene kau sevānití pea maumauʻi mo hono ongoongó. Naʻá ne fakamamahiʻi ʻa e fāmili ʻo Siopé, ʻi heʻene tāmateʻi ʻene fānau ʻofeina ʻe toko hongofulú. Peá ne fakamamahiʻi leva ʻa e sino ʻo Siopé, ʻaki ʻene taaʻi ia ʻaki ha ngaahi hangatāmaki langa lahi mei hono tumuʻakí ki hono ʻaofivaʻé. Ko e uaifi ʻo Siopé naʻe puputuʻu mo lōmekina ʻe he mamahí; naʻá ne fakaʻaiʻai ia ke ne liʻaki ʻene anga-tonú, ke ne laukovi ki he ʻOtuá pea mate. Naʻe fakaʻamu ʻa Siope ke ne mate, ka naʻá ne kei tauhi pē ʻene anga-tonú. Naʻe ngāueʻaki leva ʻe Sētane ha founga kehe. Naʻá ne ngāueʻaki ha kau tangata ʻe toko tolu ko e ngaahi kaungāmeʻa ʻo Siope. Naʻe ʻaʻahi ʻa e kau tangatá kia Siope ʻi ha laui ʻaho, ka naʻe ʻikai te nau ʻoange ha fakafiemālie. ʻI hono kehé naʻa nau fakaangaʻi mo tafuluʻi anga-fakamamahi ia. Naʻa nau taukaveʻi ko e ʻOtuá naʻá ne fakatupunga ʻene ngaahi faingataʻaʻiá pea halaʻatā haʻane tokanga ki heʻene anga-tonú. Naʻe aʻu ʻo nau pehē ko Siopé ko ha tangata fulikivanu naʻe tuha mo e ngaahi meʻa fakalilifu naʻe hoko kiate iá!​—Siope 1:13-22; 2:7-11; 15:4, 5; 22:3-6; 25:4-6.

 9. Neongo hono ʻahiʻahiʻi ʻa Siopé, ko e hā naʻá ne fakafisi ke faí?

⁹ Naʻe anga-fēfē ʻa e fakafeangai ʻa Siope ki he ngaahi faingataʻa kotoa ko iá? Naʻe ʻikai te ne haohaoa. Naʻá ne ʻita ʻo valokiʻi ʻa hono kau fakafiemālie loí, peá ne leaʻaki ʻa e ngaahi meʻa naʻá ne toki fakahaaʻi ki mui ko e lea taʻefakakaukauʻi. Naʻá ne taukapoʻi ʻene māʻoniʻoní tonu ʻo laka ange ia ʻi he māʻoniʻoni ʻa e ʻOtuá. (Siope 6:3; 13:4, 5; 32:2; 34:5) Kae kehe, naʻa mo e taimi naʻe kovi ʻaupito ai hono tuʻungá, naʻe fakafisi ʻa Siope ke tafoki meia Sihova ko e ʻOtuá. Naʻá ne fakafisi ke tui ki he ngaahi loi ʻa e ngaahi kaungāmeʻa loi ko iá. Naʻá ne pehē: “Mole ke mamaʻo haʻaku lau kimoutolu ko ha kau tangata māʻoniʻoni! ʻE ʻikai te u tuku ange ʻeku anga-tonú ʻo aʻu ki haʻaku mate!” (Siope 27:5) ʻOku mātuʻaki mahuʻinga ʻa e lea ko iá. Naʻe fakafisi ʻa Siope ke tukulolo; ʻe lava ke tau fai ʻa e meʻa tatau.

10. ʻOku anga-fēfē hoʻo kaunga ki he ʻīsiu ko eni naʻe langaʻi ʻe Sētane fekauʻaki mo Siopé?

¹⁰ ʻOku fai ʻe Sētane ʻa e tukuakiʻi tatau kiate kitautolu taki taha. ʻOku anga-fēfē hoʻo kaunga ki aí? Ko hono moʻoní, ʻokú ne pehē ʻoku ʻikai te ke ʻofa moʻoni kia Sihova ko e ʻOtuá, te ke tuku hoʻo tauhi kiate iá ke fakahaofi koe, pea heʻikai te ke tauhi maʻu hoʻo anga-tonú! (Siope 2:4, 5; Fkh. 12:10) ʻOku anga-fēfē hoʻo ongoʻi fekauʻaki mo iá? ʻOku fakamamahi ia, ʻikai ko ia? Kae kehe, fakakaukau fekauʻaki mo e meʻá ni: ʻOku falala atu ʻa Sihova kiate koe ʻo ʻoatu kiate koe ha faingamālie fakaofo. ʻOku fakaʻatā ʻe Sihova ʻa Sētane ke ne ʻahiʻahiʻi hoʻo anga-tonú. ʻOku tuipau ʻa Sihova ʻe lava ke ke tauhi maʻu hoʻo anga-tonú pea tokoni ke fakamoʻoniʻi ko Sētané ko ha tokotaha loi. Pea ʻokú Ne talaʻofa ke tokoniʻi koe ke fai pehē. (Hep. 13:6) He monū ē ko ia ke maʻu ʻa e falala ʻa e Hau ʻo e ʻunivēsí! ʻOkú ke vakai ki he ʻuhinga ʻoku mātuʻaki mahuʻinga ai ʻa e anga-tonú? ʻOku fakaivia ai kitautolu ke tau fakahalaʻi ʻa e ngaahi loi ʻa Sētané pea pouaki ʻa e huafa lelei ʻo ʻetau Tamaí pea poupouʻi ʻa ʻene founga-pulé. ʻE lava fēfē ke tau fakatupulekina ʻa e ʻulungaanga mātuʻaki mahuʻinga ko ení?

11. Ko e hā ʻe lava ke tau ako meia Siopé?

¹¹ ʻOku toe fakalalahi hono ʻohofi kitautolu ʻe Sētane ʻi he ‘ngaahi ʻaho fakaʻosi’ faingataʻa ko ení. (2 Tīm. 3:1) ʻI he ngaahi taimi fakapoʻuli peheé, ʻe lava fēfē ke tau fakaivimālohiʻi kitautolu ke tauhi maʻu ʻetau anga-tonú? ʻE lava ke tau toe ako ʻa e meʻa lahi meia Siope. Ki muʻa fuoloa ʻi hono ʻahiʻahiʻi ʻo Siopé, naʻá ne ʻosi fakatupulekina ha lēkooti ʻo e anga-tonú. Fakakaukau ki he lēsoni ʻe tolu ʻe lava ke tau ako meiate ia ki hono fakaivimālohiʻi kitautolu ke tauhi maʻu ʻetau anga-tonú.

12. (a) Hangē ko ia ʻoku lave ki ai ʻi he Siope 26:7, 8, 14, naʻe anga-fēfē hono fakatupulekina ʻe Siope ʻa e ʻapasia mo e fakaʻapaʻapa kia Sihová? (e) ʻE anga-fēfē nai haʻatau fakafonu hotau lotó ʻaki ʻa e ʻapasia ki he ʻOtuá?

¹² Naʻe fakaivimālohiʻi ʻe Siope ʻene ʻofa ki he ʻOtuá ʻaki hono fakatupulekina ha ʻapasia kia Sihova. Naʻe vaheʻi ʻe Siope ʻa e taimi ke fakalaulauloto ai ki he fakaofo ʻo e fakatupu ʻa Sihová. (Lau ʻa e Siope 26:7, 8, 14.) Naʻá ne ofoofo ʻi heʻene fakakaukau atu fekauʻaki mo e māmaní, ko e langí, ko e ʻaó, mo e maná, neongo ia naʻá ne mahinoʻi ko e meʻa siʻisiʻi ʻaupito pē naʻá ne ʻiloʻi fekauʻaki mo e kāfakafa ʻo e fakatupú. Naʻá ne toe fakamahuʻingaʻi ʻa e ngaahi lea ʻa Sihová. “Kuó u koloaʻaki ʻene ngaahi leá,” ko e lea ia ʻa Siope fekauʻaki mo e folofola ʻa Sihová. (Siope 23:12) Naʻe ofoofo ʻa Siope ʻi he fakatupu ʻa Sihová peá ne fakaʻapaʻapaʻi lahi ia. Naʻá ne ʻofa ʻi heʻene Tamaí pea loto ke fakahōifuaʻi ia. Ko e fakapapau ʻa Siope ke tauhi maʻu ʻene anga-tonú naʻe toe mālohi ange. ʻOku fiemaʻu ke tau fai ʻa e meʻa tatau ʻo hangē ko Siopé. ʻOku lahi ange ʻetau ʻilo fekauʻaki mo e fakaofo ʻo e fakatupú ʻi he kakai ʻi he taimi ʻo Siopé. Pea ʻoku tau maʻu ʻa e kotoa ʻo e Tohi Tapu fakamānavaʻí ke tokoniʻi kitautolu ke tau ʻiloʻi moʻoni ʻa Sihova. Ko e meʻa kotoa ko ia ʻoku tau akó ʻe lava ke fakafonu ai hotau lotó ʻaki ʻa e ʻapasia. Ko ʻetau ʻapasia mo fakaʻapaʻapaʻi ʻa e finangalo ʻo Sihová, ʻoku ueʻi leva ai ke tau ʻofa mo talangofua kiate ia pea langa hake ʻetau holi mālohi ke tauhi maʻu ʻetau anga-tonú.​—Siope 28:28.

13-14. (a) Hangē ko ia ʻoku hā ʻi he Siope 31:1, naʻe anga-fēfē hono fakamoʻoniʻi ʻe Siope ʻene talangofuá? (e) ʻE anga-fēfē nai haʻatau muimui ki he faʻifaʻitakiʻanga ʻa Siopé?

¹³ Naʻe fakaivimālohiʻi ʻe Siope ʻa ia tonu ke tauhi maʻu ʻene anga-tonú fakafou ʻi heʻene talangofuá. Naʻe ʻiloʻi ʻe Siope ke anga-tonú, kuo pau ke ne talangofua kia Sihova. Ko hono moʻoní, ko e taimi taki taha ʻoku tau talangofua aí ʻoku fakaivimālohiʻi ai ʻetau fakapapau ke tauhi maʻu ʻetau anga-tonú. Naʻe ngāue mālohi ʻa Siope ke talangofua ki he ʻOtuá ʻi heʻene moʻui fakaʻahó. Ko e fakatātaá, naʻá ne tokanga ʻaupito ki heʻene fakafeangai ki he kakai fefiné. (Lau ʻa e Siope 31:1.) ʻI hono tuʻunga ko ha tangata ʻosi mali, naʻá ne ʻiloʻi ʻoku taʻetotonu ke fai ha tokanga fakaemanako ki ha toe fefine kehe mei hono uaifí. ʻI he ʻahó ni, ʻoku tau nofo ʻi ha māmani ʻoku nafuiʻaki kitautolu ʻa e fakatauele fakaefehokotaki fakasinó. Hangē ko Siopé, te tau fakafisi ke fai ha tokanga taʻetotonu ki ha taha ʻoku ʻikai ko hotau mali? Te tau toe fakafisi ke sio ki ha ʻata fakalielia ʻi ha faʻahinga founga pē? (Māt. 5:28) Kapau ʻoku tau feinga mālohi ke mapuleʻi fakaʻaho kitautolu, te tau fakaivimālohiʻi ai kitautolu ke tauhi maʻu ʻetau anga-tonú.

¹⁴ Naʻe toe talangofua ʻa Siope kia Sihova ʻi he anga ʻo ʻene vakai ki he ngaahi meʻa fakamatelié. Naʻe mahinoʻi ʻe Siope kapau ʻe tuku ʻene falalá ʻi heʻene koloá, te ne fai ai ha angahala mamafa ʻo tuha mo e tautea. (Siope 31:24, 25, 28) ʻI he ʻahó ni, ʻoku tau moʻui ʻi ha māmani ʻoku fuʻu fakamatelie. Kapau ʻoku tau fakatupulekina ha vakai mafamafatatau ki he paʻangá mo e koloá, hangē ko ia ʻoku enginaki mai ʻe he Tohi Tapú, te tau fakaivimālohiʻi ai ʻetau fakapapau ke tauhi maʻu ʻetau anga-tonú.​—Pal. 30:8, 9; Māt. 6:19-21.

15. (a) Ko e ʻamanaki ki he pale meia hai naʻá ne tokoniʻi ʻa Siope ke tauhi maʻu ʻene anga-tonú? (e) Ko e hā ʻe tokoni ai kiate kitautolu ke tauhi maʻu ʻi heʻetau fakakaukaú ʻa e ʻamanaki ʻoku ʻomai ʻe Sihová?

¹⁵ Naʻe tauhi maʻu ʻe Siope ʻene anga-tonú ʻaki ʻene tokangataha ki he ʻamanaki ʻe fakapaleʻiʻaki ia ʻe he ʻOtuá. Naʻá ne tui naʻe tokanga mai ʻa e ʻOtuá ki heʻene anga-tonú. (Siope 31:6) Neongo hono ʻahiʻahiʻi ʻa Siopé, naʻá ne tuipau ʻe faai atu pē ʻo fakapaleʻi ia ʻe Sihova. Ko e tuipau ko ení naʻá ne tokoniʻi moʻoni ia ke ne pipiki ki heʻene anga-tonú. Naʻe hōifua ʻa Sihova ʻi he anga-tonu ʻa Siopé ʻo ne fakapaleʻi lahi ia lolotonga ʻene kei hoko ko ha tangata taʻehaohaoá! (Siope 42:12-17; Sēm. 5:11) Pea mo ha toe tāpuaki lahi ange ʻoku toka mei muʻa kia Siope. ʻOkú ke maʻu ha ʻamanaki mālohi ʻe fakapaleʻi koe ʻe Sihova ʻi hoʻo anga-tonú? ʻOku ʻikai liliu ʻa hotau ʻOtuá. (Mal. 3:6) Kapau te tau manatuʻi ʻokú ne fakamahuʻingaʻi ʻetau anga-tonú, ʻe lava ke tau tauhi ke moʻui ʻi hotau lotó ʻetau ʻamanaki ki ha kahaʻu fakaofó.​—1 Tes. 5:8, 9.

16. Ko e hā ʻoku totonu ke tau fakapapauʻi ke faí?

¹⁶ Fakapapauʻi leva ke ʻoua ʻaupito te ke tuku ange hoʻo anga-tonú! ʻI he taimi ʻe niʻihi, te ke ongoʻi nai ʻoku ʻikai ha toe taha ʻe tauhi anga-tonu, ka heʻikai ʻaupito te ke toko taha. Te ke kau ʻi he haʻohaʻonga ʻo e laui miliona ʻo e faʻahinga faitōnunga ʻoku nau tauhi maʻu ʻenau anga-tonú takatakai ʻi he māmaní. Te ke kau fakataha foki mo e kau tangata mo e kau fefine ʻo e tuí naʻa nau tauhi maʻu ʻenau anga-tonú ʻi he kuohilí, naʻa mo e ʻi he maluʻaki ʻa maté. (Hep. 11:36-38; 12:1) Fakatauange ke tau fakapapauʻi kotoa ke moʻuiʻaki ʻa e lea ʻa Siopé: “ʻE ʻikai te u tuku ange ʻeku anga-tonú!” Pea ʻofa ke fakalāngilangiʻi ʻe heʻetau anga-tonú ʻa Sihova ʻo taʻengata!