Ngaahi Fehuʻi mei he Kau Lautohí

ʻOku anga-fēfē ʻetau ʻiloʻi ko e fakamatalaʻi ʻo e potó ʻi he Palovepi 8:​22-​31 ʻoku ngāueʻaki ia kia Sīsū Kalaisi ʻi heʻene moʻui ki muʻa ke ne hoko ko e tangatá?

Ko e fakamatala fakamānavaʻi ʻo e potó ʻoku maʻu ʻi he tohi Palovepí ʻoku pehē ai: “Naʻe maʻu au ʻe Sihova ko e kamata o ʻene fai atu [pe foungá], ko e muʻaki o ʻene ngaahi ngaue talu mei tuai. . . . Teʻeki ke tanu ʻuhuʻi ʻa e ngaahi moʻunga, ki muʻa atu ʻi he ngaahi maʻolunga naʻe fanauʻi au . . . ʻI heʻene teu ʻa e ngaahi langi naʻa ku ʻi ai: . . . ko e taimi ko ia naʻa ku ʻi hono tafaʻaki, ko e tufunga lahi, ʻo u hakailangitau he ʻaho kotoa pe; ʻo u fiefia ʻi hono ʻao he taimi kotoa pe; . . . ʻio, ko ʻeku neka naʻe ʻi he hako ʻo Atama.”

Ko e kupu ko ení ʻoku ʻikai lava ke pehē ko e lea pē ia ʻo fekauʻaki mo e poto fakaʻotuá pe ko e poto fakaʻatamaí. Ko e hā hono ʻuhingá? Koeʻuhí he ko e poto ʻoku fakamatalaʻi hení naʻe “maʻu,” pe fakatupu, ko e kamata ia ʻo e founga ʻa Sihová. Kuo ʻi ai maʻu pē ʻa Sihova ko e ʻOtuá pea ʻokú ne poto maʻu pē. (Sāme 90:​1, 2) Ko ʻene potó naʻe ʻikai hano kamataʻanga; naʻe ʻikai ke fakatupu ia pe maʻu. Naʻe ʻikai ke “fanauʻi” ia. ʻIkai ko ia pē, ʻoku pehē ko e potó ni ʻoku lea mo ngāue, ʻokú ne fakafofongaʻi ai ha tokotaha.—Palovepi 8:1.

Ko e tohi Palovepí ʻoku pehē ai talu mei tuai ko e potó naʻá ne ʻi he tafaʻaki ʻo Sihová, ʻa e Tokotaha-Fakatupú, ko ha “tufunga lahi.” ʻOku ngāueʻaki moʻoni ia kia Sīsū. Ki muʻa fuoloa peá ne haʻu ki māmaní, naʻe ngāue vāofi ʻaupito ʻa Sīsū mo Sihova he ʻoku pehē ʻe he Folofola ʻa e ʻOtuá: “Ko e muʻa ʻa ʻEne ʻAfio kae kimui ʻa e meʻa kotoa pe, pea ʻoku femaʻumaʻutaki ʻiate ia ʻa e meʻa kotoa pe.”—Kolose 1:17; Fakahā 3:14.

Ko hono fakamatalaʻi ʻa e ʻAlo ʻo e ʻOtuá ko potó ʻoku feʻungamālie, koeʻuhi he ko ia ʻa e Tokotaha naʻá ne fakaeʻa ʻa e ngaahi taumuʻa mo e lao fakapotopoto ʻa Sihová. Lolotonga ʻene moʻui ki muʻa ke hoko ko ha tangatá, ko Sīsuú ko Folofola, pe ko e Tangata-Lea ia ʻa e ʻOtuá. (Sione 1:1) ʻOku fakamatalaʻi ia “ko e Ivi ʻo e ʻOtua, mo e Poto ʻo e ʻOtua.” (1 Kolinito 1:​24, 30) Ko ha fakamatalaʻi fakaʻofoʻofa moʻoni ia ʻo e ʻAlo ʻo e ʻOtuá, ʻa ia ko ʻene neka ʻi he faʻahinga ʻo e tangatá naʻe ueʻi ai ia ke ne foaki ʻene moʻuí ko ha huhuʻi maʻanautolu!​—Sione 3:​16.

[Fakatātā ʻi he peesi 31]

“Teʻeki ke tanu ʻuhuʻi ʻa e ngaahi moʻunga . . . naʻe fanauʻi au”