‘Ko e Ngaahi Tāpuaki Maʻá e Tokotaha Māʻoniʻoní’

“NAʻA KU talavou, pea kuo u motuʻa ni: ka kuo teʻeki te u mamata ki ha maʻoniʻoni kuo liʻaki, pe ko hono hako ʻoku nofo ke kole meʻakai,” ko e lea ia ʻa e tokotaha-tohi-sāme ko Tēvitá ʻi heʻene taʻumotuʻá. (Sāme 37:25) ʻOku ʻofa ʻa Sihova ko e ʻOtuá ki he kau māʻoniʻoní pea tokanga ʻofeina kiate kinautolu. ʻI heʻene Folofolá, ʻa e Tohitapú, ʻokú ne enginaki ai ki he kau lotu moʻoní ke nau kumi ki he māʻoniʻoní.​—Sefanaia 2:3.

Ko e māʻoniʻoní ko e tuʻunga ʻo e hoko ʻo loto-tatau mo e ʻOtuá ʻaki ʻa e talangofua ki heʻene ngaahi tuʻunga ki he leleí mo e koví. ʻI hono fakalototoʻaʻi kitautolu ke tau fakatatau ki he finangalo ʻo e ʻOtuá, ʻoku fakahaaʻi mai ʻe he Palovepi vahe hono 10 ʻo e tohi Tohitapu ʻa Palovepí ʻa e ngaahi tāpuaki fakalaumālie lahi ʻaupito ʻoku maʻu ʻe he faʻahinga ko ia ʻoku nau fai peheé. ʻOku ʻi he lotolotonga ʻo e ngaahi meʻá ni ha tokonaki lahi fau ʻo e meʻakai fakatupu-sino fakalaumālié, ko e ngāue ʻoku ʻi ai hono pale mo fakafiemālie, pea mo ha vahaʻangatae lelei mo e ʻOtuá pea mo e tangatá. Ko ia ai, tau vakai ange ki he Palovepi 10:​1-14.

Ko ha Fakaueʻiloto Lelei ʻAupito

ʻOku ʻikai ha toe veiveiua mei he ngaahi lea kamata ʻo e vahé ʻo fekauʻaki pea mo e ʻiloʻanga ʻo e tokotaha-tohi ʻo e konga hono hoko ʻo e tohi ʻa Palovepí. ʻOku nau pehē: “Koni palovepi ʻa Solomone.” ʻI hono fakahaaʻi ha fakaueʻiloto lelei ke muimui ai ʻi he ʻalunga totonú, ʻoku pehē ʻe Tuʻi Solomone ʻo ʻIsileli ʻo e kuonga muʻá: “Ko e foha poto ko e fiefiaʻanga o ʻene tamai: ka ko e tama vale ko e fakamamahi oʻene faʻe.”​—Palovepi 10:1.

Ko ha fakamamahi lahi ē ʻoku hokosia ʻe he ongo mātuʻá ʻi he taimi ʻoku liʻaki ai ʻe ha taha ʻo ʻena fānaú ʻa e lotu ki he ʻOtua moʻoni mo moʻuí! ʻOku fakaeʻa mai ʻe he tuʻi potó ʻa e mamahi ʻa e faʻeé, mahalo ke fokotuʻu mai ai ʻoku loloto ange ʻa ʻene mamahí. Naʻe fakamoʻoniʻi ʻa e moʻoni ʻo e meʻa ko iá ʻe Tōlisi.a ʻOkú ne pehē: “ʻI he taimi naʻe liʻaki ai ʻe homa foha taʻu 21 ʻa e moʻoní, ko hoku husepānití, ʻa Falangikē, mo au naʻá ma loto-lavea. Ko e langa fakaeongó naʻe lahi ange ia kiate au ʻia Falangikē. Ko e mahili atu ʻa e taʻu ʻe 12 kuo ʻikai pē ke ne faitoʻo ʻa e lavea ko iá.”

ʻOku malava ʻe he fānaú ke nau uesia ʻa e fiefia ʻenau tamaí pea malava ke fakatupunga ʻenau faʻeé ke loto-mamahi. ʻOfa ke tau fakahāhā ʻa e potó pea ʻomai ʻa e fiefiá ki heʻetau ongo mātuʻá. Pea ko e meʻa ʻoku mahuʻinga angé, ke tau ʻai ke fiefia ʻa e loto ʻo ʻetau Tamai fakahēvaní, ʻa Sihova.

‘Ko e Soulu ʻo e Māʻoniʻoní ʻOku Fakafiemālieʻi’

“Ko e ngaahi koloa ʻa e kau fulikivanú ʻe ʻikai hano ʻaonga,” ko e lau ia ʻa e tuʻí, “ka ko e māʻoniʻoní ʻa e meʻa ʻe fakahaofi mei he maté.” (Palovepi 10:​2, NW) Ki he kau Kalisitiane moʻoni ʻoku nau moʻui ʻi he uhouhonga ʻo e taimi ʻo e ngataʻangá, ʻoku mātuʻaki mahuʻinga moʻoni ʻa e ngaahi leá ni kiate kinautolu. (Taniela 12:4) Ko e fakaʻauha ʻo e māmani fakaʻotuamaté ʻoku ofí ni. ʻOku ʻikai ha ngaahi founga maluʻanga ʻoku faʻu ʻe he tangatá​—fakamatelie, fakapaʻanga, pe fakakautau​—te ne tokonaki mai ha maluʻi he lolotonga ʻa e “mamahi lahi” ʻoku tuʻunuku maí. (Fakahā 7:​9, 10, 13, 14) Ko kinautolu pē “ko e kau faitotonú te nau nofo ʻi he foʻi māmaní pea ko e haohaoa te ne ʻi ai ai pē.” (Palovepi 2:​21, The New English Bible) Ko ia, ʻofa ke tau hanganaki “kumi muʻa ki hono puleʻanga, mo e maʻoniʻoni [ʻa e ʻOtuá].”​—Mātiu 6:33.

ʻOku ʻikai pau ke tatali ʻa e kau sevāniti ia ʻa Sihová ke toki hoko mai ʻa e māmani foʻou kuo talaʻofa ʻaki maí ke toki aʻusia ai ʻa e ngaahi tāpuaki ʻa e ʻOtuá. “ʻE ʻikai tuku ʻe Sihova ʻa e soulu ʻo e māʻoniʻoní ke fiekaia, ka ko e holi ʻa e faʻahinga fulikivanú te ne tekeʻi mamaʻo.” (Palovepi 10:​3, NW) Kuo tokonaki mai ʻe Sihova ʻa e meʻakai fakalaumālie lahi fau ʻo fakafou mai ʻi he “tamaoeiki agatonu mo boto.” (Mātiu 24:​45, PM) Ko hono moʻoní, ʻoku maʻu ʻe he kau māʻoniʻoní ʻa e ngaahi ʻuhinga ke nau “mavava ʻi he fiefia honau loto.” (Aisea 65:14) ʻOku fakafiefia ʻa e ʻiló ki hono soulú. Ko ʻene manakó ʻa e fekumi ki he ngaahi koloa fakalaumālié. ʻOku ʻikai ʻiloʻi ʻe he fulikivanú ia ʻa e ngaahi fiefia peheé.

‘ʻOku Fakakoloaia Kita e he Faa Gaué’

ʻOku tāpuakiʻi ʻa e māʻoniʻoní ʻi he toe founga ʻe taha. “Koia oku fai aki ae nima vaivai e fakaaau ia ke majiva: ka oku fakakoloaia e he nima oku faa gaue. Koe foha boto ia aia oku utu mai i he faahitaʻu mafana: ka koia oku mohe i he lolotoga ae ututaʻu koe foha ia oku tau ma ai.”​—Palovepi 10:​4, 5, PM.

ʻOku mohu ʻuhinga tautefito ki he kau ngāue ʻi he lolotonga ʻa e utu-taʻú ʻa e ngaahi lea ʻa e tuʻí. Ko e faʻahitaʻu utu-taʻú ʻoku ʻikai ko ha taimi ia ki he mohe. Ko ha taimi ia ki he faʻa ngāue mo e ngāue he ngaahi houa lahi. Ko e moʻoni, ko ha taimi ia ʻo e fakavavevave.

ʻI he fakakaukau atu ki he utu-taʻú, ʻikai ʻo e uite, ka ʻo e kakaí, naʻe tala ʻe Sīsū ki heʻene kau ākongá: “Ko e utu-taʻú ʻoku lahi, ka ko e kau ngāué ʻoku tokosiʻi. Ko ia ai, kole ki he ʻEiki ʻo e utu-taʻú [Sihova ko e ʻOtuá] ke ne fekau mai ha kau ngāue ki heʻene utu-taʻú.” (Mātiu 9:​35-38, NW) ʻI he taʻu 2000, naʻe laka hake ʻi he toko 14 miliona naʻa nau maʻu ʻa e Fakamanatu ʻo e pekia ʻa Sīsuú​—ʻo tokolahi hake ia ʻi he liunga ua ʻo e tokolahi ʻo e Kau Fakamoʻoni ʻa Sihová. Ko ia ai, ko hai ia ʻe lava ke ne fakaʻikaiʻi ‘ko e ngaahi ngoué kuo fisi hina ia ki he ututaʻú’? (Sione 4:35) ʻOku kole ʻa e kau lotu moʻoní ki he ʻEikí ki ha kau ngāue tokolahi ange lolotonga iá ʻoku nau feinga mālohi longomoʻui kinautolu ʻi he ngāue ngaohi-ākongá ʻo fehoanaki mo ʻenau ngaahi lotú. (Mātiu 28:​19, 20) Pea he tāpuaki lahi ē kuo fai ʻe Sihova ki heʻenau ngaahi feingá! ʻI he lolotonga ʻa e taʻu fakangāue 2000, naʻe laka hake he faʻahinga foʻou ʻe toko 280,000 naʻe papitaiso ai. ʻOku toe feinga mo e faʻahingá ni ke nau hoko ko e kau faiako ʻo e Folofola ʻa e ʻOtuá. ʻOfa ke tau maʻu ʻa e fiefia mo e fiemālie ʻi he faʻahitaʻu utu-taʻu ko ʻení ʻaki ʻa e kau kakato ʻi he ngāue ngaohi-ākongá.

‘Ngaahi Tapuakí ki Hono ʻUlú’

“Ko e ngaahi tāpuakí ki he ʻulu ʻo e tokotaha māʻoniʻoní,” ko e hoko atu ia ʻa Solomoné, “ka ʻi he fekauʻaki mo e ngutu ʻo e faʻahinga fulikivanú, ʻokú ne ʻufiʻufi ʻa e fakamālohí.”​—Palovepi 10:​6, NW.

Ko e tokotaha ʻoku maʻa mo māʻoniʻoni ʻi he lotó ʻokú ne ʻomai ha fakamoʻoni feʻungamālie ʻo ʻene māʻoniʻoní. Ko ʻene leá ʻoku anga-ʻofa mo langa hake, ko ʻene ngaahi ngāué ʻoku ʻaonga pea ʻoku nima-homo. ʻOku tali lelei ia ʻe he niʻihi kehé. ʻOku maʻu mai ʻe ha tokotaha pehē ʻa ʻenau houngaʻiá​—ʻenau ngaahi tāpuakí​—ʻi heʻenau lea lelei ʻo fekauʻaki mo ia.

ʻI he tafaʻaki ʻe tahá, ko ha tokotaha fulikivanu, ʻoku tāufehiʻa pe loto-kovi pea ʻoku fakataumuʻa tefito ke fai ha maumau ki he niʻihi kehé. ʻOku ifo nai ʻene leá pea ʻoku hoko nai ʻo ‘ʻufiʻufi ai ʻa e fakamālohi’ ʻoku fufū ʻi hono lotó, ka ʻe faifai atu pē ʻo ne hanga ki he ngaahi ʻohofi fakaesino pe fakaelea. (Mātiu 12:​34, 35) Pe ʻi he tafaʻaki ʻe tahá, “ʻe ʻufiʻufi ʻe he fakamālohí [pe tāpuni] ʻa e ngutu tonu ʻo e kakai fulikivanú.” (Palovepi 10:​6, NW, fakamatala ʻi laló) ʻOku fakahaaʻi ʻe he meʻá ni ʻoku faʻa maʻu ʻe he tokotaha fulikivanú mei he niʻihi kehé ʻa e meʻa ʻokú ne fakahāhaá, ʻa ia ko e fakafili. ʻOku hanga ʻe he meʻá ni, ʻo hangē ko e laú, ʻo ʻufiʻufi, pe tāpuniʻi, hono ngutú mo fakasīlongoʻi ia. Ko e hā ha ngaahi tāpuaki ʻoku malava ke ʻamanekina ʻe ha tokotaha pehē mei he niʻihi kehé?

“Ko e manatu fekauʻaki mo e tokotaha māʻoniʻoní ʻoku tuha mo ha tāpuaki,” ko e tohi ia ʻe he tuʻi ʻo ʻIsilelí, “ka ko e hingoa tonu ʻo e kau anga-fulikivanú ʻe ʻaunga.” (Palovepi 10:​7, NW) Ko e tokotaha māʻoniʻoní ʻoku manatuʻi lelei ia ʻe he niʻihi kehé, ko e mahuʻinga tahá ko e manatuʻi ʻe Sihova ko e ʻOtuá. ʻI heʻene loto-tōnunga ʻo aʻu ki he pekiá, naʻe hoko ai ʻa Sīsū ʻo “maʻu totonu ae huafa lelei lahi” ange ia ʻi he kau ʻāngeló. (Hepelu 1:​3, 4, PM) Ko e kau tangata mo e kau fefine loto-tōnunga ki muʻa ʻi he Kalisitiané ʻoku manatuʻi kinautolu ʻi he ʻahó ni ʻe he kau Kalisitiane moʻoní ʻi he tuʻunga ko e ngaahi faʻifaʻitakiʻanga ʻoku taau ke faʻifaʻitaki ki ai. (Hepelu 12:​1, 2) He kehekehe lahi ē ko ʻeni mei he hingoa ʻo e kau anga-fulikivanú, ʻa ia ʻoku hoko ko e meʻa fakalielia mo pango! ʻIo, “oku lelei hake ae fili ki he higoa oku ogolelei i he fili ki he koloa lahi, bea lelei hake ke ofeina i he maʻu ae siliva moe koula.” (Palovepi 22:​1, PM) ʻOfa ke tau ʻai ha hingoa lelei kia Sihova mo hotau kaungā faʻahinga ʻo e tangatá.

‘Ko ha Tangata ʻo e Anga-Tonú ʻE ʻAʻeva ʻi he Malu’

ʻI hono fakafaikehekeheʻi ʻa e potó mo e valé, ʻoku pehē ʻe Solomone: “Ko e tokotaha ʻoku loto potó te ne tali ʻa e ngaahi fekaú, ka ko e tokotaha ʻoku loungutu fakaseselé ʻe tāmalaki hifo.” (Palovepi 10:​8, NW) ʻOku ʻilo lelei ʻe ha taha poto “ʻoku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) ʻOkú ne ʻiloʻi ʻa e fiemaʻu ke kumi ki he tataki meia Sihová pea tali loto-lelei ʻa e ngaahi fekau ʻa e ʻOtuá. ʻI he tafaʻaki ʻe tahá, ko e tokotaha ʻoku vale ʻi hono loungutú, ʻoku ʻikai lava ke ne mahinoʻi ʻa e moʻoniʻi meʻa tefito ko ʻení. Ko ʻene pōlau fakaseselé ʻokú ne ʻoatu ai ia ki he ʻauha.

ʻOku toe maʻu ʻe he tokotaha māʻoniʻoní ha faʻahinga ʻo e maluʻangá ʻoku ʻikai maʻu ia ʻe he fulikivanú. “Ko ia ʻoku ʻaʻeva ʻi he anga-tonú te ne ʻaʻeva ʻi he malú, ka ko ia ʻokú ne ʻai hono ngaahi halá ke pikopikó te ne ʻai ai ke ʻiloʻi ia. Ko e tokotaha ʻoku kakamo hono matá te ne ʻomai ʻa e langa, pea ko e tokotaha ʻoku loungutu fakaseselé ʻe tāmalaki hifo.”​—Palovepi 10:​9, 10, NW.

Ko ha tangata anga-tonu ʻoku faitotonu ia ʻi heʻene ngaahi fakafeangaí. ʻOkú ne maʻu ʻa e tokaʻi mo e falala ʻa e niʻihi kehé. Ko ha taha faitotonu ko ha tokotaha ngāue ia ʻoku fakamahuʻingaʻi pea ʻoku faʻa tuku ki ai ʻa e fatongia lahi ange. Ko hono ongoongo ʻi he faitotonú ʻoku malava ke ne kei maʻu ai pē ʻene ngāué naʻa mo e taimi ʻoku hāhāmolofia ai ha ngaahi ngāué. ʻIkai ngata aí, ʻoku tokoni ʻa ʻene faitotonú ki ha ʻatimosifia fakafiefia mo nonga ʻi ʻapi. (Sāme 34:​13, 14) ʻOkú ne ongoʻi malu ʻi hono vahaʻangatae mo e ngaahi mēmipa ʻo hono fāmilí. Ko hono moʻoní, ko e tuʻunga malú ko ha fua ia ʻo e anga-tonú.

ʻOku kehe ʻa e tuʻungá ia ʻi he fekauʻaki mo ha tokotaha ʻoku hanga ki he taʻefaitotonú koeʻuhi ke maʻu meʻa ʻi he siokitá. ʻOku feinga nai ha tokotaha kākā ke fakapuliki ʻene taʻemoʻoní ʻaki ha mioʻi ʻo e leá pe ʻaki ha talanoa fakaʻilonga. (Palovepi 6:​12-14) Ko e kakamo ʻa hono matá ʻi he taumuʻa loto-kovi pe kākaá ʻokú ne fakatupunga nai ai ʻa e kau maʻukovia ʻi heʻene kākaá ke nau moʻua ai honau ʻatamaí. Ka ʻi ha taimi pē, ko e mioʻi ʻa e tokotaha peheé ʻe hoko ʻo ʻiloa. Naʻe tohi ʻe he ʻapositolo ko Paulá: “ʻOku fuʻu eʻa ʻa e angahala ʻa e kakai niʻihi, ʻo muʻa ki he fakamāu, kae kimui ʻa e angahala ʻa e niʻihi. Pehe foki ʻoku fuʻu eʻa ʻenau ngaahi ngaue lelei; pea ko e ngaahi ngaue ʻoku ʻikai pehe, talaʻehai ʻe lava ke fufū.” (1 Timote 5:​24, 25) Tatau ai pē pe ko hai ʻoku kau aí​—pe ko ha taha ʻi he ongo mātuʻá, ko ha kaumeʻa, ko ha hoa mali, pe ko ha maheni​—ʻe faai atu pē ʻo eʻa ʻa e taʻefaitotonú. Ko hai ia ʻe falala ki ha tangata ʻoku ʻi ai hano ongoongo ʻi he taʻefaitotonú?

‘Ko Hono Gutú Koe Matavai oe Mouí’

“Koe gutu oe tagata maonioni koe matavai oe moui,” ko e lea ia ʻa Solomoné, “ka oku tabuni aki ae fakamalohi ae gutu oe agakovi.” (Palovepi 10:​11, PM) Ko e ngaahi lea mei he ngutú ʻoku malava ke faifakamoʻui pe fakalotomamahi. ʻOku nau malava ke fakaivifoʻou mo fakalongomoʻuiʻi ha taha, pe ʻoku malava ke nau fakalotovaivaiʻi ia.

ʻI hono ʻiloʻi ʻa e fakaueʻiloto ʻoku tuʻu mei mui ʻi he ngaahi lea ʻoku leaʻakí, ʻoku pehē ʻe he tuʻi ʻo ʻIsilelí: “Oku tubu mei he fehia ae fekeikei: ka oku ufiufi e he ofa ae agahala kotoabe.” (Palovepi 10:​12, PM) ʻOku fakatupunga ʻe he fehiʻá ʻa e ngaahi fekeʻikeʻi ʻi he sōsaieti ʻo e tangatá, ʻo langaʻi ai ʻa e kē. Kuo pau ki he kau ʻofa kia Sihová ke nau taʻaki-fuʻu atu ʻa e fehiʻá mei heʻenau moʻuí. Anga-fēfē? ʻAki hono fetongi ʻaki ia ʻa e ʻofá. “Ko e ʻofa ʻoku ne ʻufiʻufi ha fufuʻunga angahala.” (1 Pita 4:8) Ko e ʻofá “ʻoku ne ʻukuma ʻi he meʻa kotoa pe,” ʻa ia “okú ne ʻufiʻufi ʻa e meʻa kotoa pē.” (1 Kolinito 13:7; Kingdom Interlinear) Ko e ʻofa fakaʻotuá ʻoku ʻikai te ne ʻamanekina ʻa e haohaoá mei he kakai taʻehaohaoá. ʻI he ʻikai te ne fakamafola ha talanoa ʻo fekauʻaki mo e ngaahi hala ʻa e niʻihi kehé, ʻoku tokoniʻi kitautolu ʻe he ʻofa peheé ke tau fakamolemoleʻi ʻenau ngaahi halá tuku kehe kapau ʻoku kau ai ha faihala mamafa ia. ʻOku aʻu ʻo ʻūkuma ʻe he ʻofá ʻa e fakafeangai kovi mai ʻi he malaʻe malangá, ʻi hotau feituʻu ngāueʻangá, pe ʻi he ʻapiakó.

ʻOku hoko atu ʻa e tuʻi potó: “ʻE maʻu ha poto ʻi he ngutu ʻo e loto matala: kae maʻu ha uipi ki he tuʻa ʻo e masiva poto.” (Palovepi 10:13) Ko e poto ʻa ha tokotaha loto-matala ʻokú ne tataki ʻene ngaahi laká. Ko e ngaahi lea fakatupu langa hake ʻa hono loungutú ʻoku tokoni ia ki he niʻihi kehé ke nau ʻaʻeva ʻi he hala ʻo e māʻoniʻoní. ʻOku ʻikai totonu kiate ia pe ko e faʻahinga ko ia ʻoku fanongo kiate iá ke tataki ʻi he hala totonú ʻaki ʻa e fakamālohiʻi​—ʻa e vaʻakau ʻo e tauteá.

“Faʻoaki ʻIlo”

Ko e hā te ne tokoniʻi ʻetau ngaahi leá ke hoko ‘ko ha vaitafe ʻo e potó ʻoku mahua atu’ kae ʻikai ko ha kiʻi vaitafe mapunopuna ʻi he valelau he ngaahi meʻa taʻeʻaongá? (Palovepi 18:4) ʻOku tali ʻe Solomone: “Ko e kau poto ʻoku nau faʻoaki ʻilo: ka ko e ngutu ʻo e vale, ko e tuʻutamaki ʻoku panaki ai pe.”​—Palovepi 10:14.

Ko e ʻuluaki fiemaʻú ko hotau ʻatamaí ʻoku totonu ke fakafonu ʻaki ʻa e ʻilo fakatupu langa hake ʻo e ʻOtuá. ʻOku taha pē ʻa e matavai ʻo e ʻilo ko iá. Naʻe tohi ʻe he ʻapositolo ko Paulá: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.” (2 Timote 3:​16, 17) Kuo pau ke tau faʻoaki ʻa e ʻiló pea keli ʻi he Folofola ʻa e ʻOtuá ʻo hangē ha kumi ki ha koloa fufuú. Ko ha fekumi fakafiefia mo fakapaleʻi lahi ē ko ia!

Ke ʻilo ʻa e potó ʻi hotau loungutú, kuo pau ke toe aʻu ki hotau lotó ʻa e ʻilo ʻo e ngaahi Konga Tohitapú. Naʻe tala ʻe Sīsū ki heʻene kau fanongó: “Ko e tangata lelei ʻoku fisi kituʻa ai ʻa e lelei mei he koloa lelei kuo faʻo ki hono loto; pea ko e tangata kovi ʻoku fisi kituʻa ai ʻa e kovi mei he koloa kovi kuo faʻo ʻi hono loto: he ko e talanoa ʻa e ngutu ʻoku mei he meʻa ʻi he loto ʻoku hulu atu.” (Luke 6:45) Ko ia ai, kuo pau ke tau tōʻongaʻaki ʻa e fakalaulauloto ki he meʻa ʻoku tau akó. Ko e moʻoni, ko e akó mo e fakalaulaulotó ʻoku fiemaʻu ki ai ʻa e feinga, ka ko ha fakakoloa fakalaumālie lahi ē ko e ako peheé! ʻOku ʻikai ha ʻuhinga ia ki ha taha ke ne muimui ai ki he ʻalunga ʻauha ʻo ha tokotaha ʻokú ne talanoa ʻaki pē ʻa e ngaahi lea taʻefakakaukauʻí.

ʻIo, ko e tokotaha potó ʻokú ne fai ʻa e meʻa ʻoku totonu ʻi he ʻafio mai ʻa e ʻOtuá pea ʻokú ne maʻu ha tākiekina lelei ki he niʻihi kehé. ʻOkú ne maʻu ha tokonaki hulu fau ʻo e meʻakai fakalaumālié pea ʻoku lahi ʻaupito ʻa e meʻa ke ne fai ʻi he ngāue fakapaleʻi lahi ʻa e ʻEikí. (1 Kolinito 15:58) ʻI he hoko ko ha tangata ʻo e anga-tonú, ʻokú ne ʻaʻeva ʻi he tuʻunga malu pea maʻu ʻa e hōifua ʻa e ʻOtuá. Ko e moʻoni, ʻoku lahi ʻa e ngaahi tāpuaki ʻo e tokotaha māʻoniʻoní. ʻOfa ke tau kumi ki he māʻoniʻoní ʻaki ʻa hono fakatatau ʻetau moʻuí ki he ngaahi tuʻunga ʻa e ʻOtuá ki he leleí mo e koví.

[Fakamatala ʻi lalo]

[Fakatātā ʻi he peesi 25]

ʻOku tokoni ʻa e faitotonú ki ha moʻui fakafāmili fiefia

[Fakatātā ʻi he peesi 26]

‘ʻOku faʻoaki ʻilo ʻa e kau potó’