“Tuli ki he Gaahi Mea Fakamelino”

KO HA hala naʻe toki valitā ʻoku hā fefeka mai ʻo ngali faingataʻa ke maumau. Kae kehe, ʻi he ʻalu ʻa e taimí ʻe hoko nai ʻo maumau pea luoluo. ʻOku fiemaʻu ke monomono ia ke fakapapauʻi ʻoku ʻikai fakatuʻutāmaki pea ke tolonga ai ʻa e halá.

ʻI ha tuʻunga meimei tatau, ko hotau vahaʻangatae mo e niʻihi kehé ʻe palopalema nai ʻi he taimi ʻe niʻihi pea ʻe aʻu ʻo malava ke hoko ai ha maumau. Naʻe ʻiloʻi ʻe he ʻapositolo ko Paulá naʻe kehekehe ʻa e ngaahi fakakaukau ʻa e kau Kalisitiane ʻi Lomá. Naʻá ne akonaki ki hono kaungā Kalisitiané: “Ke tau tuli ki he gaahi mea fakamelino, [moe] gaahi mea te tau felagaaki hake ai akitautolu.” (Loma 14:13, 19, PM) Ko e hā ʻoku fiemaʻu ai ke “tuli ki he gaahi mea fakamelino”? ʻE lava fēfē ke tau fakahoko loto-toʻa mo ola lelei ʻa e tuli ki he melinó?

Ko e Hā ke Tuli Ai ki he Melinó?

Ko e fanga kiʻi maumau ʻi he halá ʻo kapau ʻe ʻikai ke fai ha ngāue ki ai, ʻe malava ke tupu ai ha ngaahi luo ʻoku fakatuʻutāmaki. ʻOku pehē pē mo e lava ke fakatuʻutāmaki ʻa hono tuku taʻefai ha ngāue ki he ngaahi fetōkehekeheʻaki fakafoʻituituí. Naʻe tohi ʻe he ʻapositolo ko Sioné: “Kapau ʻe pehe ʻe ha taha, ʻOku ou ʻofa ki he ʻOtua, ʻosi ʻoku ne fehiʻa ki hono tokoua, ko e loi ia: he ko ia ʻoku ʻikai te ne ʻofa ki hono tokoua, ʻa ia kuo ne mātaʻi, talaʻehai ʻoku ne lava ke ʻofa ki he ʻOtua, ʻa ia kuo teʻeki ke ne mātaʻi?” (1 Sione 4:20) Ko ha fetōkehekeheʻaki fakafoʻituitui ʻoku ʻikai ke fakaleleiʻi ʻe faifai atu pē ʻo ne fakatupunga ha Kalisitiane ke fehiʻa ʻi hono tokouá.

Naʻe fakahaaʻi ʻe Sīsū Kalaisi ʻoku ʻikai tali ʻe Sihova ʻetau lotú ʻo kapau kuo ʻikai ke tau fakamelino mo e niʻihi kehé. Naʻe fakahinohinoʻi ʻe Sīsū ʻa ʻene kau ākongá: “Ko ia, ka kuo ke haʻu mo koe ha feilaulau ki he ʻolita, ʻo ke toki manatuʻi ai ʻoku ai ha meʻa ʻoku koviʻia ai ho kainga kiate koe: tuku pe hena hoʻo feilaulau ʻi he veʻe olita, pea ke mole atu muʻa ʻo fakalelei ho kainga, pea ke toki haʻu ʻo ʻatu hoʻo feilaulau.” (Mt. 5:23, 24) ʻIo, ko ha ʻuhinga tefito ke tau tuli ai ki he melinó ko ʻetau loto ke fakahōifuaʻi ʻa Sihova ko e ʻOtuá.a

ʻOku fakaeʻa ʻe ha meʻa naʻe hoko ʻi he fakatahaʻanga ʻi Filipaí ha ʻuhinga ʻe taha ke tuli ai ki he melinó. Ko ha palopalema naʻe ʻikai fakahaaʻi, ʻi he vahaʻa ʻo e ongo tuofāfine Kalisitiane ko ʻIuotia mo Siniteke, ʻoku hā mahino naʻá ne fakamanamanaʻi ʻa e melino ʻa ha fakatahaʻanga. (Fili. 4:2, 3) Ko e ngaahi fetōkehekeheʻaki fakafoʻituitui ʻoku taʻefakaleleiʻí ʻe vave ke hoko ia ʻo ʻiloʻi ʻe he niʻihi kehé. Ko ha holi ke tauhi ʻa e ʻofa mo e fāʻūtaha ʻa e fakatahaʻangá ʻokú ne ueʻi kitautolu ke tau feinga ke melino mo hotau kaungātuí.

“Monūʻiaā ka ko kinautolu ʻoku fakatupu melino,” ko e lea ia ʻa Sīsuú. (Mt. 5:9) Ko e tuli ki he melinó ʻokú ne ʻomai ʻa e fiemālie ʻoku fakafiefia. ʻIkai ngata aí, ko e melinó ʻoku fakatupu moʻui lelei, he “ko e loto ʻoku toka ko e moʻuiʻanga ʻo e sino kotoa.” (Pal. 14:30) ʻI he tafaʻaki ʻe tahá, ko hono tukulotoʻi ʻo e mamahí ʻe fakautuutu nai ai ʻa e malava ke tau hoko ʻo puke fakaesinó.

Neongo ʻoku tui ʻa e kau Kalisitiane tokolahi ʻoku fiemaʻu ʻa e tuli ki he melinó, te ke fifili nai pe ʻe fēfē haʻo fakaleleiʻi ha fetōkehekeheʻaki fakafoʻituitui. Tau sivisiviʻi angé ʻa e ngaahi tefitoʻi moʻoni Fakatohitapu ʻe malava ke ne tataki kitautolú.

Fetalanoaʻaki Leleí ʻOku Toe Maʻu Ai ʻa e Melinó

Ko e fanga kiʻi mafaʻafaʻa iiki ʻi he halá ʻoku faʻa malava pē ke monomono ʻi hano tanutanu ʻa e feituʻu ko ia ʻoku maumaú. ʻOku malava nai ke tau fakamolemoleʻi pea tanu pe ʻufiʻufi ʻa e fanga kiʻi fehālaaki iiki ʻa hotau ngaahi tokouá? Ngalingali ʻe ola lelei ʻa e foungá ni ʻi he lahi taha ʻo e ngaahi fetōkehekeheʻaki fakafoʻituituí, he naʻe tohi ʻe he ʻapositolo ko Pitá ko e “ʻofa ʻoku ne ʻufiʻufi ha fufuʻunga angahala.”—1 Pita 4:8.

Kae kehe, ʻi he taimi ʻe niʻihi ʻe hā ngali fuʻu mafatukituki ha palopalema ia ʻo ʻikai ai lava ke tau tukunoaʻi pē ia. Fakakaukau angé ki he meʻa naʻe hoko ki he kau ʻIsilelí ʻi he hili pē ʻenau maʻu ʻa e Fonua ʻo e Talaʻofá. Ki muʻa ke ʻalu atu ʻa “haʻa Lupeni mo haʻa Kata mo e vaeua ʻo e matakali ʻo Manase” ki he tafaʻaki ʻe taha ʻo e Vaitafe Sioataní, naʻa nau fokotuʻu ai ha “olita naʻe fuʻu ʻilonga.” Naʻe tui ʻa e ngaahi matakali kehe ʻo ʻIsilelí naʻe ngāueʻaki ʻa e ʻōlitá ki he lotu ʻaitoli pea heʻikai ke tukunoaʻi pē ʻa e palopalemá. Naʻa nau teuteu ai ki ha tau.—Sios. 22:9-12.

Naʻe ongoʻi nai ʻe he kau ʻIsileli ʻe niʻihi kuo ʻosi ʻi ai ʻa e fakamoʻoni feʻunga ʻo e faihalá pea ko ha ʻoho fakatuʻupakē ʻe siʻi ange ai ʻa e faʻahinga ʻe maté. Kae kehe, ʻi he ʻikai fai fakavave leva ha meʻá, naʻe fekauʻi atu ʻe he ngaahi matakali ʻi he hihifo ʻo Sioataní ha kau fakafofonga ke nau alea ki he palopalemá mo honau ngaahi tokouá. Naʻa nau ʻeke: “Ko e angahala ha ʻeni kuo mou fai ki he ʻOtua ʻo Isileli? hoʻomou afe leva mei he [muimui] kia Sihova?” Ko hono moʻoní, ko e ngaahi matakali naʻa nau fokotuʻu ʻa e ʻōlitá naʻe ʻikai te nau fai ha angahala. Ka ʻe anga-fēfē ʻenau fakafeangai ki he tukuakiʻi ko iá? Te nau hanga nai ʻo ngāhiʻi ʻa honau kau tukuakiʻí pe ʻikai toe lea kia kinautolu? Naʻe tali anga-vaivai ʻa e ngaahi matakali naʻe tukuakiʻí, ʻo fakahaaʻi mahino naʻe ueʻi moʻoni ʻa e meʻa naʻa nau faí ʻe heʻenau holi ke tauhi kia Sihova. Ko ʻenau fakafeangaí naʻe tauhi maʻu ai honau vahaʻangatae mo e ʻOtuá pea naʻe fakahaofi ai ʻa e ngaahi moʻui. Ko e fetalanoaʻaki leleí naʻe fakaleleiʻi ai ʻa e palopalemá pea toe maʻu ai ʻa e melinó.—Sios. 22:13-34.

Ki muʻa ke fai ʻe he kau ʻIsileli kehé ha meʻa naʻe toe kovi angé, naʻa nau talanoa fakapotopoto ki heʻenau palopalemá mo e ngaahi matakali ʻo Lūpeni mo Kata mo e vaeua ʻo e matakali ʻo Manasé. “ʻOua naʻa ʻoho ho loto ke ʻita,” ko e lau ia ʻa e Folofola ʻa e ʻOtuá, “he ko e ʻita ʻoku ne ngaohi hono nofoʻanga ʻi he fatafata ʻo e sesele.” (Koh. 7:9) Ko e founga Fakatohitapu ke feangai ai mo e ngaahi fetōkehekeheʻaki fakafoʻituitui mafatukitukí ʻoku fakafou ia ʻi he fetalanoaʻaki lelei mo faitotonu. ʻE lava moʻoni ke tau ʻamanekina ʻa e tāpuaki ʻa Sihová kapau ʻoku tau tukulotoʻi ha mamahi pea ʻikai ke tau ʻalu ki he tokotaha ʻoku tau ongoʻi kuó ne fakalotomamahiʻi kitautolú?

ʻI he tafaʻaki ʻe tahá, fēfē kapau ʻe haʻu ha kaungā Kalisitiane kia kitautolu fekauʻaki mo ha palopalema, naʻa mo haʻane tukuakiʻi hala nai kitautolu? “Ko e tali malū ʻoku lolou ai ʻa e houhau,” ko e lau ia ʻa e Tohi Tapú. (Pal. 15:1) Ko e ngaahi matakali ʻo ʻIsileli ne fakatupu mamahí naʻa nau fakamatalaʻi ʻi he anga-malū kae mahino ʻa honau tuʻungá, ʻo mokomoko hifo ai ʻa e meʻa naʻe pau ko ha fakafetaulaki loto-ʻita mei honau ngaahi tokouá. Pe ʻoku tau tomuʻa ʻalu ki hotau tokouá pe ʻokú ne lea mai kia kitautolu ʻo fekauʻaki mo ha palopalema, ʻoku totonu ke tau ʻeke hifo kiate kitautolu, ‘Ko e hā ʻa e ngaahi lea, tō ʻo e leʻo, pea mo e fakafōtunga ʻe ngali lahi ange ai hono pouaki ʻa e melinó?’

Ngāue Fakapotopotoʻaki ʻa e ʻEleló

ʻOku mahinoʻi ʻe Sihova ʻoku ʻi ai ʻetau fiemaʻu ke fakahaaʻi ʻa e ngaahi meʻa ʻoku tau tokanga ki aí. Kae kehe, kapau ʻoku ʻikai ke tau fakaleleiʻi ha fetōkehekeheʻaki fakafoʻituitui, ngalingali ʻe fakataueleʻi ai kitautolu ke tau fakamatala ia ki ha tokotaha kehe. Ko e mamahi ʻoku tukulotoʻí ʻoku faingofua ke taki atu ai ki he lea fakaanga. Fekauʻaki mo hono ngāue taʻefakapotopotoʻaki ʻo e ʻeleló, ʻoku pehē ʻe he Palovepi 11:11: “ʻOku maumau [ha kolo] ʻi he meʻa ʻoku puʻaki ʻe he angahala.” ʻI he tuʻunga tatau, ko e lea taʻefakakaukauʻi fekauʻaki mo ha kaungā Kalisitiane ʻe malava ke ne uesia ʻa e melino ʻa ha fakatahaʻanga ʻoku hangē ha koló.

Kae kehe, ko e tuli ki he melinó ʻoku ʻikai ʻuhinga ia ke ʻoua ʻe toe fai ha talanoa ʻo fekauʻaki mo hotau ngaahi tokoua mo e tuofāfiné. Naʻe akonekina ʻe he ʻapositolo ko Paulá ʻa hono kaungātuí: “ʻOua naʻa tuku ke hū atu ha talanoa kovi mei homou ngutú.” Ka naʻá ne tānaki mai: “Leaʻaki pē ʻa e ngaahi meʻa lelei ʻoku fiemaʻu ke fanongo ki ai ʻa e tangatá, ʻa e ngaahi meʻa ʻe tokoni moʻoni kiate kinautolú. . . . Mou feangaleleiʻaki, ʻo manavaʻofa mo fefakamolemoleʻaki.” (Ef. 4:29-32, The New American Bible) Kapau naʻe ʻalu atu kiate koe ha tokoua ʻa ia naʻe mamahi ʻi hoʻo leá pe tōʻongá, ʻikai nai ʻe faingofua ange ke kole fakamolemole pea fakamelino kapau naʻá ne fai ki muʻa ha talanoa lelei fekauʻaki mo koe ki he niʻihi kehé? Ko ia, ko e tōʻongaʻaki ʻa hono fai ʻo e lea fakatupu langa hake ʻi he talanoa fekauʻaki mo e kaungā Kalisitiané ʻe ʻai ai ke faingofua ange ke tau fakafoki mai ʻa e melinó ʻi he hoko ʻa e ngaahi fetōkehekeheʻakí.—Luke 6:31.

Tauhi “Uma ki he Uma” ʻa e ʻOtuá

Ko ʻetau hehema angahalaʻia fakaetangatá ke fakamamaʻo mei he faʻahinga kuo nau fakalotomamahiʻi kitautolú, ʻo fakamavaheʻi kitautolu. Ka ʻoku taʻefakapotopoto ha ʻalunga pehē. (Pal. 18:1) ʻI he tuʻunga ko ha kakai fāʻūtaha ʻoku ui ki he huafa ʻo Sihová, ʻoku tau fakapapauʻi ke “tauhi uma ki he uma kiate ia.”—Sef. 3:9, NW.

Ko e lea pe tōʻonga taʻefeʻunga ʻa e niʻihi kehé ʻoku ʻikai ʻaupito totonu ke ne ʻai ke vaivai ʻetau faivelenga ki he lotu moʻoní. ʻI he toe pē ha ngaahi ʻaho pea fetongi ʻe he feilaulau ʻa Sīsuú ʻa e ngaahi feilaulau ʻi he temipalé pea taimi nounou mei hono fakahalaiaʻi fefeka ʻe Sīsū ʻa e kau sikalaipé, naʻá ne fakatokangaʻi atu ha uitou masiva ʻokú ne lī ʻa e “kotoa ʻo e meʻa naʻa ne maʻu ke tauhi ʻaki siʻene moʻui” ki ha puha līʻanga meʻaʻofa ʻi he temipalé. Naʻe feinga ʻa Sīsū ke taʻofi ia? ʻI hono kehé, naʻá ne fakaongoongoleleiʻi ʻa ʻene poupou mateaki ki he fakatahaʻanga ʻa Sihova ʻi he taimi ko iá. (Luke 21:1-4) Ko e ngaahi tōʻonga taʻetotonu ʻa e niʻihi kehé naʻe ʻikai te ne fakaʻatā ai ʻa e uitoú mei hono fatongia ke poupou ki he lotu kia Sihová.

Neongo te tau ongoʻi nai kuo fai taʻetaau, naʻa mo taʻetotonu mai ha tokoua pe tuofefine Kalisitiane, ʻe fēfē ʻetau fakafeangaí? Te tau fakaʻatā nai eni ke ne uesia ʻa ʻetau ngāue ʻaufuatō kia Sihová? Pe te tau loto-toʻa ʻo fai ha ngāue ke fakaleleiʻi ha fetōkehekeheʻaki fakafoʻituitui pē koeʻuhi ke tauhi ai ʻa e melino mahuʻinga ʻa e fakatahaʻanga ʻa e ʻOtuá he ʻaho ní?

ʻOku akonaki mai ʻa e Tohi Tapú: “Mou nofo melino pe mo e kakai kotoa pe, ʻo kapau ʻe ala lava: kehe pe ke ʻataʻatā meiate kimoutolu.” (Loma 12:18) ʻOfa ke tau fakapapauʻi ke fai pehē pea tau nofo maʻu ai pē ʻi he hala ki he moʻuí.

[Fakamatala ʻi lalo]

[Fakatātā ʻi he peesi 17]

Naʻe fiemaʻu ʻa ʻIuotia mo Siniteke ke na tuli ki he melinó

[Fakatātā ʻi he peesi 18]

Ko e hā ʻa e ngaahi lea, tō ʻo e leʻo, pea mo e fakafōtunga ʻe ngali lahi ange ai hono pouaki ʻa e melinó?