Ko Hoʻo Leá ʻOku Hokohokaʻi pe Fakamoʻui?

ʻI HE lolotonga ʻo e ngaahi taimi faingataʻa ko ʻení, ʻoku ʻikai ha ofo ko e tokolahi ʻoku nau “loto lavea” pea “laumalie mafesi.” (Sāme 34:18) Ko ia, ʻi he ngaahi lea ʻa e ʻapositolo ko Paulá, ʻoku ʻi ai ha fiemaʻu maʻu pē ke “fakafiemalie ki he kau loto foi” pea ke “boubou ae vaivai.” (1 Tesalonaika 5:​14, PM) Kae fēfē kapau ʻoku fakalotomamahiʻi kitautolu ʻe hotau kaungātangatá pe fai ha meʻa ʻoku mātuʻaki hala? ʻI ha tuʻunga pehē, te tau ongoʻi nai ʻoku tau tonuhia ke tafuluʻi kinautolu tāutaha. Kae kehe, ʻoku totonu ʻa e tokangá. Ko e akonakí, naʻa mo e taimi ʻoku totonu aí, ʻe lava ke hoko ia ʻo fakatuʻutāmaki kapau ʻoku fai ia ʻi ha founga fefeka. ʻOku pehē ʻe he Palovepi 12:18: “ʻOku ai ha taha ko ʻene faʻa lau ʻoku hange ko e hokohokai ha heleta.”

Ko ia ai, ʻi he taimi ʻoku tau kamata ai ke ʻoatu ha fakatonutonu pe fakaleleiʻi ha taʻefemahinoʻaki, ʻoku mātuʻaki mahuʻinga ke manatuʻi ʻa e konga hono ua ʻo e Palovepi 12:18: “Ko e ʻelelo ʻo e poto ko e meʻa faitoʻo.” ʻEke maʻu pē kiate koe, ‘Kapau ʻoku fiemaʻu kiate au ha fakatonutonu, ʻe anga-fēfē haʻaku fiemaʻu ke fakafeangai ki ai?’ Ko e tokolahi ʻo kitautolú ʻoku tau ongongofua ange ki he fakalototoʻá ʻi he fakaangaʻí. Ko ia ke ke loto-lelei ʻi hono fai ʻa e fakaongoongoleleiʻí. ʻE faʻa ʻoatu ai heni ki he tokotaha fakatupu-lotomamahí ʻa e ʻuhinga ke fakaleleiʻiange, pea ʻe ngalingali te ne houngaʻia ange ai ki ha tokoni ʻoku ʻoatu.

He mātuʻaki mahuʻinga ē ke fakamalū maʻu pē ʻetau ngaahi leá ʻaki ʻa e anga-vaivai! Ko e ngaahi lea fakamoʻuí ʻe ʻai ai ʻa e tokotaha fanongó ke ne ongoʻi ʻo hangē ko ia naʻe ʻi he tokotaha-tohi-sāmé, ʻa ia naʻá ne pehē: “Ka taaʻi au ʻe he angatonu, ko e ʻofa ia; pea ko ʻene valoki au, ko ʻene pani kita; ke ʻoua naʻa momoi ʻe hoku ʻulu: He kei ʻatā ke u lotua ʻenau pauʻu.”​—Sāme 141:5.