Fehuʻi ʻa e Toʻutupú . . . 

Ngaahi Faiva Hivá—ʻE Lava Fēfē Ke U Hoko ʻo Filifili Lelei?

“ʻI heʻeku sio ki he hingoa ʻo ha kulupu pe foʻi hiva ngalikehe ʻoku ʻasi mai, ko e taimi ia ʻoku ou liliu ai ʻa e sēnoló.”—Casey.

NGAAHI FAIVA HIVÁ—ʻoku fakamānako lahi ʻaupito ia ki he toʻutupu tokolahi. Ka ko e ngaahi faiva hiva lahi ʻoku ʻi ai ʻa e ngaahi fakatātā kovi ʻaupito ʻo e fehokotaki fakasino taʻetāú mo e fakamālohí. Ko e moʻoni, ʻi he taimi ʻoku pouaki ai ʻe ha faʻahinga fakafiefia ʻa e meʻa ʻoku fakahalaʻi ʻe he ʻOtuá, ʻoku totonu ke fakaʻehiʻehi ha Kalisitiane mei he mamata aí. Kae kehe, ʻoku ʻikai ko e ngaahi faiva hiva kotoa pē ʻoku taʻetaau taʻefakanānā. ʻOku lelei pē nai ʻa e niʻihi ʻi ha tuʻunga. ʻE hā ngali hao nai ʻa e niʻihi mei he mātuʻaki kovi ʻaupitó. Ka, ko e ngaahi faiva peheé ʻoku fakahoko lelei mai nai ai ha ngaahi pōpoaki olopoto ʻa ia ʻoku fepaki mo e Folofola ʻa e ʻOtuá.

Kapau ʻoku loto ʻa hoʻo ongo mātuʻá ke ke sio ʻi he ngaahi faiva hivá, ʻe fiemaʻu ke ke hoko ʻo filifili lelei pea ngāueʻaki ho “ngaahi mafai fakaefakakaukau” kuo akoʻi faka-Tohitapú koeʻuhi ke ke lava ai ʻo fakafaikehekeheʻi ʻa e meʻa ʻoku feʻunga pe taʻefeʻunga ki he mamatá. (Hepelu 5:​14, NW) Ko e hā ʻa e ngaahi tefitoʻi moʻoni faka-Tohitapu ʻe lava ke ne tokoniʻi koe ʻi he meʻá ni? Ko e ngaahi konga Tohitapu mo e ngaahi fakamatala hoko haké ʻe hoko nai ʻo ʻaonga kia koe.

Palovepi 4:23 (NW): “Mahulu hake ʻi he meʻa kehe kotoa pē kuo pau ke maluʻí, maluʻi ho lotó, he ʻoku haʻu mei ai ʻa e ngaahi matavai ʻo e moʻuí.” ʻOku ʻi ai haʻo ngaahi nāunau vaʻinga pe ko ha meʻalea ʻoku mahuʻinga kia koe? ʻOku ʻikai toe veiveiua ʻokú ke feinga ke tauhi ia ke ʻi ha tuʻunga lelei pea ʻi ha feituʻu malu. ʻE ʻikai ʻaupito te ke tuku taʻetokangaʻi ia ʻi he halá, naʻa mo ha lau mōmeniti, telia naʻa hoko ʻo maumau pe kaihaʻasi. ʻIo, ʻokú ke maluʻi ia. ʻI he tuʻunga tatau, kuo pau ke ke fai ha fili te ke maluʻi ho lotó, ʻo ʻikai tuku ia naʻa mo e ʻi ha fakatuʻutāmaki lau mōmeniti ʻi hono fakaeʻa ia ki he fakafiefia ʻoku ʻikai leleí.

Efeso 2:​1, 2: “Ko kimoutolu naʻa mou mate ʻi hoʻomou ngaahi talangataʻa mo e angahala; ʻa ia naʻa mou fou ai ʻi muʻa ʻi he ʻalunga ʻo e nofo fakaemaama-ko eni, ʻi he ʻalunga ʻo e ʻeiki ʻo e puleʻanga ʻo e ʻatā [“ʻeá,” NW], ko e ʻeiki ʻo e faʻahinga laumalie ʻoku lolotonga ngaue ni ʻi he hako ʻo talangataʻa.” Ko e ʻeá ko e laumālie ia ʻo e māmaní, ʻa e founga fakakaukau mo e ngaahi tōʻonga ʻokú ne fakatupunga ʻa e ʻulungaanga taʻefakaʻotuá. Ko e laumālie ko ení ʻoku tapua mai ia ʻi he ngaahi faiva hiva lahi pea ʻoku fepaki ʻaupito ia mo e laumālie ʻo e ʻOtuá, ʻa ia ʻokú ne fakatupu ʻa e ngaahi ʻulungaanga hangē ko e fiefia, melino mo e mapuleʻi-kitá.—Kaletia 5:​22, 23.

2 Timote 2:22: “Ko e ngaahi holi fakatalavou ke ke hola mei ai.” Ko e mamata ʻi he ngaahi konga fakaefehokotaki fakasinó—neongo kapau ʻoku nounou—te ne tafunaki pē ai ʻa e vela ʻa e holí. ʻOku fakahaaʻi ʻe he kau talavou tokolahi ʻoku faingataʻa ke ngalo ʻia kinautolu ʻa e ngaahi konga ko iá; ʻoku aʻu nai ʻo nau hehema ke toutou huluʻi ia ʻi honau ʻatamaí. Ko ha kiʻi tangata ko Dave, ʻa ia naʻá ne mamata ʻi ha foʻi faiva kovi, naʻá ne vete: “ʻI he hili iá, ko e taimi kotoa pē naʻá ku fanongo ai ki he foʻi hiva ko iá naʻá ku fakakaukau ai ki he foʻi faivá ni.” Ko e mamata ʻi he ngaahi faiva peheé ʻe lava ke ne fakatupulekina ha holi ki he fehokotaki fakasino taʻetāú.—1 Kolinito 6:18; Kolose 3:5.

Palovepi 13:20: “Ko ia ʻoku kaumeʻa mo e sesele ʻe hoko ko e lusa.” ʻEke hifo kia koe, ‘Te u fakaafeʻi nai ʻa e kau fai fakamālohí, fakahāʻele faʻahikehé, konaá, pe moʻui taʻetāú ki hoku falé?’ Ko e feohi mo e faʻahinga peheé fakafou ʻi he televīsoné ʻoku tatau pē ia mo hono fakaafeʻi mai kinautolu ki ho ʻapí. ʻE lava ke ʻai koe ʻe he fai peheé ke ke “hoko ko e lusa”? ʻOku pehē ʻe Kimberly: “Kuó u sio ʻi ha ngaahi tuʻunga ʻa ia ʻe faʻifaʻitaki ai, ʻi ha fakatahataha ʻoku fai, ʻa e tamaiki fefiné ki he vala pe ngaahi foʻi mio fakaehula taʻetaau naʻa nau toki sio ai ʻi ha foʻi faiva.” Kuó ke sio nai ʻi ha meʻa meimei tatau. ʻI he faʻifaʻitaki ki he faʻahinga ʻoku ʻikai haʻanau tokanga ki he ngaahi tuʻunga fakaʻotuá, ʻoku fakahaaʻi ai ʻe he kau talavou ko ení kuo nau ʻosi kamata ke “hoko ko e lusa.” Ko ia ai, fakaʻehiʻehi mei ha faʻahinga pē ʻo e “ngaahi feohi koví.”—1 Kolinito 15:​33, NW.

Sāme 11:5: “ʻOku sivi ʻe Sihova ʻa e maʻoniʻoni: ka ko e angakovi, mo e ʻofa ki he fakamalohi, ʻoku fehiʻa ki ai ʻene moʻui.” Kapau ʻoku tau sio ʻi he ngaahi faiva ʻokú ne pouaki ʻa e fakamālohi ololalo fakavalevalé, ʻe lava ke ne ʻoatu naʻa mo e fakafōtunga ko kitautolú ko e ‘kau ʻofa ki he fakamalohí’?

Ko e Pole ʻo e Hoko ʻo Filifili Leleí

Koeʻuhi “ko hono kotoa ʻo mamani ʻoku ʻi he nima ʻo e Fili,” kuo hoko ʻo faingataʻa lahi ange ke maʻu ʻa e fakafiefia ʻoku ʻikai ke fakameleʻi ʻe he fakakaukau mo e ngaahi tōʻonga ʻa e māmaní. (1 Sione 5:19) Ko e ngaahi sēnolo hiva ʻe niʻihi ʻe ʻasi nai ai ʻo lahi ʻaupito ʻa e meʻa koví. Naʻa mo e taimi ʻoku ʻikai ke tekeutua ai ʻa e ʻulungaanga taʻetāú pe fakamālohí ʻi he polokalamá, ʻokú ne kei faʻa pouaki pē ʻa e laumālie ʻo e māmaní. Naʻe vakai ha tangata mūsika palōfesinale ki ha sēnolo hiva ongoongoa ʻe taha “kuo liliu ia mei he hoko ko ha sēnolo hivá ‘ki ha sēnolo fakaetōʻonga moʻui.’”

ʻOku hā faingofua nai ʻa e fakaleleiʻangá: Kapau ʻoku kovi ha foʻi faiva, liliu ʻa e sēnoló. Ko e palopalemá, ʻe fiemaʻu nai ke ke tokanga pehē pē ʻi he taimi ʻokú ke sio ai ʻi he ngaahi sēnolo televīsone kehé. ʻOku ʻomai ʻe he ngaahi sēnolo lahi ʻa e ngaahi polokalama ʻoku eʻa lelei ai ʻa e fakamālohí pe fakalieliá pe ʻoku fakahaaʻi ai ʻa e kakai ʻi he ngaahi tuʻunga fakamā fakaeʻulungaanga. Ko e moʻoni, ʻe lava ke fakatupuʻita—naʻa mo fakamamahi nai—ʻa e feinga ke fiefia ʻi ha fakafiefia lolotonga ia ʻi he taimi tatau ʻoku mateuteu maʻu pē ke liliu ʻa e sēnoló. Pea ʻi he taimi ʻe niʻihi, ʻi he aʻu ki he taimi kuo liliu ai ʻa e sēnoló, kuo ʻosi hoko ʻa e maumaú ia. Ko e ngaahi ʻata fakaefakakaukau taʻetāú kuo ʻosi fakamaʻu ia ʻi he ʻatamaí. Ka neongo ia, ʻoku lava ke ke fakapapauʻi ʻe tāpuakiʻi ʻe Sihova ko e ʻOtuá ha ngaahi feinga loto-moʻoni pē ʻokú ke fai ke maluʻi ho lotó.—2 Samiuela 22:21.

ʻOku ʻi ai ʻa e toe ngaahi sitepu ʻaonga kehe ʻe hoko nai ʻo ʻaonga. Ko Casey, naʻe lave ki ai ʻi muʻá, naʻá ne fakamatala ki he meʻa naʻe tokoni kiate iá: “Ko e hingoa ʻo e kulupú mo e hingoa ʻo e hivá ʻoku faʻa ʻasi mai ia ʻi he kamata ʻa e faivá. Ko e ʻū kulupu hivá ʻoku ʻi ai honau ngaahi ongoongo, ko ia ʻokú ke meimei ʻiloʻi maʻu pē ʻa e ʻū kulupu mo e ngaahi hiva ʻoku ngalingali ʻe koví. Ko ia, ʻi heʻeku sio ki he hingoa ʻo ha kulupu pe foʻi hiva ngalikehe ʻoku ʻasi mai, ko e taimi ia ʻoku ou liliu ai ʻa e sēnoló. ʻI he kamatá pē.”

‘Lea Aki ae Mooni i Ho Lotó’

Neongo kapau ʻoku teuʻi ʻaki koe ha ʻilo ki he ngaahi tefitoʻi moʻoni faka-Tohitapú, ʻoku malava ke kamata ke ke tali ʻa e meʻa ʻoku koví. Anga-fēfē? ʻAki hono fakaʻatā koe ke ke fakaʻuhinga. (Semisi 1:22) ʻOku tala mai ʻe he Tohitapú kia kitautolu ko e kaumeʻa ʻo Sihová ko e tokotaha ʻokú ne “lea aki ae mooni i hono loto.” (Sāme 15:​2, PM) Ko ia, faitotonu ʻi he fekauʻaki mo koé. Fakaʻehiʻehi mei hono kākaaʻi kitá. Kapau ʻokú ke ʻilo hifo ʻokú ke fakatonuhiaʻi hoʻo mamata ʻi ha meʻa ʻoku ngalikehe, ʻeke hifo, ‘ʻE hōifua moʻoni hifo ʻa Sihova ki heʻeku mamata hení?’ Manatuʻi, ʻoku faʻa hoko ko e polé ʻa e ʻikai ko hono ʻiloʻi pē ʻa e meʻa ʻoku tonú pe halá ka ko e fakapapauʻi te ke fai ʻa e meʻa ʻoku tonú! Kuo pau ke ke vakai ki ho vahaʻangatae mo Sihová ʻoku mahuʻinga ange ia ʻi ha faʻahinga fakafiefia pē.—2 Kolinito 6:​17, 18.

ʻOku ʻikai faʻa feʻunga ke fai ha foʻi fakapapau veiveiua pē ke hoko ʻo filifili lelei ange. Ko hoʻo fakapapaú ʻe lava ke mole vave ia kapau ʻoku ʻikai ke mālohi. ʻOku tala mai ʻe he Tohitapú kia kitautolu ʻa e anga ʻo e fakapapauʻi ʻe he tangata ʻa e ʻOtuá ko Siopé ke hanganaki faitōnunga ki hono uaifí. Naʻá ne pehē: “Naaku fai ae fuakava mo hoku mata; bea ka kuo behe, koeha teu jiofia ai ha taahine?” (Siope 31:​1, PM) Fakaʻuta atu ki ai! Naʻe fai ʻe Siope ha fuakava, pe ha alea fakapapau, mo ia tonu ke fakangatangata ʻa e meʻa te ne fakaʻatā hono matá ke sio ki aí. Ko hono moʻoní, ʻe lava ke ke fai ʻa e meʻa tatau. Fai ha fakapapau mālohi—ha palōmesi fakamātoato kia koe—ke ʻoua te ke sio ki he ngaahi meʻa ʻoku koví. Fokotuʻu ha ngaahi fakangatangata pau. ʻAi ia ko ha meʻa ke fai ki ai ha lotu. Pea fai pau ki hoʻo aleá, naʻa mo hono hikiʻi hifo ia kapau ʻoku tokoni ʻa e meʻa ko iá. Kapau ʻokú ke fiemaʻu ha toe kiʻi tokoni, fēfē ke ke talanoa ki he ngaahi meʻá mo ha taha matuʻotuʻa ange ʻokú ke falala ki ai—hangē ko hoʻo ongo mātuʻá?

ʻI he vakai ki he ngaahi fakatuʻutāmakí, kuo fakapapauʻi ai ʻe he kau talavou Kalisitiane ʻe niʻihi ke ʻoua ʻaupito pē te nau sio ʻi he faiva hivá. Ko e hā pē hoʻo filí ʻi he tuʻungá ni, ngāueʻaki ʻa hoʻo ngaahi mafai fakaefakakaukaú. Tauhi maʻu ha konisēnisi maʻa. ʻI he piki ki he fakafiefia ʻoku lelei mo fakaivifoʻoú, ʻe lava ke ke kalofi ai ʻa hono fakameleʻi koé pea toe tauhi maʻu ai ho tuʻunga kaumeʻa mo Sihová.

[Fakatātā ʻi he peesi 12]

Ko e ngaahi faiva ʻe niʻihi ʻoku ʻikai tekeutua ai ʻa e ʻulungaanga taʻetāú ʻokú ne kei pouaki pē ʻa e ngaahi fakakaukau fakatupu maumaú

[Fakatātā ʻi he peesi 13]

Fakapapauʻi ʻe ʻikai te ke mamata ʻi he ngaahi meʻa ʻoku taʻefakahōifua ki he ʻOtuá