“Ko e Teniti ʻo e Faitotonu ʻe Tuʻu mo e Lau”

ʻI HE taimi ʻe mapuna hake ai ʻa e afā ʻo Hāmaketoné ʻo ʻomai ha ngataʻanga ki he fokotuʻutuʻu fulikivanu ʻo e ngaahi meʻa ʻa Sētané, “ko e fale ʻo e angahala ʻe fakaʻauha.” Fēfē ʻa e “teniti ʻo e faitotonu”? ʻĀua, ʻi he māmani foʻou ʻe faʻu ʻe he ʻOtuá, ʻe “tuʻu mo e lau” ai ia.—Palovepi 14:11.

Kae kehe, kae ʻoua ke toki aʻu ki he taimi ʻa ia ‘ko e kakai koví ʻe tuʻusi ai mei he fonuá, ʻio, ko kinautolu ʻoku fai kākaá ʻe taʻaki mei aí,’ kuo pau ke feohi mo kinautolu ʻa e kau anga-haohaoá. (Palovepi 2:​21, 22) ʻE lava ke tuʻu mo e lau ʻa e faitotonú ʻi he malumalu ʻo e ngaahi tuʻunga ko ení? Ko e veesi 1 ki he 11 ʻo e vahe 14 Pa 14:1-11 ʻi he tohi Tohi Tapu ʻa Palovepí ʻoku fakahaaʻi ai ʻe lava ke tau maʻu ha tuʻunga ʻo e lakalakaimonū mo e tuʻumaʻu ʻi hono tuku ʻa e potó ke ne tataki ʻa ʻetau leá mo e ngaahi ngāué, naʻa mo e ʻi he taimí ni.

ʻI Hono Langa ʻe he Potó ha Falé

ʻI he fakamatala ki he tākiekina ʻa e uaifí ki he lelei ʻa e fāmilí, ʻoku pehē ʻe Tuʻi Solomone ʻo ʻIsileli ʻo e kuonga muʻá: “Oku laga hake hono fale e he fefine kotoabe oku boto: ka oku holoki hifo ia e he vale aki hono nima.” (Palovepi 14:​1, PM) ʻOku anga-fēfē hono langa hake ʻe ha fefine ʻokú ne maʻu ʻa e potó ʻa hono falé? ʻOku ʻapasiaʻi ʻe ha fefine poto ʻa e fokotuʻutuʻu ʻa e ʻOtuá ki he tuʻunga-ʻulú. (1 Kolinito 11:3) ʻOku ʻikai ke tākiekina ia ʻe he laumālie ʻo e faʻifaʻitelihá ʻa ia ʻoku hūhū ʻi he māmani ʻo Sētané. (Efeso 2:2) ʻOkú ne fakamoʻulaloa ki hono husepānití pea lea lelei fekauʻaki mo ia, ʻo fakalahi ai ʻa e ʻapasia ʻoku maʻu nai ʻe he niʻihi kehé kiate iá. ʻOku kau longomoʻui ha fefine poto ʻi hono akoʻi fakalaumālie mo ʻaonga ʻa ʻene fānaú. ʻOkú ne ngāue mālohi maʻá e lelei ʻa e fāmilí, ʻo ʻai ʻa e ʻapí ko ha feituʻu lelei mo fakafiemālie ia ki he fāmilí. Ko ʻene faʻahinga ngāué ʻoku fakaʻilongaʻi ʻaki ia ʻa e fakapotopoto mo e fakaʻekonōmika. Ko ha fefine poto moʻoni ʻoku tokoni ia ki he lakalakaimonū mo e tuʻumaʻu ʻa hono falé.

Ko ha fefine vale ʻoku ʻikai haʻane ʻapasia ki he fokotuʻutuʻu ʻa e ʻOtuá ki he tuʻunga-ʻulú. ʻOku ʻikai te ne toumoua ke lea kovi fekauʻaki mo hono husepānití. ʻI he ʻikai ke fakapotopotó, ʻokú ne tolovekaʻaki ʻa e ngaahi koloa ʻa e fāmilí naʻe maʻu ʻi he ngāue mālohí. ʻOkú ne toe fakamoleki noaʻia ʻa e taimí. Ko hono ikuʻangá, ʻoku ʻikai ke tokangaʻi lelei ʻa e falé pea ʻoku faingataʻaʻia fakaesino mo fakalaumālie ʻa e fānaú. ʻIo, ko e tokotaha valé ʻokú ne holoki hifo ʻa hono falé.

Ko ia ai, ko e hā ʻokú ne fakapapauʻi pe ʻoku poto pe vale ha tokotaha? ʻOku fakamatala ʻa e Palovepi 14:2 (PM): “Koia oku eveeva i he ene agatonu oku manavahe ia kia Jihova: ka koia oku bikobiko i hono gaahi hala oku ne fehia [pe taʻetokaʻi] kiate ia.” Ko e tokotaha anga-tonú ʻoku manavahē ia ki he ʻOtua moʻoní, pea “koe manavahe kia Jihova koe kamataaga ia oe boto.” (Sāme 111:​10, PM) Ko ha tokotaha poto moʻoni ʻokú ne ʻiloʻi ko hono fatongiá ia ke “manavahe ki he Otua [moʻoní], bea ke fai ki he ene gaahi fekau.” (Koheleti 12:​13, PM) ʻI he tafaʻaki ʻe tahá, ʻoku muimui ʻa e tokotaha valé ʻi ha ʻalunga ʻoku ʻikai fehoanakimālie mo e ngaahi tuʻunga anga-tonu ʻa e ʻOtuá. Ko ʻene ngaahi foungá ʻoku pikopiko. Ko ha tokotaha pehē ʻokú ne taʻetokaʻi ʻa e ʻOtuá, ʻo ne pehē ʻi hono lotó: “Oku ʻikai ha ʻOtua.”—Sāme 14:1.

ʻI Hono Tataki ʻa e Loungutú ʻe he Potó

Ko e hā ʻe lava ke leaʻaki fekauʻaki mo e lea ʻa ha tokotaha ʻoku manavahē kia Sihova pea mo e tokotaha ʻokú ne taʻetokaʻi Iá? “Oku ai ae vaa oe laukau i he gutu oe vale,” ko e lea ia ʻa e tuʻí, “ka oku fakamoui ae boto e ho nau lougutu.” (Palovepi 14:​3, PM) ʻI he ʻikai ʻa e poto mei ʻolungá, ko ha tokotaha vale ʻoku ʻikai ke fakamelino ia pea ʻikai ke fakaʻatuʻi. Ko e poto ʻokú ne tataki ʻa ʻene ngaahi laká ʻoku fakamāmani ia, fakakakano, fakatēmeniō. ʻOkú ne leaʻaki ʻa e ngaahi lea ʻa ia ʻoku fakatupu fakakikihi pea loto-hīkisia. Ko e pōlepole ʻi hono ngutú ʻokú ne fakatupunga ʻa e faingataʻa lahi kiate ia pea ki he niʻihi kehé.​—Semisi 3:​13-​18.

Ko e loungutu ʻo ha tokotaha poto ʻokú ne leʻohi, pe maluʻi ia, ʻo tānaki atu ki heʻene ongoʻi leleí. Anga-fēfē? ʻOku fakamatala ʻa e Tohi Tapú: “ʻOku ai ha taha ko ʻene faʻa lau ʻoku hange ko e hokohokai ha heleta: ka ko e ʻelelo ʻo e poto ko e meʻa faitoʻo.” (Palovepi 12:18) Ko e ngaahi lea ʻa ha tokotaha poto ʻoku ʻikai ke taʻefakakaukauʻi ia pe fakaʻaluma. ʻOku fakalaulauloto ʻa hono lotó koeʻuhi ke ne fai ha tali. (Palovepi 15:28) Ko ʻene lea filifili leleí ʻoku faifakamoʻui—ʻokú ne fakalototoʻaʻi ʻa e ngaahi laumālie mafasiá pea fakaivifoʻou ʻa e faingataʻaʻiá. ʻI he ʻikai ke fakaʻitaʻi ʻa e niʻihi kehé, ʻoku pouaki ʻe hono loungutú ʻa e melino mo e nonga.

ʻI Hono Tataki ʻe he Potó ʻa e Ngaahi Ngāue Fakaetangatá

ʻOku hoko atu ʻa Solomone ʻo ʻomai ha palōveepi fakamānako ʻa ia ʻoku hā ngali fekuki mo e fiemaʻu ke fakafuofuaʻi ʻa e ngaahi ʻaonga pea mo e taʻeʻaonga ʻo hono fai ha ngāue pau. ʻOkú ne pehē: “I he botu oku ikai ai ha faga bulu oku maa ai ae aiaga kai: ka oku ai ae tubu lahi i he malohi oe bulu.”—Palovepi 14:​4, PM.

ʻI he fakamatala ki he ʻuhinga ʻo e palōveepi ko ení, ʻoku fakamatala ha tohi maʻuʻanga fakamatala ʻe taha: “Ko ha fafangaʻanga [ʻaiʻanga kai ʻo e manú] ʻoku mahá ʻoku fakahaaʻi ai ʻoku ʻikai ha fanga pulu tangata [fanga pulu] ke fafanga, pea ko ia ʻoku ʻataʻatā ai ha taha mei he helaʻia ʻi hono fakamaʻa mo tokangaʻi ʻa e fanga manú, pea ʻe siʻi ai ʻa e ngaahi fakamolé. Ka ko e ‘ʻaonga’ ko ení ʻoku fakataʻeʻaongaʻi ia ʻi he v[eesi] 4e: ʻi he ʻikai ngāueʻaki ʻa e fanga pulu tangatá, ʻoku fakahuʻunga ai, ʻe ʻikai ke lahi ʻa e utu-taʻú.” Kuo pau ke fili fakapotopoto ai ʻa e tokotaha fāmá.

ʻIkai ʻe toe ngāueʻaki ʻa e tefitoʻi moʻoni ʻo e palōveepi ko ení ʻi he taimi ʻoku tau fakakaukau ai ke fetongi ʻa e ngāué, ko hono filifili ha faʻahinga pau ʻo e falé, fakatau ʻo ha kaá, ʻomai ha manu pusiaki ki he falé mo e ngaahi meʻa meimei tatau? ʻE fua tautau ʻe ha tokotaha poto ʻa e ngaahi ʻaongá mo e taʻeʻaongá pea fakafuofuaʻi pe ko e meʻá ʻoku mahuʻinga moʻoni ʻa e feinga ki aí pea mo e fakamolé.

Taimi ʻOku Poto Ai ha Fakamoʻoní

“Ko e fakamoʻoni tonunga ʻoku ʻikai te ne loi,” ko e hoko atu ia ʻa Solomoné, “ka ʻoku hoʻaki loi ʻa e fakamoʻoni kākā.” (Palovepi 14:5) Ko e ngaahi loi ʻa e fakamoʻoni kākaá ʻoku lava moʻoni ke ne fai ha maumau lahi. Ko e tokotaha Sisilili ko Nēpoté naʻe tolomakaʻi ia ki he mate koeʻuhi ko e fakamoʻoni loi fekauʻaki mo ia ʻa ha ongo tangata anga-kovi. (1 Tuʻi 21:​7-​13) Pea ʻikai naʻe hoko kia Sīsū ha ngaahi fakamoʻoni loi ʻo iku ai ki heʻene pekiá? (Mātiu 26:​59-​61) Naʻe toe fakamoʻoni ha kau fakamoʻoni loi kia Sitīveni—ʻa e ʻuluaki ākonga ʻa Sīsū naʻe tāmateʻi koeʻuhi ko ʻene tuí.​—Ngāue 6:​10, 11.

ʻE hokohoko atu nai ha tangata ʻoku ʻikai lea moʻoni ʻo ʻikai ʻiloʻi ia ʻi he lolotongá ni, kae fakakaukau atu ki hono kahaʻú. ʻOku fehiʻa ʻa Sihova ʻi ha “fakamoʻoni kākā ʻoku hoʻaki loi,” ko e fakamatala ia ʻa e Tohi Tapú. (Palovepi 6:​16-19) Ko e ʻinasi ʻo e tangata ko iá ʻe ʻi he ano ʻoku ulo afi mo e sūlifa—ko e mate ʻanga ua—fakataha mo e kau faihala hangē ko e kau fakapoó, kau feʻauakí mo e kau tauhi ʻaitolí.​—Fakahā 21:8.

Ko e fakamoʻoni faitōnungá ʻoku ʻikai te ne fai ha loi ʻi heʻene fai ha fuakava. Ko ʻene fakamoʻoní ʻoku ʻikai ke fakameleʻi ia ʻaki ha ngaahi loi. Kae kehe, ʻoku ʻikai ʻuhinga eni ia ʻokú ne ʻi he malumalu ʻo ha fatongia ke fai ha fakamatala kakato ki he faʻahinga te nau loto nai ke ʻomai ha maumau ʻi ha faʻahinga founga ki he kakai ʻa Sihová. Ko e ongo pēteliake ko ʻĒpalahame mo ʻAisaké naʻá na taʻofi ha ngaahi foʻi moʻoni mei he niʻihi naʻe ʻikai te nau lotu kia Sihová. (Senesi 12:​10-​19; 20:​1-​18; 26:​1-​10) Ko Lēhapi ʻo Sielikoó naʻá ne takihalaʻi ʻa e kau tangata ʻa e tuʻí. (Siosiua 2:​1-7) Naʻe fakaʻehiʻehi ʻa Sīsū Kalaisi tonu mei hono fakahaaʻi ʻa e fakamatala kakató ʻa ia ʻi he fai peheé ne mei fakatupunga ai ha maumau naʻe ʻikai pau ke hoko. (Sione 7:​1-​10) Naʻá ne pehē: “Oua naa atu ae mea maonioni ki he faga kuli.” Ko e hā ke ʻoua aí? Koeʻuhi “telia naa nau . . . foki mai o haehae akimoutolu.”—Mātiu 7:​6, PM.

ʻI Hono “Maʻungofua ʻa e ʻIlo”

Ko e potó ko ha koloa ia ʻa e kakai kotoa pē? ʻOku fakahaaʻi ʻi he Palovepi 14:6: “[ʻOku] kumi ʻa e kakae ki he potu ʻoku ʻikai ke siaʻa: ka ʻoku maʻungofua ʻa e ʻilo ki he mafakakaukau [tokotaha mahino].” Ko ha tokotaha kakae, pe manuki, ʻe kumi nai ki he potó, ka ʻoku mavahe meiate ia ʻa e poto moʻoní. Koeʻuhi ʻoku manuki loto-pōlepole ha tokotaha kakae ki he ngaahi meʻa ʻa e ʻOtuá, ʻoku ʻikai lava ke ne maʻu ʻa e meʻa tefito ʻoku fiemaʻu ki he potó—ko e ʻilo totonu fekauʻaki mo e ʻOtua moʻoní. Ko ʻene loto-pōlepolé mo e hīkisiá ʻoku taʻofi ai ia mei he ako fekauʻaki mo e ʻOtuá pea mo hono maʻu ʻo e potó. (Palovepi 11:2) Ko e hā ʻoku aʻu ai ʻo fakahohaʻasi ia ke ne kumi ki he potó? ʻOku ʻikai tala mai ia ʻe he palōvēpí, kae mahalo pē ʻokú ne fai ia koeʻuhí ke fakakaukau nai ai ʻa e niʻihi kehé ʻokú ne poto.

“ʻOku maʻungofua ʻa e ʻilo” ki ha tokotaha mahino. Ko e mahinó ʻoku fakamatalaʻi ia ko “ha maʻu fakaeʻatamai: makupusi,” “ko e malava ke ʻiloʻi ʻa e ngaahi felāveʻi fakalūkufua ʻo ha ngaahi meʻa tefito.” Ko e malava ke fakafehokotaki ʻa e ngaahi tafaʻaki kehekehe ʻo ha kaveinga pea sio ki he meʻá fakakātoa, ʻo ʻikai ki he ngahi konga mavahé pē. ʻOku pehē ʻi he palōveepi ko ení ʻoku hokongofua ʻa e ʻiló ki ha tokotaha ʻokú ne maʻu ʻa e malava ko ení.

ʻI he fekauʻaki mo e meʻá ni, fakakaukau ki hoʻo hokosia tonu ʻa hono maʻu ʻo e ʻilo ki he moʻoni Fakatohitapú. ʻI hoʻo kamata ke ako ʻa e Tohi Tapú, ʻoku mātuʻaki ngalingali ko e ngaahi akonaki tefito fekauʻaki mo e ʻOtuá, ko ʻene ngaahi talaʻofá, pea mo hono ʻAló naʻe ʻi he haʻohaʻonga ʻo e ngaahi ʻuluaki moʻoni naʻá ke akó. ʻI ha taimi, naʻa nau ʻi he ngaahi fakaikiiki māvahevahe ai pē. Ka ʻi hoʻo hokohoko atu ke akó, naʻe kamata ke fehokotaki fakataha ʻa e fanga kiʻi kongokongá pea lava ai ke ke sio lelei ki he anga ʻo e felāveʻi ʻa e ngaahi fakaikiiki kehekehe ki he taumuʻa fakalūkufua ʻa Sihova ki he tangatá pea mo e foʻi māmaní. Ko e moʻoni mei he Tohi Tapú naʻe hoko ia ʻo kaungatonu pea fehokotaki. Ko hono ako mo manatuʻi ʻa e ngaahi fakaikiiki foʻoú naʻe hoko leva ai ʻo faingofua ange koeʻuhi naʻe lava ke ke sio ki he feituʻu ke fokotuʻu ki ai ʻi he fakatātaá fakakātoa.

ʻOku fakatokanga ʻa e tuʻi potó ki he feituʻu ʻe ʻikai ke maʻu ai ʻa e ʻiló. “Alu atu mei he ao oe tagata vale,” ko ʻene leá ia, “oka ke ka mamata oku ikai iate ia ae lougutu oe boto [pe ʻiló].” (Palovepi 14:​7, PM) Ko ha tokotaha vale ʻoku ʻikai ke ʻi ai ʻa e ʻilo moʻoní. ʻOku ʻikai ke ʻaʻana ʻa e loungutu ʻoku leaʻaki ʻa e ʻiló. Ko e faleʻí ke mavahe mei ha tangata pehē, pea ʻoku fakapotopoto ke fakamamaʻo meiate ia. Ko ha taha pē ʻoku “kaumeʻa mo e sesele ʻe hoko ko e lusa.”—Palovepi 13:20.

“Ko e poto ʻa e fakapotopoto ʻaʻeni, ke ʻai ke mahino hono hala,” ko e hoko atu ia ʻa Solomoné, “ka ko e vale ʻa e kau vale ke fai fakakākā.” (Palovepi 14:8) Ko ha tokotaha poto ʻokú ne fakakaukau ki heʻene ngaahi ngāué. ʻOkú ne fakakaukau ki he ngaahi fili kehekehe ʻoku ʻatā kiate iá pea fakalaulauloto ki he ola ʻe lava ke hoko ʻi he meʻa ʻe iku ki ai ʻa e fili taki taha. ʻOkú ne fili fakapotopoto ʻa hono ʻalungá. Fēfē ʻa e tokotaha valé? ʻOkú ne fili ha hala fakavalevale, ʻi he tui ʻokú ne ʻiloʻi ʻa e meʻa ʻokú ne faí pea ʻokú ne fai ʻa e fili lelei tahá. ʻOku kākaaʻi ia ʻe heʻene valé.

ʻI Hono Tataki ʻe he Potó ʻa e Ngaahi Vahaʻangataé

Ko e tokotaha ʻoku tataki ʻe he potó ʻoku melino ʻa hono ngaahi vahaʻangatae mo e niʻihi kehé. “Ko e feilaulau totongi [pe halaia] ʻa e vale ʻoku ne tuhu kakae ki ai,” ko e fakamatala ia ʻa e tuʻi ʻo ʻIsilelí, “ka ko e kau faitotonu ʻoku feluteni honau va.” (Palovepi 14:9) Ko e ongoʻi halaiá, pe fakatomalá, ko ha meʻa fakakata ia ki ha vale. ʻOku maumau ʻa hono ngaahi vahaʻangatae ʻi ʻapí pea mo ha feituʻu pē koeʻuhi ʻokú ne “fuʻu hīkisia ke fai ha ngaahi fakalelei” pea kumi ki he melinó. (The New English Bible) Ko e tokotaha faitotonú ʻoku loto-lelei ia ke tali ʻa e ngaahi tōnounou ʻa e niʻihi kehé. ʻOkú ne mateuteu ke kole fakamolemole pea fai ha ngaahi fakalelei ʻi he taimi ʻokú ne hala aí. Koeʻuhi ʻokú ne tuli ki he melinó, ʻokú ne maʻu ha ngaahi vahaʻangatae fiefia mo tuʻumaʻu mo e niʻihi kehé.​—Hepelu 12:14.

ʻOku hoko atu ʻa Solomone ʻo fakahaaʻi ha meʻa fakangatangata tefito ʻi he ngaahi vahaʻangatae fakaetangatá. ʻOkú ne pehē: “Oku ilo e he loto a ene mamahi aana: bea oku ikai ke kau ha taha kehe i he ene fiefia.” (Palovepi 14:​10, PM) ʻE lava ke tau fakahaaʻi maʻu pē ʻetau ngaahi ongoʻi taupotú—pe ko e mamahi pe fiefia—ki he niʻihi kehé pea tala totonu kia kinautolu ʻa e meʻa ʻoku tau hokosiá? Pea ʻe lava ʻe ha taha ʻi he taimi kotoa pē ʻo mahinoʻi kakato ʻa e anga ʻo e ongoʻi ʻa e tokotaha ʻe tahá? Ko e tali ki he ongo fehuʻí fakatouʻosi ko e ʻikai.

Ko ha fakatātā, fakakaukau angé ki he ngaahi ongoʻi taonakitá. Ko e tokotaha ʻokú ne maʻu iá ʻoku ʻikai te ne faʻa fakahaaʻi mahino ʻa e ngaahi ongoʻi ko ení ki ha mēmipa ʻi he fāmilí pe ko ha kaumeʻa. Pea ʻoku ʻikai maʻu pē ke lava ʻo ʻiloʻi ʻe he niʻihi kehé ʻa e ngaahi fakaʻilonga ʻo e ngaahi ongoʻi peheé ʻi he faʻahinga ʻoku nau feohi mo iá. ʻOku ʻikai fiemaʻu ke tau ongoʻi halaia ʻi he ʻikai te tau ʻiloʻi ʻa e ngaahi fakaʻilongá ni pea ʻikai lava ke tau fai ha tokoní. ʻOku toe akoʻi ʻe he palōveepi ko ení neongo ʻoku fakafiemālie ke hanga ki ha kaumeʻa kaungāongoʻi ki ha poupou fakaeongo, ʻoku fakangatangata ʻa e tangatá ʻi he fakafiemālie ʻoku lava ke nau foakí. ʻOku fiemaʻu nai ke tau falala kia Sihova tokotaha pē ʻi he taimi ʻoku hoko mai ai ki hono kātekina ʻa e ngaahi faingataʻá.

“ʻOku ʻi Hono Fale ʻa e Mahu mo e Koloa”

“Ko e fale ʻo e angahala ʻe fakaʻauha,” ko e fakamatala ia ʻa e tuʻi ʻo ʻIsilelí, “ka ko e teniti ʻo e faitotonu ʻe tuʻu mo e lau.” (Palovepi 14:11) ʻE tuʻu mo e lau nai ha tokotaha angahala ʻi he fokotuʻutuʻu ko eni ʻo e ngaahi meʻá pea nofo nai ʻi ha fale lelei, ka ko e hā hono ʻaonga ia kiate ia ʻi he taimi ʻe ʻikai te ne toe ʻi ai aí? (Sāme 37:10) ʻI he tafaʻaki ʻe tahá, ko e feituʻu nofoʻanga ʻo ha tokotaha faitotonu ʻe mātuʻaki māʻulalo nai. Ka “ʻoku ʻi hono fale ʻa e mahu mo e koloa,” ko e lau ia ʻa e Sāme 112:3. Ko e hā ʻa e ngaahi meʻá ni?

ʻI he taimi ʻoku tataki ai ʻe he potó ʻetau ngaahi leá mo e ngāué, ʻoku tau maʻu ai ʻa e “koloa mo e ongoongo” ʻa ia ʻoku ʻi he potó. (Palovepi 8:18) ʻOku kau ai ha vahaʻangatae melino mo e ʻOtuá pea mo hotau kaungā faʻahinga ʻo e tangatá, ko ha ongoʻi lelei, mo ha tuʻunga tuʻumaʻu. ʻIo, “ko e teniti ʻo e faitotonu” ʻe lava ke tuʻu ia mo e lau naʻa mo e ʻi he taimí ni.

[Fakatātā ʻi he peesi 27]

Ko ha fefine poto ʻokú ne langa hake hono falé

[Fakatātā ʻi he peesi 28]

“Ko e ʻelelo ʻo e poto ko e meʻa faitoʻo”