“Ko e Fakapotopoto ʻOku Ne Fakakaukaua ʻEne Laka”

KO HA tokotaha fakapotopoto ʻokú ne pōtoʻi mo ʻatamaiʻia, lelei ʻene fakafuofuá pea māsila ʻene ʻiló, fakakaukau lelei mo ʻiloʻilo pea poto. ʻOku ʻikai foki te ne taʻefaitotonu pe anga-kākā. “Oku faa kau ki he ilo ae tagata fakabotoboto,” ko e lau ia ʻa e Palovepi 13:16 (PM). ʻIo, ko e fakapotopotó ko ha anga fakamānako ia.

ʻE lava fēfē ke tau fakahāhā ʻa e fakapotopotó ʻi heʻetau moʻui fakaʻahó? ʻOku anga-fēfē ʻetau ʻai ʻo hā mahino ʻa e ʻulungāangá ni ʻi he ngaahi fili ʻoku tau faí, ʻi heʻetau founga fai ki he niʻihi kehé pea mo e anga ʻo ʻetau tali ki he ngaahi tuʻunga kehekehé? Ko e hā ʻa e ngaahi pale ʻoku utu ʻe he fakapotopotó? Ko e hā ʻa e ngaahi fakatamaki ʻokú ne taʻofí? ʻOku ʻomi ʻe Tuʻi Solomone ʻo ʻIsileli ʻo e kuonga muʻá ʻa e ngaahi tali pōtoʻi ki he ngaahi fehuʻí ni ʻi heʻetau lau ʻa e Palovepi 14:​12-​25.a

Fili Fakapotopoto Ho ʻAlungá

Ko hono fai ʻa e ngaahi fili fakapotopotó mo e hoko ʻo lavameʻa ʻi he moʻuí ʻoku fiemaʻu papau ki ai ʻa e malava ko ia ke fakafaikehekeheʻi ʻa e meʻa ʻoku tonú mei he meʻa ʻoku halá. Kae kehe, ʻoku fakatokanga mai ʻe he Tohi Tapú: “ʻOku ai ha hala ʻoku ha matamata totonu ki he tangata: ka ʻoku tuʻulu atu ki he ngaahi hala ʻoku fakatau ki he mate.” (Palovepi 14:12) Ko ia ai, kuo pau ke tau ako ke fakafaikehekeheʻi ʻa e meʻa ʻoku tonu matemateé mei he meʻa ʻoku hā ngali pē ʻoku tonú. Ko e fakalea “hala ʻoku fakatau ki he mate” ʻoku fakahaaʻi mai ai ʻoku lahi ʻa e ngaahi ʻalunga kākaá. Fakakaukau angé ki he ngaahi tafaʻaki ʻoku totonu ke tau tokanga ki ai pea fakaʻehiʻehi mei aí.

Ko e kau tuʻumālie mo ongoongoa ʻo e māmaní ʻoku fai e vakai fakalūkufua kiate kinautolu ko e kakai taau ia ke fai e leleiʻia ai. Ko ʻenau lavameʻa fakasōsiale mo fakapaʻangá te ne ʻai nai ai ke hā ngalingali ʻoku totonu ʻa e founga ʻo e ngaahi meʻa ʻoku nau faí. Neongo ia, fēfē nai ʻa e ngaahi founga ʻoku ngāueʻaki ʻe he tokolahi ʻo e faʻahinga tāutaha ko iá ke maʻu ai ʻa e tuʻumālié pe ongoongoá? ʻOku anga-tonu mo tonu fakaeʻulungāanga maʻu pē ʻa ʻenau ngaahi foungá? Pea ʻoku ʻi ai ʻa e faʻahinga tāutaha ʻo kinautolu ʻoku nau fakahāhā ʻa e faivelenga ʻoku taau ke viki ki heʻenau ngaahi tui fakalotú. Ka ʻoku fakamoʻoniʻi totonu mai ʻe heʻenau loto-moʻoní ʻoku tonu ai ʻenau ngaahi tuí?​—Loma 10:​2, 3.

ʻE hā ngali totonu nai ha ʻalunga koeʻuhí ko e kākaaʻi-kitá. Ke fakatuʻunga ʻetau ngaahi filí ʻi he meʻa ʻoku tau ongoʻi fakafoʻituitui ʻoku tonú ko e fakafalala moʻoni ia ki he lotó, ʻa ia ko ha tataki kākā. (Selemaia 17:9) Ko ha konisēnisi ʻikai fakamaama mo taʻeakoʻi ʻe lava ke ne taki atu ai kitautolu ke fakakaukau ʻo pehē ko e ʻalunga halá ʻa e ʻalunga ʻoku tonú. Ko ia, ko e hā leva te ne tokoniʻi kitautolu ke fili ha ʻalunga totonú?

Ko ha ako tōtōivi fakafoʻituitui ʻo e ngaahi moʻoni loloto ange ʻo e Folofola ʻa e ʻOtuá ko ha meʻa ia kuo pau ke fai ʻo kapau ʻoku tau fiemaʻu ʻa e ‘ngaahi ongoʻanga [pe mafai fakaefakakaukau] kuo akoʻi ke nau sivi ʻa e leleí mo e koví [pe tonú mo e halá].’ ʻIkai ngata aí, kuo pau ke tau akoʻi ʻa e ngaahi mafai ko ʻení ʻi he “faʻa fai” ʻi hono ngāueʻaki ʻa e ngaahi tefitoʻi moʻoni Fakatohitapú. (Hepelu 5:​14) Kuo pau ke tau tokanga ke ʻoua ʻe fakaʻatā ha ʻalunga ʻoku hā ngali ʻoku tonú ke ne fakatupunga kitautolu ke tau afe ai mei he ‘hala fāsiʻi ʻoku fakatau ki he moʻuí.’​—Mātiu 7:​13, 14.

ʻI he Taimi “Oku Mamahi Ai ae Loto”

ʻE lava nai ke tau fiefia ʻi he taimi ʻoku ʻikai ke tau nonga aí? ʻOku fakasiʻisiʻi nai ʻe he kakatá mo e fakafiefiá ha mamahi kuo faiaka loloto? ʻOku fakapotopoto ʻa e feinga ke lōmia ʻa e ngaahi ongoʻi loto-mafasiá ʻaki ʻa e ʻolokaholó, ngāuekoviʻaki ʻa e faitoʻo kona tapú pe ko e feinga ke fakapuliki ʻa e ngaahi ongo peheé ʻaki hono ohi ha founga moʻui fakaʻaluʻalu? Ko e talí ko e ʻikai. “I he lolotoga ae kata oku mamahi ai ae loto,” ko e lau ia ʻa e tuʻi potó.​—Palovepi 14:13a, PM.

ʻE fakapuliki nai ʻe he kakatá ʻa e mamahí, ka ʻoku taʻemalava ke ne toʻo atu ia. “Ko e meʻa kotoa ʻoku ai hano taimi,” ko e lau ia ʻa e Tohi Tapú. Ko e moʻoni, ʻoku ʻi ai ʻa e “ʻaho ke tangi, mo e ʻaho ke kata; ko e ʻaho ke tengihia, mo e ʻaho ke meʻe.” (Koheleti 3:​1, 4) ʻI he taimi ʻoku tuʻumaʻu ai ʻa e loto-mafasiá, kuo pau ke tau fou ʻi he ngaahi sitepu ke ikuʻi ia, ʻo kumi ki ha “ngaahi fakakaukau lelei” ʻi he taimi ʻoku fiemaʻu aí. (Palovepi 24:6)b Ko e kakatá mo e mālieʻiá ʻoku ʻi ai pē hono mahuʻinga, ka ʻoku siʻi ʻa hona mahuʻingá ʻi hono fakahoa atú. ʻI he fakatokanga fekauʻaki mo e ngaahi founga taʻetaau ʻo e mālieʻiá mo e fakafiefia tōtuʻá, ʻoku pehē ai ʻe Solomone: “ko e ikuanga ʻo é—ʻo e—fiefia—ko e mamahi.”​—Palovepi 14:13e.

Ko e Taʻetuí pea mo e Leleí—Anga-Fēfē ʻEna Fiemālié?

“Ko e holomui loto [ pe taʻetuí] ʻe faifai pea ne makona [ pe fiemālie] ʻi heʻene faliunga,” ko e hoko atu ia ʻa e tuʻi ʻo ʻIsilelí, “pea ʻe makona [ pe fiemālie] ʻa e tangata lelei meiate ia pe.” (Palovepi 14:14) ʻE anga-fēfē ʻa e hoko ʻo fiemālie ʻa e taʻetuí pea mo e leleí ʻi heʻena ngaahi ngāué?

Ko ha tokotaha taʻetui ʻoku ʻikai tokanga ia ki he ʻoatu ko ia ha fakamatala ki he ʻOtuá. Ko ia ai, ko hono fai ʻa e meʻa ʻoku tonu ʻi he vakai ʻa Sihová ʻoku ʻikai mahuʻinga ia ki ha tangata ʻoku ʻikai tui. (1 Pita 4:​3-5) Ko ha tokotaha pehē ʻoku fiemālie pē ia ʻi he ngaahi ola ko ē ʻo ʻene tōʻonga moʻui fakamatelié. (Sāme 144:​11-​15a) Ko e tokotaha leleí, ʻi he tafaʻaki ʻe tahá, ʻokú ne maʻu ʻa e mahuʻingaʻia fakalaumālie ʻi he lotó. ʻI he kotoa ʻo ʻene ngaahi ngāué, ʻokú ne pipiki ai ki he ngaahi tuʻunga māʻoniʻoni ʻa e ʻOtuá. Ko ha tokotaha tāutaha pehē ʻokú ne fiemālie ʻi he ngaahi olá koeʻuhi ko Sihova ʻa hono ʻOtuá pea ʻokú ne maʻu ʻa e fiefia taʻealafakatataua ʻi hono tauhi ʻa e Fungani Māʻolungá.​—Sāme 144:15e.

ʻOua ʻe “Tui ki he Lea Kotoa”

ʻI hono fakahoa ʻa e ngaahi ʻalunga ʻo e taʻetaukeí pea mo e fakapotopotó, ʻoku pehē ai ʻe Solomone: “Ko e hehema ngofua [ pe taʻetaukeí] ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.” (Palovepi 14:15) Ko e tokotaha fakapotopotó ʻoku ʻikai kākaaʻingofua. ʻI he ʻikai tui ki he meʻa kotoa pē ʻokú ne fanongo ki aí pe ko hono tali noaʻia pē ʻa e anga ʻo e fakakaukau ʻa e niʻihi kehé, ʻokú ne fakakaukauʻi fakapotopoto ʻa hono ʻalungá. ʻI hono tānaki kotoa ʻa e ngaahi moʻoni ʻoku ala maʻú, ʻokú ne fai ha meʻa ʻaki ʻa e ʻiló.

Ko e fakatātaá, fakakaukau angé ki he fehuʻi, “ʻOku ʻi ai nai ha ʻOtua?” Ko e tokotaha taʻetaukeí ʻoku hehema ia ke ne tali ʻa e meʻa ʻoku manakoá pe ko e meʻa ko ia ʻoku tui ki ai ʻa e kakai ʻiloá. Ko e tokotaha fakapotopotó, ʻi he tafaʻaki ʻe tahá, ʻokú ne tuku ʻa e taimi ke sivisiviʻi ai ʻa e ngaahi moʻoniʻi meʻá. ʻOkú ne ngāueʻaki ʻa e ngaahi konga Tohi Tapu hangē ko e Loma 1:​20 pea mo e Hepelu 3:4. ʻI he ngaahi meʻa fakalaumālié, ko ha tokotaha fakapotopoto ʻoku ʻikai ke ne tafoki hake pē ʻo tali ʻa e lea ʻa e kau taki lotú. ʻOkú ne ‘sivi pe ʻa e ngaahi laumālié, pe ʻoku mei he ʻOtuá ia.’​—1 Sione 4:1.

He fakapotopoto ē ke tokanga ki he akonaki ko ia ke ʻoua ʻe “tui ki he lea kotoa”! Ko e faʻahinga ko ia ʻoku fakafatongiaʻaki ke nau ʻoatu ʻa e akonaki ki he niʻihi kehe ʻi he fakatahaʻanga Kalisitiané kuo pau ke tautefito ʻenau tokangá ki he meʻa ko ení. Kuo pau ki he tokotaha akonakí ke ne maʻu ʻa e fakatātā kakato ʻo e meʻa kuo hokó. Kuo pau ke ne fanongo lelei pea tānaki ʻa e ngaahi moʻoniʻi meʻá mei he ongo tafaʻakí koeʻuhi ke ʻoua ʻe hala pe fakafaʻahitaha ʻa ʻene akonakí.​—Palovepi 18:13; 29:20.

“ʻOku Tupu ʻa e Fehiʻa ki he Tangata ʻOku Filioʻi Koví”

ʻI ha vakai ki ha toe faikehekehe ʻi he vahaʻa ʻo e potó pea mo e valé, ʻoku pehē ʻe he tuʻi ʻo ʻIsilelí: “Ko e tangata poto ʻoku ne manavahe, ʻo afe mei he kovi: ka ko e vale ʻoku ʻai ʻene fakaʻita, ʻo ʻalu taʻetokanga. Ko e tangata mafanangofua ʻoku fai ʻa e meʻa ʻoku ngali vale; ka ko e tangata puleaki [ pe malava fakaefakakaukaú] ʻoku fehiʻanekina.”​—Palovepi 14:​16, 17.

Ko e tokotaha potó ʻokú ne manavahē ki he ngaahi nunuʻa ʻo e muimui ʻi ha ʻalunga halá. Ko ia ai, ʻokú ne tokanga pea fakahoungaʻi ha faʻahinga akonaki pē ʻoku tokoniʻi ai ia ke ne fakaʻehiʻehi mei he koví. Ko e tokotaha valé ʻoku ʻikai ke ne maʻu ʻe ia ʻa e faʻahinga manavahē peheé. ʻI he hoko ʻo taʻetokangá, ʻokú ne tukunoaʻi loto-pōlepole ʻa e akonaki ʻa e niʻihi kehé. ʻI he hehema ke fakaʻitá, ko ha tokotaha pehē ʻokú ne fai ʻa e ngaahi meʻa ngali vale. Ka ʻoku anga-fēfē ʻa e hoko ha tangata ʻokú ne maʻu ʻa e ngaahi malava fakaefakakaukaú ko ha tāketi ia ʻo e fehiʻanekinaʻí?

Ko e muʻaki-lea naʻe liliu mei ai ʻa e fakalea “puleaki” pe malava fakaefakakaukaú ʻoku ʻi ai hono ʻuhinga ʻe ua. ʻI ha ʻuhinga lelei, ʻoku lava ke ne fakahaaʻi ʻa e ʻiloʻilo pe ʻatamaiʻia. (Palovepi 1:4; 2:​11; 3:​21) Pe ʻi ha tuʻunga kovi, ʻe lava ʻo ʻuhinga ʻa e fakaleá ki he ngaahi fakakaukau fulikivanu pe fakakaukau loto-kovi.​—Sāme 37:7; Palovepi 12:2; 24:8.

Kapau ʻoku ʻuhinga ʻa e fakalea ko e “tangata puleaki” ki ha tokotaha ʻokú ne fai ha fakakaukau loto-kovi, ʻoku ʻikai faingataʻa ai ke sio ki he ʻuhinga ʻoku fehiʻanekinaʻi ai ha tokotaha peheé. Kae kehe, ʻikai ʻoku moʻoni ko ha tangata ʻokú ne maʻu ʻa e ʻiloʻiló ʻe fehiʻanekinaʻi nai mo ia foki ʻe he faʻahinga ʻoku ʻikai ke nau maʻu ʻa e ʻulungāangá ni? Ko e fakatātaá, ko e faʻahinga ko ia ʻoku nau ngāueʻi ʻenau ngaahi tufakanga fakaefakakaukaú pea fili ke “ʻikai ʻo māmani” ʻoku fehiʻanekinaʻi kinautolu ʻe he māmaní. (Sione 15:19) Ko e kau talavou Kalisitiane ʻoku nau ngāueʻi ʻenau ngaahi malava fakaefakakaukaú pea matuʻuaki ʻa e ngaahi tenge kovi ʻa e toʻumeʻá koeʻuhi ke taʻofi ʻa e tōʻonga taʻetāú, ʻoku manukiʻi kinautolu. Ko hono moʻoní, ko e kau lotu moʻoní ʻoku fehiʻanekinaʻi kinautolu ʻe he māmaní, ʻa ia ʻoku tokoto ʻi he mālohi ʻo Sētane ko e Tēvoló.​—1 Sione 5:​19.

“ʻOku Tulolo ʻa e Kovi”

Ko e fakapotopotó, ʻoku faikehekehe ia mei he faʻahinga taʻetaukeí ʻi ha toe tafaʻaki ʻe taha. “Ko e hehemangofua [ pe taʻetaukeí] ʻe to honau tofiʻa ko e vale: ka ko e kau fakapotopoto ʻe ai honau kalauni ko e ʻilomeʻa.” (Palovepi 14:18) ʻI he ʻikai maʻu ʻa e ʻiloʻiló, ʻoku fili ʻe he faʻahinga taʻetaukeí ʻa e meʻa ʻoku ngali valé. ʻOku hoko ʻeni ia ko ʻenau founga ia ʻi he moʻuí. ʻI he tafaʻaki ʻe tahá, ʻoku teuʻi ʻe he ʻiló ʻa e fakapotopotó ʻo hangē tofu pē ko hono fakalāngilangiʻi ʻe ha kalauni ha tuʻi.

“ʻOku tulolo ʻa e kovi ʻi he ʻao ʻo e kakai lelei,” ko e lau ia ʻa e tuʻi potó, “mo e kau angahala ʻi he matanikolo ʻo e faitotonu.” (Palovepi 14:19) ʻI hono toe fakalea ʻe tahá, ʻe ikuna fakaʻaufuli ʻa e leleí ʻi he koví. Fakakaukau atu ki he tupulaki ʻi he tokolahí mo e ʻalunga māʻolunga ʻo e moʻuí ʻoku hokosia ʻe he kakai ʻa e ʻOtuá he ʻaho ní. ʻI he sio ki he ngaahi tāpuaki ko ʻeni kuo foaki ki he kau sevāniti ʻa Sihová ʻe fakamālohiʻi ai ʻa e kau fakafepakí ke nau “tulolo” ki he fefine fakahēvani fakaefakatātā ʻa Sihová, ʻa ia ʻoku fakafofongaʻi ʻe he toenga ʻo e kau pani ʻe he laumālié ʻi he māmaní. ʻI he faingamālie fakaʻosí ʻi ʻĀmaketone, ʻe kounaʻi ai ʻa e kau fakafepaki ko iá ke nau fakamoʻoniʻi ko e konga fakaemāmani ʻo e kautaha ʻa e ʻOtuá ʻokú ne fakafofongaʻi moʻoni ʻa e konga fakahēvaní.​—Aisea 60:​1, 14; Kaletia 6:​16; Fakahā 16:​14, 16.

Fakahaaʻi ʻa e “ʻOfa ki he Masiva”

ʻI hono fai ha fakamatala fekauʻaki mo e natula ʻo e tangatá, ʻoku pehē ʻe Solomone: “Ko siʻi masiva, naʻa mo hono kaungaʻapi ʻoku ne fehiʻa ki ai: ka ʻoku toko lahi ʻa e fafale ʻo e koloaʻia.” (Palovepi 14:20) He moʻoni ē ko e meʻá ni ʻi he tangata taʻehaohaoá! ʻI he hoko ʻo hehema siokitá, ʻoku nau hehema ai ke leleiʻia pē ʻi he koloaʻiá kae ʻikai ko e masivá. Lolotonga ʻoku tokolahi ʻa e ngaahi kaumeʻa ʻo e tokotaha koloaʻiá, ʻoku nau ʻi he tuʻunga fakataimi pē ʻo hangē pē ko ʻene koloá. ʻIkai ʻoku totonu ai ke tau fakaʻehiʻehi mei he fakakaumeʻa fakafou ʻi he paʻangá pe fakahekeheké?

Fēfē nai kapau kuo fakaeʻa ʻe ha sivisiviʻi-kita faitotonu ʻoku tau fakalai ki he koloaʻiá kae sio lalo ki he faʻahinga ʻoku masivá? Kuo pau ke tau ʻiloʻi ko hono fakahaaʻi ʻa e filifilimānako peheé ʻoku fakahalaʻi ia ʻe he Tohi Tapú. ʻOku fakahaaʻi ai: “Ko ia ʻoku ne taʻetokaʻi hono kaungaʻapi ʻoku ne angahala: ka ko ia ʻoku ʻofa ki he masiva ko e koto monuʻia pe ia.”​—Palovepi 14:21.

ʻOku totonu ke tau fakahaaʻi ʻa e fakaʻatuʻi ki he faʻahinga ko ia ʻoku nau ʻi he ngaahi tuʻunga faingataʻá. (Semisi 1:​27) ʻE lava fēfē ke tau fai ení? ʻAki hono tokonaki “ae lelei oe mamani,” ʻa ia ʻoku lava ʻo kau ki ai ʻa e paʻanga, meʻakai, nofoʻanga, vala pea mo e tokangaekina fakafoʻituitui. (1 Sione 3:​17, PM) He monūʻia ē ko ia ʻokú ne fakahāhā ʻa e ʻofa ki he faʻahinga peheé, koeʻuhí “ʻoku te monuʻia lahi ʻi he fai ha foaki atu, ʻi heʻete maʻu ha foaki mai.”​—Ngāue 20:35.

ʻOku Anga-Fēfē ʻEna Hokohoko Atú?

Ko e tefitoʻi moʻoni ko ia ʻoku pehē ko e “meʻa ʻoku to ʻe ha tangata, ko ia ia te ne utu foki” ʻoku ngāueʻaki ia ki he tokotaha fakapotopotó pea pehē foki ki he tokotaha valé. (Kaletia 6:7) Ko e fakapotopotó ʻokú ne fai ʻa e meʻa ʻoku leleí; ka ko e valé ʻokú ne faʻufaʻu ʻe ia ʻa e koví. “ʻIkai te nau ʻalu he ʻakinautolu ʻoku fakakaukau ha kovi ke fai?” ko e ʻeke ia ʻe he tuʻi potó. Ko e talí ko e ʻio; ʻoku nau hoko ʻo “ʻalu he.” “Kae to ha ʻofa mo e fai moʻoni kiate kinautolu ʻoku fakakaukauʻi ha lelei.” (Palovepi 14:22) Ko e faʻahinga ko ia ʻoku nau fai ʻa e meʻa leleí ʻoku nau maʻu ai ʻa e loto-lelei ʻa e niʻihi kehé pea pehē foki ki he ʻofa ʻa e ʻOtuá.

ʻI hono fakafehokotaki ʻa e lavameʻá ki he ngāue mālohí pea mo hono fakafehokotaki ʻa e taʻelavameʻá ki he faʻa lea kae ʻikai fai ha meʻá, ʻoku pehē ai ʻe Solomone: “ʻI he fakaongosia kotoa ʻoku ai hano fua: ka ko e lau ʻa e ngutu, ʻoku iku pe ki he fakamasiva.” (Palovepi 14:23) ʻOku kaunga tefito ʻa e tefitoʻi moʻoni ko ʻení ki heʻetau ngaahi feinga fakalaumālié. ʻI he taimi ʻoku tau ngāue mālohi ai ʻi he ngāue fakafaifekau faka-Kalisitiané, ʻoku tau utu ai ʻa e ngaahi pale ʻo hono fakahoko ʻa e moʻoni fakaefakahaofi moʻui ʻo e Folofola ʻa e ʻOtuá ki he faʻahinga tokolahi kehe. ʻI hono fakahoko faitōnunga ha faʻahinga konga fakateokalati pē ʻoku tau maʻu, ʻoku taki atu ia ki he fiefia pea mo e fiemālie.

“Ko e kalauni ki he kau poto ʻa ʻenau koloa: ko e vale ʻa e kau vale koe vale ai pe,” ko e lau ia ʻa e Palovepi 14:24. ʻE lava ʻo ʻuhinga ʻeni ko e poto ko ia ʻoku feinga ʻa e potó ke maʻú ko ʻenau koloá, pea ʻokú ne fakakalauni, pe teuʻi kinautolu. Ko e valé, ʻi he tafaʻaki ʻe tahá, ʻokú ne maʻu ʻa e vale pē. Fakatatau ki ha tohi maʻuʻanga fakamatala ʻe taha, ʻoku toe lava pē ke ʻuhinga ʻa e palōveepi ko ʻení ko e “tuʻumālié ko ha meʻa teuteu ia ki he faʻahinga ko ia ʻoku nau ngāueʻaki lelei iá . . . [ka koe] valé ʻokú ne maʻu pē ʻa e sesele.” Neongo pe ko e hā ʻa e tuʻungá, ko e potó ʻoku hokohoko lelei atu ange ia ʻi he tokotaha valé.

“ʻOku fakahaofi moʻui ʻe ha fakamoʻoni tonunga,” ko e lea ia ʻa e tuʻi ʻo ʻIsilelí, “ka koia ʻoku hoʻaki loi ko e koto kākā.” (Palovepi 14:25) Lolotonga ʻoku moʻoni papau ʻeni ʻi ha potutohi fakaefakamaau, fakakaukau angé ki heʻene kaunga ki heʻetau ngāue fakafaifekaú. Ko ʻetau ngāue malangaʻi ʻo e Puleʻangá mo e ngaohi-ākongá ʻoku kau ki ai ʻa e faifakamoʻoni ki he moʻoni ʻo e Folofola ʻa e ʻOtuá. Ko e faifakamoʻoni ko iá ʻoku fakatauʻatāinaʻi ai ʻa e faʻahinga tāutaha loto-totonú mei he lotu loí pea toe fakahaofi mo e ngaahi moʻui. ʻI he fai ha tokanga tuʻumaʻu kiate kitautolu pea ki he meʻa ʻoku tau akoʻí, te tau fakahaofi fakatouʻosi ai ʻa ʻetau moʻuí pea mo kinautolu ko ia ʻoku fanongo mai kiate kitautolú. (1 Timote 4:​16) ʻI heʻetau hokohoko atu ke fai ení, tuku muʻa ke tau ʻāʻā pea fakahāhā ʻa e fakapotopotó ʻi he ngaahi tafaʻaki kotoa ʻo e moʻuí.

[Fakamatala ʻi lalo]

[Fakatātā ʻi he peesi 18]

Ko hono ako tōtōivi ʻo e ngaahi moʻoni loloto angé ko ha meʻa ia kuo pau ke fai kae lava ke tau fakafaikehekeheʻi ai fakatouʻosi ʻa e halá mo e tonú

[Fakatātā ʻi he peesi 18]

ʻOku fakafiemālie moʻoni nai ha founga moʻui fakamātelie?