Ko e Manavahē ki he ʻOtuá—“Koe Akonaki Ia oe Boto”

KO POTO moʻoni ē kuó ne teuteu ha fuʻu kātoanga. Kuó ne “fekau atu ene kau kaunaga; oku kalaga ia mei he gaahi botu maoluga oe kolo, Kohai ia oku tae boto ke afe mai ia ki heni: bea oku lea ia, o behe, kiate ia oku tae ilo, Haʻu, o kai i he eku ma, o inu i he uaine kuou huiʻi e au. Liaki ae kau vale, ka ke moui; bea ke alu i he hala oe faa ilo.”—Palovepi 9:​1-6, PM.

Ko e maʻu meʻatokoni ʻi he tēpile ʻa potó ʻoku ʻikai ke teitei iku ia ki ha meʻa ʻoku kovi pe fakamamahi. Ko e fanongo ki he poto fakaʻotua ʻoku ʻi he ngaahi palōveepi fakamānavaʻí pea mo tali ʻa ʻene akonakí, ko e lelei pē ʻoku maʻu aí. ʻOku ʻikai ke toe kehe mei heni ʻa e ngaahi lea ʻo e potó ʻa ia ʻoku hiki ʻi he Palovepi 15:​16-33.a Ko e tokanga ki he faleʻi ʻi he ngaahi lea nounou ko ení, ʻe malava ke ne tokoniʻi ai kitautolu ke tau topono ʻi hono maʻu ʻa e meʻa siʻí, ke laka ki muʻa pea ke maʻu ʻa e fiefia ʻi he moʻuí. Ko e fai peheé ʻe toe malava foki ke ne tokoniʻi kitautolu ke tau fai ha ngaahi fili lelei pea malava ai ke tau nofo ʻi he hala ki he moʻuí.

ʻI he Lelei Ange ʻa e Meʻa Siʻí

“ʻOku ngutuhuaange ha kiʻi meʻa ʻoku maʻu mo e ʻapasia kia Sihova, ʻi ha fuʻu koloa ʻoku o mo e maveuveu,” ko e lau ia ʻa Tuʻi Solomone ʻo ʻIsileli ʻo e kuonga muʻá. (Palovepi 15:16) Ke tukunoaʻi ʻa e Tokotaha-Fakatupú pea ke ʻai ʻa e tuli ki he ngaahi koloa fakamatelié ko ʻete taumuʻa tefito ia ʻi he moʻuí ʻoku fakavalevale. Ko ha moʻui pehē ʻoku fonu ia ʻi he fāinga fakaongosia mo e loto-moʻua lahi. Ko e meʻa pango moʻoni ke toki fakatokangaʻi hake ʻi he taʻumotuʻá ko hoto ʻalunga moʻuí kotoa ko e koto ngeʻesi pē mo taʻeʻaonga! Ko hono tānaki ʻa e ngaahi koloa lahi fakataha mo e “maveuveu” ʻoku ʻikai pē ke fakapotopoto ia. Hono lelei ange ke ako ki he founga ke hoko ai ʻo toponó pea moʻui ʻaki ia! Ko e topono moʻoní ʻoku maʻu ia ʻi he manavahē kia Sihová—ʻi hotau vahaʻangatae mo iá—ʻo ʻikai ʻi he ngaahi koloa fakamatelié.—1 Timote 6:​6-8.

ʻI hono fakamamafaʻi ʻa e mahuʻinga ange ha vahaʻangatae lelei mo e niʻihi kehé ʻi ha meʻa fakamatelie lahí, ʻoku pehē ʻe Solomone: “ʻOku lelei ha ʻumu lu ʻoku kiki ʻaki ʻa e ʻofa, ʻi ha pulu fafanga ʻoku ʻomi mo e fehiʻa.” (Palovepi 15:17) ʻIo, ko ha ʻātakai ʻofa ʻi ha fāmili ʻoku fakamānako ange ia ʻi he lahi ʻa e meʻakai leleí. Ko e ʻapi ʻo ha mātuʻa taʻehoa, ʻe mātuʻaki siʻi nai ai ʻa e koloá. ʻI he ngaahi fonua ʻe niʻihi, ko e meʻakai tefitó pē ʻa e meʻa ʻoku malava ke tokonakí. Kae kehe, ʻoku lakalakaimonū ʻa e fāmilí ʻi he ʻi ai ʻa e ʻofá mo e ongoʻí.

Naʻa mo e ngaahi fāmili ʻoku faʻa ʻi ai ʻa e ʻātakai ʻo e ʻofá, ʻe malanga hake nai ai ha ngaahi tuʻunga faingataʻa. ʻE leaʻaki nai pe fai ʻe ha mēmipa ʻe taha ʻo e fāmilí ha meʻa ʻoku fakalotomamahiʻi ai ʻa e tokotaha ʻe tahá. ʻOku totonu ke fēfē ʻa e tali ʻa e tokotaha ʻoku loto-mamahí? ʻOku pehē ʻe he Palovepi 15:18: “ʻO[k]u fakalanga kē ʻa e tangata loto ʻita: ka ko ia ʻoku fakatotoka ki he ʻita ʻoku ne fakaleleia.” Ko ha tali vaivai, ʻikai ko ha tali ʻita ʻoku pouaki ai ʻa e melinó mo e nongá. ʻOku ngāueʻaki tatau pē ʻa e faleʻi ʻo e palōvēpí ni ki he ngaahi tafaʻaki kehe ʻo e moʻuí, kau ai ʻa e ngaahi meʻa fakaefakatahaʻangá pea mo e ngāue fakafaifekau ki he kakaí.

ʻI he “Haga Malie ae Hala”

ʻI he palōveepi hono hokó ʻoku fakaeʻa ai ʻa e faikehekehe ʻi he vahaʻa ʻo e tokotaha ʻoku ʻikai tokanga ki he potó pea mo kinautolu ʻoku fai peheé. “Oku tatau ae hala oe tagata fakabikobiko moe a akau talatala,” ko e lau ia ʻa e tuʻi potó, “ka oku haga malie ae hala oe maonioni.”—Palovepi 15:​19, PM.

Ko ha tokotaha fakapikopiko ʻokú ne fakakaukauloto atu ki ha ngaahi fakafaingataʻaʻiaʻanga kehekehe pea ngāueʻaki ia ko ha kalofanga ke fakatonuhiaʻi ʻaki ʻa e ʻikai malava ke ne kamata ha ngāué. Ko e kau māʻoniʻoní ʻi he tafaʻaki ʻe tahá, ʻoku ʻikai te nau hohaʻa ki he ngaahi ʻā fakangatangata ʻe malava nai ke ne taʻotaʻofi kinautolú. ʻOku nau ngāue tōtōivi pea tokanga ki he ngāue ʻoku nau faí. Ko ia, ʻoku nau kalofi ai ʻa e ngaahi palopalema lahi hangē ha talatalá ne nau mei fetaulaki nai mo ia kapau naʻa nau ngāue fakataʻetaʻetokanga. Ko honau halá ʻoku “haga malie,” ʻa ia ʻoku lalaka ki muʻa. ʻOku nau fakahoko ʻenau ngāué pea nau fiefia ʻi heʻene laka ki muʻá.

Tau fakatātā ʻaki eni ʻa e tuʻunga ʻo hono maʻu ʻa e ʻilo totonu ki he Folofola ʻa e ʻOtuá pea mo e fakalakalaka ki he tuʻunga matuʻotuʻá. ʻOku fiemaʻu ʻa e feinga. ʻE faingofua ke ngāueʻaki ʻe ha taha ʻa e ʻikai aʻu ʻa e akó, ʻikai ke maʻu ha malava fakaelautohi leleí, pe ko e kovi ʻa e manatú ko ha kalofanga ia ki he ʻikai te ne ako fakafoʻituitui tōtōivi ʻa e Tohi Tapú. Hono lelei ange ke ʻoua ʻe vakai ki he ngaahi meʻa peheé ko ha ngaahi fakafaingataʻaʻiaʻanga ki hono maʻu ʻo e ʻiló! Naʻa mo e fakangatangata ʻa e malavá, ʻe malava ke tau feinga ke fakaleleiʻi ʻetau pōtoʻi lautohí mo ʻetau mahinoʻi ʻa e meʻa ʻoku tau laú, ʻi hano ngāueʻaki nai ha tikisinale ʻo ka fiemaʻu. Ko ha fakakaukau maʻu pē ki he tafaʻaki leleí ʻoku tokoniʻi ai kitautolu ke maʻu ʻa e ʻiló pea fai ha laka ki muʻa fakalaumālie.

ʻI he ‘Fiefia ae Tamaí’

“Oku fakafiefiaʻi ae tamai e he foha oku boto,” ko e lau ia ʻa e tuʻi ʻo ʻIsilelí, “ka oku fehia ae tagata vale ki he ene faʻe.” (Palovepi 15:​20, PM) ʻIkai ʻoku fiefia ʻa e ngaahi mātuʻá ʻi he taimi ʻoku fakapotopoto ai ʻenau fānaú? Ko e moʻoni, ʻoku fiemaʻu ʻa e akoʻi mo e akonekina mei he mātuʻá kae maʻu ai ha ngaahi ola lelei pehē. (Palovepi 22:6) Ka ko ha fiefiaʻanga moʻoni ko ha foha poto ki heʻene ongo mātuʻá! Kae kehe, ko e tama valé ko e fakamamahiʻanga taʻetuku ia kiate kinaua.

ʻI hono ngāueʻaki ʻa e foʻi lea “fakafiefia” ʻi ha tuʻunga ʻe taha, ʻoku pehē ʻe he tuʻi potó: “Ko e fai vale ko e meʻa fakafiefia ki he masiva ʻatamai: ka ko e tangata poto ʻoku ne ʻalu fakatotonu atu.” (Palovepi 15:21) Ko e faʻahinga masiva ʻatamaí ʻoku nau fiefia ʻi he kata mo e fiefia vale ʻa ia ʻoku ʻikai te ne ʻomai ʻa e fiemālie pe fiefia moʻoní. Kae kehe, ko e tangata potó ʻokú ne sio ki he fakavalevale ʻo e hoko ko ha tokotaha ʻoku “ʻofa ki he malie ʻo ʻikai ʻofa ki he ʻOtua.” (2 Timote 3:​1, 4) ʻOku tokoniʻi ia ʻi he piki ki he ngaahi tefitoʻi moʻoni fakaʻotuá ke ne māʻoniʻoni ai pē pea tauhi ke totonu ʻa hono ʻalungá.

ʻI he ‘ʻI Ai ha Lavameʻá’

Ko e moʻuiʻaki ʻa e ngaahi tefitoʻi moʻoni fakaʻotuá ʻokú ne ʻomai foki ʻa e ngaahi ʻaonga ʻi he ngaahi tafaʻaki kehe ʻo ʻetau moʻuí. ʻOku pehē ʻe he Palovepi 15:22: “ʻOku maumau fakakaukau ʻa e ʻikai fai ha alea: ka ʻoku tuʻu [pe ʻi ai ha lavameʻa] ʻo ka tokolahi ʻa e faleʻi.”

Ko e aleá ʻoku ʻuhingá ko ha fetuʻutaki ʻi he vahaʻa ʻo ha faʻahinga tāutaha, ʻo fai fakaekinautolu kae lea totonu. Ko e foʻi lea faka-Hepelū ʻoku liliu ko e “alea” ʻoku toe liliu nai ia ko e “kaumeʻa fafale.” ʻOku fakahaaʻi ʻe he meʻá ni ʻa e fekoekoeʻi ʻo e fetuʻutakí. ʻI he ʻikai ko ha talanoa noaʻia pē, ko e aleá ko ha felingiʻaki ia ʻo e ngaahi fakakaukau mo e ngaahi ongoʻi moʻoni. ʻI he taimi ʻoku fetuʻutaki tauʻatāina ai ʻi he foungá ni ʻa e husepānití mo e uaifí pea pehē ki he mātuʻá mo e fānaú, ʻoku ʻi ai leva ʻa e melino mo e fāʻūtaha ʻiate kinautolu. Ka ko e ʻikai ha aleá ʻoku taki atu ai ki he ongoʻi feifeitamaki mo e ngaahi palopalema ʻi he fāmilí.

ʻI he taimi ʻoku tau fai ai ha ngaahi fili mahuʻinga, ʻoku fakapotopoto ke tau tokanga ki he faleʻí ni: “ʻOku tuʻu [pe ʻi ai ha lavameʻa] ʻo ka tokolahi ʻa e faleʻi.” Ko e fakatātaá, ʻi heʻetau fili ki ha faitoʻo ke fai, ʻikai ʻoku fakapotopoto ke maʻu ha fakakaukau ʻa ha tokolahi ange, tautefito kapau ʻoku fekauʻaki ia mo ha ngaahi ʻīsiu mafatukituki?

Ko e ʻaonga ʻo e ʻi ai ʻa e kau faleʻi tokolahí ʻoku mātuʻaki mahuʻinga ia ʻi hono tokangaʻi ʻa e ngaahi meʻa fakalaumālié. ʻI he taimi ʻoku fealēleaʻaki ai ʻa e kau mātuʻá pea ngāueʻaki ʻa honau poto fakatokolahí, ʻoku “ʻi ai ha lavameʻa.” Pehē foki, ko e kau ʻovasia kuo toki fakanofo foʻoú ʻoku ʻikai totonu ke nau toumoua ke kumi faleʻi ki he kau mātuʻa matuʻotuʻa mo taukei angé, tautefito kapau ko e meʻa ʻoku tokangaʻí ʻoku faingataʻa.

ʻI he Hoko Ha ‘Fiefia ʻi he Talí’

Ko e hā ha lelei ʻe maʻu mei ha lea ʻoku fai mo e ʻiloʻiló? ʻOku pehē ʻe he tuʻi ʻo ʻIsilelí: “Ka lava ʻe ha tangata ha tali ʻoku feʻunga, ʻoku ai ʻene fiefia: ʻio, ko e lea ʻoku fai ʻi hono taimi totonu, hono ʻikai lelei.” (Palovepi 15:23) ʻIkai ʻoku tau fiefia ʻi he taimi ʻoku fai ai ha muimui ki heʻetau talí pe faleʻí ʻo maʻu ai ha ngaahi ola lelei? Kae kehe, ke ola lelei ʻetau akonakí kuo pau ke ne aʻusia ʻa e ongo fiemaʻu ʻe ua.

ʻUluakí, ko e faleʻí kuo pau ke makatuʻunga fefeka ia ʻi he Folofola ʻa e ʻOtuá ko e Tohi Tapú. (Sāme 119:105; 2 Timote 3:​16, 17) Pea kuo pau ke leaʻaki ʻi he taimi totonu. Naʻa mo e ngaahi lea moʻoni ʻoku leaʻaki ʻi he taimi halá ʻoku malava ke fakatupu maumau. Ko e fakatātaá, ko hono fai ha faleʻi ki ha taha ki muʻa ke fanongo kiate iá ʻoku ʻikai ke fakapotopoto pe tokoni ia. He mahuʻinga moʻoni kiate kitautolu ‘ke vave ke fanongo, kae fakatotoka ki he lea’!—Semisi 1:19.

‘Ko e Hala ʻo e Moʻuí ʻOku Fakatahakehake’

ʻOku pehē ʻe he Palovepi 15:24: “Ko e hala ʻo e moʻui ki he tangata fakapotopoto ko e hala fakatahakehake: ko ʻene fie hao mei hetesi mo e ʻalu hifo.” Ko ha tokotaha fai fakapotopoto ʻoku ʻi he hala ia ʻoku taki mamaʻo atu mei hētesi, ko e faʻitoka anga-maheni ʻo e tangatá. ʻOkú ne hola mei he ngaahi tōʻonga fakatupu maumau hangē ko e moʻui fakaʻaluʻalú, ngāuekoviʻaki ʻo e faitoʻo kona tapú mo e konaá—pea ʻokú ne hao ai mei he mate mutukiá. Ko hono halá ʻoku taki atu ki he moʻui.

Fakatokangaʻi leva ʻa hono kehe ʻo e hala ʻo e kau taʻefakapotopotó: “Ko e fale ʻo e fielahi ʻoku taʻaki ʻe Sihova: ka ʻoku ne vili hifo ʻa e kauʻa ʻo siʻi uitou. Ko e ngaahi fakakaukau kovi ʻoku fakaliliʻa ki ai ʻa Sihova: ka ʻoku maʻa ʻi hono ʻao ʻa e ngaahi leaʻofa. Ko ia ʻoku faʻao koloa ʻoku ne fakamamahi hono fale oʻona: ka ko ia ʻoku fehiʻa ki he totongi fufu te ne moʻui.”—Palovepi 15:​25-27.

ʻI hono fakahaaʻi mai ʻa e founga ke tau hao ai mei ha tōʻanga anga-maheni, ʻoku pehē ʻe he tuʻi ʻo ʻIsilelí: “Ko e loto ʻo e faitotonu ʻoku ne fakakaukau ha tali lelei: ka ko e ngutu ʻo e angahala ʻoku ne puʻaki atu ʻani kovi.” (Palovepi 15:28) He mahuʻinga moʻoni ko e faleʻi ʻa e palōvēpí ni! Ko e ngaahi tali vale mo taʻefakapotopoto ʻoku puʻaki atu mei he ngutú, ʻoku siʻi ke iku ia ki ha meʻa ʻoku lelei. ʻI he taimi ʻoku tau fakakaukau ai ki he ngaahi meʻa kehekehe ʻoku ʻi ai nai ʻene fekauʻaki mo ha meʻá, kau ai ʻa e ngaahi tuʻunga mo e ongoʻi ʻa e niʻihi kehé, ʻoku ngalingali ʻe ʻikai te tau fai ha lea te tau toki fakatomala nai ai ʻamui.

Ko e hā leva ʻa e ʻaonga ʻo e manavahē ki he ʻOtuá mo tali ʻa ʻene akonakí? ʻOku tali mai ʻe he potó: “ʻOku mamaʻo ʻa Sihova mei he kau angahala: ka ko e lotu ʻo e faitotonu ʻoku ne ongoʻi.” (Palovepi 15:29) Ko e ʻOtua moʻoní ʻoku ʻikai ofi ia ki he angahalá. ʻOku pehē ʻe he Tohi Tapú: “Ko ia ʻoku si telinga ke ʻoua te ne fanongo ki he lao, naʻa mo ʻene lotu ʻe fai ha fakaliliʻa ki ai.” (Palovepi 28:9) Ko e faʻahinga ʻoku manavahē ʻOtua pea ʻoku nau feinga ke fai ʻa e meʻa ʻoku totonu ʻi heʻene ʻafió ʻoku malava ke nau fakaofiofi tauʻatāina kiate ia, ʻi he tuipau kakato te ne fanongo hifo kiate kinautolu.

Meʻa “ʻOku Ne Langa ʻa e Fiefia ʻi he Loto”

ʻOku pehē ʻe Solomone ʻi heʻene ngāueʻaki ha fakahoa fakatupu fakakaukau: “Ko e fauloulo ʻa e mata ʻoku ne langa ʻa e fiefia ʻi he loto. Ko ʻete ongona ha ongoongolelei ʻoku ne fakamomona ʻa e hui.” (Palovepi 15:30) ʻOku “fakamomona” ʻa e huí ʻi heʻene fonu ʻi he ngakó. ʻOku hanga ʻe he meʻá ni ʻo fakaivimoʻui ʻa e sinó kotoa pea ʻai ke fiefia ʻa e lotó. Pea ko e fiefia ʻa e lotó ʻoku tapua atu ia ʻi he fauloulo ʻa e matá. ʻOku pehē pē ʻa e ola ʻo ha ongoongo lelei.

ʻIkai ko e ngaahi ongoongo ʻo e tupu ʻi māmani lahi ʻa e lotu kia Sihová ko ha matavai ia ʻo e fakalototoʻa moʻoni kiate kitautolu? Ko e ʻilo ʻo fekauʻaki mo e kotoa ʻo e ngaahi meʻa ʻoku lavaʻi ʻi he ngāue fakamalanga ʻo e Puleʻangá mo e ngāue ngaohi-ākongá, ko e moʻoni ʻokú ne fakalongomoʻuiʻi kitautolu ke tau kau lahi ange ki he ngāue fakafaifekaú. (Mātiu 24:14; 28:​19, 20) Ko e meʻa ko ia ʻoku hokosia ʻe he faʻahinga ʻoku nau ʻai ʻa Sihova ko honau ʻOtuá mo fai ʻa e lotu moʻoní ʻokú ne fakafonu hotau lotó ʻaki ʻa e fiefia. Koeʻuhi ko e “ongoongolelei mei ha fonua mamaʻo” ʻoku ʻi ai hono ola mālohi pehē, he mahuʻinga moʻoni ke tau līpooti totonu mo faitōnunga ʻa e meʻa ʻoku tau fai ʻi he ngāue fakafaifekaú!—Palovepi 25:25.

“Oku Muomua ae Agavaivai i he Hakeakiʻi”

ʻI hono fakamamafaʻi ʻe he tuʻi potó ʻa e mahuʻinga ʻo hono tali ʻa e ngaahi founga kehekehe ʻo e akonakí, ʻokú ne pehē: “Koe teliga oku fakafanogo ki he valoki fakamoui e nofo mau ia i he haohaoga oe boto. Koia oku manuki ki he akonaki oku ne fehia ki hono laumalie oona: ka koia oku fanogo ki he valoki oku maʻu eia ae loto boto.” (Palovepi 15:​31, 32, PM) Ko e valokí pe akonakí ʻoku aʻu ia ki he loto ʻo ha taha ʻo ne fakatonutonu ia, ʻo ʻoange ai kiate ia ʻa e fakakaukau fakapotopoto. Tā neʻineʻi ke toʻo ʻe he “ʻakau ako” ʻa e ‘vale ʻoku tāvani ʻi he loto ʻo ha tamasiʻi’! (Palovepi 22:15) Ko e tokotaha ʻoku fanongo ki he akonakí ʻokú ne toe maʻu foki ʻa e loto poto, ʻa ia ko e fakaueʻiloto lelei. ʻI he tafaʻaki leva ʻe tahá, ke manuki ki he akonakí ko e fehiʻa ia ki he moʻuí.

Ko e moʻoni, ko hono tali ʻa e akonaki ʻa potó pea tali ia ʻi he anga-vaivaí ʻoku ʻaonga. Ko e fai peheé ʻoku taki atu ia ʻo ʻikai ngata pē ki he loto-topono, laka ki muʻa, fiefia mo e lavameʻa kae toe pehē foki ki he hakeakiʻi mo e moʻui. ʻOku fakaʻosiʻaki ʻe he Palovepi 15:33 (PM): “Koe manavahe kia Jihova, koe akonaki ia oe boto; bea oku muomua ae agavaivai i he hakeakiʻi.”

[Fakamatala ʻi lalo]

[Fakatātā ʻi he peesi 17]

Ko ha ʻātakai ʻofa ʻi ha fāmili ʻoku fakamānako ange ia ʻi he lahi ʻa e meʻakai leleí

[Fakatātā ʻi he peesi 18]

Neongo kapau ʻoku fakangatangata hotau tuʻungá, ko ha fakakaukau maʻu pē ki he tafaʻaki leleí ʻoku tokoniʻi ai kitautolu ke maʻu ʻa e ʻiló

[Fakatātā ʻi he peesi 19]

Ko e aleá ko ha felingiʻaki ia ʻo e ngaahi fakakaukau mo e ngaahi ongoʻi moʻoni

[Fakatātā ʻi he peesi 20]

ʻOkú ke ʻilo ʻa e anga ʻo e hoko ‘ha ongoongolelei ʻo ne fakamomona ʻa e huí’?