“Ko e Poto ko e Maluʻanga”

“KO E maʻu mai ha poto, hono ʻikai ngutuhuaange ia ʻi he maʻu ha koula? Pea ko e aʻusia ʻa e ʻilo ko e meʻa ke te fili muʻa ki ai ʻi he siliva,” ko e lau ia ʻa e Palovepi 16:16. Ko e hā ʻoku mātuʻaki mahuʻinga ai ʻa e potó? Koeʻuhí “ko e poto ko e maluʻanga, ko e paʻanga ko e maluʻanga: ka ʻoku hulu ʻa e ʻilo, he ʻoku fakahaofi ʻe he poto ʻa e tangata ʻoku maʻu ia.” (Koheleti 7:12) Kae kehe, ʻoku anga-fēfē hono fakahaofi ʻe he potó ʻa e tangata ʻokú ne maʻu iá?

Ko e maʻu ʻa e poto fakaʻotuá, ʻa ia ko hono maʻu ia ʻo e ʻilo totonu ki he Folofola ʻa e ʻOtuá, ʻa e Tohi Tapú pea ngāue fakatatau ki aí, ʻokú ne tokoniʻi kitautolu ke tau ʻaʻeva ʻi he hala ʻoku fakahōifua kia Sihová. (Palovepi 2:​10-12) ʻOku pehē ʻe Tuʻi Solomone ʻo ʻIsileli ʻo e kuonga muʻá: “Ko e hala puleʻanga ʻo e kakai totonu ko e fakaʻehiʻehi mei he kovi: Ko ia ʻoku lama hono hala ʻoku ne maluʻi ʻene moʻui.” (Palovepi 16:17) ʻIo, ʻoku fakahaofi ʻe he potó ʻa e faʻahinga ʻoku nau maʻu iá mei he ngaahi ʻalunga koví pea fakatolonga ai ʻenau moʻuí! Ko hono ʻai mahinó, ko e ngaahi lea ʻaonga ʻi he Palovepi 16:​16-33 ʻoku hā ai ʻa e tākiekina ʻaonga ʻoku lava ke ʻai ʻe he poto fakaʻotuá ki heʻetau fakakaukaú, leá mo e ngaahi tōʻongá.a

“Ke Loto Agavaivai”

Ko e fakasino ʻo e potó ʻoku fakahaaʻi ia ʻokú ne pehē: “Ko e lotohiki mo e fieʻeiki, . . . ʻoku ou fehiʻa ki ai.” (Palovepi 8:13) Ko e fieʻeikí mo e potó ʻoku ʻikai haʻana felāveʻi ʻe taha. ʻOku fiemaʻu ke tau ngāueʻaki ʻa e potó pea tokanga ke ʻoua ʻe fakatupulekina ha fakakaukau hīkisia pe ʻulupupula. ʻOku tautefito ʻa e totonu ke tau maluʻi kitautolú kapau kuo tau maʻu ha lavameʻa ʻi he tafaʻaki ʻe niʻihi ʻo e moʻuí pe kuo tuku mai kia kitautolu ha fatongia ʻi he fakatahaʻanga Kalisitiané.

“Ko e fieʻeiki ko e fakamelomelo ʻo e haveʻi,” ko e fakatokanga ia ʻa e Palovepi 16:​18, “pea ko e angahiki ko e fakamelomelo ʻo e hinga.” Fakakaukau atu ki he haveʻi lahi taha naʻe hoko ʻi he ʻunivēsí—ko e haʻulu ʻo ha foha fakalaumālie haohaoa ʻo e ʻOtuá ʻa ē naʻá ne ʻai ʻa ia tonu ko Sētane ko e Tēvoló. (Senesi 3:​1-5; Fakahā 12:9) ʻIkai naʻá ne fakahāhā ha laumālie fieʻeiki ki muʻa ke hoko kiate ia ʻa e haveʻí? Naʻe lave ʻa e Tohi Tapú ki he meʻá ni ʻi he pehē ai ʻoku ʻikai totonu ke fakanofo ha tangata toki liliu foʻou ki he lakanga ko e ʻovasia ʻi he fakatahaʻanga Kalisitiané “naʻa ʻaoʻaofia hono loto ʻi he ʻafungi, ʻo ne to ai ki he tautea ʻo e Tevolo.” (1 Timote 3:​1, 2, 6) He mahuʻinga ē ke fakaʻehiʻehi mei hono fakaʻaiʻai ʻa e niʻihi kehé ke nau pōlepolé pea pehē foki ki hono fakaʻatā ia ke tupu ʻiate kitautolú!

“Oku lelei lahi hake ia ke loto agavaivai moe kakai agavaivai, i he vahevahe ha koloa kuo maʻu moe fielahi,” ko e lau ia ʻa e Palovepi 16:19 (PM). ʻOku hā ʻa e lelei ʻo e ekinakí ni ʻi he tuʻunga ʻo Tuʻi Nepukanesa ʻo Pāpilone ʻo e kuonga muʻá. Naʻá ne fokotuʻu loto-pōlepole ha fuʻu ʻīmisi—ke fakafofongaʻiʻaki nai ʻa ia tonu—ʻi he potu tafangafanga ko Tulá. Naʻe fokotuʻu nai ʻa e ʻīmisí ʻi ha tuʻuʻanga māʻolunga ʻaupito ʻo aʻu hono māʻolungá ki he mita ʻe 27. (Taniela 3:1) Ko e fuʻu ʻīmisi fakamanatú ni naʻe ʻaí ke hoko ko ha fakaʻilonga maeʻeeʻa ʻo e ʻemipaea ʻo Nepukanesá. Neongo ʻe mahuʻinga nai ki he tangatá ʻa e ngaahi meʻa lalahi mo māʻolungá​—ʻo hangē ko e ʻīmisi ko iá pea pehē ki he ngaahi maka fakamanatu, fale lotu ʻoku ʻi he ʻataá hono tumuʻakí mo e ngaahi fale fungavaka māʻolungá—ʻoku ʻikai ke mahuʻinga pehē ʻa e ngaahi meʻá ni ia ki he ʻOtuá. Naʻe hiva ʻa e tokotaha-tohi-sāmé: “Ko e maʻolunga ʻa Sihova, ka ʻoku ne tokaʻi ʻa e maʻulalo: Ka ko e mahiki ʻoku nau feʻiloaki mamaʻo.” (Sāme 138:6) Ko hono moʻoní, “ko e meʻa ʻoku fungani ʻi he lau ʻa e kakai ko e fakalielia pe ia ʻi he vakai ʻa e ʻOtua.” (Luke 16:15) He lelei ange ē ke tau ‘tuku kitautolu ke ʻauhia mo maʻulalo,’ ʻi he “tokanga ki he ngaahi meʻa maʻolunga.”—Loma 12:16.

Leaʻaki ʻa e “Vavanga” mo e “Fakatupu Fakalotoʻi”

ʻOku anga-fēfē hono tākiekina ʻe he maʻu ko ia ʻo e potó ʻa ʻetau leá? ʻOku tala mai kiate kitautolu ʻe he tuʻi potó: “Ko ia ʻoku ne tokanga ki he folofola [pe vavangá] te ne ʻilo ha lelei: Pea ko ia ʻoku falala kia Sihova ko e toki monuʻia ia. ʻE ui ai pe ko e poto ʻa e tangata ʻoku ʻilo meʻa ʻe hono ʻatamai: Ka ʻoku tokaʻi ʻa e meʻa ʻoku te maʻu ko e lea lelei [pe fakatupu fakalotoʻi]. Ko e ʻilomeʻa ko e fauniteni ʻo e moʻui kiate ia ʻoku ne maʻu; ka ko e tautea ʻo e vale ko ʻenau vale. Ko e ʻatamai ʻo e poto ʻoku ne fakapoto [pe vavanga]: Pea ko e meʻa ʻoku ne maʻu ʻe aʻu ki hono loungutu [pe fakatupu fakalotoʻi].”—Palovepi 16:​20-23.

ʻOku tokoniʻi kitautolu ʻe he potó ke tau leaʻaki ʻa e vavanga mo e fakatupu fakalotoʻi. Ko e hā hono ʻuhingá? Koeʻuhi ko ha tokotaha ʻoku loto poto ʻokú ne feinga ke “ʻilo ha lelei” ʻi ha meʻa pea ʻokú ne “falala kia Sihova.” ʻI heʻetau feinga ke kumi ke ʻilo ʻa e lelei ʻi he niʻihi kehé, ʻe ngalingali ange ai te tau fakaongoongoleleiʻi kinautolu. ʻI he ʻikai ke anga-kovi pe fakatupu keé, ko ʻetau ngaahi leá ʻoku totonu ke ifo mo fakatupu fakalotoʻi. Ko e vavanga ki he ngaahi tuʻunga ʻo e niʻihi kehé ʻoku tokoniʻi ai kitautolu ke tau mahinoʻi ʻa e lahi ʻo e faingataʻa nai ʻoku nau hokosiá pea mo e anga ʻo ʻenau fekuki mo iá.

Ko e lea ʻoku tākiekina ʻe he potó ʻoku toe mātuʻaki mahuʻinga ia ʻi he taimi ʻoku tau kau ai ʻi he ngāue malangaʻi ʻo e puleʻangá mo e ngaohi ākongá. ʻI heʻetau akoʻi ʻa e Folofola ʻa e ʻOtuá ki he niʻihi kehé, ʻoku ʻikai ko ʻetau taumuʻá pē ia ke fakaaʻu atu ʻa e fakamatala mei he Tohi Tapú. Ko ʻetau taumuʻá ke aʻu ki he loto ʻo e tokotaha taki taha. ʻOku fiemaʻu ai heni ke fakatupu fakalotoʻi ʻa ʻetau leá. Naʻe ekinaki ʻa e ʻapositolo ko Paulá ki hono kaungā feohi ko Tīmoté ke ne hokohoko atu ʻi he ngaahi meʻa naʻe “fakamahino” pe fakalotoʻi ia ke ne tui ki aí.​—2 Timote 3:​14, 15.

Ko e foʻi lea faka-Kalisi ki he “fakalotoʻi” ʻoku ʻuhingá ko hono “fakahoko ha liliu ʻi he ʻatamaí ʻaki ʻa e tākiekina ʻo e ngaahi fakakaukau fakaʻuhinga pe fakaeʻulungāanga,” ko e lau ia ʻa e An Expository Dictionary of New Testament Words, faʻu ʻe W. E. Vine. Ko hono ʻoatu ha ngaahi fakaʻuhinga fakatuipau ʻoku taki atu ki ha liliu ʻi he ʻatamai ʻo ʻetau tokotaha fanongó ʻoku fiemaʻu ki ai ʻa e vavanga ki heʻene fakakaukaú, ngaahi meʻa ʻokú ne saiʻia aí, tuʻungá mo e puipuituʻá. ʻE lava fēfē ke tau maʻu ʻa e vavanga peheé? ʻOku tali mai ʻe he ākonga ko Sēmisí: “Ke vave ʻa e tangata fuape he fanongo, kae fakatotoka ki he lea.” (Semisi 1:19) ʻI hono ʻeke ha ngaahi fehuʻi ki he tokotaha fanongó pea tokanga fakalelei ki he meʻa ʻokú ne leaʻakí, ʻe lava ke tau ʻilo ai pe ko e tokotaha fēfē ia.

Naʻe laulōtaha ʻa Paula ʻi heʻene malava ke fakalotoʻi ʻa e niʻihi kehé. (Ngāue 18:4) Naʻa mo e taha ʻo hono kau fakafepakí, ko ha tangata tufunga siliva ko Temetelio, naʻá ne pehē: “Kuo ne fakalotoʻi mo taki kehe ha fuʻu kakai, ʻo ʻikai ʻi Efeso pe, ka meimei ko hono kotoa ʻo Esia.” (Ngāue 19:26) Naʻe lau ʻe Paula ko haʻaná pē ia lavameʻa ʻa ʻene ola lelei ko ia ʻi he ngāue fakamalangá? Mole ke mamaʻo. Naʻá ne vakai ki heʻene malangá “naʻe faiʻaki ʻa e fakamoʻoni ʻe he Laumalie mo e Māfimafi” ʻo e ʻOtuá. (1 Kolinito 2:​4, 5) ʻOku tau maʻu ʻe kitautolu foki ʻa e tokoni ʻa e laumālie māʻoniʻoni ʻo Sihová. Koeʻuhí ko ʻetau falala kia Sihová, ʻoku tau falala pau ai ki heʻene tokoní ʻi heʻetau feinga ke leaʻaki ʻa e vavangá mo e fakatupu fakalotoʻí ʻi heʻetau ngāue fakafaifekaú.

Tā neʻineʻi ke ui ʻa e “tangata ʻoku ʻilo meʻa” ko e “boto” pe “ʻiloʻilo”! (Palovepi 16:​21, PM; New International Version ) ʻIo, ko e vavangá ko e “fauniteni ʻo e moʻui” ki he faʻahinga ʻoku nau maʻu iá. Kae fēfē nai ʻa e valé? ʻOku nau ‘taʻetokaʻi ʻa e potó mo e akó.’ (Palovepi 1:7) Ko e hā ʻa e ngaahi nunuʻa ʻoku nau utu ʻi hono talitekeʻi ʻa e ako meia Sihová? Hangē ko ia ʻoku lave ki ai ʻi ʻolungá, ʻoku pehē ʻe Solomone: “Ko e tautea ʻo e vale ko ʻenau vale.” (Palovepi 16:22) ʻOku nau maʻu ha toe ako, ʻoku faʻa hoko ʻi he tuʻunga ko e tautea lahi. ʻE toe hoko nai ki he kau valé ʻa e faingataʻa, tuʻunga fakamā, mahaki pea naʻa mo e mate mutukiá.

ʻI he toe lave ki he tākiekina ʻaonga ʻoku fai ʻe he potó ki heʻetau leá, ʻoku pehē ʻe he tuʻi ʻo ʻIsilelí: “Oku tatau moe geeji oe honi ae lea malie, i hono hua melie ki he laumalie, bea koe moui ia ki he gaahi hui.” (Palovepi 16:​24, PM) ʻI he hangē ko e melie mo hono tokonaki vave ʻe he honé ʻa e fakamāmālohi ki ha tokotaha fiekaia, ʻoku pehē pē ʻa e fakalototoʻa mo e fakaivifoʻou ʻa e ngaahi lea leleí. ʻOku toe fakatupu ivi, maʻu mo e malava fakafaitoʻo pea fakatupu moʻui lelei ʻa e honé ki ha tokotaha. ʻOku pehē pē mo e ngaahi lea leleí; ʻoku fakatupu moʻui lelei fakalaumālie.—Palovepi 24:​13, 14.

Tokanga Telia ʻa e “Hala ʻOku Matamata Totonu”

“ʻOku ai ha hala ʻoku matamata totonu ki he tangata,” ko e lau ia ʻa Solomoné, “ka ʻoku tuʻulu atu ki he ngaahi hala ʻoku fakatau ki he mate.” (Palovepi 16:25) Ko e fakatokanga ʻeni ʻo fekauʻaki mo e fakaʻuhinga hala mo e tuli ki ha ʻalunga ʻoku fepaki mo e lao ʻa e ʻOtuá. ʻOku hā ngali totonu nai ha faʻahinga hala ki he sio fakakakanó ka ʻoku fepaki moʻoni nai ia mo e ngaahi tefitoʻi moʻoni māʻoniʻoni ʻo e Folofola ʻa e ʻOtuá. ʻIkai ko ia pē, ʻe lava ke pouaki ʻe Sētane ʻa e faʻahinga kākā peheé koeʻuhi ke ueʻi ai ha taha ke ne ʻalu ʻi ha ʻalunga ʻokú ne tui ʻoku totonú, ka ko hono moʻoní ʻoku taki atu ia ki he maté.

ʻOku ʻikai ke toe ʻi ai ha maluʻanga lelei ange mei he kākaaʻi-kitá ka ko ha loto ʻoku poto mo mahino pea mo ha konisēnisi kuo fakamaama ʻe he ʻilo ki he Folofola ʻa e ʻOtuá. ʻI hono fai ha ngaahi fili ʻi he moʻuí—tatau ai pē pe ko e meʻa fekauʻaki mo e tuʻunga fakaʻulungāangá, lotú pe ko ha toe meʻa kehe—ko e founga lelei taha ke malu ai mei he kākaaʻi-kitá ko e hoko ʻo tataki ʻe he ngaahi tuʻunga ʻa e ʻOtuá ki he leleí mo e koví.

“ʻOku Ngāue ʻa e Holi ke Kai ʻa e Tangata Ngāué Maʻana”

“Ko e fiekaia ʻa e tangata ngaue ʻoku tokoni ki heʻene ngaue,” ko e hoko atu ia ʻa e tuʻi potó, “he ʻoku mateka atu ia ʻe hono ngutu.” (Palovepi 16:26) ʻOku pehē ʻe Solomone ko e holi ʻa ha tangata ngāue ki ha meʻakaí ‘ʻoku tokoni ia ki heʻene ngaué’ koeʻuhí ʻoku ueʻi ia ʻe he fiekaiá. ʻOku fakalea ia ʻe he An American Translation ʻo pehē: “ʻOku ngāue ʻa e holi ke kai ʻa e tangata ngāué maʻana; he ʻoku ueʻi ia ʻe heʻene fiekaiá.” Ko e holi fakanatula ʻo hangē ko ʻetau holi ke kai ha meʻakaí, ʻe lava ke ne ueʻi kitautolu ke tau faʻa ngāue. ʻOku ʻaonga ʻa e faʻahinga holi peheé. Kae kehe, fēfē kapau ʻoku fakaʻatā ʻa e holi totonú ke hoko ia ʻo fuʻu hulu ʻo liliu ia ki he mānumanú? Ko e nunuʻá ʻoku meimei tatau ia mo e meʻa ʻoku hoko ʻi he taimi ʻoku vela taʻelava ke mapuleʻi ai ha vaotā tupu mei ha kiʻi afi ne ngāueʻaki ki he feimeʻatokoní ʻi ha nofo kemi. Ko e mānumanú ko ha holi ia kuo ʻikai lava ke mapuleʻi pea ʻoku fakatupu maumau. ʻI hono fakatokangaʻi ʻa e fakatuʻutāmakí, ʻoku mapuleʻi ʻe he tokotaha potó ʻo aʻu ki heʻene ngaahi holi leleí.

ʻOua ʻe ʻAlu ʻi ha “Hala ʻOku ʻIkai Lelei”

Ko e ngaahi lea ʻoku haʻu mei hotau ngutú ʻe lava ke fakatupu maumau ia ʻo hangē ko ha afi kakahá. ʻI hono fakamatalaʻi ʻa e nunuʻa fakatupu maumau ʻo e kumi ki he ngaahi fehālaaki ʻa e niʻihi kehé pea fakamafola holó, ʻoku pehē ʻe Solomone: “Oku keli hake ae kovi e he tagata agakovi: bea oku i hono lougutu ae afi kakaha. Oku tūtūʻi e he tagata agakovi ae feiteitani: bea oku fakamavae e he tagata faa fafana [pe lauʻikovi loí] ae kaumea feofoofani.”—Palovepi 16:​27, 28, PM.

Ko ha tangata ʻoku feinga ke maumauʻi ʻa e ongoongo ʻo hono kaungā tangatá ko e “agakovi” ia. ʻOku totonu ke tau feinga ke sio ki he lelei ʻi he niʻihi kehé pea leaʻaki ʻa e ngaahi meʻa ʻoku ʻai ai ke fakaʻapaʻapaʻi kinautolú. Pea fēfē nai ʻa e fakafanongo ki he faʻahinga ʻoku nau fakamafola ʻa e lau fakatupu maumaú? ʻE lavangofua ke langaʻi ʻe heʻenau ngaahi leá ʻa e ngaahi huʻuhuʻu taʻetotonu, ʻo fakamavahevaheʻi ai ha ngaahi kaungāmeʻa pea tupu ai ha māvahevahe ʻi he fakatahaʻangá. ʻE ueʻi kitautolu ʻe he potó ke ʻoua te tau fanongo ki he faʻahinga peheé.

ʻI he fakatokanga fekauʻaki mo ha mālohi fakatauele ʻa ia ʻe lava ke ne fakatupunga ha taha ke ne muia ha ʻalunga hala, ʻoku pehē ʻe Solomone: “Ko e tangata angamalohi ʻoku ne taki he hono kaungaʻapi: ʻO ne ʻave ia ʻi ha hala ʻoku ʻikai lelei. Ka kakamo hono mata ko ʻene fakakaukau ha kākā: Ka lalamu hono ngutu kuo ne lava ha kovi.”—Palovepi 16:​29, 30.

ʻE lava ke ngāue ʻa e mālohi fakaefakatauele ʻo e fakamālohí ʻi he kau lotu moʻoní? Ko e faʻahinga tokolahi he ʻahó ni kuo fakataueleʻi kinautolu ki hono ‘fakakaukauʻi ha kākaá.’ ʻOku nau pouaki pe fakahoko ʻa e ngaahi tōʻonga fakamālohi. ʻE ʻikai nai faingataʻa ke tau fakaʻehiʻehi mei he kau fakahangatonu pehē ʻi he fakamālohí. Kae fēfē nai ʻa e hoko ʻo fakataueleʻi ʻe hono ngaahi founga olopotó? ʻIkai kuo fakataueleʻi ʻa e kakai ʻe laui miliona ke nau mamata ʻi he ngaahi fakafiefia pe sipoti ʻoku fakaʻaiʻai ai ʻa e fakamālohí? ʻOku māʻalaʻala ʻa e fakatokanga ʻa e Tohi Tapú: “Ko ia ʻoku fafale ki he kau poto, te ne hoko ko e poto: Ka ko ia ʻoku kaumeʻa mo e sesele ʻe hoko ko e lusa.” (Palovepi 13:20) He maluʻanga moʻoni ē ʻoku tokonaki mai ʻe he poto fakaʻotuá!

Ko e hā ʻe lava ke leaʻaki fekauʻaki mo ha tokotaha kuó ne maʻu ʻa e potó mo e mahinó ʻi ha taimi lahi pea kuo ʻikai te ne foua ʻa e “hala ʻoku ʻikai lelei”? Ko ha moʻui ʻoku ʻi he ʻalunga ʻo e māʻoniʻoní ʻoku fakaʻofoʻofa ia ʻi he vakai ʻa e ʻOtuá pea ʻoku tuha ia mo e fakaʻapaʻapa. “Koe ulu hina koe tatā ia oe ogoogolelei, o kabau oku ilo ia i he hala oe maonioni,” ko e lau ia ʻa e Palovepi 16:31 (PM).

ʻI he tafaʻaki ʻe tahá, ʻoku ʻikai hano fakaʻofoʻofa ʻe taha ʻa e ʻita taʻemapuleʻí. Ko e foha ʻuluaki ʻo ʻĀtama mo ʻIví, ʻa Keini, naʻá ne “ʻita ʻaupito” ʻi hono tokoua ko ʻĒpelí peá ne ‘tuʻu ʻo ne tamateʻi ia.’ (Senesi 4:​1, 2, 5, 8) Neongo ʻe ʻi ai nai ʻa e ngaahi taimi ʻoku ʻi ai ha ʻuhinga ai ke tau ʻita, kuo pau ke tau maluʻi kitautolu mei hono fakaʻatā ʻetau ʻitá ke hoko ʻo ʻikai mapuleʻí. “Ko ia ʻoku fakatotoka ki he ʻita ʻoku lelei hake ʻi ha fuʻu mafi: Pea ko ia ʻoku puleʻi hono loto ʻi ha taha ʻoku hamu ha kolo,” ko hono tala mahino mai ia ʻe he Palovepi 16:32. Ko e ʻita taʻemapuleʻí ʻoku ʻikai ko ha fakaʻilonga ia ʻo e mālohi pe ʻulungāanga lelei. Ko ha vaivaiʻanga ia ʻoku lava ke ne ‘ʻave ha taha ʻi ha hala ʻoku ʻikai lelei.’

ʻI he Taimi ‘Oku Ia Jihova Ai a Hono Fakamāuʻí’

“Oku li ki he loto kofu ae talotalo,” ko e lau ia ʻa e tuʻi ʻo ʻIsilelí, “ka oku ia Jihova a hono fakamāuʻi.” (Palovepi 16:​33, PM) ʻI ʻIsileli ʻo e kuonga muʻá, naʻe ngāueʻaki ʻe Sihova ʻi he taimi ʻe niʻihi ʻa e talotaló ke ʻai ke ʻiloʻi ai ʻa hono finangaló. Naʻe ngāueʻaki ʻa e ngaahi foʻi maka iiki fuopotopoto, ngaahi lauʻi papa pe lauʻi maka ki he talotaló. Ko e ʻuluaki meʻa naʻe faí ko e kole kia Sihova ke ne fai ha fili ki ha meʻa. Ko hono hokó, ʻoku lī leva ʻa e naunau talotaló ki loto ki he ngaahi pelu ʻo ha kofu tōtōlofa pea toho leva mei ai. Ko e olá naʻe tali ia ko e haʻu mei he ʻOtuá.

ʻOku ʻikai kei ngāueʻaki ʻe Sihova ʻa e talotaló ke fakahaaʻi ki hono kakaí ʻa e meʻa ʻokú ne finangalo ki aí. Kuó ne fakaeʻa hono finangaló ʻi heʻene Folofolá, ʻa e Tohi Tapú. Ko e ʻilo totonu ki he meʻa ʻoku hā ʻi he Tohi Tapú ʻoku mātuʻaki fiemaʻu ia kae maʻu ʻa e poto fakaʻotuá. Ko ia ai, ʻoku ʻikai totonu ke tau tuku ke ʻosi atu ha ʻaho ʻoku teʻeki ai ke tau lau ʻa e Tohi Tapu fakamānavaʻí.—Sāme 1:​1, 2; Mātiu 4:4.

[Fakamatala ʻi lalo]

[Fakatātā ʻi he peesi 8]

Ko e hā ʻoku ngutuhua ange ai ʻa e potó ʻi he koulá?

[Fakatātā ʻi he peesi 9]

Ko e hā ʻokú ne tānaki atu ʻa e fakatupu fakalotoʻí ki hoʻo leá ʻi hoʻo ʻalu ʻi he ngāue fakafaifekaú?

[Fakatātā ʻi he peesi 10]

“Oku keli hake ae kovi e he tagata agakovi”

[Fakatātā ʻi he peesi 11]

ʻOku lava ʻe he ʻita taʻemapuleʻí ke ne ‘ʻave ha taha ʻi ha hala ʻoku ʻikai lelei’

[Fakatātā ʻi he peesi 12]

ʻOku maʻu ʻe he fakamālohí ʻa e mālohi ke ne fai ha fakatauele