Fili Fakapotopoto Ho Ngaahi Kaumeʻá

Lolotonga ʻa e ngaahi taimi leleí, ko e ngaahi kaumeʻa ofí ʻoku nau ʻai ke tau fiefia ange pea fakaivimālohiʻi kitautolu ʻi he ngaahi taimi faingataʻá. Ka ʻoku fakatokanga mai ʻa e Tohi Tapú ʻoku ʻikai ko ha kaumeʻa lelei ʻa e tokotaha kotoa. Ko ia ai, ʻe lava fēfē ke ke fili ha ngaahi kaumeʻa lelei? Lāulea ki he ongo fehuʻi hokó.

1. ʻE anga-fēfē hano tākiekina koe ʻe he ngaahi kaumeʻa ʻokú ke filí?

ʻOku tau hehema ke hoko ʻo hangē ko e kakai ʻoku tau feohi mo iá. ʻOku lava ke hoko eni ʻo lelei pe kovi. Pea ʻoku moʻoni eni tatau ai pē pe ʻoku tau feohi tonu mo kinautolu pe ʻi he ʻinitanetí. Hangē ko e lau ʻa e Tohi Tapú, “ko e tokotaha ʻoku ʻaʻeva mo e potó ʻe hoko ai ʻo poto, ka ko e tokotaha ʻokú ne feohi mo e valé,” ʻa ia ko e faʻahinga ʻoku ʻikai ʻofa kia Sihová, “ʻe hoko ai ʻa e kovi kiate ia.” (Palōveepi 13:20) Ko e ngaahi kaumeʻa ʻoku ʻofa mo lotu kia Sihová ʻe lava ke nau tokoniʻi koe ke nofo ofi kiate ia pea fai ʻa e ngaahi fili lelei. Ka ko e ngaahi kaumeʻa ofi ʻoku ʻikai ke nau ʻofa kia Sihová, te nau ʻai kitautolu ke fakamamaʻo meiate ia. Tāneʻineʻi ke ekinaki mai ʻe he Tohi Tapú ke tau fili fakapotopoto hotau ngaahi kaumeʻá! ʻI heʻetau kaumeʻa mo e kakai ʻoku ʻofa ki he ʻOtuá, ʻoku tau maʻu ʻaonga kotoa mei ai. Te tau malava ai ke “hanganaki fefakalototoʻaʻaki mo felangahakeʻaki.”​—1 Tesalonaika 5:11.

2. Ko e hā ʻa e ongoʻi ʻa Sihová fekauʻaki mo e ngaahi kaumeʻa ʻokú ke filí?

ʻOku fili fakapotopoto ʻe Sihova hono ngaahi kaumeʻá. “ʻOkú Ne kaumeʻa ofi mo e faitotonú.” (Palōveepi 3:32) ʻE fēfē ʻa e ongoʻi ʻa Sihová kapau te tau fili ha ngaahi kaumeʻa ʻoku ʻikai ʻofa kiate ia? Te ne loto-mamahi lahi ʻaupito! (Lau ʻa e Sēmisi 4:4.) ʻI he tafaʻaki ʻe tahá, ʻe fiefia ʻa Sihova pea te ne fili kitautolu ko hono ngaahi kaumeʻa kapau te tau talitekeʻi ʻa e ngaahi feohi koví pea ʻunuʻunu ofi kiate ia mo e faʻahinga ʻoku ʻofa kiate iá.​—Saame 15:1-4.

KELI LOLOTO ANGE

3. Fakaʻehiʻehi mei he feohi koví

Ko e feohi mo e kakai ʻoku ʻikai ke nau ʻofa ki he ʻOtuá mo ʻene ngaahi tuʻungá ko e ngaahi feohi kovi. Huluʻi ʻa e VITIOÓ, pea lāulea leva ki he fehuʻi hokó.

VITIŌ: Ako ke Talitekeʻi ʻa e Feohi Koví (6:17)

• ʻE lava fēfē ke tau hoko ʻo feohi mo e kakai halá ʻo ʻikai ʻilo ki ai?

Lau ʻa e 1 Kolinitō 15:33, pea lāulea leva ki he ongo fehuʻi ko ení:

• Ko e tokotaha fēfē ʻe hoko nai ko ha feohi kovi kiate koé? Ko e hā hono ʻuhingá?

Lau ʻa e Saame 119:63, pea lāulea leva ki he fehuʻi ko ení:

• Ko e hā ʻokú ke kumi ki ai ʻi ha kaumeʻa?

4. Ko e kakai ʻoku kehe meiate kitautolú te nau lava ʻo hoko ko hotau ngaahi kaumeʻa lelei

ʻOku fakamatalaʻi ʻe he Tohi Tapú ha ongo tangata ʻi ʻIsileli ʻo e kuonga muʻá, ko Tēvita mo Sionatane. Naʻá na fuʻu kehekehe ʻi he taʻú mo e ngaahi tuʻungá. Neongo ia naʻá na maʻu ha kaumeʻa makehe atu. Lau ʻa e 1 Sāmiuela 18:1, pea lāulea leva ki he fehuʻi ko ení:

• ʻOku anga-fēfē hono fakahaaʻi ʻe he konga Tohi Tapu ko ení ʻoku ʻikai fiemaʻu ke tau taʻu tatau pe tuʻunga tatau mo hotau ngaahi kaumeʻá?

Lau ʻa e Loma 1:11, 12, pea lāulea leva ki he fehuʻi ko ení:

• ʻE lava fēfē ke fefakalototoʻaʻaki ʻa e ngaahi kaumeʻa ʻoku ʻofa kia Sihová?

ʻI he vitiō ko ení, sio ki he anga hono maʻu ʻe ha toʻutupu ha kaumeʻa ʻokú na toʻu kehekehé. Huluʻi ʻa e VITIOÓ, pea lāulea leva ki he ngaahi fehuʻi hokó.

VITIŌ: Maʻu ʻa e Ngaahi Kaumeʻá ʻi he Toʻu Kehekehe (5:06)

• ʻI he vitioó, ko e hā naʻe hohaʻa ai ʻa e ongo mātuʻa ʻa Akil fekauʻaki mo hono ngaahi kaumeʻa he ʻapiakó?

• ʻI he kamatá, ko e hā ʻa e ngaahi meʻa naʻá ne ʻai ʻa e ngaahi kaumeʻa ko iá ke fakamānako kiate iá?

• Naʻe malava fēfē ke ne ikuʻi ʻene tuēnoá?

5. Founga hono fakatupulekina ʻa e ngaahi kaumeʻa leleí

VITIŌ: Ko e Hā e Kaumeʻa Moʻoni? (4:14)

Lau ʻa e Palōveepi 18:24 mo e 27:17, pea lāulea leva ki he ngaahi fehuʻi ko ení:

• ʻOku anga-fēfē ʻa e fetokoniʻaki ʻa e ngaahi kaumeʻa moʻoní?

• ʻOkú ke maʻu ha ngaahi kaumeʻa lelei pehē? Kapau ʻoku ʻikai, ʻe lava fēfē ke ke maʻu ha ngaahi kaumeʻa lelei?

Lau ʻa e Filipai 2:4, pea lāulea leva ki he fehuʻi ko ení:

• Ke maʻu ha kaumeʻa leleí, ʻoku fiemaʻu ke ke hoko ko ha kaumeʻa lelei. ʻE lava fēfē ke ke fai iá?

FAKANOUNOU

ʻI heʻetau fili fakapotopoto hotau ngaahi kaumeʻá, ʻoku tau fakahōifuaʻi ʻa Sihova pea maʻu ʻaonga mei ai.

Fakamanatu

• Ko e hā ʻoku mahuʻinga ai kia Sihova ʻa e ngaahi kaumeʻa ʻoku tau filí?

• Ko e hā ʻa e faʻahinga kakai ʻoku ʻikai totonu ke tau fili ko e ngaahi kaumeʻá?

• ʻE lava fēfē ke ke langa hake ha kaumeʻa vāofi mo e kakai ʻoku ʻofa kia Sihová?

AKO LAHI ANGE

Sio ki he hoko ʻa e ngaahi kaumeʻa leleí ʻo tokoniʻi kitautolu ʻi he ngaahi taimi faingataʻá.

“Langa Hake ha Ngaahi Kaumeʻa Mālohi ki Muʻa he Ngataʻangá” (Ko e Taua Leʻo, Nōvema 2019)

Fakakaukau ki he meʻa ʻe lava ke ke faí ke maʻu ʻa e ngaahi kaumeʻa lelei.

“ʻE Lava Fēfē Ke U Maʻu ha Ngaahi Kaumeʻa Lelei?” (Ngaahi Fehuʻi ʻOku ʻEke ʻe he Toʻutupú​—Tali ʻOku ʻAongá, Voliume 1, vahe 8)

Ko e hā ʻoku totonu ke ke ʻilo fekauʻaki mo hono maʻu ʻa e ngaahi kaumeʻa ʻi he ʻinitanetí?

Ngāueʻaki Fakapotopoto ʻa e ʻInitanetí (4:12)

ʻI he talanoa “Naʻá Ku Fakaʻamua ha Tamai” sio angé ki he ʻuhinga naʻe fili ai ʻe ha tangata ha ngaahi kaumeʻa kehé.

“Liliu ʻe he Tohi Tapú ʻa e Moʻuí” (Ko e Taua Leʻo, ʻEpeleli 1, 2012)