Hoko ʻo Poto Kumi ki he “Tataki Pōtoʻí”

Kuo fakahoa ʻa e moʻuí ki ha folau. Kae kehe, ko e poto fakaetangatá kuo faʻa fakamoʻoniʻi ʻoku fakangatangata pē hono mahuʻingá ʻi hono tokoniʻi ʻa e kakaí ke nau folau lavameʻa ʻi he moʻuí. Ko e tokolahi kuo nau hokosia ha tūkia ʻi ha vaka ʻi he ngaahi tahi hou ʻo e moʻuí. (Saame 107:23, 27, PM) Ko e hā ʻoku feʻungamālie ai ʻa e lea fakaefakatātā ko iá?

ʻI he kuohilí, ko e fononga ʻi tahí ko ha pole ia naʻe fiemaʻu ki ai ʻa e taukei. Ko ha pōtoʻi ia naʻe faʻa akoʻi ʻe he kau ʻalu tahi fuoloa mahalo ko ha tangata fakaʻuli. (Ngā. 27:9-11) Ko e ngaahi tā-valivali lahi ʻi he kuohilí ʻoku fakamamafaʻi ai ʻa e mahuʻinga ʻo e ngafa ʻo e tangata fakaʻulí ʻaki hono fakatātaaʻi ia ʻokú ne lahi ange ʻi he niʻihi kehé. Ke folau atu ki he moaná, naʻe ako ai ʻa e kau ʻalu tahí fekauʻaki mo e ngaahi fetuʻú, matangí, mo e ngaahi maʻuʻanga fakamatala kehé. ʻOku fakamatalaʻi ʻi he Tohi Tapú ʻa e kau tangata ʻalu tahi ʻe niʻihi ko e kau “pōtoʻi,” ʻo ngāueʻaki ʻa e fakalea ʻe lava ke ʻuhinga ko e “poto.”​—ʻIsi. 27:8.

Ko e feangainga mo e ngaahi palopalema ʻo e moʻuí he ʻaho ní ʻe lava ke hā ia ʻoku faingataʻa hangē ko e folau tahi ʻi he kuohilí. Ko e hā ʻe lava ke ne tokoniʻi kitautolú?

ʻE LAVA FĒFĒ KE TAU MAʻU ʻA E “TATAKI PŌTOʻÍ”?

Ko hono manatuʻi ʻa e lea fakaefakatātā fekauʻaki mo e moʻuí ʻoku hangē ko ha folaú, fakakaukau ki he moʻoni Fakatohitapu ko ení: “Ko e tokotaha potó te ne fanongo pea maʻu ʻa e fakahinohino lahi ange, pea ko e tangata mahinó ʻa e tokotaha ʻokú ne maʻu ʻa e tataki pōtoʻí.” (Pal. 1:5, 6, NW) Ko e kupuʻi lea faka-Hepelū ʻoku liliu ko e “tataki pōtoʻí” ʻe lava ke fakamatalaʻi ia ko e ngaahi ngāue ʻa e ʻeikivaka ʻo ha vaka he kuohilí. ʻOku fakahuʻunga ai ʻa e malava ke tataki mo fakahinohino ʻaki ʻa e pōtoʻi.

Neongo ʻoku fiemaʻu ki ai ʻa e feinga, ʻoku lava ke maʻu ʻa e “tataki pōtoʻí” pea ako ke “folau” lavameʻa ʻi he tahi ʻo e moʻuí. Hangē ko ia ʻoku fakahaaʻi ʻi he Palōvēpí, kuo pau ke tau tuku ʻa e “potó,” “mahinó,” mo e “vavangá” ke nau ngāue fakataha. (Pal. 1:2-6, NW; 2:1-9) Pea ʻe ʻikai malava ai ke tau fakaliʻeliʻaki ʻa e kumi ki he tataki fakaʻotuá, he naʻa mo e fulikivanú ʻokú ne ʻiloʻi nai ʻa e founga ke ‘fakaʻuli’ ai mei ha ikuʻanga taʻetotonu.​—Pal. 12:5, NW.

ʻOku mātuʻaki mahuʻinga leva ke tau hoko ko e kau ako tōtōivi ʻo e Folofola ʻa e ʻOtuá. ʻI he ako peheé, ʻe lava ai ke tau maʻu ʻa e fakamatala mahuʻinga fekauʻaki mo Sihova pea mo e tokotaha ʻokú ne tapua lelei taha atu Iá, ʻa Sīsū Kalaisi. (Sione 14:9) ʻOku tau maʻu ʻa e akonaki fakapotopoto lahi ʻi he ngaahi fakataha faka-Kalisitiané. Tānaki atu ki ai, ʻe lava ke tau ako mei he hokosia ʻa e niʻihi kehé, kau ai ʻetau ongo mātuʻá.​—Pal. 23:22.

ʻAMANEKINA PEA PALANI

Ko e “tataki pōtoʻí” ʻoku mātuʻaki mahuʻinga ia ʻi he taimi ʻoku tau faingataʻaʻia ai ʻi tahi, ʻo hangē ko e laú. ʻI he veiveiua fekauʻaki mo e ngāue ke fai ʻi ha tuʻunga fihi peheé ʻe malava ke ne fakavaivaiʻi kitautolu, fakataha mo e ngaahi ola fakatuʻutāmaki lahi.​—Sēm. 1:5, 6.

Ko e meʻa mālié, ko e kupuʻi lea ʻoku lave ko e “tataki pōtoʻí” ʻoku toe ngāueʻaki ia ki he taú. ʻOku tau lau: “ʻI he tataki pōtoʻí [“ʻi he palani pōtoʻí,” The Revised English Bible] te ke fakahoko hoʻo taú, pea ʻi he tokolahi ʻo e kau faiakonakí ʻoku ʻi ai ʻa e fakamoʻui.”​—Pal. 20:18; 24:6.

Hangē ko ha tokotaha palani ʻokú ne fokotuʻutuʻu ha tau, ʻoku lelei ke tau ʻamanekina ʻa e ngaahi fakatuʻutāmaki ʻe ala hoko ki hotau tuʻunga fakalaumālié. (Pal. 22:3) Ko e fakatātaá, te ke fili nai pe te ke tali ha ngāue foʻou pe ko ha hiki lakanga ʻi he ngāué. Te ke fakakaukauʻi lelei ʻa e totongi, taimi ʻalu mo e foki mei he ngāué, mo e ngaahi fakaikiiki kehe. Kae kehe, ʻoku ʻi ai ʻa e ngaahi poini kehe ke manatuʻi: ʻE fenāpasi ʻa e faʻahinga ngāue ko iá mo e ngaahi tefitoʻi moʻoni Fakatohitapú? Fēfē nai ʻa e ngaahi houá, hangē ko e ngāue ʻi he taimi kehekehe, ʻo uesia ai ʻeku ngaahi ngāue faka-Kalisitiané?​—Luke 14:28-30.

Ko Loretta, ko e taha ʻo e Kau Fakamoʻoni ʻa Sihová, naʻá ne maʻu ha ngāue lelei ʻi ha kautaha ngaohi meʻakai. ʻI he taimi naʻe hiki ai ʻa e kautahá ki he feituʻu kehe, naʻe tuʻuaki ange kia Loretta ha tuʻunga mahuʻinga ʻi he lakanga foʻou: “Ko ha faingamālie eni ʻi he toenga ʻo e moʻuí,” ko e tala ange ia ʻe he kau talēkitá kiate iá. “Kuo mau ʻosi ʻilo ʻoku ʻi ai ha Fale Fakatahaʻanga ʻi ai.” Ka naʻe loto ʻa Loretta ke fakafaingofuaʻi ʻene moʻuí ke tauhi kakato ange ki he Tokotaha-Fakatupú. Naʻá ne sio ko e lakanga foʻou ko iá ʻe siʻisiʻi ai hono taimi ki he ngaahi ngāue faka-Kalisitiané. Ko ia ai, naʻá ne ʻoatu ʻene tohi fakafisí, neongo naʻe falala ʻa e talēkitá ko ia pē ʻa e tokotaha ngāue ʻoku nau loto moʻoni ke ngāueʻakí. Ko Loretta, ʻa ia kuó ne hoko he taimí ni ko ha tāimuʻa tuʻumaʻu ʻi he taʻu nai ʻe 20, ʻokú ne tuipau ko e ngaahi ola lelei naʻá ne maʻú naʻe fekauʻaki hangatonu ia mo ʻene fai ha palani ʻaki ha “tataki pōtoʻí,” ʻio, ʻo fehoanaki mo e faleʻi ʻoku maʻu ʻi he Folofola ʻa e ʻOtuá. Naʻá ne fakaivimālohiʻi hono vahaʻangatae mo Sihová pea kuó ne maʻu ʻa e monū ʻo hono tokoniʻi ʻa e niʻihi ke nau tali ʻa e moʻoni ʻo e Tohi Tapú.

ʻOku mātuʻaki fiemaʻu ʻa e “tataki pōtoʻí” ʻi he fāmilí. Ko hono tauhi hake ʻa e fānaú ko ha ngāue taimi lōloa, pea ko e ngaahi fili ʻoku fai ʻi he ngaahi tafaʻaki fakalaumālié pe fakamatelié ʻoku uesia ai ʻa e kahaʻu ʻo e faʻahinga kotoa ʻi he fāmilí. (Pal. 22:6) Ko e fakatātaá, ko e ngaahi mātuʻa Kalisitiané, ke nau ʻeke hifo nai kia kinautolu: ‘ʻI heʻetau ngaahi fetalanoaʻakí mo e faʻifaʻitakiʻangá, ʻoku tau akoʻi ai ki heʻetau fānaú ʻa e ngaahi meʻa mahuʻinga fakalaumālie te ne tokoniʻi kinautolu ke nau fekuki fakapotopoto mo e moʻui ko e tokotaha lahí? ʻOku tokoniʻi kinautolu ʻe heʻetau tōʻonga moʻuí ke nau mahinoʻi ʻa e founga ke nau fiemālie pē ʻi ha moʻui faingofua pea tokangataha ki heʻenau ngāue fakafaifekau faka-Kalisitiané?’​—1 Tīm. 6:6-10, 18, 19.

Ko e lavameʻa moʻoní ʻoku ʻikai fakapapauʻi ia ʻe he ngaahi taumuʻa fakamatelie pe fakasōsiale ʻoku faʻa tuli ki ai ʻa e faʻahinga ʻi he māmaní. Naʻe mahinoʻi eni ʻe Tuʻi Solomone. Naʻe fakamānavaʻi ia ke ne tohi: “E hoko ae lelei kiate kinautolu oku manavahe ki he Otua, akinautolu oku manavahe i hono ao.” (Koh. 8:12, PM) ʻOku fakamoʻoniʻi pau ai ʻa e poto ʻo e kumi ki he “tataki pōtoʻí” ʻa ia ʻoku makatuʻunga pea fehoanaki mo e Folofola ʻa e ʻOtuá.​—2 Tīm. 3:16, 17.

[Fakatātā ʻi he peesi 30]

Ke fakamamafaʻi honau ngafá, naʻe fakatātaaʻi ʻa e kau fakaʻulí ʻoku nau lalahi ange ʻi he kau kauvaka kehé

[Credit Line]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.