Maʻuʻanga Fakamatala ki he Polokalama Ngāue ki he Fakatahá Moʻui mo e Ngāue Fakafaifekaú

ʻOKATOPA 3-9

KOLOA MEI HE FOLOFOLA ʻA E ʻOTUÁ | PALŌVEEPI 1-6

Keli ki he Makakoloa Fakalaumālie

it-2 180

Matavai ʻo e ʻIló. Ko Sihova ʻa e Matavai tefito ʻo e ʻiló. Ko e moʻoni ko e moʻuí ʻoku meiate ia pea ʻoku mahuʻinga ʻa e moʻuí ki he faʻahinga ʻoku nau maʻu ha ʻilo. (Saame 36:9; Ngā. 17:​25, 28) ʻIkai ko ia pē, naʻe ngaohi ʻe he ʻOtuá ʻa e meʻa kotoa pē, ko ia ʻoku makatuʻunga ʻa e ʻilo ʻa e tangatá ʻi hono ako ʻa e fakatupu ʻa e ʻOtuá. (Fkh. 4:11; Saame 19:​1, 2) ʻOku toe fakamānavaʻi ʻe he ʻOtuá ʻene Folofola tohí, ʻa ia ʻoku ako ai ʻa e tangatá ki he finangalo mo e taumuʻa ʻa e ʻOtuá. (2 Tīm. 3:​16, 17) Ko ia ai, ko e tefito ʻo e ʻilo totonu kotoa pē ko Sihova pea ko e tokotaha ʻoku kumi ki aí kuo pau ke ne manavahē ki he ʻOtuá pea ke tokanga ke ʻoua te ne ʻai ha meʻa ke taʻefakahōifuaʻi ʻa Sihova. Ko e manavahē peheé ko e kamataʻanga ia ʻo e ʻiló. (Pal. 1:​7, PM) Ko e manavahē fakaʻotua ko iá ʻokú ne ʻai ai ha tokotaha ke ne maʻu ʻa e ʻilo totonú, ka ko e faʻahinga ʻoku ʻikai ke nau tali lelei iá ʻoku nau maʻu ha fakamulituku hala ʻo makatuʻunga mei he ngaahi meʻa ʻoku nau vakai ki aí.

ʻOKATOPA 17-23

KOLOA MEI HE FOLOFOLA ʻA E ʻOTUÁ | PALŌVEEPI 12-16

Keli ki he Makakoloa Fakalaumālie

g 11/13 16

ʻOkú Ke “Fai Katoaga Mau Ai Be”?

“OKU kovi ae aho kotoabe onautolu oku mamahi: ka oku fai katoaga mau ai be ia aia oku loto fiemalie.”—Palōveepi 15:​15, PM.

ʻOku ʻuhinga ʻa e ngaahi leá ni ki he hā? ʻOku nau ʻuhinga ki ha tuʻunga fakaefakakaukau mo fakaeongo ʻo ha tokotaha. Ko e faʻahinga “oku mamahi” ʻoku nau hehema ki he ngaahi fehālākí—ko e vakai ko iá ʻokú ne ʻai hono ngaahi ʻahó ke “kovi,” pe fakamamahi. ʻI hono kehé, ko e tokotaha “oku loto fiemalie” ʻoku feinga ke tāfataha ki he ngaahi fakakaukau leleí—ko ha ʻulungaanga ia ʻokú ne fakaʻaiʻai ʻa e fiefia ʻi lotó, ʻo hangē ai ʻokú ne “fai katoaga mau ai be.”

ʻOku tau fehangahangai kotoa mo ha ngaahi palopalema ʻa ia ʻoku lava ke ne kaihaʻasi ʻetau fiefiá. Kae kehe, ʻoku lava ke tau fai ha ngaahi meʻa pau ke tokoniʻi kitautolu ke kei tauhi ʻetau fiefiá ʻi he taimi faingataʻa ko ení. Fakakaukau ki he meʻa ʻoku leaʻaki ʻe he Tohi Tapú.

• ʻOua ʻe fakaʻatā ʻa e loto-moʻua ʻapongipongí ke ne lōmekina koe he ʻahó ni. Naʻe pehē ʻe Sīsū Kalaisi: “Oua naa mou tokaga ki he abogibogi: koeuhi e tokaga ae abogibogi ki he gaahi mea oona. Oku tatau moe aho a hono kovi.”—Mātiu 6:​34, Koe Tohi Tabu Katoa.

• Feinga ke tokangataha ki he ngaahi hokosia lelei naʻe hoko kiate koé. Kae kehe, ʻi he taimi ʻokú ke ongoʻi loto-siʻi aí, ko e hā ʻoku ʻikai ʻai ai ha lisi hoʻo ngaahi hokosia leleí pea fakakaukau ki ai? ʻIkai ko ia pē, ʻoua ʻe nōfoʻi ʻi he ngaahi fehālaaki ʻi he kuohilí pe ngaahi ngāue koví. Ako mei ai pea hoko atu. ʻAi ke hangē ko ha tokotaha fakaʻuli ʻoku fakasio fakavave ki heʻene sioʻata muí kae ʻikai nōfoʻi ai. Manatuʻi “ʻoku ʻiate koe ʻa e fakamolemole” ʻa e ʻOtuá.—Saame 130:4.

• ʻI he taimi ʻoku lōmekina ai ko e ʻe he loto-moʻuá, talanoa ki ha tokotaha ʻoku lava ke ne ʻoatu ha fakafiemālie. “Koe māfajia” ʻokú ne ʻai hotau lotó ke “mabelu . . . : ka oku fakafiefiaʻi ia e he lea lelei,” ko e lau ia ʻa e Palōveepi 12:​25, PM. Ko e “lea lelei” ʻoku malava ke haʻu ia mei he ngaahi mēmipa ʻo e fāmilí pe ko ha kaumeʻa moʻoni—ko ha tokotaha ʻoku ʻikai veiveiua pe fakatuʻatamaki ka “ʻoku ne ʻofa ʻi he taimi kotoa pe.”—Palōveepi 17:17.

Ko e ngaahi lea leleí ʻoku maʻu ia ʻi he Tohi Tapú pea kuo tokoniʻi ai ʻa e tokolahi ke fiefia ange ʻi he moʻuí naʻa mo e ngaahi taimi faingataʻá. ʻOfa ke tokoniʻi mo koe foki ʻe he ngaahi lea lelei ko ení.

ʻOKATOPA 31-NŌVEMA 6

KOLOA MEI HE FOLOFOLA ʻA E ʻOTUÁ PALŌVEEPI | 22-26

“ʻAtu Ako ki ha Tamasiʻi, ʻo Tāu mo Hono ʻAlunga”

w08 4/1 16

Fakahanga ʻa e Ngahaú

Fakatokangaʻi ʻa e Saame 127:​4, 5 ʻoku fakatatau ai ʻa e mātuʻá ki ha “toʻa.” ʻOku ʻuhinga nai eni ko e tamaí pē ʻoku lava ke ne fai ʻa e fatongia fakaemātuʻá? ʻIkai ʻaupito. Ko hono moʻoní, ko e tefitoʻi moʻoni ʻi he talanoa fakatātā ko ení ʻoku fakatou ngāueʻaki ia ki he ngaahi tamaí mo e faʻeé—pea pehē ki he ngaahi mātuʻa taʻehoá. (Palōveepi 1:8) Ko e foʻi lea “toʻa” ʻoku fakahuʻunga ki he mālohi naʻe fiemaʻu ke fanaʻi ai ha mataʻi ngahau mei ha ngahau. ʻI he taimi ʻo e Tohi Tapú, naʻe ngaohi ʻi he taimi ʻe niʻihi ʻa e ngaahi mataʻi ngahaú mei he kopa, pea naʻe tala ki ha sōtia ke fusi ʻa e ngahaú mahalo pē ko ʻene tuʻu mateuteu kae malava ke ne fusiʻi ʻa e ngahaú. (Selemaia 50:​14, 29) ʻOku hā mahino, naʻe fiemaʻu ʻa e ivi mo e feinga ke fusiʻi ʻa e afó kae malava ke fanaʻi ʻa e ngahaú ki he tāketí!

ʻI he tuʻunga meimei tatau, ko hono ʻohake ʻa e fānaú ʻoku fiemaʻu ki ai ʻa e feinga lahi. ʻOku ʻikai ko ʻenau tauhi hake pē kinautolu ʻo hangē ko ha mataʻi ngahau ke puna pē ʻiate ia ki he tāketí. Ko e meʻa fakamamahí, ko e ngaahi mātuʻa tokolahi ʻoku hā ngali ʻoku ʻikai ke nau loto-lelei ke fakalahi atu ʻenau ngaahi feinga ʻoku totonu ke nau maʻú. ʻOku nau fai pē ʻa e meʻa ʻoku faingofua kia kinautolú. ʻOku nau fakaʻatā ʻa e televīsoné, akó mo e ngaahi toʻumeʻá ke akoʻi ʻenau fānaú ki he meʻa ʻoku tonu mo halá, ko e ngaahi tuʻunga fakaeʻulungāngá mo e fehokotaki fakaesinó. ʻOku nau fakaʻatā ʻenau fānaú ke fai pē meʻa ʻoku nau loto ki aí. Pea ʻi heʻenau leá ʻoku hangē ʻoku nau faʻa pehē pē ʻio—ʻi he ʻikai ke nau fai ha fili ʻoku nau faʻa kalofanga ʻo pehē ʻoku ʻikai ke nau loto ke fakalotomamahiʻi ʻenau fānaú. ʻI he tuʻunga moʻoní, ko ʻenau fakangofua tavalé ʻoku iku ai ʻenau fānaú ki ha maumau lahi.

Ko hono ʻohake ʻo e fānaú ko e ngāue lahi. Ko hono fai fakamātoato ʻa e ngāue ko ení fakataha mo e tataki ʻa e Folofola ʻa e ʻOtuá ko ha fiemaʻu pau ia, ka ʻoku taʻefaʻalaua hono palé. Naʻe pehē ʻe ha makasini ki he ngaahi mātuʻá: “Ko ha fekumi . . . kuo ʻilo ko e fānau ʻoku ʻohake ʻi he ʻofá ʻe he ngaahi mātuʻa ʻoku ala falalaʻangá—ko e faʻahinga ʻoku nau poupouʻi ʻenau fānaú kae kei tuʻumaʻu ʻi hono tauhi ʻa e ngaahi fakangatangatá—ʻoku lelei honau tuʻunga fakaeakó, pōtoʻi ange ʻi he feohi fakasōsialé, ongoʻi lelei fekauʻaki mo kinautolu, pea fiefia ange ʻi he fānau ʻoku fuʻu fakamolemoleʻi pe anga-fefeka tōtuʻa ʻenau ngaahi mātuʻá.”

ʻOku ʻi ai ha totongi ʻoku toe lelei ange. Ki muʻá naʻa tau lāulea ai ki he konga ʻuluaki ʻo e Palōveepi 22:6: “ʻAtu ako ki ha tamasiʻi, ʻo tāu mo hono ʻalunga.” ʻOku toe hoko atu ʻa e vēsí mo e ngaahi lea fakalotomāfana ko ení: “Talaatu ʻo ka ne ka motuʻa ʻe ʻikai te ne hiki mei ai.” ʻOku ʻomi nai ʻi he palōveepi fakamānavaʻi ko ení ha fakapapau ʻanga ʻo e lavameʻá? ʻIkai. ʻOku maʻu ʻe hoʻo fānaú ʻa e tauʻatāina ke fili mo e tauʻatāina ke tupu hake pea ngāueʻi ia. Ka ko e veesi ko ení ʻokú ne ʻoange ki he ngaahi mātuʻá ʻa e fakapapau anga-ʻofa. Ko e hā ia?

Kapau te ke akoʻi hoʻo fānaú ʻo fakatatau ki he faleʻi ʻa e Tohi Tapú, ʻokú ne fokotuʻu ai ha ngaahi faingamālie lahi ki ha ola tuʻuloa—ko hoʻo sio ki hoʻo fānaú ʻoku nau tupu hake ʻo fiefia, fiemālie pea hoko ko ha tokotaha lahi fua fatongia. (Palōveepi 23:24) ʻI he kotoa ʻo e ngaahi meʻá ni, ko hono teuteuʻi ʻa e “ngaahi ngahau” mahuʻinga ko iá pea maluʻi mo feinga lahi ke tataki kinautolu. Heʻikai ʻaupito te ke fakaʻiseʻisa ai.

w97 10/15 32

ʻOhake Fānaú ʻi he Tuʻunga Fakaeʻulungāngá—ʻOku Kei Malava?

“ʻOKU tau moʻui ʻi ha sōsaieti ʻoku mātuʻaki fihi, ko ha anga fakafonua ʻoku tuifio, ʻa ia ʻoku ʻikai ke ʻi ai ha tuʻunga fakaeʻulungaanga taau,” ko e lau ia ʻa Robert Glossop ʻi he Vanier Institute for the Family in Ottawa, Kānata. Ko e hā ʻa e olá? Ko ha līpooti mei he nusipepa The Toronto Star ʻoku pehē ai: “Ko e feitama ʻa e faʻahinga taʻu hongofulu tupú, faihia ʻa e toʻutupú mo e taonakita ʻa e taʻu hongofulu tupú ʻoku fakautuutu.”

ʻOku tupulaki ʻa e palopalemá ʻi ʻAmelika Tokelau. Ko e talēkita ko Bill Damon, ʻi he Senitā ki he Tupulaki ʻo e Faʻahinga ʻo e Tangatá ʻi he Brown University ʻi Rhode Island, ʻAmelika, naʻá ne fakatokangaʻi ʻa e ngaahi tuʻunga ko ení ʻi Pilitānia mo e ngaahi feituʻu ʻo ʻIulopé, pea pehē ki ʻAositelēlia, ʻIsileli mo Siapani. Naʻá ne lave ki he tōlalo ʻa e ngaahi siasí, ngaahi akoʻangá mo e ngaahi kautaha kehekehe ʻi hono ʻomai ʻa e tataki ki he toʻutupú. Ko ʻene tuí ko ʻetau anga fakafonuá, “kuo ʻikai lava ke ne fakafuo ha tokotaha mo malava ke fakataukeiʻi ia.” Ko e ngaahi mātuʻa naʻe kau ʻi he fakatotoló naʻa nau ako ko e “akonakí ʻoku fakatuʻutāmaki ia ki he moʻui lelei ʻa e fānaú mo ʻenau leleí,” ʻoku fakapapauʻi ʻe Damon ko e “founga eni ki hono ʻohake ʻo e fānau taʻeʻilo mo talangataʻá.”

Ko e hā ʻoku fiemaʻu ʻe he toʻutupu ʻo e ʻaho ní? ʻOku nau fiemaʻu hokohoko ʻa e akoʻi anga-ʻofa ʻokú ne fakatonutonuʻi ʻa e ʻatamaí mo e lotó. Ko e toʻutupú ʻoku kehekehe pea ʻoku fiemaʻu mo e akonakí ke kehekehe. ʻI hono ueʻi ʻe he ʻofá, ʻoku faʻa fakahoko ʻa e akonakí ʻi ha founga fakaʻuhinga. Ko e ʻuhinga ia ʻoku tala mai ʻe he Palōveepi 8:33 ke “tali ʻa e akonaki.” Ko e niʻihi ʻoku ʻikai “matautea . . . ʻi ha lea pe.” ʻOku fiemaʻu kia kinautolu ʻa e tautea totonu ki he talangataʻá, ʻo fai ʻi he tuʻunga feʻunga ʻe fiemaʻu ke aʻu ki aí. (Palōveepi 17:10; 23:​13, 14; 29:19) Ko hono fai ʻa e fakaongoongoleleí, ʻoku ʻikai poupouʻi ʻe he Tohi Tapú ke tau fai e tauteá ʻi hano tā fakaʻita pe uipi ke takatakaʻuli pe lavea ʻa e kiʻi tamá. (Palōveepi 16:32) ʻI hono kehé, ʻoku totonu ki he kiʻi tamá ke ne mahinoʻi ʻa e ʻuhinga naʻe fakatonutonuʻi ai iá peá ne ongoʻi ʻoku ʻi he tafaʻakí ʻene ongo mātuʻá.—Fakafehoanaki mo e Hepelū 12:​6, 11.

Ko e ngaahi faleʻi ʻaonga Fakatohitapú ʻoku hā ia ʻi he tohi Ko e Fakapulipuli ʻo e Fāmili Fiefiá.

it-2 818 ¶4

Fatongia fakaemātuʻá. Ko e “ʻakau” naʻe toe ngāueʻaki ia ke fakatātaaʻiʻaki ʻa e fatongia e mātuʻá ki heʻenau fānaú. Ko e tohi ʻa Palōvēpí ʻoku lahi ai ʻa e ngaahi fakamatala ki he fatongia ko ení, ʻoku fakatātaaʻi ʻe he foʻi lea ko ení ʻa e faʻahinga kotoa ʻo e akonaki naʻe ngāueʻakí, ʻo kau ai ʻa e vaʻakaú ki he tautea. Ko e mātuʻá ʻoku fakafatongiaʻaki ʻe he ʻOtuá ke ngāueʻaki ʻa e vaʻakau ko ení ki hono akonakiʻi ʻenau fanaú. Kapau ʻoku taʻemalava ʻe he mātuʻá ke fai eni, ʻe hoko heni ha maumau, mate ʻene tamá mo e fakamā pea ʻe taʻefakahōifuaʻi ai foki mo e ʻOtuá. (Pal. 10:1; 15:20; 17:25; 19:13) “ʻOku tāvani ʻa e vale ʻi he loto ʻo ha tamasiʻi: Ko e ʻakau ako te ne vaea ke mavahe.” “ʻOua te ke taʻofi ʻa e tautea mei he tamasiʻi: Kapau te ke taaʻi ia ʻaki ʻa e ʻakau, ʻe ʻikai te ne mate. Ko koe te ke taaʻi ia ʻaki ʻa e ʻakau, ka ko hoʻo fakahao ia ʻene moʻui mei he vanu.” (Pal. 22:15; 23:​13, 14) Ko e moʻoni, “ko ia ʻoku ne angakoviʻi ʻa e meʻa kinisi ʻoku ne fehiʻa ki heʻene tamasiʻi: Ka ko ia ʻoku ne ʻofa ki ai ʻoku ne tautea kei siʻi.”—Pal. 13:24; 19:18; 29:15; 1Sām. 2:​27-36.