ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Palovepí

KO Tuʻi Solomone ʻo ʻIsileli he kuonga muʻá, naʻe lava ke ne “faʻu ha palovepi ʻe tolu afe.” (1 Tuʻi 4:32) ʻE lava nai ke tau ala maʻu ʻa ʻene ngaahi lea potó? ʻIo, ʻe lava. Ko e tohi Palovepí, ʻa ia naʻe kakato ʻi he 717 K.M. nai, ʻoku lēkooti ai ʻa e ngaahi palōveepi lahi ʻa Solomoné. Ko e ongo vahe fakamuimuí pē ʻoku taku ai hono hikí ki he ongo hiki-tohi kehe—ko ʻAuka foha ʻo ʻIake mo e tuʻi ko Lēmiueli. Kae kehe, ʻoku tui ʻa e niʻihi ia ko Lēmiuelí ko e hingoa ia ʻe taha ʻo Solomone.

Ko e ngaahi lea fakamānavaʻi naʻe tātānaki ʻi he tohi Palovepí ʻoku ʻi ai ha taumuʻa lō ua ai—“ko e meʻa ke ʻilo poto ai mo e akonaki.” (Palovepi 1:2) ʻOku tokoniʻi kitautolu ʻe he ngaahi leá ni ke tau maʻu ai ʻa e potó, ʻa ia ko e malava ke sio māʻalaʻala ki he ngaahi meʻá pea ngāueʻaki ʻa e ʻiló ke solova ʻa e ngaahi palopalemá. Fakafou ai, ʻoku tau toe maʻu foki e akonaki, pe ako ki he ʻulungāangá. Ko e tokanga ki he ngaahi palōveepi ko ení mo talangofua ki he faleʻi ʻi aí ʻe lava ke ne laveʻi hotau lotó, tokoni ki heʻetau fiefiá pea iku ai ki he lavameʻa.—Hepelu 4:12.

‘FAKATAU MAʻAU ʻA E POTÓ PEA PUKENIMA ʻA E AKONAKÍ’

(Palovepi 1:1–9:18)

“ʻOku kalanga [leʻo-lahi] ʻa Poto ʻi hala,” ko e lea ia ʻa Solomoné. (Palovepi 1:20) Ko e hā ʻoku totonu ai ke tau fanongo ki hono leʻo ʻoku leʻo-lahi mo mahinó? ʻOku hā ʻi he vahe 2 ʻa e ngaahi ʻaonga lahi ʻo hono maʻu ʻa e potó. Ko e founga ke kumi ai ki ha vahaʻangatae fekoekoeʻi mo Sihová ʻoku lāulea ki ai ʻi he vahe 3. ʻOku hoko atu ʻa Solomone ʻo pehē: “Ko e kamata ke poto ʻaʻeni: fakatau maʻau ʻa e poto: ʻio, neongo ʻoku ke totongi ʻaki ʻa e meʻa kotoa kuo ke lava, fakatau ʻa e mafai-ke-ʻilo. Pukenima ʻa e akonaki; ʻoua ʻe tukuange.”—Palovepi 4:​7, 13.

Ko e hā te ne tokoniʻi kitautolu ke tau talitekeʻiʻaki ʻa e ngaahi founga taʻetaau ʻa e māmaní? Ko e vahe 5 ʻo e Palovepí ʻoku tali mai ai ʻo pehē: Ngāueʻaki ʻa e malava fakaefakakaukaú, pea lāuʻilo ki he ngaahi founga fakatauele ʻa e māmaní. Toe fakakaukau foki ki he ngaahi nunuʻa kovi ʻo hono fai ʻa e ʻulungāanga taʻetāú. Ko e vahe hono hokó ʻoku fakatokanga mai ai ʻo kau ki he ngaahi tōʻonga mo e fakakaukau ʻe maumauʻi ai hotau vahaʻangatae mo Sihová. Ko e vahe 7 ʻoku ʻomai ai ha foʻi moʻoni mahuʻinga ʻo kau ki he founga ʻoku ngāue ai ha tokotaha ʻulungāanga taʻetaau. ʻI he vahe 8, ko e mahuʻinga mo e hā fakamānako ʻa e potó ʻoku fakahaaʻi mai ai ʻi ha founga fakatoʻoaloto. Ko e vahe 9, ko ha fakamulituku fakaueʻiloto ia ki he ngaahi palōveepi naʻe lāulea ki ai ki muʻá, ʻoku fakahaaʻi mai ia ko ha fakatātā fakafiefia ʻa ia ʻoku ueʻi ai kitautolu ke tau feinga ke maʻu ʻa e potó.

Tali ki he Ngaahi Fehuʻi Fakatohitapú:

1:7 (PM); 9:​10​—ʻI he founga fē ʻoku hoko ai ʻa e manavahē kia Sihová ko e “kamataaga ia oe ilo” pea mo e “kamataʻanga ʻo e poto”? Ka ne ʻikai e manavahē kia Sihová, heʻikai lava ke ʻi ai ha ʻilo, he ko ia ʻa e Tokotaha-Fakatupu ʻo e meʻa kotoa pē pea ko e Faʻu-Tohi ia ʻo e Tohi Tapú. (Loma 1:20; 2 Timote 3:​16, 17) Ko e Matavai tonu ia ʻo e ʻilo moʻoní kotoa. Ko ia ai, ko e ʻiló ʻoku kamataʻaki ia ʻa e manavahē anga-ʻapasia kia Sihova. Ko e manavahē-ʻOtuá ko e toe kamataʻanga ia ʻo e potó koeʻuhi heʻikai lava ke ʻi ai ha poto ʻo taʻeʻiai ha ʻilo. ʻIkai ngata aí, ko ha tokotaha ʻoku ʻikai te ne maʻu ʻa e manavahē kia Sihová heʻikai te ne ngāueʻaki ha ʻilo pē ʻokú ne maʻu ke fakalāngilangiʻiʻaki ʻa e Tokotaha-Fakatupú.

5:3 (PM)​—Ko e hā ʻoku ui ai ha paʻumutu ko ha “fefine muli”? ʻOku fakamatalaʻi ʻe he Palovepi 2:​16, 17 ha “fefine muli” ko ha tokotaha kuo “ngalo ai ʻa e kovinanite ʻo hono ʻOtua.” Ko ha tokotaha pē naʻe lotu ki he ngaahi ʻotua loí pe ʻai ia tonu ke ne hoko ko ha muli ki he Lao ʻa Mōsesé, ʻo kau ai ha paʻumutu, naʻe ui ia ko ha muli.—Selemaia 2:25; 3:13.

7:​1, 2​—Ko e hā ʻoku kau ʻi he “ʻeku ngaahi lea” mo “ʻeku ngaahi fekau”? Tānaki atu ki he ngaahi akonaki ʻa e Tohi Tapú, ʻoku kau heni ʻa e ngaahi lao pe ngaahi tuʻutuʻuni ʻi he fāmilí ʻoku fokotuʻu ʻe he ngaahi mātuʻá ki he lelei pē ʻa e ngaahi mēmipa ʻo e fāmilí. ʻOku fiemaʻu ki he fānaú ke nau talangofua ki ai pea pehē foki ki he ngaahi akonaki Fakatohitapu ʻoku nau maʻu mei heʻenau ngaahi mātuʻá.

8:​30​—Ko hai ʻa e “tufunga lahi”? ʻOku ui ʻe he fakasino ʻo potó ʻa ia tonu ko ha tufunga lahi. ʻI he ʻikai ke ngata pē ʻi hono ngāueʻaki tonu ia ke fakamatalaʻiʻaki ʻa e ngaahi tafaʻaki ʻo e potó, ko e fakasino ko ení ʻoku tuʻu fakaefakatātā ia ki he ʻAlo ʻuluaki ʻo e ʻOtuá, ʻa Sīsū Kalaisi, ʻi heʻene moʻui ki muʻa ke ne hoko ko ha tangatá. Ki muʻa fuoloa pea toki ʻaloʻi ia ko ha tangata ʻi he māmaní, ‘nae maʻu ia ko e kamataaga o e hala [pe founga] ʻa e ʻOtuá.’ (Palovepi 8:​22, PM) ʻI hono tuʻunga ko ha “tufunga lahi,” naʻá ne ngāue longomoʻui mo ʻene Tamaí lolotonga hono fakatupu ʻo e ngaahi meʻa kotoa pē.—Kolose 1:​15-17.

9:​17​—Ko e hā ʻa e “vai kaihaʻa,” pea ko e hā ʻoku “melie” aí? Koeʻuhi ʻoku fakatatau ʻe he Tohi Tapú ʻa e fiefia ʻi he vā fakaefehokotaki fakasino ʻi he nofo malí ki hono inu ha vai fakaivifoʻou ʻoku ʻomi mei ha vai tupu, ʻoku fakafofongaʻi ʻe he vai kaihaʻá ʻa e ngaahi vā fakaefehokotaki fakasino taʻetaau fakapulipulí. (Palovepi 5:​15-17) Ko e foʻi fakakaukau ko ia ʻo e ʻikai ke ʻiloʻí ʻoku ʻai ai ke hā ngali melie ʻa e vai peheé.

Ngaahi Lēsoni kia Kitautolu:

1:​10-​14. ʻOku totonu ke maluʻi kitautolu mei hono tauheleʻi ki he ngaahi ʻalunga kovi ʻo e kau angahalá ʻaki ʻenau ngaahi talaʻofa ʻo e koloaʻiá.

3:3. ʻOku totonu ke tau fakamahuʻingaʻi lahi ʻa e ʻaloʻofá mo e moʻoní pea fakahāhā atu ia ʻo hangē pē ko haʻatau fai ki ha kahoa mahuʻinga. ʻOku toe fiemaʻu foki ke tau tongi ʻa e ongo ʻulungāangá ni ʻi hotau lotó, ʻo ʻai ia ko hatau konga tefito.

4:​18. ʻOku tupulaki māmālie ʻa e ʻilo fakalaumālié. Ke tau hanganaki nofo ʻi he māmá, kuo pau ke tau hokohoko atu hono fakahāhā ʻa e anga-fakatōkilalo mo e anga-vaivai.

5:8. ʻOku totonu ke tau hanganaki fakamamaʻo mei he ngaahi tākiekina taʻetaau kotoa pē, ʻo tatau ai pē pe ʻoku fou mai he fasí, fakafiefiá, ʻInitanetí pe ngaahi tohí mo e ngaahi makasiní.

5:​21. ʻE fetongi ʻaki nai ʻe ha tokotaha ʻoku ʻofa kia Sihova ʻa hono vahaʻangatae lelei mo e ʻOtua moʻoní ki ha ngaahi mōmeniti siʻi pē ʻo e fiefiá? Ko e moʻoni ʻoku ʻikai! Ko e fakaueʻiloto mālohi taha ki hono tauhi maʻu ʻa e maʻa fakaeʻulungāangá ko e lāuʻilo ʻoku ʻafioʻi ʻe Sihova hotau ngaahi ʻalungá pea te tau fai ha fakamatala kiate ia.

6:​1-5. ʻI he ngaahi veesi ko ení, he faleʻi lelei moʻoni ia ʻoku tau maʻu ke tau fakaʻehiʻehi ai mei he “talifaki,” pe ko hono fai ha tukupā fakapaʻanga taʻefakapotopoto, maʻá e niʻihi kehé! Kapau kuo tau sivisiviʻi fakalelei ʻa e ngāue ʻoku tau faí ʻoku hā ngali taʻefakapotopoto, ʻi he ʻikai ke tautoloí ʻoku totonu ke tau ‘hu ki hotau kaungaʻapí’ ʻaki ʻa e kōlenga kīvoi pea mo hono fai ʻa e meʻa kotoa ʻoku tau lavá ke fakatonutonu ai ia.

6:​16-​19. ʻOku hā heni ʻa e ngaahi tafaʻaki tefito ʻe fitu ʻoku kau ai ʻa e meimei faʻahinga kotoa pē ʻo e faihalá. ʻOku totonu ke tau fakatupulekina ha fehiʻa ki ai.

6:​20-​24. Ko hano akoʻi Fakatohitapu hake kitá ʻe lava ke maluʻi ai kita mei he hoko ʻo fihia ʻi he tauhele ʻo e ʻulungāanga taʻetaau fakaefehokotaki fakasinó. ʻOku totonu ke ʻoua ʻe fakaliʻeliʻaki ʻe he ngaahi mātuʻá ʻa hono fai ʻo e akoʻi peheé.

7:4. ʻOku totonu ke tau fakatupulekina ha ʻofa ki he potó mo e mahinó.

NGAAHI PALŌVEEPI TĀUTAHÁ KE TATAKIʻAKI KITAUTOLU

(Palovepi 10:1–29:27)

Ko e toenga ʻo e ngaahi palōveepi ʻa Solomoné ko e ngaahi lea tāutaha nounou. ʻI hono fakahaaʻi tefito mai ia ko e ngaahi fakafaikehekehe, faitatau mo e fakafehoanakí, ʻoku fakahaaʻi mai ai ha ngaahi lēsoni mālohi ʻi he ʻulungāangá, leá mo e fakakaukaú.

Ko e vahe 10 ki he 24 ʻoku fakamamafaʻi ai ʻa e mahuʻinga ʻo e manavahē anga-ʻapasia kia Sihová. Ko e ngaahi palōveepi ʻi he vahe 25 ki he 29 naʻe hiki ia ʻe he “kau tangata ʻa Hesekaia ko e Tuʻi Siuta.” (Palovepi 25:1) Ko e ngaahi palōveepi ko ení ʻoku akoʻi mai ai ʻa e falala kia Sihová mo e ngaahi lēsoni mātuʻaki mahuʻinga kehe.

Tali ki he Ngaahi Fehuʻi Fakatohitapú:

10:6​—ʻOku anga-fēfē hono ‘tapuni [pe ʻufiʻufi] ʻa e ngutu ʻo e angahalá ʻe heʻenau fakamalohí’? ʻOku ʻuhinga nai ení fakafou ʻi heʻenau lea momole-ʻolungá ʻoku ʻufiʻufi ai ʻe he fulikivanú ʻenau taumuʻa fakalotokovi ke fai ha maumau ki he niʻihi kehé. Pe mahalo koeʻuhi ko e fulikivanú ʻoku anga-maheni ke fehiʻanekinaʻi kinautolu, ko e fakafili ʻoku fai kia kinautolu ʻe he niʻihi kehé ʻoku fakasīlongoʻi ai kinautolu.

10:10​—ʻOku anga-fēfē ʻa hono fakatupunga ʻe he “talanoa kakamo” ha mamahí? Ko ha “tagata oku agakovi,” heʻikai ke ngata pē nai ʻi heʻene “gutu kovi” ka ʻokú ne toe feinga ke fūfuuʻi ʻene ngaahi fakaueʻilotó ʻaki ʻa e ngaahi ngaue ʻo e sinó, hangē ko e “kakamo eia aki hono mata.” (Palovepi 6:​12, 13, PM) Ko e faʻahinga kākā ko ení ʻe lava ke hoko ia ko ha tupuʻanga ʻo e mafasia lahi fakaefakakaukau ki he tokotaha ʻokú ne maʻukoviá.

10:29​—Ko e hā ʻa e “ʻalunga ʻo Sihova”? ʻOku ʻuhinga ení ki he founga ʻoku feangai ai ʻa Sihova mo e faʻahinga ʻo e tangatá kae ʻikai ko e ʻalunga moʻui ʻoku totonu ke tau muimui aí. Ko e ngaahi feangainga ʻa e ʻOtuá mo e tangatá ʻoku fakahaaʻi mai ai ʻa e maluʻanga ki he haohaoá ka ko e tuʻutāmaki ki he fulikivanú.

11:31​—Ko e hā ʻoku totonu ai ke totongi lahi ange ʻa e faikoví ʻi he faitotonú? Ko e totongi ko ení ʻoku fua ʻaki ia ʻa e lahi ʻo e tautea ʻoku maʻu ʻe he tokotaha taki taha. ʻI he taimi ʻoku faihala ai ha tokotaha faitotonu, ko e totongi ʻokú ne maʻu ʻi heʻene fehālaakí ko e akonekina. Ko e faikoví ʻokú ne fai fakakaukauʻi pē ʻe ia ha angahala peá ne fakafisi ke tafoki ʻo fai lelei. Ko ia ai ʻokú ne tuha mo ha tautea mamafa.

12:23 (PM)​—ʻOku anga-fēfē hono ‘fakafufu e ha taha a ene iló’? Ko hono fufū ʻa e ʻiló ʻoku ʻikai ʻuhinga iá ko e tokotaha ko iá ʻoku ʻikai te ne teitei fakahaaʻi ʻe ia. ʻI hono kehé, ʻoku ʻuhinga iá ko ʻete fakahāhā fakapotopoto ʻa e ʻiló, ʻo ʻikai ke fai fakamamata ia ʻaki ʻa e pōlepole.

14:17 (NW)​—ʻI he founga fē ʻoku ‘fehiʻanekinaʻi ai ʻa e tangata ʻoku malava fakaefakakaukaú’? Ko e foʻi lea faka-Hepelū naʻe liliu ko e “malava fakaefakakaukau” ʻe lava ke ʻuhinga iá ki he ʻiloʻilo pe ko e fakakaukau kovi. Ko hono moʻoní, ʻoku fehiʻanekinaʻi ʻa e tangata ʻoku fakakaukau fulikivanú. ʻOku toe pehē pē foki ki he tangata ʻiloʻilo ʻokú ne ngāueʻaki ʻene ngaahi malava fakaefakakaukaú peá ne fili ke “ʻikai ʻo māmani.”—Sione 15:19.

18:19​—ʻOku anga-fēfē ʻa e ‘faingataʻa ange ʻi ha kolo malohi ʻa e kainga [pe tokoua] kuó te hia ki aí’? ʻI he hangē ko ha kolo mālohi ʻoku ʻākoloʻí, ko ha tokotaha pehē te ne fakafisi mālohi nai ke tukulolo. Ko e ngaahi fakakikihi ʻiate ia mo e tokotaha faihalá ʻe lavangofua ke hoko ia ʻo faingataʻa ʻo hangē pē ko e “songo ʻo ha palasi.”

Ngaahi Lēsoni kia Kitautolu:

10:​11-​14. Ke hoko ʻetau ngaahi leá ʻo fakatupu langa hake, ʻoku totonu ke fakafonu hotau ʻatamaí ʻaki ʻa e ʻilo totonu, ʻoku totonu ke ueʻi hotau lotó ʻaki ʻa e ʻofa, pea ʻoku totonu ke puleʻi ʻe he potó ʻa e meʻa ʻoku hū ki tuʻa mei hotau ngutú.

10:19; 12:18; 13:3; 15:28; 17:28. ʻOfa ke tau fakakaukau ki muʻa ke tau leá, pea ʻoua ʻe faʻa talanoa.

11:1; 16:11; 20:​10, 23. ʻOku fiemaʻu kitautolu ʻe Sihova ke tau faitotonu ʻi heʻetau ngaahi ngāue fakapisinisí.

11:4. Ko e meʻa fakasesele ka ko e tuli ki he tuʻumālie fakamatelié kae fakaliʻeliʻaki ʻa e ako Tohi Tapu fakafoʻituituí, maʻu fakatahá, lotú mo e ngāue fakafaifekaú.

13:4. Ke hoko ʻo “holinoa” ki ha fatongia ʻi he fakatahaʻangá pe ko e moʻui ʻi he māmani foʻoú ʻoku ʻikai ke feʻunga pē ia. Kuo pau ke tau toe ngāue mālohi pea fai ha feinga lahi ke aʻusia ʻa e ngaahi fiemaʻú.

13:24; 29:​15, 21. Ko ha mātuʻa ʻofa ʻoku ʻikai te ne fakapelepeleʻi ʻene kiʻi tamá pe tukunoaʻi ʻene ngaahi fehālaakí. ʻI hono kehé, ʻoku fai ʻe ha tamai pe ko ha faʻē ha ngāue ke fakatonutonu pea ke toʻo atu ai ʻa e ngaahi fehālaaki peheé ki muʻa ke hoko ʻo faiaka loloto.

14:10. Koeʻuhi ko ʻetau ngaahi ongoʻi lolotó heʻikai lava ke fakahaaʻi totonu ia ʻi he taimi kotoa pē pe mahinoʻi maʻu pē ia ʻe he kau mamatá, ko e fiemālie fakaeongo ʻoku lava ke ʻomai ʻe he niʻihi kehé ʻoku ʻi ai hono ngaahi fakangatangata. ʻE pau nai ke tau kātekina ʻa e ngaahi faingataʻa ʻe niʻihi ʻaki ʻa e falala kakato kia Sihova.

15:7. ʻOku ʻikai totonu ke tau fakamatala fakaʻangataha ʻa e meʻa kotoa pē ʻoku tau ʻiló ki ha tokotaha, hangē pē ko ha tokotaha faama ʻoku ʻikai te ne laku kotoa ʻene ngaahi tengá ʻi ha feituʻu ʻe taha. Ko e tokotaha potó ʻokú ne tuku atu māmālie ʻa ʻene ʻiló ʻo fakatatau ki he fiemaʻú.

15:15; 18:14. Ko hono tauhi maʻu ha fakakaukau fakatuʻamelié ʻe tokoniʻi ai kitautolu ke tau maʻu ʻa e fiefia, naʻa mo e ʻi he ngaahi tuʻunga fakalotomamahí.

17:24. ʻI he ʻikai hangē ko e “vale” ʻa ia ko hono matá mo e ʻatamaí ʻoku tā kakau holo kae ʻikai ke tokangataha ki he ngaahi meʻa mahuʻingá, ʻoku totonu ke tau feinga ke maʻu ʻa e mahinó koeʻuhi ke tau lava ai ʻo ngāue fakapotopoto.

23:​6-8. ʻOku totonu ke maluʻi kitautolu mei hano fakahāhā mālualoi ʻa e anga-talitali kakaí.

27:21. Ko e fakahīkihikí ʻe lava ke fakahāhaaʻi atu ai pe ko hai kitautolu. ʻOku fakahaaʻi ʻa e anga-fakatōkilaló kapau ʻe ueʻi kitautolu ʻe he fakahīkihikí ke tau lāuʻilo ki heʻetau moʻua kia Sihová pea fakalototoʻaʻi ai kitautolu ke tau hokohoko atu ʻa e tauhi kiate iá. Ko ha ʻikai ke maʻu ʻa e anga-fakatōkilaló ʻoku fakahaaʻi ia ʻi he taimi ʻoku pouaki ai ʻe he fakahīkihikí ha ongoʻi māʻolunga ange.

27:​23-​27. ʻI hono ngāueʻaki ʻa e feituʻu kaikaiʻanga ʻo e fanga sipí, ʻoku fakamamafaʻi ʻe he ngaahi palōveepi ko ení ʻa e mahuʻinga ʻo hono maʻu ʻa e loto-topono ʻi ha moʻui faingofua ʻoku tupu mei he ngāue tōtōiví. ʻOku totonu ke tautefito ʻene ʻai ke maongo kia kitautolu ʻa e fiemaʻu ke falala ki he ʻOtuá.a

28:5. Kapau te tau “haʻao kia Sihova” fakafou ʻi he lotu pea mo ako ʻene Folofolá, ʻe lava ai ke tau ‘mahinoʻi ʻa e meʻa hono kotoa’ ʻoku fiemaʻu ke tauhi fakahōifua ai kiate iá.

‘ONGO PŌPOAKI MAMAFA’

(Palovepi 30:1–31:31)

ʻOku fakaʻosiʻaki ʻa e tohi Palovepí ha ongo “pōpoaki mamafa.” (Palovepi 30:​1, NW; 31:1) Fakafou ʻi ha ngaahi fakafehoanaki fakatupu fakakaukau, ʻoku fakatātaaʻi ʻe he pōpoaki ʻa ʻAuká ʻa e havalá pea ʻoku fakahaaʻi ai ʻa e taʻealafakatokangaʻi ʻo e ngaahi founga fakalotoʻi ʻe lava ke fakataueleʻi ʻaki ʻe ha tangata ha fefine.b ʻOku toe fakatokanga mai ai ʻo kau ki he loto-mahikihikí mo e lea ʻitá.

Ko e pōpoaki mamafa naʻe maʻu ʻe Lēmiueli mei heʻene faʻeé ʻoku ʻi ai ha faleʻi ʻaonga ai ʻo kau ki hono ngāueʻaki ʻo e uainé mo e ʻolokaholó pea pehē foki ki he fakamaau ʻi he māʻoniʻoní. Ko hono fakamatalaʻi ʻo ha uaifi leleí ʻoku fakaʻosiʻaki ʻa e pehē: “Tuku hano ʻinasi mei he fua ʻo hono nima, pea ke ne maʻu fakamālō . . . ʻi he ngaahi meʻa kuo ne fai.”—Palovepi 31:31.

Maʻu ʻa e potó, tali ʻa e akonakí, fakatupulekina ʻa e manavahē-ʻOtuá, falala kia Sihova. He ngaahi lēsoni mahuʻinga moʻoni ia ʻoku akoʻi mai ʻe he ngaahi palōveepi fakamānavaʻí! Ko ia ai, ʻai ke tau ngāueʻaki ʻa e ngaahi akonaki aí pea aʻusia leva ʻa e fiefia ʻa e “tangata oku ne manavahe kia Jihova.”—Sāme 112:​1, PM.

[Fakamatala ʻi lalo]

[Fakatātā ʻi he peesi 16]

Ko Sihova ʻa e Matavai ʻo e ʻilo moʻoni kotoa pē

[Fakatātā ʻi he peesi 18]

ʻOku ʻuhinga ki he hā ʻa e pehē ke “laku atu ʻa e meʻa kuo ʻilo”?