Fai Fakapotopoto ʻa e Ngaahi Fili Fakafoʻituituí

“Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou.”—PAL. 3:5.

ʻE FĒFĒ HAʻO TALI?

ʻOku ʻuhinga ki he hā ʻa hono maʻu ha fakakaukau lelei ʻi he taimi ʻoku tau fai ai ha ngaahi filí?

ʻE lava fēfē ke tau ako ke fai ʻa e ngaahi fili fakapotopotó?

Ko e hā ʻe lava ke ne tokoniʻi kitautolu ke fai ʻa e meʻa kuo tau fakapapauʻi ke faí?

1, 2. ʻOkú ke saiʻia ʻi hono fai ʻa e ngaahi filí? ʻOku anga-fēfē hoʻo ongoʻi fekauʻaki mo e ngaahi fili ʻe niʻihi kuó ke faí?

ʻI HE ʻaho kotoa pē kuo pau ke tau fai ʻa e ngaahi fili lahi. ʻOku anga-fēfē hoʻo ongoʻi fekauʻaki mo hono fai ʻa e ngaahi filí? ʻOku vēkeveke ʻa e kakai ʻe niʻihi ke fai ʻa e fili kotoa pē maʻanautolú. ʻOku nau fakakaukau ʻoku nau maʻu ʻa e totonu ke fai kotoa ʻenau ngaahi filí pea ʻikai saiʻia ʻi he foʻi fakakaukau ʻo e fai ʻe ha taha kehe ʻa e filí maʻanautolu. ʻOku ilifia ʻa e niʻihi kehe ʻi hono fai ʻa e ngaahi fili mahuʻingá. ʻOku kumi ʻa e niʻihi ki he faleʻi ʻi he ʻū tohí pe mei he kau faiakonakí pea aʻu ʻo fakamoleki ʻa e paʻanga lahi ke maʻu ʻa e tokoni ʻoku nau fakakaukau ʻoku fiemaʻu ke faiʻaki ʻa e ngaahi filí.

² Ko e tokolahi ʻo kitautolu ʻoku tau ʻiloʻi neongo ʻoku ʻi ai ʻa e ngaahi fili ʻe niʻihi ʻoku ʻikai ke tau maʻu ʻa e totonu ke fai, ʻoku ʻi ai ʻa e ngaahi fili fakafoʻituitui lahi ʻoku lava ke tau fai ʻi he moʻuí. (Kal. 6:5) Kae kehe, ʻoku tau ʻiloʻi nai ko e ngaahi fili kotoa ʻoku tau faí ʻoku ʻikai ke fakapotopoto pe ʻaonga.

 3. Ko e hā ʻa e ngaahi fakahinohino ʻoku tau maʻu ke tokoniʻi kitautolu ke fai ʻa e ngaahi filí? Ko e hā ʻoku ʻikai faingofua maʻu pē ai ke ʻilo ʻa e fili ke faí?

³ ʻI he tuʻunga ko e kau sevāniti ʻa Sihová, ʻoku lava ke tau fiefia he kuó ne ʻomai kia kitautolu ʻa e ngaahi fakahinohino māʻalaʻala fekauʻaki mo e ngaahi meʻa mahuʻinga lahi ʻi heʻetau moʻuí. ʻOku tau ʻilo kapau te tau muimui ki heʻene ngaahi fakahinohinó, ʻe lava ke tau fai ʻa e ngaahi fili ʻa ia te ne fakatou fakahōifuaʻi ʻa Sihova mo ʻaonga kia kitautolu. Ka ʻoku ʻikai ke ʻomai ʻe he Tohi Tapú ʻa e ngaahi fakahinohino ki he ngaahi palopalemá pe ngaahi tuʻungá kotoa. ʻOku totonu ke fēfē ʻetau fili ʻa e meʻa ke faí ʻi he taimi ʻoku hoko ai iá? Ko e fakatātaá, ʻoku pehē ʻe he Tohi Tapú ʻoku ʻikai totonu ke tau kaihaʻa. (ʻEf. 4:28) Ka ʻoku pehē ʻe he niʻihi ia ʻoku ʻikai ke hala maʻu pē ia ki ha tokotaha ke toʻo ha meʻa ʻoku ʻikai ʻaʻana kapau ʻoku ʻikai ke fuʻu mahuʻinga ia pe kapau ʻokú ne mātuʻaki fiemaʻu ia. ʻE fēfē haʻatau fai ha fili ʻi he taimi ʻoku pehē ai ʻe he niʻihi ʻoku ʻikai ke ʻi ai ha fakahinohino māʻalaʻala ia ki he meʻa ke faí? Ko e hā e meʻa te ne tokoniʻi kitautolú?

FAI HOʻO FILÍ ʻAKI HA FAKAKAUKAU LELEI

 4. Ko e hā ʻa e faleʻi ʻoku tau faʻa maʻu ʻi he ʻai ke tau fai ha filí?

⁴ ʻI he taimi ʻoku tau tala ange ai ki ha kaungā-Kalisitiane ʻoku ʻai ke tau fai ha fili mahuʻinga, te ne tala mai nai kia kitautolu ke fai ʻa e filí ʻaki ha fakakaukau lelei. Ko e faleʻi lelei ia. ʻOku ʻomai kia kitautolu ʻe he Tohi Tapú ʻa e faleʻi ko eni fekauʻaki mo e ʻikai fai ha fili fakavavé: “Ko e fakavave kovi ko hono o pe ko e masiva.” (Pal. 21:5) Ka ko e hā ʻoku ʻuhinga ki ai ʻa e fai ha fili ʻaki ha fakakaukau leleí? ʻOku ʻuhinga pē ení ʻoku totonu ke tau fakakaukau fakalelei fekauʻaki mo e tuʻungá, hoko ʻo fakaʻatuʻi pea feinga ke mahinoʻi ʻa e ngaahi moʻoniʻi meʻá kotoa ki muʻa ke tau fai ʻa e filí? Ko e ngaahi meʻá ni kotoa ʻoku mahuʻinga, ka ʻoku ʻi ai ʻa e meʻa lahi ange ia ʻi hono maʻu pē ha fakakaukau leleí.—Loma 12:3; 1 Pita 4:7.

 5. Ko e hā ʻoku ʻikai ke tau maʻu ai ha fakakaukau lelei haohaoá?

⁵ ʻOku ʻikai ha taha ʻia kitautolu ʻoku fanauʻi mo ha fakakaukau lelei haohaoa. Koeʻuhí ko kitautolu kotoa ko e kau faiangahala mo taʻehaohaoa, ʻoku ʻikai ke tau maʻu ha moʻui lelei haohaoa mo fakakaukau lelei haohaoa. (Saame 51:5; Loma 3:23) Pehē foki, ko e tokolahi ʻo kitautolu naʻe “fakakuihi” ʻe Sētane ki muʻa ke tau ako fekauʻaki mo Sihova mo ʻene ngaahi tuʻungá. (2 Kol. 4:4; Tai. 3:3) Ko ia neongo kapau ʻe fakakaukau ha tokotaha ʻi ha vahaʻa taimi lahi ki muʻa ke fai ha fili makatuʻunga ʻi he meʻa ʻokú ne fakakaukau ʻoku lelei mo ʻuhinga leleí, te ne kei fai pē nai ha fili hala.—Pal. 14:12.

 6. Ko e hā ʻe lava ke ne tokoniʻi kitautolu ke maʻu ha fakakaukau leleí?

⁶ Neongo ʻoku tau taʻehaohaoa, ko Sihova, ʻa ʻetau Tamai fakahēvaní, ʻoku haohaoa ʻi he founga kotoa pē. (Teu. 32:4) Kuó ne ʻomai kia kitautolu ʻa e meʻa ʻoku tau fiemaʻú ke liliu ai ʻa e anga ʻetau fakakaukaú pea ako ke maʻu ha fakakaukau lelei. (Lau ʻa e 2 Tīmote 1:7.) ʻI he tuʻunga ko e kau Kalisitiané, ʻoku tau loto ke fakakaukau, fakaʻuhinga, pea ngāue ʻi ha founga fakapotopoto. Ko ia ʻoku fiemaʻu ke tau ako ke mapuleʻi ʻetau fakakaukaú mo e ngaahi ongoʻí pea faʻifaʻitaki ki he anga ʻo e ngaahi fakakaukau, ongoʻi mo e ngāue ʻa Sihová.

7, 8. Ko e hā ʻa e hokosia ʻoku fakahaaʻi ai ʻe lava ke tau fai ha fili lelei neongo hono tenge kitautolu pe hokosia ha ngaahi palopalema?

⁷ Ko ha fakatātā eni. ʻOku angamaheniʻaki ki he niʻihi ʻoku nau hiki ki ha fonua mulí ke fakafoki ʻenau fanga kiʻi pēpē toki fāʻeleʻí ki honau ngaahi kāinga ʻi honau fonua tupuʻangá. ʻI he foungá ni, ʻe lava ai ke hokohoko atu ʻa e ngaahi mātuʻá ke ngāue mo maʻu ha paʻanga ʻi honau fonua foʻoú.a Ko ha fefine ʻe taha naʻe ʻi ai haʻane kiʻi pēpē tangata fakaʻofoʻofa. ʻI he taimi ko iá, naʻá ne kamata ke ako ʻa e Tohi Tapú pea ngāueʻaki ʻa e meʻa naʻá ne akó. Naʻe kamata ke tala ange ʻe hono ngaahi kaungāmeʻá mo e kāingá kiate ia mo hono husepānití ko e anga-fakafonuá ia ke fakafoki ʻa e fanga kiʻi pēpeé ki ʻapi koeʻuhí ke lava ʻo ʻohake ai kinautolu ʻe he fanga kuí. Ka naʻe ako ʻe he uaifí kuo ʻoange ʻe Sihova kiate ia mo hono husepānití ʻa e fatongia ke ʻohake ʻena kiʻi tamá. (Saame 127:3; ʻEf. 6:4) ʻOku totonu ke ne muimui ki he anga-fakafonuá koeʻuhí ʻoku fakakaukau ʻa e tokotaha kotoa ko e meʻa totonu ia ke faí? Pe ʻoku totonu ke ne ngāueʻaki ʻa e meʻa naʻá ne ako mei he Tohi Tapú, neongo ʻe faingataʻa ke moʻui ʻi ha kiʻi paʻanga siʻisiʻi mo hono fakaangaʻi nai ia ʻe he niʻihi kehé? Ko e hā naʻá ke mei faí kapau naʻá ke ʻi he tuʻunga ko iá?

⁸ Naʻe loto-mafasia ʻa e kiʻi fefiné koeʻuhí ko hono tenge ia ʻe he niʻihi kehé. Ko ia naʻá ne lotu kia Sihova fekauʻaki mo e anga ʻene ongoʻí pea kōlenga ki heʻene fakahinohinó. ʻI heʻene talanoa ki heʻene faiako Tohi Tapú pea mo e niʻihi kehe ʻi he fakatahaʻangá, naʻe kamata ke ne mahinoʻi ʻa e anga ʻo e fakakaukau ʻa Sihová fekauʻaki mo e tuʻungá ni. Naʻá ne toe ʻiloʻi ʻe lava ke uesia fakaeongo hono fohá kapau naʻe fakamavaheʻi ia mei heʻene ongo mātuʻá ʻi heʻene tupu haké. Hili ʻa e fakakaukau fakalelei fekauʻaki mo e meʻa naʻe leaʻaki ʻe he Tohi Tapú fekauʻaki mo hono tuʻungá, naʻá ne fakaʻosiʻaki naʻe ʻikai totonu ke fakafoki ʻa e pēpeé. ʻI he sio hono husepānití ki he anga ʻo e tokoni vave ʻa e ngaahi mēmipa ʻo e fakatahaʻangá kia kinautolú pea mo e fiefia mo moʻui lelei ʻa e pēpeé, naʻá ne tali ha ako Tohi Tapu pea kamata ke maʻu ʻa e ngaahi fakatahá mo hono uaifí.

9, 10. ʻOku ʻuhinga ki he hā ʻa hono maʻu ha fakakaukau leleí? ʻE lava fēfē ke tau maʻu ha fakakaukau lelei?

⁹ Ko ha fakatātā pē ia ʻe taha, ka ʻoku fakahaaʻi ai ko hono ngāueʻaki ʻa e fakakaukau leleí ʻoku ʻikai ʻuhinga ia ko hono fai pē ʻa e meʻa ʻoku tau fakakaukau ʻoku ʻuhinga lelei pe meʻa ʻoku fakakaukau ʻa e niʻihi kehé ʻoku lelei taha pe faingofua tahá. Ko ʻetau fakakaukau mo e loto taʻehaohaoá ʻe lava ke hangē ia ha uasi ʻoku fuʻu vave pe fuʻu tuaí. Kapau ʻoku tau falala ki he uasí neongo ʻene halá, ʻe lava ke tau hokosia ha ngaahi palopalema lahi. (Sel. 17:9) Ke fakaʻehiʻehi mei he ngaahi palopalemá, ʻoku fiemaʻu ke tau fakapapauʻi ko ʻetau fakakaukaú mo ʻetau ngaahi ongoʻí ʻoku tataki ʻe he ngaahi tuʻunga ʻa e ʻOtuá.—Lau ʻa e ʻAisea 55:8, 9.

¹⁰ ʻOku tau maʻu ʻa e faleʻi fakapotopoto ko ení ʻi he Tohi Tapú: “Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou: Ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.” (Pal. 3:5, 6) Fakatokangaʻi ʻoku pehē ai “ʻouae fāki ki ho poto oʻou.” Pea pehē leva “fakaongo” kia Sihova. Ko ia Tokotaha pē ʻokú ne maʻu ʻa e fakakaukau lelei haohaoá. Ko ia ʻi he taimi pē ʻoku tau ʻai ai ke fai ha fili, ʻoku fiemaʻu ke tau kumi ki he Tohi Tapú ke maʻu ʻa e anga ʻo e fakakaukau ʻa e ʻOtuá fekauʻaki mo e tuʻungá koeʻuhi ke lava ke tau fili ʻi he founga te ne fili aí. Kapau ʻoku tau loto ke maʻu ha fakakaukau lelei, kuo pau ke tau faʻifaʻitaki ki he anga ʻo e fakakaukau ʻa Sihová.

AKOʻI HO NGAAHI MAFAI ʻILOʻILÓ

11. Ko e hā ʻoku fiemaʻu ke fai ʻe ha tokotaha ke fai ai ʻa e ngaahi fili fakapotopotó?

¹¹ ʻOku ʻikai faingofua ke ako ki hono fai ʻa e ngaahi fili fakapotopotó pea fai leva ʻa e meʻa ʻoku tau fakapapauʻi ke faí. ʻE lava ke mātuʻaki faingataʻa eni ki he faʻahinga toki papitaiso foʻoú pe ko e faʻahinga ʻoku nau toki fai pē ha fakalakalaka ʻi he moʻoní. Ka ʻoku malava kia kinautolu ke fai ha fakalakalaka moʻoni. ʻOku ui kinautolu ʻe he Tohi Tapú ko e ‘fanga kiʻi tama kei siʻi’ koeʻuhí ʻoku nau hangē ha kau valevale ʻoku nau akoako ʻalú. ʻOku ako ʻalu ha kiʻi valevale ʻaki ʻene toutou manga iiki. Ko e faʻahinga ʻoku nau ako ke fai ʻa e ngaahi fili fakapotopotó ʻoku nau fai ʻa e meʻa meimei tatau. Naʻe pehē ʻe he ʻapositolo ko Paulá ko e kakai matuʻotuʻá ʻa e “faʻahinga kuo akoʻi ʻenau ngaahi mafai ʻiloʻiló fakafou ʻi hono ngāueʻaki iá, ke ne fakafaikehekeheʻi fakatouʻosi ai ʻa e tonú mo e halá.” Ko e foʻi lea “fakafou ʻi hono ngāueʻaki” mo e “akoʻi” ʻokú na fakatou fakahaaʻi ʻoku fiemaʻu ke tau fai ha feinga hokohoko. Ko ia ʻoku fiemaʻu ki he faʻahinga foʻoú ke nau hokohoko fai ha ngaahi feinga ke ako ke fai ʻa e ngaahi fili fakapotopotó.—Lau ʻa e Hepelū 5:13, 14.

12. ʻE lava fēfē ke tau ako ke fai ʻa e ngaahi fili fakapotopotó?

¹² ʻI he ʻaho taki taha kuo pau ke tau fai ha ngaahi fili lahi. ʻE lava ke lahi pe siʻi ia. Ko e niʻihi ʻa ia ʻoku nau fai ha fekumi ʻi he anga ʻo e fai ʻe he kakaí ʻa e ngaahi filí naʻa nau pehē ʻoku tau fai ʻa e meimei vaeua ʻetau ngaahi filí ʻo makatuʻunga ʻi he meʻa ʻoku tau tōʻongaʻakí kae ʻikai makatuʻunga ʻi he fakakaukau fakaleleí. Ko e fakatātaá, ʻi he pongipongi kotoa kuo pau ke ke fili ʻa e meʻa ke tuí. ʻOku hā ngali ko ha fili siʻisiʻi eni pea ʻoku ʻikai fiemaʻu ia ke ke fakakaukau lahi fekauʻaki mo ia. Kae kehe, ʻoku mahuʻinga kiate koe ke fakakaukau pe ko e meʻa ʻokú ke tuí ko ha meʻa ia ʻoku totonu ke tui ʻe ha sevāniti ʻa Sihova. (2 Kol. 6:3, 4) ʻI he taimi ʻokú ke fakatau vala aí, te ke fakakaukau nai fekauʻaki mo e sitaila vala ʻoku manakoá. Ka ʻokú ke toe fakakaukau pe ʻoku fakanānā ʻa e valá mo ke maʻu ha paʻanga feʻunga ke totongiʻaki ia? Ko hono fai ʻa e ngaahi fili lelei ʻi he fanga kiʻi meʻa īkí ʻe lava ke ne tokoniʻi kitautolu ke akoʻi ʻetau mafai ʻiloʻiló. Kapau te tau fai eni, ʻe lava ke tokoniʻi ai kitautolu ke fai ʻa e ngaahi fili totonú ʻi he ngaahi tafaʻaki ʻoku mātuʻaki mahuʻinga angé.—Luke 16:10; 1 Kol. 10:31.

MAʻU HA HOLI MĀLOHI KE FAI ʻA E MEʻA ʻOKU TOTONÚ

13. Ko e hā te ne tokoniʻi kitautolu ke fai ʻa e ngaahi meʻa kuo tau fakapapauʻi ke faí?

¹³ Naʻa mo e taimi ʻoku tau fai ai ʻa e fili totonú, ʻoku ʻikai faingofua maʻu pē ke fai ʻa e meʻa kuo tau fakapapauʻi ke faí. Ko e fakatātaá, ʻoku loto ʻa e niʻihi ke tuku ʻenau ifi tapaká, ka ko ʻenau holi ke tukú ʻoku ʻikai ke mālohi feʻunga ia ke tokoniʻi kinautolu ke lavameʻa. ʻOku fiemaʻu ke tau maʻu ha holi mālohi ke fai ʻa e ngaahi meʻa kuo tau fakapapauʻi ke faí. ʻOku pehē ʻe he niʻihi ʻe lava ke tau ʻai ke mālohi ʻa e holi ko ení ʻi he founga tatau ʻoku tau ʻai ai ke mālohi ha uouá. Ko e lahi ange ʻetau ngāueʻi ha uoua pe fakamālohisinoʻi iá, ko ʻene mālohí ange ia. Kapau ʻoku ʻikai ke tau faʻa ngāueʻi ʻa e uouá, ʻe hoko ʻo vaivai. Ko e hā ʻe lava ke ne tokoniʻi kitautolu ke ʻai ke mālohi ʻetau holi ke fai ʻa e ngaahi meʻa kuo tau fakapapauʻi ke faí? ʻOku fiemaʻu ke tau falala ki he tokoni ʻa Sihová.—Lau ʻa e Filipai 2:13.

14. Ko e hā e ʻuhinga naʻe maʻu ai ʻe Paula ʻa e mālohi ke fai ʻa e meʻa naʻá ne ʻiloʻi ʻoku totonu ke ne faí?

¹⁴ Naʻe ʻiloʻi ʻe Paula naʻe faingataʻa ke fai ʻa e meʻa totonú koeʻuhí ko ʻene ngaahi hokosiá tonu. Naʻe tuʻo taha ʻene pehē naʻá ne fakaʻamu ke fai “ʻa e meʻa ʻoku leleí” ka naʻe faingataʻa eni he taimi ʻe niʻihi kiate ia. Naʻá ne ʻiloʻi ʻa e meʻa naʻá ne loto ke faí pe ko e meʻa naʻe totonu ke ne faí, ka naʻe ʻikai malava ke ne fai ia he taimi ʻe niʻihi. Naʻá ne fakahaaʻi: “ʻOku ou manako moʻoni ʻi he lao ʻa e ʻOtuá ʻo fakatatau ki hoku tangata ʻi lotó, ka ʻoku ou mātā ʻi hoku sinó ha toe lao ia ʻe taha ʻokú ne faitau mo e lao ʻo hoku ʻatamaí mo ne taki pōpula au ki he lao ʻa angahalá ʻa ia ʻoku ʻi hoku ngaahi kupú.” Ka naʻá ne maʻu ha ʻuhinga lelei ke ʻamanaki. Naʻá ne pehē: “Fakafetaʻi ki he ʻOtuá fakafou ʻia Sīsū Kalaisi ko hotau ʻEikí!” (Loma 7:18, 22-25) Naʻá ne toe tohi: “He ko e ngaahi meʻa kotoa pē ʻoku ou maʻu ʻa e ivi ki ai fakafou ʻiate ia ʻokú ne ʻomai kiate au ʻa e mālohí.”—Fil. 4:13.

15. Ko e hā ʻoku fiemaʻu ai ke tau fakapapauʻi ke fai ʻa e meʻa ʻoku totonú?

¹⁵ Ke fakahōifuaʻi ʻa e ʻOtuá, ʻoku fiemaʻu ke tau fili ke fai ʻa e meʻa ʻoku totonú pea fakapapauʻi leva ke fai ia. Manatuʻi ʻa e meʻa naʻe tala ange ʻe ʻIlaisiā ki he kau lotu Pēalí pea mo e kau ʻIsileli tafoki ʻo fakafepaki ki he moʻoní ʻi he Moʻunga Kāmelí: “Ko futu hoʻomou toumoua pehe? Kapau ko e ʻOtua ʻa Sihova, mou muimui kiate ia: pea kapau ko Peali, peʻi muimui kiate ia.” (1 Tuʻi 18:21) Naʻe ʻiloʻi ʻe he ngaahi foha ʻo ʻIsilelí naʻe totonu ke nau lotu pē kia Sihova. Naʻa nau “toumoua” koeʻuhí naʻa nau feinga ke lotu fakatouʻosi kia Sihova mo Pēali. Naʻe kehe ʻaupito ʻa Siosiua ia. ʻI he ngaahi taʻu ki muʻa angé, naʻá ne tala ange ki he kau ʻIsilelí: “Kapau ʻoku ha kovi kiate kimoutolu ke tauhi ʻa Sihova, mou fai hoʻomou fili he ʻaho ni pe ko hai te mou tauhi ki ai . . . Ka ko au mo hoku fale te mau tauhi ʻa Sihova.” (Sios. 24:15) Ko e hā ʻa e tāpuaki naʻá ne maʻu mo e faʻahinga naʻe ʻiate iá? Naʻe fakaʻatā kinautolu ke hū ki he Fonua ʻo e Talaʻofá, ʻa ia “ko e fonua ʻoku mahutafea ʻi he huʻakau mo e honi.”—Sios. 5:6.

KAPAU TE KE FAI HA NGAAHI FILI FAKAPOTOPOTO, ʻE TĀPUAKIʻI KOE

16, 17. Ko e hā ʻa e ngaahi ʻaonga ʻe lava ke tau maʻu ʻi he taimi ʻoku tau fili ai ke fai ʻa e meʻa ʻoku loto ʻa Sihova ke tau faí?

¹⁶ Ko ha tokoua toki papitaiso ʻe taha mo hono uaifí naʻe ʻi ai ʻena fānau iiki ʻe toko tolu. Naʻe ʻikai ke fuʻu totongi lelei ʻene ngāué, ka naʻá ne fili ia koeʻuhí ke ʻoua te ne ngāue ʻi he fakaʻosinga uiké kae lava ke maʻu ʻa e ngaahi fakatahá pea kau ʻi he ngāue fakafaifekaú mo hono fāmilí. ʻI he ʻaho ʻe taha, naʻe fokotuʻu ange ʻe ha kaungāngāue ke ne hiki mo e tokouá ki ha kautaha ʻe taha ʻoku totongi lelei ange pea te na maʻu ai mo ha ngaahi ʻaonga lahi kehe. Naʻe fakakaukau mo lotu ʻa hotau tokouá fekauʻaki mo e filí. Naʻá ne ʻiloʻi ngalingali ʻe ʻi ha vahaʻa taimi fuoloa ki muʻa ke ne lava ʻo ʻikai ngāue ʻi he fakaʻosinga uiké kapau te ne fili ʻa e ngāue foʻoú. Ko e hā naʻá ke mei faí?

¹⁷ Hili ʻa e fakakaukau fekauʻaki mo e anga hono uesia ʻe he fili ko ení hono vahaʻangatae mo Sihová, naʻe ʻikai ke ne tali ʻa e ngāue totongi lahi ange ko iá. ʻOkú ke fakakaukau naʻá ne fakaʻiseʻisa ki mui ʻi heʻene fai ʻa e fili ko ení? ʻIkai ʻaupito. ʻI he ʻikai ke fakakaukau pē fekauʻaki mo hono maʻu ha paʻanga lahi angé, naʻá ne ongoʻi ʻoku mahuʻinga ange kiate ia mo hono fāmilí ke malava ʻo ʻunuʻunu ofi kia Sihova. Naʻe fiefia ʻaupito ʻa e tokouá mo hono uaifí ʻi he taimi naʻe tala ange ai ʻe hona ʻofefine taʻu hongofulú, ʻokú ne ʻofa ʻi heʻene ongo mātuʻá, ʻofa ʻi he fanga tokouá mo e fanga tuofāfiné, pea ʻofa lahi ʻaupito kia Sihova. Naʻá ne pehē ʻokú ne loto ke fakatapui ʻene moʻuí kia Sihova pea hoko ʻo papitaiso. Naʻá ne maʻu ʻaonga mei he faʻifaʻitakiʻanga lelei ʻene tangataʻeikí ʻi hono fakamuʻomuʻa ʻa e lotu ʻa Sihová ʻi heʻene moʻuí.

18. Ko e hā ʻoku mahuʻinga ai ke fai ʻa e ngaahi fili fakapotopoto ʻi he ʻaho kotoa pē?

¹⁸ Hangē pē ko hono tataki ʻe Mōsese ʻa e kau ʻIsilelí ʻi he toafá, ko Sīsū Kalaisi kuó ne tataki ʻa e kakai ʻa e ʻOtuá ʻi he fokotuʻutuʻu ʻa Sētané ʻi he laui taʻu lahi. ʻE vavé ni ke fakaʻauha ia. Pea hangē pē ko hono tataki ʻe Siosiua ʻa e kakai ʻIsilelí ki he Fonua ʻo e Talaʻofá, ko Sīsū te ne tataki hono kau muimuí ki he māmani foʻou kuo talaʻofá, ʻa ia ʻe ʻi ai ʻa e māʻoniʻoní. (2 Pita 3:13) Koeʻuhi ʻoku ofi ʻaupito ʻa e ʻaho ko iá, ʻe taʻefakapotopoto ia kia kitautolu ke foki ki heʻetau fakakaukau, ngaahi tōʻonga, ngaahi tuʻunga, mo e ngaahi taumuʻa motuʻá. ʻOku fiemaʻu ke tau mahinoʻi ʻo toe māʻalaʻala ange ʻa e founga ʻoku loto ʻa e ʻOtuá ke tau moʻuiʻakí. (Loma 12:2; 2 Kol. 13:5) Fai ʻa e ngaahi fili fakapotopoto, pea hoko ko e faʻahinga tokotaha ʻe tāpuakiʻi ʻe Sihova ʻo taʻengatá.—Lau ʻa e Hepelū 10:38, 39.

[Fakamatala ʻi lalo]

[Fakatātā ʻi he peesi 22]

[Fakatātā ʻi he peesi 24]

ʻI he taimi ʻoku tau fai ai ʻa e ngaahi fili totonu ʻi he moʻui fakaʻahó, ʻoku tau akoʻi ai ʻetau mafai ʻiloʻiló (Sio ki he palakalafi 11)

[Fakatātā ʻi he peesi 26]

Fai ʻa e ngaahi fili fakapotopoto pea maʻu ʻa e fiefia ʻi he lotolotonga ʻo e kakai ʻa e ʻOtuá (Sio ki he palakalafi 18)