Ngaahi Palōveepi Faka-ʻĀkana—Ko ha Sioʻata ʻi he Tōʻonga Fakasōsialé

MEI HE TOKOTAHA-TOHI ʻĀ HAKE! ʻI KANA

KO E HĀ ʻa e palōveepi? ʻOku fakamatalaʻi ʻe ha tikisinale ʻe taha ko e palōvēpí “ko ha sētesi nounou ia ʻoku faʻa lave ki ai ʻa e kakaí, ʻa ia ʻoku ʻomai ai ʻa e faleʻi pe tala atu ai kia koe ha meʻa fekauʻaki mo e moʻuí.” Ko e kau ʻIolapa ʻo Naisīliá ʻoku nau fakaʻuhinga mālie ange ha palōveepi, ʻo ui ia “ko ha hoosi ʻa ia ʻe lava ke ne ʻave vave ha taha ki hono ʻiloʻi ʻo e ngaahi fakakaukaú.”

Ko e mahuʻinga ʻo e ngaahi palōvēpí, pe ngaahi lea fakapalōvēpí, ʻoku fakahaaʻi ia ʻi he palōveepi ko ení, ʻa ia ʻoku ʻiloa ʻe he kakai lea faka-ʻĀkana ʻo Kaná: “Ko ha tokotaha poto ʻoku lea ki ai ʻi he ngaahi palōvēpí, ʻikai ʻi he lea anga-mahení.” Ko e poiní ko e tokotaha potó ʻoku ʻikai te ne fiemaʻu maʻu pē ha malanga koeʻuhi ke fakatuipauʻi ai ia ki he meʻa ʻoku totonu ke faí. Ko ha palōveepi feʻungamālie ʻokú ne ueʻi ʻa e fakakaukaú, ʻomai ʻa e mahinó, pea lava ke ne ueʻi ha taha ke ne fai ʻa e meʻa ʻoku totonú.

ʻI Kana, ʻoku ngāueʻaki lahi ai ʻa e ngaahi palōvēpí lolotonga ʻa e ngaahi kātoanga malí mo e ngaahi putú pea ʻoku fakaeʻa ia ʻi he ngaahi fasi tukufakaholó. ʻOku ʻikai foki ala tuku ia ʻi he ngaahi lāulea fakapuleʻangá. ʻOku faʻa ngāueʻaki pōtoʻi ʻe ha tangata lea pe ko ha talafekau ʻa e ngaahi palōvēpí.

ʻI he sōsaieti faka-ʻĀkaná, ko e pōtoʻi ʻi hono ngāueʻaki ʻa e ngaahi palōvēpí ko ha fakaʻilonga ia ʻo e poto. Ko e meʻa ʻoku mālié, ʻi he Tohitapú, ko Tuʻi Solomone—ʻa ia ko ha tangata naʻe ongoongoa ʻi hono potó, ʻiló, mo e alea fakapuleʻangá—naʻe pehē naʻá ne ʻiloʻi ʻa e ngaahi palōveepi ʻe 3,000. Ko e moʻoni, ko e ngaahi palōveepi faka-Tohitapú naʻe fakamānavaʻi fakaʻotua ia pea ʻoku moʻoni maʻu pē, ʻo ʻikai hangē ko e ngaahi palōveepi makatuʻunga ʻi he taukei mo e vavanga fakaetangatá. Ko e ngaahi palōveepi fakaetangatá, neongo ai pē pe ʻoku fēfē ʻa ʻene fakapotopotó, ʻoku ʻikai ʻaupito totonu ke fakamahuʻingaʻi tatau ia mo e palōveepi ʻi he Tohitapú. Ka tau sio angé ki ha ngaahi palōveepi faka-ʻĀkana ʻe niʻihi.

Fakakaukau Fekauʻaki mo e ʻOtuá

ʻI Kana, ʻoku faʻa fakahaaʻi ʻi he ngaahi lea fakapalōvēpí ʻa e ʻi ai ʻa e ʻOtuá, pea ʻoku tapua mai eni ʻi he ngaahi palōveepi faka-ʻĀkana lahi. Ko e ngaahi fakakaukau fakaʻikaiʻi-ʻOtuá ʻoku ʻikai ke ʻi he filōsofia faka-ʻĀkaná ia. Ko e fakatātaá, ʻoku pehē ʻi ha palōveepi ʻe taha: “ʻOku ʻikai fakahaaʻi ʻe ha taha ʻa e ʻOtuá ki ha kiʻi tama.” Ko e ʻi ai ʻa e ʻOtuá ʻoku mātuʻaki hā mahino ia ʻo aʻu ki ha kiʻi tama. ʻOku faʻa ngāueʻaki ʻa e palōveepi ko ení ʻi he felāveʻi mo ha meʻa ʻe ʻilo fakanatula ʻe ha kiʻi tama ʻo ʻikai loko fakahinohinoʻi.

ʻOku pehē ʻe ha toe palōveepi faka-ʻĀkana ʻe taha: “Kapau te ke hola mei he ʻOtuá, ʻokú ke kei ʻi he malumalu pē ʻoʻoná.” Ko ia ai, ko hano kākaaʻi pē ʻe ia ia ʻe ha taha ʻoku feinga ke ne tukunoaʻi ʻa e ʻOtuá. ʻI he taimi fuoloá, naʻe ʻomai ai ʻe he Tohitapú ha poini meimei tatau, ʻi heʻene pehē ko e fofonga ʻo e ʻOtuá “ʻoku ʻi he potu kotoa pe: he taulama ʻa e lelei mo e kovi.” (Palovepi 15:3) Te tau fai kotoa ha fakamatala ki he Māfimafi-Aoniú.

Fakahāhā ʻo e Ngaahi Tōʻonga mo e Meʻa Mahuʻinga Fakasōsialé

Hangē ko ia ʻoku moʻoni ʻi he ngaahi palōveepi mei he ngaahi tōʻonga fakafonua kehé, ko e ngaahi palōveepi faka-ʻĀkaná ko ha feleoko ia ʻo e ngaahi tōʻonga mo e meʻa mahuʻinga fakasōsialé. Hangē ko ení, ko e mālohi ʻo e foʻi lea ʻoku leaʻakí ʻoku fakaeʻa lelei ia ʻi he fakatātā ko ení: “Ko ha lapavale ʻoku kovi ange ia ʻi ha hekea ʻa e vaʻé.” Ko ha ʻelelo taʻemapuleʻi ʻe lava moʻoni ke ne fai ʻa e maumau lahi pea te ne ʻomai moʻoni ha faikehekehe ʻi he vahaʻa ʻo e moʻuí mo e maté.​—Palovepi 18:21.

Kae kehe, ʻi hono mapuleʻí, ʻe lava ke hoko ʻa e ʻeleló ko ha meʻa fakamelino moʻoni, hangē ko ia ʻoku fakamoʻoni ki ai ʻa e leá, “ʻI he ʻi ai ʻa e ʻeleló, ʻoku ʻikai kē ai ʻa e nifó.” Ko e poini ʻi hení ko e pehē ʻe lava ke fakaleleiʻi ʻi he melino ʻa e vā ʻo e ongo faʻahi feʻauhí—tau pehē, ko ha tangata mo hono uaifí—fakafou ʻi ha fetalanoaʻaki anga-mokomoko. Pea naʻa mo e ʻikai ola lelei ení, ko e ngāueʻaki pōtoʻi ʻo e ʻeleló ʻi he fakaleleí ʻe lava ke ne taʻofi ʻa e fepakí.

Poto ʻAonga

Ko e mahuʻinga ʻo e ʻiloʻiló mo e tomuʻa fakakaukaú ʻoku fakahaaʻi mahino ia ʻi ha ngaahi lea fakapalōveepi lahi ʻoku fakamamafaʻi ai ʻa e poto ʻaongá. Ko ha tokotaha loto-ʻoho mo vakavakamuʻa ʻoku ʻikai lava ke ne fakakaukau ki he ngaahi nunuʻa ʻo ʻene ngāué ʻe lava ke ne maʻu faleʻi mei he fakahinohino fakapalōveepi ko ení, “ʻUluaki kumi ha hala ke hola ai ki muʻa ke fakamataliliʻi ʻa e ngata kōpelá.”

Ko ha mātuʻa ʻokú ne fakatokangaʻi ha ngaahi tōʻonga kovi ʻi ha kiʻi tama te ne loto ke tokanga ki he palōveepi ko ení, “Kapau te ke fakatokangaʻi ha fuʻu vaʻa lōloa ʻe lava ke mahoka ai ho matá, ʻokú ke taʻaki fuʻu ia, ʻoku ʻikai te ke fakamata ia.” ʻIo, ko ha anga pē ʻoku kovi, ʻoku totonu ke taʻaki fuʻu ia—pe fakaʻauha—ki muʻa ke hoko ki ha faingataʻa moʻoní.

Lau ki he Ngaahi Anga Fakafonuá mo e Ngaahi Tōʻongá

ʻI he taimi ʻe niʻihi ʻoku fiemaʻu ke mahinoʻi ha tōʻonga fakafonua ke maʻu ai ʻa e ʻuhinga ʻo ʻene palōvēpí. Ko e fakatātaá, ʻi he lotolotonga ʻo e kau ʻĀkaná ʻoku vakai ki ai ko e ngaahi anga ia ʻoku kovi ke fakaʻilongaʻaki ʻa e nima toʻohemá ʻi he ʻi ai ʻa e niʻihi kehé, tautefito ki he faʻahinga taʻumotuʻá. Ko e lao ko eni ʻo e anga-fakaʻapaʻapá ʻoku lau ki ai ʻi he palōveepi, “ʻOku ʻikai te ke ngāueʻaki ʻa e nima toʻohemá ke tuhuʻi ʻa e hala ki ho koló.” Ko hono toe fakalea ʻe tahá, ʻoku totonu ke fakamahuʻingaʻi ʻe ha taha ʻa e meʻa ʻokú ne maʻú, ʻo kau ai hono tupuʻangá.

Ko ha palōveepi ʻoku lau ai ki he tōʻonga kai tukufakaholó ʻi ha ʻapi ʻĀkana anga-maheni ʻoku pehē ai: “Ko ha kiʻi tama ʻoku ako ke fanofanó ʻoku kai fakataha ia mo e kau taʻumotuʻá.” ʻI he ngaahi taimi kaí, ko e ngaahi mēmipa ʻo e fāmilí ʻoku fakakulupu ia makatuʻunga ʻi he taʻumotuʻá. Kae kehe, ko ha kiʻi tama ʻoku ʻulungaanga lelei, tautefito ʻi he tafaʻaki fekauʻaki mo e maʻa fakaesinó pea anga-fakaʻapaʻapá, ʻe hiki hake nai ia ke kai fakataha mo ʻene tamaí mo e kakai lalahi kehé ʻi heʻenau tēpilé. ʻOku fakamamafaʻi ʻe he palōvēpí ʻa e poini ko hono fakaʻapaʻapaʻi ʻo ha tahá ʻoku fakapapauʻi lahi ange ia ʻi hono ʻulungāngá ʻo ʻikai ʻi hono taʻumotuʻá.

ʻOkú ke fakakaukau ke mali? Fakakaukau leva ki he palōveepi faka-ʻĀkana ko ení, “Ko e malí ʻoku ʻikai ko ha uaine paame ia ke ʻahiʻahiʻi.” Ko e kau fakatau atu ʻo e uaine pāmé, ko ha inu fakatoka ia ʻoku ngaohi mei he fuʻu pāmé, ʻo fakaʻatā lahi ai ki he faʻahinga ʻoku nau teu ke fakataú ke nau ʻahiʻahiʻi ia ki muʻa ke fakapapauʻi ʻa e lahi te nau fakataú pe ʻe fakatau ha meʻa pe ʻikai. Kae kehe, ko e malí ʻe ʻikai lava ke ʻahiʻahiʻi pehē ia. Ko e palōveepi ko ení ʻoku fakaeʻa ai ʻa e tuʻuloa ʻo e haʻi fakaemalí pea mo e tuʻunga ʻoku ʻikai ala tali ʻo e mali ʻahiʻahí.

Vakai Fakaanga ki he Ngaahi Meʻá

Ko e ngaahi lea fakapalōveepi lahi ʻoku fakamoʻoniʻi ai ʻa e ngaahi vakai vēkeveke ʻoku fai ʻe he fanga kui ʻĀkaná ki he kakaí mo e fanga manú. Ko e fakatātaá, ko ha sivisiviʻi ofi ʻo ha motuʻa moa mo hono fāngangá, naʻe tupu mei ai ʻa e palōveepi ko ení, “Ko ha ʻuhikiʻi moa ʻoku tuʻu ʻi he tafaʻaki ʻo ʻene faʻeé ʻokú ne maʻu ʻa e alanga ʻo e heʻé.” Ko e hā hono ʻuhingá? Kapau ʻe fakamavaheʻi ʻe ha tokotaha ia, ʻoku ngalongofua ai ia ʻi he hoko mai ki hono vahevahe ʻa e ngaahi meʻa leleí.

Ko ha taha pē ʻokú ne vakai ki ha kiʻi poto ʻe ʻikai te ne taʻemahinoʻi ʻa e moʻoni ʻo e lea, “Ko e lōloa kakato ʻo e potó ʻoku hā ia ʻi heʻene maté.” ʻOku faʻa lave ki he palōveepi ko ení ʻi he taimi ʻoku ʻikai ke fakamahuʻingaʻi ai ha tahá. ʻI ha tuʻunga hangē ko ení, ko e tokotaha ʻoku ʻikai fakamahuʻingaʻí ʻoku fiemālie ia ʻi he moʻoniʻi meʻa ko ia ko e ʻikai te ne ʻi aí ʻe ʻoatu nai ai ʻa e faingamālie ki he kakaí ke nau sio kakato ai ki hono ngaahi ʻulungaanga leleí.

Ngaahi Palōveepi ʻi he “Faʻunga Fakanounoú”

Neongo ko e ngaahi palōveepi faka-ʻĀkaná kuo tukuʻau mai ia mei he toʻutangata ki he toʻutangata ʻi hono leaʻakí, kuo fakatolonga ʻa e ngaahi lea lahi ʻi he tā fakatātā fakaefakaʻilongá. Ko e tā fakatātā peheé ʻoku hā ia ʻi he ngaahi tā tongitongi mei he ʻakaú, ngaahi tokotoko, ngaahi meʻafua koulá, mo e ngaahi vala tukufakaholo pea pehē ki he ngaahi tisaini tupenu ʻi onopōní. Ko e kau ʻaʻahi ki he fale ʻaati ʻi Kaná ʻoku nau sio nai ai ki he ngaahi fakatātā ʻo ha tangata ʻoku kaka ʻi ha fuʻu ʻakau lolotonga ʻoku tokoniʻi ia ʻe ha tangata ʻe taha. Ko e tatau fakatātā ia ʻo e foʻi palōveepi ko ení, “Kapau ʻokú ke kaka ʻi ha fuʻu ʻakau lelei, ʻe tekeʻi hake nai koe.” Ko e pōpoaki tefitó ʻoku hā mahino—kapau ʻokú ke tuli ki ha ngaahi taumuʻa ʻaonga, ʻe fai nai hano tokoniʻi koe.

ʻOku faʻa ʻomai ʻi he ngaahi putú ʻa e taimi ki he meʻa ʻoku ui ʻe ha faʻu-tohi ʻe taha ko e “lea ki he valá.” Ko e ʻatimosifia fakamamahi ʻo e meʻa ʻoku hokó ʻoku fiemaʻu moʻoni ai ha fakakaukau fakalaulauloto ki he moʻuí. Ko ia ai, ko e ngaahi tisaini ʻoku hā ʻi he ngaahi vala putú ʻoku fakahaaʻi ai ʻa e ngaahi pōpoaki fakataha mo e ʻuhinga loloto fakafilōsofia. Ko e fakatātaá, ko ha vala ʻoku fakahaaʻi ai ha tuʻunga pe ko ha sitepu ʻoku fakamanatu mai ai ʻa e palōveepi, “ʻOku ʻikai ke kaka tokotaha pē ha foʻi tokotaha ʻi he tuʻunga ʻo e maté.” a ʻOku fakatokanga ʻa e meʻá ni ki he tokotaha kotoa ke vakai fakatōkilalo fekauʻaki mo kinautolu pea ʻoua ʻe moʻui ʻo hangē ʻoku nau ʻatā mei he maté.​—Koheleti 7:2.

ʻI he sōsaieti faka-ʻĀkaná, ko e kau talafekau pe kau tangata lea maʻá e kau pule tukufakaholó ʻoku nau mātuʻaki pōtoʻi ʻi hono ngāueʻaki lelei ʻa e ngaahi palōvēpí, pea ʻoku nau toe toʻo ha tokotoko fakalakanga fakataha mo e ngaahi tisaini ʻoku fakahaaʻi ai ʻa e tuʻunga mahuʻinga fakakoloa ʻo e kakaí. Hangē ko ení, ko ha manupuna ʻokú ne puke ʻa e ʻulu ʻo ha ngata ko e “faʻunga fakanounou” ia ki he lea, “Kapau ʻokú ke puke ʻa e ʻulu ʻo ha ngata, ko hono toengá ko ha maea pē ia.” Ko e hā ʻa e pōpoaki ʻoku ʻomai aí? Fekuki mālohi mo e ngaahi palopalemá—ʻo fakahangatonu.

Founga Totonu Hono Ngāueʻaki ʻo e Palōvēpí

Hangē ko ia ʻi ha talanoa fakatātā pē, ko e taimi mo e founga ʻoku totonu ke ngāueʻaki ai ha palōvēpí ʻoku totonu ke fakatuʻunga ia fakatouʻosi ʻi he fakaʻuhingá pea mo e kau fanongó. Ko e fakaʻofoʻofa ʻo ha fakaʻuhinga ʻe lava ke fakameleʻi ia ʻi hono ngāueʻaki taʻetotonu ʻo e ngaahi palōvēpí. Pea koeʻuhi ʻi he ngaahi tōʻonga ʻe niʻihi ko e ngāueʻaki ʻo e ngaahi palōvēpí ʻoku faʻu ai ha tafaʻaki mahuʻinga ʻo e fetuʻutaki ʻi he founga totonú, ko hano ngāuehalaʻaki pē ʻe lava ke tākiekina ai ʻa hono fakamāuʻi ʻe he kakaí ʻa e tokotaha malangá ʻi ha founga ʻoku ʻikai lelei.

ʻI Kana, ko e kau mātuʻa ʻo e sōsaietí ʻoku vakai ki ai ko e kau faʻu-tohi mo e kau fakatolonga ʻo e ngaahi palōvēpí. Ko ia, ko e ngaahi lea fakapalōvēpí ʻoku faʻa muʻomuʻa ia ʻi he kupuʻi lea, “ʻOku pehē ʻe heʻemau kau taʻumotuʻá . . .” Pea ʻi ha tuʻunga ʻa ia ʻoku talanoa ai ʻa e tokotaha leá ki ha kau fanongo taʻumotuʻa lahi angé, ʻoku anga-fakaʻapaʻapa ke muʻomuʻa ʻa hono ngāueʻaki ʻo ha palōveepi fakataha mo e kupuʻi lea, “Ko kimoutolu kau taʻumotuʻá ʻoku mou pehē . . .” ʻI he fakaʻapaʻapá, ʻoku ʻikai loto ha tokotaha lea kei siʻi ke hā ʻokú ne akoʻi ki hono kau taʻumotuʻá ʻa e ngaahi lea ʻo e potó ʻa ia ʻoku fakasino mai ʻi he palōvēpí.

Ngaahi Vakai ʻOku Mahuʻinga

ʻOku lava ke muʻomuʻa pe hoko atu ʻa e ngaahi palōvēpí ʻi ha fakaʻuhinga. Pehē foki, ʻe lava ke fakahūhū pōtoʻi ia ʻi ha fakaʻuhinga ʻa ia ʻe fiemaʻu nai ai ʻe ha taha ʻa e vavangá ke ʻiloʻi ʻa e lea heliakí. Ko e fakatātaá, fekauʻaki mo ha tokotaha anga-fakatōkilalo mo ʻofa he melinó, ʻe pehē nai ʻe ha ʻĀkana: “Kapau naʻe fakatuʻunga ʻia Meʻa-mo-meʻa pē, ʻe ʻikai ha fana meʻafana ʻi he koló ni.” ʻOku fakamanatu mai heni ʻa e palōveepi, “Kapau naʻe tuku pē ia ki he ʻelili vaó mo e fonú, ʻe ʻikai ha fana meʻafana ʻi he vaó.” ʻOku vakai ki he ongo meʻamoʻuí fakatouʻosi ʻokú na anga-vaivai ʻikai fiehā pea ʻikai hehema ke fakafepaki. Ko e kakai ʻoku nau maʻu ʻa e ngaahi ʻulungaanga ko ení ʻoku nau fakatupu melino.

Kae kehe, kapau ʻokú ke fiemaʻu ha ʻĀkana ke ne lau maʻuloto ha ʻotu palōveepi, te ne tali mai ʻaki nai ha palōveepi ʻe taha pē, “ʻE ʻikai lava ke ʻi ai ha misi ʻi he ʻikai ha mohé.” ʻI hono fakalea ʻe tahá, ʻe ʻikai lava ke ngāueʻaki ʻe ha taha ha ngaahi palōveepi ʻi he ʻikai ʻi ai ha tuʻunga feʻungamālié ʻo hangē pē ia ko e ʻikai lava ke misi ha taha lolotonga ʻene ʻāʻaá. ʻOku fakapapauʻi ʻe he ngaahi tuʻungá ʻa hono ngāueʻakí.

[Fakamatala ʻi lalo]