FEHUʻI ʻA E TOʻUTUPÚ . . .

Ko e Hā Hono Kovi ʻo e Sāuní?

“Naʻá ne fakaʻitaʻi au.”—Conneel, taʻu 15, nofo pilīsone ko e fakapō.

Ko Andrew, taʻu 14 ʻa ia naʻá ne fakapoongi ha faiako ʻi ha hulohula fakaako, naʻá ne taukaveʻi ʻa ʻene fehiʻa ki he kau faiakó mo ʻene ongo mātuʻá pea ʻita ʻi hono fakataleʻi ia ʻe he tamaiki fefiné.

ʻOKU ui ia ʻe he makasini Time “ko ha sīpinga fakatupu-mate.” Ko hano ʻave fakafufū ʻe ha talavou ʻoku ʻita ha meʻafana ki hono ʻapiakó pea kamata ke ne fana ʻa hono kaungāakó mo e kau faiakó. Ko e ngaahi meʻa fakamamahi ʻoku hoko peheé kuo kamata ke hā lahi ʻaupito ia ʻi he ʻIunaite Seteté ʻo fakamatalaʻi ai ʻe ha netiueka faiongoongo TV ʻe taha ʻa e sīpingá ni “ko ha mapuna lahi fau ʻa e fakamālohí.”

Ko hono leleí, ko e ngaahi fana ʻi he ʻapiakó ʻoku kei tātātaha pē ʻene hokó. Naʻa mo ia, ko e ngaahi faihia ki muí ni ʻi he lilí ʻoku hā mei ai ʻa e lahi tofu pē ko ia ʻoku aʻu moʻoni ki ai ʻa e ʻita ʻa e toʻutupu ʻe niʻihi. Ko e hā ʻoku ngalingali ke ne fakatupunga ʻa e ngaahi fakahāhā fakamālohi pehē ʻo e ongoʻí? Ko e niʻihi ʻo e toʻutupú ni, ʻoku hā mahino naʻa nau loto-lili ʻi heʻenau hokosia ʻa e fakamaau taʻetotonu pe ko e ngāuehalaʻaki ʻo e mafaí ʻi he pule ʻa e kakai maʻu mafaí. ʻOku hā mai naʻe fakaʻitaʻi ʻa e niʻihi ʻe he fakamatalili taʻetuku mei honau toʻumeʻá. Ko ha tamasiʻi taʻu 12 ʻa ia naʻá ne fanaʻi ha kaungāako—pea toki hoko kiate ia tonu—naʻe fakamataliliʻi ia ko ʻene fuʻu sinó.

ʻOku moʻoni, ko e toʻutupu tokolahi naʻe ʻikai ʻaupito nai te nau fakakaukau fakamātoato ke kau ʻi ha fakamālohi tōtuʻa pehē. Ka neongo ia, ko hono tauʻi ʻa e ongoʻi loto-mamahi mo e loto-lavea ʻoku ʻalu hake ʻi hoʻo hoko ʻo maʻukovia ʻi he tāufehiʻa fakamatakalí, houtamakí pe fakamatalili anga-fakamamahí ʻoku ʻikai faingofua. ʻI he fakakaukau atu ki hono ngaahi ʻaho akó, ʻoku pehē ʻe Ben: “Naʻá ku nounou maʻu pē au ʻi he tokolahi taha ʻo e kau leka ʻi hoku toʻú. Pea koeʻuhi naʻe kosi nonou ʻaupito hoku ʻulú, naʻe toutou fakamataliliʻi maʻu pē au ʻe he kau leka kehé pea paaʻi hoku foʻi ʻulú. Naʻe ʻai au ʻe he meʻá ni ke u ʻita lahi. Ko e meʻa naʻá ne ʻai ke toe kovi angé, ko ʻeku ʻalu atu ko ia ke kumi tokoni mei he kakai maʻu mafaí, naʻe halaʻatā haʻanau tokanga mai. Naʻa nau ʻai ke toe lahi ange ai ʻeku ʻitá!” ʻOku tānaki mai ʻe Ben: “Ko e meʻa pē naʻá ne taʻofi au mei hono maʻu ha meʻafana pea fana ʻa e kakai ko ení ko e moʻoniʻi meʻa ko ia ʻo e ʻikai te u maʻu ha meʻafaná.”

ʻOku totonu ke fēfē hoʻo vakai ki he toʻutupu ʻoku nau kumi ke fakamamahiʻi ʻa e faʻahinga kuo nau fakalotomamahiʻi kinautolú? Pea ko e hā ʻoku totonu ke ke faí kapau ʻokú ke hoko tonu ʻo maʻukovia ʻi hono ngaohikoviʻí? ʻI hono talí, fakakaukau atu ki he meʻa ʻoku leaʻaki ʻe he Folofola ʻa e ʻOtuá.

Mapuleʻi-Kitá—Ko ha Fakaʻilonga ʻo e Mālohi!

Ko e ngaohikoviá mo e fakamaau taʻetotonú ʻoku ʻikai ʻaupito ke foʻou. Naʻe ʻomai ʻe ha tokotaha-hiki Tohitapu ʻe taha ʻa e faleʻi ko ení: “Tukuange ʻa e ʻitá pea liʻaki ʻa e lilí; ʻoua ʻe fakahaaʻi ʻokú ke tafunaki ʻa koe tonu koeʻuhi pē ke fai ha kovi.” (Sāme 37:​8, NW) ʻOku faʻa hoko lahi maʻu pē, ko e lilí ʻoku kau ki ai ʻa e ʻikai ha mapuleʻi-kitá pea ʻoku fakahaaʻi ia ʻo ʻikai ha tokanga ki hono ngaahi nunuʻá. Ko hono fakaʻatā kita ke hoko ʻo “tafunaki” ʻe lava ke iku ia ki ha mapuna hake ʻa e lilí! Ko e hā nai ʻe iku ki aí?

Fakakaukau ki he faʻifaʻitakiʻanga faka-Tohitapu ʻa Keini mo ʻĒpelí. Naʻe “ʻita ʻaupito ʻa Keini” ki hono tehina ko ʻĒpelí. Ko hono ikuʻangá, “lolotonga ʻena ʻi ʻuta naʻe tuʻu ʻa Keini kia Epeli ko hono tehina, ʻo ne tamateʻi ia.” (Senesi 4:​5, 8) Ko e fakatātā ʻe taha ʻo e lili taʻemapuleʻí ʻoku fekauʻaki ia mo e tuʻi ko Saulá. ʻI he meheka ki he lavameʻa fakakautau ʻa e talavou ko Tēvitá, naʻá ne mātuʻaki tolo taoʻi ai ʻo ʻikai ko Tēvita pē kae toe pehē ki hono foha tonu ko Sionatané!—1 Samiuela 18:11; 19:10; 20:​30-34.

Ko e moʻoni, ʻoku ʻi ai ʻa e taimi ʻoku totonu ai ʻa e ʻitá. Ka naʻa mo ia, ʻe lava ke iku kovi ʻa e ʻita totonú kapau ʻoku ʻikai ke mapuleʻi. Ko e fakatātaá, naʻe maʻu moʻoni ʻe Simione mo Līvai ʻa e totonu ke na ʻita kia Sīkemi ʻi heʻena ʻilo naʻá ne tohotohoʻi hona tuofefine ko Tainá. Ka, ʻi he ʻikai ke nofo nonga peé, naʻá na tafunaki ʻa e ʻita fakamālohí, ʻo hangē ko hono fakahaaʻi ʻe heʻena ngaahi lea ki muí: “He ko e pehē koā ke ne fai ki homa tuofefine ʻo hangē ko ha fefine feʻauaki ia.” (Senesi 34:31) Pea ʻi he fakautuutu ʻo lahi ʻena ʻitá, naʻá na “toʻo ʻena heleta, ʻo na hu taʻemanavahe ki he kolo, ʻo na taaʻi ʻa e tangata kotoa pe” naʻe nofo ʻi he kolo ʻo Sīkemí. Ko ʻena lilí naʻe pipihi atu ia koeʻuhi ko e “ngaahi foha [“kehe,” NW] ʻo Sekope” naʻa nau kau ʻi he ʻoho fakaefakapō ko iá. (Senesi 34:​25-27) Naʻa mo e ngaahi taʻu ki muí, ko e tamai ʻa Simione mo Līvaí, ʻa Sēkope naʻá ne fakahaaʻi ʻa e kovi ʻo ʻena ʻita taʻemapuleʻí.—Senesi 49:​5-7.

Mei he meʻá ni, ʻoku tau ako ai ʻa e poini mahuʻinga: Ko e ʻita taʻemapuleʻí ko ha fakaʻilonga ia ʻo ʻikai ʻo e mālohi ka ʻo e vaivai. ʻOku pehē ʻe he Palovepi 16:32: “Ko ia ʻoku fakatotoka ki he ʻita ʻoku lelei hake ʻi ha fuʻu mafi: pea ko ia ʻoku puleʻi hono loto ʻi ha taha ʻoku hamu ha kolo.”​—Fakaʻītali ʻamautolu.

Ko e Fakavalevale ʻo e Sāuní

ʻOku ʻomi leva ʻe he ngaahi Konga Tohitapú ʻa e faleʻi ko ení: “Neongo pe ko hai, ʻoua te mou totongi ʻene kovi ʻaki ʻa e kovi . . . . ʻOua te mou sauni hoʻomou ngaahi meʻa.” (Loma 12:​17, 19) Ko e sāuní—pe ʻoku kau ai ha fakamamahi fakaesino pe ko e ngaahi lea fakatupu mamahi pē—ʻoku taʻefakaʻotua ia. ʻI he taimi tatau, ko e sāuni peheé ʻoku mātuʻaki taʻeʻaonga mo taʻefakapotopoto moʻoni ia. Ko e meʻa ʻe tahá, ʻoku faʻa iku ʻa e fakamālohí ki ha toe fakamālohi lahi ange. (Mātiu 26:52) Pea ko e ngaahi lea taʻeʻofá ʻokú ne faʻa fanauʻi mai ʻa e toe ngaahi lea taʻeʻofa lahi ange. Manatuʻi foki, ko e ʻitá ʻoku ʻikai faʻa ala fakatonuhiaʻi. Ko e fakatātaá, ʻe lava moʻoni ke ke ʻilo ko e tokotaha naʻá ne fakalotomamahiʻi koé ʻoku fehiʻa ʻiate koe? Naʻe hoko nai ia koeʻuhí pē naʻe taʻetokanga pe anga-taʻetokaʻi ʻa e tokotahá? Pea kapau naʻe kau ki ai mo e loto-koví, ʻoku ʻai moʻoni nai ʻe he tuʻungá ʻa e sāuní ko e meʻa totonu ia ke faí?

Fakakaukau ki he ngaahi lea faka-Tohitapu ʻi he Koheleti 7:​21, 22: “Ko e meʻa foki ki he ngaahi lea ʻoku fai ʻe he kakai, ʻoua naʻa tokanga ho loto ki ai, naʻa ʻiloange te ke fanongo ki hoʻo tamaioʻeiki ʻoku ne talakaaʻi koe. Seuke ʻoku ʻilo ʻe ho loto kuo tuʻo lahi ʻa e talakaaʻi ha kakai kehe ʻe koe foki.” ʻIo, ʻoku taʻefakafiemālie ke lea mai ʻaki ʻe he kakaí ha ngaahi meʻa ʻoku kovi ʻo fekauʻaki mo koe. Ka, ʻoku fakahaaʻi ʻe he Tohitapú ko ha meʻa ia ʻoku hoko moʻoni ʻi he moʻuí. ʻIkai ʻoku moʻoni, kuó ke leaʻaki nai ha ngaahi meʻa ʻo fekauʻaki mo e niʻihi kehé ʻa ia naʻe lelei ange ke ʻoua ʻe leaʻaki? Ko ia, ko e hā ke ke fuʻu hohaʻa ai ʻi hano leaʻaki ʻe ha taha ha meʻa taʻeʻofa ʻo fekauʻaki mo koe? ʻI he taimi lahi, ko e founga lelei taha ke fekuki ai mo e fakamatalilí ko e mātuʻaki tukunoaʻi pē.

ʻI he tuʻunga tatau, ʻoku taʻefakapotopoto ke fuʻu hohaʻa ʻi he taimi ʻokú ke ongoʻi ai kuo ngaohikoviʻi koé. ʻOku manatu ʻa e taʻu hongofulu tupu ko David ki he meʻa naʻe hoko ʻi haʻane vaʻinga pasiketipolo mo e niʻihi ʻo e kaungā Kalisitiané. “Naʻe tolongi ʻaki au ʻe ha taha mei he timi ʻe tahá ʻa e foʻi pulú,” ko e lau ia ʻa David. ʻI he vave ke fakaʻosiʻaki ko ha foʻi fai fakalotokovi ʻení, naʻe faisāuni ʻa David, ʻo ne tolongi fakafoki atu ʻa e foʻi pulú ʻaki ʻa e tokotaha vaʻinga ʻe tahá. “Naʻá ku fuʻu ʻita lahi ʻaupito,” ko e fakahā ia ʻe David. Ka ki muʻa ke toe kovi ange ʻa e meʻá, naʻe lotu ʻa David kia Sihova. Naʻá ne pehē hifo kiate ia tonu, ‘Ko e hā ʻoku ou faí, ko hoku lotó ia ke fuhu mo ha tokoua Kalisitiane?’ Ki mui ai, naʻá na fefakamolemoleʻaki.

ʻI he ngaahi tuʻunga peheé, ʻoku lelei ke manatu ki he faʻifaʻitakiʻanga ʻa Sīsū Kalaisí. “ʻI hono leakovia naʻe ʻikai te ne tali ʻaki ha leakovi; ʻi hono ngaohikoviʻi naʻe ʻikai te ne fakamana.” (1 Pita 2:23) ʻIo, ʻi hoʻo loto-mafasiá, ʻi he ʻoua leva ʻe fai ha meʻá, lotu ki he ʻOtuá ʻo kole kiate ia ke ne tokoniʻi koe ke ke tauhi maʻu ʻa e mapuleʻi-kitá. Te ne nima-homo ʻo “foaki ʻa e Laumālie Māʻoniʻoni kiate kinautolu ʻoku kole kiate ia.” (Luke 11:13) ʻI he ʻoua ʻe faisāuni ʻi hano fakalotomamahiʻi koe ʻe ha tahá, ko e meʻa nai ke faí ko hoʻo fakaofiofi ki he tokotaha ko iá pea mo talanoa fekauʻaki mo ia. (Mātiu 5:​23, 24) Pe, kapau ko koe ʻoku maʻukovia ʻi ha faʻahinga fakahohaʻa mafatukituki hokohoko, mahalo nai mei ha tamasiʻi ako houtamaki, ʻoua ʻe kumi ki ha fakafepaki ʻe lava ke hoko ko e fakamālohí. ʻI hono kehé, ʻoku fiemaʻu ke ke fou atu ʻi ha ngaahi sitepu ʻaonga ke maluʻi koe.a

Ko ha Talavou Naʻá Ne Liʻaki ʻa e Lilí

Kuo ngāueʻaki ʻe he toʻutupu tokolahi ʻa e ngaahi tefitoʻi moʻoni faka-Tohitapu ko ení ʻo ola lelei. Ko e fakatātaá, ko Catrina naʻe tuku atu ia ke ohi ʻi heʻene kei siʻí. ʻOkú ne pehē: “Naʻá ku maʻu ha palopalema fekauʻaki mo e lilí koeʻuhi naʻe ʻikai ke u mahinoʻi pe ko e hā naʻe liʻaki ai au ʻe heʻeku faʻē totonú. Ko ia, naʻá ku fakahanga ia ki heʻeku faʻē ohí. ʻI ha faʻahinga ʻuhinga fakavalevale, naʻá ku ongoʻi ai kapau te u fakalotomamahiʻi ia, ʻoku ou sāuniʻi moʻoni ai ʻi ha founga ʻa ʻeku faʻē totonú. Ko ia, naʻá ku fai ʻa e meʻa kotoa pē—lea kovi, ʻakafute mo e tōlili. Ko e haʻaki matapaá ʻa hoku manakó. Naʻá ku toe faʻa leaʻaki foki, ‘ʻOku ou fehiʻa ʻia koe!’—naʻá ku fai kotoa ia koeʻuhí naʻá ku fuʻu ʻita lahi ʻaupito. ʻI heʻeku vakai atu ki he kuohilí, ʻoku taʻemalava ke u tui naʻá ku fai ʻa e ngaahi meʻá ni.”

Ko e hā naʻe tokoni kia Catrina ke ne mapuleʻi ʻene ʻitá? ʻOkú ne tali: “Ko hono lau ʻo e Tohitapú! ʻOku mātuʻaki mahuʻinga eni koeʻuhi ʻoku ʻiloʻi ʻe Sihova ʻa e anga ʻo ʻetau ongoʻí.” Naʻe toe maʻu ʻe Catrina ʻa e fiemālie ʻi heʻene lau mo hono fāmilí ʻa e ngaahi kupu ʻo e ʻĀ Hake! ʻa ia naʻe fekauʻaki mo e tuʻunga tefito naʻe hoko ʻi hono fāmilí.b “Ko kimautolu kotoa, naʻe malava ke mau tangutu fakataha hifo ʻo mau taki taha mahinoʻi ʻemau ngaahi ongoʻí,” ko ʻene manatú ia.

Ko koe foki ʻe lava ke ke ako ke mapuleʻi ʻa e ngaahi ongoʻi lilí. ʻI he fetaulaki mo e fakamatalilí, houtamakí pe ngaohikoviá, manatuʻi ʻa e ngaahi lea ʻa e Tohitapú ʻi he Sāme 4:​4 (PM): “Mou manavahe, bea oua naa fai agahala.” (Fakaʻītali ʻamautolu.) Ko e ngaahi lea ko iá, ʻe lava ke ne tokoniʻi koe ke ke kalofi ai ʻa e ʻulutukua ki he lili fakatupu-ʻauhá.

[Fakamatala ʻi lalo]

[Fakatātā ʻi he peesi 15]

ʻI he taimi lahi, ko e founga lelei taha ke fekuki ai mo e fakamatalilí ko e mātuʻaki tukunoaʻi pē ia