Vahe 35

ʻOku Mahuʻinga ʻa e Meʻa ʻOku Ou Laú?

NAʻE fakatokanga ʻa Tuʻi Solomone: “ʻOku ʻikai hano ngataʻanga ʻo e faʻu tohi ke lahi, pea ko e faʻa lautohi ko e meʻa fakaongosia kakano.” (Koheleti 12:12) Naʻe ʻikai ke feinga ʻa Solomone ke fakalotosiʻi ʻa e lautohí; ko ʻene faleʻi atu pē ke ke filifili lelei.

Naʻe pehē ʻe he filōsefa Falanisē ʻo e senituli hono 17 ko René Descartes: “ʻI he taimi ʻoku lau ai ʻe ha taha ʻa e ngaahi tohi leleí ʻoku hangē ia haʻane pōtalanoa mo e kau tangata mei he ngaahi ʻātakai fakasōsiale lelei naʻe moʻui ʻi he kuohilí. Naʻa mo haʻatau ui ia ko ha pōtalanoa filifili lelei ʻa ia ʻoku fakamatalaʻi ai ʻe he faʻu-tohí ʻa ʻene ngaahi fakakaukau lelei tahá pē.” Kae kehe, ʻoku ʻikai ko e kau faʻu-tohi kotoa pē ʻoku ʻaonga ʻa e ‘talanoa’ mo iá, pehē ki he ʻikai ke “lelei” moʻoni ʻa e kotoa ʻo ʻenau ngaahi fakakaukaú.

Ko ia ʻoku toe ʻomai ai ʻa e tefitoʻi moʻoni Fakatohitapu ko eni ʻoku faʻa fai ʻa e lave ki aí: “ʻOku maumauʻi ʻa e ngaahi ʻulungaanga lelei ʻe he faʻa talanoa kovi,” pe feohi koví. (1 Kolinito 15:33) ʻIo, ko e kakai ʻokú ke feohi mo iá ʻe malava ke nau fakafuo ʻa ho angaʻitangatá. Kuó ke fakamoleki ha taimi lahi mo ha kaungāmeʻa ʻo ke ʻilo ai ʻoku kamata ke ke tōʻonga, lea pea naʻa mo e fakakaukau ʻo hangē ko ho kaumeʻá? Sai, ko hono lau ha tohi ʻoku hangē ia ko hano fakamoleki ha ngaahi houa ʻi he pōtalanoa mo e tokotaha naʻá ne hiki iá.

ʻOku kaungatonu ai ʻa e tefitoʻi moʻoni naʻe fakahā ʻe Sīsū ʻi he Mātiu 24:15: “ʻIlonga ha taha ʻoku lau, pea ke ne tokanga.” Ako ke ʻanalaiso mo fua-tautau ʻa e meʻa ʻokú ke laú. Ko e tangata kotoa pē ʻoku ʻi ai ʻene hehema ke anga-fakapalataha pea ʻoku ʻikai ke nau faitotonu fakaʻaufuli maʻu pē ʻi heʻenau fakahaaʻi mai ʻa e moʻoní. Ko ia ai, ʻoua te ke tali taʻetoefehuʻia ʻa e meʻa kotoa pē ʻokú ke lau pe fanongo aí: “Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.”—Palovepi 14:15.

ʻOku totonu ke ke tokanga tautefito ki hono lau ha faʻahinga meʻa pē ʻoku taukaveʻi ai ha filōsofia ʻo e moʻuí. Ko e fakatātaá, ʻoku fonu ʻa e ngaahi makasini ʻa e kau taʻu hongofulu tupú ʻi he ngaahi faleʻi ʻi he meʻa kotoa pē, mei he faialeá ki he fehokotaki fakasino ki muʻa ʻi he malí—ka ʻoku ʻikai maʻu pē ko ha faleʻi ia ʻoku totonu ke ngāueʻaki ʻe ha Kalisitiane. Pea fēfē ʻa e ngaahi tohi ʻoku fuʻu tō ki he ngaahi filōsofia ʻoku fehuʻia lahí?

ʻOku fakatokanga ʻa e Tohi Tapú: “Mou vakai naʻa faifai pea ai ha taha, te ne fai ʻaki ʻene poto fiefilosefa, ʻa ia ko e koto muna mo e kākā, ʻo ne holataki kimoutolu ʻi he ʻalunga ʻo e ngaahi tuʻutuʻuni fakaeonoʻaho ʻa e kakai . . . ʻo ʻikai ʻi he ʻalunga faka-Kalaisi.” (Kolose 2:8) Ko e Tohi Tapú mo e ngaahi tohi Fakatohitapu hangē ko ení, ʻokú ne ʻomai ʻe ia ʻa e faleʻi ʻoku lelei mamaʻo ange.—2 Timote 3:16.

Ngaahi Tohi Talanoa ʻEvá—ʻIkai ke Kovi Hono Laú?

Ko hono lau ʻo e ngaahi tohi talanoa ʻevá kuo hoko ia ko ha tōʻonga ʻokú ne maʻunimā ʻa e kakai ʻe toko 20 miliona ʻi he ʻIunaite Seteté ʻataʻatā pē. Ko e moʻoni ko e ʻOtuá tonu naʻá ne ʻai ki he tangatá mo e fefiné ʻa e holi ke feʻofaʻaki pea malí. (Senesi 1:​27, 28; 2:​23, 24) ʻOku ʻikai ai ko ha meʻa fakaʻohovale ʻa e hoko ʻo tuʻu-ki-muʻa ʻa e feʻofaʻakí ʻi he ngaahi talanoa faʻu lahi, pea ʻoku ʻikai ke kovi eni ia. Ko e ngaahi talanoa ʻeva ʻe niʻihi kuo aʻu ia ki he tuʻunga ʻo e faʻu tohi leleí. Ka koeʻuhi ko e ngaahi talanoa motuʻa ko ení ʻoku fakanānā ia ʻi he vakai ki he ngaahi tuʻunga ʻoku ngāueʻaki ʻi onopōní, kuo ʻiloʻi ki muí ni ʻe he kau faʻu-tohí ʻoku ʻaonga ange ke faʻu ke lahi ha faʻahinga foʻou ʻo e ngaahi talanoa ʻevá. ʻOku kei ngāueʻaki ʻe he niʻihi ʻa e ngaahi puipuituʻa ʻi he hisitōliá, pe ʻo e kuonga lotolotó ke tānaki atu ha tuʻunga fakamānako mo ha ongo ki he talanoá. Ko e niʻihi ʻoku fakaonopooni ʻa hono sīpingá mo e puipuituʻá. Kae kehe, ʻi ha fanga kiʻi kehekehe siʻi pē, ko e ngaahi talanoa ʻeva fakaeonopooni ko ení ʻoku muimui pē ʻi ha sīpinga ʻoku meimei lava ke tomuʻa ʻiloʻi: ʻoku ikuʻi ʻe he tamá mo e taʻahiné ʻa e ngaahi fakafaingataʻaʻiaʻanga fakalotosiʻi ʻokú ne fakamanamanaʻi ʻa ʻena feʻofaʻaki naʻe toki kamatá.

ʻI hono anga-mahení, ko e tamá ko ha tangata mālohi, naʻa mo hīkisia, ko ha tangata ʻoku loto-maʻu ʻaupito. Kae kehe, ko e taʻahiné ʻoku meimei ke vaivai mo ala tōngofua, ʻo faʻa siʻi hifo ʻaki ʻi he tamá ʻa e taʻu ʻe 10 pe 15. Pea neongo ʻoku faʻa taʻetokaʻi ia ʻe he tamá, ʻokú ne kei manako pē ʻiate ia ʻi ha tuʻunga taʻealatalitekeʻi.

ʻOku faʻa ʻi ai foki mo e tama kehe ʻokú ne ʻevaʻi ʻa e taʻahiné. Neongo ʻokú ne anga-lelei mo fakaʻatuʻi, ʻoku ʻikai te ne fakalotomāfanaʻi pe tohoakiʻi ʻa e tokanga ʻa e taʻahiné. Ko ia, ʻoku ngāueʻaki ʻe he taʻahiné ʻa ʻene ngaahi fakalaukau fakatauelé ke oʻi ʻaki ʻa e tama loto-mālohí ke hoko ko ha tokotaha anga-malū ʻa ia ʻokú ne fakahāhā he taimí ni ʻa ʻene ʻofa tuʻuloá. Ko e ngaahi fetaʻefiemālieʻaki kotoa pē ki muʻá kuo fakaleleiʻi mo fakamolemoleʻi, ʻokú na mali peá na nofo fiefia ai pē . . . 

ʻOku Hangē ʻa e ʻOfá ko e ʻOfa ʻi he Ngaahi Talanoa ʻEvá?

ʻE malava nai ʻi hono lau ʻo e ngaahi talanoa fananga peheé ke ne fakanenefuʻi ʻa hoʻo vakai ki he moʻoní? Ko e manatu eni ʻa Bonnie, ʻa ia naʻá ne kamata lau ʻa e ngaahi tohi talanoa ʻevá ʻi hono taʻu 16: “Naʻá ku kumi ki he talavou naʻe lōloa, kili melomelo mo talavoú; ʻa e tokotaha naʻe fakalotomāfana mo anga-fakaaoaó.” Naʻá ne fakahā: “Kapau naʻá ku faialea mo ha talavou pea naʻe ʻikai fie ʻuma ia mo ala mai, ko e tokotaha ia naʻe taʻeoli, neongo naʻá ne anga-fakaʻatuʻi mo anga-lelei. Naʻá ku fiemaʻu ʻa e fakalotomāfana naʻá ku lau ʻi he ngaahi tohi talanoá.”

Naʻe kei hoko atu pē ʻe Bonnie ʻa ʻene lau ʻa e ngaahi talanoa ʻevá ʻi he hili ʻene malí peá ne pehē: “Naʻá ku maʻu ha ʻapi mo ha fāmili lelei, ka naʻe ʻikai ke feʻunga ia ʻi ha faʻahinga ʻuhinga . . . Naʻá ku fiemaʻu ʻa e meʻa mālie, fakalotomāfana mo fakafiefia naʻe fakamatalaʻi fakaʻaiʻai mai ʻi he ngaahi tohi talanoá. Naʻá ku ongoʻi naʻe ʻi ai ha meʻa naʻe fehālaaki ʻi heʻeku nofo malí.” Kae kehe, naʻe tokoniʻi ʻe he Tohi Tapú ʻa Bonnie ke ne mahinoʻi kuo pau ke ʻoange ʻe ha husepāniti ʻo ʻikai ko e fakalaukaú pē pe “fakalotomāfaná” ki hono uaifí. ʻOku pehē ai: “ʻOku totonu ke . . . ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu. Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia.”—Efeso 5:​28, 29.

Pea fēfē ʻa e ngaahi kaveinga ʻoku faʻa lahi ʻi he ngaahi talanoa ʻevá, ʻa e ngaahi fakaʻosi haohaoá pea mo hono fakaleleiʻi ngofua ʻo e ngaahi felotokehekeheʻakí? Ko e moʻoni, ʻoku taumamaʻo ʻaupito ia mei he moʻoní. Ko e manatu eni ʻa Bonnie: “ʻI he ʻi ai haʻaku taʻefelotoi mo hoku husepānití, ʻi he ʻikai ke talanoaʻi ia mo iá, naʻá ku faʻifaʻitakiʻi ʻa e ngaahi founga naʻe ngāueʻaki ʻe he taʻahine he talanoá. ʻI he ʻikai ke tali mai ʻa hoku husepānití ʻi he founga ʻo e tali ʻa e tamá, naʻá ku fakaʻiteʻita.” ʻIkai ko e faleʻi ʻa e Tohi Tapú ki he ngaahi uaifí ʻoku moʻoni mo ʻaonga mamaʻo ange ia ʻi heʻene pehē, “ʻA e kau fefine, mou anganofo ki homou ngaahi husepaniti”?—Kolose 3:18.

Fehokotaki Fakasinó

Ko e meʻa fakatupu-tokangá, he ko e ngaahi talanoa ʻeva ʻoku fakamatalaʻi hangatonu ai ʻa e fehokotaki fakasinó—maʻu ʻi he ngaahi laipeli fakapuleʻangá ʻi he ngaahi kolo ʻe niʻihi—ko e ngaahi talanoa ia ʻoku fiemaʻua taha ʻe he kau taʻu hongofulu tupú. ʻE malava ke hoko ai ha maumau kiate koe? Ko e fakamatala eni ʻa Karen taʻu 18: “Naʻe ueʻi moʻoni ʻe he ʻū tohí ʻa e ngaahi ongo fakaefehokotaki fakasino mālohi mo e fieʻilo ʻiate au. Ko e kāvea mo e toʻoa naʻe ongoʻi ʻe he taʻahiné ʻi heʻene fāʻofua mo ʻuma mo e tamá naʻá ne ʻai au ke u fakaʻamua foki ʻa e ngaahi ongo ko iá. Ko ia, ʻi he taimi naʻá ku faialea aí,” ko ʻene hokó atu ia, “naʻá ku feinga ke toe fakaake ʻa e ngaahi ongo ko iá. Naʻe iku ai ki heʻeku fakahoko ha feʻauaki.” Ka naʻe hangē ʻa e meʻa naʻá ne hokosiá ko e ngaahi meʻa naʻe hokosia ʻe he kau taʻahine naʻá ne lau mo fakaʻānaua ki aí? Ko e meʻa eni naʻe ʻilo ʻe Karen: “Ko e ngaahi ongo eni ʻoku fatu ʻi he ʻatamai ʻo e kau faʻu-tohí. ʻOku ʻikai ke moʻoni.”

Ko hono faʻu ʻo e ngaahi fakaʻānaua fakaefehokotaki fakasinó ko e taumuʻa moʻoni ia ʻa e kau faʻu-tohi ʻe niʻihi. Vakai angé ki he ngaahi fakahinohino ʻoku ʻoange ʻe ha faipulusi ʻe taha ki he kau faʻu-tohi ʻo e talanoa ʻevá: “Ko e fehokotaki fakasinó ʻoku totonu ke nofo ia ʻi he holi pea mo e ngaahi ongo fakaefehokotaki fakasino ʻoku langaʻi ʻe he ʻuma mo e amo ʻa e tamá.” ʻOku toe faleʻi foki ki he kau faʻu-tohí ʻo pehē ko e ngaahi talanoa ʻevá “ʻoku totonu ke langaʻi ai ʻa e fakalotomāfana, hohaʻa mo e havala lahi fakaeongo mo fakakakano ʻi he tokotaha lautohí.” ʻOku hā mahino, ko hono lau ʻo e ngaahi meʻa peheé ʻe ʻikai ke tokoni ia ki ha taha ke muimui ʻi he akonaki ʻa e Tohi Tapú ke “ʻai ke mate leva homou ngaahi kupu ʻoku ʻi mamani, ko e feʻauaki, angaʻuli, havala, holi pango.”—Kolose 3:5.

Filifili Lelei

Ko ia ai, ʻoku lelei tahá ke fakaʻehiʻehi mei he ngaahi talanoa ʻokú ne langaʻi ʻa e ngaahi ongo taʻetāú pe ʻokú ne fakatupu ʻa e ngaahi ʻamanaki ʻoku ʻikai moʻoni. Fēfē ke fakalahi atu ʻo ʻahiʻahi lau ʻa e ngaahi tohi kehe, hangē ko e ngaahi tohi hisitōliá pe saienisí? ʻOku ʻikai koeʻuhí ʻoku tapu ʻa e ngaahi talanoa faʻú, he ʻoku ʻi ai ʻa e ngaahi tohi faʻu ʻoku ʻikai ngata pē ʻi heʻene mālié ka ʻoku toe fakatupu ʻilo foki. Ka ʻo kapau ʻoku fakaeʻa ʻe ha tohi talanoa ʻa e fehokotaki fakasinó, fakamālohi fakaseselé, ngaahi tōʻonga fakamēsikí, pe ko e “kau helo” fakaʻaluʻalu, anga-fītaʻa pe mānumanu, ʻoku totonu ke mole ho taimí hono lau iá?

Ko ia, tokanga. Ki muʻa ke ke lau ha tohi, vakaiʻi ʻa hono takafí; sio pe ʻoku ʻi ai ha meʻa ʻoku kovi ʻi he tohí. Pea kapau naʻe ʻosi fai ha tokanga ka ʻoku ʻai angé kuo ʻikai taau ha tohi, loto-mālohi ke taʻofi hono lau iá.

ʻI hono kehé, ko hono lau ʻo e Tohi Tapú mo e ngaahi tohi felāveʻi mo e Tohi Tapú ʻe tokoni ia, kae ʻikai fakatupu maumau kiate koe. Ko e fakatātaá, ʻoku pehē ʻe ha kiʻi taʻahine Siapani ko hono lau ʻo e Tohi Tapú naʻá ne tokoniʻi ia ke ʻoua te ne fakakaukau ki he fehokotaki fakasinó—faʻa hoko ko ha palopalema ki he toʻutupú. “ʻOku ou tuku maʻu pē ʻa e Tohi Tapú ʻo ofi ʻi hoku mohengá pea ʻoku ou ʻai ke u lau ia ki muʻa peá u mohé,” ko ʻene laú ia. “Ko e taimi ʻoku ou toko taha ai pea ʻikai ha meʻa ke faí (hangē ko e taimi mohé) ʻoku faʻa hanga ai hoku ʻatamaí ki he fehokotaki fakasinó. Ko ia ko hono lau ʻo e Tohi Tapú ʻoku tokoni lahi ia kiate au!” ʻIo, ko e “talanoa” mo e kakai tui ʻoku fakamatala ki ai ʻi he Tohi Tapú ʻe malava ke ne ʻoatu ʻa e mālohi fakaeʻulungāanga moʻoni pea fakalahi atu ai hoʻo fiefiá.—Loma 15:4.

Ngaahi Fehuʻi ki he Fetalanoaʻaki

◻ Ko e hā kuo pau ai ke ke filifili lelei ʻa e meʻa ʻokú ke laú?

◻ Ko e hā ʻoku mātuʻaki fakamānako ai ʻa e ngaahi tohi talanoa ʻevá ki he kau talavou tokolahi? Ka ko e hā hono ngaahi fakatuʻutāmakí?

◻ ʻE malava fēfē ke ke fili ʻa e ngaahi naunau lautohi tāú?

◻ Ko e hā ʻa e ngaahi ʻaonga ʻe niʻihi ʻo hono lau ʻo e Tohi Tapú mo e ngaahi tohi Fakatohitapú?

[Fakamatala ʻi he peesi 287]

“Naʻá ku maʻu ha ʻapi mo ha fāmili lelei, ka naʻe ʻikai ke feʻunga ia ʻi ha faʻahinga ʻuhinga . . . Naʻá ku fiemaʻu ʻa e meʻa mālie, fakalotomāfana mo fakafiefia naʻe fakamatalaʻi fakaʻaiʻai mai ʻi he ngaahi tohi talanoá. Naʻá ku ongoʻi naʻe ʻi ai ha meʻa naʻe fehālaaki ʻi heʻeku nofo malí”

[Fakatātā ʻi he peesi 283]

ʻI he laui afe lahi ʻa e ngaahi tohi ʻoku maʻú, kuo pau ke ke filifili lelei

[Fakatātā ʻi he peesi 285]

Ko e ngaahi tohi talanoa ʻevá ʻe fakamānako nai hono laú, ka ʻokú ne akoʻi ha vakai ʻoku lelei ki he ʻofá mo e nofo malí?