Vahe 24

ʻE Fēfē Haʻaku Fakaʻikaiʻi ʻa e Fehokotaki Fakasino ki Muʻa ʻi he Malí?

ʻI HA savea fakapuleʻanga ʻa e makasini ’Teen naʻe fakahā ai ko e tokolahi ʻo hono kau talavou lautohí naʻa nau fiemaʻu ha fakamatala ki he fehuʻi ko ení: “ʻE fēfē hano fakaʻikaiʻi ʻa e tenge fakaefehokotaki fakasinó.”

ʻI he Sāme 119:​9, naʻe ʻohake ai ʻe he tokotaha-tohi-sāmé ha fehuʻi meimei tatau: “ʻE fakamaʻa ʻe ha talavou [pe finemui] hono hala ʻi he ha?” Ko e talí: “Heʻene tauhi ia ke hoa mo hoʻo [ʻOtua] folofola.” Ka ko ha meʻa lahi ange ʻoku fiemaʻú ʻi hono ʻilo pē ia ʻi he ʻatamaí. Naʻe vete ʻe ha finemui ʻe taha: “ʻOkú ke ʻilo ʻi ho ʻatamaí ʻa e meʻa ʻoku leaʻaki ʻe he Tohi Tapú ʻo fekauʻaki mo e fehokotaki fakasino taʻetāú, ka ʻoku teke maʻu pē ʻe ho lotó ʻa e ngaahi ʻuhingá ni ki mui ʻi ho ʻatamaí.” ʻOku feʻungamālie ai ʻa e hoko atu ʻa e tokotaha-tohi-sāmé: “Kuo u fufu hoʻo lea ʻi hoku loto e, koeʻuhi ke ʻoua naʻa ku hia kiate koe.”—Sāme 119:11.

Maluʻi ʻa e Lotó

Ke tauhi ʻa e ngaahi folofola ʻa e ʻOtuá ʻi ho lotó ʻoku ʻuluaki fiemaʻu ia ke ke lau mo ako ʻa e Tohi Tapú pea mo e ngaahi tohi Fakatohitapú. ʻE lava ke tokoni eni ke ne fakatuipauʻi koe ki he mahuʻinga ʻo e ngaahi lao ʻa e ʻOtuá. ʻI he tafaʻaki ʻe tahá, ko e lau, fanongo pe mamata ʻi he ngaahi meʻa fakalanga fehokotaki fakasinó ʻokú ne fakaʻaiʻai ai ʻa e “havala.” (Kolose 3:5) Ko ia, mātuʻaki fakaʻehiʻehi mei he ngaahi meʻa peheé! ʻI hono kehé, fakakaukau koe ki he ngaahi meʻa ʻoku maʻa mo kinokinoifiá.

Kuo toe hā foki ʻi he fakatotoló, ko e ngaahi kaungāmeʻa ofi ʻo ha taha ʻoku malava ke ʻi ai ʻenau tākiekina lahi ʻi he tuʻunga ʻo e kei nofo anga-maʻa ʻa ha taha. Naʻe pehē ʻe he tokotaha-tohi-sāmé: “Ko e kaumeʻa au ʻo e kakai kotoa ʻoku ʻapasia atu [ʻOtua], mo e faʻahinga ʻoku tauhi ʻa e ngaahi enginaki aʻau.”—Sāme 119:63.

Ko ho ngaahi kaungāmeʻá ko e faʻahinga ʻoku nau feinga mālohi ke ‘tauhi ʻa e ngaahi enginaki ʻa e ʻOtuá’? Ko e lea eni ʻa e finemui ko Joanna fekauʻaki mo e ngaahi kaungāmeʻa ʻoku filí: “Kapau ʻokú ke ʻi he kakai ʻoku ʻofa kia Sihová, te ke ʻiloʻi ai, ʻi hoʻomou talanoa ʻo fekauʻaki mo e ngaahi ʻulungāangá, ʻoku kamata ke ke ongoʻi ʻo hangē ko kinautolú. Hangē ko ení, kapau ʻokú ke fanongo ki heʻenau pehē ʻoku fakalielia ʻa e ʻulungāanga taʻetāú, ʻoku kamata leva ke ke ongoʻi tatau. ʻI he tafaʻaki ʻe tahá, kapau ʻokú ke taka mo ha taha ʻoku ʻikai tokanga ia ki ai, ʻe ʻikai tuai te ke hangē tofu pē ko iá.”—Palovepi 13:20.

Kae kehe, ko e faialeá mo e faisoó ʻokú na faʻa fakahoko mai ʻa e pole lahi taha ki hono tauhi ʻo e anga-maʻá. Fakakaukau angé ki ha fakatotolo fakapuleʻanga ʻa Robert Sorensen. Naʻá ne ʻilo ai ko e peseti ʻe 56 ʻo e kau talavoú mo e peseti ʻe 82 ʻo e kau finemui naʻe saveaʻi ʻa ia naʻa nau ʻosi fai ʻa e fehokotaki fakasinó, naʻa nau ʻuluaki fai ia mo ha taha ʻa ia naʻa nau ō holo maʻu pē mo ia—pe ʻiloʻi lelei mo fuʻu saiʻia ai. Fēfē leva kapau ʻokú ke taʻumotuʻa feʻunga ke muia ʻa e nofo malí pea ʻokú ke faialea mo ha taha? ʻE lava fēfē ke ke hoko ʻo maheni lelei mo e tokotaha ko iá pea kei tauhi ʻa e anga-maʻá?

Kalofi ʻa e Ngaahi Tōʻanga ʻi he Faisoó

ʻOku fakatokanga ʻa e Tohi Tapú: “ʻOku kākā ange ʻa e lotó ʻi ha toe meʻa mo ʻi ha tuʻunga holiholivale; ko hai ʻokú ne mahinoʻi ia?” (Selemaia 17:​9, Byington) ʻE mātuʻaki ongoʻi fakanatula nai ʻe ha taha ʻokú ne manako ʻi ha taha. Ka ko e lahi ange ʻa hoʻomo feohí, ko e lahi ange ai pē ia ʻa e manakó. Pea ʻe lava ʻe he holi anga-maheni ko ení ke ne takihalaʻi ho lotó. “ʻOku mei he loto ʻa e ngāhi fakakaukau pango, . . . ʻa e ngāhi feʻauaki,” ko e lea ia ʻa Sīsū Kalaisí.—Mātiu 15:19.

ʻOku ʻikai faʻa palani ʻe ha ongo meʻa kei siʻi ke fai ha fehokotaki fakasino.a ʻI he ngaahi tuʻunga lahi tahá, ʻoku hoko eni koeʻuhi ko e fai ʻe ha ongo meʻa ʻa e fealaʻakí, pe amo fakalanga holi ʻo e ngaahi konga fakapulipuli ʻo e sinó. Naʻe vete ʻe he faʻē taʻemali ʻe taha: “Kiate au pea ki he tokolahi taha ʻo e tamaiki ʻoku ou ʻiloʻí, naʻe kiʻi ʻaluʻalu siʻi atu pē ʻi he taimi taki taha ʻo fakaiku ki he ʻikai ke te kei veisinia. ʻOkú te kamata fai ha kiʻi ala, pea ki muʻa ke te fakatokangaʻi ʻa e meʻa ʻoku hokó, ʻoku ʻikai lava ke te taʻofi.”

Ke kalofi ʻa hoʻo tō ki he fehokotaki fakasino taʻetāú, kuo pau ke ke taki ho lotó, kae ʻoua ʻe tuku ia ke ne taki koé. (Palovepi 23:19) ʻE malava fēfē ke ke fai eni?

Fokotuʻu ha ngaahi fakangatangata: ʻE ongoʻi nai ʻe ha talavou ʻoku ʻamanekina ange ʻe hono kaumeʻá ke ne kamata ʻa e ʻumá mo e alá, ka ʻi hono moʻoní ʻoku ʻikai nai ke pehē. “ʻI he fiematamuʻá ʻoku fakatupunga pē ai ʻe ha taha ha fekuki faingataʻa, ka ko kinautolu ʻoku fealeaʻakí ʻoku ʻi ai ʻa e potó.” (Palovepi 13:​10, NW) Ko ia, kapau ʻokú ke faialea, ʻai ke ʻilo ʻe he tokotaha ʻe tahá ʻa e anga hoʻo ongoʻi ʻo fekauʻaki mo e meʻa ko iá ʻaki ʻa e “fealeaʻaki.” Fokotuʻu fakapotopoto ʻa e ngaahi fakangatangata ki hono fakahāhā ʻo e ʻofá. ʻI he taimi tatau, ʻoua te ke ʻoatu ha ngaahi fakaʻilonga kehe. Ko hono tui ʻo e ngaahi teunga manoʻonoʻo, fakatēlefua mo fakatauelé ʻe lava ke ne ʻoatu ai ki ho hoá ʻa e pōpoaki hala.

Fakaʻehiʻehi mei he ngaahi tuʻunga fakatauelé: ʻOku fakamatala ʻa e Tohi Tapú ki ha finemui veisinia ʻa ia naʻe fakaafeʻi ʻe hono kaumeʻá ke na luelue ʻo ʻeva ki ha kiʻi feituʻu maomaonganoa ʻi he moʻungá. Ko e hā ʻene taumuʻá? Koeʻuhi ke na lava ʻo fiefia ʻi he ngaahi fakaʻofoʻofa ʻo e kamata ʻa e faʻahitaʻu failaú. Kae kehe, naʻe ʻilo ʻe he fanga tuongaʻane ʻo e taʻahiné ʻa e palani ʻeva ko ení pea nau taʻofi ai ia ʻi he ʻita. Naʻa nau fai ení koeʻuhi ko haʻanau ongoʻi naʻá ne angaanga taʻetaau? ʻIkai ʻaupito! Ka naʻa nau ʻiloʻi lelei ʻa e mālohi ʻo e fakatauele ʻoku ʻi he ngaahi tuʻunga peheé. (Hiva ʻo e Hiva 1:6; 2:​8-15) ʻI he tuʻunga tatau, ʻoku totonu ke ke fakaʻehiʻehi mei he ngaahi tuʻunga ʻa ia ʻe lava ke taki atu ki he fakatauelé, hangē ko e nofo toko taha ʻi ha fale, ʻi ha ʻapātimeni, pe ko ha meʻalele ʻoku tau, mo ha taha ʻokú ke faialea mo ia.

ʻIloʻi ho ngaahi ngataʻangá: ʻOku ʻi ai ʻa e ngaahi taimi ʻoku tākiekina ngofua nai ai koe ki he ngaahi fakatauele fakaefehokotaki fakasinó ʻi ha ngaahi taimi kehe. Ko e fakatātaá, te ke loto-siʻi nai koeʻuhi ko ha tōnounou fakafoʻituitui pe ko ha taʻefelotoi mo hoʻo ongo mātuʻá. Ko e hā pē ʻa e tuʻungá, lolotonga ʻa e ngaahi taimi peheé kuo pau ke ke mātuʻaki tokanga ai. (Palovepi 24:10) Pehē foki, tokanga fekauʻaki mo hono ngāueʻaki ʻo e ngaahi inu ʻolokaholó. ʻI he tākiekina ʻo e ngaahi meʻa ko ení, ʻe malava ke mole ai ʻa hoʻo faʻa mataʻofí. “Ko e . . . uaine, kaeʻumaʻa ʻa e uaine foʻou, ʻoku mole ai ʻa e loto.”—Hosea 4:11.

Tala ange ko e ʻikaí ko e ʻikai: Ko e hā ʻe malava ke fai ʻe ha ongo meʻa ʻi he taimi ʻoku fakalalahi ai ʻa e ngaahi ongó pea ʻi heʻena ʻilo ʻokú na hoko ʻo fuʻu fekoekoeʻi fakatuʻutāmakí? Ko e toko taha ʻia kinaua kuo pau ke ne leaʻaki pe fai ha meʻa ʻa ia ʻe motuhi ai ʻa e tuʻungá ni. Naʻe hanga hake ʻa Debra ʻokú ne toko taha pē mo e tamasiʻi naʻá na faialeá ʻa ia naʻá ne taʻofi ʻa e kaá ʻi ha feituʻu maomaonganoa ki ha “talanoa.” ʻI he taimi naʻe kamata ke fakalalahi ai ʻa e ngaahi ongó, naʻe pehē ange ʻe Debra ki he tamasiʻí: “ʻIkai ko e ʻuma eni? ʻIkai ʻoku totonu ke tuku?” Naʻe motuhi ai ʻa e tuʻungá ni. Naʻá ne ʻave leva ia ki hono ʻapí. Ke fakaʻikaiʻi ʻa e ngaahi tuʻunga ko ení mahalo ko e meʻa faingataʻa taha nai ia naʻe pau ke ke faí. Kae hangē ko e lea ʻa e finemui taʻu 20 naʻá ne fakavaivai ki he fehokotaki fakasinó: “Kapau heʻikai te ke mavahe, te ke toki fakaʻiseʻisa!”

ʻAi ha fakafeʻao: Neongo ʻa e vakai ʻa e niʻihi kuo ʻosi hono kuongá, ko hono ʻai ha fakafeʻao ke ke ʻalu fakataha mo ia ʻi ha faialea, ʻoku kei hoko pē ia ko ha fakakaukau lelei. “ʻOku hangē ia ʻoku ʻikai fai mai ha falalá,” ko e lāunga ia ʻa e niʻihi. Mahalo pē. Ka ʻoku fakapotopoto ke falala kiate kita? ʻOku tala hangatonu mai ʻe he Palovepi 28:26: “Ko ia ʻoku falala ki hono ʻatamai oʻona ko ia ʻa e vale; ka ko ia ʻoku fou ʻi he poto, ʻe hao ʻa e toko taha ko ia.” Laka fakapotopoto ʻaki hono ʻai ha taha ke ke ʻalu mo ia ʻi ha faialea. “ʻOku ou tokaʻi ʻaupito ʻa e tangata ʻokú ne ʻomai ʻene fakafeʻao pē ʻaʻaná. ʻOku ou ʻiloʻi ʻokú ne mahuʻingaʻia tatau pē mo au ʻi he anga-maʻá,” ko e fakahā ia ʻe Debra. “ʻOku ʻikai ke hoko ai ha palopalema, he ʻi he taimi ʻokú ma fie talanoa ai ki ha meʻa fakaekimauá, ʻokú ma kiʻi manga atu pē ke ʻoua ʻe ongoʻi mai ʻe he niʻihi kehé. Ko e maluʻi ʻokú ne ʻomaí ʻoku tuha ia mo ha fakahohaʻa pē.”

Kaumeʻa mo e ʻOtuá

Hiliō ʻi hono kotoá, ko hono maʻu ha tuʻunga kaumeʻa ofi mo e ʻOtuá, ʻo ʻiloʻi ko ha tokotaha moʻoni ia mo e ngaahi ongoʻi, ʻe lava ke tokoniʻi ai koe ke ke fakaʻehiʻehi mei he tōʻonga ʻoku fakatupu houhau kiate iá. Ko hono huaʻi atu ho lotó kiate ia fekauʻaki mo ha ngaahi palopalema ʻoku tohoakiʻi ai koe ke ke ofi kiate ia. Ko e ngaahi hoa tokolahi ʻa ia ʻoku nau fakaʻamu ke kei tauhi ʻa e anga-maʻá, kuo aʻu ʻo nau lotu fakataha ki he ʻOtuá lolotonga ʻa e ngaahi tuʻunga mālohi fakaeongó ʻo kole ke ne foaki hifo kiate kinautolu ʻa e ivi ʻoku fiemaʻú.

ʻOku tokanga lahi hifo ʻa Sihova ʻaki ʻene ʻoange ki he faʻahinga peheé ‘ʻa e mafai makehe atu.’ (2 Kolinito 4:7) ʻOku moʻoni, kuo pau ke ke fai hoʻo tafaʻakí. Kae kehe, loto-pau he ʻi he tokoni mo e tāpuaki ʻa e ʻOtuá, ʻoku malava ke fakaʻikaiʻi ʻa e fehokotaki fakasino taʻetāú.

[Fakamatala ʻi lalo]

Ngaahi Fehuʻi ki he Fetalanoaʻaki

◻ Ko e hā ʻa e ngaahi meʻa ʻe malava ke ke fai ʻe tokoniʻi ai koe ke ke tauhi ʻa e ngaahi lao ʻa Sihova fekauʻaki mo e fehokotaki fakasinó?

◻ ʻE malava fēfē ke uesia ʻe ho ngaahi kaungāmeʻá ʻa hoʻo vakai ki he fehokotaki fakasino ki muʻa ʻi he malí?

◻ Ko e hā ʻokú ke ongoʻi ai ʻoku fiemaʻu ʻa e tokanga ʻi he taimi ʻo e faialeá?

◻ Ko e hā ʻa e ngaahi meʻa ʻe malava ke fai ʻe ha ongo meʻa faisō ke maluʻi ai kinaua mei he tō ki he fehokotaki fakasino taʻetāú?

[Fakamatala ʻi he peesi 193]

“ʻOkú te kamata fai ha kiʻi ala . . . ”

[Fakamatala ʻi he peesi 194]

ʻI he faisoó, fakaʻehiʻehi mei he ʻulungāanga taʻetāú ʻi he ʻoua ʻe fakamavaheʻi kimoua

[Puha/Fakatātā ʻi he peesi 195]

Hanganaki Anga-Maʻa Lolotonga ʻa e Faialeá

Fakaʻehiʻehi mei he ngaahi tuʻunga ʻa ia ʻe malava ke iku ai ki he ʻumá mo e alá

Faialea ʻi ha kulupu pe ʻai ha fakafeʻao

Tauhi ʻa e talanoá ʻi ha tuʻunga fakatupu langa hake

Mei he kamatá, ʻai ke ʻilo ʻe ho hoá ʻa hoʻo fakakaukau fekauʻaki mo e ngaahi fakangatangata ʻi hono fakahāhā ʻo e ʻofá

Teunga taau pea fakaʻehiʻehi mei he ngaahi tōʻonga fakatauelé

Kole ke ʻave koe ki ʻapi kapau ʻokú ke ongoʻi ko hoʻo anga-maʻá ʻoku ʻi he tuʻunga fakatuʻutāmaki

Fakaʻehiʻehi mei he fakamāvae “poʻuli ā” lōloá

Foki vave ki ʻapi

[Fakatātā]

Ko e faʻahinga ʻoku faisoó ʻe malava ke nau fai ʻa e ngaahi meʻa ʻa ia ʻoku ʻikai ke fakamavaheʻi ai kinautolu mei he kakai kehé

[Fakatātā ʻi he peesi 196]

Kapau ʻoku hoko ʻo fuʻu “fakamāfana” ha tuʻunga, tala ange ko e ʻikaí ko e ʻIkai!