“Tuku ke Hokohoko Atu ʻa Hoʻomou ʻOfa Fakatokouá”!

1, 2. Ko e hā naʻe tohi ai ʻa Paula ki he kau Kalisitiane Hepeluú?

ʻI HE taʻu 61, naʻe maʻu ʻe he ngaahi fakatahaʻanga kotoa ʻi ʻIsilelí ha nonga. Neongo hono tuku pilīsone ʻa e ʻapositolo ko Paulá ʻi Lomá, naʻá ne ʻamanaki ʻe vave hano tukuange ia. Ko hono hoa ngāue fefonongaʻaki ko Tīmoté naʻe toki ʻatā mai mei he pilīsoné, pea naʻá na palani ke ʻaʻahi ki he fanga tokoua ʻi Siuteá. (Hep. 13:23) ʻI ha taʻu pē ʻe nima mei ai, ko e kau Kalisitiane ʻi Siuteá pea tautefito ki he faʻahinga ʻoku nofo ʻi Selusalemá, naʻe pau ke nau ngāue fakavavevave. Ko e hā hono ʻuhingá? Ki muʻá, naʻe tala ʻe Sīsū ki hono kau muimuí ko e taimi pē te nau sio ai kuo ʻātakaiʻi ʻe he kau sōtiá ʻa Selusalema, ʻe fiemaʻu ke nau hola.​—Luke 21:20-24.

² Naʻe ʻoange ʻe Sīsū ki hono kau muimuí ʻa e fakatokanga ko iá ʻi he taʻu ʻe 28 kuohilí. Lolotonga ʻa e taimi ko iá, ko e kau Kalisitiane ʻi ʻIsilelí naʻa nau faitōnunga ai pē neongo ʻa e lahi ʻo e ngaahi fakatangá mo e ʻahiʻahí. (Hep. 10:32-34) Ka naʻe loto ʻa Paula ke teuʻi kinautolu ki he meʻa ʻe hoko ʻi he kahaʻú. Naʻe teu ke nau hokosia ʻa e taha ʻo e ʻahiʻahiʻi lahi taha ʻo ʻenau tuí. (Māt. 24:20, 21; Hep.12:4) ʻE fiemaʻu ke nau maʻu ʻa e kātaki mo e tui ʻoku mālohi makehe atu koeʻuhí ke nau talangofua ai ki he ngaahi lea ʻa Sīsuú ke nau hola, pea ʻe makatuʻunga ai ʻenau moʻuí. (Lau ʻa e Hepelū 10:36-39.) Ko ia, naʻe fakamānavaʻi ʻe Sihova ʻa Paula ke ne tohi ki he siʻi fanga tokoua mo e fanga tuofāfine ko ení. ʻOku ui he taimí ni ʻa e tohi ko iá ko e tohi ʻa Hepeluú, ʻa ia naʻe fakataumuʻa ke fakalototoʻaʻi kinautolu ki he meʻa naʻe teu ke hokó.

 3. Ko e hā ʻoku totonu ai ke tau mahuʻingaʻia ʻi he tohi ʻa Hepeluú?

³ ʻI he tuʻunga ko e kakai ʻa e ʻOtuá ʻi he ʻaho ní, ʻoku totonu ke tau mahuʻingaʻia ʻi he tohi ʻa Hepeluú. Ko e hā hono ʻuhingá? Koeʻuhí ʻoku meimei tatau hotau tuʻungá mo e kau Kalisitiane ʻi Siuteá. ʻOku tau moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia” pea kuo kātekina faitōnunga ai ʻe he tokolahi ʻa e ngaahi ʻahiʻahi mafatukitukí pe fakatangá. (2 Tīm. 3:1, 12) Ka ko e tokolahi ʻo kitautolu ʻoku tau maʻu ʻa e nonga pea ʻikai hokosia fakahangatonu ʻa e fakatangá. Kae hangē ko e kau Kalisitiane ʻi he taimi ʻo Paulá, ʻoku fiemaʻu ke tau tokanga. Ko e hā hono ʻuhingá? ʻOku vavé ni ʻaupito ke tau hokosia ʻa e ʻahiʻahiʻi lahi taha ʻo ʻetau tuí!​—Lau ʻa e Luke 21:34-36.

 4. Ko e hā ʻa e konga tohi fakataʻu ki he 2016, pea ko e hā ʻoku feʻungamālie ai iá?

⁴ Ko e hā te ne tokoniʻi kitautolu ke teuteu ki he ngaahi meʻa ʻe hoko ʻi he kahaʻú? ʻI he tohi ʻa Hepeluú, naʻe lave ai ʻa Paula ki he ngaahi meʻa te ne tokoniʻi kitautolu ke fakaivimālohiʻi ʻetau tuí. Ko e fakamanatu mātuʻaki mahuʻinga ʻe taha, ʻoku ʻi he Hepelū 13:1. ʻOku fakalototoʻaʻi ai kitautolu: “Tuku ke hokohoko atu ʻa hoʻomou ʻofa fakatokouá.” Kuo fili ʻa e veesi ko iá ko e konga tohi fakataʻu ki he 2016.

 5. Ko e hā ʻa e ʻofa fakatokouá?

⁵ Ko e hā ʻa e ʻofa fakatokouá? Ko e muʻaki lea faka-Kalisi naʻe ngāueʻaki ʻe Paulá ʻoku ʻuhinga fakafoʻilea ko e “ʻofa ki ha tokoua.” Ko e ʻofa fakatokouá ko ha ongo ʻoku mālohi mo māfana ʻi he vahaʻa ʻo e ngaahi mēmipa ʻo e fāmilí pe ngaahi kaumeʻa ofí. (Sione 11:36) ʻOku ʻikai ke tau fakangalingali ko ha fanga tokoua mo e fanga tuofāfine. Ko kitautolú ko e fanga tokoua mo e fanga tuofāfine. (Māt. 23:8) ʻOku pehē ʻe Paula: “ʻI he ʻofa fakatokouá mou maʻu ʻa e femanavaʻofaʻaki loloto. ʻI he fakahāhā ʻo e fefakaʻapaʻapaʻakí, mou takimuʻa ai.” (Loma 12:10) Ko e ngaahi lea ko ení ʻoku fakahaaʻi ai ʻa e mālohi ʻetau ʻofa ki hotau fanga tokouá. Ko e ʻofa fakatokoua ko ení fakataha mo e ʻofa makatuʻunga ʻi he ngaahi tefitoʻi moʻoni faka-Kalisitiané, ʻoku tokoniʻi ai ʻa e kakai ʻa e ʻOtuá ke nau fevāofiʻaki mo fāʻūtaha.

 6. ʻOku anga-fēfē hono mahinoʻi ʻe he kau Kalisitiane moʻoní ʻa e ʻuhinga ʻo e ʻofa fakatokouá?

⁶ Ko e kupuʻi lea “ʻofa fakatokouá” ʻoku lahi taha ʻene hā ʻi he ʻū tohi faka-Kalisitiané. Ki he kau Siu ʻi he kuohilí, ko e foʻi lea “tokoua” naʻe faʻa ʻuhinga ki he kāingá pea ʻi he taimi ʻe niʻihi ki ha tokotaha kehe mei he fāmilí. Ka naʻe ʻikai ʻaupito ke fakakau ai ha taha naʻe ʻikai ko ha Siu. Kae kehe, ʻi he tuʻunga ko e kau Kalisitiane moʻoní ko hotau “tokouá” ko ha Kalisitiane moʻoni pē ʻo tatau ai pē pe ko e hā ʻa e fonua ʻokú ne haʻu mei aí. (Loma 10:12) Kuo akonekina kitautolu ʻe Sihova ke tau feʻofaʻaki ko e fanga tokoua. (1 Tes. 4:9) Ko e hā ʻoku mahuʻinga ai ke hokohoko atu hono fakahāhā ʻa e ʻofa fakatokouá?

 7. (a) Ko e hā ʻa e ʻuhinga mahuʻinga taha ke tau fakahāhā ai ʻa e ʻofa fakatokouá? (e) ʻOmai ʻa e ʻuhinga ʻe taha ʻoku mahuʻinga ai ke fakaivimālohiʻi ʻetau feʻofaʻakí.

⁷ Ko e ʻuhinga mahuʻinga taha ke tau fakahāhā ai ʻa e ʻofa fakatokouá he ʻoku tala mai ʻe Sihova ke tau fai pehē. Heʻikai lava ke tau ʻofa moʻoni ʻia Sihova kapau ʻoku tau fakafisi ke ʻofa ki hotau fanga tokouá. (1 Sio. 4:7, 20, 21) Ko e toe ʻuhinga ʻe tahá he ʻoku tau tauʻaki fiemaʻu kitautolu, tautefito ʻa e ngaahi taimi faingataʻa ko ení. ʻI he taimi naʻe hiki ai ʻe Paula ʻene tohi ki he kau Kalisitiane Hepeluú, naʻá ne ʻiloʻi ʻoku vave ke liʻaki ʻe he niʻihi honau ngaahi ʻapí mo ʻenau ngaahi meʻa fakafoʻituituí. Naʻe fakamatalaʻi ʻe Sīsū ʻa e faingataʻa ʻo e taimi ko iá. (Mk. 13:14-18; Luke 21:21-23) Ki muʻa ke hoko mai ʻa e taimi ko iá ʻe fiemaʻu ki he kau Kalisitiane ko iá ke fakaivimālohiʻi ʻenau feʻofaʻakí.​—Loma 12:9.

 8. Ko e hā ʻoku fiemaʻu ke tau fai he taimí ni ki muʻa ke kamata ʻa e fuʻu mamahi lahí?

⁸ ʻOku vavé ni ke hoko mai ʻa e mamahi lahi taha ʻi he hisitōlia ʻa e faʻahinga ʻo e tangatá. (Mk. 13:19; Fkh. 7:1-3) ʻE fiemaʻu ke tau talangofua ki he akonaki ko ení: “Haʻu ange, siʻoku kakai, hu ki ho ngaahi loki, ʻo tapuni ʻa e matapa kiate koe: toi ko e foʻi kemo pe, kae ʻoua ke laka atu ʻa e tautea.” (ʻAi. 26:20) Ko e “ngaahi loki” ko iá ʻoku ʻuhinga nai ki heʻetau ngaahi fakatahaʻangá. Ko e feituʻu ia ʻoku tau lotu ai mo hotau fanga tokouá mo e fanga tuofāfiné kia Sihova. Ka ʻoku fiemaʻu ke tau fai ʻa e meʻa lahi ange ia ʻi he fakatahataha maʻu peé. Naʻe fakamanatu ʻe Paula ki he kau Kalisitiane Hepeluú ʻoku totonu ke nau fefakalototoʻaʻaki ʻi he fakahāhā ʻa e ʻofá pea fefaiʻaki ʻa e ngaahi ngāue leleí. (Hep. 10:24, 25) ʻOku fiemaʻu ke fakaivimālohiʻi ʻetau ʻofa fakatokouá he taimí ni, koeʻuhí ʻe tokoniʻi ai kitautolu ke kātaki ʻo tatau ai pē pe ko e hā ʻa e ngaahi ʻahiʻahi te tau fehangahangai mo ia ʻi he kahaʻú.

 9. (a) Ko e hā ʻa e ngaahi faingamālie ʻoku tau maʻu ke fakahāhā ʻa e ʻofa fakatokouá ʻi he ʻahó ni? (e) ʻOmai ha ngaahi fakatātā ʻo e anga hono fakahāhā ʻe he kakai ʻa Sihová ʻa e ʻofa fakatokouá.

⁹ Naʻa mo e ʻahó ni, kuo tau maʻu ʻa e faingamālie lahi ke fakahāhā ai ʻa e ʻofa fakatokouá, ki muʻa ke kamata ʻa e fuʻu mamahi lahí. ʻOku faingataʻaʻia hotau fanga tokoua tokolahi koeʻuhí ko e ngaahi mofuike, tāfea, afā, sūnami pe ngaahi fakatamaki fakanatula kehe. ʻOku kātekina ʻe he fanga tokoua ʻe niʻihi ʻa e fakatangá. (Māt. 24:6-9) Pea pehē ki he ngaahi palopalema fakaʻekonōmika fakaʻahó, ʻa ia ko e nunuʻa ia ʻo e moʻui ʻi he māmani fakameleʻi ko ení. (Fkh. 6:5, 6) Kae kehe, ko e lahi ange hono maʻu ʻe he fanga tokouá ʻa e palopalemá, ko e lahi ange ia ʻa e faingamālie kuo tau maʻu ke fakahāhā ai ʻa e lahi ʻo ʻetau ʻofa ʻiate kinautolú. Neongo ʻoku ʻikai ke fakahāhā ʻe he māmani ko ení ʻa e ʻofá, ʻoku fiemaʻu ke hokohoko atu ʻetau fakahāhā ʻa e ʻofa fakatokouá. (Māt. 24:12)^[1]

10. Ko e hā te tau sivisiviʻi he taimi ní?

¹⁰ Neongo ʻetau fehangahangai mo e ngaahi palopalemá, ʻe lava fēfē ke tau fakapapauʻi ʻoku hokohoko atu ʻetau ʻofa fakatokouá? ʻE lava fēfē ke tau fakamoʻoniʻi ʻoku tau maʻu ʻa e faʻahinga ʻofa ko ení ki hotau fanga tokouá? Hili ʻa e pehē ʻe he ʻapositolo ko Paulá, “tuku ke hokohoko atu ʻa hoʻomou ʻofa fakatokouá,” naʻá ne lisi mai ʻa e founga ʻe niʻihi ʻe lava ke fai ai eni ʻe he kau Kalisitiané. Tau sivisiviʻi he taimí ni ha founga ʻe ono.

11, 12. Ko e hā ʻa e ʻuhinga ʻo e fakahāhā ʻa e anga-talitali kakaí? (Sio ki he ʻuluaki fakatātā ʻi he kupú ni.)

¹¹ “ʻOua ʻe ngalo ʻa e anga-talitali kakaí.” (Lau ʻa e Hepelū 13:2.) Ko e hā ʻa e ʻuhinga ʻo e foʻi lea “anga-talitali kakaí”? Ko e foʻi lea naʻe ngāueʻaki ʻe Paulá ʻoku ʻuhinga fakafoʻilea ia ki he “anga-lelei ki he kau solá.” ʻOku fakamanatu mai nai ʻe he kupuʻi lea ko iá ʻa ʻĒpalahame mo Lote. Ko e ongo tangata ko ení naʻá na fakahāhā ʻa e anga-lelei ki he kau ʻaʻahi naʻe ʻikai ke na ʻiloʻí. Faifai atu pē, naʻe ʻiloʻi ʻe ʻĒpalahame mo Lote ko e kau sola ko ení ko ha kau ʻāngelo. (Sēn. 18:2-5; 19:1-3) Naʻe fakalototoʻaʻi ʻe he faʻifaʻitakiʻanga ʻe ua ko ení ʻa e kau Kalisitiane Hepeluú ke nau fakahāhā ʻa e ʻofa fakatokouá ʻaki ʻa e hoko ʻo anga-talitali kakai.

¹² ʻE lava fēfē ke tau fakahāhā ʻa e anga-talitali kakaí ki he niʻihi kehé? ʻE lava ke tau fakaafeʻi hotau fanga tokoua mo e fanga tuofāfiné ki hotau ʻapí ki ha houa kai pe ko ha fakalototoʻa pē. Neongo ʻoku ʻikai nai ke tau ʻiloʻi lelei ʻetau ʻovasia sēketí mo hono uaifí, ʻe lava ke tau fakaafeʻi kinaua ʻi he taimi ʻokú na ʻaʻahi mai ai ki heʻetau fakatahaʻangá. (3 Sio. 5-8) ʻOku ʻikai fiemaʻu ke tau ngaohi ha fuʻu meʻakai lahi pe fakamoleki ha paʻanga lahi. Ko ʻetau taumuʻá ke fakalototoʻaʻi hotau fanga tokouá, kae ʻikai ko hono ʻai ke nau ofoofo ʻi he lahi ʻo e meʻa ʻoku tau maʻú. Pea ʻoku ʻikai totonu ke tau fakaafeʻi pē ʻa e faʻahinga ʻe lava ke nau toe fai mai ʻa e meʻa tatau. (Luke 10:42; 14:12-14) Ko e meʻa mahuʻinga tahá, ke ʻoua ʻaupito te tau fuʻu femoʻuekina pea ngalo ai hono fakahāhā ʻa e anga-talitali kakaí!

13, 14. ʻE lava fēfē ke tau “manatuʻi ʻa e faʻahinga ʻoku tuku pilīsoné”?

¹³ “Manatuʻi ʻa e faʻahinga ʻoku tuku pilīsoné.” (Lau ʻa e Hepelū 13:3.) ʻI he taimi naʻe tohi ai eni ʻe Paulá, naʻá ne ʻuhinga ki he fanga tokoua naʻe tuku pilīsone koeʻuhí ko ʻenau tuí. Naʻe fakaongoongoleleiʻi ʻe Paula ʻa e fakatahaʻangá koeʻuhí naʻa nau fakahāhā ʻa e “kaungāongoʻi ki he faʻahinga ʻi he pilīsoné.” (Hep. 10:34) Naʻe tokoniʻi ʻe he fanga tokoua ʻe niʻihi ʻa Paula lolotonga ʻa e taʻu ʻe fā ʻene ʻi he pilīsoné, ka ko e niʻihi naʻe nofo mamaʻo. Naʻe lava fēfē ke nau tokoniʻi ʻa Paula? Naʻe lava ke nau hanganaki lotu maʻana.​— Fil. 1:12-14; Hep. 13:18, 19.

¹⁴ ʻI he ʻahó ni, ʻoku tokolahi ʻa e fanga tokoua ʻoku tuku pilīsone koeʻuhí ko ʻenau tuí. ʻE lava ʻe he fanga tokoua mo e fanga tuofāfine ʻoku nofo ofi atu aí ke nau fai ha tokoni ʻaonga kia kinautolu. Ka ko e tokolahi ʻo kitautolu ʻoku nofo mamaʻo mei he faʻahinga ʻi he pilīsoné. ʻE lava fēfē ke tau tokoniʻi mo manatuʻi maʻu pē kinautolu? ʻE ueʻi kitautolu ʻe he ʻofa fakatokouá ke hanganaki lotu maʻa kinautolu. Ko e fakatātaá, ʻe lava ke tau lotu maʻa hotau fanga tokouá, fanga tuofāfiné pea pehē ki he fānau ʻoku tuku pilīsone ʻi ʻElitiliá, kau ai hotau fanga tokoua ko Paulos Eyassu, Isaac Mogos, mo Negede Teklemariam, ʻa ia ʻoku kei tuku pilīsone kinautolu ʻo laka hake eni ʻi he taʻu ʻe 20.

15. ʻE lava fēfē ke tau fakaʻapaʻapaʻi ʻetau nofo mali?

¹⁵ “Tuku ke fakaʻapaʻapaʻi ʻa e nofo malí ʻe he kakai kotoa.” (Lau ʻa e Hepelū 13:4.) ʻE lava ke tau toe fakahāhā ʻa e ʻofa fakatokouá ʻaki ʻetau hoko ʻo maʻa fakaeʻulungaanga. (1 Tīm. 5:1, 2) Ko e fakatātaá, kapau te tau fai feʻauaki mo ha tokoua pe tuofefine, te tau fakameleʻi ai ʻa e tokotaha ko iá mo hono fāmilí. ʻE maumau ai ʻa e falala ʻoku tau maʻu ʻi he haʻohaʻonga hotau fanga tokouá. (1 Tes. 4:3-8) Toe fakakaukau angé ki he anga ʻo e ongoʻi ʻa e uaifí kapau te ne ʻiloʻi ʻoku sio hono husepānití ʻi he ʻata fakalieliá. Te ne ongoʻi ʻoku ʻofa hono husepānití kiate ia pea fakaʻapaʻapaʻi ʻa e fokotuʻutuʻu ki he nofo malí?​—Māt. 5:28.

16. ʻOku anga-fēfē hono tokoniʻi kitautolu ʻe he fiemālie pē ʻi he meʻa ʻoku tau maʻú ʻi hono fakahāhā ʻa e ʻofa fakatokouá?

¹⁶ Hoko ʻo “fiemālie pē ʻi he ngaahi meʻa lolotongá.” (Lau ʻa e Hepelū 13:5.) Ko e falala kia Sihová te ne tokoniʻi ai kitautolu ke fiemālie pē ʻi he meʻa ʻoku tau maʻú. ʻOku anga-fēfē ʻa e tokoni eni kia kitautolu ʻi hono fakahāhā ʻa e ʻofa fakatokouá? ʻI he taimi ʻoku tau fiemālie aí, te tau manatuʻi ai ʻa e mātuʻaki mahuʻinga ange hotau fanga tokoua mo e fanga tuofāfine Kalisitiané ʻi he paʻangá pe ko ha ngaahi meʻa. (1 Tīm. 6:6-8) Heʻikai ai ke tau lāunga fekauʻaki mo hotau fanga tokouá pe fekauʻaki mo hotau tuʻunga ʻi he moʻuí. Pea heʻikai ai ke tau meheka ki he niʻihi kehé pe mānumanu. ʻI hono kehé, ʻi he taimi ʻoku tau fiemālie aí, te tau hoko ai ʻo nima-homo.​—1 Tīm. 6:17-19.

17. ʻE lava fēfē ke tokoni ʻetau “mātuʻaki loto-lahi” ki hono fakahāhā ʻa e ʻofa fakatokouá?

¹⁷ Ke “tau mātuʻaki loto-lahi.” (Lau ʻa e Hepelū 13:6.) Ko e falala kia Sihová te ne ʻomai ai kia kitautolu ʻa e loto-lahi ke kātekina ʻa e ngaahi ʻahiʻahi faingataʻá. ʻOku tokoniʻi kitautolu ʻe he loto-lahi ko ení ke tau maʻu ai ʻa e fakakaukau pau. Pea ʻi he taimi ʻoku tau fakakaukau pau aí, ʻoku lava ai ke tau fakahāhā ʻa e ʻofa fakatokouá ʻaki hono fakalotolahiʻi mo fakafiemālieʻi hotau fanga tokouá mo e fanga tuofāfiné. (1 Tes. 5:14, 15) Naʻa mo e lolotonga ʻa e fuʻu mamahi lahí, ʻe lava ke tau loto-lahi ʻi hono ʻiloʻi ʻoku ofi hotau fakahaofí.​—Luke 21:25-28.

18. ʻE lava fēfē ke tau fakaivimālohiʻi ʻetau ʻofa fakatokouá ki heʻetau kau mātuʻa?

¹⁸ “Manatuʻi ʻa e faʻahinga ʻoku nau takimuʻa ʻiate kimoutolú.” (Lau ʻa e Hepelū 13:7, 17.) Ko e kau mātuʻa ʻi heʻetau fakatahaʻangá ʻoku nau ngāueʻaki honau taimi fakafoʻituituí ke nau ngāue mālohi ai maʻa kitautolu. ʻI heʻetau fakakaukau atu fekauʻaki mo e meʻa kotoa ʻoku nau faí, ʻe tupulekina ai ʻetau ʻofa mo e houngaʻia ʻiate kinautolú. ʻOku ʻikai ʻaupito te tau loto ke ʻai kinautolu ke mole ʻenau fiefiá pe hoko ʻo fakalotomamahiʻi kinautolu koeʻuhí ko ha meʻa ʻoku tau fai. ʻI hono kehé, ʻoku tau loto ke talangofua loto-lelei kia kinautolu. ʻI he founga ko ení ʻoku tau “fakahāhā kiate kinautolu ʻa e fakaʻatuʻi ʻi he ʻofa ʻoku mahulu atu koeʻuhí ko ʻenau ngāué.”​—1 Tes. 5:13.

19, 20. ʻE lava fēfē ke tau hokohoko atu hono fakahāhā ʻa e ʻofa fakatokouá ʻi ha founga lahi angé?

¹⁹ ʻOku ʻiloa ʻa e kakai ʻa Sihová ʻi heʻenau ʻofa fakatokouá. Naʻe pehē pē mo e ʻaho ʻo Paulá. Ka naʻe fakalototoʻaʻi ʻe Paula ʻa e fanga tokouá ke nau fakahāhā ʻa e ʻofá ʻi ha founga lahi ange. Naʻá ne pehē: “Hokohoko atu hono fai iá ke toe kakato ange.” (1 Tes. 4:9, 10) ʻOku hā mahino, ʻoku ʻi ai maʻu pē ʻa e tafaʻaki ke fakaleleiʻi!

²⁰ Ko ia, ʻi heʻetau sio ki heʻetau konga tohi fakataʻú ʻi heʻetau Fale Fakatahaʻangá lolotonga ʻa e taʻu ní, ʻofa ke tau fakalaulauloto ʻi he ngaahi fehuʻi ko ení: ʻE lava ke u toe anga-talitali kakai ange? ʻE lava fēfē ke u tokoniʻi hotau fanga tokoua ʻi he pilīsoné? ʻOku ou fakaʻapaʻapaʻi ʻa e fokotuʻutuʻu ʻa e ʻOtuá ki he nofo malí? Ko e hā te ne tokoniʻi au ke hoko ʻo fiemālie moʻoni ʻi he meʻa ʻoku ou maʻú? ʻE lava fēfē ke u falala lahi ange kia Sihová? ʻE lava fēfē ke u hoko ʻo talangofua lahi ange ki he faʻahinga ʻoku takimuʻá? Kapau te tau ngāue ke fakaleleiʻi ʻa e tafaʻaki ʻe ono ko ení, heʻikai ke hoko ai ʻa e konga tohi fakataʻú ko ha fakaʻilonga pē ʻi he holisí; ka ʻoku fakamanatu mai ai ke tau talangofua ki he ngaahi lea ʻa Paulá: “Tuku ke hokohoko atu ʻa hoʻomou ʻofa fakatokouá.”​—Hep. 13:1.