Vakai! Ko e Sevāniti Ena ʻOku Hōifua Ai ʻa Sihová

“Vakai ko ʻeku sevaniti é, ʻa ia ʻoku; . . . hoifua ai ʻeku moʻui”!—AI. 42:1.

 1. Ko e hā ʻoku fakalototoʻaʻi ʻa e kakai ʻa Sihová ke nau faí, tautefito ʻi he ofi mai ʻa e Fakamanatú, pea ko e hā hono ʻuhingá?

ʻI HE fakaʻau ke ofi atu ki he taimi ke fakamanatu ai ʻa e pekia ʻa Kalaisí, ʻoku fakalototoʻaʻi ʻa e kakai ʻa e ʻOtuá ke nau muimui ʻi he akonaki ʻa e ʻapositolo ko Paulá ʻo “sio fakamamaʻu atu ki he Takimuʻa ʻi he tui mo hono Fakaaʻu, ʻio, ʻa Sisu.” Naʻe toe pehē ʻe Paula: “Seuke, mou fua kimoutolu mo e Toko Taha naʻa ne kataki ʻa e fuʻu angatuʻu pehe fau ko ia ʻa e koto angahala kiate kinautolu, telia naʻa mou mafasia he poʻepoʻea homou laumalie.” (Hep. 12:2, 3) Ko e tokanga ki he ʻalunga faitōnunga ʻo Kalaisí, ʻa ia naʻe aʻu ki hono tumutumú ʻi heʻene feilaulaú, ʻe tokoniʻi fakatouʻosi ai ʻa e kau Kalisitiane paní mo honau kaungāfeohi ko e fanga sipi kehé ke hokohoko atu ʻenau tauhi faitōnunga kia Sihová pea ke nau hao ai mei he ‘poʻepoʻea honau laumalié.’—Fakafehoanaki mo e Kaletia 6:9.

 2. Ko e hā ʻe lava ke tau ako mei he ngaahi kikite ʻa ʻAisea ʻoku felāveʻi mo e ʻAlo ʻo e ʻOtuá?

² Naʻe fakamānavaʻi ʻe Sihova fakafou ʻi he palōfita ko ʻAiseá ha ngaahi kikite hokohoko naʻe felāveʻi hangatonu mo hono ʻAló. Ko e ngaahi kikité ni te ne tokoniʻi kitautolu ke tau “sio fakamamaʻu atu ki he Takimuʻa ʻi he tui mo hono Fakaaʻu,” ʻa Kalaisi Sīsū.a ʻOku ʻomai ai ʻa e fakamaama fekauʻaki mo hono ʻulungāangá, ko ʻene faingataʻaʻiá mo hono hakeakiʻi ia ʻo ne hoko ko hotau Tuʻi mo e Faifakamoʻuí. ʻE fakalahi ai ʻetau mahinoʻi ʻo e Fakamanatú, ʻa ia ʻe kātoangaʻi ʻi he taʻú ni ʻi he Tuʻapulelulu, ʻo ʻEpeleli 9, hili e tō ʻa e laʻaá.

Ko Hono ʻIloʻi ʻo e Sevānití

3, 4. (a) ʻI he tohi ʻa ʻAiseá, ʻoku ʻuhinga ki he hā ʻa e foʻi lea “sevaniti”? (e) ʻOku anga-fēfē hono fakapapauʻi tonu ʻe he Tohi Tapú ʻa e Sevāniti naʻe lave ki ai ʻi he Aisea vahe 42, 49, 50, 52 mo e 53?

³ Ko e foʻi lea “sevaniti” ʻoku ʻasi tuʻo lahi ia ʻi he tohi ʻa Aiseá. ʻOku faʻa ʻuhinga ia ki he palōfitá tonu. (Ai. 20:3; 44:26) ʻOku ngāueʻaki ia ʻi he taimi ʻe niʻihi ki he puleʻanga fakakātoa ʻo ʻIsilelí, pe Sēkopé. (Ai. 41:8, 9; 44:1, 2, 21) Kae fēfē ʻa e ngaahi kikite ʻiloa fekauʻaki mo e Sevānití ʻa ia ʻoku hiki ʻi he Aisea vahe 42, 49, 50, 52 mo e 53? ʻOku fakahaaʻi mahino mai ʻe he Ngaahi Konga Tohi Tapu Faka-Kalisi Kalisitiané ʻa e Sevāniti ko ia ʻa Sihova ʻa ē naʻe fakamatalaʻi ʻi he ngaahi vahe ko iá. ʻOku fakatupu tokangá, ko e ʻōfisa ʻItiopea naʻe lave ki ai ʻi he tohi Ngāué naʻá ne lau ʻa e taha ʻo e ngaahi kikité ni ʻi he taimi naʻe tataki ai ʻe he laumālié ʻa e ʻevangeliō ko Filipé ke ne talanoa kiate iá. Ko e ʻōfisá, ʻi heʻene lau ʻa e kupuʻi Tohi Tapu ʻoku tau maʻu he ʻahó ni ʻi he Aisea 53:7, 8, naʻá ne ʻeke kia Filipe: “Fakamolemole, ka ke tala mai, pe ko e lea ʻeni ʻa e palofita kia hai? kiate ia pe, pe ki ha taha kehe?” Naʻe fakamatalaʻi ange ai pē ʻe Filipe ko e lea ʻa ʻAiseá ʻo fekauʻaki mo e Mīsaiá, ʻa Sīsū.—Ng. 8:26-35.

⁴ Lolotonga e kei pēpē ʻa Sīsuú, naʻe talaki ai ʻe ha tangata māʻoniʻoni ko Simione ʻi he mālohi ʻo e laumālie māʻoniʻoní ʻo pehē ko e “tamasiʻi ko Sīsū” te ne hoko “ko e Maama ke tatalaʻaki ʻa e fakapoʻuli ʻo e Senitaile,” hangē ko ia ne tomuʻa tala ʻi he Aisea 42:6 mo e 49:6. (Luke 2:25-32) ʻIkai ko ia pē, ko e ngaohikovia fakamā naʻe fai kia Sīsū ʻi he pō ʻo hono fakamāuʻí naʻe tomuʻa tala ia ʻi he kikite he Aisea 50:6-9. (Mt. 26:67; Luke 22:63) Hili e Penitekosi 33 T.S., naʻe fakapapauʻi mahino ai ʻe he ʻapositolo ko Pitá ʻa Sīsū ko e “Sevaniti” ʻa Sihova. (Ai. 52:13; 53:11; lau ʻa e Ngāue 3:13, 26.) Ko e hā ʻe lava ke tau ako mei he ngaahi kikite faka-Mīsaia ko ení?

Akoʻi ʻe Sihova ʻEne Sevānití

 5. Ko e hā e ako naʻe maʻu ʻe he Sevānití?

⁵ Ko e taha ʻo e ngaahi kikite ʻa ʻAisea fekauʻaki mo e Sevāniti ʻa e ʻOtuá ʻoku fakahaaʻi ai ʻa e vahaʻangatae fekoekoeʻi ʻi he vahaʻa ʻo Sihova mo hono ʻAlo ne ʻuluaki fakatupú lolotonga ʻa e moʻui ʻa e ʻAló ki muʻa ke ne hoko ko e tangatá. (Lau ʻa e Aisea 50:4-9.) Ko e Sevānití tonu ʻokú ne fakahaaʻi naʻe hokohoko akoʻi ia ʻe Sihova, ʻi heʻene pehē: “ʻOku ne ueʻi hoku telinga ke fanongo hange ha tama ako.” (Ai. 50:4) Lolotonga ʻa e taimi kotoa ko iá, naʻe fanongo ai ʻa e Sevāniti ʻa Sihová ki heʻene Tamaí pea ako meiate ia, ʻo ne hoko ai ko ha ākonga anganofo. Ko ha monū laulōtaha moʻoni ē hono akoʻi ia ʻe he Tokotaha-Fakatupu ʻo e ʻunivēsí!

 6. Naʻe anga-fēfē hono fakahaaʻi ʻe he Sevānití ʻa ʻene anganofo haohaoa ki heʻene Tamaí?

⁶ ʻI he kikite ko ení, ʻoku lave ai ʻa e Sevānití fekauʻaki mo ʻene Tamaí “ko e ʻEiki Hau ko Sihová.” ʻOku fakahaaʻi heni kuo ako ʻe he Sevānití ʻa e moʻoni tefito fekauʻaki mo e tuʻunga-hau fakaleveleva ʻo Sihová. ʻI hono fakahaaʻi ʻa ʻene anganofo haohaoa ki heʻene Tamaí, naʻá ne pehē: “Ko e ʻEiki Hau ko Sihová tonu kuó ne fakaava hoku telingá, pea ko au, ʻi heʻeku tafaʻakí, naʻe ʻikai te u angatuʻu. Naʻe ʻikai te u tafoki ki he tafaʻaki ʻe tahá.” (Ai. 50:5, NW) Naʻá ne ʻi he “tafaʻaki [ʻo Sihová], ko e tufunga lahi” ʻi he fakatupu ʻo e ʻuniveesi matelié mo e tangatá. Ko e “tufunga lahi” ko ení naʻá ne “fiefia ʻi [he ʻao ʻo Sihová] he taimi kotoa pe; ʻo [ne] lata ki he ngaahi potu ʻo hono mamani naʻe nofoʻanga kakai; ʻio, ko [e] neka [ʻa e ʻAlo ʻo e ʻOtuá] naʻe ʻi he hako ʻo Atama.”—Pal. 8:22-31.

 7. Ko e hā ʻokú ne fakahaaʻi mai naʻe falala pau ʻa e Sevānití ki he poupou ʻa ʻene Tamaí lolotonga hono ngaahi ʻahiʻahí?

⁷ Ko e ako ko eni naʻe maʻu ʻe he Sevānití mo ʻene neka ʻi he faʻahinga ʻo e tangatá naʻe teuʻi ai ia ki he taimi naʻe haʻu ai ki māmani ʻo fehangahangai mo e fakafepaki kakahá. Naʻe hokohoko atu ʻene fiefia ke fai ʻa e finangalo ʻo ʻene Tamaí, naʻa mo e ʻi he fehangahangai mo e fakatanga kakahá. (Sāme 40:8; Mt. 26:42; Sione 6:38) ʻI he kotoa ʻo hono ngaahi ʻahiʻahi ʻi he māmaní, naʻe falala pau ai ʻa Sīsū ki he hōifua mo e poupou ʻa ʻene Tamaí. Hangē ko ia ne tomuʻa tala ʻi he kikite ʻa ʻAiseá, naʻe malava ʻa Sīsū ke ne pehē: “Ko e Tokotaha ʻokú ne talaki ʻoku ou māʻoniʻoní ʻoku ofi. Ko hai ʻe lava ke tuʻu mai kiate au? . . . Vakai! Ko e ʻEiki Hau ko Sihová tonu te ne tokoniʻi au.” (Ai. 50:8, 9, NW) Naʻe tokoniʻi moʻoni ʻe Sihova ʻa ʻene Sevāniti faitōnungá ʻi he kotoa ʻo ʻene ngāue fakafaifekau ʻi he māmaní, ʻo hangē ko ia ʻoku fakahaaʻi ʻi he kikite ʻe taha ʻa ʻAisea.

Ngāue Fakafaifekau ʻa e Sevānití ʻi he Māmaní

 8. Ko e hā ʻokú ne fakamoʻoniʻi ko Sīsū ʻa e tokotaha “fili” ʻa Sihová, hangē ko ia naʻe tomuʻa tala ʻi he Aisea 42:1?

⁸ ʻOku tala mai ʻe he lēkooti ʻi he Tohi Tapú ʻa e meʻa naʻe hoko ʻi he taimi naʻe papitaiso ai ʻa Sīsū ʻi he 29 T.S.: “Pea ʻalu hifo kiate ia ʻa e Laumālie Māʻoniʻoni, . . . pea naʻe ai ha leʻo mei he langi naʻe pehē mai, Ko hoku ʻAlo Pele koe, ko koe kuo u hōifua ai.” (Luke 3:21, 22) Naʻe fakapapauʻi mahino ai ʻe Sihova ʻa ʻene tokotaha kuo “fili,” naʻe lave ki ai ʻi he kikite ʻa ʻAiseá. (Lau ʻa e Aisea 42:1-7, “PM.”) Lolotonga ʻene ngāue fakafaifekau ʻi māmaní, naʻe fakahoko ai ʻe Sīsū ʻa e kikité ni ʻi ha tuʻunga fakaofo. ʻI heʻene fakamatala Kōsipelí, naʻe toʻo fakahangatonu ai ʻe Mātiu ʻa e ngaahi lea ʻoku hā ʻi he Aisea 42:1-4 pea ngāueʻaki ia kia Sīsū.—Mt. 12:15-21.

9, 10. (a) Naʻe anga-fēfē hono fakahoko ʻe Sīsū ʻa e Aisea 42:3 lolotonga ʻene ngāue fakafaifekaú? (e) Naʻe anga-fēfē hono “fakahoko ʻa e fakamaau” ʻe Kalaisi lolotonga ʻene ʻi māmaní, pea ko fē taimi te ne ‘fokotuʻu ai ʻi mamani ʻa e fakamāú’?

⁹ Ko e kakai lāuvale ʻi he lotolotonga ʻo e kau Siú naʻe fehiʻanekinaʻi kinautolu ʻe he kau taki lotu Siú. (Sione 7:47-49) Naʻe ngaohikoviʻi ʻa e kakaí pea naʻe lava ke fakahoa ia ki he “kofe kuo foa” pe “vavae ʻoku kohu” ʻi he taimi ʻoku tamatemate aí. Kae kehe, naʻe fakahaaʻi ʻe Sīsū ʻa e manavaʻofa ki he masivá mo e faingataʻaʻiá. (Mt. 9:35, 36) Naʻá ne fai ki he faʻahinga ko iá ha fakaafe anga-ʻofa, ʻo pehē: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu.” (Mt. 11:28) ʻIkai ko ia pē, ko Sīsuú naʻá ne “fakahoko ʻa e fakamaau” ʻaki ʻene akoʻi ʻa e ngaahi tuʻunga ʻa Sihova ki he tonú mo e halá. (Ai. 42:3) Naʻá ne toe fakahaaʻi naʻe fiemaʻu ke ngāueʻaki ʻa e Lao ʻa e ʻOtuá fakataha mo e fakaʻatuʻi pea mo e meesi. (Mt. 23:23) Naʻe toe fakahāhā ʻe Sīsū ʻa e fakamaau totonú ʻi heʻene malanga taʻefilifilimānako ki he koloaʻiá mo e masivá fakatouʻosi.—Mt. 11:5; Luke 18:18-23.

¹⁰ Naʻe toe tala ki muʻa ʻe he kikite ʻa ʻAiseá ko e tokotaha “fili” ʻa Sihová ʻokú ne “fokotuʻu ʻi mamani ʻa e fakamaau.” (Ai. 42:4) Te ne fai vave ʻa e meʻá ni ʻi heʻene fakaʻauha ʻi hono tuʻunga ko e Tuʻi ʻo e Puleʻanga faka-Mīsaiá, ʻa e ngaahi puleʻanga fakapolitikale kotoa pē pea fetongi kinautolu ʻaki ʻene pule māʻoniʻoni ʻaʻaná. Te ne ʻomai ha māmani foʻou, ʻa ia ʻe “nofoʻanga ai ʻa maʻoniʻoni.”—2 Pita 3:13; Tan. 2:44.

“Ko e Maama” mo e “Kovinanite”

11. ʻI he ʻuhinga fē naʻe hoko ai ʻa Sīsū ko ha “maama ki he Senitaile” ʻi he ʻuluaki senitulí, pea ʻoku anga-fēfē ʻene hoko ʻo pehē ʻo aʻu mai ki he lolotonga ní?

¹¹ ʻI hono fakahoko ʻo e Aisea 42:6, naʻe fakamoʻoniʻi moʻoni ʻe Sīsū ʻene hoko “ko e maama ki he Senitaile.” Lolotonga ʻene ngāue fakafaifekau ʻi māmaní, naʻá ne ʻomai ai ʻa e maama fakalaumālie ʻo fakatefito ki he kau Siú. (Mt. 15:24; Ng. 3:26) Ka naʻe fakahaaʻi ʻe Sīsū: “Ko au pe ko e Maama ʻo Māmani.” (Sione 8:12) Naʻá ne hoko ko ha maama fakatouʻosi ki he kau Siú pea ki he ngaahi puleʻangá ʻo ʻikai ngata pē ʻi hono ʻomai ʻa e fakamaama fakalaumālié kae pehē foki ki hono foaki ʻa ʻene moʻui fakaetangata haohaoá ko ha huhuʻi maʻá e faʻahinga kotoa ʻo e tangatá. (Mt. 20:28) Hili ʻene toetuʻú, naʻá ne fekauʻi ʻa ʻene kau ākongá ke nau hoko ko e kau fakamoʻoni kiate ia “ʻo aʻu ki he ngataʻanga ʻo māmani.” (Ng. 1:8) Lolotonga ʻena ngāue fakafaifekaú, naʻe toʻo hangatonu ai ʻe Paula ʻa e kupuʻi lea ko e “maama ki he Senitaile” pea ngāueʻaki ia ki he ngāue fakamalanga naʻá na fakahoko ʻi he faʻahinga ʻikai ko e Siú. (Ng. 13:46-48; fakafehoanaki mo e Aisea 49:6.) Ko e ngāue ko iá ʻoku kei fai ia ʻi hono fakamafola ʻe he fanga tokoua pani ʻo Sīsū ʻi he māmaní pea mo honau kaungāfeohí ʻa e maama fakalaumālié pea tokoniʻi ʻa e kakaí ke nau tui kia Sīsū, ko e “maama ki he Senitaile.”

12. Kuo anga-fēfē hono foaki ʻe Sihova ʻa ʻene Sevānití ko ha “kovinanite ki he kakai”?

¹² ʻI he kikite tatau, naʻe tala ai ʻe Sihova ki heʻene Sevāniti kuo filí: “Te u tauhi koe, pea te u tuku koe ko e kovinanite ki he kakai.” (Ai. 42:6) Naʻe fai ʻe Sētane ʻa e ngaahi feinga kīvoi ke fakaʻauha ʻa Sīsū mo taʻofi ia mei heʻene fakakakato ʻa ʻene ngāue fakafaifekau ʻi he māmaní, ka naʻe tauhi ia ʻe Sihova ʻo aʻu ki he taimi kotofa ke ne pekia aí. (Mt. 2:13; Sione 7:30) Naʻe fokotuʻu hake leva ʻe Sihova ʻa Sīsū ʻo ʻoange kiate ia ha “kovinanite,” pe fuakava ki he kakai ʻi māmaní. Ko e talaʻofa molumalu ko iá naʻe ʻomai ai ʻa e fakapapau ʻe hokohoko atu ʻa e hoko ʻa e Sevāniti faitōnunga ʻa e ʻOtuá ko e “maama ki he Senitaile,” ʻi hono fakatauʻatāinaʻi ʻa e faʻahinga ko ia ʻi he fakapoʻuli fakalaumālié.—Lau ʻa e Aisea 49:8, 9.b

13. ʻI he founga fē naʻe fakahaofi ai ʻe Sīsū “ʻa kinautolu ʻoku nofo he poʻuli” lolotonga ʻene ngāue fakafaifekau ʻi he māmaní, pea ʻoku anga-fēfē ʻene hokohoko atu hono fai iá?

¹³ ʻI he fehoanaki mo e fuakavá ni, ko e Sevāniti kuo fili ʻa Sihová te ne “fakaava ʻa e ngaahi mata ʻoku kui,” “fakahu mai mei he pilisone ʻa e kakai ʻoku haʻi ai” pea fakahaofi “ʻa kinautolu ʻoku nofo he poʻuli.” (Ai. 42:7) Lolotonga ʻene ngāue fakafaifekau ʻi māmaní, naʻe fai ai eni ʻe Sīsū ʻaki ʻene fakaeʻa ʻa e talatukufakaholo fakalotu loí mo hono malangaʻi ʻa e ongoongo lelei ʻo e Puleʻangá. (Mt. 15:3; Luke 8:1) Naʻá ne fakahaofi ai mei he pōpula fakalaumālié ʻa e kau Siu naʻa nau hoko ko ʻene kau ākongá. (Sione 8:31, 32) Kuo ʻomai ʻe Sīsū ʻi he founga meimei tatau, ʻa e fakahaofi fakalaumālie ki he laui miliona ʻo e faʻahinga ʻikai ko e Siú. Kuó ne fekau ki hono kau muimuí ke nau ‘ō, ʻo ngaohi ʻa e ngāhi kakai kotoa pe ko e kau ako,’ ʻo ne palōmesi te ne ʻi hono kau muimuí “ʻo aʻu ki he ngataʻanga ʻo mamani.” (Mt. 28:19, 20) ʻOku tokangaʻi ʻe Kalaisi Sīsū, mei hono tuʻunga fakahēvaní ʻa e ngāue fakamalanga ʻi he māmaní.

Hakeakiʻi ʻe Sihova ʻa e “Sevaniti”

14, 15. Ko e hā naʻe hakeakiʻi ai ʻe Sihova ʻa ʻene Sevānití pea naʻe anga-fēfē ʻene fai iá?

¹⁴ ʻI ha toe kikite ʻe taha fekauʻaki mo ʻene Sevāniti faka-Mīsaiá, ʻoku fakahaaʻi ʻe Sihova: “Vakai, ʻe fai fakapotopoto ʻa ʻeku Sevaniti; te ne fotu, pea te ne mahiki hake, pea te ne maʻolunga ʻaupito.” (Ai. 52:13) ʻI he vakai ki he fakamoʻulaloa mateaki ʻa hono ʻAló ki Hono tuʻunga-haú pea mo ʻene faitōnunga ʻi he malumalu ʻo e ʻahiʻahi taupotu tahá, naʻe hakeakiʻi ia ʻe Sihova.

¹⁵ Naʻe tohi ʻe he ʻapositolo ko Pitá ʻo fekauʻaki mo Sīsū: “ʻOku ne ʻafio mei he toʻomataʻu ʻo e ʻOtua, he kuo ne ʻalu ki he langi; pea ko e kau angelo mo e kau maʻu tuʻunga mo e kau maʻu malohi kuo tuku ki lalo kiate ia.” (1 Pita 3:22) ʻI he tuʻunga meimei tatau, naʻe tohi ʻe he ʻapositolo ko Paulá: “Naa ne fakamoulaloaʻi ia, bea talagofua ki he mate, io, ae mate i he akau. Bea koia kuo hakeakiʻi ai ia e he Otua o lahi aubito, o ne foaki kiate ia ae huafa oku maoluga taha be i he higoa kotoabe: Koeuhi ke tuulutui ki he huafa o Jisu ae tui oia kotoabe oku i he lagi mo mamani, moe lalo mamani; Bea ke fakaha e he elelo kotoabe koe Eiki a Jisu Kalaisi, ke ogoogo lelei ai ae Otua koe Tamai.”—Fili. 2:8-11, PM.

16. Naʻe anga-fēfē hono hakeakiʻi ke “maʻolunga ʻaupito” ʻa Sīsū ʻi he 1914, pea ko e hā kuó ne fakahoko talu mei aí?

¹⁶ ʻI he 1914, naʻe toe hakeakiʻi lahi ange ai ʻe Sihova ʻa Sīsū. Naʻe hakeakiʻi ia ʻo ne “maʻolunga ʻaupito” ʻi he taimi naʻe fakanofo ai ia ʻe Sihova ko e Tuʻi ʻo e Puleʻanga faka-Mīsaiá. (Sāme 2:6; Tan. 7:13, 14) Talu mei ai, mo e hoko ʻa Kalaisi ʻo ‘pule ʻi he lotolotonga ʻo hono ngaahi filí.’ (Sāme 110:2) Naʻá ne ʻuluaki ikunaʻi ʻa Sētane mo ʻene kau tēmenioó, ʻi hono lī hifo kinautolu ki he māmaní. (Fkh. 12:7-12) Pea ʻi heʻene ngāue ko e Kōlesi Lahi Angé, naʻe fakatauʻatāinaʻi ai ʻe Kalaisi ʻa e toenga ʻo hono fanga tokoua pani ʻi he māmaní mei hono pukenimā ʻe “Babilone koe lahi.” (Fkh. 18:2, PM; Ai. 44:28) Kuó ne tataki ha ngāue fakamalanga ʻi māmani lahi ʻa ia kuo iku ai ki hono fakatahatahaʻi ʻa e “toe” ʻo hono fanga tokoua fakalaumālié pea hoko atu ai ki he laui miliona ʻo e “fanga sipi kehe,” ʻa e kaungāfeohi mateaki ʻo e “fanga sipi toko siʻi.”—Fkh. 12:17; Sione 10:16; Luke 12:32.

17. Ko e hā kuo tau ʻilo ʻi he aʻu mai ki he taimi ní ʻi hono ako ʻa e ngaahi kikite ʻa ʻAisea fekauʻaki mo e “sevaniti”?

¹⁷ Ko hono ako ʻo e ngaahi kikite fakaofo ko eni ʻi he tohi ʻa ʻAiseá kuo fakalahi moʻoni ai ʻetau houngaʻia ki hotau Tuʻi mo e Faifakamoʻuí, ʻa Kalaisi Sīsū. Ko ʻene fakamoʻulaloa ko e ʻAlo lolotonga ʻene ngāue fakafaifekau ʻi he māmaní naʻe tapua atu ai ʻa e ako naʻá ne maʻu heʻene nofo ʻi he tafaʻaki ʻo ʻene Tamaí ki muʻa ke ne haʻu ki he māmaní. Kuó ne fakamoʻoniʻi tonu ʻa ʻene hoko ko e “maama ki he Senitaile” ʻi heʻene ngāue fakafaifekaú tonu pea ʻi he ngāue fakamalanga kuó ne tokangaʻi ʻo aʻu tonu mai ki he ʻaho ní. Hangē ko ia te tau hoko atu ki aí, ʻoku fakahaaʻi ʻi ha toe kikite ʻe taha fekauʻaki mo e Sevāniti faka-Mīsaiá te ne faingataʻaʻia pea foaki ʻa ʻene moʻuí ke tau maʻu ʻaonga mei ai, ko e meʻa ʻoku totonu ke tau “tokagaʻi” pe fakakaukau lelei ki ai ʻi he ofi mai ʻa e Fakamanatu ʻo ʻene pekiá.—Hep. 12:2, 3, PM.

[Fakamatala ʻi lalo]

Fakamanatu

• Ko hai ʻa e “sevaniti” naʻe lave ki ai ʻi he ngaahi kikite ʻa ʻAiseá, pea ʻoku anga-fēfē ʻetau ʻiloʻí?

• Ko e hā e ako naʻe maʻu ʻe he Sevānití meia Sihová?

• ʻOku anga-fēfē ʻa e hoko ʻa Sīsū ko e “maama ki he Senitaile”?

• Naʻe anga-fēfē hono hakeakiʻi ʻo e Sevānití?

[Fakatātā ʻi he peesi 21]

Naʻe fakahaaʻi mahino ʻe Filipe ko e “sevaniti” naʻe lave ki ai ʻa ʻAiseá ko Sīsū ko e Mīsaiá

[Fakatātā ʻi he peesi 23]

ʻI hono tuʻunga ko e Sevāniti kuo fili ʻa Sihová, naʻe fakahaaʻi ʻe Sīsū ʻa e manavaʻofa ki he masivá mo e faingataʻaʻiá

[Fakatātā ʻi he peesi 24]

Naʻe hakeakiʻi ʻa Sīsū ʻe heʻene Tamaí pea fakanofo ia ko e Tuʻi ʻo e Puleʻanga faka-Mīsaiá