Ko e Ikuna ʻa e Founga-Lotu Moʻoní ʻOku Ofí Ni

“ʻE hoko ʻa Sihova ko e Tuʻi ʻo Mamani katoa.”​—SĀKALAIA 14:9.

 1. Ko e hā naʻe hokosia ʻe he kau Kalisitiane paní he lolotonga ʻa e Tau I ʻa Māmaní, pea naʻe anga-fēfē ʻa hono ʻosi tala ki muʻa ʻa e meʻá ni?

ʻI HE lolotonga ʻa e tau ʻuluaki ʻa e māmaní, naʻe faingataʻaʻia ai ʻa e kau Kalisitiane paní ʻi he ngaahi faingataʻa lahi mo e ngaahi tuku pilīsone ʻi he nima ʻo e ngaahi puleʻanga naʻe taú. Naʻe fakangatangata fefeka ʻenau ngaahi feilaulau ʻo e fakahīkihiki kia Sihová, pea naʻa nau tō ki ha tuʻunga pōpula fakalaumālie. Ko e kotoa ʻo e ngaahi meʻá ni naʻe tala ia ki muʻa ʻi he Sākalaia 14:​2, ʻa ia ʻoku fakamatala ai ki ha ʻohofi fakavahaʻapuleʻanga ʻo Selusalema. Ko e kolo ʻi he kikite ko ʻení ko “Selusalema fakalangi,” ko e Puleʻanga fakahēvani ʻo e ʻOtuá pea ko e feituʻú “ko e taloni ʻo e ʻOtua mo e Lami.” (Hepelū 12:​22, 28; 13:14; Fakahā 22:3) Naʻe fakafofongaʻi ʻa e kolo ko iá ʻe he kau pani ʻa e ʻOtuá ʻi he māmaní. Ko e faʻahinga anga-tonu ʻo kinautolú naʻa nau hao ʻi he ʻohofi naʻe faí, ʻi he fakafisi ke fakaʻatā kinautolu ke fakaheeʻi “mei he koló.”a

2, 3. (a) Kuo ikuna fēfē ʻa e founga-lotu ʻa Sihová talu mei he 1919? (e) Talu mei he 1935, ko e hā ʻa e fakalaka kuo hokó?

² ʻI he 1919 naʻe fakatauʻatāinaʻi ai ʻa e kau pani anga-tonú mei honau tuʻunga pōpulá, pea naʻa nau fakaʻaongaʻi leva ʻa e vahaʻa taimi nonga ko ia naʻe hoko mai ʻi he hili ʻa e taú. ʻI he tuʻunga ko e kau ʻamipasitoa ʻo e Selusalema fakalangí, naʻa nau puke mai ʻa e faingamālie maʻongoʻonga ke malangaʻi ai ʻa e ongoongo lelei ʻo e Puleʻanga ʻo e ʻOtuá pea ke tokoni ki hono fakatahatahaʻi ʻa e kau mēmipa fakaʻosi ʻo e toko 144,000. (Mātiu 24:14; 2 Kolinitō 5:​20) ʻI he 1931 naʻa nau ohi mai ai ʻa e hingoa Fakatohitapu feʻungamālie ko e Kau Fakamoʻoni ʻa Sihová.​—ʻAisea 43:​10, 12.

³ Talu mei ai, kuo ʻikai ʻaupito holomui ʻa e kau Fakamoʻoni pani ʻa e ʻOtuá. Naʻa mo Hitler mo ʻene kau tau Nasí naʻe ʻikai ke malava ke nau fakalongolongoʻi kinautolu. Neongo ʻa e fakatanga ʻi māmani lahí, kuo ʻomai ʻe heʻenau ngāué ʻa e fua ʻi he kotoa ʻo e māmaní. Tautefito talu mei he 1935, kuo kau fakataha atu kiate kinautolu ʻa e “fuʻu kakai lahi,” naʻe tala ki muʻa ʻi he tohi ʻa Fakahaá. Ko e faʻahingá ni foki ko e kau Kalisitiane ʻosi papitaiso kinautolu pea kuo nau “fō honau kofu, ʻo fakahinehina ʻi he taʻataʻa ʻo e Lami,” ko Sīsū Kalaisi. (Fakahā 7:​9, 14) Kae kehe, ʻoku ʻikai ko e kau pani kinautolu, ʻa ē ʻoku nau ʻamanaki ki he moʻui fakahēvaní. Ko ʻenau ʻamanakí ke nau maʻu ʻa e meʻa naʻe fakamoleki ʻe ʻĀtama mo ʻIví, ʻa ia, ko e moʻui fakaetangata haohaoa ʻi ha māmani palataisi. (Sāme 37:29; Mātiu 25:34) ʻI he ʻahó ni, ko e tokolahi ʻo e fuʻu kakai lahí ʻoku laka hake he ngaahi soulu ʻe nima miliona. Ko e founga-lotu moʻoni ʻa Sihová ʻoku ikuna, ka ʻoku teʻeki ke hoko mai ʻa ʻene ikuna fakaʻosí.

Kau Muli ʻi he Temipale Fakalaumālie ʻo e ʻOtuá

4, 5. (a) Ko fē ʻoku fai ai ʻa e lotu ʻa e fuʻu kakai lahí kia Sihová? (e) Ko e hā ʻa e ngaahi monū ʻoku nau fiefia aí, pea ko hono fakahoko ia ʻo e kikite fē?

⁴ Hangē pē ko ia naʻe ʻosi tala ki muʻá, ko e fuʻu kakai lahí “ʻoku nau tauhi [ki he ʻOtuá] ʻi hono temipale ʻi he ʻaho mo e po.” (Fakahā 7:​15) Koeʻuhi ʻoku ʻikai ko e kau ʻIsileli fakalaumālie mo haʻa taulaʻeiki kinautolu, ʻoku ngalingali naʻe sio ʻa Sione kiate kinautolu ʻoku nau tuʻu ʻi he temipalé ʻi he lotoʻā ʻi tuʻa ʻo e kau Senitailé. (1 Pita 2:5) He lāngilangi lahi ē kuo hoko ki he temipale fakalaumālie ʻo Sihová, ʻi hono fakafonu ʻa hono ngaahi tafaʻakí ʻaki ʻa e fuʻu kakai tokolahi ko ʻeni ʻa ia ʻoku nau kau fakataha mo e toenga ʻo e kau ʻIsileli fakalaumālié ʻi hono fakahīkihikiʻi iá!

⁵ ʻOku ʻikai ke tauhi ʻe he fuʻu kakai lahí ia ʻa e ʻOtuá ʻi he tuʻunga ʻoku fakatātaaʻi ʻe he lotoʻā fakaetaulaʻeiki ʻi lotó. ʻOku ʻikai ke lau kinautolu ʻoku nau māʻoniʻoni ki he taumuʻa ko e hoko ko e ngaahi foha ohi fakalaumālie ʻo e ʻOtuá. (Loma 8:​1, 15) Ka neongo ia, ʻi hono ngāueʻi ʻa e tui ki he huhuʻi ʻa Sīsuú, ʻoku nau ʻi ha tuʻunga maʻa ai ʻi he ʻao ʻo Sihová. ʻOku lau kinautolu ʻoku nau māʻoniʻoní ʻi he taumuʻa ko e hoko ko hono ngaahi kaumeʻa. (Fakafehoanaki mo Sēmisi 2:​21, 23.) ʻOku kau mo kinautolu ʻi hono maʻu ʻa e monū ko hono ʻoatu ʻa e ngaahi feilaulau fakahōifua ʻi he funga ʻōlita fakalaumālie ʻa e ʻOtuá. Ko ia, ʻi he fekauʻaki mo e fuʻu kakai lahí ni, ʻoku fakahoko lāngilangiʻia ai ʻa e kikite ʻa ʻAisea 56:​6, 7: “Ko e meʻa ki he hakoʻi muli kuo luva kia Sihova, ke tauhi kiate ia, pea ke ʻofa ki he huafa ʻo Sihova, . . . talaatu te u ʻomi kinautolu ki hoku moʻunga tapu, pea te u fakafiefiaʻi kinautolu ʻi hoku falelotu; ko ʻenau ngaahi feilaulau-moifua mo ʻenau ngaahi feilaulau kehe ʻe fai ha hoifua ki ai ʻi hoku funga olita: he ko hoku fale ʻe ui ko e falelotu moʻo e ngaahi kakai kotoa pe.”

 6. (a) Ko e hā ʻa e faʻahinga feilaulau ʻoku fai ʻe he kau mulí? (e) Ko e hā naʻe fakamanatu kiate kinautolu ʻe he ʻaiʻanga vai ʻi he lotoʻā fakaetaulaʻeikí?

⁶ Ko e taha ʻi he ngaahi feilaulau ʻoku fai ʻe he kau mulí ni “ko e fua ʻo e loungutu [hangē ko e ʻelitoʻi mahoaʻa naʻe teuteu ki he ngaahi feilaulaú] ʻoku takua hono huafa [ʻo e ʻOtuá]” pea mo e “fai ʻofa mo e fai tokoni.” (Hepelū 13:​15, 16) Ko e fuʻu ʻaiʻanga vai lahi naʻe ngāueʻaki ʻe he kau taulaʻeikí ke fufulu ai kinautolú ko ha toe fakamanatu mahuʻinga ia ki he kau mulí ni. Kuo pau kiate kinautolu foki ke nau moʻulaloa ki he fakamaʻa fakalaumālie mo fakaeʻulungaanga ʻoku fakamāʻalaʻala mahino hokohoko ʻe he Folofola ʻa e ʻOtuá kiate kinautolú.

Ko e Potu Tapú mo Hono Ngaahi Nāunaú

 7. (a) ʻOku anga-fēfē ʻa e vakai ʻa e fuʻu kakai lahí ki he ngaahi monū ʻo e tuʻunga-taulaʻeiki toputapú? (e) Ko e hā ʻa e toe ngaahi monū kuo maʻu ʻe he niʻihi ʻo e kau mulí?

⁷ ʻOku ʻi ai ha kaunga ʻa e Potu Tapú mo hono ngaahi nāunaú ki he fuʻu kakai lahi ko ʻeni ʻo e kau mulí? Sai, ʻe ʻikai ʻaupito te nau ʻi he tuʻunga ʻoku fakatātaaʻi ʻe he Potu Tapú. ʻOku ʻikai te nau fanauʻi foʻou ke hoko ko e ngaahi foha fakalaumālie ʻo e ʻOtuá ki he moʻui ʻi hēvaní. ʻOku ʻai ʻe he meʻá ni kinautolu ke nau ongoʻi meheka pe loto-mānumanu? ʻIkai. Ka, ʻoku nau fiefia ʻi honau monū ko hono poupouʻi ʻa e toenga ʻo e toko 144,000, pea ʻoku nau fakahāhā ʻa e houngaʻia loloto ki he taumuʻa ʻa e ʻOtuá ʻi hono ohi ʻa e ngaahi foha fakalaumālié ni, ʻa ia te nau kau fakataha mo Kalaisi ʻi hono ʻohake ʻa e faʻahinga ʻo e tangatá ki he tuʻunga haohaoá. Pehē foki, ko e fuʻu kakai lahi ʻo e kau mulí ʻoku nau koloaʻaki ʻa e fuʻu ʻofa maʻataʻatā ʻa e ʻOtuá ʻi hono tuku ange kiate kinautolu ha ʻamanaki ki he māmaní ko e moʻui taʻengata ʻi he Palataisí. Ko e niʻihi ʻo e kau mulí ni, ʻoku hangē ko e kau Netinimi ʻo e kuonga muʻá, kuo foaki ange kiate kinautolu ʻa e ngaahi monū ʻo e tuʻunga tauhí ʻi hono tokoniʻi ʻo e tuʻunga-taulaʻeiki toputapú.b (ʻAisea 61:5) ʻOku fili ʻe Sīsū mei he faʻahingá ni ʻa e “gaahi eiki i mamani kotoabe.”​—Sāme 45:​16, PM.

8, 9. Ko e hā ʻa e ʻaonga ʻoku maʻu ʻe he fuʻu kakai lahí mei he fakakaukau atu ki he ngaahi nāunau ʻo e Potu Tapú?

⁸ Neongo ʻe ʻikai ʻaupito ke hū ʻa e fuʻu kakai lahi ʻo e kau mulí ki he Potu Tapu ʻikai fakaetaipé, ʻoku nau ako ʻa e ngaahi meʻa mahuʻinga mei hono ngaahi nāunaú. Hangē pē ko ia naʻe fiemaʻu ki he tuʻunga-maamá ke ʻai maʻu pē ki ai ha lolo, ʻoku pehē pē ʻa hono fiemaʻu ki he kau mulí ʻa e laumālie māʻoniʻoní ke tokoniʻi kinautolu ke nau makupusi ʻa e ngaahi moʻoni fakalakalaka mei he Folofola ʻa e ʻOtuá, ʻoku fakafou mai ʻi he “tamaioeiki agatonu mo boto.” (Mātiu 24:​45-​47, PM) ʻIkai ngata aí, ʻoku tokoniʻi kinautolu ʻe he laumālie ʻo e ʻOtuá ke nau tali ʻa e fakaafé ni: “Ko e Laumalie mo e Taʻahine [ko e toenga ʻo e kau paní] ʻoku na pehe, Haʻu. Pea ko ia ʻoku ne fanongo ke ne pehe, Haʻu. Pea ko ia ʻoku fieinu ke ne haʻu. Pea ko ia ʻoku ne loto ki ai, ke ne toʻo taʻetotongi ʻa e Vaiola.” (Fakahā 22:17) Ko ia, ko e tuʻunga-maamá ko ha fakamanatu ia ki he fuʻu kakai lahí ʻa honau ngafa ke nau ulo atu ko e kau Kalisitiane pea ke nau fakaʻehiʻehi mei ha meʻa pē ʻi he anga ʻo e vakaí, fakakaukaú, leá, pe ngāué ʻe mamahi ai ʻa e laumālie māʻoniʻoni ʻo e ʻOtuá.​—ʻEfesō 4:​30.

⁹ ʻOku fakamanatu ʻe he tēpile ʻo e mā fonó ki he fuʻu kakai lahí kuo pau ke nau maʻu tuʻumaʻu ʻa e meʻakai fakalaumālie mei he Tohitapú pea mei he ngaahi tohi ʻa e “tamaioeiki agatonu mo boto” ka nau kei ʻi he tuʻunga moʻui lelei fakalaumālié. (Mātiu 4:4) ʻOku fakamanatu kiate kinautolu ʻe he ʻōlita ʻo e ʻinisēnisí ʻa e mahuʻinga ʻo e lotu tōtōivi kia Sihova ʻo kole ha tokoni ke nau kei tauhi ai pē ʻenau mateaki-angatonú. (Luke 21:36) ʻOku totonu ke fakakau ʻi heʻenau ngaahi lotú ʻa e ngaahi fakahā ongoʻiloto ʻo e fakahīkihiki mo e fakamālō. (Sāme 106:1) ʻOku toe fakamanatu kiate kinautolu ʻe he ʻōlita ʻinisēnisí ʻa hono fiemaʻu ke fakahīkihikiʻi ʻa e ʻOtuá ʻi he ngaahi founga kehe, ʻo hangē ko hono fakafou ʻi heʻenau hivaʻi ʻaufuatō ʻa e ngaahi hiva ʻo e Puleʻangá ʻi he ngaahi fakataha faka-Kalisitiané pea ʻi heʻenau mateuteu lelei ke fai ola lelei ʻa e “fakaha ʻaki ʻa e ngutu ke maʻu ʻa e fakamoʻui.”​—Loma 10:10.

Ko e Ikuna Kakato ʻa e Founga-Lotu Moʻoní

10. (a) Ko e hā ʻa e ʻamanaki maʻongoʻonga ʻoku malava ke tau fakatuʻotuʻa atu ki aí? (e) Ko e hā ʻa e meʻa kuo pau ke ʻuluaki hokó?

¹⁰ ʻI he ʻahó ni ʻoku tafe ki he fale ʻo e founga-lotu ʻa Sihová ʻa e “ngaahi kakai lahi” mei he ngaahi puleʻanga kotoa pē. (ʻAisea 2:​2, 3) ʻI hono fakapapauʻi ʻo e meʻá ni, ʻoku fakahā ʻe he Fakahā 15:4: “Ko hai ʻe ʻikai ʻapasia ki he ʻAfiona, mo fakahikihikiʻi ho huafa? He ko koe toko taha ʻoku maʻoniʻoni: pea ʻe haʻu kotoa pē ʻa e ngaahi kakai, ʻo punou ʻi ho ʻao; koeʻuhi kuo fakaeʻa hoʻo maʻoniʻoni.” ʻOku fakamatala ʻa e Sākalaia vahe 14 ki he meʻa ʻe hoko mai aí. ʻI he kahaʻu ofi maí ni, ʻe aʻu ai ʻa e fakakaukau kovi ʻa e tokolahi ʻo e kakai ʻi he māmaní ki ha tumutumu ʻi heʻenau fakatahataha fakaʻosi ke fai tau ki Selusalema​—ko e kau fakafofonga ʻo e Selusalema fakalangí ʻoku nau ʻi he māmaní. ʻE toki ngāue mai leva ʻa Sihova. ʻI he tuʻunga ko ha ʻOtua-Faitau, te ne ‘haʻele atu ʻo tau mo e ngaahi puleʻanga ko ia’ ʻoku nau fakatoʻotoʻa ke fai ʻa e ʻohofi ko ʻení.​—Sākalaia 14:​2, 3.

11, 12. (a) Ko e hā ʻe fai ʻe Sihova ki he ʻoho fakalūkufua ko ia ʻe hoko mai ki he kau lotu ʻi hono temipalé? (e) Ko e hā ʻe iku ki ai ʻa e tau ʻa e ʻOtuá?

¹¹ “Ko eni ʻa e mala, ʻa ia ʻe taʻiʻaki ʻe Sihova ʻa e ngaahi kakai kehekehe kuo fai tau mo Selusalema: ʻe popo honau kakano lolotonga ʻoku nau kei tuʻuʻaki honau vaʻe, pea ʻe ʻauha honau ngaahi foʻimata ʻi honau ʻana, pea ʻe ʻaunga honau ʻelelo ʻi honau ngutu. Pea ka hoko ʻa e ʻaho ko ia, ʻe ai ha fuʻu fakaʻohovale ʻa Sihova kiate kinautolu; pea ʻe puke ʻe é ʻa e nima ʻo é, pea hikita ʻa e nima ʻo é ki he nima ʻo é.”​—Sākalaia 14:​12, 13.

¹² Pe ko ha mala moʻoni ʻeni pe fakaefakatātā, kuo pau pē ke tau tatali ʻo sio. Kae kehe, ʻoku ʻi ai ʻa e meʻa ʻe taha ʻoku pau. ʻI he ngaʻunu ʻa e ngaahi fili ʻo e ʻOtuá ke fai ʻenau ʻoho fakalūkufua ki he kau sevāniti ʻa Sihová, ʻe taʻofi kinautolu ʻaki ʻa e ngaahi fakahāhā fakamanavahē ʻo e mafai aoniu ʻo e ʻOtuá. ʻE fakasīlongoʻi honau ngaahi ngutú. ʻE hangē ne ʻaunga honau ngaahi ʻelelo naʻe talitalituʻú. ʻE hoko ʻenau taumuʻa fāʻūtahá ʻo nenefu ki heʻenau vakaí, ʻo hangē ne ʻauha honau ngaahi foʻi matá. Ko honau ngaahi mālohi fakaesinó, ʻa ia naʻá ne fakalotolahiʻi kinautolu ke nau fai ʻa e ʻohó, ʻe mole atu ia. ʻI he puputuʻú, te nau toe fetāʻaki pē ʻo hoko ai ha tāmate tangata lahi. Ko ia ai, ko e ngaahi fili fakamāmani kotoa pē ʻo e founga-lotu ʻa e ʻOtuá ʻe fakaʻauha atu ia. Fakaʻosí, ʻe ʻosi fakamālohiʻi ke nau lāuʻilo ki he tuʻunga-hau fakaleveleva ʻo Sihová. ʻE fakahoko ai ʻa e kikité: “ʻE hoko ʻa Sihova ko e Tuʻi ʻo Mamani katoa.” (Sākalaia 14:9) ʻI he hili iá, ʻe haʻi ʻa Sētane mo ʻene kau tēmenioó pea ʻe kamata leva ʻa e Pule Taʻu ʻe Taha Afe ʻa Kalaisí ʻaki ʻa e ngaahi tāpuaki lahi ʻoku tuku tauhi mai maʻá e faʻahinga ʻo e tangatá.​—Fakahā 20:​1, 2; 21:​3, 4.

Ko e Toetuʻu Fakaemāmaní

13. Ko hai ʻa e faʻahinga ko e “toe ʻi he ngaahi puleʻanga”?

¹³ ʻOku hoko atu ʻa e kikite ʻa Sākalaiá ʻi he vahe 14, veesi 16: “ʻE hoko ʻo pehe, ʻilonga ha toe ʻi he ngaahi puleʻanga naʻe haʻu ke tauʻi ʻa Selusalema, te nau ʻalu hake ʻi he taʻu kotoa pe ke hu kia Kingi Sihova Sapaoti, pea ke fai ʻa e katoanga falelouʻakau.” Fakatatau ki he Tohitapú, ko e kakai kotoa pē ʻoku moʻui he ʻahó ni ʻa ia ʻe hokohoko atu ʻenau moʻuí ʻo aʻu ki he ngataʻanga ʻo e fokotuʻutuʻu fulikivanú ni pea nau kei hoko ko e ngaahi fili ʻo e founga-lotu moʻoní te nau inumia ʻa e fakamāu ko e “tautea taʻengata.” (2 Tesalonaika 1:​7-9; toe sio ki he Mātiu 25:​31-​33, 46.) ʻE ʻikai te nau toetuʻu. Ko ia, ʻoku hangehangē ko e faʻahinga ʻoku “toe” ʻoku kau ai ʻa e ngaahi mēmipa ʻo e ngaahi puleʻangá ʻa ia naʻa nau mate ki muʻa ʻi he tau fakaʻosi ʻa e ʻOtuá pea ʻoku nau maʻu ha ʻamanaki makatuʻunga ʻi he Tohitapú ki ha toetuʻu. “ʻOku ʻunu mai ha taimi,” ko e talaʻofa ia ʻa Sīsuú, “ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.”​—Sione 5:​28, 29.

14. (a) Ko e hā kuo pau ke fai ʻe he kau toetuʻú ka nau maʻu ʻa e moʻui taʻengatá? (e) Ko e hā ʻe hoko ki ha faʻahinga ʻe fakafisi ke fakatapui kinautolu kia Sihova mo fai ʻa e founga-lotu moʻoní?

¹⁴ Ko e faʻahinga kotoa ko ʻeni ʻe toetuʻú kuo pau ke nau fai ʻa e meʻa kae lava ke iku ʻenau toetuʻú ko e toetuʻu ke moʻui kae ʻikai ʻo e fakamaau fakamamahi. Kuo pau ke nau haʻu ki he ngaahi lotoʻā fakaemāmani ʻo e temipale ʻo Sihová ʻo punou ʻi he fakatapui ki he ʻOtuá fakafou ʻia Sīsū Kalaisi. Ko ha taha toetuʻu pē ʻe fakafisi ke ne fai ʻa e meʻá ni te ne faingataʻaʻia ʻi he mala tatau pē ko ia ʻoku hoko ki he ngaahi puleʻanga lolotonga ní. (Sākalaia 14:18) Ko hai ʻokú ne ʻilo pe ko e toko fiha ʻo e kau toetuʻú te nau kau fiefia fakataha mo e fuʻu kakai lahí ʻi hono kātoangaʻi ʻa e Kātoanga Falelouʻakau ʻikai fakaetaipé? ʻOku ʻikai ha veiveiua, ʻe tokolahi, pea ko hono olá ʻe hoko ʻa e temipale lahi fakalaumālie ʻo Sihová ʻo toe lāngilangiʻia lahi ange!

Ko e Kātoanga Falelouʻakau ʻIkai Fakaetaipé

15. (a) Ko e hā ʻa e niʻihi ʻo e ngaahi konga tuʻu-ki-muʻa ʻo e Kātoanga Falelouʻakau ʻa ʻIsileli ʻi he kuonga muʻá? (e) Ko e hā naʻe feilaulauʻaki ai ʻa e fanga pulu tangata ʻe toko 70 ʻi he lolotonga ʻa e kātoangá?

¹⁵ ʻI he taʻu taki taha, naʻe fiemaʻu ai ki he kau ʻIsilelí ke nau kātoangaʻi ʻa e Kātoanga Falelouʻakaú. Naʻe fai ia ʻi he uike ʻe taha ʻi he fakaʻosiʻosi ʻo ʻenau taimi ututaʻú. Naʻe hoko ia ko ha taimi fakafiefia ʻo e fakamālō. ʻI he kotoa ʻo e fuoloa ʻo e foʻi uike ʻe tahá, naʻa nau nofo pē ʻi he fanga kiʻi palepale louʻakau fakataimi naʻe ʻato ʻaki ʻa e ngaahi lauʻiʻakau, tautefito ki he ngaahi vaʻa paamé. Naʻe fakamanatu ʻe he kātoangá ni ki he kau ʻIsilelí ʻa e founga naʻe fakahaofi ai ʻe he ʻOtuá ʻenau ngaahi kuí mei ʻIsipité pea mo e founga naʻá ne tokangaʻi ai kinautolu ʻi heʻenau nofo ʻi he fanga kiʻi palepale louʻakau he lolotonga ʻenau fononga holo ʻi he toafá ʻi he taʻu ʻe 40 pea nau toki tūʻuta ki he Fonua ʻo e Talaʻofá. (Livitikō 23:​39-​43) ʻI he lolotonga ʻo e kātoangá, naʻe feilaulau ʻaki ai ha fanga pulu tangata ʻe toko 70 ʻi he ʻōlita ʻi he temipalé. ʻOku hā mahino, ko e konga ko ʻeni ʻo e kātoangá naʻe tuʻu fakaekikite mai ia ki he ngāue fakahaofi-moʻui haohaoa mo kakato naʻe fakahoko ʻe Sīsū Kalaisí. Ko e ngaahi ʻaonga ʻo ʻene feilaulau huhuʻí ʻe tafe māmālie mai ia ki he tokolahi taʻefaʻalaua ʻo e ngaahi hako ʻo e ngaahi fāmili ʻe 70 ʻo e faʻahinga ʻo e tangatá naʻe tupu mai meia Noá.​—Sēnesi 10:​1-​29; Nōmipa 29:​12-​34; Mātiu 20:28.

16, 17.(a) Naʻe kamata ʻanefē ʻa e Kātoanga Falelouʻakau ʻikai fakaetaipé, pea naʻe anga-fēfē ʻene hokó? (e) ʻOku fēfē ʻa e kau ʻa e fuʻu kakai lahí ʻi he kātoangá?

¹⁶ Ko ia naʻe tuhu mai ʻa e Kātoanga Falelouʻakau ʻo e kuonga muʻá ki hono fakatahatahaʻi fiefia ʻa e kau angahala kuo huhuʻí ki he temipale lahi fakalaumālie ʻo Sihová. Ko e ʻikai fakaetaipe ʻa e kātoangá ni naʻe kamata ia ʻi he Penitekosi ʻi he 33 T.S. ʻi hono kamata ai ʻa hono fakatahatahaʻi fiefia ʻo e kau ʻIsileli fakalaumālié ki he fakatahaʻanga Kalisitiané. (Ngāue 2:​41, 46, 47) Naʻe houngaʻia ai ʻa e kau paní ʻa ia naʻa nau hoko ko e kau “muli” ʻi he māmani ʻo Sētané koeʻuhi ko honau “kolo ʻoku tuʻu ʻi langi.” (1 Pita 2:​11; Filipai 3:​20) Naʻe fakapōpōʻuliʻi fakataimi ʻa e kātoanga fiefiá ʻe he tafoki ko ia mei he moʻoní naʻe tupu mei hono fokotuʻu ʻo Puleʻanga-Haʻa-Kalisitiané. (2 Tesalonaika 2:​1-3) Kae kehe, naʻe hoko atu ʻa e kātoangá ʻi he 1919 ʻaki hono fakatahatahaʻi fiefia ʻa e kau mēmipa fakaʻosi ʻo e kau ʻIsileli fakalaumālie ʻe toko 144,000, pea hoko mai aí ko e fuʻu kakai tokolahi fakavahaʻapuleʻanga ʻo e Fakahā 7:9.

¹⁷ Ko e fuʻu kakai lahí ʻoku fakamatalaʻi ʻoku nau toʻo ʻa e ngaahi vaʻa paame ʻi honau nimá, ʻa ia ʻoku fakahaaʻi ai ʻoku nau kau mo kinautolu ʻi he kau kātoangaʻi fiefia ʻo e Kātoanga Falelouʻakau ʻikai fakaetaipé. ʻI he tuʻunga ko e kau Kalisitiane fakatapuí, ʻoku nau kau fiefia ʻi he ngāue ko hono fakatahatahaʻi mai ʻa e kau lotu tokolahi ange ki he temipale ʻo Sihová. ʻIkai ngata aí, ʻi he tuʻunga ko e kau angahalá, ʻoku nau houngaʻia ʻoku ʻikai te nau maʻu ha ngaahi totonu ke nofo tuʻuloa ʻi he māmaní. Ko kinautolu, fakataha mo e faʻahinga ʻe toetuʻu hake ʻi he kahaʻú, kuo pau ke nau hanganaki ngāueʻi ʻa e tui ki he feilaulau huhuʻi ʻa Kalaisí kaeʻoua kuo nau aʻu ki he tuʻunga haohaoa fakaetangatá ʻi he ngataʻanga ʻo e Pule Taʻu ʻe Taha Afe ʻa Kalaisí.​—Fakahā 20:5.

18. (a) Ko e hā ʻe hoko ʻi he ngataʻanga ʻo e Pule Taʻu ʻe Taha Afe ʻa Sīsū Kalaisí? (e) ʻE anga-fēfē ʻa e ikuna fakaʻosi ʻa e founga-lotu moʻoni ʻa Sihová?

¹⁸ Hili iá, ko e kau lotu ko ia ʻa e ʻOtuá ʻi he māmaní, te nau tuʻu ʻi hono ʻaó ʻi he tuʻunga haohaoa fakaetangata ʻo ʻikai toe fiemaʻu ai ha tuʻunga-taulaʻeiki fakahēvani. ʻE hoko mai leva ʻa e taimi ʻa ia ʻe hanga ai ʻe Sīsū Kalaisi ʻo “tukuange ʻe ia ʻa e puleʻanga ki he ʻOtua, ʻio, ki he Tamai.” (1 Kolinitō 15:24) ʻE tukuange mai leva ʻa Sētane “ʻo fuoloa siʻi” ke ne ʻahiʻahiʻi ʻa e faʻahinga ʻo e tangata haohaoá. ʻE fakaʻauha taʻengata ha kau taʻeangatonu, fakataha mo Sētane mo ʻene kau tēmenioó. Ko e faʻahinga te nau kei anga-tonú ʻe foaki kiate kinautolu ʻa e moʻui taʻengatá. Te nau hoko leva ko e kau nofo tuʻuloa ʻi he Palataisi fakaemāmaní. ʻE hoko ai ʻa e Kātoanga Falelouʻakau ʻikai fakaetaipé ki ha fakamulituku lāngilangiʻia, mo lavameʻa. ʻE ikuna leva ʻa e founga-lotu moʻoní ki he lāngilangi taʻengata ʻa Sihová mo e fiefia taʻengata ʻa e faʻahinga ʻo e tangatá.​—Fakahā 20:​3, 7-​10, 14, 15.

[Fakamatala ʻi lalo]

Ngaahi Fehuʻi Fakamanatu

◻ Naʻe anga-fēfē ʻa hono ʻohofi ʻo “Selusalema” he lolotonga ʻa e ʻuluaki tau ʻa e māmaní?​—Sākalaia 14:2.

◻ Ko e hā kuo hoko ki he kakai ʻa e ʻOtuá talu mei he 1919?

◻ Ko hai ʻi he ʻahó ni ʻoku kau ʻi hono kātoangaʻi ʻa e Kātoanga Falelouʻakau ʻikai fakaetaipé?

◻ ʻE anga-fēfē ʻa e ikuna fakaʻaufuli ʻa e founga-lotu moʻoní?