Kuó Ke Liliu?

“Ke fai homou liliú ʻaki hono fakafoʻou homou ʻatamaí.”—LOMA 12:2.

ʻE LAVA KE KE FAKAMATALAʻI?

Ko e hā ʻoku fiemaʻu ai ki he kau Kalisitiane kotoa pē ke liliú?

Ko e hā ʻa e liliu kuo pau ke fai ʻe he Kalisitiane taki taha?

ʻE lava fēfē ke tau fai ʻa e liliu ʻoku tau fiemaʻú?

1, 2. ʻOku anga-fēfē hono tākiekina ʻetau moʻuí ʻe hotau ʻātakaí mo e founga naʻe ʻohake ai kitautolú?

ʻOKU tākiekina kotoa kitautolu ʻe hotau ʻātakaí mo e founga naʻe ʻohake ai kitautolú, ʻa ia ko hotau ngaahi kaungāmeʻá, hotau anga fakafonuá, mo e feituʻu ʻoku tau nofo aí. Ko e ʻuhinga ia ʻoku tau saiʻia ai ʻi he ngaahi meʻakai pau mo e ʻuhinga ʻoku tau ʻai vala mo tōʻonga ai ʻi ha founga pau.

² Ka ʻoku ʻi ai ʻa e ngaahi meʻa ʻe niʻihi ʻoku mahuʻinga ange ia ʻi he founga ʻoku tau ʻai vala aí pe ko e meʻa ʻoku tau kaí. Ko e fakatātaá, ʻi heʻetau tupu haké, naʻe akoʻi kitautolu ʻoku tonu ʻa e ngaahi meʻa ʻe niʻihi pea ʻoku hala ʻa e ngaahi meʻa ʻe niʻihi. Ka ʻoku maʻu ʻe he kakai kehekehe ʻa e ngaahi fakakaukau kehekehe fekauʻaki mo e meʻa ʻoku tonú mo e meʻa ʻoku halá. ʻOku toe tākiekina ʻe hotau konisēnisí ʻa e ngaahi fili ʻoku tau faí. ʻOku pehē ʻe he Tohi Tapú ko e ‘kakai ʻo e ngaahi puleʻangá ʻa ia ʻoku ʻikai te nau maʻu ʻa e laó ʻoku nau faʻa fai fakanatula ʻa e ngaahi meʻa ʻo e laó.’ (Loma 2:14) Ka ʻo kapau ʻoku ʻikai ke ʻi ai ha lao pau mei he ʻOtuá, ʻe lava ke tau muimui pē ki he ngaahi tuʻunga ʻa hotau fāmilí pe muimui ki he ngaahi tuʻunga ʻoku angamaheniʻaki ʻi he feituʻu ʻoku tau nofo aí?

 3. ʻOmai ʻa e ʻuhinga ʻe ua ʻoku ʻikai ke muimui ai pē ʻa e kau Kalisitiané ki he ngaahi tuʻunga ʻo e māmaní.

³ ʻOku ʻi ai ʻa e ʻuhinga mahuʻinga ʻe ua ʻoku ʻikai ke fai pehē ai ʻa e kau Kalisitiané. ʻUluakí, ʻoku pehē ʻe he Tohi Tapú: “ʻOku ai ha hala ʻoku matamata totonu ki he tangata, ka ʻoku tuʻulu atu ki he ngaahi hala ʻoku fakatau ki he mate.” (Pal. 16:25) Koeʻuhí ʻoku tau taʻehaohaoa, ʻoku ʻikai malava ke tau tataki haohaoa hotau ngaahi halá. (Pal. 28:26; Sel. 10:23) Uá, ʻoku pehē ʻe he Tohi Tapú ko Sētané ko e “ʻotua ʻo e fokotuʻutuʻu ko ʻení.” ʻOkú ne puleʻi ʻa e ngaahi tuʻunga ʻo e māmaní, ʻa ia, ko e meʻa ʻoku fakakaukau ʻa e māmaní ʻoku tonú pe halá mo e meʻa ʻoku manakoá. (2 Kol. 4:4; 1 Sio. 5:19) Kapau ʻoku tau loto ke ʻai ke fiefia ʻa Sihova pea loto ke ne tāpuakiʻi kitautolu, kuo pau ke tau talangofua ki he meʻa ʻoku leaʻaki ʻi he Loma 12:2.—Lau.

 4. Ko e hā te tau lāulea ki ai ʻi he kupu ko ení?

⁴ ʻE lāulea ʻa e kupu ko ení ki he poini mahuʻinga ʻe tolu ʻoku lave ki ai ʻi he Loma 12:2. Ko e (1) Ko e hā ʻoku fiemaʻu ai ke tau “liliu”? (2) Ko e hā ʻa e meʻa ʻoku tau fiemaʻu ke liliú? (3) ʻE lava fēfē ke tau liliu?

KO E HĀ ʻOKU FIEMAʻU AI KE TAU LILIÚ?

 5. Ko hai naʻe tohi ki ai ʻe Paula ʻa e akonaki ʻi he Loma 12:2?

⁵ ʻI he taimi naʻe hiki ai ʻe Paula ʻa e tohi ki he kau Lomá ʻi he taʻu 56, naʻe ʻikai te ne hiki ha tohi ki he kakai kotoa ʻi Lomá. Naʻá ne tohi ki he kau Kalisitiane pani naʻe nofo ʻi aí. (Loma 1:7) Naʻá ne ekinaki kia kinautolu ke nau liliu pea “tuku ʻa e fakaangatatau ki he fokotuʻutuʻu ko ení.” ʻOku kau ki he “fokotuʻutuʻu” naʻá ne tohi fekauʻaki mo iá ʻa e meʻa naʻe fakakaukau ʻa e kakai ʻi Lomá naʻe tonú mo halá pea pehē ki heʻenau ngaahi anga fakafonuá, tōʻongá, mo e founga ʻai valá. Naʻe pehē ʻe Paula ke “tuku ʻa e fakaangatatau” koeʻuhí naʻe ʻi ai ʻa e fanga tokoua mo e fanga tuofāfine naʻa nau kei ngāue mo fakakaukau hangē ko e kau Lomá. Naʻe anga-fēfē hono tākiekina kinautolú?

6, 7. ʻI he ʻaho ʻo Paulá, ko e hā naʻe faingataʻa ai ke hoko ko ha Kalisitiane ʻi Lomá?

⁶ ʻI he ʻaʻahi ʻa e kau folau ʻeveʻevá he ʻahó ni ki Lomá, ʻoku nau sio ai ki he toetoenga ʻo e ngaahi temipalé, ngaahi faʻitoká, mo e ngaahi maka fakamanatu ʻa ia naʻe langa ʻi he ngaahi taʻu ʻe laui afe ki muʻá. ʻOku tokoniʻi kitautolu ʻe he ngaahi langa ko ení ke tau ako ʻa e meʻa lahi ange fekauʻaki mo e anga ʻo e moʻui mo e lotu ʻa e kakai ʻi Loma he kuonga muʻá. ʻI he ngaahi tohi hisitōliá ʻoku tau lau ai fekauʻaki mo e ngaahi vaʻinga tau ki he maté, ngaahi lova saliote, mo e ngaahi faiva mo e ngaahi hiva naʻe faʻa taʻetaau. Ko Lomá ko ha kolo tuʻumālie ʻa ia ko e kakaí naʻe lahi honau ngaahi faingamālie ke fakatupu paʻanga.—Loma 6:21; 1 Pita 4:3, 4.

⁷ Naʻe maʻu ʻe he kau Lomá ʻa e ngaahi temipale lahi pea lotu ki he ngaahi ʻotua tokolahi, ka ko e tokolahi taha ʻo e kakaí naʻe ʻikai te nau feinga ke maʻu ha vahaʻangatae moʻoni mo vāofi mo honau ngaahi ʻotuá. Ko e lotu ʻa e kau Lomá naʻe fiemaʻu tefito ke nau kau ʻi he ngaahi ouau, hangē ko ia ʻi he ngaahi ʻaho fāʻeleʻí, ngaahi nofo malí, pe ngaahi putú. Ko e ngaahi ouau ko ení ko e konga ia ʻenau moʻui fakaʻahó. Kuo pau pē naʻe mātuʻaki faingataʻa ki he kau Kalisitiane ʻi Lomá. Naʻe ʻohake ʻa e tokolahi ʻo kinautolu ke lotu ki he ngaahi ʻotua loi, ko ia naʻe pau ke nau fai ʻa e ngaahi liliu ke hoko ko e kau Kalisitiané. Naʻa mo e hili ʻenau papitaisó, naʻe kei ʻi ai pē ʻa e ngaahi liliu ke nau fai.

 8. Ko e hā ko ha feituʻu fakatuʻutāmaki ai ʻa e māmani ʻo e ʻaho ní ki he kau Kalisitiané?

⁸ ʻI he tuʻunga meimei tatau, ko e māmani he ʻaho ní ko ha feituʻu fakatuʻutāmaki ia ki he kau Kalisitiané. Ko e hā hono ʻuhingá? Koeʻuhí ko e laumālie ʻo e māmaní ʻoku ʻi he feituʻu kotoa pē. (Lau ʻa e ʻEfesō 2:2, 3; 1 Sione 2:16.) ʻOku feinga ʻa e māmaní ke tākiekina kitautolu ʻaki ʻene ngaahi holí, fakakaukaú, ngaahi tuʻungá mo e ngaahi ʻulungāngá, pea ʻoku tau ʻi ha tuʻunga fakatuʻutāmaki maʻu pē ʻo e hoko ko e konga ʻo e māmaní. Ko ia ʻoku fiemaʻu moʻoni ke tau talangofua ki he akonaki ke “tuku ʻa e fakaangatatau ki he fokotuʻutuʻu ko ení” pea “liliu.” Ko e hā kuo pau ke tau fai ke liliú?

KO E HĀ ʻA E MEʻA ʻOKU TAU FIEMAʻU KE LILIÚ?

 9. Ko e hā ʻa e ngaahi liliu ʻoku fai ʻe he tokolahi koeʻuhí ke nau taau ai ke papitaisó?

⁹ ʻI he ako ʻe ha tokotaha ʻa e Tohi Tapú pea ngāueʻaki ʻa e meʻa ʻokú ne akó, ʻoku kamata ke ne ʻunuʻunu ofi ange ai kia Sihova. ʻOkú ne mavahe mei he lotu loí pea fai ʻa e ngaahi liliu ʻi heʻene moʻuí. ʻOkú ne ngāue mālohi ke fakatupulekina ʻa e angaʻitangata foʻoú pea faʻifaʻitaki kia Sīsū. (ʻEf. 4:22-24) ʻOku tau fiefia ʻi hono fai ʻe he kakai ʻe laui kilu ʻa e faʻahinga fakalakalaka ko ení ʻi he taʻu taki taha, ʻo fakatapui kinautolu kia Sihova ko e ʻOtuá, pea papitaiso. ʻOku ʻai moʻoni ai heni ʻa Sihova ke fiefia. (Pal. 27:11) Ka ko e ngaahi liliu pē eni kuo pau ke fai ʻe ha tokotaha?

10. Ke hoko ʻo liliú ko e hā ʻoku ʻikai ko hono fai pē hano fakaleleiʻi kitautolú?

¹⁰ Ke hoko ʻo liliú ʻoku ʻikai ko hono fai pē ha fakalakalaka pe fakaleleiʻi kitautolu. Ko e fakatātaá, ko ha koloa ʻi he māketí kuo leipolo nai ʻo pehē “fakaleleiʻi,” ʻa ia, ko e koloá kuo liliu ke lelei ange. Ka ko e anga-mahení ko e tānaki atu pē ha meʻa foʻou ʻe taha pe ko ʻene ʻi ha kofukofu foʻou pē. Ko e koloá ʻoku meimei tatau pē ia mo ia ki muʻá. ʻOku pehē ʻe ha tikisinale Fakatohitapu ko e foʻi lea ko e “liliu” ʻi he Loma 12:2 ʻoku kau ki ai ʻa hono fakafoʻou pe liliu ʻetau fakakaukaú ʻe he mālohi ʻo e laumālie māʻoniʻoní. Ko ia ko ha Kalisitiane ʻoku ʻikai ke ne liliú pē ʻi heʻene taʻofi ʻene ngaahi tōʻonga fakatupu maumaú, lea koví, pe ʻulungaanga taʻetāú. Ko e kakai ʻe niʻihi ʻa ia ʻoku ʻikai te nau ʻilo ʻa e meʻa ʻoku leaʻaki ʻe he Tohi Tapú ʻoku nau feinga ke fakaʻehiʻehi mei he ngaahi meʻa kovi ko ení. Ko ia, ko e hā leva ʻoku fiemaʻu ke tau fai ʻi he tuʻunga ko e kau Kalisitiané ke liliú, pe ke liliu ʻa e founga ʻetau fakakaukaú mo e ongoʻí?

11. Ko e hā naʻe leaʻaki ʻe Paula naʻe fiemaʻu ki ha tokotaha ke liliú?

¹¹ “Ke fai homou liliú ʻaki hono fakafoʻou homou ʻatamaí,” ko e tohi ia ʻa Paulá. Ko e “ʻatamaí” ʻoku ʻuhinga ia ki heʻetau malava ke fakakaukaú. Ka ʻi he Tohi Tapú, ʻoku toe kau ki ai ʻa e meʻa ʻoku tau saiʻia ke fakakaukau ki aí kae pehē ki heʻetau tōʻongá mo ʻetau malava ke fakaʻuhinga ʻi ha meʻá. Ki muʻa ange ʻi heʻene tohi ki he kau Lomá, naʻe fakamatalaʻi ʻe Paula ʻa e kakaí naʻa nau maʻu “ha tuʻunga fakaefakakaukau taʻefakahōifua” koeʻuhí ko ʻenau “taʻemāʻoniʻoni, fulikivanu, mānumanu, mo e kovi.” Naʻa nau “fonu ʻi he meheka, fakapō, fekeʻikeʻi, kākā,” mo e ngaahi meʻa kovi kehe. (Loma 1:28-31) ʻE lava ke tau mahinoʻi ʻa e ʻuhinga naʻe akonakiʻi ai ʻe Paula ʻa e kau Kalisitiane ʻa ia naʻa nau nofo ʻi he haʻohaʻonga ʻo e kakai hangē ko iá ke ‘fai honau liliú ʻaki hono fakafoʻou honau ʻatamaí.’

12. Ko e hā ʻoku fakakaukau ki ai ʻa e kakai tokolahi he ʻahó ni? Ko e hā ʻoku fakatuʻutāmaki ai ki he kau Kalisitiané ke fakakaukau ʻi he founga ko ení?

¹² Ko e meʻa fakamamahí, ko e kakai tokolahi ʻi he māmani takatakai ʻia kitautolú ʻoku nau maʻu ʻa e faʻahinga fakakaukau naʻe fakamatalaʻi ʻe Paulá. ʻOku nau fakakaukau ʻoku ʻolokuonga ke moʻuiʻaki ʻa e ngaahi tuʻungá mo e ngaahi tefitoʻi moʻoní pea ʻoku ʻikai totonu ki ha taha ke ne fakamālohiʻi ʻa e niʻihi kehé ke moʻuiʻaki ia. ʻOku fakaʻatā ʻe he kau faiako mo e ngaahi mātuʻa tokolahi ʻa e fānaú ke nau fai pē ha meʻa ʻoku nau loto ki ai. ʻOku aʻu ʻo nau akoʻi kinautolu ko e tokotaha taki taha ʻokú ne maʻu ʻa e tauʻatāina ke fili maʻana ʻa e meʻa ʻoku tonú pe meʻa ʻoku halá. ʻOku tui ʻa e kakai peheé ʻoku ʻikai ke ʻi ai moʻoni ha founga ke ʻilo ai ʻa e meʻa ʻoku tonú mo e meʻa ʻoku halá. Naʻa mo e tokolahi ʻoku nau pehē ʻoku nau tui ki he ʻOtuá ʻoku ʻikai te nau fakakaukau ʻoku fiemaʻu ke nau fai ʻa e meʻa ʻoku pehē ʻe he ʻOtuá ʻoku tonú. (Saame 14:1) Ko e fakakaukau ko ení ʻoku fakatuʻutāmaki ia ki he kau Kalisitiané. Kapau heʻikai ke tau tokanga, ʻe taʻofi nai ʻetau muimui ki he ngaahi fakahinohino ʻoku tau maʻu mei he kautaha ʻa e ʻOtuá pea aʻu ʻo tau kamata nai ke lāunga fekauʻaki mo ha meʻa ʻoku ʻikai ke tau saiʻia ai. Pe mahalo ʻoku ʻikai ke tau loto-tatau kakato mo e akonaki Fakatohitapu ʻoku tau maʻu fekauʻaki mo e fakafiefiá, ko e ngāueʻaki ʻo e ʻInitanetí, mo e ako māʻolunga angé.

13. Ko e hā ʻoku totonu ai ke tau fakakaukau faitotonu fekauʻaki mo e tokotaha moʻoni ko kitautolu ʻi lotó?

¹³ Kapau ʻoku tau loto ke tuku ʻa e “fakaangatatau ki he fokotuʻutuʻu ko ení,” ʻa ia ko e ʻikai fakaʻatā ʻa e māmaní ke fakafuo ʻa e anga ʻetau fakakaukaú mo e ongoʻí, ʻoku fiemaʻu ke tau fakakaukau faitotonu fekauʻaki mo e tokotaha moʻoni ko kitautolú. ʻOku fiemaʻu ke tau sivisiviʻi ʻetau ngaahi fakakaukau mo e ngaahi ongoʻi loloto tahá, ʻetau ngaahi taumuʻá, mo hotau ngaahi tuʻungá. ʻOku ʻikai nai ʻilo ʻe he niʻihi kehé ʻa e meʻa moʻoni ʻi loto ʻia kitautolú, pea nau tala mai nai kia kitautolu ʻoku tau lelei pē. Ka ko kitautolu pē ʻoku tau ʻiloʻi kapau ʻoku tau fakaʻatā ʻa e meʻa kuo tau ako mei he Tohi Tapú ke ne liliu kitautolu pea hokohoko atu ke fai pehē.—Lau ʻa e Sēmisi 1:23-25.

FOUNGA ʻE LAVA KE TAU LILIU AÍ

14. Ko e hā ʻe lava ke ne tokoniʻi kitautolu ke tau ʻilo ai ʻa e ngaahi liliu ʻoku fiemaʻu ke tau faí?

¹⁴ Ke liliú, ʻoku fiemaʻu ke tau liliu ʻa e meʻa ʻi hotau lotó, ʻa ia, ko e tokotaha moʻoni ko kitautolú. Ko e hā ʻe lava ke ne tokoniʻi kitautolu ke fai ʻa e ngaahi liliu loloto peheé? ʻI heʻetau ako ʻa e Tohi Tapú, ʻoku tau ako ai fekauʻaki mo e faʻahinga tokotaha ʻoku loto ʻa Sihova ke tau hoko ki aí. Ko e anga ʻetau tali ki he meʻa ʻoku tau lau ʻi he Tohi Tapú ʻe tokoniʻi ai kitautolu ke tau ʻiloʻi ʻa e meʻa moʻoni ʻi hotau lotó. ʻE tokoniʻi heni kitautolu ke tau ʻilo ʻa e ngaahi liliu ʻoku fiemaʻu ke tau fai ke fakahoko ai ‘ʻa e finangalo haohaoa ʻo e ʻOtuá.’—Loma 12:2; Hep. 4:12.

15. Ko e hā ʻa e liliu ʻoku hoko kia kitautolu ʻi he taimi ʻoku fakafuo ai kitautolu ʻe Sihová?

¹⁵ Lau ʻa e ʻAisea 64:8. Ko e talanoa fakatātā naʻe ngāueʻaki ʻe he palōfita ko ʻAiseá ʻoku akoʻi mai ai kia kitautolu ha lēsoni mahuʻinga. ʻOku tau hangē ko e ʻumeá, pea ko Sihová ʻoku hangē ko ha tufunga ʻumeá. ʻI he taimi ʻokú ne fakafuo ai kitautolu ʻo hangē ko ha meʻa ʻoku fai ʻe he tufunga ʻumeá ki he ʻumeá, ʻoku ʻikai te ne liliu ʻa e anga hotau fōtunga ʻi tuʻá. Ka, ʻokú ne liliu ʻa e faʻahinga tokotaha ʻo kitautolu ʻi lotó. ʻI he taimi ʻoku tau tali ai ʻene fakafuó, ʻoku tau fakaʻatā ia ke ne liliu kitautolu ʻi loto, ʻa ia, ko ʻene tokoniʻi kitautolu ke liliu ʻa e anga ʻetau ongoʻí mo e anga ʻetau fakakaukaú. Ko e meʻa tofu pē eni ʻoku tau fiemaʻú koeʻuhí ke lava ʻo tau faitau mo e ngaahi tākiekina ʻa e māmaní. ʻOku anga-fēfē hono fakafuo kitautolu ʻe Sihová?

16, 17. (a) Fakamatalaʻi ʻa e meʻa ʻoku fai ʻe ha tufunga ʻumea ki he ʻumea ʻokú ne ngāueʻakí ke ngaohi ha ipu mahuʻingá. (e) ʻOku tokoniʻi fēfē kitautolu ʻe he Folofola ʻa e ʻOtuá ke liliu ki ha ipu mahuʻinga ʻa ia ʻe lava ke ngāueʻaki ʻe Sihova?

¹⁶ Kapau ʻoku loto ha tufunga ʻumea ke ngaohi ha ipu makehe, ʻoku fiemaʻu ke ne ngāueʻaki ha ʻumea lelei ʻaupito. Ka ʻoku ʻi ai ʻa e meʻa ʻe ua ʻoku fiemaʻu ki ha tufunga ʻumea ke ne fai ki he ʻumeá ki muʻa ke ne fakafuo iá. ʻUluakí, ʻoku fiemaʻu ke fakamaʻa ʻa e ʻumeá. ʻOku fiemaʻu leva ke toe tānaki atu ki he ʻumeá ha vai lahi feʻunga mo e ngāue feʻunga koeʻuhí ke malava ai ʻo tuʻumaʻu ʻi he fuo ko iá ʻi he taimi ʻoku fakafuo aí.

¹⁷ ʻOku ngāueʻaki ʻe ha tufunga ʻumea ʻa e vaí ʻo ʻikai ke fakamaʻa pē ʻa e ʻumeá kae toe pehē ke ʻai ʻa e ʻumeá ke fakafuongofua. ʻE lava leva ke ne ngaohi ha faʻahinga ipu pē ʻokú ne loto ki ai, naʻa mo ha ipu pelepelengesi. Hangē pē ko hono liliu ʻe he vaí ʻa e ʻumeá, ʻoku liliu kitautolu ʻe he Folofola ʻa e ʻOtuá. ʻI heʻetau kamata ako fekauʻaki mo e ʻOtuá, ʻoku tokoniʻi kitautolu ʻe he Tohi Tapú ke tuku ʻetau fakakaukau hangē ko e māmaní kae kamata fakakaukau hangē ko e anga ʻo e fakakaukau ʻa e ʻOtuá. ʻE lava leva ke ne liliu kitautolu ki ha ipu mahuʻinga ʻa ia ʻe lava ke ne ngāueʻaki. (ʻEf. 5:26) Kuo fakamanatu mai maʻu pē kia kitautolu ʻi he taimi lahi ke lau ʻa e Tohi Tapú ʻi he ʻaho taki taha pea ke maʻu maʻu pē ʻa e ngaahi fakataha faka-Kalisitiané. Ko e hā kuo fakalototoʻaʻi ai kitautolu ke fai ʻa e ngaahi meʻa ko ení? Koeʻuhí ko hono fai iá, ʻoku tau tali lelei ai ʻa e fakafuo ʻa Sihová.—Saame 1:2; Ngā. 17:11; Hep. 10:24, 25.

18. (a) Ko e hā ʻoku fiemaʻu ai ke tau fakalaulauloto ki he Folofola ʻa e ʻOtuá kapau ʻoku tau loto ke ne liliu kitautolu? (e) Ko e hā ʻa e ngaahi fehuʻi ʻe lava ke ne tokoniʻi kitautolu ke fai iá?

¹⁸ Kapau ʻoku tau loto ke liliu kitautolu ʻe he Folofola ʻa e ʻOtuá, ʻoku fiemaʻu ke tau fai ʻa e meʻa lahi ange ʻi hono lau pē mo ako iá. ʻOku lau ʻe he kakai tokolahi ʻa e Tohi Tapú pea ʻilo lahi fekauʻaki mo e meʻa ʻoku leaʻaki aí. Mahalo kuó ke fetaulaki mo e kakai hangē ko ení ʻi he ngāue fakafaifekaú. ʻOku aʻu ʻo malava ʻa e niʻihi ke lau maʻuloto ʻa e ngaahi veesi Tohi Tapú.a Ka ʻoku ʻikai ke faʻa liliu heni ʻenau fakakaukaú mo e founga moʻuí. Ko e hā hono ʻuhingá? Koeʻuhí ʻoku liliu ʻe he Folofola ʻa e ʻOtuá ʻa e kakaí ʻi he taimi pē ʻoku nau fakaʻatā ai ia ke aʻu loloto ki honau lotó. Ke fai iá ʻoku fiemaʻu ke tau fakalaulauloto ki he meʻa ʻoku tau ako mei he Tohi Tapú. ʻOku totonu ke tau ʻeke hifo kia kitautolu: ‘ʻOku ou tuipau ʻoku ʻikai ko e akonaki fakalotu pē eni? Kuó u sio ki ha fakamoʻoni ʻi heʻeku moʻuí ko e meʻa ko ení ko e moʻoní ia? ʻOku ou ngāueʻaki ʻi heʻeku moʻuí tonu ʻa e meʻa kuó u akó kae ʻikai akoʻi pē ia ki he niʻihi kehé? ʻOku ou tui ko e meʻa ʻoku ou akó ko e haʻu ia meia Sihova, ʻo hangē ia naʻá ne talanoa fakafoʻituitui mai kiate aú?’ Kapau te tau fakalaulauloto ki he ngaahi fehuʻi hangē ko ení, te tau ʻunuʻunu ofi ange ai kia Sihova. ʻI he taimi ʻoku aʻu ai ʻa e meʻa ʻoku tau akó ki hotau lotó, ʻe ueʻi ai kitautolu ke fai ʻa e ngaahi liliu ʻi heʻetau moʻuí ʻa ia ʻe ʻai ai ke fiefia ʻa e ʻOtuá.—Pal. 4:23; Luke 6:45.

19, 20. Te tau maʻu ʻaonga fēfē kapau ʻoku tau ngāueʻaki ʻa e akonaki ʻa e Tohi Tapú?

¹⁹ Kapau ʻoku tau lau tuʻumaʻu ʻa e Tohi Tapú pea fakalaulauloto ki ai, ʻe tokoniʻi heni kitautolu ke hokohoko atu ke fai ʻa e meʻa naʻe leaʻaki ʻe Paulá: “Huʻi atu ʻa e angaʻitangata motuʻá mo ʻene ngaahi tōʻongá, pea mou kofuʻaki kimoutolu ʻa e angaʻitangata foʻoú, ʻa ia fakafou ʻi he ʻilo totonú ʻoku fai ai pē hono fakafoʻou ia.” (Kol. 3:9, 10) Kapau ʻoku tau mahinoʻi moʻoni ʻa e meʻa ʻoku akoʻi ʻe he Tohi Tapú pea ngāueʻaki ʻa e meʻa ʻoku tau akó, ʻe ueʻi ai kitautolu ke tau ʻai ʻa e angaʻitangata faka-Kalisitiane foʻoú ʻa ia ʻe lava ke ne maluʻi kitautolu mei he ngaahi tauhele ʻa Sētané.

²⁰ “ʻI he tuʻunga ko e fānau talangofuá, tuku ʻa e hoko ʻo fakafuo ʻe he ngaahi holi naʻa mou maʻu ki muʻa,” ko e fakamanatu mai ia kia kitautolu ʻa e ʻapositolo ko Pitá, kae “hoko ʻo māʻoniʻoni ʻi hoʻomou tōʻonga kotoa pē.” (1 Pita 1:14, 15) Ko e kupu hoko maí ʻe fakamatalaʻi ai ʻa e founga ʻe tāpuakiʻi ai kitautolu ʻe Sihova kapau ʻoku tau fai hotau lelei tahá ke liliu ʻetau fakakaukaú mo e tōʻongá.

[Fakamatala ʻi lalo]

[Fakatātā ʻi he peesi 17]

[Fakatātā ʻi he peesi 18]

ʻOku fiemaʻu ki he tokolahi ke nau mavahe mei he māmani ʻo Sētané pea liliu (Sio ki he palakalafi 9)

[Fakatātā ʻi he peesi 19]

‘Huʻi atu meiate kimoutolu ʻa e faʻahinga kotoa pē ʻo e ʻitá, lilí, fekailangakí, mo e laukoví.’—ʻEf. 4:31

[Fakatātā ʻi he peesi 21]

Ko e hoko ʻo liliú ʻe tokoniʻi ai koe ke fakaleleiʻi ʻa e ngaahi palopalemá ʻi ha founga lelei ange ʻi he kuohilí (Sio ki he palakalafi 18)