Tuku ke Fakafuo Koe ʻe he Akonaki ʻa Sihová

1, 2. (a) Ko e hā kuo pau ke tau fai ke maʻu ai ha vahaʻangatae lelei mo Sihová? (e) Te tau maʻu ʻaonga fēfē mei he lāulea ki he ngaahi fakatātā Fakatohitapu ki he anga ʻo e tali ʻa e kakaí ki he akonaki ʻa e ʻOtuá?

“ʻOKU lelei kiate au ke fakaofiofi ki he ʻOtua: Kuo tuʻu ʻeku hufanga ʻia Atonai Sihova.” (Saame 73:28) Ko e hā naʻá ne ʻai ʻa e tokotaha-tohi-sāmé ke ne leaʻaki eni fekauʻaki mo ʻene falala ki he ʻOtuá? Ki muʻa angé, ʻi he taimi naʻe sio ai ʻa e tokotaha-tohi-sāmé naʻe hā ngali nonga ʻa e kakai fulikivanú, naʻá ne ʻuluaki ʻita. Naʻá ne pehē: “Ko e kulanoa ʻeku toutou tafi hoku loto ke maʻa, mo ʻeku fanofano hoku nima ʻi he taʻe angahala.” (Saame 73:2, 3, 13, 21) Ka ʻi he taimi naʻá ne hū ai ki he “potu tapu ʻo Ela,” naʻe malava ai ke ne fakatonutonu ʻene fakakaukaú pea nofo ofi ai pē ki he ʻOtuá. (Saame 73:16-18) Naʻe ako ʻe he tokotaha-tohi-sāmé ha lēsoni mātuʻaki mahuʻinga: Kapau ʻoku loto ha tokotaha ke maʻu ha vahaʻangatae vāofi mo Sihova, kuo pau ke ne hoko ko e taha ʻo e kakai ʻa e ʻOtuá pea tali mo ngāueʻaki ʻene faleʻí.—Saame 73:24.

² ʻOku tau loto ke maʻu ha vahaʻangatae vāofi mo e ʻOtua moʻoni mo moʻuí. Ko ia ʻoku mātuʻaki mahuʻinga ke tau tali ʻene faleʻí mo ʻene akonakí. ʻI he foungá ni, ʻoku fakafuo ai kitautolu ʻe Sihova, ʻa ia, ʻokú ne tokoniʻi kitautolu ke tau hoko ko e faʻahinga kakai ʻokú ne loto ke tau hoko ki aí. ʻI he kuohilí, naʻe fakahaaʻi ai ʻe he ʻOtuá ʻa e mēsí ki he kakaí pea ʻi he taimi ʻe niʻihi ki he puleʻangá kotoa ʻaki hono ʻoange ʻa e ngaahi faingamālie ke nau tali ai ʻene akonakí. Ko e ngaahi fakatātā ko ení ʻoku hiki ia ʻi he Tohi Tapú “ko hotau fakahinohino,” pea “ko ha fakatokanga ia kiate kitautolu” ʻi he ngaahi ʻaho fakaʻosí. (Loma 15:4; 1 Kol. 10:11) ʻE lāulea ʻa e kupú ni ki he niʻihi ʻo e ngaahi fakatātā ko ení. Te tau ako ai ki he anga ʻo e fakakaukau ʻa Sihová pea mo e founga ʻe lava ke tau maʻu ʻaonga ai ʻi he taimi ʻokú ne fakafuo ai kitautolú.

 3. ʻI he ʻAisea 64:8 mo e Selemaia 18:1-6, ʻoku fakamatalaʻi fēfē ʻe he Tohi Tapú ʻa e mafai ʻo Sihova ki he kakaí? (Sio ki he ʻuluaki fakatātā ʻi he kupú ni.)

³ ʻOku pehē ʻe he Tohi Tapú ʻoku hangē ʻa Sihova ko ha tufunga ʻumea koeʻuhí ʻokú ne maʻu ʻa e mafai ki he kakaí mo e ngaahi puleʻangá. ʻOku pehē ʻe he ʻAisea 64:8: “ʻE Sihova, ko ʻemau tamai koe; ko kimautolu ko e ʻumea, pea ko koe ko ʻemau tufunga; pea ko e ngaue ʻa ho nima ʻa kimautolu kotoa pe.” Ko ha tufunga ʻumea ʻe lava ke ne ngaohi ha meʻa pē ʻokú ne loto ke ngaohi mei heʻene ʻumeá. Heʻikai lava ke tala ange ʻe he ʻumeá ki he tufungá ʻa e meʻa ke ne ngaohí. ʻOku tatau pē ia mo e tangatá ki he ʻOtuá. ʻOku ʻikai haʻatau totonu ke tala ange ki he ʻOtuá ʻa e founga ke fakafuo ai kitautolú, ʻo hangē pē ia ko e ʻikai lava ke tala ange ʻe he ʻumeá ki he tufungá ʻa e faʻahinga ipu ke ne ngaohí.—Lau ʻa e Selemaia 18:1-6.

 4. ʻOku fakamālohiʻi ʻe Sihova ʻa e kakaí pe ngaahi puleʻangá ke tali ʻene fakafuó? Ko e hā hono ʻuhingá?

⁴ Naʻe fakafuo ʻe Sihova ʻa ʻIsileli ʻo hangē ko hono fakafuo ʻe ha tufunga ʻa e ʻumeá. Ka ʻoku anga-fēfē ʻa e kehe ʻa Sihova mei ha tufunga ʻumea fakaetangata? Kuo foaki ʻe Sihova ki he kakaí ʻa e meʻaʻofa makehe ʻo e tauʻatāina ke filí, ʻa ia, ʻokú ne fakaʻatā kinautolu ke nau fai pē ʻenau ngaahi fili. ʻOku ʻikai ke ne ʻai ha kakai ʻe niʻihi ke lelei mo e niʻihi ke kovi. Pe ʻoku ʻikai ke ne ngāueʻaki hono mafaí ke fakamālohiʻi ʻa e kakaí ke talangofua kiate ia. Ka, kuo pau ke fili ʻa e tangatá pe te nau tuku honau Tokotaha-Fakatupú, ʻa Sihova, ke ne fakafuo kinautolu.—Lau ʻa e Selemaia 18:7-10.

 5. ʻI he taimi ʻoku fakafisi ai ʻa e tangatá ke tuku ke fakafuo kinautolu ʻe Sihová, ko e hā ʻokú ne faí?

⁵ Fēfē kapau ʻoku ongongataʻa mo fakafisi ha taha ke tuku ke fakafuo ia ʻe he Tufunga ʻUmeá, ʻa Sihova? ʻE ngāueʻaki fēfē ʻe Sihova hono mafai ko ha tufunga ʻumeá? Sai, ʻi he taimi ʻoku faingataʻa ai ke fakafuo ʻa e ʻumeá ki ha faʻahinga ipu ʻoku loto ʻa e tufungá ke ngaohi, ʻe lava ke ne fili ke ngaohi ha meʻa kehe, pe ʻe lava ke ne liʻaki ʻa e ʻumeá. ʻOku faʻa hoko eni koeʻuhí ko e tufungá naʻe ʻikai ke ne fakafuo ʻa e ʻumeá ʻi he founga totonú. Ka ʻoku fakafuo maʻu pē ʻe Sihova ʻa e kakaí ʻi he founga totonu. (Teu. 32:4) ʻI he taimi ʻoku ʻikai ke fakaʻatā ai ʻe ha tokotaha ke fakafuo ia ʻe Sihová, ko e foʻui maʻu pē ia ʻo e tokotaha ko iá. ʻOku feʻunuʻaki ʻe Sihova ʻa e founga ʻokú ne fakafuo ai ʻa e kakaí ʻo makatuʻunga pē ʻi he anga ʻo ʻenau talí. ʻI he taimi ʻoku talangofua ai ʻa e kakaí kia Sihová, ʻoku nau hoko ai ʻo ʻaonga kiate ia. Ko e fakatātaá, ko e kau Kalisitiane paní ko ha ‘ngaahi ipu ʻo e meesi’ ʻa ia kuo fakafuo kinautolu ko e ‘ngaahi ipu ki hano ngāueʻaki lāngilangiʻia.’ Ka ko e kakai ʻoku nau fakafisi ke talangofua ki he faleʻi ʻa e ʻOtuá te nau hoko ko e “ngaahi ipu ʻo e houhaú” ʻa ia ʻe ʻikai malava ke ngāueʻaki ki ha meʻa.—Loma 9:19-23.

6, 7. Naʻe anga-fēfē ʻa e fakafeangai ʻa Tuʻi Tēvita mo Tuʻi Saula ʻi he taimi naʻe ʻoange ai ʻe Sihova kia kinaua ʻa e faleʻí?

⁶ Ko e founga ʻe taha ʻoku fakafuo ai ʻe Sihova ʻa e kakaí ko hono ʻoange kia kinautolu ʻa e faleʻi pe akonaki. Ko e fakatātaá, fakakaukau fekauʻaki mo e founga naʻe fakafuo ai ʻe Sihova ʻa e ʻuluaki ongo tuʻi ʻIsilelí, ʻa Saula mo Tēvitá. Naʻe ʻi ai ʻa e ngaahi nunuʻa kovi kia Tuʻi Tēvita mo e niʻihi kehé ʻi he taimi naʻá ne tono ai mo Patisepá. Neongo ko Tēvitá ko ha tuʻi, naʻe akonakiʻi fefeka ia ʻe Sihova. Naʻe fekauʻi atu ʻe he ʻOtuá ʻene palōfita ko Nētané kia Tēvita mo ha faleʻi mālohi. (2 Sām. 12:1-12) Naʻe fēfē ʻa e fakafeangai ʻa Tēvitá? Naʻá ne fakatomala moʻoni ʻi he meʻa naʻá ne faí. Koeʻuhí naʻe fakatomala ʻa Tēvita, naʻe faimeesi kiate ia ʻa e ʻOtuá.—Lau ʻa e 2 Sāmiuela 12:13.

⁷ Naʻe kehe ʻa Tuʻi Saula ia. Naʻe ʻikai ke ne fanongo ki he faleʻí. Naʻe fekauʻi atu ʻe Sihova ʻa Sāmiuela ke tala kia Tuʻi Saula ke tāmateʻi ʻa e kau ʻAmalekí kotoa mo ʻenau fanga manú. Ka naʻe talangataʻa ʻa Saula ki he fekau ʻa Sihová. Naʻá ne tuku ke moʻui ʻa Tuʻi ʻĒkaki, pea naʻá ne fakahaofi ʻa e fanga manu lelei tahá. Ko e hā hono ʻuhingá? Naʻá ne fai nai ení ke ʻomai ai ʻa e lāngilangí kiate ia. (1 Sām. 15:1-3, 7-9, 12) Ko ia naʻe fekauʻi atu ʻe Sihova ʻa Sāmiuela ke ʻoange ha faleʻi kia Saula. Naʻe totonu ke fanongo ʻa Saula ki he faleʻí pea tali ʻa e fakafuo ʻa Sihová. Ka, naʻe fakafisi ʻa Saula ke liliu. Naʻá ne fakakaukau naʻá ne maʻu ha ʻuhinga lelei ke tukunoaʻi ai ʻa e ngaahi fakahinohino ʻa Sihová. Naʻá ne pehē te ne feilaulauʻaki ʻa e fanga monumanú ko ha meʻaʻofa kia Sihova. Naʻe talitekeʻi ʻe he ʻOtuá ʻa Saula ʻi he tuʻunga ko e tuʻí, pea naʻe ʻikai ʻaupito toe maʻu ʻe Saula ha vahaʻangatae lelei mo ia.—Lau ʻa e 1 Sāmiuela 15:13-15, 20-23.

 8. Ko e hā ʻe lava ke tau ako mei he anga ʻo e tali ʻa e puleʻanga ʻIsilelí ki he fakafuo ʻa Sihová?

⁸ ʻOku toe ʻoange ʻe Sihova ki he ngaahi puleʻangá kotoa ha faingamālie ke talangofua kiate ia. Hili hono fakatauʻatāinaʻi ʻe Sihova ʻa e kau ʻIsilelí mei ʻIsipité ʻi he taʻu 1513 ki muʻa ʻia Kalaisí, naʻa nau hoko ko e kakai makehe ʻa Sihova. Naʻe talaʻofa ʻa e ʻOtuá te ne fakafuo kinautolu. Ka naʻe ʻikai ke tali lelei ʻe he kakaí ʻa ʻene fakafuó pea nau hanganaki fai ʻa e meʻa naʻe kovi ʻi he ʻao ʻo Sihová. Naʻe aʻu ʻo nau lotu ki he ngaahi ʻotua loi ʻo e ngaahi puleʻanga takatakai kia kinautolú. ʻI he taimi lahi, naʻe fekauʻi atu ʻe Sihova ʻa e kau palōfitá ki he kau ʻIsilelí ke tokoniʻi kinautolu ke liliu ʻenau tōʻongá, ka naʻe talitekeʻi ʻe ʻIsileli ʻa e faleʻi ʻa e kau palōfitá. (Sel. 35:12-15) Koeʻuhí naʻe ʻikai te nau talangofua kia Sihova, naʻá ne akonakiʻi fefeka kinautolu. Naʻe fakaʻauha ʻe he kau ʻAsīliá ʻa e puleʻanga fakatokelau ʻo ʻIsilelí. Ki mui ai, naʻe ikunaʻi ʻe he kau Pāpiloné ʻa e puleʻanga fakatonga ʻo Siutá. ʻOku tau ako ʻa e meʻa mātuʻaki mahuʻinga mei heni. Ko e founga pē taha te tau maʻu ʻaonga ai mei he fakafuo ʻa Sihová kapau te tau tali lelei ia.

9, 10. Naʻe anga-fēfē tali ʻa e kau Ninivé ʻi he taimi naʻe ʻoange ai ʻe Sihova kia kinautolu ha fakatokangá?

⁹ Naʻe toe ʻoange ʻe Sihova ki he kakai ʻo e kolomuʻa ʻo ʻAsīliá ʻa Ninive ha faingamālie ke nau tali ʻene fakatokangá. Naʻe tala ʻe Sihova kia Siona: “Tuʻu ʻo ʻalu ki Ninive, ʻa e fuʻu kolo ko ia, pea ke fanongonongo ki ai; he kuo aʻu hake ʻenau ngaahi faikovi ki hoku ʻao.” Naʻe fakapapauʻi ʻe Sihova ʻoku totonu ke fakaʻauha ʻa Ninive koeʻuhí naʻe fuʻu kovi ʻa e kakaí.—Siona 1:1, 2; 3:1-4.

¹⁰ ʻI he taimi naʻe tala ai ʻe Siona ki he kakaí ʻa e meʻa naʻe leaʻaki ʻe Sihová, naʻa nau ‘tui ki he ʻOtuá.’ Naʻa nau loto kotoa ke fakahaaʻi naʻa nau fakatomala, ko ia naʻe ʻikai te nau kai, pea naʻa nau ʻai tauangaʻa. Naʻa mo e tuʻí naʻá ne “tuʻu mei hono taloni, ʻo ne huʻihuʻi hono kofu lahi, ʻo ne ʻai tauangaʻa, ʻo ne nofo ʻi he efuefu.” Naʻe fakaʻatā ʻe he kau Ninivé kinautolu ke fakafuo ʻe Sihova, pea naʻa nau fakatomala. Ko hono olá, naʻe ʻikai ke fakaʻauha ʻe Sihova ʻa e koló.—Siona 3:5-10.

11. Ko e hā ʻoku tau ako mei he anga ʻo e fakafeangai ʻa Sihova ki ʻIsileli mo Ninivé?

¹¹ Neongo ko e kau ʻIsilelí ko e kakai makehe ʻa Sihova, naʻe pau ke ne akonakiʻi kinautolu. Ko e kau Ninivé naʻe ʻikai ko e kakai makehe ia ʻa Sihova, ka naʻa nau tali lelei ʻa ʻene fakafuó. Ko ia naʻe fakahaaʻi ʻe Sihova ʻa e meesi kia kinautolu pea fili ke ʻoua ʻe fakaʻauha kinautolu. Ko Sihová ʻoku ʻikai ke filifilimānako. ʻOkú ne fakamāuʻi ʻa e kakaí ʻo fakatatau ki he anga ʻenau tōʻongá.—Teu. 10:17.

12, 13. (a) Ko e hā ʻoku liliu ai ʻe he ʻOtuá ʻene ngaahi filí ʻo makatuʻunga ʻi he anga ʻo e tali ʻa e kakaí ki heʻene fakafuó? (e) Ko e hā e ʻuhinga naʻe ongoʻi fakatomala ai ʻa Sihova fekauʻaki mo Saula mo Ninivé?

¹² ʻOku loto-lelei ʻa Sihova ke liliu ʻene ngaahi fili fekauʻaki mo e kakaí ʻi he taimi ʻoku liliu ai ʻa e anga ʻenau tōʻongá. Ko e fakatātaá, ʻoku tala mai ʻe he Tohi Tapú kia kitautolu naʻe ongoʻi fakatomala ʻa Sihova ʻi heʻene ʻai ʻa Saula ko e tuʻi ʻo ʻIsilelí. (1 Sām. 15:11) Pea ʻi he taimi naʻe fakatomala ai ʻa e kakai ʻo Ninivé pea taʻofi ʻenau tōʻonga koví, ʻoku pehē ʻi he Tohi Tapú: “Naʻe louaki [pe ongoʻi fakatomala] ʻe Elohimi mei he kovi naʻa ne pehe te ne fai kiate kinautolu; pea naʻe ʻikai te ne fai.”—Siona 3:10.

¹³ ʻI he taimi ʻoku pehē ai ʻe he Tohi Tapú naʻe “ongoʻi fakatomala” ʻa Sihová, ʻoku ʻuhinga iá naʻá ne liliu ʻa e anga ʻene ongoʻi fekauʻaki mo ha taha pe naʻá ne liliu ʻa e meʻa naʻá ne fili ke faí. Naʻe hōifua ʻa Sihova ʻi he taimi ʻe taha kia Saula. Ka ʻi he taimi naʻe talangataʻa ai ʻa Saulá, naʻá ne talitekeʻi ʻa Saula ʻi he tuʻunga ko e tuʻí. Naʻe ʻikai hoko ení koeʻuhí ko Sihová naʻá ne fai ha fehālaaki ʻi he taimi naʻá ne fili ai ʻa Saula ko e tuʻí. Ka, koeʻuhí naʻe talangataʻa ʻa Saula kiate ia. Pea ʻi he taimi naʻe fakatomala ai ʻa e kau Ninivé, naʻe loto-lelei ʻa Sihova ke liliu ʻene filí pea tuku pē ke nau moʻui. ʻOku fakafiemālie ke tau ʻilo ʻoku anga-lelei mo faimeesi ʻa Sihova pea ʻokú ne loto-lelei ke liliu ʻene filí ʻi he taimi ʻoku liliu ai ʻe he kakaí ʻa e anga ʻenau tōʻongá!

14. (a) Ko e hā ʻoku ngāueʻaki ʻe Sihova ke fakafuoʻaki kitautolu he ʻaho ní? (e) Ko e hā ʻoku totonu ke tau faí ʻi he taimi ʻoku fakafuo ai kitautolu ʻe he ʻOtuá?

¹⁴ ʻI he ʻahó ni, ʻoku ngāueʻaki ʻe Sihova ʻa e Tohi Tapú mo ʻene kautahá ke fakafuoʻaki kitautolu. (2 Tīm. 3:16, 17) ʻOku totonu ke tau fiefia ke tali ha faleʻi pe akonaki pē ʻoku tau maʻu ʻi he foungá ni. Tatau ai pē pe ko e hā ʻa e fuoloa ʻetau papitaisó pe ko e lahi ʻo e ngaahi monū ʻoku tau maʻu ʻi he fakatahaʻangá, ʻoku totonu ke tau hokohoko atu ke talangofua ki he faleʻi ʻa Sihová. ʻI he taimi ʻoku tau tali ai ki he fakafuo ʻa Sihová ʻi he foungá ni, ʻe lava ke tau hoko ai ko e faʻahinga tokotaha ʻokú ne loto ke tau hoko ki aí.

15, 16. (a) Ko e hā ʻa e ngaahi ongoʻi ʻe maʻu nai ʻe ha taha ʻi he taimi ʻoku mole ai hono ngaahi monū ʻi he fakatahaʻangá? ʻOmai ha fakatātā. (e) Ko e hā ʻe lava ke ne tokoniʻi kitautolu ke fekuki ai mo e ngaahi ongoʻi hangē ko e mā mo e mamahi ʻi he taimi ʻoku akonakiʻi ai kitautolú?

¹⁵ ʻOku anga-fēfē hono akonakiʻi kitautolu ʻe Sihová? ʻOkú ne akoʻi kitautolu ki he meʻa ʻokú ne fiemaʻu meiate kitautolú, pea ʻokú ne fakatonutonu ʻetau fakakaukaú. ʻI he taimi ʻe niʻihi te tau fiemaʻu nai ha akonaki fefeka koeʻuhí ʻoku tau fai ʻa e meʻa ʻoku mātuʻaki hala. Ko hono olá, ʻe mole nai hotau ngaahi monū ʻe niʻihi ʻi he fakatahaʻangá. Fakakaukau ki he fakatātā ʻo ha mātuʻa ko Tenisi.a Naʻe valokiʻi ia koeʻuhí ko ha fakamaau taʻetotonu ʻi he ngaahi meʻa fakapisinisí. Naʻe anga-fēfē ongoʻi ʻa Tenisi ʻi he pō naʻe fanongonongo ai ki he fakatahaʻangá heʻikai te ne toe ngāue ko ha mātuʻá? ʻOkú ne pehē naʻá ne ongoʻi taʻelavameʻa. “Laka hake ʻi he taʻu ʻe 30, naʻá ku maʻu ʻa e ngaahi monū lahi. Naʻá ku hoko ko ha tāimuʻa tuʻumaʻu, ngāue ʻi Pēteli, fakanofo ko ha sevāniti fakafaifekau pea hoko leva ko ha mātuʻa. Naʻá ku toki fai pē mo ʻeku ʻuluaki malanga ʻi ha fakataha-lahi fakavahe. Fakafokifā pē, naʻe mole kotoa atu ia.” Naʻá ne ongoʻi mā mo mamahi, pea naʻá ne fifili pe ʻe faifai angé ʻo malava ke toe ngāueʻaki ia ʻi he kautahá.

¹⁶ Naʻe liliu ʻe Tenisi ʻene tōʻongá. Ka ko e hā naʻá ne tokoniʻi ia ke fekuki ai mo e mā mo e mamahi naʻá ne ongoʻí? Naʻá ne fakapapauʻi ke ako ʻa e Tohi Tapú, ʻalu maʻu pē ʻi he ngāue fakafaifekaú, pea maʻu ʻa e kotoa ʻo e ngaahi fakatahá. Naʻá ne houngaʻia ʻi he fakalototoʻa naʻá ne maʻu mei he fanga tokouá mo e fanga tuofāfiné pea mei heʻetau ʻū tohí. ʻOkú ne pehē: “Ko e kupu ‘Naʻá Ke Ngāue ki Muʻa? ʻE Lava Ke Ke Toe Ngāue?’ ʻi he ʻīsiu ʻo e Taua Leʻo ʻo ʻAokosi 15, 2009, naʻe hangē ia ha tohi fakafoʻituitui ʻo tali ʻeku ngaahi lotú.” Naʻe ako ʻe Tenisi mei he kupú ʻe malava ke ne ngāueʻaki hono taimí ke fakaivimālohiʻi hono vahaʻangatae mo Sihová. Naʻá ne maʻu ʻaonga mei he akonaki naʻá ne maʻú, pea hili atu ha ngaahi taʻu naʻá ne toe hoko ko ha sevāniti fakafaifekau.

17. ʻE lava fēfē ke tokoni ʻa e tuʻusí ki ha tokotaha angahalá? ʻOmai ha fakatātā.

¹⁷ Ko e tuʻusí ko e founga ia ʻe taha ʻo e akonaki meia Sihová. ʻOku maluʻi ai ʻa e fakatahaʻangá mei he tākiekina kovi ʻa e tokotaha angahalá, pea ʻe lava ke tokoniʻi ai ʻa e tokotaha angahalá ke fakatomala. (1 Kol. 5:6, 7, 11) Naʻe tuʻusi ʻa Lōpeti ʻi he meimei taʻu ʻe 16. Lolotonga ʻa e taimi ko ení, ko ʻene ongo mātuʻá mo e toenga ʻo e fānaú naʻa nau muimui ki he faleʻi ʻa e Tohi Tapú pea ʻikai feohi mo ia, pea aʻu ʻo ʻikai fakafeʻiloaki kiate ia. Naʻe toe fakafoki mai ʻa Lōpeti ʻi ha ngaahi taʻu ki muí ni pea ʻokú ne fakalakalaka ʻi he moʻoní. Naʻá ne fakamatala ko e konga ʻo e ʻuhinga naʻá ne foki mai ai ki he moʻoní hili ha taimi fuoloa, koeʻuhí pē ko hono fāmilí naʻa nau fakafisi ke feohi mo ia. Naʻá ne pehē kapau naʻe fakamoleki ʻe hono fāmilí naʻa mo ha kiʻi taimi mo ia pe ʻeke ange pe ʻokú ne fēfē, ʻe ʻikai te ne fuʻu taʻelata pehē. Naʻe tokoniʻi ia heni ke ne loto ke toe foki kia Sihova mo ʻEne kakaí.

18. ʻOku totonu ke fēfē ʻetau talí ʻi he taimi ʻoku fakafuo ai kitautolu ʻe he ʻOtuá?

¹⁸ ʻE ʻikai nai ke tau fiemaʻu ha akonaki tatau. Ka ʻoku tau fiemaʻu ke fakakaukau fekauʻaki mo e meʻa ʻe lava ke tau fai ʻi he taimi ʻoku fakafuo ai mo akonakiʻi kitautolu ʻe he ʻOtuá. ʻE anga-fēfē ʻetau talí? Te tau tali ʻa e akonakí, hangē ko Tēvitá? Pe te tau talitekeʻi ia, hangē ko Saulá? Ko Sihova, ʻa e Tufunga ʻUmea Lahí, ʻetau Tamaí. ʻOua ʻaupito ʻe ngalo “ko ia ʻoku ʻofa ki ai ʻa e ʻEiki ʻa ia ʻoku ne kinisi; ʻio, hange ko e fai ʻe ha tamai ki hono foha pele.” Tuku maʻu pē kia Sihova ke ne akonakiʻi koe.—Pal. 3:11, 12.