LĒSONI 26
Ko e Hā ʻOku Hoko Ai ʻa e Ngaahi Meʻa ʻOku Koví pea Faingataʻaʻia ʻa e Kakaí?
“Ko e hā naʻe hoko ai ení?” ko ha fehuʻi anga-maheni ia ki ha taha ke ʻeke ʻi he taimi ʻoku hoko ai ha fakatamaki. He fiefia ē ko kitautolu he ʻoku ʻomai ʻe he Tohi Tapú ʻa e tali māʻalaʻala ki he fehuʻi ko iá!
1. Ko e hā naʻe fai ʻe Sētane ʻo ʻai ai ke hoko ʻa e ngaahi meʻa ʻoku koví?
Naʻe anga-tuʻu ʻa Sētane ko e Tēvoló ki he ʻOtuá. Naʻe loto ʻa Sētane ke ne puleʻi mo e niʻihi kehé, ko ia naʻá ne tākiekina ʻa e ʻuluaki ongo mātuʻá, ʻa ʻĀtama mo ʻIvi, ke na anga-tuʻu. Naʻe fai eni ʻe Sētane ʻaki hono tala ange kia ʻIvi ha loi. (Sēnesi 3:1-5) Naʻá ne ʻai ʻa ʻIvi ke fakakaukau ʻoku taʻofi ʻe Sihova ha meʻa lelei meiate ia. Naʻá ne fakahuʻunga ʻe fiefia ange ʻa e tangatá kapau heʻikai ke nau talangofua ki he ʻOtuá. Naʻe tala ange ʻe Sētane ʻa e ʻuluaki loí kia ʻIvi, heʻikai ke ne mate. Ko ia ai, ʻoku ui ʻe he Tohi Tapú ʻa Sētane “ko ha tokotaha loi ia pea ko e tamai ia ʻa e loí.”—Sione 8:44.
2. Ko e hā naʻe fili ʻa ʻĀtama mo ʻIvi ke faí?
Naʻe mātuʻaki nima-homo ʻa Sihova kia ʻĀtama mo ʻIvi. Naʻá ne pehē ʻe lava ke na kai mei he ʻakau kotoa pē ʻo e ngoue ko ʻĪtení, tuku kehe pē ʻa e taha. (Sēnesi 2:15-17) Ka naʻá na fili ke kai ʻa e fua ʻo e ʻakau ko iá. Naʻe kamata ʻa ʻIvi “ke ne toʻo ʻa hono fuá ʻo ne kai.” Pea ki mui aí, naʻe kamata ke kai mo ʻĀtama. (Sēnesi 3:6) Naʻá na talangataʻa fakatouʻosi ki he ʻOtuá. Koeʻuhi ko ʻĀtama mo ʻIvi naʻá na haohaoa, naʻe fakanatula pē kiate kinaua ke fai ʻa e meʻa ʻoku tonú. Ka ʻi heʻena talangataʻa loto-lelei ki he ʻOtuá, naʻá na angahala pea talitekeʻi ʻene founga-pulé. Ko ʻena fili ko iá naʻá na faingataʻaʻia lahi ai.—Sēnesi 3:16-19.
3. Kuo anga-fēfē hono uesia kitautolu ʻe he fili ʻa ʻĀtama mo ʻIví?
ʻI he faiangahala ʻa ʻĀtama mo ʻIví, naʻá na hoko ʻo taʻehaohaoa pea ʻoatu ʻa e taʻehaohaoá ki he kotoa hona hakó. ʻI he fekauʻaki mo ʻĀtamá, ʻoku pehē ʻe he Tohi Tapú: Naʻe “fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē.”—Loma 5:12.
ʻOku tau faingataʻaʻia koeʻuhi ko e ngaahi ʻuhinga kehekehe. Ko e taimi ʻe niʻihi ʻoku tau faingataʻaʻia koeʻuhí ko e fili taʻefakapotopoto naʻa tau faí. Ko e taimi ʻe niʻihi ʻoku tau faingataʻaʻia koeʻuhí ko e fili taʻefakapotopoto ʻa e niʻihi kehé. Ko e taimi ʻe niʻihi ʻoku tau faingataʻaʻia koeʻuhí ʻoku hoko ha meʻa taʻeʻamanekina.—Lau ʻa e Tangata Malanga 9:11.
KELI LOLOTO ANGE
Fakakaukau angé ki he ʻuhinga ʻoku ʻikai ko e ʻOtuá ai naʻá ne fakatupu ʻa e ngaahi meʻa ʻoku koví mo e faingataʻaʻia ʻa e māmani he ʻaho ní pea mo e anga ʻene ongoʻi ki heʻetau faingataʻaʻiá.
4. Ko hai naʻá ne fakatupunga ʻetau faingataʻaʻiá?
ʻOku tui ʻa e kakai tokolahi ko e ʻOtuá ʻokú ne puleʻi e māmaní. ʻOku moʻoni ia? Huluʻi ʻa e VITIOÓ.
Lau ʻa e Sēmisi 1:13 mo e 1 Sione 5:19, pea lāulea leva ki he fehuʻi ko ení:
Ko e ʻOtuá ke tukuakiʻi ki he faingataʻaʻiá mo e koví?
5. Ko e hā kuo hokó talu mei he kamata pule ʻa Sētané?
Lau ʻa e Sēnesi 3:1-6, pea lāulea leva ki he ngaahi fehuʻi ko ení:
Ko e hā ʻa e loi ʻa Sētané?—Sio ki he veesi 4 mo e 5.
Naʻe anga-fēfē fakahuʻunga ʻa Sētane ʻoku taʻofi ʻe Sihova ʻa e meʻa lelei mei he tangatá?
Naʻe anga-fēfē fakahuʻunga ʻa Sētane heʻikai ke fiemaʻu ʻe he tangatá ʻa Sihova ke pule mai ka nau fiefiá?
Lau ʻa e Tangata Malanga 8:9, pea lāulea leva ki he fehuʻi ko ení:
Ko e hā kuo hokó ʻi he vahaʻa taimi ko eni ʻoku ʻikai pule mai ai ʻa Sihova ki he māmaní?
A. Naʻe haohaoa ʻa ʻĀtama mo ʻIvi pea naʻá na nofo ʻi Palataisi. Ka naʻá na fanongo kia Sētane pea anga-tuʻu kia Sihova
E. Hili ʻa e anga-tuʻú, naʻe hoko ʻa e māmaní ʻo fonu ʻi he angahala, faingataʻaʻia pea mo e mate
F. ʻE fakangata ʻe Sihova ʻa e angahalá, faingataʻaʻiá mo e maté. ʻE toe hoko leva ʻa e tangatá ʻo haohaoa pea moʻui ʻi Palataisi
6. ʻOku tokanga mai ʻa Sihova ki heʻetau faingataʻaʻiá
ʻOku tokanga mai ʻa e ʻOtuá ki heʻetau faingataʻaʻiá? Vakai angé ki he meʻa naʻe hiki ʻe Tuʻi Tēvita mo e ʻapositolo ko Pitá. Lau ʻa e Saame 31:7 mo e 1 Pita 5:7, pea lāulea leva ki he fehuʻi ko ení:
ʻOku anga-fēfē hoʻo ongoʻí ʻi hono ʻiloʻi ʻoku fakatokangaʻi mo tokanga mai ʻa Sihova ki heʻetau faingataʻaʻiá?
7. ʻE fakangata ʻe he ʻOtuá ʻa e kotoa ʻo e faingataʻaʻia ʻa e faʻahinga ʻo e tangatá
Lau ʻa e ʻAisea 65:17 mo e Fakahā 21:3, 4, pea lāulea leva ki he fehuʻi ko ení:
ʻOku talaʻofa mai ʻa Sihova te ne fakaleleiʻi ʻa e kotoa ʻo e ngaahi nunuʻa kovi kuo hokosia ʻe he tangatá. Ko e hā ʻoku fakafiemālie ai kiate koe ʻa e talaʻofa ko iá?
Naʻá ke ʻiloʻi?
ʻI he fuofua loi ʻa Sētané, naʻá ne lauʻikoviʻi loi ʻa Sihova. ʻOku ʻuhinga ení, naʻá ne maumauʻi ʻa e ongoongo ʻo Sihová ʻi he tuʻunga ko ha tokotaha fakamaau totonu mo Pule anga-ʻofá. ʻI he taimi ʻe fakaleleiʻi ai ʻe Sihova ʻa e faingataʻaʻia ʻa e faʻahinga ʻo e tangatá ʻi he kahaʻu vavé ni maí, te ne fakatonuhiaʻi ai ia tonu. ʻOku ʻuhinga ení, te ne fakamoʻoniʻi ko ʻene founga-pulé ʻa e lelei tahá. Ko hono fakatonuhiaʻi ʻa e huafa ʻo Sihová ʻa e meʻa mahuʻinga taha ʻi he ʻunivēsí.—Mātiu 6:9, 10.
ʻOKU PEHĒ ʻE HE NIʻIHI: “Ko e finangalo pē ia ʻo e ʻOtuá ke tau faingataʻaʻia.”
Ko e hā haʻo lau?
FAKANOUNOU
Ko Sētane ko e Tēvoló mo e ʻuluaki ongo mātuʻá ʻa e faʻahinga tefito ke tukuakiʻi ki he kovi ʻi he māmaní. ʻOku tokanga lahi mai ʻa Sihova ki heʻetau faingataʻaʻiá, pea ʻoku vavé ni ke ne fakaleleiʻi ia.
Fakamanatu
Ko e hā ʻa e loi naʻe tala ange ʻe Sētane ko e Tēvoló kia ʻIví?
Kuo anga-fēfē hono uesia kotoa kitautolu ʻe he anga-tuʻu ʻa ʻĀtama mo ʻIví?
ʻOku anga-fēfē ʻetau ʻiloʻi ʻoku tokanga mai ʻa Sihova ki heʻetau faingataʻaʻiá?
AKO LAHI ANGE
Sio angé ki hono fakamatalaʻi ʻe he Tohi Tapú ʻa e angahalá.
Lau lahi ange fekauʻaki mo e ʻīsiu naʻe langaʻi ʻe Sētane ko e Tēvoló ʻi he ngoue ko ʻĪtení.
“Ko e Hā ʻOku Fakaʻatā Ai ʻe he ʻOtuá ʻa e Faingataʻá?” (Ko e Taua Leʻo, Maʻasi 1, 2014)
Sio ki he ngaahi tali fakafiemālie ki ha fehuʻi faingataʻa.
Sio ki he meʻa naʻe ako ʻe ha tangata fekauʻaki mo e faingataʻaʻia naʻá ne mamata ki aí.