Ngaahi Fehuʻi mei he Kau Lau Tohí

Koeʻuhí ʻoku feinga ʻa e Kau Fakamoʻoni ʻa Sihová ke nau faitotonu pea ʻoku nau fefalalaʻaki, ko e hā ʻoku nau ongoʻi ai ʻoku mahuʻinga ke fai ha aleapau fakapepa ʻi he taimi ʻoku nau fai ai haʻanau ngaahi alea fakapisinisi?

Ko ʻenau fai peheé ʻoku Fakatohitapu, fakapotopoto, pea anga-ʻofa. ʻO anga-fēfē? Sai, tau fakakaukau angé ki he ngaahi tafaʻaki ko ia ʻo e ngaahi aleapau pisinisí.

ʻOku ʻomai ʻe he Tohitapú ʻa e fakamatala kuo hiki fekauʻaki mo e ngaahi anga-fai ʻa e ʻOtuá mo ʻene kakai ʻi he fuakavá, ʻa e kau ʻIsilelí. ʻOku kau ai ʻa e ngaahi alea fakapisinisi ʻoku kaunga ki ai ʻa e kau lotu moʻoni. ʻOku ʻi he Senesi vahe 23 ha meʻa ʻoku taau ke tau fakakaukau ki ai. ʻI he taimi naʻe mate ai ʻa hono ʻofaʻanga ko Selá, naʻe fiemaʻu ʻe ʻĒpalahame ke maʻu ha konga malaʻe. Naʻá ne kamata leva ʻa e alea fakataú mo e kau Kēnani nofo ofi ki Hepeloní. ʻOku hā ʻi he veesi 7-9 naʻá ne foaki ha totongi mahino ki he konga kelekele naʻá ne fiemaʻú. ʻOku fakamoʻoniʻi ʻe he veesi 10 naʻe fai fakahāhā ʻa e foakí ni, ʻi he fanongo ki ai ʻa e niʻihi kehe ʻi he matapā ʻo e koló. ʻOku fakahā ʻi he veesi 13 naʻe loto-lelei ʻa e tokotaha ʻoku ʻoʻoná ke foaki ange pē ʻa e kelekelé maʻa ʻĒpalahame, ka naʻá ne tali ange te ne toki ʻave pē kapau ʻe fakatau. Pea ʻoku fakamatalaʻi ʻe he veesi 17, 18, pea mo e 20 ko e meʻa pē ʻeni naʻe hokó, naʻe fakapapauʻi “ʻi he ʻao ʻo haʻa Heti, mo kinautolu naʻe feʻaluʻaki ʻi he matapa ʻo hono kolo.”

ʻE toe kehe nai, neongo kapau ko e ongo meʻa ʻokú na fai ha alea pisinisi peheé ko ha ongo lotu moʻoni fakatouʻosi? Ko e vahe 32 ʻo Selemaiá ʻokú ne tokonaki mai ha tali. Mei he veesi 6 ʻo faai hifo, ʻoku tau sio ai naʻe teu fakatau kelekele ʻa Selemaia mei ha tokotaha naʻá ne tokouaʻaki. ʻOku hā ʻi he veesi 9 naʻe ʻi ai ha totongi lelei naʻá na felotoi ki ai. Lau he taimí ni ʻa e veesi 10-12: “Pea naʻa ku [Selemaia] tohi ʻa e meʻa ʻi he tohi, pea u silaʻi ke maʻu, pea u kumi ha kau fakamoʻoni, pea naʻa ku fua kiate ia ʻa e paʻanga ʻi he meʻafua. Pea naʻa ku toʻo ʻa e tohi fakatau​—ʻa ia naʻe silaʻi, ʻa ia ʻoku ʻi ai ʻa e, fakamatala mo e ngaahi tuʻutuʻuni, pea mo ia naʻe ava—pea u ʻatu ʻa e tohi fakatau kia Paluki ko e foha ʻo Nelaia, foha ʻo Maaseia, ʻoku sio ki ai ʻa Anameli ko e tokoua o ʻeku tamai, pea ʻoku sio ki ai ʻa e kau fakamoʻoni naʻe ʻai honau hingoa ki he tohi-fakatau; ʻoku sio ki ai foki ʻa e kau Siu kotoa naʻe nofo ʻi he lotoʻa ʻo e kaate.”

ʻIo, neongo naʻe alea fakatau ʻa Selemaia mo ha kaungā lotu, naʻa mo e kāinga, naʻá ne fou ʻi he ngaahi founga fakalao ʻuhinga lelei ʻe niʻihi. Ko e fakamatala tohinima ʻe ua naʻe faí​—ko e taha naʻe folahi pē ʻo mateuteu ke fai ha sio ki ai, ko e taha naʻe silaʻi pē koeʻuhi ke ne ʻomi ha fakamoʻoni tokoni, kapau leva ʻe ʻi ai ha veiveiua ʻo fekauʻaki mo e moʻoni ʻa e taha ko ia ʻoku folahí. Naʻe fakahoko kotoa ʻa e aleá ni, ʻo hangē ko ia ʻoku lau ʻe he veesi 13, “ʻi honau ʻao.” Ko ia naʻe hoko ia ko ha alea pisinisi fakahāhā fakalao naʻe fakamoʻoniʻi. ʻOku hā mahino leva, koeʻuhi ko ʻene tomuʻa Fakatohitapu hono faí, ʻoku tuha ai ki he kau lotu moʻoní ke aleaʻi ʻenau ngaahi meʻá ʻi ha faʻahinga founga papau mo fakapepa.

ʻOku toe fakapotopoto foki ia. ʻOku tau ʻilo tā he meʻa moʻoni ko e lau ko ia “ʻoku hokonoa ki he faʻahinga kotoa pe ʻa e faingamalie mo e tuʻutamaki.” (Koheleti 9:11) ʻOku kau ai ʻa e kau Kalisitiane anga-tonu mo līʻoá. ʻOku fokotuʻu ia ʻe Semisi 4:​13, 14 ʻi he foungá ni: “Meʻa mai ʻeni, ʻa kimoutolu ʻoku lau, ʻo pehe, Ko e ʻaho ni, pe ko e ʻapongipongi, te mau fononga ki he kolo ko é, pea mau nofo ai ʻo taʻu katoa, pea te mau fakatau ai ʻo ngaohi paʻanga: ʻosi ʻoku ʻikai te mou ʻilo ʻa e meʻa ʻo e ʻapongipongi.” Ko ia, te tau kamata nai ha ngāue, hangē ko hano fai ha fakatau, fakahoko ha felotoi ki ha ngāue pe fatongia, pe ngaohi ha meʻa maʻa ha taha. Ka ko e hā ʻe ʻomi ʻe he ʻapongipongí​—pe ko e mahina hono hokó pe taʻu hono hokó? Fēfē leva kapau ʻe hoko ha fakatuʻutāmaki kiate kitautolu pe ko e faʻahi ʻe tahá? ʻOku ʻai nai ʻi he meʻa ko iá ke ngali taʻemalava hano tauhi ha aleapau. Fēfē kapau ʻe ʻikai te tau malava ʻo fai ʻa e ngāué pe fakahoko ʻa e fatongiá, pe ko ʻene ʻilo ʻoku teletele taʻemalava ke ne fai tauhi ki he totongí pe ko hono tauhi ʻene tafaʻaki ʻi he aleapaú? Kapau ʻoku ʻikai ha aleapau fakapepa, ʻe malanga hake nai ha ngaahi palopalema moʻoni, ʻa ē naʻe mei malava pē, pe naʻe mei kalofi pē ʻi hano fai ha aleapau fakapepa nounou.

Tānaki atu ki aí, ʻoku totonu ke ʻoua naʻa ngalo ʻiate kitautolu ko e natula taʻepau pē ko ia ʻo e ngaahi tafaʻaki lahi ʻi he moʻuí ʻe ʻuhinga nai ai ko ha tokotaha kehe ia te ne hoko atu pe fakaʻosi ʻetau (pe ko ʻene) ngaahi meʻa fakapisinisí. Naʻe tānaki mai ʻe Sēmisi ʻi he veesi 14: “Ko e mao pe kimoutolu, ʻa ia ʻoku ha fuoloa siʻi, pea toki mole foki.” Ko hono moʻoní, te tau mate taʻeʻamanekina nai. Ko ha felotoi fai fakapepa, ko ha aleapau, te ne malava ʻi ha ngaahi tuʻunga fakapotopoto ke fakaʻatā ʻa e niʻihi kehé ke nau hoko atu hono fakahoko ʻa e ngaahi meʻá ka faifai ange kuo hoko taʻeʻamanekina ha faʻahinga meʻa ki he ongo tafaʻakí.

ʻI ha toe ʻuhinga ʻe taha, ʻoku toe tataki atu eni ki he tafaʻaki hono tolú​—ko e ngaahi aleapau fai fakapepá ʻoku anga-ʻofa. ʻOku taʻetoeveiveiua, kapau naʻe mate ha taha ʻi he ongo faʻahí pe naʻe hoko ki ai ha fakatuʻutāmaki fakatupu taʻemalava, naʻe mei anga-ʻofa leva ki ha Kalisitiane kapau naʻe ʻosi tokonaki mai ha fakamatala fakapepa fekauʻaki mo hono ngaahi fatongiá pe ko e paʻanga ʻoku ʻamanekiná. Pea ʻi he ʻikai ke fakahā ai ha taʻefefalalaʻakí, ʻoku fakahā ai ʻa e ʻofa ki he tokoua ko ia ʻa ia ʻoku tau aleá ke fai ha aleapau fakapepa ʻa ia ʻe fakahā mahino mo totonu ai ʻa e meʻa ʻoku fakamoʻuaʻi ia ke ne faí pe ʻokú ne teu ke maʻú. Ko e sitepu anga-ʻofa ko ení te ne hanga ʻo fakasiʻisiʻi ha faʻahinga ʻuhinga pē ke loto-ʻita pe loto-mamahi ai kapau ʻe fai atu pē ʻo ngalo ʻi ha taha ʻo e ongo faʻahi taʻehaohaoá ha niʻihi ʻo e ngaahi fakaikiikí pe ngaahi fatongiá. He ko hai ia ʻiate kitautolu ʻoku ʻikai taʻehaohaoa, loto ngalongalo pe hehema ke fakaʻuhingahalaʻi ʻa e ngaahi fakaikiikí pe ngaahi taumuʻá?​—Mātiu 16:5.

ʻOku ʻi ai ʻa e ngaahi founga kehe ia ʻa ia ʻoku hoko ai ʻa e ngaahi felotoi fakapisinisi ʻoku fai fakapepá ʻo tapua ai ʻa e ʻofa ki hotau tokouá, hotau fāmilí, pea ki he fakatahaʻangá fakalūkufua. Ka ko e meʻa ʻoku totonu ke mahinó ʻi he hulu atu ʻi hono fai pē ko e anga-ʻofá, ko e ngaahi lēkooti fakapepa pehē ʻoku feʻunga hono fakaikiikí ʻoku fakapotopoto ia pea Fakatohitapu.