Vahe 38

Ko e Hā ʻOku Tauhi Mai ʻi he Kahaʻú Maʻakú?

“ʻOKU OU manavahē ki he kahaʻú, ko e kahaʻu ʻi ha māmani ʻoku fakamatalaʻiʻaki ʻa e ngaahi fakamanamana fakaniukilia.” Ko e lau ia ʻa ha talavou Siamane ʻi haʻane lea ki he ʻōfisa fakapolitikale māʻolunga taha ʻi hono fonuá.

Mahalo ko e manavahē ki he ʻauha ʻi ha foʻi puho fakaniukiliá ʻoku pehē ʻa ʻene toutou fakahohaʻasi ʻa hoʻo vīsone ki he kahaʻú. “Ko e hā ke u hohaʻa ai ke maʻu ha ngaahi kuleiti lelei?” ko e fehuʻi ia ʻa e talavou ʻe taha. “He ko ē ʻe ʻauha ʻa e foʻi māmaní ia.” Ko e moʻoni, ʻi ha savea ʻe taha ki he fānau akó, naʻe lave ai ʻa e fānau tangatá ki he tau fakaniukiliá ko e meʻa ia ʻoku nau manavahē lahi taha ki aí. Naʻe fika ua ia ki he fānau fefiné ʻo muʻomuʻa pē ai ʻa e manavahē ki ha “mate ʻeku ongo mātuʻá.”

Kae kehe, ko e pā ʻa ha niukilia ʻoku ʻikai ko e tuʻunga fakapōpōʻuli pē ia ʻoku maluʻaki maí. Ko e fakamanamana ʻo e “fuʻu tokolahi ʻa e kakaí, ʻosiʻosingamālie ʻa e ngaahi maʻuʻanga tokoní, ʻuliʻi ʻo e ʻātakaí,” mo e ngaahi fakatamaki kehe ʻoku tuʻunukú naʻe taki ai ʻa e toketā ongoongoa ki he ʻatamaí ko B. F. Skinner ke ne fakaʻosiʻaki: “ʻOku hā mai ʻoku fakamanamanaʻi ʻa hotau faʻahingá.” Naʻá ne fakahā ki mui: “ʻOku ou mātuʻaki fakatuʻatamaki ʻaupito. Ko e moʻoni ʻe ʻikai ke tau solova ʻetau ngaahi palopalemá.”

Koeʻuhi naʻa mo e kau potó ʻoku nau vakai fakataha mo e tailiili ki he kahaʻú, ʻoku ʻikai ai ha ofo ʻi he fakahāhā ʻe he kau talavou tokolahi ʻa e fakakaukau: “ʻE, tau kai mo inu e, he ʻoku apongipongi ʻetau mate.” (1 Kolinito 15:32) Ko e moʻoni, kapau ʻoku fakafalala ho kahaʻú ʻi he malava ʻa e kau politikí mo e kau saienisí, ʻoku hā faingatāmaki ʻaupito. He ʻoku pehē ʻe he Selemaia 10:23: “ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”

ʻOku ʻikai pehē pē ʻoku ʻikai maʻu ʻe he tangatá ʻa e malava ke ne puleʻi iá. Fakatokangaʻi ange ʻoku ʻikai “ʻi he” tangatá ke fai pehē—ʻoku ʻikai haʻane totonu ke puleʻi ʻa e kahaʻu ʻo e māmaní. Ko ia ai, ko ʻene ngaahi feingá kuo pau ke taʻelavameʻa. ʻI he ʻuhinga ko iá naʻe lotu ai ʻa Selemaia ki he tokoni fakaʻotuá: “Akonakiʻi au, ʻe Sihova, kae fai ʻo tāu mo e lao.” (Selemaia 10:24) ʻOku ʻuhinga ení ko hotau Tokotaha-Fakatupú te ne fakapapauʻi ʻa hotau kahaʻú. Ka ko e hā ʻa e kahaʻu ko iá?

Taumuʻa ʻa e ʻOtuá ki he Māmaní—Mo Ho Kahaʻú

Taimi nounou mei hono fakatupu ʻa e tangatá, naʻe folofola ʻa e ʻOtuá ki he ʻuluaki ongo meʻa fakaetangatá: “Mo fakatupu, mo fakatokolahi, mo fakafonu ʻa mamani, pea ikuna ia: pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Senesi 1:28) Naʻe ʻoange ai ki he tangatá ʻa e ʻamanaki ʻo e moʻui ʻi ha foʻi kolope palataisi.

Kae kehe, naʻe angatuʻu ʻa e ʻuluaki ongo meʻá ki he tuʻunga-pule ʻa e ʻOtuá. Hangē ko hono fakalea ki mui ʻe Solomoné, “Nae gaohi ae tagata e he Otua i he agatonu; ka kuo nau kumi ki he gaahi filioi lahi.” (Koheleti 7:​29, PM) Kuo fakamoʻoniʻi ʻa e hoko ʻo fakatuʻutāmaki ʻa e ngaahi filioʻi ʻa e tangatá, ʻo tuku mai ai ki he toʻutangata lolotongá ʻa e faingataʻaʻia pea mo e ngaahi ʻamanaki fakamamahi taha ki he kahaʻú.

ʻOku ʻuhinga eni kuo liʻaki ʻe he ʻOtuá ʻa e foʻi māmaní ke hoko ko ha foʻi kolope ʻoku ʻuli, fonu ʻi he ngaahi huelo fakaeʻātomi kehekehe—pea mo taʻemoʻui nai? ʻIkai ʻaupito! Ko Ia “naʻa ne faʻu ʻa e fonua mo ngaohi ia; (ko ia naʻa ne teu ia, naʻe ʻikai te ne fakatupu ia ke maomaonganoa, naʻa ne faʻu ia ke nofoʻanga).” Ko ia ai, ko ʻene taumuʻa kuo fakahā ki he māmaní ʻoku pau ke fakahoko!—Aisea 45:18; 55:​10, 11.

Ka ʻe hoko ʻafē—pea ʻe anga-fēfē? Lau angé ʻa e Luke vahe 21. Naʻe tomuʻa fakahā ai ʻe Sīsū ʻa e ngaahi palopalema tonu ko ia kuó ne fakafaingataʻaʻiaʻi ʻa e faʻahinga ʻo e tangatá lolotonga ʻa e laui hongofuluʻi taʻu kuo maliu atú: ngaahi tau fakavahaʻapuleʻanga, mofuike, mahaki, nounou fakameʻatokoni mo e mafolalahia ʻa e faihiá. ʻE vavé ni ke fakahoko ʻa e ngaahi lea ko ia ʻa Sīsū: “ʻI he kamata hoko ʻa e ngaahi meʻa ko ia, mou hiki homou ʻulu, ʻo hanga hake; he ʻoku ofi ai homou huhuʻi. . . . Ka mou ka vakai kuo hoko ʻa e ngaahi meʻa ko ia, pea mou ʻilo kuo ofi ʻa e Puleʻanga ʻo e ʻOtua.”—Luke 21:​10, 11, 28, 31.

Ko e Puleʻanga ko iá ʻa e kī ki ho kahaʻú. Ko ha founga-pule ia, ko e founga ʻa e ʻOtuá ki hono puleʻi ʻo e foʻi māmaní. Ko e Puleʻanga ko iá te ne faʻao fakamālohi ʻa e puleʻi ʻo e māmaní mei he nima ʻo e tangatá. (Taniela 2:44) Ko ‘kinautolu ʻoku fakaʻauha ʻa e fonuá’ te nau fehangahangai mo e fakaʻauhá tonu ʻi he ʻaofinima ʻo e ʻOtuá, ʻo fakahaofi ai ʻa e foʻi māmaní—mo e faʻahinga ʻo e tangatá—mei hono ngaohikovia lahi ʻe he tangatá.—Fakahā 11:18; Koheleti 1:4.

ʻI he malu he malumalu ʻo e pule ʻa e Puleʻanga ʻo e ʻOtuá, ʻe faai atu pē ʻo hoko ʻa e foʻi māmaní ko ha palataisi fakalūkufua. (Luke 23:43) ʻE toe ʻi ai ha tuʻunga mafamafatatau haohaoa ʻi he felāveʻiʻaki ʻa e meʻamoʻuí mo honau ʻātakaí. He ko ē, ʻe aʻu ʻo ʻi ai ʻa e feongoongoi ʻi he vahaʻa ʻo e tangatá mo e manú. (Aisea 11:​6-9) Ko e taú mo e ngaahi meʻataú ʻe ʻikai toe ʻi ai. (Sāme 46:​8, 9) Ko e faihiá, fiekaiá, nounou fakaenofoʻangá, puké—naʻa mo e maté tonu—ʻe toʻo kotoa atu ia. Ko e kau nofo ʻi he māmaní “te nau fefiefiaʻi ʻi he melino lahi.”—Sāme 37:​10, 11; 72:16; Aisea 65:​21, 22; Fakahā 21:​3, 4.

“Sivi” ʻa e Ngaahi Talaʻofa ʻa e ʻOtuá

Ko e moʻui taʻengata ʻi ha palataisí—ʻe malava ke hoko ia ko ho kahaʻú! Kae lolotonga ʻe ongo fakamānako nai ʻa e foʻi fakakaukaú ni, mahalo ʻoku faingataʻa nai ke ke tukuange ʻa e tui ʻoku ʻalu ʻa e kakai lelei kotoa pē ki hēvaní, pe ʻoku ʻi ai haʻo ngaahi tālafili fekauʻaki mo e Tohi Tapú tonu. Naʻa mo e kau talavou ʻe niʻihi ʻi he Kau Fakamoʻoni ʻa Sihová kuo nau ʻiloʻi ko ʻenau tuí ʻoku ngāvaivai moʻoni ʻi he taimi ʻe niʻihi. Ko e fakatātaá, ko Michelle naʻe ʻohake ia ʻe ha ongo mātuʻa Fakamoʻoni. Ko hono tali ko ia ʻoku moʻoni ʻa e Tohi Tapú naʻe hangē ia ko hono tali ʻoku ʻosi ʻa e poʻulí pea hoko mai ʻa e ʻahó. Kae kehe, ʻi he ʻaho ʻe taha naʻe hā kiate ia—naʻe ʻikai te ne ʻilo ʻa e ʻuhinga naʻá ne tui ai ki he Tohi Tapú. Naʻá ne pehē: “ʻOku ou tui ko ʻeku tui ki ai ʻo ʻau mai ki he taimi ko ení koeʻuhi naʻe tui ki ai ʻa ʻeku faʻeé mo ʻeku tamaí.”

ʻOku pehē ʻe he Tohi Tapú: “ʻO ka taʻekau ʻa e tui, ʻoku ʻikai momoʻi lava haʻate fakahōifua [ʻa e ʻOtuá].” (Hepelu 11:6) Neongo ia, ko e tuí ʻoku ʻikai ko ha meʻa ia ʻokú ke maʻu koeʻuhi ko hono maʻu ʻe hoʻo faʻeé mo hoʻo tamaí. Ke malu ho kahaʻú, kuo pau ke ke langa ha tui ʻoku makatuʻunga ʻi he fakamoʻoni fefeka—ko hano “fakasino ʻa e ngaahi meʻa ʻoku ʻamanekina.” (Hepelu 11:1) Hangē ko hono fakamatalaʻi ʻe he Tohi Tapú, kuo pau ke ke “sivi kotoa pe,” pe hangē ko hono fakalea ʻe he liliu ʻa e Living Bible, ke “sivi ʻa e meʻa kotoa pē ʻoku leaʻakí ke fakapapauʻi ʻoku moʻoni.”—1 Tesalonaika 5:21.

Ko Hoʻo Fakapapauʻi ʻOku Moʻoni ʻa e Tohi Tapú

ʻE ʻuluaki fiemaʻu nai ke ke sivi pe ko e Tohi Tapú ʻoku moʻoni ko e “fakamanava mei he ʻOtua.” (2 Timote 3:16) ʻE malava fēfē ke ke fai eni? Ko e ʻOtua Māfimafi-Aoniú pē ʻoku malava taʻetoefehālaaki ke ne ‘fakaha mei he kamataagá ae ikuagá.’ (Aisea 43:9; 46:​10, PM) Pea ʻokú ne toutou fai pehē ʻi he Tohi Tapú. Lau ʻa e ongo kikite ʻoku hiki ʻi he Luke 19:​41-44 mo e 21:​20, 21 fekauʻaki mo e tō ʻa Selusalemá. Pe ko e ongo kikite ʻi he Aisea 44:​27, 28 mo e 45:​1-4 fekauʻaki mo e tō ʻa Pāpiloné. ʻOku fakamoʻoniʻi ʻe he hisitōlia fakaemāmaní ʻa e taʻetoefehālaaki hono tomuʻa fakahaaʻi ʻe he Tohi Tapú ʻa e ngaahi meʻá ni! “Hili hono vakaiʻi ʻa e niʻihi ʻo ʻene ngaahi kikité,” ko e lau ia ʻa Janine taʻu 14, “naʻá ku mātuʻaki fakatumutumu ʻi he sio ki heʻene malava ʻo tomuʻa fakahā ʻa e ngaahi meʻa kotoa naʻá ne fakahaá.”

Ko e tonu fakahisitōlia, faitotonu, lea hangatonu mo e ʻikai fepakipaki ʻa e Tohi Tapú ko e toe ngaahi ʻuhinga lahi ange ia ke tui ai ki he Tohi Tapú.a Ka ʻoku malava fēfē ke ke ʻiloʻi ʻoku tonu ʻa e founga ʻoku mahinoʻi ai ʻe he Kau Fakamoʻoni ʻa Sihová ʻa e Tohi Tapú? Ko e faʻahinga naʻe nofo ʻi Pēlea ʻo e kuonga muʻá naʻe ʻikai te nau tali taʻetoefehuʻia ʻa e anga hono fakamatalaʻi ʻe he ʻapositolo ko Paulá ʻa e Tohi Tapú. ʻI hono kehé, naʻa nau “kumi ʻi he Tohitapu ʻi he ʻaho kotoa pe ʻa e moʻoni ʻo e ngaahi meʻa ko ia.”—Ngāue 17:11.

ʻOku mau fakalototoʻaʻi foki koe ke ke ako fakaʻāuliliki ʻa e ngaahi akonaki ʻa e Tohi Tapú. Ko e tohi ʻIlo ʻA Ia ʻOku Taki Atu ki he Moʻui Taʻengatá (pulusi ʻe he Watchtower Bible and Tract Society of New York, Inc.) ʻoku ʻoatu ai ʻa e ngaahi akonakí ni ʻi ha founga mahino. Kapau ko hoʻo ongo mātuʻá ko e ongo Fakamoʻoni ʻa Sihova, ʻoku ʻikai ha veiveiua ʻe malava ke na tokoniʻi koe ʻi ha fehuʻi pē nai te ke ʻeke. “Lea totonu ki hoʻo ongo mātuʻá kapau ʻoku ʻi ai haʻo palopalema ʻi he meʻá ni,” ko e fokotuʻu ia ʻa e finemui ko Janel. “ʻEke ha ngaahi fehuʻi kapau ʻoku ʻi ai ha meʻa ʻoku faingataʻa ke ke tui ki ai.” (Palovepi 15:22) ʻI he ʻalu ʻa e taimí ʻe ʻikai ha veiveiua te ke hoko ai ʻo mahinoʻi kuo tāpuakiʻi moʻoni ʻe Sihova ʻa ʻene Kau Fakamoʻoní ʻaki ha mahino fakaofo ʻo e ngaahi moʻoni ʻo e Tohi Tapú!

Ko e lau eni ʻa e talavou ko Prentice: “ʻI he taimi ʻe niʻihi ʻoku ou ongoʻi mafasia ʻi he tuʻunga ʻoku ʻi ai ʻa e māmaní. ʻOku ou sio ki he ngaahi konga Tohi Tapu hangē ko e Fakahā 21:​4, pea ʻokú ne ʻomai kiate au ha meʻa ke u ʻamanaki ki ai.” ʻIo, ko e maʻu ʻo e tui mālohi ki he ngaahi talaʻofa ʻa e ʻOtuá te ne laveʻi ʻa e anga hoʻo fakakaukaú. ʻOkú ke vakai ai ki he kahaʻú fakataha mo e ʻamanaki fiefia, ʻikai ko e fakatuʻatamaki. ʻOku hoko ai ʻa hoʻo moʻui lolotongá, ʻo ʻikai ko ha fāinga taumuʻavalea, ka ko ha founga ʻo e ‘faʻoaki maʻau ha tuʻunga lelei ki he ʻamuí, koeʻuhi ke ke puke ki he moʻui moʻoní.’—1 Timote 6:19.

Ka ʻoku ʻi ai ha meʻa lahi ange ki hono maʻu ʻo e “moʻui moʻoni” ko iá ʻi he ako pē pea hoko ʻo tui ki he ngaahi akonaki ʻa e Tohi Tapú?

[Fakamatala ʻi lalo]

Ngaahi Fehuʻi ki he Fetalanoaʻaki

◻ Ko e hā ʻoku manavahē ki ai ʻa e kau talavou tokolahi ʻi he fekauʻaki mo honau kahaʻú?

◻ Ko e hā ʻa e muʻaki taumuʻa ʻa e ʻOtuá ki he māmaní? Ko e hā ʻoku malava ai ke tau tuipau kuo ʻikai ke liliu ʻa e taumuʻa ʻa e ʻOtuá?

◻ Ko e hā ʻa e ngafa ʻo e Puleʻangá ʻi hono fakahoko ʻo e taumuʻa ʻa e ʻOtuá ki he māmaní?

◻ Ko e hā ʻoku fiemaʻu ai ke ke sivi ʻa e moʻoni ʻo e ngaahi akonaki ʻa e Tohi Tapú pea ʻe malava fēfē ke ke fai ia?

◻ ʻE malava fēfē ke ke fakamoʻoniʻi tonu ko e Tohi Tapú ko e fakamānavaʻi ʻe he ʻOtuá?

[Fakamatala ʻi he peesi 306]

“ʻOku ou mātuʻaki fakatuʻatamaki ʻaupito. Ko e moʻoni ʻe ʻikai ke tau solova ʻetau ngaahi palopalemá.”—Toketā ki he ʻAtamaí ko B. F. Skinner

[Fakatātā ʻi he peesi 307]

ʻE ʻikai fakaʻatā ʻe he Tokotaha-Fakatupu ʻo e māmaní ʻa e tangatá ke ne maumauʻi ʻa hotau foʻi palanité

[Fakatātā ʻi he peesi 309]

Kuó ke fakatuipauʻi koe ki he moʻoni ʻo e Tohi Tapú?