Ko Hai ʻOkú Ne Fakafuo Hoʻo Fakakaukaú?

“ʻOUA naʻa tala mai ʻe ha taha ʻa e meʻa ke u fakakaukau ki aí! Pea ʻoua naʻa tala mai ʻe ha taha kiate au ʻa e meʻa ke u faí!” Ko e lea ʻo mātuʻaki fakamamafaʻi iá ʻoku faʻa ʻuhinga iá ʻokú ke falala lahi kiate koe pea ki hoʻo fakafuofuá tonu. Ko e anga ia hoʻo ongoʻí? ʻOku mahino, ʻoku ʻikai totonu ki ha taha kehe ke ne fai maʻau ʻa hoʻo ngaahi filí. Ka ʻoku fakapotopoto ke talitekeʻi vave ʻaupito ha meʻa ʻe iku nai ko ha faleʻi lelei? ʻE ʻikai ʻaupito lava ʻe ha taha ia ʻo tokoniʻi koe ke fai ha ngaahi fili fakapotopoto? Neongo ia, ʻe lava moʻoni ke ke fakapapauʻi, ko hono moʻoní, ʻoku ʻikai ke fakafuo ʻe ha taha ʻa hoʻo fakakaukaú, ʻo ʻikai naʻa mo haʻo lāuʻilo ki ai?

Ko e fakatātaá, ki muʻa ʻi he tau hono ua ʻa māmaní, ko Joseph Goebbels, ʻa e minisitā fakamafola fakamatala fakangalilelei ʻa Hitilaá, naʻá ne puleʻi ʻa e ngāueʻanga filimi ʻa Siamané. Ko e hā hono ʻuhingá? Koeʻuhi he naʻá ne ʻiloʻi ʻe ʻomai kiate ia ʻe he meʻá ni ha meʻatau mālohi fakaʻulia ʻa ia ʻe lava ke ne “tākiekina ʻaki ʻa e tui ʻa e kakaí pea mei ai ko ʻenau tōʻongá.” (Propaganda and the German Cinema 1933-​1945) Ngalingali ʻokú ke lāuʻilo ki he ola lelei fakalotomafasia ʻa ia naʻá ne ngāueʻaki ai eni mo e ngaahi founga kehe ke ne puleʻiʻaki ʻa e kakai lāuvalé​—ʻa e kakai maheni, fakakaukau leleí​—ke nau muimui kui ki he filōsofia faka-Nasí.

Ko e moʻoniʻi meʻá ko e anga ʻo hoʻo fakakaukaú, pea mei ai ki he anga ʻo hoʻo tōʻongá, ʻoku tākiekina maʻu pē ʻi ha founga ʻe he ngaahi ongoʻi mo e fakakaukau ʻa e faʻahinga ko ia ʻokú ke fanongo ki aí. Ko e moʻoni, ʻoku ʻikai fiemaʻu ke hoko eni ko ha meʻa ʻoku kovi. Kapau ko e kakaí ni ʻoku nau mahuʻingaʻia moʻoni ʻi ha lelei maʻau​—hangē ko e kau faiakó, kaungāmeʻá, pe ngaahi mātuʻá​—te ke maʻu leva ʻa e ʻaonga lahi mei heʻenau akonakí mo e faleʻí. Ka ʻo kapau ko e kakai kinautolu ʻoku nau tokanga ki he lelei pē ʻanautolú pea nau tākihalaʻi pe fakameleʻi pē kinautolu ʻi heʻenau fakakaukaú, ʻo “fakahalaʻi ʻa e loto,” hangē ko hono fakamatalaʻi kinautolu ʻe he ʻapositolo ko Paulá, tokanga leva!​—Taitusi 1:​10; Teutalonome 13:​6-8.

Ko ia, ʻoua ʻe hoko ʻo taʻetokanga pea fakakaukau ʻe ʻikai ʻaupito lava ʻe ha taha ʻo tākiekina koe. (Fakafehoanaki mo 1 Kolinito 10:12.) Hangehangē kuo ʻosi hoko ia​—ʻo tuʻo lahi ange ia ʻi he meʻa ʻokú ke loto ke fakahāʻí​—ʻo ʻikai ʻaupito te ke fakatokangaʻi. Fakakaukau ki he fakatātā faingofua ki he koloa ʻokú ke fili ke fakatau ʻi hoʻo ʻalu ʻo faifakataú. Ko ha fili fakafoʻituitui, mo fakakaukau lelei kotoa maʻu pē ia? Pe ʻoku uesia olopoto kae mālohi ʻa hoʻo filí ʻe he kakai kehé, ʻo ʻikai faʻa sio ki ai? ʻOku fakakaukau ʻa e ʻētita fakatotolo ko Eric Clark ʻoku pehē. “Ko e lahi ange hono nafui ʻaki kitautolu ʻa e tuʻuakí,” ko ʻene leá ia, “ko e siʻi ange ia ʻetau fakatokangaʻí, pea neongo ia, ʻoku meimei pau, ko e lahi ange ia hono uesia kitautolú.” ʻOkú ne toe līpooti ko e taimi ʻoku ʻeke ai ki he kakaí pe ʻoku fēfē ʻenau ongoʻi fekauʻaki mo e ola lelei ʻa e tuʻuakí, “ko e tokolahi tahá ʻoku nau loto-tatau ʻoku ngāue ia, ka ʻikai kiate kinautolu.” ʻOku hehema ʻa e kakaí ke ongoʻi ʻoku laveangofua ʻa e tokotaha kehe kotoa, ka ʻoku ʻikai te nau pehē. “ʻOku ngalingali, ko kinautolu pē ʻoku haó.”​—The Want Makers.

Kokoʻi ki he Fakafuo ʻa Sētané?

Pe ʻoku tākiekina koe ʻe he tuʻuaki ʻi he ʻaho kotoa pē ʻe ʻikai nai hano ngaahi nunuʻa mafatukituki. Kae kehe, ʻoku ʻi ai ha tākiekina ʻe taha, ʻoku fakatuʻutāmaki lahi ange ia. ʻOku fakahaaʻi mahino ʻe he Tohitapú ko Sētane ʻa e pule tākiekina kākaá. (Fakahā 12:9) Ko ʻene filōsofiá ʻoku tautefito ʻa ʻene tataú mo e fakakaukau ʻa ha fakafofonga tuʻuaki ʻe taha ʻa ia naʻá ne pehē ʻoku ʻi ai ʻa e founga ʻe ua ke tākiekina ai ʻa e kau kasitomá​—“ʻaki hono fakataueleʻi kinautolu pe ʻaki hono fakafuo kinautolu.” Kapau ʻe lava ke ngāueʻaki ʻe he kau fakamafola fakamatala fakangalileleí mo e kau tuʻuakí ʻa e ngaahi founga olopoto peheé ke fakafuo hoʻo fakakaukaú, he pōtoʻi lahi ange ē kuo pau ʻoku ʻi ai ʻa Sētane ʻi hono ngāueʻaki ʻa e ngaahi founga meimei tatau!​—Sione 8:44.

Naʻe ʻiloʻi eni ʻe he ʻapositolo ko Paulá. Naʻá ne manavahē naʻa ʻikai nai ʻāʻā ʻa e niʻihi ʻo hono kaungā Kalisitiané pea hoko ko e kau maʻunimā ʻe he kākā ʻa Sētané. Naʻá ne tohi: “ʻOku te manavahē tuʻu naʻa ʻiloange ʻe leʻei hoʻomou tokanga, ʻo mou hiki mei hoʻomou toka taha mo nofo molumalu kia Kalaisi.” (2 Kolinito 11:3) Fakakaukau fakamātoato ki he fakatokanga ko iá. He ka ʻikai te ke tatau nai mo e kakai ko ia ʻoku nau tui ʻoku ngāue ʻa e fakamatala fakangalileleí mo e fakafuó​—“kae ʻikai kiate kinautolu.” Ko e moʻoniʻi meʻa ko ia ʻoku ngāue ʻa e fakamatala fakangalilelei fakasētané ʻoku hā mahino ia takatakai kotoa ʻiate kitautolu ʻi he anga-fakamanu, anga-fakalielia, mo e mālualoi ʻokú ne fakaʻilongaʻi ʻa e toʻutangata ko ení.

Ko ia ai, naʻe kōlenga ʻa Paula ki hono kaungā Kalisitiané ke ‘ʻoua ʻe tuku ke fakaangatatau kinautolu ki he maama ko ení.’ (Loma 12:2) Ko ha tokotaha liliu Tohitapu ʻe taha naʻá ne toe fakalea ʻa e ngaahi lea ʻa Paulá ʻi he foungá ni: “ʻOua ʻe tuku ʻa e māmani takatakai ʻiate koé ke ne kokoʻi koe ki he fakafuo ʻaʻaná.” (Loma 12:​2, Phillips) ʻE feingaʻaki ʻe Sētane ha meʻa pē ke fakamālohiʻi ʻaki koe ki heʻene fakafuó, hangē ko e tokotaha tufunga ʻumea he kuonga muʻá ʻa ia naʻá ne fakamālohiʻi ʻa e ʻumeá ki ha fuo ʻoku ava ke maʻu ai ʻa e ngaahi fakaʻilonga mo e ngaahi anga naʻá ne fiemaʻu ke ʻai ke hā ʻi aí. Kuo teuteuʻi ʻe Sētane ʻa e ngaahi tuʻunga politikí, komēsialé, lotú, mo e fakafiefia ʻo e māmaní ke nau fai ia. ʻOku hūhū fēfē ʻene tākiekiná? ʻOku mafolalahia tatau pē ia mo ia ʻi he ʻaho ʻo e ʻapositolo ko Sioné. “Ko hono kotoa ʻo mamani,” ko e lau ia ʻa Sioné, “ʻoku ʻi he nima ʻo e Fili.” (1 Sione 5:​19; toe sio ki he 2 Kolinito 4:4.) Kapau ʻoku ʻi ai haʻo veiveiua fekauʻaki mo e malava ʻa Sētane ke fakataueleʻi ʻa e kakaí mo fakameleʻi ʻenau fakakaukaú, manatuʻi ʻa e anga ʻo e ola lelei ʻo ʻene fai eni ki ha puleʻanga kakato ʻo e kakai ʻIsilelí, ʻa ia naʻa nau fakatapui ki he ʻOtuá. (1 Kolinito 10:​6-​12) ʻE hoko nai ʻa e meʻa tatau kiate koe? ʻE lava ia kapau te ke tuku ʻatā ho ʻatamaí ki he tākiekina fakatauele ʻa Sētané.

ʻIloʻi ʻa e Meʻa ʻOku Hokó

ʻI he lahi tahá, ʻe tākiekina ʻe he ngaahi mālohi fakatauele peheé ʻa hoʻo fakakaukaú kapau pē te ke fakaʻatā kinautolu. ʻI heʻene tohi ko e The Hidden Persuaders, naʻe fokotuʻu ai ʻe Vance Packard ʻa e poini ko ení: “ʻOku tau kei maʻu pē ha maluʻi mālohi ʻoku ala maʻu ki he kau fakalotoʻi [fufū] peheé: ʻe lava ke tau fili ke ʻoua ʻe fakalotoʻi kitautolu. ʻI he meimei ngaahi tuʻunga kotoa pē ʻoku tau kei maʻu pē ʻa e fili ke fai, pea ʻe ʻikai lava ke fuʻu tākiekina kākaaʻi mafatukituki kitautolu kapau ʻoku tau ʻiloʻi ʻa e meʻa ʻoku hokó.” ʻOku toe hoko moʻoni foki ia ʻi he fakamatala fakangalileleí mo e kākaá.

Ko e moʻoni, ke “ʻiloʻi ʻa e meʻa ʻoku hokó,” kuo pau ke ke hanganaki fakaʻatā hoʻo fakakaukaú pea tali ʻa e ngaahi tākiekina leleí. Ko ha fakakaukau moʻui lelei, ʻo hangē pē ko ha sino moʻui lelei, ʻoku fiemaʻú ke fafangaʻi lelei ia kapau ʻoku fiemaʻu ke ngāue lelei. (Palovepi 5:​1, 2) Ko e ʻikai ha fakahinohinó ʻe lava ke fakatupu maumau lahi ʻo tatau pē ia mo e fakahinohino halá. Ko ia, lolotonga ko e moʻoni ʻoku fiemaʻu ke ke maluʻi hoʻo fakakaukaú mei he ngaahi fakakaukau mo e filōsofia tākihalaʻí, feinga ke ʻoua ʻe fakatupu ha fakakaukau fakafili mo taʻefalala ki he faleʻi pe fakahinohino kotoa kuo fai atu kiate koé.​—1 Sione 4:1.

Ko e fakalotoʻi faitotonú ʻoku ʻikai ko e meʻa tatau ia mo e fakamatala fakangalilelei fakafufuú. Naʻe fakatokanga moʻoni ʻa e ʻapositolo ko Paulá ki he talavou ko Tīmoté ke hanganaki fakasio ki he “kakai kovi mo fakahekeheke [ʻa ia] te nau fakaaʻau atu mei he kovi ki he kovi, heʻenau kākāʻi ʻa e kakai kehe, pea kākāʻi mo kinautolu.” Ka naʻe tānaki atu ki ai ʻe Paula: “Ka ko koe, ke ke nofo ʻi he ngaahi meʻa naʻa ke ako ai, ʻa ia naʻe fakamahino atu, ko hoʻo ʻilo ki he anga ʻo e kakai naʻa ke ako mei ai.” (2 Timote 3:​13, 14) Koeʻuhi ko e meʻa kotoa pē ʻokú ke ʻai ki hoʻo fakakaukaú te ne tākiekina koe ki ha tuʻunga, ko e meʻa tefitó ko e ‘ʻilo ki he anga ʻo e kakai naʻá ke ako mei aí,’ ke fakapapauʻi ko e kakai kinautolu ʻoku nau mahuʻingaʻia taha ʻiate koé, ʻo ʻikai ʻiate kinautolú.

ʻOku ʻaʻau ʻa e filí. ʻE lava ke ke fili ke hoko ʻo ‘fakaangatatau ki he maama ko ení’ ʻaki hono tuku ʻa e ngaahi filōsofia mo e fokotuʻutuʻu mātuʻaki mahuʻinga ʻo e māmani ko ení ke ne puleʻi hoʻo fakakaukaú. (Loma 12:2) Ka ʻoku ʻikai ke mahuʻingaʻia ʻa e māmani ko ení ʻiate koe. Ko ia ai, “vakai,” ko e fakatokanga ia ʻa e ʻapositolo ko Paulá, “naʻa faifai pea ai ha taha, te ne fai ʻaki ʻene poto fiefilosefa, ʻa ia ko e koto muna mo e kākā, ʻo ne holataki kimoutolu ʻi he ʻalunga ʻo e ngaahi tuʻutuʻuni fakaeonoʻaho ʻa e kakai.” (Kolose 2:8) ʻI hono kokoʻi ki he fakafuo ʻa Sētané ʻi he founga ko ení, pe hoko ʻo “holataki,” ʻoku ʻikai faingataʻa. ʻOku hangē ia ha ʻahu ʻoku toki puhiʻi maí. ʻE lava ke uesia koe ʻaki pē hoʻo mānavaʻaki ʻa e ʻea kuo ʻuliʻí.

ʻI he tafaʻaki ʻe tahá, ʻe lava ke ke fakaʻehiʻehi mei hono mānavaʻaki ʻa e “ʻea” ko iá. (Efeso 2:2) ʻI hono kehé, muimui ki he faleʻi ʻa Paulá: “Tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai.” (Loma 12:2) ʻOku fiemaʻu ʻi he meʻá ni ʻa e feinga. (Palovepi 2:​1-5) Manatuʻi, ko Sihová ʻoku ʻikai ko ha tokotaha tākiekina kākā ia. ʻOkú ne ʻai ʻa e fakahinohino kotoa ʻoku fiemaʻú ke ala maʻu, ka ke maʻu ʻaonga mei ai, kuo pau ke ke fanongo ki ai pea tuku ia ke ne ueʻi hoʻo fakakaukaú. (Aisea 30:​20, 21; 1 Tesalonaika 2:​13) Kuo pau ke ke loto-lelei ke fakafonu ʻaki hoʻo fakakaukaú ʻa e moʻoni ʻoku ʻi he “gaahi tohi maonioni,” ʻa e Folofola fakamānavaʻi ʻa e ʻOtuá, ko e Tohitapú.​—2 Timote 3:​15-​17, PM.

Tali ʻa e Fakafuo ʻa Sihová

Ko e fiemaʻu ki ha tali loto-lelei, mo talangofua mei hoʻo tafaʻakí kapau ʻoku fiemaʻu ke ke maʻu ʻaonga mei he tākiekina fakafuo ʻa Sihová naʻe fakatātaaʻi mālohi ia ʻi he taimi naʻe tala ange ai ʻe Sihova ki he palōfita ko Selemaiá ke ʻaʻahi ki ha falengāue ʻa ha tufunga ʻumeá. Naʻe sio ʻa Selemaia ki he liliu ʻa e fakakaukau ʻa e tokotaha tufunga ʻumeá fekauʻaki mo e meʻa ke fai ki ha ipu e taha ʻi he taimi “ka maumau ʻi he nima ʻo e tufunga” ʻa e meʻa naʻá ne feinga ke ngaohí. Naʻe folofola leva ʻa Sihova: “Fale ʻo Isileli e, ʻikai koa te u lava ke fai kiate kimoutolu ʻo hange ko e tufunga ni? . . . Vakai, hange ko e ʻumea ʻi he nima ʻo e tufunga, ko kimoutolu ia ʻi hoku nima, siʻi fale ʻo Isileli.” (Selemaia 18:1-6) Naʻe ʻuhinga iá ko e kakai ʻi ʻIsilelí naʻa nau hangē pē ha ngaahi konga ʻumea taʻemoʻui ʻi he nima ʻo Sihová ke ne faʻiteliha pē ʻi hono fakafuo ki ha faʻahinga kalasi ipu?

ʻOku ʻikai ʻaupito ngāueʻaki ʻe Sihova ʻa hono ivi māfimafi-aoniú ke ʻai ʻa e kakaí ke nau fai ʻa e ngaahi meʻa ʻoku ʻikai te nau loto ki aí; pea ʻoku ʻikai ke tupu mei ai ʻa e mele ia ʻo e ngaahi meʻa ʻoku faʻú, ʻo hangē nai ko e tuʻunga ʻo ha tufunga ʻumea fakaetangatá. (Teutalonome 32:4) ʻOku tupu ʻa e melé ia ʻi he taimi ʻoku talitekeʻi ai ʻa ʻene fakahinohinó ʻe he faʻahinga ko ia ʻoku feinga ʻa Sihova ke fakafuo ki ha founga paú. Ko e taha ia ʻo e fuʻu faikehekehe lahi ʻi ho vahaʻá mo ha konga ʻumea taʻemoʻui. ʻOkú ke maʻu ʻa e tauʻatāina ke fili. ʻI hono ngāueʻaki iá, ʻe lava ke ke fili ke tali ʻa e tākiekina fakaefakafuo ʻa Sihová pe talitekeʻi fakahangatonu ia.

He lēsoni fakatupu fakakaukau moʻoni ē! He lelei ange ē ke fanongo ki he leʻo ʻo Sihová kae ʻikai ko e pehē loto-fefeka, “ʻOua naʻa tala mai ʻe ha taha ia kiate au ʻa e meʻa ke u faí”! ʻOku tau fiemaʻu kotoa ʻa e tākiekina fakaefakahinohino ʻa Sihová. (Sione 17:3) Hoko ʻo hangē ko e tokotaha-tohi-sāme ko Tēvitá, ʻa ia naʻá ne lotu: “ʻEiki, fakaʻilo mai ho ngaahi founga; ako kiate au ho ngaahi ʻalunga.” (Sāme 25:4) Manatuʻi ʻa e meʻa naʻe leaʻaki ʻe Tuʻi Solomoné: “Ke fanongo ʻa e poto, pea fakalahi ʻene meʻa ʻoku maʻu.” (Palovepi 1:5) Te ke fanongo? Kapau ko ia, pea “ʻe fai ho fakalekesi ʻe Fakakaukau, ʻe leʻohi koe ʻe Fakahinohino.”​—Palovepi 2:11.