Fāʻūtaha Fakaʻofoʻofá mo e Fakamanatú

1, 2. ʻI he 2018, ko e hā ʻa e kātoanga te ne fakafāʻūtahaʻi kitautolu ʻi ha founga makehé, pea ko e hā hono ʻuhingá? (Sio ki he ʻuluaki fakatātā ʻi he kupú ni.)

ʻI HE ʻaho 31 ʻo Maʻasi, 2018, ʻe ō ai ʻa e kakai ʻe laui miliona takatakai ʻi he māmaní ki ha kātoanga ʻa ia ʻoku hoko tuʻo taha pē ʻi he taʻu. Hili ʻa e tō ʻa e laʻaá, ʻe fakatahataha fakataha ai ʻa e Kau Fakamoʻoni ʻa Sihová mo e tokolahi kehe ke nau fakamanatu ʻa e feilaulau naʻe fai ʻe Sīsū maʻatautolú. ʻI he taʻu taki taha, ʻoku fakafāʻūtahaʻi ai ʻe he Fakamanatu ʻo e pekia ʻa Kalaisí ʻa e kakaí ʻi ha founga fakaofo, ʻo laka ange ia ʻi ha toe kātoanga pē ʻoku hoko ʻi he māmaní.

² ʻOku pau pē ʻoku fiefia moʻoni ʻa Sihova mo Sīsū ʻi heʻena sio mai ʻoku ō ʻa e kakai ʻe laui miliona ki he kātoanga makehe ko iá ʻi he houa ki he houa, takatakai ʻi he māmaní kotoa. ʻOku fakamatalaʻi ʻe he Tohi Tapú “ha fuʻu kakai lahi, ʻa ia naʻe ʻikai lava ʻe ha tangata ke ne lau, mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea,” ʻoku nau kalanga: “Ko hotau fakamoʻuí ʻoku mei he ʻOtuá, ʻa ia ʻokú ne ʻafio ʻi he taloní, pea mei he Lamí.” (Fkh. 7:9, 10) ʻOku fakaofo ʻa hono fakalāngilangiʻi ʻi he taʻu taki taha ʻi he Fakamanatú ʻe he fuʻu kakai tokolahi ʻa Sihova mo Sīsū ʻi he ngaahi meʻa lahi kuó na faí!

 3. Ko e hā ʻa e ngaahi fehuʻi ʻe tali ʻi he kupu ko ení?

³ ʻI he kupu ko ení, te ke maʻu ai ʻa e tali ki he fehuʻi ʻe fā ko ení: (1) ʻE lava fēfē ke u teuteu ki he Fakamanatú koeʻuhi ke u maʻu ʻaonga moʻoni ai mei ai? (2) ʻI he ngaahi founga fē ʻoku tokoniʻi ai ʻe he Fakamanatú ʻa e kakai kotoa ʻa e ʻOtuá ke nau fāʻūtahá? (3) Ko e hā ʻe lava ke u fai ke pouaki ai ʻa e fāʻūtaha ʻi he lotolotonga ʻo e kakai ʻa e ʻOtuá? (4) ʻE faifai pē pea ʻi ai ha Fakamanatu fakaʻosi? Kapau ko ia, ʻe fai ʻafē?

 4. Ko e hā ʻoku mahuʻinga ai ke tau ʻi he Fakamanatú?

⁴ Ko e hā ʻoku mahuʻinga ai ke tau ʻi he Fakamanatú? Ko e ʻuhinga ʻe taha he ko hono maʻu ʻa e ngaahi fakatahá ko ha founga ia ʻo ʻetau lotu kia Sihová. ʻE lava ke tau fakapapauʻi ʻoku fakatokangaʻi ʻe Sihova mo Sīsū ʻa e tokotaha taki taha ʻokú ne fai ʻene lelei tahá ke maʻu ʻa e fakataha mahuʻinga taha ko eni ʻo e taʻú. ʻOku tau loto ke sio mai ʻa Sihova mo Sīsū ʻoku tau ʻi he Fakamanatú tuku kehe kapau ʻe faingataʻa fakaʻaufuli ke tau ʻi ai. ʻI he fakamoʻoniʻi ʻi heʻetau ngaahi ngāué ʻoku mahuʻinga kiate kitautolu ʻetau ngaahi fakatahá, ʻoku tau ʻoange ai kia Sihova ha toe ʻuhinga ke tauhi ai hotau hingoá ʻi heʻene “tohi ʻo e manatú.” Ko e tohí ni ʻoku toe ui ia ko e “tohi ʻo e moʻuí.” ʻOku ʻi ai ʻa e ngaahi hingoa ʻo e faʻahinga kotoa ʻoku loto ʻa Sihova ke foaki kiate kinautolu ʻa e moʻui taʻengatá.​—Mal. 3:16; Fkh. 20:15.

 5. ʻI he ngaahi uike ki muʻa ʻi he Fakamanatú, ʻe lava fēfē ke mou “hanganaki siviʻi pe ʻoku mou ʻi he tuí”?

⁵ ʻI he ngaahi uike ki muʻa ʻi he Fakamanatú, ʻe lava ke tau fakamoleki ai ʻa e taimi lahi ange ʻi he lotu mo e fakakaukau fakamātoato fekauʻaki mo e mālohi hotau vahaʻangatae mo Sihová. (Lau ʻa e 2 Kolinitō 13:5.) Naʻe tala ʻe he ʻapositolo ko Paulá ki he kau Kalisitiané: “Hanganaki siviʻi pe ʻoku mou ʻi he tuí.” ʻE lava fēfē ke tau fai iá? ʻE lava ke tau ʻeke hifo: ‘ʻOku ou tui moʻoni ko e kautaha pē eni ʻe taha kuo fili ʻe Sihova ke ne fai hono finangaló? ʻOku ou fai ʻeku lelei tahá ʻi he malangá mo hono akoʻi ʻa e ongoongo leleí? ʻOku fakahaaʻi ʻi heʻeku ngaahi ngāué ʻoku ou tui moʻoni ʻoku tau moʻui ʻi he ngaahi ʻaho fakaʻosí pea ʻoku ofi ʻa e ngataʻanga ʻo e pule ʻa Sētané? ʻOku mālohi ʻa ʻeku falala kia Sihova mo Sīsuú ʻo tatau mo ia ʻi he taimi naʻá ku muʻaki kamata tauhi ai kia Sihová?’ (Māt. 24:14; 2 Tīm. 3:1; Hep. 3:14) Ko e fakakaukau fekauʻaki mo e tali ki he ngaahi fehuʻi ko ení ʻe tokoniʻi ai kitautolu ke tau “hanganaki fakamoʻoniʻi” ʻa e tuʻunga ʻoku tau ʻi aí.

 6. (a) Ko e hā ʻa e founga pē ʻe taha te tau maʻu ai ʻa e moʻui taʻengatá? (e) ʻOku anga-fēfē ʻa e teuteu ʻa ha mātuʻa ki he Fakamanatú ʻi he taʻu taki taha, pea ʻe lava fēfē ke ke fai ha meʻa meimei tatau?

⁶ Ko e founga ʻe taha ʻe lava ke ke teuteu ai ki he Fakamanatú ko e lau mo fakakaukau ki he ngaahi kupu ʻoku fakamatalaʻi ai ʻa e ʻuhinga ʻoku mātuʻaki mahuʻinga ai ʻa e kātoanga ko ení. (Lau ʻa e Sione 3:16; 17:3.) Ko e founga pē ʻe taha ke tau maʻu ai ʻa e moʻui taʻengatá ko e hoko ʻo ʻiloʻi ʻa Sihova pea tui ki hono ʻAló, ʻa Sīsū. Ke teuteu ki he Fakamanatú, ʻe lava ke tau fili ʻa e ngaahi kupu ako ʻa ia te ne tokoniʻi kitautolu ke tau ongoʻi ofi ange ai kiate kinauá. Ko e meʻa eni ʻoku fai ʻe ha tokoua ʻa ia kuó ne hoko ko ha mātuʻa ʻi ha taimi fuoloa. Kuó ne tānaki ʻi he ngaahi taʻu lahi ʻa e ngaahi kupu Taua Leʻo ʻoku lāulea ai ki he Fakamanatú mo e ʻofa kuo fakahaaʻi mai ʻe Sihova mo Sīsū kiate kitautolú. ʻI he ngaahi uike ki muʻa ʻi he Fakamanatú, ʻokú ne toe lau ʻa e ngaahi kupu ko ení pea fakakaukau fakamātoato fekauʻaki mo e ʻuhinga ʻoku mātuʻaki mahuʻinga ai ʻa e kātoanga ko ení. ʻI he taimi ʻe niʻihi ʻokú ne tānaki atu ha kupu ʻe taha pe ua ki he meʻa kuó ne tānakí. ʻOkú ne toe lau foki mo fakakaukau fakamātoato fekauʻaki mo e lau Tohi Tapu ki he Fakamanatú. ʻOku pehē ʻe he mātuʻa ko ení ʻi hono fai ʻa e meʻa kotoa ko ení, ʻokú ne ako ai ʻa e ngaahi meʻa foʻou ʻi he taʻu taki taha. Ko e meʻa mahuʻinga tahá, ʻoku ʻai ia ʻe heʻene akó ke ne ʻofa lahi ange kia Sihova mo Sīsū. ʻI hoʻo ako ʻi he founga ko ení, te ke ʻofa lahi ange ai mo koe foki kia Sihova mo Sīsū. Te ke toe houngaʻia lahi ange ai ʻi he meʻa kuó na faí, pea te ke maʻu ʻaonga lahi ange ai mei he Fakamanatú.

 7. (a) Ko e hā naʻe lotu ʻa Sīsū fekauʻaki mo ia ʻi he pō ʻo e ʻuluaki Kai Efiafi ʻa e ʻEikí? (e) Ko e hā ʻokú ne fakahaaʻi naʻe tali ʻe Sihova ʻa e lotu ʻa Sīsuú?

⁷ ʻI he pō ʻo e ʻuluaki Kai Efiafi ʻa e ʻEikí, naʻe fai ai ʻe Sīsū ha lotu makehe. Naʻá ne lotu fekauʻaki mo e fāʻūtaha mahuʻinga ʻokú ne maʻu mo ʻene Tamaí. Naʻe toe lotu ʻa Sīsū ke fāʻūtaha ʻa ʻene kau ākongá kotoa ʻi he founga tatau. (Lau ʻa e Sione 17:20, 21.) Naʻe tali moʻoni ʻe Sihova ʻa e lotu ko ia ʻa hono ʻAlo ʻofaʻangá. ʻOku fakamoʻoniʻi ʻe he Fakamanatú ʻo laka ange ia ʻi ha toe fakataha kehe ko e Kau Fakamoʻoni ʻa Sihová ʻoku nau fāʻūtaha. ʻI he ʻaho ko iá, ʻoku fakatahataha fakataha ai ʻa e kakai ʻe laui miliona mei he fonua kehekehe mo e lanu kehekehe takatakai ʻi he māmaní ʻo nau fakahāhā ʻoku nau tui naʻe fekauʻi mai ʻe Sihova ʻa hono ʻAló. ʻI he ngaahi feituʻu ʻe niʻihi, ʻoku ngalikehe ʻaupito ke fakatahataha fakalotu ai ha kakai ʻo e matakali kehekehe, pe kapau ʻoku pehē, ʻoku fakakaukau ʻa e niʻihi ia ʻoku ʻikai totonu ʻa e meʻá ni. Ka ʻoku ʻikai ke pehē ʻa e fakakaukau ia ʻa Sihova mo Sīsuú. Kiate kinauá, ʻoku fakaʻofoʻofa ʻa ʻetau fāʻūtaha ʻi he Fakamanatú.

 8. Ko e hā ʻa e pōpoaki naʻe ʻoange ʻe Sihova kia ʻIsikelí?

⁸ ʻI he tuʻunga ko e kakai ʻa Sihová, ʻoku ʻikai ke tau ʻohovale ʻi heʻetau fāʻūtaha pehení. Naʻe tomuʻa tala ʻe Sihova ʻa e fāʻūtaha koe ní ʻi heʻene pōpoaki naʻe ʻoange kia ʻIsikelí. Naʻá ne tala kia ʻIsikeli ke ne toʻo ha vaʻakau ʻe ua, ko e vaʻakau ʻe taha “ki Siuta” pea ko e taha “kia Siosifa,” pea fakatahaʻi kinaua ke na hoko ʻo taha. (Lau ʻa e ʻIsikeli 37:15-17.) Ko e “Fehuʻi mei he Kau Lautohí” naʻe pulusi ʻi he Taua Leʻo ʻo Siulai 2016 naʻe fakamatala ai: “Naʻe tomuʻa tala ʻe Sihova ʻo fakafou ʻi heʻene palōfita ko ʻIsikelí ʻe foki hono kakaí ki he Fonua ʻo e Talaʻofá pea te nau hoko ʻo toe fāʻūtaha ko e puleʻanga pē taha. ʻI he kikite ko iá naʻe toe tomuʻa tala ai fekauʻaki mo e faʻahinga ʻoku nau lotu ki he ʻOtuá lolotonga ʻa e ngaahi ʻaho fakaʻosí te nau fāʻūtaha ko e kakai pē taha.”

 9. ʻI he taʻu taki taha ʻi he Fakamanatú, ʻoku anga-fēfē ʻetau sio ai ki he fāʻūtaha naʻe tomuʻa tala ʻi he kikite ʻa ʻIsikelí?

⁹ Kamata ʻi he taʻu 1919, naʻe toe ʻuluaki fokotuʻutuʻu mo toe fakafāʻūtahaʻi māmālie ai ʻe Sihova ʻa e kau paní. Naʻa nau hangē ko e vaʻakau “ki Siuta.” Naʻe kamata leva ai ke kau mai ki he kau paní ʻa e tokolahi ange ʻo e faʻahinga ʻoku ʻamanaki ke moʻui taʻengata ʻi he māmaní. Ko e faʻahinga ko eni ʻoku nau maʻu ha ʻamanaki fakamāmaní ʻoku nau hangē ko e vaʻakau “kia Siosifa.” Naʻe talaʻofa ʻe Sihova te ne fakatahaʻi ʻa e ongo vaʻakau ko ení pea “ʻai kinaua ko e vaʻakau pē ʻe taha” ʻi hono nimá. (ʻIsi. 37:19) Naʻá ne ʻai ʻa e kau paní mo e “fanga sipi kehe” ke nau hoko ko e “tākanga pē ʻe taha.” (Sione 10:16; Sāk. 8:23) ʻI he ʻahó ni, ko e ongo kulupú fakatouʻosi ʻokú na fāʻūtaha pea tauhi fakataha kia Sihova. Pea ʻokú na maʻu ha Tuʻi pē ʻe taha, ko Sīsū Kalaisi, ʻa ia ʻoku ui ʻi he kikite ʻa ʻIsikelí ko e ‘sevāniti ʻa e ʻOtuá ko Tēvita’. (ʻIsi. 37:24, 25) ʻI he taʻu taki taha ʻi he Fakamanatú, ʻi heʻetau fakatahataha ke fakamanatu ʻa e pekia ʻa Sīsuú, ʻoku tau sio ai ki he fāʻūtaha ʻa e ongo kulupú ni hangē ko ia naʻe tomuʻa tala fakafou ʻia ʻIsikelí. Ka ko e hā ʻe lava ke fai ʻe he tokotaha taki taha ʻo kitautolú ke tauhi maʻu mo pouaki ʻa e fāʻūtaha ʻa e kakai ʻa e ʻOtuá?

10. ʻE lava fēfē ke tau pouaki ʻa e fāʻūtaha ʻi he lotolotonga ʻo e kakai ʻa e ʻOtuá?

¹⁰ Ko e hā ʻa e ʻuluaki founga ʻe lava ke tau pouaki ai ʻa e fāʻūtaha ʻi he lotolotonga ʻo e kakai ʻa e ʻOtuá? ʻAki ʻa e ngāue mālohi ke hoko ʻo anga-fakatōkilalo. ʻI he taimi naʻe ʻi māmani ai ʻa Sīsuú, naʻá ne tala ki heʻene kau ākongá kuo pau ke nau anga-fakatōkilalo. (Māt. 23:12) Ko e kakai ʻi he māmaní ʻoku nau faʻa vakai kiate kinautolu ʻoku nau mahuʻinga ange ʻi he niʻihi kehé. Ka ʻo kapau ʻoku tau anga-fakatōkilalo, te tau fakaʻapaʻapaʻi ʻa e fanga tokoua ʻoku nau takimuʻa ʻi he fakatahaʻangá pea te tau talangofua ki heʻenau tatakí. Ko e toki taimi pē ia ʻe lava ke fāʻūtaha ai ʻa e fakatahaʻangá. Ko e meʻa ʻoku mahuʻinga tahá, kapau te tau anga-fakatōkilalo ai pē, te tau fakahōifuaʻi ʻa e ʻOtuá, he ʻokú ne “talitekeʻi . . . ʻa e kau hīkisiá, ka ʻokú ne foaki ʻa e ʻofa maʻataʻataá ki he kau anga-fakatōkilaló.”​—1 Pita 5:5.

11. ʻE lava fēfē ke tokoniʻi kitautolu ʻe he fakakaukau ki he mā mo e uaine naʻe ngāueʻaki ʻi he Fakamanatú ke tau pouaki ʻa e fāʻūtahá?

¹¹ Ko e hā ʻa e founga hono ua ʻe lava ke tau pouaki ai ʻa e fāʻūtahá? ʻAki ʻa e fakakaukau fakamātoato fekauʻaki mo e ʻuhinga moʻoni ʻo e maá mo e uainé. ʻOku totonu ke tau fai eni ki muʻa ʻi he Fakamanatú pea tautefito ʻi he pō ko iá. (1 Kol. 11:23-25) Ko e mā taʻelēvaní ʻokú ne fakafofongaʻi ʻa e sino haohaoa naʻe foaki ʻe Sīsū ko ha feilaulaú. Ko e uaine kulokulá ʻokú ne fakafofongaʻi ʻa hono totó. Ka ʻoku fiemaʻu ke tau fai ʻa e meʻa lahi ange ʻi hono mahinoʻi pē ʻa e ngaahi moʻoni tefito ko ení. ʻOku fiemaʻu ke tau manatuʻi ko e feilaulau huhuʻi ʻa Sīsuú ʻoku kau ki ai ʻa e fakahāhā lahi taha ʻe ua ʻo e ʻofá. Naʻe foaki mai ʻe Sihova ʻa hono ʻAló koeʻuhi ko kitautolu, pea naʻe foaki loto-lelei ʻe Sīsū ʻa ʻene moʻuí maʻatautolu. ʻI heʻetau fakakaukau atu ki heʻena ʻofá, ʻe ueʻi ai kitautolu ke tau ʻofa ʻiate kinaua. Pea ko e ʻofa ʻoku tau maʻu ʻe kitautolu kotoa kia Sihová te ne ʻai ke mālohi ʻetau fāʻūtahá.

12. ʻI he talanoa fekauʻaki mo ha tuʻi mo ʻene kau tamaioʻeikí, naʻe anga-fēfē hono ʻai ʻe Sīsū ke mahino ʻoku fiemaʻu ʻe Sihova ke tau fakamolemoleʻi ʻa e niʻihi kehé?

¹² Ko e hā ha founga hono tolu ʻe lava ke tau pouaki ai ʻa e fāʻūtahá? ʻAki ʻa e fakamolemoleʻi mātuʻaki loto-lelei ʻa e niʻihi kehé. ʻI heʻetau fai peheé, ʻoku tau fakahaaʻi ai ʻoku tau houngaʻia ʻi he lava ke fakamolemoleʻi ʻe Sihova ʻetau angahalá koeʻuhi ko e feilaulau ʻa Sīsuú. Ke fakahaaʻi ʻa e ʻuhinga ʻoku mahuʻinga ai ke fakamolemolé, naʻe fai ʻe Sīsū ha talanoa fekauʻaki mo ha tuʻi mo ʻene kau tamaioʻeiki. Kātaki ʻo lau ʻa e Mātiu 18:23-34 pea ʻeke hifo: ‘ʻOku ou maʻu ʻa e fakaueʻiloto ke fai ʻa e meʻa naʻe akoʻi mai ʻe Sīsuú? ʻOku ou kātaki mo mahinoʻi ʻa hoku fanga tokouá mo e fanga tuofāfiné? ʻOku ou mateuteu ke fakamolemoleʻi ʻa e faʻahinga ʻoku nau fakalotomamahiʻi aú?’ Ko e moʻoni ʻoku mafatukituki ange ʻa e angahala ʻe niʻihi ʻi he niʻihi. Pea ko e angahala ʻe niʻihi ʻe lava ke faingataʻa ʻaupito ke tau fakamolemoleʻi ʻi hotau tuʻunga ko e faʻahinga taʻehaohaoa ʻo e tangatá. Ka ko e talanoa naʻe fai ʻe Sīsuú ʻoku akoʻi mai ai ʻa e meʻa ʻoku fiemaʻu ʻe Sihova ke tau faí. (Lau ʻa e Mātiu 18:35.) ʻOku ʻai ʻe Sīsū ke mahino ʻe ʻikai ke fakamolemoleʻi kitautolu ʻe Sihova kapau ʻoku ʻikai ke tau fakamolemoleʻi ʻa hotau fanga tokouá ʻi heʻenau fakatomala moʻoní. Ko e meʻa moʻoni ia kuo pau ke tau fakakaukau fakamātoato ki ai. Ke maluʻi mo tauhi maʻu ʻetau fāʻūtaha mahuʻingá, ʻoku fiemaʻu ke tau fakamolemoleʻi ʻa e niʻihi kehé ʻo hangē ko ia naʻe akoʻi mai ʻe Sīsuú.

13. ʻOku anga-fēfē ʻetau pouaki ʻa e fāʻūtahá ʻi he taimi ʻoku tau fakamelino ai mo e niʻihi kehé?

¹³ ʻI heʻetau fakamolemoleʻi ʻa e niʻihi kehé, ʻoku tau tauhi ai ʻa e melino mo hotau fanga tokouá mo e fanga tuofāfiné. Naʻe pehē ʻe he ʻapositolo ko Paulá ʻoku totonu ke tau ngāue mālohi ke hanganaki fāʻūtaha ʻiate kitautolu pea maʻu ʻa e melino. (ʻEf. 4:3) Ko ia ʻi he ofi ki he taimi ʻo e Fakamanatú, pea tautefito ki he pō ko iá, fakakaukau fakamātoato fekauʻaki mo e anga hoʻo fakafeangai ki he niʻihi kehé. ʻEke hifo: ‘ʻOku mahino ki he faʻahinga ʻoku nau ʻiloʻi aú ʻoku ʻikai ke u hanganaki ʻita ʻi he kakai ʻoku nau fakalotomamahiʻi aú? ʻE lava ke sio mai ʻa e kakaí ʻoku ou feinga mālohi ke fakamelino mo pouaki ʻa e fāʻūtahá?’ Ko e ongo fehuʻi mafatukituki eni ke fakakaukau ki ai.

14. ʻE lava fēfē ke tau fakahāhā ʻoku tau “fekātakiʻaki ʻi he ʻofa”?

¹⁴ Ko e hā ha founga hono fā ʻe lava ke tau pouaki ai ʻa e fāʻūtahá? ʻAki ʻa e faʻifaʻitaki kia Sihova ʻi hono fakahāhā ʻa e ʻofá. (1 Sio. 4:8) Heʻikai ʻaupito ke tau pehē, “Kuo pau nai ke u ʻofa ʻi hoku fanga tokouá, ka ʻoku ʻikai fiemaʻu ia ke u saiʻia ʻiate kinautolu.” Kapau ʻoku tau fakakaukau peheni, ʻoku ʻikai ke tau muimui ki he akonaki ʻa Paula ke tau “fekātakiʻaki ʻi he ʻofa.” (ʻEf. 4:2) Fakatokangaʻi naʻe ʻikai ke pehē pē ʻe Paulá ʻoku totonu ke tau “fekātakiʻaki” ka ʻoku totonu ke tau fai ia “ʻi he ʻofa.” ʻOku ʻi ai ha faikehekehe. ʻOku ʻi ai ʻa e kakai kehekehe ʻi heʻetau fakatahaʻangá, pea kuo tohoakiʻi kotoa mai kinautolu ʻe Sihova kiate ia. (Sione 6:44) Ko ia kuo pau pē ʻokú ne ʻiloʻi ʻa e ngaahi ʻuhinga lelei lahi ke ʻofa ai ʻiate kinautolú. Kapau ʻoku tuha ʻa hotau fanga tokouá mo e fanga tuofāfiné mo e ʻofa ʻa e ʻOtuá, ʻe lava fēfē ke tau pehē ʻoku ʻikai ke nau tuha mo ʻetau ʻofá? ʻOku totonu ke tau vēkeveke ke ʻofa ʻiate kinautolu ʻi he founga ʻoku fiemaʻu mai ʻe Sihová.​—1 Sio. 4:20, 21.

15. ʻOku anga-fēfē ʻetau ʻiloʻi ʻe ʻi ai ha Fakamanatu fakaʻosí?

¹⁵ ʻE ʻi ai ʻa e ʻaho te tau maʻu ai ʻa e Fakamanatu fakaʻosí. ʻOku anga-fēfē ʻetau ʻiloʻi iá? Naʻe tala ʻe Paula ki he kau Kalisitiane paní ʻi heʻenau fakamanatu ʻi he taʻu taki taha ʻa e pekia ʻa Sīsuú, ʻoku nau “hanganaki fanongonongo ai ʻa e pekia ʻa e ʻEikí, kae ʻoua ke ne haʻu.” (1 Kol. 11:26) ʻI heʻene kikite fekauʻaki mo e taimi ʻo e ngataʻangá, naʻe toe talanoa ai ʻa Sīsū fekauʻaki mo ʻene “haʻu.” ʻI heʻene lea fekauʻaki mo e fuʻu mamahi lahi kuo vavé ni ke hoko maí, naʻá ne pehē: “ʻE toki hā . . . ʻa e fakaʻilonga ʻo e Foha ʻo e tangatá ʻi langi, pea ko e ngaahi matakali kotoa pē ʻo e māmaní te nau tuki honau fatafatá ʻi he mamahi, pea te nau mamata ki he Foha ʻo e tangatá ʻokú ne haʻu ʻi he ngaahi ʻao ʻo e langí fakataha mo e mālohi mo e lāngilangi lahi. Pea te ne fekauʻi atu ʻene kau ʻāngeló mo ha ifi talupite leʻo-lahi, pea te nau tānaki fakataha mai ʻa ʻene faʻahinga kuo filí mei he ngaahi matangi ʻe faá, mei he ngataʻanga ʻe taha ʻo e ngaahi langí ʻo aʻu ki he ngataʻanga ʻe tahá.” (Māt. 24:29-31) ʻE hanga ʻe Sīsū ʻo “tānaki fakataha mai ʻa ʻene faʻahinga kuo filí” ʻi heʻene ʻave ki hēvani ʻa e kau Kalisitiane pani kotoa ʻoku kei ʻi he māmaní. ʻE hoko ia hili ʻa e kamata ʻa e fuʻu mamahi lahí ka ki muʻa ʻi he tau ʻo ʻĀmaketoné. ʻI he tau ko iá, ko Sīsū, fakataha mo e toko 144,000 kotoa te nau faitau mo e ngaahi tuʻi ʻo e māmaní pea nau ikuna. (Fkh. 17:12-14) Ko e Fakamanatu fakaʻosi te tau maʻu ki muʻa ke “haʻu” ʻa Sīsū ʻo tānaki fakataha mai ʻa e kau paní ko e Fakamanatu fakaʻosí ia.

16. Ko e hā ʻokú ke fakapapauʻi ai ke ʻi he Fakamanatú ʻi he taʻu ní?

¹⁶ Fakapapauʻi ke ke ʻi he Fakamanatú ʻi he ʻaho 31 ʻo Maʻasi, 2018. Pea kole kia Sihova ke ne tokoniʻi koe ke ke fai hoʻo tafaʻakí koeʻuhi ke tau lava ʻo fāʻūtaha ai pē ʻi he tuʻunga ko ʻene kakai. (Lau ʻa e Saame 133:1.) ʻE ʻi ai ʻa e ʻaho, te tau ō fakaʻosi ai ki he Fakamanatú. Kae ʻoua ke toki aʻu ki he ʻaho ko iá, tau fakahāhā ko e fāʻūtaha fakaʻofoʻofa ʻoku tau maʻu ʻi he taʻu taki taha ʻi he Fakamanatú ʻoku mahuʻinga ʻaupito kiate kitautolu.