FEHUʻI MEI HE KAU LAUTOHÍ

ʻI he ngaahi taʻu lahi, kuo fakamatalaʻi ʻi heʻetau ʻū tohí ʻo pehē ko e hingoa Koki ʻo Mēkokí ʻoku ʻuhinga ia kia Sētane hili hono lī hifo ia mei hēvaní. Ko e hā hono ʻuhinga? Koeʻuhí ʻi he tohi ʻa Fakahaá ʻoku fakamatalaʻi ai ʻa Sētane ko e taki ia ʻi he ʻohofi fakaemāmanilahi ʻo e kakai ʻa e ʻOtuá. (Fkh. 12:1-17) Ko ia naʻa tau mahinoʻi ko Kokí ʻoku pau pē ko e toe hingoa ia ʻe taha ʻo Sētane.

Kae kehe, naʻe ʻi ai ʻa e palopalema fekauʻaki mo e fakamatala ko ení. Fakakaukau ki he meʻa ko ení: ʻI he fakamatala fekauʻaki mo hono fakaʻauha ʻo Kokí, naʻe pehē ʻe Sihova te ne ʻoatu ʻa Koki ke “meʻakaiʻaki ʻa e manupuna fekai fulufulu kehekehe, mo e manu ʻo e vao.” (ʻIsi. 39:4) Naʻe toe pehē ʻe Sihova: “Pea ʻe hoko ʻi he ʻaho ko ia, te u ʻatu kia Koki ha potu ʻi Isileli ke tanu ai.” (ʻIsi. 39:11) Ka ʻe lava fēfē ke kai ʻe he fanga manupuná mo e manu ʻo e vaó ʻa Sētane ʻa ia ko ha meʻamoʻui laumālie taʻehāmai? ʻE lava fēfē ke tanu ia ʻi he māmani? ʻOku fakahaaʻi mahino ʻe he Tohi Tapú ʻe lī ʻa Sētane ki he luo taʻehanotakelé ʻi he taʻu ʻe 1,000. ʻE ʻikai ke kai pe tanu ia.—Fkh. 20:1, 2.

ʻOku pehē ʻe he Tohi Tapú ʻi he ngataʻanga ʻo e taʻu ʻe 1,000, ʻe tukuange mai ʻa Sētane mei he luo taʻehanotakelé pea “te ne ʻalu atu ke takihalaʻi ʻa e ngaahi puleʻanga ko ia ʻi he ngaahi tuliki ʻe fā ʻo e māmaní, ʻa Koki mo Mēkoki, ke fakatahatahaʻi fakataha kinautolu ki he tau.” (Fkh. 20:8) Ka ʻo kapau ko Koki ʻa Sētane, ʻoku ʻuhinga ení ʻe pau ke takihalaʻi pē ʻe Sētane ʻa ia tonu. Ko ia ai, ko “Koki” ʻoku ʻikai ʻuhinga ia kia Sētane ʻi he tohi ʻIsikelí pe tohi Fakahaá.

Ko ia, ko hai ʻa Koki ʻo Mēkokí? Ke tali ʻa e fehuʻi ko iá, ʻoku fiemaʻu ke tau fekumi ki he Tohi Tapú ke ʻiloʻi ko hai ʻokú ne ʻohofi ʻa e kakai ʻa e ʻOtuá. ʻOku lave ʻa e Tohi Tapú ki he ʻoho ʻa ‘Koki ʻo Mēkoki,’ ko e ʻoho ʻa e “tuʻi tokelau” mo e ʻoho ʻa e “ngaahi tuʻi ʻo e māmaní.” (ʻIsi. 38:2, 10-13; Tan. 11:40, 44, 45; Fkh. 17:14; 19:19) ʻOku kehekehe ʻa e ongo ʻoho ko ení? Ngalingali ʻoku ʻikai pehē ia. ʻOku hā ngali ʻoku ngāueʻaki ʻe he Tohi Tapú ʻa e ngaahi hingoa kehekehe ke fakamatalaʻiʻaki ʻa e ʻohofi tatau. Ko e hā ʻoku tau lea pehē aí? Koeʻuhí ʻoku tala mai ʻe he Tohi Tapú ko e ngaahi puleʻanga kotoa ʻo e māmaní te nau kau ʻi he ʻoho fakaʻosi ko ení ʻa ia ko e kamata ia ʻo e tau ʻo ʻĀmaketoné.—Fkh. 16:14, 16.

ʻI heʻetau fakahoa ʻa e ngaahi maʻuʻanga fakamatala Fakatohitapu kotoa ko eni fekauʻaki mo hono ʻohofi fakaʻosi ʻa e kakai ʻa e ʻOtuá, ʻoku hā mahino ai ko e hingoa Koki ʻo Mēkokí ʻoku ʻikai ʻuhinga ia kia Sētane. ʻI hono kehé, ʻoku ʻuhinga ʻa Koki ʻo Mēkokí ki he kulupu ʻo e ngaahi puleʻanga. ʻE taki ʻe he “tuʻi tokelau” ʻa e kulupu ko ení? ʻOku ʻikai lava ke tau fakapapauʻi. Ka ʻoku hā ngali ʻoku fehoanaki ʻa e fakamatala ko ení mo e meʻa ʻoku leaʻaki ʻe Sihova fekauʻaki mo Kokí: “Te ke haʻu mei ho feituʻu ʻi he tuliki ʻo e tokelau, ʻa koe mo e ngaahi kakai lahi fakataha, ʻoku nau hekahoosi kotoa pe, ko e fuʻufuʻunga kakai mo e tau lahi.”—ʻIsi. 38:6, 15.

ʻI he tuʻunga meimei tatau, ko e palōfita ko Tanielá ʻa ia naʻá ne moʻui ʻi he taimi tatau mo ʻIsikelí, ʻokú ne pehē fekauʻaki mo e tuʻi tokelaú: “ʻE fakahohaʻa ia ʻeni ongoongo mei hahake, pea mei he tokelau; pea te ne ʻalu atu ʻoku lili lahi ke fakaʻauha mo moifua ʻa e tokolahi. Pea te ne hunuki hono teniti fakaʻeiʻeiki ʻi he vahaʻa ʻo e ongo tahi ʻi he Siueli ko e moʻunga tapu; ka te ne aʻu ki hono ngataʻanga, ʻo ʻikai hano tokoni.” (Tan. 11:44, 45) ʻOku meimei tatau eni mo e meʻa ʻoku leaʻaki ʻi he tohi ʻa ʻIsikelí ʻa ia ʻe fai ʻe Kokí.—ʻIsi. 38:8-12, 16.

Ko e hā ʻe hoko ʻi he hili ʻa e ʻoho fakaʻosí? ʻOku tala mai kiate kitautolu ʻe Taniela: “ʻI he taimi ko ia ʻe tuʻu hake ʻa Maikeli [ʻa Sīsū Kalaisi], ʻa e ʻeiki lahi ʻoku ne tuʻu [ʻi ʻĀmaketone] ke taukapoʻi ʻa e hako ʻo ho kakai [talu mei he 1914]; pea ʻe hoko ha taimi faingataʻa [ko e fuʻu mamahi lahi], ʻa ia kuo teʻeki ke ʻi ai ha meʻa pehe, talu mei he ʻi ai ha puleʻanga ʻo aʻu ki he taimi ko ia: pea ʻi he taimi ko ia ʻe fakahaofi ho kakai; ʻa ia fuape ʻe ʻilo ki ai kuo tohi ʻi he tohi.” (Tan. 12:1) ʻOku tau lau ʻa e fakamatala meimei tatau fekauʻaki mo e meʻa ʻe fai ʻe Sīsuú ʻi he Fakahā 19:11-21.

Ka ko hai ʻa “Koki mo Mēkoki” ʻoku lave ki ai ʻi he Fakahā 20:8? ʻOku ʻuhinga ʻa e hingoa ko ení ki he faʻahinga kotoa ʻoku fakafepaki kia Sihová mo ʻohofi ʻene kakaí lolotonga ʻa e ʻahiʻahi fakaʻosí ʻi he ngataʻanga ʻo e taʻu ʻe 1,000. Te nau maʻu ʻa e fakakaukau tāufehiʻa tatau mo ia ʻoku maʻu ʻe Koki ʻo Mēkokí, ʻa e ngaahi puleʻanga te nau ʻohofi ʻa e kakai ʻa e ʻOtuá ʻi he ngataʻanga ʻo e fuʻu mamahi lahí. Pea hangē ko e ngaahi puleʻanga ko ia ʻe teu ke fakaʻauha ʻi ʻĀmaketoné, ʻe fakaʻauha foki ʻa Koki mo Mēkoki. (Fkh. 19:20, 21; 20:9) Ko ia, ʻoku hā ngali feʻungamālie leva ʻa hono ui ʻa e faʻahinga kotoa te nau angatuʻu ʻi he ngataʻanga ʻo e taʻu ʻe 1,000 ko “Koki mo Mēkoki.”

ʻI he tuʻunga ko e kau ako fakamātoato ʻo e Tohi Tapú, ʻoku tau vēkeveke ke ʻilo pe ko hai te ne hoko ko e “tuʻi tokelau” ʻi he kahaʻu vave maí. Kae tatau ai pē pe ko hai te ne taki ʻa e ngaahi puleʻanga ʻoku nau fakafepaki ki he kakai ʻa e ʻOtuá, ʻoku tau falala-pau ki he meʻa ʻe ua: (1) ʻE ʻulungia pea fakaʻauha ʻa Koki ʻo Mēkokí mo ʻene kau taú. (2) Ko hotau Tuʻí, ʻa Sīsū Kalaisi, te ne fakahaofi ʻa e kakai ʻa e ʻOtuá mo taki atu kinautolu ki ha māmani foʻou melino mo malu moʻoni.—Fkh. 7:14-17.