ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Tanielá

“KO E tohi Tanielá ko e taha ia ʻo e ngaahi tohi fakatoʻoaloto taha ʻi he Tohi Tapú,” ko e fakamatala ia ʻa e Holman Illustrated Bible Dictionary. “ʻOku fonu ʻi hono ngaahi pēsí ʻa e ngaahi moʻoni tuʻuloa.” ʻOku kamata ʻa e fakamatala ʻi he tohi Tanielá ʻi he 618 K.M. ʻi he haʻu ʻa Tuʻi Nepukanesa ʻo Pāpiloné ki Selusalema ʻo ʻākoloʻi ʻa e koló, peá ne ʻave “ha niʻihi ʻo haʻa Isileli” ʻo tuku pōpula ʻi Pāpilone. (Taniela 1:​1-3) ʻOku ʻi he haʻohaʻonga ʻo e faʻahinga ko iá ʻa e talavou ko Tanielá, ngalingali ʻoku ʻi hono taʻu hongofulu tupú pē. ʻI he ʻosi ʻa e tohí ʻoku kei ʻi Pāpilone pē ʻa Taniela. ʻI heʻene mei taʻu 100, ʻoku maʻu ai ʻe Taniela ʻa e talaʻofa ʻa e ʻOtuá: “Te ke malolo, pea te ke tuʻu ʻi ho tofiʻa ʻi he fakaʻosi ʻo e ngaahi ʻaho.”—Taniela 12:13.

Lolotonga ko e konga ʻuluaki ʻo e tohi Tanielá ʻoku ʻomai fakahokohoko ʻaho ia ʻi he vakai ʻa ha tokotaha mei tuʻa, ko e konga fakaʻosí ʻoku hiki ia mei he anga ʻo e vakai ʻa Tanielá. ʻI hono tohi ʻe Tanielá, ʻoku ʻi he tohí ʻa e ngaahi kikite fekauʻaki mo e ʻasi hake pea mo e tō ʻa e ngaahi puleʻanga hau ʻi he māmaní, ko e taimi ʻo e aʻu mai ʻa e Mīsaiá mo e ngaahi meʻa ʻoku hoko ʻi hotau ʻahó.a Ko e palōfita taʻumotuʻá ni ʻokú ne toe sio atu ki heʻene moʻui fuoloá ʻo ne fakamatala ki he ngaahi meʻa naʻe hoko ʻa ia ʻokú ne fakalototoʻaʻi kitautolu ke tau hoko ai ko e kau tangata mo e kau fefine anga-fakaʻotua tauhi anga-tonu. Ko e pōpoaki ʻa Tanielá ko e koto moʻui mo e koto mālohi.—Hepelu 4:12.

KO E HĀ ʻOKU AKOʻI MAI KIA KITAUTOLU ʻE HE FAKAMATALA FAKAHOKOHOKO TAIMÍ?

(Taniela 1:1–​6:​2829)

Ko e taʻú ko e 617 K.M. Ko Taniela mo hono kaungāmeʻa ko e kau talavou ʻe toko tolu ko Setaleki, Mēsake mo ʻApitenikō, ʻoku nau ʻi he lotoʻā fakatuʻi ʻo Pāpiloné. Lolotonga honau akoʻi taʻu tolu ki he moʻui ʻi he lotoʻā fakatuʻí, ʻoku tauhi maʻu ʻe he kau talavoú ʻenau anga-tonu ki he ʻOtuá. ʻI he taʻu nai ʻe valu ki mui ai, ʻoku ʻi ai ha misi fakatupu puputuʻu ʻa Tuʻi Nepukanesa. ʻOku fakahaaʻi ʻe Taniela ʻa e misí peá ne fakaʻuhingaʻi leva. ʻOku ʻiloʻi ai ʻe he tuʻí ko Sihová “ko e ʻOtua ia ʻo e ngaahi ʻotua, pea ko e ʻEiki ʻo e ngaahi tuʻi, pea ko e Tatala ʻo e ngaahi meʻa ʻoku fufū.” (Taniela 2:47) Kae kehe, ʻikai fuoloa mei ai ʻoku hā ngali ngalo ʻia Nepukanesa ʻa e lēsoni ko ení. ʻI he fakafisi ʻa e kaungāmeʻa ʻe toko tolu ʻo Tanielá ke lotu ki ha fuʻu ʻīmisí, ne fekau ʻe he tuʻí ke lī kinautolu ki ha fōnise afi. ʻOku fakahaofi ʻe he ʻOtua moʻoní ʻa e toko tolú, pea ʻoku pau ai kia Nepukanesa ke ne ʻiloʻi “ʻoku ʻikai mo ha ʻotua ʻoku ne lava ke fakahaofi ʻo hange ko eni.”—Taniela 3:29.

ʻOku toe maʻu ʻe Nepukanesa ha misi mohu ʻuhinga ʻe taha. ʻOkú ne mamata ki ha fuʻu ʻakau lahi, ʻa ia ʻoku tā hifo pea fakangata ʻa ʻene tupú. ʻOku fakahaaʻi ʻe Taniela ʻa e ʻuhinga ʻo e misi ko iá. ʻOku fakahoko ʻa e konga ʻo e misí ʻi he hoko ʻa Nepukanesa ʻo fakasesele pea toki fakaakeake ki mui. ʻI he ngaahi hongofuluʻi taʻu lahi ki mui aí, ʻoku fai ai ʻe Tuʻi Pelisasa ha fuʻu kātoanga kai maʻa ʻene kau māʻolungá ʻo ne ngāue taʻefakaʻapaʻapa ʻaki ai ʻa e ngaahi ipu ʻa ia naʻe toʻo mei he temipale ʻo Sihová. ʻI he pō pē ko iá, ʻoku tāmateʻi ai ʻa Pelisasa pea ʻoku maʻu ai ʻe Talaiasi ko e Mītiá ʻa e puleʻangá. (Taniela 5:​30, 31) ʻI he ngaahi ʻaho ʻo Talaiasí, ʻi he taʻu 90 tupu ʻa Tanielá, ʻoku hoko ai ʻa e palōfita taʻumotuʻá ni ko e tāketi ʻo ha teuaki fakapō ʻa e kau ʻōfisa meheká. Ka ʻoku fakahaofi ia ʻe Sihova “mei he pesipesi ʻo e fanga laione.”—Taniela 6:28 (6:​27, PM).

Tali ki he Ngaahi Fehuʻi Fakatohitapú:

1:​11-​15​—Naʻe tupu mei he kai vesitapoló ʻa e fōtunga lelei ange ʻa e kau talavou Siu ʻe toko faá? Naʻe ʻikai. ʻOku ʻikai ha meʻakai ʻe lava ke ne fakahoko ha ngaahi liliu pehē ʻi ha ʻaho pē ʻe hongofulu. Ko e liliu ʻi he fōtunga ʻo e kau talavou Hepeluú ko e tupu ia meia Sihova, ʻa ia naʻá ne tāpuakiʻi kinautolu ʻi heʻenau falala kiate iá.​—Palovepi 10:22.

2:1​—Ko fē taimi naʻe misi ai ʻa Nepukanesa fekauʻaki mo e fuʻu ʻīmisi lahí? ʻOku fakahaaʻi ʻe he fakamatalá naʻe hoko eni “ʻi hono ua ʻo e taʻu ʻo e pule ʻa Nepukanesa.” Naʻá ne hoko ko e tuʻi ʻi he 624 K.M. Ko e taʻu hono ua ʻo ʻene pulé naʻe kamata leva ia ʻi he 623 K.M.​—ko e ngaahi taʻu ia ki muʻa ke ne ikunaʻi ʻa Siutá. ʻI he vahaʻa taimi ko iá, naʻe ʻikai ke ʻi Pāpilone ai ʻa Taniela ke fakaʻuhingaʻi ʻa e misí. Ko “hono ua ʻo e taʻu” ʻoku hā mahino naʻe lau ia mei he 607 K.M., ʻi he taimi naʻe fakaʻauha ai ʻe he tuʻi Pāpiloné ʻa Selusalema pea hoko ai ko ha hau ʻi he māmaní.

2:​32, 39 (PM)​—ʻI he founga fē naʻe māʻulalo ai ʻa e puleʻanga silivá ʻi he ʻulu koulá, pea naʻe anga-fēfē ʻa e māʻulalo ʻa e puleʻanga palasá ʻi he puleʻanga silivá? Ko e ʻEmipaea Mītia-Pēsiá, ʻi hono fakafofongaʻi ʻe he konga siliva ʻo e ʻīmisí, naʻe māʻulalo ia ʻi Pāpilone, ko e ʻulu koulá, ʻi he ʻikai te ne maʻu ʻa e tuʻunga makehe ʻo hono liua ʻo Siutá. Ko e puleʻanga hau naʻe hoko atu aí ko Kalisi, ʻa ia naʻe fakafofongaʻi ʻe he palasá. Naʻe toe māʻulalo ange ʻa Kalisi ʻo hangē pē ko e māʻulalo ʻa e palasá ʻi he silivá. Neongo naʻe kāpui ʻe he ʻEmipaea Kalisí ha fuʻu feituʻu lahi ange, naʻe ʻikai te ne maʻu ʻa e monū ʻo hono fakatauʻatāinaʻi ʻa e kakai ʻa e ʻOtuá mei he nofo pōpulá ʻo hangē ko ia naʻe fai ʻe Mītia-Pēsiá.

4:​8, 9 (PM)​—Naʻe hoko ʻa Taniela ko ha taulaʻeiki fai meʻa mana? ʻIkai. Ko e kupuʻi lea “eiki oe kau fai mea mana” ʻoku ʻuhinga pē ia ki he tuʻunga ʻo Taniela ko e “pule lahi ʻo e kau poto kotoa pe ʻo Papilone.”—Taniela 2:48.

4:​10, 11, 20-​22 (PM)​—Ko e hā naʻe fakafofongaʻi pe fakaʻilongaʻi ʻe he fuʻu ʻakau lahi ʻi he misi ʻa Nepukanesá? Ko e fuʻu ʻakaú naʻá ne muʻaki fakafofongaʻi ʻa Nepukanesa ko e pule ʻo ha puleʻanga hau ʻi he māmaní. Kae kehe, koeʻuhi naʻe aʻu ʻa e pulé “ki he gataaga o mamani,” ko e fuʻu ʻakaú ʻoku pau pē ʻokú ne fakahaaʻi ʻa e meʻa ʻoku māʻolunga lahi ange. ʻOku fakafehokotaki ʻe he Taniela 4:17 (PM) ʻa e misí ki he tuʻunga-pule ʻa e “Maoluga taha” ʻi he faʻahinga ʻo e tangatá. Ko e fuʻu ʻakaú leva, ʻokú ne toe fakaʻilongaʻi ʻa e tuʻunga-hau fakaleveleva ʻo Sihová, tautefito ʻi heʻene fekauʻaki mo e māmaní. Ko ia ai, ko e misí ʻoku ʻi ai hono fakahoko ʻe ua—ʻi he tuʻunga-pule ʻo Nepukanesá pea ʻi he tuʻunga-hau ʻo Sihová.

4:​16, 23, 25, 32, 33​—Ko e hā hono lōloa ʻo e “fituʻi kuonga”? Ko e ngaahi liliu kotoa naʻe hoko ʻi he ʻasi ʻa Tuʻi Nepukanesá naʻe fiemaʻu ai ke hoko ʻa e “fituʻi kuonga” ko ha vahaʻa taimi lōloa ange ia ʻi he ʻaho pē ʻe fitú. ʻI hono tuʻungá, ko e ngaahi kuongá ni naʻe ʻuhingá ko e taʻu ʻe fitu ʻo e ngaahi ʻaho ʻe 360 ʻi he taʻu taki taha, pe ʻaho ʻe 2,520. ʻI hono fakahoko lahi angé, ko e “fituʻi kuonga” ko e taʻu ʻe 2,520. (Isikeli 4:​6, 7) Naʻe kamata ia ʻi hono fakaʻauha ʻo Selusalema ʻi he 607 K.M. pea ngata ʻi hono fakanofo ʻo Sīsū ko e Tuʻi fakahēvani ʻi he 1914 T.S.​—Luke 21:24.

6:​6-​10​—Koeʻuhi ko e lotu kia Sihová ʻoku ʻikai ke fiemaʻu ia ai ha faʻahinga tuʻunga pau ʻo e sinó, ʻikai naʻe mei fakapotopoto ʻi he tafaʻaki ʻa Tanielá ke ne lotu fakapulipuli ʻi he vahaʻa taimi ʻo e ʻaho ʻe 30? Naʻe ʻiloʻi ʻe he kakaí ʻa e moʻoniʻi meʻa ko ia ʻo e lotu tuʻo tolu ʻa Taniela he ʻahó. Ko e ʻuhinga ia naʻe fakakaukauʻi ai ʻe he kau faʻufaʻufonó ha lao ki hono tapui ʻo e lotú. Ko ha liliu pē ʻi he founga-tuʻumaʻu ʻa Taniela fekauʻaki mo e lotú ʻe lava ke hā nai ki he niʻihi kehé ko ha fakangaloku ia pea ʻe lava ke fakahaaʻi ai ha taʻelavameʻa ʻi heʻene fai ʻa e līʻoa maʻataʻatā kia Sihová.

Ngaahi Lēsoni kia Kitautolu:

1:​3-8. Ko e fili fakapapau ʻa Taniela mo hono ngaahi kaungāmeʻá ke mateaki ai pē kia Sihová ʻoku fakamamafaʻi ai ʻa e mahuʻinga ʻo e akoʻi kuo pau naʻa nau maʻu mei heʻenau mātuʻá. ʻI he taimi ʻoku fakamuʻomuʻa ai ʻe he ngaahi mātuʻa manavahē-ʻOtuá ʻa e ngaahi meʻa fakalaumālié ʻi heʻenau moʻuí pea akoʻi ʻenau fānaú ke nau fai ʻa e meʻa tataú, ʻoku mātuʻaki ngalingali ʻe talitekeʻi ai ʻe heʻenau fānaú ha ngaahi fakatauele pe tenge pē ʻe malanga hake nai ʻi he ʻapiakó pe ko ha feituʻu pē.

1:​10-​12. Naʻe mahinoʻi ʻe Taniela ʻa e ʻuhinga naʻe manavahē ai ʻa e “ʻeiki ʻo e kau iunoke” ki he tuʻí pea naʻe ʻikai te ne toe kole kiate ia. Kae kehe, naʻe fakaofiofi ki mui ʻa Taniela “ki he setuata” ʻa ia naʻá ne ʻi ha tuʻunga nai ke ne anga-fakanainai ange. ʻI he fekuki mo e ngaahi tuʻunga faingataʻá, ʻoku totonu ke tau ngāueʻaki ʻa e vavanga, mahino mo e poto tatau.

2:​29, 30. ʻI he hangē ko Tanielá, ʻoku totonu ke tau ʻave ʻa e fakahīkihiki kakato kia Sihova ki ha ʻilo, ngaahi ʻulungāanga mo ha ngaahi malava pē kuo tau maʻu nai tupu mei hono ngāueʻaongaʻaki ʻa ʻene ngaahi tokonaki fakalaumālié.

3:​16-​18. Ngalingali naʻe ʻikai mei tali ʻa e kau Hepelū ʻe toko tolú ʻaki ha tuipau mālohi pehē kapau ne nau fakahaaʻi ki muʻa ange ʻa e mateuteu ke fakangaloku ʻi he fekauʻaki mo ʻenau meʻakaí. ʻOku totonu ke tau feinga mo kitautolu foki ke hoko ʻo “falalaʻanga ʻi he meʻa kotoa pe.”—1 Timote 3:11.

4:​24-​27. Ko hono fanongonongo ʻa e pōpoaki ʻo e Puleʻangá, ʻa ia ʻoku kau ai ʻa e ngaahi fakamaau ʻa e ʻOtuá ki ha kovi ʻe hoko, ʻoku fiemaʻu ai ʻa e faʻahinga tui mo e loto-toʻa tatau naʻe fakahāhā ʻe Taniela ʻi hono fakahaaʻi ʻa e meʻa naʻe pau ke hoko kia Nepukanesá mo e meʻa naʻe totonu ke fai ʻe he tuʻí koeʻuhi ke lava ʻo ‘tolonga ai ʻene tuʻumalié.’

5:​30, 31. Ko e ‘taʻanga ki he Tuʻi Papiloné’ naʻe hoko moʻoni. (Aisea 14:​3, 4, 12-​15) Ko Sētane ko e Tēvoló, ʻa ia ko ʻene hīkisiá ʻoku meimei tatau mo e hīkisia ʻa e haʻa tuʻi Pāpiloné, te ne fetaulaki foki mo ha ngataʻanga fakamā.—Taniela 4:​30; 5:​2-4, 23.

KO E HĀ ʻOKU FAKAEʻA ʻI HE VĪSONE ʻA TANIELÁ?

(Taniela 7:1–​12:13)

ʻI hono maʻu ʻe Taniela ʻa ʻene fuofua vīsone ʻi he misí he 553 K.M., ʻokú ne ʻi hono taʻu 70 tupú ai. ʻOku mamata ai ʻa Taniela ki he ngaahi fuʻu manu fekai ʻe fā ʻoku fakatātaaʻi ai ha hokohoko ʻo e ngaahi puleʻanga hau ʻi he māmaní mei hono ʻahó ki hotau ʻahó ni. ʻI ha vīsone ki ha meʻa ʻoku hoko ʻi hēvani, ʻokú ne sio ai ki ha “Taha hange ha hakoʻi tangata” ʻoku ʻoange kiate ia ha “hau taʻengata.” (Taniela 7:​13, 14) ʻI he taʻu ʻe ua ki mui ai, ʻoku maʻu ai ʻe Taniela ha vīsone ʻoku kau ki ai ʻa Mītia-Pēsia, Kalisi mo ha meʻa ʻoku hoko ko ha “tuʻi mata fetaʻo.”—Taniela 8:23.

Ko e taʻu 539 K.M. eni. Kuo tō ʻa Pāpilone, pea kuo hoko ʻa Talaiasi ko e Mītiá ko e pule ʻi he puleʻanga ʻo e kau Kalitiá. ʻOku lotu ʻa Taniela kia Sihova fekauʻaki mo hono toe fakafoʻou ʻa hono fonua tupuʻangá. Lolotonga ʻene kei lotú, ʻoku fekauʻi mai ʻe Sihova ʻa e ʻāngelo ko Kepalelí ke ne ʻai ke maʻu ʻe Taniela “ae boto moe ilo” ʻo fekauʻaki mo e hoko mai ʻa e Mīsaiá. (Taniela 9:​20-25, PM) ʻOku ngaʻunu mai ʻa e taimí ki he 536/535 K.M. Kuo foki ha toenga ki Selusalema. Ka ʻoku ʻi ai ʻa e fakafepaki ki he ngāue ʻo e langa temipalé. ʻOku hoko eni ko ha tupuʻanga ʻo e loto-hohaʻa kia Taniela. ʻOkú ne lotu tōtōivi fekauʻaki mo ia, pea ʻoku fekauʻi mai ʻe Sihova ha ʻāngelo tuʻunga māʻolunga kia Taniela. Hili hono fakaivia mo fakalotolahiʻi ʻo Tanielá, ʻoku fakamatalaʻi ʻe he ʻāngeló ʻa e kikite ʻa ia ʻoku fakahaaʻi ai ha fāinga ki he mafai aoniú ʻi he vahaʻa ʻo e tuʻi tokelaú mo e tuʻi ʻo e tongá. Ko e fepaki ʻi he vahaʻa ʻo e ongo tuʻí ʻoku lele ia mei he taimi ʻoku vahevahe ai ʻa e puleʻanga ʻo ʻAlekisānita ko e Lahí ki heʻene kau seniale ʻe toko faá ʻo aʻu ki he taimi “ʻe tuʻu hake” ai ʻa Maikeli, ko e ʻEiki Lahí.—Taniela 12:1.

Tali ki he Ngaahi Fehuʻi Fakatohitapú:

8:9​—Ko e hā ʻoku fakatātaaʻi ʻe he “Fonua Siueli”? ʻI he tuʻunga ko ení, ko e “Fonua Siueli” ʻokú ne fakatātaaʻi ʻa e tuʻunga fakaemāmani ʻo e kau Kalisitiane paní lolotonga ʻa e taimi ʻo e puleʻanga hau ʻo ʻAmelika-Pilitāniá.

8:​25​—Ko hai ʻa e “pule ʻo e ngaahi pule”? Ko e foʻi lea faka-Hepelū ko e sar, naʻe liliu ko e “pule,” ʻoku ʻuhinga tefitó ko e “ʻeiki,” pe “taki.” Ko e hingoa fakalakanga “pule ʻo e ngaahi pule” ʻoku ngāueʻaki pē ia kia Sihova ko e ʻOtuá—ʻa e ʻEiki ʻo e kau pule fakaeʻāngelo kotoa pē, ʻo kau ai ʻa “Maikeli, ko e taha ʻi he houʻeiki tuʻumuʻa.”—Taniela 10:13.

9:​21​—Ko e hā ʻoku lave ai ʻa Taniela ki he ʻāngelo ko Kepalelí “ko e tangata”? Koeʻuhí naʻe haʻu ʻa Kepaleli kiate ia ʻi he fōtunga hangē ha tangatá, ʻo hangē ko ʻene hā kia Taniela ʻi ha vīsone ki muʻa.​—Taniela 8:​15-​17.

9:​27​—Ko e hā ʻa e fuakava naʻe ‘navei ki ha tokolahi’ ʻo aʻu ki he ngataʻanga ʻo e uike hono 70 ʻo e ngaahi taʻú, pe 36 T.S.? Ko e fuakava Laó naʻe toʻo ia ʻi he 33 T.S. ʻi he taimi naʻe tutuki ai ʻa Sīsuú. Ka ʻi hono kei ngāueʻaki ʻo e fuakava ʻia ʻĒpalahame ki he kau ʻIsileli fakakakanó ʻo aʻu mai ki he 36 T.S., naʻe fakalōloa ai ʻe Sihova ʻa e vahaʻa taimi ʻo e hōifua makehe ki he kau Siú makatuʻunga ʻi heʻenau hoko ko e hako ʻo ʻĒpalahamé. Ko e fuakava ʻia ʻĒpalahamé ʻoku hokohoko ʻa hono ngāueʻakí ʻi he fekauʻaki mo e “Isileli oe Otua.”​—Kaletia 3:​7-9, 14-​18, 29; 6:​16, PM.

Ngaahi Lēsoni kia Kitautolu:

9:​1-​23; 10:11. Koeʻuhi ko ʻene anga-fakatōkilaló, anga-līʻoa fakaʻotuá, faʻa akó mo e kīvoi ʻi he lotú, ko Tanielá ko ha tokotaha “ʻofeina lahi.” Ko e ngaahi ʻulungāanga tonu ko ení naʻá ne toe tokoniʻi ia ke ne faitōnunga ai pē ki he ʻOtuá ʻo aʻu ki he ngataʻanga ʻo ʻene moʻuí. Tau fakapapauʻi ke muimui ʻi he faʻifaʻitakiʻanga ʻa Tanielá.

9:​17-​19. Naʻa mo e taimi ʻoku tau lotu ai ki he hoko mai ʻa e māmani foʻou ʻa e ʻOtuá, ʻa ia “ʻoku nofoʻanga ai ʻa maʻoniʻoni,” ʻikai ʻoku totonu ko ʻetau tokanga tefitó ki hono fakamāʻoniʻoniʻi ʻo e huafa ʻo Sihová pea ki hono fakatonuhiaʻi ʻa hono tuʻunga-haú kae ʻikai ko e tokanga ki ha ngata ʻa ʻetau ngaahi mamahí mo e faingataʻaʻiá?​—2 Pita 3:​13.

10:​9-​11, 18, 19. ʻI he faʻifaʻitaki ki he ʻāngelo naʻe haʻu kia Tanielá, ʻoku totonu ke tau fefakalototoʻaʻaki mo fefakaivimālohiʻaki ʻaki hono fai ʻo e tokoni mo e ngaahi lea fakafiemālie.

12:3. Lolotonga ʻa e ngaahi ʻaho fakaʻosí, “ko e kau fakapotopoto”—ʻa e kau Kalisitiane paní—kuo nau ‘ulo ko e ngaahi maamaʻanga’ pea kuo nau ʻomai “ʻa e toko lahi ki he maʻoniʻoni,” ʻo kau ai ʻa e “fuʻu kakai lahi” ʻo e “fanga sipi kehe.” (Filipai 2:​15; Fakahā 7:9; Sione 10:16) Ko e kau paní te nau ‘ngingila hange ko e ngaahi fetuʻú’ ʻi he ʻuhinga kakato tahá lolotonga ʻa e Pule Taʻu ʻe Taha Afe ʻa Kalaisí, ʻi heʻenau kau fakataha mo ia ʻi hono ngāueʻaki ʻa e ngaahi ʻaonga kakato ʻo e huhuʻí ki he faʻahinga talangofua ʻo e tangatá ʻi he māmaní. Ko e “fanga sipi kehe” ʻoku totonu ke nau piki mateaki ki he kau paní, ʻo poupou ʻaufuatō kia kinautolu ʻi he tafaʻaki kotoa pē.

Hanga ʻe Sihova ʻo ‘Tabuakiʻi Akinautolu Oku Manavahe Kiate Iá’

Ko e hā ʻoku akoʻi mai ʻe he tohi Tanielá kia kitautolu fekauʻaki mo e ʻOtua ʻoku tau lotu ki aí? Fakakaukau angé ki he ngaahi kikite ʻoku ʻi aí—ʻa e ngaahi kikite ko ia kuo ʻosi fakahokó mo ia ʻoku teʻeki fakahokó. He maeʻeeʻa moʻoni ko ʻenau fakamatalaʻi ʻa Sihova ko e Tokotaha-Fakahoko ʻo ʻene folofolá!​—Aisea 55:11.

Ko e hā ʻoku fakahaaʻi ʻe he talanoa ʻo e tohi Tanielá fekauʻaki mo hotau ʻOtuá? Ko e kau talavou Hepelū ʻe toko fā ko ia ne nau fakafisi ke fakatatau ki he moʻui ʻi he lotoʻā fakatuʻi Pāpiloné naʻa nau maʻu ʻa e ‘ilo, mafai moe boto.’ (Taniela 1:​17, PM) Ko e ʻOtua moʻoní naʻá ne fekauʻi mai ʻene ʻāngelo ʻo ne fakahaofi ʻa Setaleki, Mēsake mo ʻApitenikō mei he fōnise afí. Naʻe fakahaofi ʻa Taniela mei he ʻana ʻo e fanga laioné. Ko Sihová ʻokú ne ‘tokoniʻi mo fakaū akinautolu oku nau falala kiate iá’ peá ne ‘tabuakiʻi akinautolu oku manavahe kiate iá.’—Sāme 115:​9, 13, PM.

[Fakamatala ʻi lalo]

[Fakatātā ʻi he peesi 18]

Ko e hā naʻe hoko ai ʻa Taniela ko ha tokotaha “ʻofeina lahi”?