ʻOku Fakalieliaʻi ʻe ha Tuʻi ʻa e Potu Tapu ʻa Sihová
“Ka ko e kakai ʻoku ʻilo ʻa honau ʻOtua te nau malohi pea fai meʻa.”—TĀNIELA 11:32.
1, 2. Ko e hā ʻa e fepaki fakatupu tokanga kuó ne fakaʻilongaʻi ʻa e hisitōlia ʻo e tangatá ʻo lahi ange ʻi he taʻu ʻe 2,000?
KO E ongo tuʻi ʻoku feʻauʻauhi fakamātoató ʻokú na tau fematematei. ʻOku fuofua mālohi ʻa e toko taha pea hoko leva ki he toko taha ko ē, ʻi he hokohoko mai ʻa e taú ʻi he taʻu ʻe ua afe tupu. ʻI hotau ʻaho ní kuo uesia ʻe he fetakai ko iá ʻa e kakai lahi taha ʻi he māmaní peá ne ʻahiʻahiʻi ʻa e anga-tonu ʻa e kakai ʻa e ʻOtuá. ʻOku fakangata ʻa e fetakaí ni ʻaki ha meʻa naʻe taʻe ʻamanekina ʻe ha taha ʻo e ongo mafai ko iá. Naʻe fakahā ki muʻa pea toki hoko ʻa e hisitōlia fakatupu tokanga ko iá ki he palōfita ʻo e kuonga muʻá ko Tāniela.—Tāniela, vahe 10 ki he 12.
2 ʻOku kaunga ʻa e kikité ki he fetāufehiʻaʻaki kuo hokohoko mai ʻi he vahaʻa ʻo e tuʻi ʻo e tokelaú pea mo e tuʻi ʻo e tongá pea naʻe fai ha lave fakaikiiki ki ai ʻi he tohi ko e “Your Will Be Done on Earth.”a Naʻe fakahā ʻi he tohi ko iá ʻo pehē, ʻi he kamataʻangá ko e tuʻi ʻo e tokelaú, ko Sīlia, ki he tokelau ʻo ʻIsilelí. Hili iá, naʻe hoko atu ai ʻa Loma. ʻI he kamataʻangá, ko ʻIsipite ʻa e tuʻi ʻo e tongá.
Fepaki ʻi he Taimi Fakamuí
3. Fakatatau ki he ʻangeló, ko e fē ʻa e taimi ʻe mahino ai ʻa e kikite ʻo kau ki he tuʻi ʻo e tokelaú pea mo e tuʻi ʻo e tongá, pea ʻe mahino fēfē ʻa e kikité ni?
3 Naʻe pehē ʻe he ʻangelo naʻá ne fakahā ʻa e ngaahi meʻá ni kia Tānielá: “Pea ko koe, Taniela, tapuni ʻa e ngaahi lea, ʻo silaʻi ʻa e tohi, ʻo aʻu ki he taimi fakamui: ʻe lele holo ha tokolahi, pea ʻe fakautuutu ʻa e ʻilo.” (Tāniela 12:4) ʻIo, ko e kikité ʻoku fekauʻaki mo e taimi fakamuí—ko e vahaʻa taimi naʻe kamata ʻi he 1914. ʻI he lolotonga ʻa e vahaʻa taimi ko eni kuo fakaʻilongaʻí, ko e tokolahi te nau “lele holo” ʻi he Tohi Tapú, pea ʻi he tokoni ʻa e laumālie māʻoniʻoní, ʻe fakautuutu ʻa e ʻilo moʻoní pea pehē mo e mahino ʻo kau ki he ngaahi kikite ʻi he Tohi Tapú. (Palōvepi 4:18) ʻI heʻetau fakaʻau ke toe ofi ange ki he ngataʻangá, kuo fakamaʻalaʻala ʻa e ngaahi fakaikiiki ʻo toe lahi ange ʻo kau ki he ngaahi kikite ʻa Tānielá. Ko ia ai, ʻi he taʻu 1994 ko ení, ʻa ia ko e taʻu ʻe 36 eni mei he hili ʻa hono pulusi ʻa e tohi ko e “Your Will Be Done on Earth,” ko e hā ʻa e mahino ʻoku totonu ke tau maʻu ʻo fekauʻaki mo e kikite ʻo kau ki he tuʻi ʻo e tokelaú pea mo e tuʻi ʻo e tongá?
4, 5. (a) ʻE lava ke ʻilo ʻi fē ʻa e taʻu 1914 ʻi he kikite ʻa Tānielá ʻo fekauʻaki mo e tuʻi ʻo e tokelaú pea mo e tuʻi ʻo e tongá? (e) Fakatatau ki he ʻangeló, ko e hā ʻa e meʻa naʻe teu ke hoko ʻi he 1914?
4 Naʻe fakaʻilongaʻi ʻa e kamata ʻo e taimi fakamuí ʻi he 1914 ʻe he ʻuluaki tau ʻa māmaní pea mo e ngaahi faingataʻaʻia kehe ʻi māmani naʻe kikiteʻi ʻe Sīsuú. (Mātiu 24:3, 7, 8) ʻE lava ke tau ʻiloʻi ʻa e taʻu ko iá ʻi he kikite ʻa Tānielá? ʻIo. Ko e kamataʻanga ʻo e taimi fakamuí ko e “taimi kuo tuʻutuʻuni” ʻoku lave ki ai ʻi he Tāniela 11:29. (Sio ki he “Your Will Be Done on Earth,” peesi 269-70.) Ko e taimi ia naʻe ʻosi tuʻutuʻuni ʻe Sihova ʻi he ʻaho ʻo Tānielá, he naʻe hoko ia ʻi he ngataʻanga ʻo e taʻu ʻe 2,520 naʻe fakahā ʻi he ngaahi meʻa mahuʻinga fakakikité ʻi he Tāniela vahe 4.
5 Ko e taʻu ʻe 2,520 ko iá, mei he fakaʻauha ʻo Selūsalemá ʻi he 607 K.M. ʻi he taimi naʻe kei talavou ai ʻa Tānielá ʻo aʻu ki he 1914 T.S., naʻe ui ko e “ngaahi kuonga ʻo e Senitaile.” (Luke 21:24) Ko e hā ʻa e ngaahi meʻa fakapolitikale naʻe teu ke nau fakaʻilongaʻi ʻa e ngataʻanga ʻo e ngaahi kuonga ʻo e Senitailé? Naʻe fakahā ʻe ha ʻangelo ʻa e meʻá ni kia Tāniela. Naʻe pehē ʻe he ʻangeló: “ʻI he taimi kuo tuʻutuʻuni te ne [ko e tuʻi ʻo e tokelaú] foki, ʻo aʻu ki he tonga; ka ko ʻene fai ki mui ʻe ʻikai hange ko e ʻuluaki fai.”—Tāniela 11:29.
Ko e Foʻi ʻa e Tuʻí ʻi ha Tau
6. ʻI he 1914, ko hai ʻa e tuʻi ʻo e tokelaú, pea ko hai ʻa e tuʻi ʻo e tongá?
6 ʻI he aʻu mai ki he 1914 ko Siamane naʻá ne fetongi mai ʻo ne hoko ko e tuʻi ʻo e tokelaú, pea ko hono takí ko Kaisa Wilhelm. (Ko e foʻi lea ko e “Kaisá,” ʻoku toʻo mei he hingoa fakalakanga faka-Loma ko e “Sisa.”) Ko e kamata ʻo e ngaahi fepaki ʻi ʻEulopé ko e toe meʻa ia ʻe taha ʻi he holongā fepaki ʻi he vahaʻa ʻo e tuʻi ʻo e tokelaú pea mo e tuʻi ʻo e tongá. Naʻe toki hoko ʻa Pilitania ko e tuʻi ʻo e tongá, pea naʻe vave ʻene hoko ʻo pule ki ʻIsipité, ʻa ia ko e feituʻu ia naʻe ʻuluaki pule ki ai ʻa e tuʻi ʻo e tongá. ʻI he hoko atu ʻa e taú, naʻe kau fakataha mo Pilitania ʻa hono kolonia ki muʻá, ko e ʻIunaite Setete ʻo ʻAmeliká. Ko e tuʻi ʻo e tongá naʻe hoko ia ko e Mafai Fakamāmani ko Pilitania mo ʻAmelika, ko e ʻemipaea mālohi taha ia ʻi he hisitōliá.
7, 8. (a) ʻI he ʻuluaki tau ʻa māmaní, ʻi he founga fē naʻe ʻikai ke hoko ai ʻa e ngaahi meʻá ʻo “hange ko e ʻuluaki fai”? (e) Ko e hā ʻa e ikuʻanga ʻo e ʻuluaki tau ʻa māmaní, kae fakatatau ki he kikité, ko e hā ʻa e meʻa naʻe fai ʻe he tuʻi ʻo e tokelaú?
7 ʻI he ngaahi fepaki ki muʻa ʻi he vahaʻa ʻo e ongo tuʻí, naʻe toutou ikuna ʻa e ʻEmipaea Lomá ʻi heʻene hoko ko e tuʻi ʻo e tokelaú. Ka ʻi he taimi ko ení, ‘ko ʻene fai ki muí naʻe ʻikai hangē ko ʻene ʻuluaki faí.’ Ko e hā naʻe pehē aí? Koeʻuhi naʻe foʻi ʻa e tuʻi ʻo e tokelaú ʻi he taú. Ko e ʻuhinga ʻe tahá he ko e “ngaahi vaka Kitimi” naʻa nau haʻu ʻo fepaki mo e tuʻi ʻo e tokelaú. (Tāniela 11:30) Ko e hā ʻa e ngaahi vaka ko iá? ʻI he taimi ʻo Tānielá, ko Kitimí ko Saipalo, pea ʻi he konga ki muʻa ʻo e ʻuluaki tau ʻa māmaní, naʻe maʻu ʻe Pilitania ʻa Saipalo ʻo nau pule ki ai. ʻIkai ngata aí, fakatatau ki he The Zondervan Pictorial Encyclopedia of the Bible, ko e hingoa ko Kitimí “ʻoku fakalahi ia ʻo fakakau ki ai ʻa e Hihifó fakalūkufua, kae tautautefito ki he Hihifo kaivai.” ʻOku liliu lea ʻe he International Version ʻa e kupuʻi lea ko e “ngaahi vaka Kitimi” ki he “ngaahi vaka ʻo e ngaahi matafonua ʻo e hihifó.” ʻI he ʻuluaki tau ʻa māmaní, ko e ngaahi vaka Kitimí naʻe ʻuhinga ki he ngaahi vaka ʻo Pilitaniá, ʻa ia ʻoku tuʻu ʻi he matafonua hihifo ʻo ʻEulopé. Ki mui mai, naʻe ʻai ke mālohi ange ʻa e folau tau tahi Pilitaniá ʻaki ʻa e ngaahi vaka mei he konitineniti hihifo ko ʻAmelika Tokelaú.
8 ʻI he hoko ʻa e ʻohofi ko ení, ko e tuʻi ʻo e tokelaú naʻá ne hoko ʻo “mapelu ai” peá ne tukulolo ʻi he 1918. Ka naʻe ʻikai ke ngata ai ia. “Pea te ne foki, pea te ne lili ki he kovinanite tapu, pea te ne fai [“ola lelei ʻi heʻene ngāué,” NW], pea te ne foki, pea te ne tokangaʻi ʻa kinautolu naʻe liʻaki ʻa e kovinanite tapu.” (Tāniela 11:30) Naʻe pehē ʻa hono kikiteʻi ʻe he ʻangeló, pea naʻe hoko ʻo pehē.
Ko e Ola Lelei ʻa e Ngāue ʻa e Tuʻí
9. Ko e hā ʻa e ngaahi meʻa naʻe iku atu ai ki he ʻasi hake ʻa ʻAtolifi Hitilaá, pea ʻi he founga fē naʻá ne “ola lelei ʻi heʻene ngāue”?
9 ʻI he hili ʻa e taú, ʻi he 1918, ko e ngaahi fonua naʻe fakatahataha ʻo nau ikuná, naʻa nau fakakavengaʻi ʻa Siamane ʻaki ha aleapau ki he melino ʻo tautea ia, ʻa ia ʻoku ngalingali naʻe fakataumuʻa ke tuku ʻa e kakai Siamané ʻi he tuʻunga ko e meimei hōngea ʻo aʻu ki ha vahaʻa taimi taʻe pau ʻi he kahaʻú. Ko e ola ʻo e meʻá ni, ʻi he tofanga ʻa Siamane ʻi he ngaahi taʻu ʻi he tuʻunga mātuʻaki faingataʻá, naʻe ʻi he tuʻunga ai ia ke ne tali ʻa e ʻasi hake ʻa ʻAtolifi Hitilaá. Naʻá ne maʻu ʻa e mafai aoniú ʻi he 1933 peá ne kamata leva ha ʻohofi fītaʻa “ki he kovinanite tapu,” ʻa ia naʻe fakatātāʻi ʻe he ngaahi tokoua pani ʻo Sīsū Kalaisí. Naʻá ne ola lelei ʻi heʻene ngāue ki he kau Kalisitiane mateaki ko ení, ʻo ne fakatangaʻi anga-fakamamahi ʻa e tokolahi ʻo kinautolu.
10. Naʻe feinga ʻa Hitilā ke fai ha aleapau mo hai ke ne maʻu ha poupou, pea ko e hā ʻa e ola mei he feingá ni?
10 Naʻe lavameʻa ʻa Hitilā ʻi he fekauʻaki mo e ngaahi meʻa fakaʻikonōmiká mo e fealeaʻaki fakaevahaʻapuleʻangá, ʻo ne ola lelei ʻi heʻene ngāue ʻi he tafaʻaki ko iá foki. ʻI ha ngaahi taʻu siʻi pē, naʻe ʻai ai ʻe Hitilā ʻa Siamane ko e mālohi ia ke ʻoua ʻe taʻe fakatokangaʻi, ʻo ne maʻu ʻa e tokoni ʻi he feinga ko ení meiate “kinautolu naʻe liʻaki ʻa e kovinanite tapu.” Ko hai ʻa e faʻahinga ko ení? ʻOku hā mahino mei he fakamoʻoní, ko e kau taki ia ʻo Puleʻanga-Haʻa-Kalisitiané, ʻa ia naʻa nau pehē ʻoku nau ʻi ha vahaʻangatae ko e kovinanite mo e ʻOtuá ka naʻe fuoloa ʻa hono tuku ʻenau hoko ko e kau ākonga ʻa Sīsū Kalaisí. Naʻe lavameʻa ʻa Hitilā ʻi heʻene kole poupou mei he faʻahinga ko eni “naʻa nau liʻaki ʻa e kovinanite tapu.” Ko e tuʻi tapu ʻi Lomá, naʻá ne fai ha aleapau mo Hitilā, pea ko e Siasi Katolika Lomá, pea pehē foki mo e ngaahi siasi Palōtisani ʻi Siamané, naʻa nau poupouʻi ʻa Hitilā ʻi he lolotonga ʻo ʻene pule fakamanavahē ʻi he taʻu ʻe 12 fakakātoa.
11. Naʻe “fakalieliaʻi ʻa e potu tapu” ʻe he tuʻi ʻo e tokelaú pea mo “ʻave ʻa e lotu tuʻu maʻu” ʻi he founga fē?
11 Naʻe fuʻu lavameʻa lahi ʻa Hitilā ʻi heʻene ʻalu ʻo fai taú, ʻo hangē ko ia naʻe kikiteʻi tonu ʻe he ʻangeló. “Pea ʻe tuʻu maʻana ʻa e ngaahi matatau, pea te nau maumau ʻa e tapu ʻo e [“fakalieliaʻi ʻa e,” NW] potu tapu; ʻio ʻa e malohinga; pea te nau ʻave ʻa e lotu tuʻu maʻu.” (Tāniela 11:31a) ʻI ʻIsileli ʻo e kuonga muʻá, ko e potu tapú ko e konga ia ʻo e temipale ʻi Selūsalemá. Kae kehe, ʻi hono talitekeʻi ʻe he kau Siú ʻa Sīsuú, naʻe talitekeʻi kinautolu pea mo honau temipalé ʻe Sihova. (Mātiu 23:37–24:2) Talu mei he ʻuluaki senitulí, ko hono moʻoní ko e temipale ʻo Sihová ko e temipale fakalaumālie ia, pea ko hono potu toputapú ʻoku ʻi hēvani pea ko e lotoʻā fakalaumālié ʻoku ʻi māmani ʻa ia ʻoku ngāue ai ʻa e ngaahi tokoua pani ʻo Sīsuú, ko e Taulaʻeiki Lahí. Talu mei he ngaahi taʻu 1930 tupú, ko e fuʻu kakai lahí kuo nau lotu fakataha mo e toenga ʻo e kau paní; ko ia ai, ʻoku pehē ʻoku nau lotu ‘ʻi he temipale ʻo e ʻOtua.’ (Fakahā 7:9, 15; 11:1, 2; Hepelū 9:11, 12, 24) Naʻe fakalieliaʻi ʻa e lotoʻā ʻi māmani ʻo e temipalé ʻaki ʻa hono fakatangaʻi taʻe toe fakavaivai ʻa e toenga ʻo e kau paní pea mo honau ngaahi takangá ʻi he ngaahi fonua naʻe pule ai ʻa e tuʻi ʻo e tokelaú. Naʻe fuʻu anga-kakaha fau ʻa e fakatangá ʻo ne toʻo ʻa e lotu tuʻumaʻú, ko e feilaulau fakafetaʻi fakahāhā ki he huafa ʻo Sihová. (Hepelū 13:15) Kae kehe, ʻoku fakahā mai mei he hisitōliá, neongo ʻa e mamahi fakalilifú, ko e kau Kalisitiane pani naʻe anga-tonú fakataha mo e “fanga sipi kehe,” naʻa nau hokohoko atu ʻa e ngāue fakamalangá ʻi ha founga fakapulipuli.—Sione 10:16.
Ko e “Meʻa Fakalielia”
12, 13. Ko e hā ʻa e “meʻa fakalielia,” pea hangē ko ia naʻe tomuʻa ʻilo ʻe he tamaioʻeiki anga-tonu mo potó, naʻe hoko ʻanefē pea ʻi he founga fē ʻa hono toe fokotuʻu iá?
12 Naʻe hoko ha toe meʻa ʻe taha ʻi he ofi ke ngata ʻa e tau hono ua ʻa māmaní. “Pea te nau fokotuʻu ʻa e meʻa fakalielia ʻoku fakalala.” (Tāniela 11:31e) Ko e “meʻa fakalielia” ko ení, ʻa ia naʻe toe lave ki ai ʻa Sīsū, kuo ʻosi fakahā ko e Kautaha ia ʻa e Ngaahi Puleʻangá, ko e manu fekai kula ʻahoʻaho ʻa ia naʻe ʻalu ki he luo taʻe hano takelé ʻo fakatatau ki he tohi Fakahaá. (Mātiu 24:15; Fakahā 17:8; sio ki he tohi ko e Light, Tohi Ua, peesi 94.) Naʻá ne fai ʻa e meʻá ni ʻi he kamata ʻa e Tau II ʻa Māmaní. Kae kehe, ʻi he Fakataha Fakateokalati ko e Māmani Foʻoú ʻa e Kau Fakamoʻoni ʻa Sihová ʻi he 1942, ko Nathan H. Knorr, ko e palesiteni hono tolu ia ʻo e Watch Tower Bible and Tract Society, naʻá ne fakamatalaʻi ai ʻa e kikite ʻi he Fakahā 17 peá ne fai fakatokanga ʻo pehē ʻe toe ʻalu hake ʻa e manu fekaí mei he luo taʻe hano takelé.
13 Naʻe fakamoʻoniʻi ʻe he hisitōliá ʻa e moʻoni ʻo ʻene ngaahi leá. ʻI he vahaʻa ʻo ʻAokosi ki ʻOkatopa 1944, ʻi he fale ko Dumbarton Oaks ʻi Uāsingatoni D.C. ʻi he ʻIunaite Seteté, naʻe kamata ai ke fai ha ngāue ki he konisitutone ʻo e meʻa naʻe teu ke ui ko e Ngaahi Puleʻanga Fakatahatahá. Naʻe tali ʻa e konisitutoné ʻe he ngaahi puleʻanga ʻe 51, kau ai mo e Soviet Union ki muʻa, pea ʻi he hoko ʻa e Ngaahi Puleʻanga Fakatahatahá ʻo ngāue ʻi ʻOkatopa 24, 1945, naʻe hangē naʻe ʻalu hake mei he luo taʻe hano takelé ʻa e Kautaha ʻa e Ngaahi Puleʻangá naʻe maté.
14. Naʻe hoko ʻanefē pea ʻi he founga fē ʻa e liliu ki he faʻahinga ko e tuʻi ʻo e tokelaú?
14 Naʻe hoko ʻa Siamane ko e fili tefito ia ʻo e tuʻi ʻo e tongá he lolotonga ʻa e ongo tau ʻa māmaní. ʻI he hili ʻa e Tau II ʻa Māmaní, ko e konga ʻe taha ʻo Siamane naʻá ne hoko ʻo fakakaumeʻa mo poupouʻi ʻa e tuʻi ʻo e tongá. Ka ko e toe tafaʻaki ʻe taha ʻo Siamane naʻá ne hoko ʻo fakakaumeʻa mo poupouʻi ha toe ʻemipaea mālohi ʻe taha. Ko hono fakatahaʻi ʻa e ngaahi fonua Komiunisí, ʻa ia naʻe toki kau ki ai ha konga ʻo Siamané, naʻa nau tuʻu hake ʻo fakafepaki lahi ki Pilitania mo ʻAmelika, pea ko e feʻauhi ʻi he vahaʻa ʻo e ongo tuʻí naʻe hoko ia ko e fepaki mo e fakafili ʻo kau ki he ngaahi fakakaukau fakapolitikalé.—Sio ki he tohi ko e “Your Will Be Done on Earth,” peesi 264-84.
Ko e Tuʻí mo e Kovinanité
15. Ko hai ʻa “kinautolu ʻoku hia ki he Kovinanite,” pea ko e hā ʻa e vā kuo nau maʻu mo e tuʻi ʻo e tokelaú?
15 ʻOku hoko atu ʻa e ʻangeló ʻo ne pehē: “Pea ko kinautolu ʻoku hia ki he Kovinanite te ne fakatafoki ʻaki ʻene ngaahi fakalai.” (Tāniela 11:32a) Ko hai ʻa e faʻahinga ko eni ʻoku nau hia ki he kovinanité? ʻOku ʻuhinga pē ki he kau taki ʻo Puleʻanga-Haʻa-Kalisitiané, ʻa ia ʻoku nau pehē ko e kau Kalisitiane kinautolú ka ʻoku nau fakalieliaʻi ʻa e hingoa ko e lotu faka-Kalisitiané ʻaki ʻenau ngaahi ngāué. ʻI he lolotonga ʻa e tau hono ua ʻa māmaní, “ko e Puleʻanga Lūsiá naʻá ne fai ha feinga ke maʻu ʻa e tokoni fakamatelie mo e poupou ʻa e ngaahi Siasí ke maluʻi ʻa e fonuá.” (Religion in the Soviet Union, naʻe tohi ʻe Walter Kolarz) ʻI he hili ʻa e taú, naʻe feinga ʻa e kau taki lotú ke fakatolonga ʻa e tuʻunga fakakaumeʻa ko iá neongo ʻa e tokāteline fakapolitikale fakaʻikai ʻotua ʻa e mafai ko e tuʻi ʻo e tokelau ʻi he taimi ko iá.b Ko ia ai, naʻe kau ʻo toe lahi ange ʻa e Puleʻanga-Haʻa-Kalisitiané ki he māmaní—ko e fakatafoki fakalielia ia ʻi he vakai ʻa Sihová.—Sione 17:14; Sēmisi 4:4.
16, 17. Ko hai ʻa e “kakai ʻoku fakapotopoto,” pea ko e hā ʻa e meʻa naʻe hoko kiate kinautolu ʻi he pule mai kiate kinautolu ʻa e tuʻi ʻo e tokelaú?
16 Kae kehe, naʻe fēfē ʻa e kau Kalisitiane moʻoní? “Ka ko e kakai ʻoku ʻilo ʻa honau ʻOtua te nau malohi pea fai meʻa. Pea ko kinautolu ʻi he kakai ʻoku fakapotopoto te nau hinoiʻi ha tokolahi; ka te nau to ʻi he heleta, pe ʻi he uloʻi afi, ʻi he taki popula, pe ʻi he vetea, ʻo laui ʻaho.” (Tāniela 11:32e, 33) Neongo ko e kau Kalisitiane naʻe pule mai kiate kinautolu ʻa e tuʻi ʻo e tokelaú naʻa nau “moʻulaloa . . . ki he kau maʻu mafai māʻolunga angé,” kuo ʻikai te nau kau mo e māmani ko ení. (Loma 13:1, NW; Sione 18:36) ʻI heʻenau tokanga ke totongi kia Sisa ʻa e ngaahi meʻa ʻa Sisá, naʻa nau toe foaki ki he “ʻOtua ʻa e ngāhi meʻa ʻa e ʻOtua.” (Mātiu 22:21) Naʻe ʻahiʻahiʻi ʻa ʻenau mateakí koeʻuhi ko ʻenau fai ʻa e meʻá ni.—2 Tīmote 3:12.
17 Ko e hā ʻa e olá? Naʻa nau fakatou “mālohi” pea mo “to.” Naʻa nau tō ʻi he ʻuhinga naʻe fakatangaʻi kinautolu pea naʻa nau mātuʻaki faingataʻaʻia, ʻo aʻu ʻo tāmateʻi ha niʻihi ʻo kinautolu. Ka naʻa nau mālohi koeʻuhi ʻi he tuʻunga lahi tahá naʻa nau tauhi ʻenau anga-tonú. ʻIo, naʻa nau ikuna ʻa e māmaní, ʻo hangē tofu pē ko ia naʻe ikuna ʻe Sīsū ʻa e māmaní. (Sione 16:33) ʻIkai ngata aí, naʻe ʻikai ʻaupito te nau tuku ʻa e ngāue fakamalangá, neongo naʻa nau ʻi he pilīsoné pe ʻapitanga fakamamahí. ʻI heʻenau fai peheé, naʻa nau “hinoiʻi ha tokolahi.” Neongo ʻa e fakatangá, naʻe tupu ʻo tokolahi ange ʻa e Kau Fakamoʻoni ʻa Sihová ʻi he ngaahi fonua lahi taha naʻe pule ki ai ʻa e tuʻi ʻo e tokelaú. Koeʻuhi ko e anga-tonu ʻa e “kakai ʻoku fakapotopoto,” kuo ʻasi hake ʻi he ngaahi fonua ko iá ha konga ʻoku fakaʻau ke tokolahi ange ʻa ia ko e “fuʻu kakai lahi.”—Fakahā 7:9-14.
18. Ko e hā ʻa e “tokoni siʻi” kuo maʻu ʻe he toenga ʻo e kau paní ʻa ia ʻoku pule mai kiate kinautolu ʻa e tuʻi ʻo e tokelaú?
18 Naʻe kikiteʻi ʻe he ʻangeló ʻi heʻene lea ʻo kau ki hono fakatangaʻi ʻa e kakai ʻa e ʻOtuá: “Pea ʻi heʻenau to, ʻe ai ha tokoni ʻe fai; ka ko e tokoni siʻi.” (Tāniela 11:34a) ʻI he founga fē naʻe hoko ai ʻa e meʻá ni? Ko e meʻa ʻe taha, ko e ikuna ʻa e tuʻi ʻo e tongá ʻi he tau hono ua ʻa māmaní naʻe iku atu ai ki he tokoni kāfakafa ki he kau Kalisitiane naʻe pule mai kiate kinautolu ʻa e tuʻi ʻo e tokelaú. (Fakafehoanaki mo e Fakahā 12:15, 16.) Pea ko e faʻahinga naʻe fakatangaʻi kinautolu ʻe he mafai hono hoko naʻe hoko ko e tuʻi ʻo e tokelaú naʻa nau aʻusia ʻa e fakasiʻisiʻi ʻa e fakatangá mei he taimi ki he taimi. Pea ʻi he fakaʻau ke ʻosi ʻa e feʻauʻauhi mo e fakafili ʻa e ongo mafai lahí, naʻe tokolahi ʻa e kau taki fakapolitikale naʻa nau hoko ʻo ʻilo ʻoku ʻikai ke fakatuʻutāmaki ʻa e kau Kalisitiane anga-tonú pea ko ia ai, naʻe ʻai ai ke nau maʻu ʻa e ngofua fakalao.c Kuo toe maʻu ʻa e tokoni foki mei he faʻahinga ʻoku fakaʻau ke tokolahi angé ʻa ia ko e fuʻu kakai lahi kuo nau tali ʻa e ngāue fakamalanga kuo anga-tonu hono fai ʻe he kau paní pea kuo nau tokoniʻi ʻa e kau paní, ʻo hangē ko ia ʻoku fakamatalaʻi ʻi he Mātiu 25:34-40.
Ko e Fakamaʻa ki he Kakai ʻa e ʻOtuá
19. (a) ʻI he founga fē ko “ha toko lahi [naʻa] nau fakakauange ki he faʻahinga ko é, ka ko e koto fakalai pe”? (e) Ko e hā ʻa e ʻuhinga ʻo e kupuʻi lea “ʻo aʻu atu ki he taimi fakamui”? (Sio ki he fakamatala ʻi lalo.)
19 Naʻe ʻikai ke maʻu ha ngaahi taumuʻa lelei ʻe he faʻahinga kotoa naʻa nau fakahā ʻi he vahaʻa taimi ko ení ʻa ʻenau saiʻia ke lotu ki he ʻOtuá. Naʻe fai fakatokanga ʻa e ʻangeló ʻo ne pehē: “Pea ai ha toko lahi te nau fakakauange ki he faʻahinga ko é, ka ko e koto fakalai pe. Pea ko e niʻihi ʻiate kinautolu ʻoku fakapotopoto te nau to, ke faiʻaki kinautolu ha sivi, mo ha fakamaʻa, mo ha fakahinehina, ʻo aʻu atu ki he taimi fakamui: ʻe fai atu ki he meʻa kuo tuʻutuʻuni.”d (Tāniela 11:34e, 35) Naʻe ʻi ai ha niʻihi naʻa nau fakahā ʻenau saiʻia ʻi he moʻoní ka naʻe ʻikai te nau loto-lelei ke fai ha fakatapui moʻoni ke tauhi ki he ʻOtuá. Naʻe ʻi ai ha niʻihi kehe naʻe hā ngali naʻa nau tali ʻa e ongoongo leleí ka ko hono moʻoní, ko e kau sipai kinautolu maʻá e kau maʻu mafaí. ʻOku pehē ʻe ha fakamatala mei ha fonua ʻe taha: “Ko e niʻihi ʻo e faʻahinga ko ení naʻe ʻikai te nau tokanga ki he totonu pe taʻe totonu ʻo ha meʻa, ko e kau Komiunisi kinautolu ʻa ia naʻa nau moulu atu ki he kautaha ʻa e ʻEikí, ʻo nau fakahāhā lahi ʻa e faivelengá, pea aʻu ʻo fakanofo kinautolu ki he ngaahi tuʻunga ʻo e fatongiá ʻi he kautaha ʻa Sihová.”
20. Ko e hā naʻe fakangofua ai ʻe Sihova ke “to” ʻa e niʻihi ʻo e kau Kalisitiane anga-tonú koeʻuhi ko e faʻahinga mālualoi naʻa nau fehuufi fakapulipuli ki he kautahá?
20 Ko e faʻahinga ko eni naʻe fehuufi fakapulipuli ki he kautahá naʻa nau fakatupunga ke puke ʻe he kau maʻu mafaí ha niʻihi ʻo e faʻahinga anga-tonú. Ko e hā naʻe fakangofua ai ʻe Sihova ke hoko ʻa e ngaahi meʻa peheé? Ke fakahoko ha sivi mo ha fakamaʻa. ʻOku hangē tofu pē ko Sīsū “nae akonekina ia ke talagofua e he gaahi mea naa ne kataki,” naʻe pehē pē ʻa hono ako ʻe he kau anga-tonu ko ení ʻa e kātaki ʻi hono ʻahiʻahiʻi ʻenau tuí. (Hepelū 5:8, PM; Sēmisi 1:2, 3; fakafehoanaki mo Malakai 3:3.) Ko ia ai, ʻoku ‘sivi, fakamaʻa mo fakahinehina’ kinautolu. ʻOku toka mei muʻa ʻa e fiefia lahi maʻá e faʻahinga anga-tonu peheé ʻi he hoko ʻa e taimi kuo tuʻutuʻuni ke fakapaleʻi ai ʻa ʻenau kātakí. Te tau vakai ki he meʻá ni ʻi heʻetau fakamatala lahi ange ʻo kau ki he kikite ʻa Tānielá.
[Fakamatala ʻi lalo]
a Naʻe pulusi ʻe he Watchtower Bible and Tract Society of New York, Inc., pea naʻe ʻai ke ala maʻu ʻi he lea faka-Pilitaniá ʻi he 1958 ʻi he Fakataha Fakavahaʻa-Puleʻanga ʻa e Kau Fakamoʻoni ʻa Sihová ko e “Finangalo ʻo e ʻOtuá.”
b Naʻe ʻasi ʻi he World Press Review ʻo Nōvema 1992 ha kupu mei he The Toronto Star, ʻa ia naʻe pehē: “ʻI he ngaahi taʻu siʻi kuo maliu atú, kuo sio ʻa e kau Lūsiá ki he ngaahi fakakaukau ʻe laui hongofulu naʻe ʻikai ʻaupito ke fehuʻia ki muʻá ʻo kau ki he hisitōlia ʻo honau fonuá, kuo nau ʻauʻauha ʻi he hoko ʻo ʻilo ʻa e ngaahi moʻoniʻi meʻa. Ka ko e tā kuo oʻo lahi tahá ko e ngaahi fakahā ʻo kau ki he fengāueʻaki ʻa e siasí mo e founga pule Komiunisí.”
c Sio ki he Ko e Taua Leʻo (faka-Pilitania), Siulai 15, 1991, peesi 8-11.
d Ko e pehē “ʻo aʻu atu ki he taimi fakamui” ʻe lava ke toe ʻuhinga “ʻi he lolotonga ʻo e taimi fakamui.” Ko e foʻi lea ko eni ʻoku liliu lea ki he “ʻo aʻu,” ʻoku hā ia ʻi he potutohi faka-ʻAlamea ʻi he Tāniela 7:25 pea ʻoku ʻuhinga ai ko e “ʻi he lolotonga” pe “ʻi he.” ʻOku meimei tatau ʻa e ʻuhinga ʻo e foʻi leá ʻi he potutohi faka-Hepelū ʻi he 2 Tuʻi 9:22, Siope 20:5, mo e Fakamaau 3:26. Kae kehe, ʻi he ngaahi liliu Tohi Tapu lahi taha ʻo e Tāniela 11:35, ʻoku hiki ia ko e “ʻo aʻu ki,” pea kapau ko e mahino totonú eni, tā ko e “taimi fakamui” kuo pau ke ʻuhinga ia ko e taimi fakamui ʻo e kātaki ʻa e kakai ʻa e ʻOtuá.—Fakafehoanaki mo e “Your Will Be Done on Earth,” peesi 286.
ʻOkú Ke Manatuʻi?
◻ Ko e hā ʻoku totonu ai ke tau ʻamanekina ʻi he ʻahó ni ke maʻu ha mahino maʻalaʻala ange ʻo kau ki he kikite ʻa Tānielá?
◻ ʻI he founga fē naʻe ‘lili ai ki he kovinanité’ ʻa e tuʻi ʻo e tokelaú ʻo ne ‘ola lelei ʻi heʻene ngāué’?
◻ Naʻe anga-fēfē ʻa hono tomuʻa ʻilo ʻe he kalasi tamaioʻeikí ʻa e toe ʻasi hake ʻa e “meʻa fakalielia”?
◻ ʻI he founga fē naʻe ‘tō, hoko ʻo mālohi, pea maʻu ha tokoni siʻi’ ʻe he toenga ʻo e kau paní?
[Fakatātā ʻi he peesi 14]
ʻI he pule ʻa Hitilaá, naʻe toe ake kakato ʻa e tuʻi ʻo e tokelaú mei hono ikuʻi ia ʻi he 1918 ʻe he tuʻi ʻo e tongá