Ko e Ikuna Fakaʻosi ʻa Maikeli, ko e Pilinisi Lahi

“Pea ʻi he taimi ko ia ʻe tuʻu hake ʻa Maikeli, ʻa e ʻeiki [“pilinisi,” NW] lahi ʻoku ne tuʻu ke taukapoʻi ʻa e hako ʻo ho kakai”​—TĀNIELA 12:1.

 1. Ko e hā ʻa e anga ʻo e fakakaukau kuo fakahā ʻe he kau pule tokolahi ʻo e māmaní ki he tuʻunga-hau ʻo Sihová, pea ko e hā ʻa e meʻa kuo fai ʻe he tuʻi ʻo e tokelaú ʻo tatau pē mo eni?

“KO HAI ʻa Sihova ke u tokanga ai ki heʻene lea, ʻo tuku atu ʻa Isileli?” (ʻEkisoto 5:2) Ko e ngaahi lea luma eni ʻa Felo kia Mōsese. ʻI he fakafisi ʻa Felo ke ne tali ʻa e tuʻunga ʻOtua aoniu ʻo Sihová, naʻá ne loto-ʻalovili ke tuku pē ʻa ʻIsileli ʻi he nofo pōpulá. Kuo fakahā ʻe he kau pule kehé ʻa e paetaku meimei tatau mo eni kia Sihova, pea ko e meʻa pehē pē ʻoku fai ʻe he ongo tuʻi ʻi he kikite ʻa Tānielá. (ʻAisea 36:​13-20) Ko hono moʻoní, kuo fai ʻe he tuʻi ʻo e tokelaú ha meʻa lahi ange. ʻOku pehē ʻe he ʻangeló: “Pea te ne fakapupula mo fakamaʻolunga ʻi he ʻotua kotoa; ʻio, naʻa mo e ʻotua ʻo e ngaahi ʻotua ʻe makehe atu ʻa e meʻa te ne lau ki ai . . . Pea ʻe ʻikai te ne tokangaʻi ʻa e ʻotua o ʻene ngaahi kui, pe ko e ʻofa ʻa fefine; ʻio ʻe ʻikai te ne tokangaʻi ha ʻotua ʻe taha: he te ne fakapupula ke maʻolunga ʻi he meʻa kotoa pe.”​—Tāniela 11:​36, 37.

 2, 3. ʻI he founga fē naʻe talitekeʻi ai ʻe he tuʻi ʻo e tokelaú “ʻa e ʻotua o ʻene ngaahi kui” kae fetongi ʻaki ia ʻa e lotu ki ha toe “ʻotua”?

² ʻI hono fakahoko ʻa e ngaahi lea fakaekikite ko ení, naʻe talitekeʻi ʻe he tuʻi ʻo e tokelaú “ʻa e ʻotua o ʻene ngaahi kui” (pe “ko e ngaahi ʻotua ʻo hono tupuʻangá,” The New English Bible), tatau ai pē pe ko e ngaahi ʻotua fakapangani ʻo Lomá pe ko e Tolu-Tahaʻi-ʻOtua ʻa Puleʻanga-Haʻa-Kalisitiané. Naʻe ngāueʻaki ʻe Hitilā ʻa Puleʻanga-Haʻa-Kalisitiane ki he lelei pē ʻaʻana ka ʻoku hā mei he ngaahi fakamoʻoni ʻoku ala maʻú naʻá ne palani ke fetongi ʻaki ia ha siasi faka-Siamane foʻou. Ko e toko taha naʻá ne fetongi ʻa Hitilā ʻo ne hoko ko e tuʻi ʻo e tokelaú naʻá ne pouaki ʻa e fakaʻikai ʻotua maʻataʻatā. Ko ia ai, kuo ʻai ʻe he tuʻi ʻo e tokelaú ke ʻotuaʻaki ʻe ia ʻa ia pē, ʻo ne ‘fakamāʻolungaʻi ʻe ia ʻa ia pē.’

³ ʻOku hoko atu ʻa e kikité: “Ka te ne fetongiʻaki ʻa e ʻotua ʻo e ngaahi malohinga ʻene fakahikihikiʻi; ʻio, ko e ʻotua naʻe ʻikai ʻilo ki ai ʻe heʻene ngaahi kui te ne fakalangilangiʻi ʻaki ʻa e koula mo e siliva mo e makakoloa mo e ngaahi meʻa mahuʻinga.” (Tāniela 11:38) Ko hono moʻoní, ko e tuʻi ʻo e tokelaú naʻá ne fokotuʻu ʻene falalá ki he ngaahi meʻa fakakautau fakasaienisi ʻi onopooní, “ʻa e ʻotua ʻo e ngaahi malohinga.” ʻI he lolotonga ʻa e taimi fakamuí fakakātoa, kuó ne feinga ki he fakahaofí ʻo fakafou mai ʻi he “ʻotua” ko ení, ʻo ne fakamoleki ʻa e paʻanga lahi fakaʻulia ʻi he ʻolita ʻo e ʻotua ko ení.

 4. Ko e hā ʻa e lavameʻa ʻa e tuʻi ʻo e tokelaú?

⁴ “Pea te ne fai meʻa [“ola lelei,” NW] ki he ngaahi talitauʻanga malohi ʻi he tokoni ʻa ha ʻotua muli; ʻilonga ha taha te ne mamahiʻi ia, te ne fakalahi hono langilangi, pea te ne fakanofo kinautolu ke pule ki ha meʻa lahi, pea te ne tufa ʻa e fonua mono totongi.” (Tāniela 11:39) ʻI he falala ʻa e tuʻi ʻo e tokelaú ki hono “ʻotua muli” fakaekautau, kuó ne “fai meʻa ola lelei,” ʻo ne hoko ko e mālohi fakakautau kāfakafa ia ʻi he “kuonga fakamui.” (2 Tīmote 3:1) Ko e faʻahinga naʻa nau poupouʻi ʻa ʻene faʻahinga fakakaukaú, naʻe fakapaleʻi kinautolu ʻaki ʻa e tokoni fakapolitikale, fakapaʻanga pea mo fakaekautau ʻi he taimi ʻe niʻihi.

“ʻI he Taimi Fakamui”

 5, 6. ʻI he founga fē kuo “teketeke” ai ʻa e tuʻi ʻo e tongá, pea ko e hā ʻa e meʻa kuo fai ʻe he tuʻi ʻo e tokelaú ʻi he meʻá ni?

⁵ ʻOku pehē ʻi he Tāniela 11:40a: “Pea ʻi he taimi fakamui ʻe fekuki [“teketeke,” NW] mo ia ʻa e tuʻi tonga.” Kuo fakakaukau ko e veesi ko ení pea mo e ngaahi veesi hono hokó ʻe fakahoko ia ʻi hotau kahaʻú. Kae kehe, kapau ʻoku ʻuhinga tatau ʻa e kupuʻi lea ko e “taimi fakamui” ʻi he veesí ni ki he kupuʻi lea pehē ʻi he Tāniela 12:​4, 9, ʻoku totonu ke tau kumi ki hono fakahoko ʻo e ngaahi veesí ni ʻi he lolotonga ʻo e ngaahi ʻaho fakaʻosí. Kuo “teketeke” ʻa e tuʻi ʻo e tongá ki he tuʻi ʻo e tokelaú ʻi he lolotonga ʻo e vahaʻa taimi ko ení? ʻIo, ʻoku pau kuo fai pehē. ʻI he hili ʻa e ʻuluaki tau ʻa māmaní, ʻoku pau ko e aleapau melino ʻa ia ko e tauteá ko e “teketeke” ia, ko e fakaʻaiʻai ke fai sauni. ʻI he hili ʻa e ikuna ʻa e tuʻi ʻo e tongá ʻi he tau hono ua ʻa māmaní, naʻe fakahanga ʻe he tuʻi ʻo e tongá ʻa e ngaahi mahafu tau fakaniukilia fakailifia ki he tuʻi ʻo e tokelaú, pea naʻá ne fokotuʻu ha kulupu fakaekautau mālohi, ko e NATO, ke ne tuʻufili ki he tuʻi ʻo e tokelaú. ʻI he faai atu ʻa e ngaahi taʻú, naʻe kau ki he “teketeke” naʻe fai ʻe he tuʻi ʻo e tongá ʻa e founga sipai ʻo ngāueʻaki ʻa e ngaahi meʻa fakaʻilekitolonika fakaonopooni tahá pea pehē foki mo e ngaahi ʻohofi fakaekautau mo e fealeaʻaki fakaevahaʻapuleʻangá.

⁶ Ko e hā ʻa e meʻa naʻe fai ʻe he tuʻi ʻo e tokelaú ʻi he ngaahi meʻá ni? “Pea ʻe ʻohofia ia ʻe he tuʻi tokelau hange ha afā, ʻaki ha tau saliote, mo e tau hoosi, mo e folau lahi; pea te ne hu ki he ngaahi fonua, pea te ne lomakiʻi ʻo ʻasi atu.” (Tāniela 11:40e) Kuo eʻa ʻi he hisitōlia ʻo e ngaahi ʻaho fakaʻosí ʻa hono fakalahiange ʻe he tuʻi ʻo e tokelaú ʻa e feituʻu ʻokú ne pule ki aí. ʻI he lolotonga ʻa e tau hono ua ʻa māmaní, naʻe lōmakiʻi ʻe he “tuʻi” faka-Nasí ʻa hono kauʻā-fonuá ʻo aʻu ki he ngaahi fonua takatakaí. ʻI he ngataʻanga ʻo e tau ko iá, ko e “tuʻi” ko hono fetongí naʻá ne fokotuʻu ha ʻemipaea mālohi ʻi tuʻa mei hono kauʻā-fonua ʻoʻoná pē. ʻI he lolotonga ʻa e feʻauʻauhi mo e fakafili ʻa e ongo mafai lahí, naʻe fai tau ʻa e tuʻi ʻo e tokelaú mo e tuʻi ʻo e tongá ʻaki ʻa e ngaahi tau mo e fakafepaki naʻe fai ʻi he vahaʻa ʻo e ngaahi fonua kehé ʻi ʻAfelika, ʻĒsia, mo ʻAmelika Latina ka naʻe poupouʻi kinautolu ʻe he tuʻi ʻo e tokelaú mo e tuʻi ʻo e tongá. Naʻe fakatangaʻi ʻe he tuʻi ʻo e tokelaú ʻa e kau Kalisitiane moʻoní, ʻo ne fakangatangata (kae ʻikai malava ke taʻofi) ʻenau ngāué. Pea ko ʻene ngaahi ʻoho fakakautaú mo e fakapolitikalé naʻa nau ʻai ke ne hoko ʻo puleʻi ʻa e ngaahi fonua ʻe niʻihi. ʻOku tatau tofu pē eni mo e meʻa naʻe kikiteʻi ʻe he ʻangeló: “Te ne hu foki ki he Fonua Siueli [ko e tofiʻa fakalaumālie ʻo e kakai ʻa e ʻOtuá], pea lahi ʻa e ngaahi fonua ʻe fulihi.”​—Tāniela 11:41a.

 7. Ko e hā ʻa e ngaahi fakangatangata ki he feinga ʻa e tuʻi ʻo e tokelaú ke ne maʻu ha ngaahi fonua lahi angé?

⁷ Ka neongo ia, neongo kuo fakakite ngali fakatuʻutāmaki mai ʻa e tuʻi ʻo e tokelaú ʻi he anga ʻo e vakai ki ai ʻa e tuʻi ʻo e tongá, ka kuo ʻikai te ne aʻusia ʻa hono ikuna ʻa e māmaní fakakātoa. “Kae fakahaofi ʻa ʻeni mei hono nima, ʻa Itomi, mo Moape, mo e ʻelito ʻo haʻa Amoni.” (Tāniela 11:41e) ʻI he kuonga muʻá, ko ʻĪtomi, Mōape mo ʻĀmoni naʻa nau tuʻu ʻi he vahaʻa ʻo ʻIsipite mo Sīliá. ʻE lava ke nau fakatātāʻi ʻa e ngaahi puleʻanga mo e ngaahi kautaha ʻi he ʻahó ni naʻe feinga ki ai ʻa e tuʻi ʻo e tokelaú ka naʻe ʻikai malava ke ne maʻu kinautolu ke tākiekina.

‘ʻE ʻIkai ha Haoʻanga ki ʻIsipite’

 8, 9. ʻI he founga fē kuo aʻu ai ʻa e tākiekina ʻa e tuʻi ʻo e tokelaú ki he niʻihi, pea aʻu ki he tuʻi ʻo e tongá?

⁸ ʻOku hoko atu ʻa e ʻangeló ʻo ne pehē: “Te ne mafao atu hono nima foki ʻi he ngaahi fonua; pea naʻa mo Isipite ʻe ʻikai hano haoʻanga. Pea te ne faʻiteliha ki he ngaahi fokotuʻunga koula mo siliva [“fufū,” NW] mo e meʻa mahuʻinga fuape ʻo Isipite: pea ko e kau Lupi mo e kau Itiopea ʻe muimui kiate ia.” (Tāniela 11:​42, 43) Naʻa mo e tuʻi ʻo e tongá, ko “Isipite,” naʻe ʻikai te ne hao mei he uesia ʻa e ngaahi feinga ʻa e tuʻi ʻo e tokelaú ke ne maʻu ha ngaahi fonua lahi angé. Ko e fakatātā, naʻe tofanga ʻa e tuʻi ʻo e tongá ʻi he foʻi lahi ʻi Vietinemi. Pea naʻe fēfē ʻa e “kau Lupi mo e kau ʻItiopea”? Ko e ngaahi fonua kaungāʻapi ko eni ʻo ʻIsipite ʻo e kuonga muʻá ʻoku nau fakatātāʻi nai ʻi he lea fakasiokalafí ʻa e ngaahi fonua kaungāʻapi ʻo “Isipite” ʻi onopooní pea ʻi he taimi ʻe niʻihi kuo nau hoko ko e kau “muimui” ʻo e tuʻi ʻo e tokelaú.

⁹ Kuo pule ʻa e tuʻi ʻo e tokelaú ki he ‘ngaahi fokotuʻunga koloa fufū ʻo ʻIsipité’? ʻOku pau kuo ʻikai te ne ikuʻi ʻa e tuʻi ʻo e tongá, pea ʻi he aʻu mai ki he 1994 kuo hā ngalingali mei he tuʻunga ʻi he māmaní he ʻikai te ne fai pehē. Ka kuó ne tākiekina mālohi ʻa e anga ʻo hono ngāueʻaki ʻe he tuʻi ʻo e tongá ʻa ʻene ngaahi meʻa fakapaʻangá. Koeʻuhi ko e manavahē ʻa e tuʻi ʻo e tongá ki he tuʻi ʻo e tokelaú, kuó ne fakamoleki ʻa e paʻanga kāfakafa ʻi he taʻu taki taha ke tauhi maʻu ha kau tau, mo ha folau tau tauhi, pea mo e folau laulā-puna lahi fakaʻulia. Ko ia ʻi he fekauʻaki mo e meʻá ni ʻe lava ke pehē kuo ‘faʻiteliha’ pe puleʻi ʻe he tuʻi ʻo e tokelaú ʻa hono tufaki ʻa e koloa ʻa e tuʻi ʻo e tongá.

Feingatau Fakaʻosi ʻa e Tuʻi ʻo e Tokelaú

10. Ko e hā ʻa e fakamatala ʻa e ʻangeló ʻo kau ki he fakangata ʻo e feʻauʻauhí ʻi he vahaʻa ʻo e ongo tuʻí?

¹⁰ ʻE hokohoko atu ʻa e feʻauʻauhi ʻi he vahaʻa ʻo e ongo tuʻí? ʻIkai. Naʻe tala ʻe he ʻangeló kia Tāniela: “Ka ʻe fakahohaʻa ia [ko e tuʻi ʻo e tokelaú] ʻeni ongoongo mei hahake [“ko e hopoʻanga laʻā,” NW], pea mei he tokelau; pea te ne ʻalu atu ʻoku lili lahi ke fakaʻauha mo moifua ʻa e tokolahi. Pea te ne hunuki hono teniti fakaʻeiʻeiki ʻi he vahaʻa ʻo e ongo tahi ʻi he Siueli ko e moʻunga tapu; ka te ne aʻu ki hono ngataʻanga, ʻo ʻikai hano tokoni.”​—Tāniela 11:​44, 45.

11, 12. Ko e hā ʻa e ngaahi meʻa fakapolitikale kuo hoko ki muí ni mai ʻoku fekauʻaki mo e feʻauʻauhi ʻi he vahaʻa ʻo e tuʻi ʻo e tokelaú pea mo e tuʻi ʻo e tongá, pea ko e hā ʻa e meʻa kuo teʻeki ai ke tau ʻilo ki aí?

¹¹ ʻOku kei ʻi he kahaʻú ʻa e ngaahi meʻá ni, ko ia ʻoku ʻikai malava ke tau fakahā fakaikiiki pē ʻe fēfē ʻa hono fakahoko ʻa e kikité. Ki muí ni mai, kuo liliu ʻa e tuʻunga fakapolitikale ʻo kau ki he ongo tuʻí. Kuo fakaʻau ke siʻi ange ʻa e feʻauʻauhi lahi ʻi he vahaʻa ʻo e ʻIunaite Seteté pea mo e ngaahi fonua ʻo ʻEulope Hahaké. ʻIkai ngata aí, ka naʻe veteki ʻi he 1991 ʻa e Soviet Union ki muʻá pea ʻoku ʻikai ke kei ʻi ai ia.​—Sio ki he Ko e Taua Leʻo (faka-Pilitania), ko e tatau ʻo Maʻasi 1, 1992, peesi 4, 5.

¹² Ko ia ko hai ʻa e tuʻi ʻo e tokelaú ʻi he taimí ni? Ko e taha ia ʻo e ngaahi fonua naʻe kau ki he Soviet Union motuʻá? Pe ʻoku liliu ia ki ha fonua mātuʻaki kehe, ʻo hangē ko ia kuo hoko ʻi he ngaahi taimi ki muʻá? ʻOku ʻikai te tau ʻilo pau. Ko hai ʻe hoko ko e tuʻi ʻo e tokelaú ʻi he taimi ʻe fakahoko ai ʻa e Tāniela 11:​44, 45? ʻE toe ʻasi hake ʻa e feʻauʻauhi ʻi he vahaʻa ʻo e ongo tuʻí? Pea ko e hā ʻa e meʻa ʻe hoko ki he ngaahi fokotuʻunga kāfakafa ʻo e meʻatau niukiliá ʻa ia ʻoku kei toe ʻi he ngaahi fonua ʻe niʻihi? Te tau toki ʻilo pē ʻa e tali ki he ngaahi fehuʻí ni ʻi he faai mai ʻa e taimí.

13, 14. Ko e hā ʻa e meʻa ʻoku tau ʻilo ʻo kau ki he kahaʻu ʻo e ongo tuʻí?

¹³ Ko e meʻa ʻe taha ʻoku tau ʻilo ki ai. ʻE vavé ni ʻa hono fai ʻe he tuʻi ʻo e tokelaú ha feingatau ʻohofi ʻe kamata tupu mei he ‘ongoongo mei he hopoʻanga laʻā, pea mei he tokelau’ ʻa ia te ne “fakahohaʻa ia.” Ko e feingatau ko ení ʻe hoko ia ki muʻa pē pea toki hoko hono “ngataʻanga.” ʻE lava ke tau ako lahi ange ʻo kau ki he ongoongo ko ení kapau te tau vakai ki he ngaahi kikite kehe ʻi he Tohi Tapú.

¹⁴ Kae kehe, ʻuluaki fakatokangaʻi ko e ngaahi meʻa ko eni ʻoku fai ʻe he tuʻi ʻo e tokelaú ʻoku ʻikai ke pehē ʻokú ne fai ia ki he tuʻi ʻo e tongá. ʻOku ʻikai te ne aʻu ki hono ngataʻangá ʻi he nima ʻo e tuʻi ʻo e tongá. ʻI he founga meimei tatau pē, ʻoku ʻikai ke fakaʻauha ʻe he tuʻi ʻo e tokelaú ʻa e tuʻi ʻo e tongá. Ko e tuʻi ʻi he tongá (ʻa ia ʻoku fakatātāʻi ʻi he ngaahi kikite kehé ʻaki ʻa e nifo fakamuimui ke ʻasi ʻi he manu fekaí) ʻoku fakaʻauha ia ʻe he Puleʻanga ʻo e ʻOtuá ʻo “taʻe kau ai ha nima [fakaetangata].” (Tāniela 7:26; 8:25) Ko hono moʻoní, ʻe fakaʻauha ʻe he Puleʻanga ʻo e ʻOtuá ʻa e ngaahi tuʻi kotoa ʻo e māmaní ʻi he tau ʻo ʻĀmaketoné, pea ko e meʻa ia ʻe hoko ki he tuʻi ʻo e tokelaú. (Tāniela 2:44; 12:1; Fakahā 16:​14, 16) ʻOku fakamatalaʻi ʻi he Tāniela 11:​44, 45 ʻa e ngaahi meʻa ʻoku iku atu ai ki he tau fakaʻosi ko iá. Tā neʻineʻi ke “ʻikai hano tokoni” ʻi he fakaʻauha ʻa e tuʻi ʻo e tokelaú!

15. Ko e hā ʻa e ongo fehuʻi mahuʻinga ʻe ua ʻoku toe ke fai ha lave ki aí?

¹⁵ Ko ia, ko e hā ʻa e ngaahi kikite kehe ʻoku nau fakahoko mai ʻa e maama ʻo fekauʻaki mo e “ongoongo” ʻa ia ʻokú ne ueʻi ʻa e tuʻi ʻo e tokelaú ke ne feinga “ke fakaʻauha mo moifua ʻa e tokolahi.” Pea ko hai ʻa e “tokolahi” te ne loto ke fakaʻauhá?

Ko e Ongoongo mei he Hopoʻanga Laʻā

16. (a) Ko e hā ʻa e meʻa tuʻu-ki-muʻa kuo pau ke hoko ki muʻa ʻi ʻĀmaketoné? (e) Ko hai ʻa e “ngaahi tuʻi mei he hopoʻanga laʻā”?

¹⁶ Ki muʻa ʻi he tau fakaʻosí, ʻa ia ko ʻĀmaketoné, kuo pau ke fakaʻauha ʻa e fili lahi ʻo e lotu moʻoní​—ko Pāpilone ko e Lahi ʻoku hangē ha fefine feʻauakí, ko e ʻemipaea ʻo e lotu loí ʻi māmani lahi. (Fakahā 18:​3-8) ʻOku fakatātāʻi hono fakaʻauhá ʻe he lilingi ʻo e ipu hono ono ʻo e houhau ʻa e ʻOtuá ki he vaitafe fakaefakatātā ko ʻEufaletesi. ʻOku mātuʻu ʻa e vaitafé “koeʻuhi ke teuteu ʻa e hala ʻo e ngaahi tuʻi mei he hopoʻanga laʻā.” (Fakahā 16:12) Ko hai ʻa e ngaahi tuʻi ko ení? ʻOku ʻikai ko ha taha kehe ka ko Sihova ko e ʻOtuá pea mo Sīsū Kalaisi!a

17. (a) Ko e hā ʻa e meʻa ʻoku fakahā mai kiate kitautolu ʻe he Tohi Tapú ʻo kau ki he fakaʻauha ʻo Pāpilone ko e Lahí? (e) Ko e hā nai ʻe hoko ko e ongoongo “mei he hopoʻanga laʻā”?

¹⁷ ʻOku maeʻeeʻa lelei ʻa hono fakamatalaʻi ʻi he tohi Fakahaá ʻa e fakaʻauha ʻo Pāpilone ko e Lahí: “Pea ko e nifo ʻe hongofulu naʻa ke mamata ki ai [ko e ‘ngaahi tuʻi’ ʻoku pule he lolotonga ʻa e taimi fakamuí], pea mo e manu fekai [ko e manu fekai kula ʻahoʻaho, ʻokú ne fakatātāʻi ʻa e kautaha ko e Ngaahi Puleʻanga Fakatahatahá], te nau fehiʻa ki he fefine feʻauaki, pea te nau ngaohi ia ko e liʻekina mo e telefua; pea te nau keina hono kakano, pea te nau tutu ia ʻaki ʻa e afi.” (Fakahā 17:16) ʻOku moʻoni, ko e ngaahi puleʻangá te nau ‘fakaʻauha ʻa e kakano lahi’! (Tāniela 7:5) Ka, ko e hā ʻa e ʻuhinga ʻe fakaʻauha ai ʻe he kau pulé, kau ai mo e tuʻi ʻo e tokelaú, ʻa Pāpilone ko e Lahí? Koeʻuhi ‘ko e ʻOtuá te ne ʻai ki honau lotó ke fai hono finangalo ko iá.’ (Fakahā 17:17) ʻE ʻuhinga nai ʻa e ongoongo “mei he hopoʻanga laʻā” ki he ngāue ko eni ʻa Sihová, ʻi heʻene ʻai ʻi he founga ʻokú ne fili ki aí, ki he ngaahi loto ʻo e kau taki fakaetangatá ke nau fakaʻauhamālie ʻa e fuʻu feʻauaki fakalotú.​—Tāniela 11:44.

Ko e Ongoongo mei he Tokelaú

18. Ko e hā ʻa e toe meʻa ʻoku fakahangataha ki ai ʻa e tuʻi ʻo e tokelaú, pea ʻoku ʻuhinga eni te ne tuʻu ʻi he feituʻu fē ʻi heʻene aʻu ki hono ngataʻangá?

¹⁸ Ka ʻoku ʻi ai ha toe meʻa ʻe taha ʻoku fakahangataha ki ai ʻe he tuʻi ʻo e tokelaú ʻa ʻene ʻitá. ʻOku pehē ʻe he ʻangeló “te ne hunuki hono teniti fakaʻeiʻeiki ʻi he vahaʻa ʻo e ongo tahi ʻi he Siueli ko e moʻunga tapu.” (Tāniela 11:45) ʻI he taimi ʻo Tānielá, ko e tahí ko e Metiteleniané, pea ko e moʻunga tapú ko Saione, ʻa ia naʻe tuʻu ai ʻa e temipale ʻo e ʻOtuá. Ko ia ai, ʻi he fakahoko ʻo e kikité, ko e tuʻi ʻita ʻo e tokelaú ʻokú ne fai ha feingatau ʻo fakafepaki ki he kakai ʻa e ʻOtuá! ʻI he ʻuhinga fakalaumālie ʻi he ʻaho ní, ko e “ʻi he vahaʻa ʻo e ongo tahi . . . [mo e] moʻunga tapu” ʻoku ʻuhingá ʻokú ne tuʻu ʻi he tofiʻa fakalaumālie ʻo e kau sevāniti pani ʻa e ʻOtuá, ʻa ia kuo nau hū ki tuʻa mei he “tahi” ko e kakai ʻoku nofo mavahe mei he ʻOtuá pea ʻoku nau maʻu ʻa e ʻamanaki ke nau pule ʻi he Moʻunga Saione fakahēvaní fakataha mo Sīsū Kalaisi.​—ʻAisea 57:20; Hepelū 12:22; Fakahā 14:1.

19. ʻOku hangē ko ia ʻoku fakahaaʻi ʻe he kikite ʻa ʻIsikelí, ʻoku lava fēfē ke tau ʻilo pe ko e hā ʻa e ongoongo ʻokú ne fakaʻaiʻai ʻa e ʻohofi ʻe fai ʻe Kokí? (Sio ki he fakamatala ʻi laló.)

¹⁹ Ko ʻIsikeli, ʻa ia naʻe moʻui kuonga taha mo Tāniela, naʻá ne toe kikiteʻi ʻo fekauʻaki mo hono ʻohofi ʻa e kakai ʻa e ʻOtuá “ʻi he fakaʻosi ʻo e taimi ʻe hoko.” Naʻá ne pehē ʻe kamata ʻa e fakafilí ʻe Koki ʻo Mēkoki, ʻa ia ʻokú ne fakatātāʻi ʻa Sētane ko e Tēvoló. (ʻIsikeli 38:16) ʻI he lea fakatātā, ʻoku haʻu ʻa Kokí mei fē? ʻOku folofola ʻa Sihova ʻo fakafou mai ʻia ʻIsikeli, ʻo ne pehē: “Pea te ke haʻu mei ho feituʻu ʻi he tuliki ʻo e tokelau.” (ʻIsikeli 38:​15, fakaʻītali ʻamautolu.) Ko ia ai, ko e ongoongo “mei he tokelau” ko e lea nai ia ʻa Sētane ke ne fakaʻaiʻai ʻa e tuʻi ʻo e tokelaú pea mo e ngaahi tuʻi kehé fakakātoa ke nau ʻohofi ʻa e kakai ʻa Sihová.b​—Fakafehoanaki mo Fakahā 16:​13, 14; 17:14.

20, 21. (a) Ko e hā ʻe fakaʻaiʻai ai ʻe Koki ʻa e ngaahi puleʻangá, kau ai mo e tuʻi ʻo e tokelaú, ke nau ʻohofi ʻa e kakai ʻa e ʻOtuá? (e) Te ne lavameʻa ʻi heʻene ʻohofi ʻe faí?

²⁰ ʻOku fokotuʻutuʻu ʻe Koki ʻa e ʻohofi fematematei ko ení koeʻuhi ko e lakalakaimonū ʻa e “Isileli oe Otua,” ʻa ia ʻoku ʻikai te nau kau ki he māmani ko ení fakataha mo e fuʻu kakai lahi ko e fanga sipi kehé. (Kalētia 6:​16, PM; Sione 10:16; 17:​15, 16; 1 Sione 5:19) ʻOku hila ʻa Koki ki he “kakai kuo tanaki mei he ngaahi puleʻanga, kuo nau maʻu monumanu mo e koloa [fakalaumālie].” (ʻIsikeli 38:12; Fakahā 5:9; 7:9) Ko hono fakahoko ʻo e ngaahi leá ni, ʻoku lakalakaimonū ʻa e kakai ʻa Sihová he ʻahó ni ʻo lahi ange ia ʻi ha toe taimi ki muʻa. ʻOku nau tauʻatāina ke lotu he taimí ni ʻi he ngaahi fonua lahi ʻi ʻEulope, ʻAfelika mo ʻĒsia ʻa ia naʻe tapui ai kinautolu ki muʻa. ʻI he vahaʻa taimi ko e 1987 ki he 1992, ʻoku laka hake ʻi he “ngaahi meʻa manakoa” ʻe taha miliona naʻa nau hū ki tuʻa mei he ngaahi puleʻangá ki he fale ʻo Sihová ko e lotu moʻoní. ʻI he ʻuhinga fakalaumālié, ʻoku nau koloaʻia mo nofo melino.​—Hākeai 2:​7, NW; ʻAisea 2:​2-4; 2 Kolinitō 8:9.

²¹ ʻI he sio ʻa Koki ki he tofiʻa fakalaumālie faka-Kalisitiané ko e “fonua tukuʻuta” ʻoku faingofua ʻa hono ikuʻí, ʻokú ne fai ha feinga mālohi taupotu ke ne fakaʻauha ʻa e meʻa ko ení he ʻokú ne fakafaingataʻaʻiaʻi ʻa ʻene puleʻi kakato ʻa e faʻahinga ʻo e tangatá. (ʻIsikeli 38:11) Ka ʻe ʻikai te ne lavameʻa. ʻI he ʻohofi ʻe he ngaahi tuʻi ʻo e māmaní ʻa e kakai ʻa Sihová, te nau ‘aʻu ai ki honau ngataʻangá.’ ʻO anga-fēfē?

Ko e Tuʻi Hono Tolu

22, 23. Ko hai ʻe tuʻu hake maʻá e kakai ʻa e ʻOtuá ʻi he ʻohofi ʻe fai ʻe Kokí, pea ko e hā ʻa e ikuʻangá?

²² ʻOku pehē ʻe ʻIsikeli ko e ʻohofi ʻe fai ʻe Kokí ko e fakaʻilonga ia ke tuʻu hake ai ʻa Sihova ko e ʻOtuá ʻo tokoniʻi ʻEne kakaí pea fakaʻauha ʻa e ngaahi kongakau ʻa Kokí “ʻi he ngaahi moʻunga ʻo Isileli.” (ʻIsikeli 38:18; 39:4) ʻOku fakamanatu mai kiate kitautolu ʻe he meʻá ni ʻa e meʻa naʻe tala ʻe he ʻangeló kia Tānielá: “Pea ʻi he taimi ko ia ʻe tuʻu hake ʻa Maikeli, ʻa e ʻeiki [“pilinisi,” NW] lahi ʻoku ne tuʻu ke taukapoʻi ʻa e hako ʻo ho kakai; pea ʻe hoko ha taimi faingataʻa, ʻa ia kuo teʻeki ke ʻi ai ha meʻa pehe, talu mei he ʻi ai ha puleʻanga ʻo aʻu ki he taimi ko ia: pea ʻi he taimi ko ia ʻe fakahaofi ho kakai; ʻa ia fuape ʻe ʻilo ki ai kuo tohi ʻi he tohi.”​—Tāniela 12:1.

²³ ʻI he 1914, ko Sīsuú, ko e tangata tau fakahēvani ia ko Maikelí, naʻá ne hoko ai ko e Tuʻi ʻo e Puleʻanga fakahēvani ʻo e ʻOtuá. (Fakahā 11:15; 12:​7-9) Talu mei ai mo ʻene tuʻu ‘ke taukapoʻi ʻa e hako ʻo e kakai ʻo Tānielá.’ Kae kehe, ʻe vavé ni ʻa ʻene “tuʻu hake” ʻi he huafa ʻo Sihová ko e Tuʻi mo e Tangata Tau taʻe ala ikuʻi, ʻo ne fakahoko ʻa e “fai sauni ki he kau taʻeʻilo ʻOtua, pea ki he kau taʻetalangofua ki he Kosipeli ʻo hotau ʻEiki ko Sisu.” (2 Tesalonaika 1:8) Ko e ngaahi puleʻanga kotoa ʻo māmaní, kau ai mo e ngaahi tuʻi ʻo e kikite ʻa Tānielá, te nau “toki lauʻaitu.” (Mātiu 24:30) ʻI heʻenau kei maʻu ʻi honau lotó ʻa e ngaahi fakakaukau anga-fulikivanu ki he ‘kakai ʻo Tānielá,’ ʻe fakaʻauha taʻe ngata kinautolu ʻe ‘Maikeli, ko e pilinisi lahi.’​—Fakahā 19:​11-21.

24. ʻOku totonu ke ueʻi kitautolu ʻe he ako ko eni ki he kikite ʻa Tānielá ke tau fai ʻa e hā?

²⁴ ʻIkai ʻoku tau ʻunaloto ke sio ki he ikuna molumalu ko ia ʻa Maikeli pea mo hono ʻOtuá, ko Sihova? He ko e ikuna ko iá ʻe ʻuhinga ki he kau Kalisitiane moʻoní, ko e “fakahaofi,” ko e hao moʻui atu. (Fakafehoanaki mo Malakai 4:​1-3.) Ko ia ai, ʻi heʻetau vēkeveke ʻo fakatuʻamelie atu ki he kahaʻú, ʻoku tau manatuʻi ʻa e ngaahi lea ʻa e ʻaposetolo ko Paulá: “Ke ke malangaʻaki ʻa e folofola, faʻa fai pe ʻi he faingamalie mo e ʻikai ha faingamalie.” (2 Tīmote 4:2) ʻAi ke tau puke maʻu ki he Folofola ʻo e moʻuí pea kumi tōtōivi ke ʻilo ʻa e fanga sipi ʻa Sihová ʻi he kei hokohoko atu ʻa e faingamālié. Kuo mei ʻosi ʻa e lova ki he moʻuí. Kuo tau mei aʻu ki he palé. ʻOfa ke tau loto-ʻalovili kātoa ke kātaki ʻo aʻu ki he ngataʻangá pea kau ai ʻi he lotolotonga ʻo e faʻahinga ʻe fakahaofí.​—Mātiu 24:13; Hepelū 12:1.

[Fakamatala ʻi lalo

ʻOku Mahino Kiate Koe?

◻ ʻI he founga fē kuo teketeke ai ʻa e tuʻi ʻo e tongá ki he tuʻi ʻo e tokelaú he lolotonga ʻa e taimi ʻo e ngataʻangá?

◻ Ko e hā ʻa e meʻa kuo teʻeki ai ke tau ʻilo ki ai ʻo kau ki he ikuʻanga ʻo e feʻauʻauhi ʻi he vahaʻa ʻo e ongo tuʻí?

◻ Ko e hā ʻa e ongo meʻa ʻe hoko ki muʻa ia ʻi ʻĀmaketoné ʻa ia ʻoku pau ʻe kau ki ai ʻa e tuʻi ʻo e tokelaú?

◻ ʻE maluʻi fēfē ʻe ‘Maikeli, ko e pilinisi lahí,’ ʻa e kakai ʻa e ʻOtuá?

◻ Ko e hā ʻa e meʻa ʻoku totonu ke tau fai ʻi he hili ʻa ʻetau ako ʻo kau ki he kikite ʻa Tānielá?