“ʻOku Ou ʻIlo Te Ne Tuʻu Hake”

 1. Ko e hā naʻe fakapapauʻi ʻe Māʻata ʻe hoko ki hono tuongaʻané? (Sio ki he ʻuluaki fakatātā ʻi he kupú ni.)

NAʻE mamahi ʻa Māʻata, ʻa ia ko ha kaumeʻa ofi pea ko ha ākonga ʻa Sīsū. Ko hono tuongaʻané, ʻa Lāsalosi, kuó ne mate. Naʻe ʻi ai ha meʻa naʻe lava ke ne fakafiemālieʻi ia? ʻIo. Naʻe talaʻofa ange ʻe Sīsū: “ʻE tuʻu hake ho tuongaʻané.” Ko e moʻoni, ko e ngaahi lea ko iá naʻe ʻikai lava ke ne toʻo kotoa ʻa ʻene loto-mamahí. Neongo ia, naʻe falala ʻa Māʻata ki he talaʻofa ʻa Sīsuú, pea naʻá ne pehē: “ʻOku ou ʻilo te ne tuʻu hake ʻi he toetuʻu ʻi he ʻaho fakaʻosí.” (Sione 11:20-24) Naʻá ne fakapapauʻi ʻe ʻi ai ha toetuʻu ʻi he kahaʻú. Ka naʻe fakahoko ʻi he taimi ko iá ʻe Sīsū ha mana. Naʻá ne fokotuʻu hake ʻa Lāsalosi ʻi he ʻaho pē ko iá.

 2. Ko e hā te ke saiʻia ai ke maʻu ʻa e tuipau tatau mo ia naʻe maʻu ʻe Māʻatá?

² ʻOku ʻikai ha ʻuhinga ke tau ʻamanekina ai ʻe fokotuʻu hake he taimí ni ʻe Sīsū pe ko ʻene Tamaí ʻa hotau ngaahi ʻofaʻanga kuo maté. Ka ʻokú ke fakapapauʻi ʻo hangē pē ko Māʻatá ʻe toetuʻu ʻi he kahaʻú ʻa ho ngaahi ʻofaʻangá? Mahalo kuo mole ʻi he maté ʻa ho husepānití pe uaifí, ko hoʻo faʻeé, ko hoʻo tamaí, ko ha kui ʻofeina, pe naʻa mo ha kiʻi tama ʻofeina. ʻOku ʻikai ke ke kei faʻa tatali ke fāʻofua, talanoa, mo kata fakataha mo e tokotaha ʻofeina ko iá. Ko e meʻa fakafiefiá, ʻi he hangē ko Māʻatá, ʻokú ke maʻu ʻa e ngaahi ʻuhinga lelei ke pehē ai, ‘ʻOku ou ʻilo ʻe tuʻu hake ʻa hoku ʻofaʻangá ʻi he toetuʻú.’ Neongo ia, ʻoku lelei ki he Kalisitiane taki taha ke ne fakakaukau fekauʻaki mo e ngaahi ʻuhinga ʻoku tau maʻu ai ʻa e tuipau ko ení.

3, 4. Ko e hā naʻe toki ʻosi fai ʻe Sīsuú, pea naʻe anga-fēfē hono ʻai ʻe he meʻa ko iá ke mālohi ʻa e tuipau ʻa Māʻatá?

³ Naʻe nofo ʻa Māʻata ofi ki Selusalema, ko ia naʻe ʻikai nai te ne sio ʻi hono fokotuʻu hake ʻe Sīsū ʻa e foha ʻo ha uitou ofi ki Neini ʻi Kālelí. Kae kehe, ʻoku ngalingali naʻá ne fanongo fekauʻaki mo ia. Pea ʻoku ngalingali naʻá ne fanongo foki naʻe fokotuʻu hake ʻe Sīsū ʻa e ʻofefine ʻo Siailosí. Ko e tokotaha kotoa pē ʻi he fale ʻo e taʻahiné “naʻa nau ʻilo kuó ne mate.” Neongo ia, naʻe puke ʻe Sīsū ʻa hono nimá peá ne pehē: “Taʻahine, tuʻu hake!” Pea naʻá ne tuʻu hake ʻi he taimi pē ko iá. (Luke 7:11-17; 8:41, 42, 49-55) Ko Māʻata mo hono tokouá, ʻa Mele, naʻá na ʻiloʻi ʻoku lava ke fakamoʻui ʻe Sīsū ʻa e kau puké. Ko ia naʻá na tui kapau naʻe ʻi ai ʻa Sīsū, naʻe ʻikai mei mate ʻa Lāsalosi. Kae kehe, ko eni kuó ne mate, ko e hā naʻe ʻamanekina ʻe Māʻatá? Fakatokangaʻi naʻá ne pehē ʻe toe moʻui ʻa Lāsalosi ʻi he kahaʻú, “ʻi he ʻaho fakaʻosí.” Ko e hā naʻá ne mātuʻaki fakapapauʻi ai iá? Pea ko e hā ʻe lava ai ke ke fakapapauʻi ʻe ʻi ai ha toetuʻu ʻi he kahaʻú ʻa ia ʻe kau nai ai ho ngaahi ʻofaʻangá?

⁴ ʻOku ʻi ai ʻa e ngaahi ʻuhinga lelei ke tui ai ki he toetuʻú. Te tau lāulea ki ha niʻihi. Ko hono moʻoní, te ke maʻu nai ha ngaahi poini ʻi he Folofola ʻa e ʻOtuá ʻoku ʻikai te ke faʻa fakakaukau ki ai ka ʻe lava ke ne ʻai ke mālohi hoʻo tui te ke toe sio ki ho ngaahi ʻofaʻangá.

 5. Ko e hā naʻe fakapapauʻi ai ʻe Māʻata ʻe toetuʻu ʻa Lāsalosí?

⁵ Fakatokangaʻi naʻe ʻikai ke pehē ʻe Māʻata: ‘ʻOku ou ʻamanaki ʻe toetuʻu ʻa hoku tuongaʻané.’ Naʻá ne pehē: “ʻOku ou ʻilo te ne tuʻu hake.” Ko e hā naʻe mātuʻaki tuipau ai ʻa Māʻatá? Koeʻuhi naʻá ne ʻilo fekauʻaki mo e ngaahi toetuʻu naʻe hoko ʻi he kuohilí. ʻOku ngalingali naʻá ne ʻilo fekauʻaki mo ia ʻi ʻapi pea ʻi he sinakoké ʻi heʻene kei siʻí. Te tau sivisiviʻi he taimí ni ʻa e toetuʻu ʻe tolu ʻi he ngaahi toetuʻu ʻoku lave ki ai ʻi he Folofolá.

 6. Ko e hā ʻa e mana naʻe ʻilo moʻoni ʻa Māʻata fekauʻaki mo iá?

⁶ Naʻe hoko ʻa e ʻuluaki toetuʻú lolotonga ʻa e taimi naʻe ʻoange ai ʻe he ʻOtuá ki he palōfita ko ʻIlaisiaá ʻa e mafai ke ne fakahoko ha ngaahi mana. ʻI he tokelau ʻo ʻIsilelí, ʻi ha kolo Finisia ko Salepita, naʻe ʻi ai ha uitou masiva ʻa ia naʻá ne fakahāhā ʻa e anga-talitali kakai ki he palōfitá. Naʻe fakahoko ai ʻe Sihova ha mana. Naʻá ne fakapapauʻi naʻe ʻikai ke ʻosi ʻa ʻene mahoaʻá mo e loló koeʻuhi ke hokohoko atu ʻene moʻuí mo ʻene tamá. (1 Tuʻi 17:8-16) Ki mui ai, naʻe puke ʻa ʻene tamá peá ne mate. Ka naʻe tokoniʻi ia ʻe ʻIlaisiā. Lolotonga ʻene ala ki he tamasiʻí, naʻe lotu ʻa ʻIlaisiā kia Sihova: “ʻOtua, tuku muʻa ke foki mai ʻa e moʻui ʻa e kiʻi tamá ni kiate ia.” Pea naʻe hoko! Naʻe fanongo ʻa e ʻOtuá kia ʻIlaisiā, pea naʻe toe moʻui ʻa e kiʻi tamá. Ko e ʻuluaki toetuʻu ia ʻoku hiki ʻi he Tohi Tapú. (Lau ʻa e 1 Tuʻi 17:17-24.) Ko e moʻoni, naʻe ʻilo ʻa Māʻata fekauʻaki mo e meʻa fakaofo ko ia naʻe hokó.

7, 8. (a) Naʻe anga-fēfē hono fakafiemālieʻi ʻe ʻIlaisa ha faʻē naʻe mamahi? (e) Ko e hā ʻoku fakamoʻoniʻi ʻe he mana ʻa ʻIlaisá fekauʻaki mo Sihová?

⁷ Ko e toetuʻu hono ua ʻoku hiki ʻi he Tohi Tapú naʻe fakahoko ia ʻe he palōfita ko ʻIlaisá. ʻI ha kolo ko Sūnemi, naʻe nofo ai ha fefine ʻIsileli ʻa ia naʻe ʻikai haʻane fānau. Koeʻuhi naʻá ne fakahāhā ʻa e anga-talitali kakai lahi kia ʻIlaisa, naʻe tāpuakiʻi ʻe Sihova ʻa e fefiné ni mo hono husepāniti taʻumotuʻá ʻaki ha foha. Kae kehe, ʻi ha taʻu siʻi ki mui ai, naʻe mate ʻa e tamasiʻí. Sioloto atu ki he ongoʻi mamahi ʻa e faʻē ko ení. Naʻá ne loto-mamahi lahi ʻo ne fononga ai ʻi he kilomita ʻe 30 (maile ʻe 19) ki Moʻunga Kāmeli ʻo kumi ʻa ʻIlaisa. Naʻe fekauʻi atu ʻe ʻIlaisa ʻa hono tauhi ko Kēhesí ke muʻomuʻa ʻiate kinautolu ki Sūnemi ke ne fokotuʻu hake ʻa e tamasiʻí. Ka naʻe ʻikai lava ʻe Kēhesi ke fakamoʻui ia. Pea naʻe aʻu atu ki ʻapi ʻa e faʻē naʻe mamahí mo ʻIlaisa.​—2 Tuʻi 4:8-31.

⁸ Naʻe hū atu ʻa ʻIlaisa ki he fale naʻe ʻi ai ʻa e tamasiʻi kuo maté, pea naʻá ne lotu. Naʻe tali ʻe Sihova ʻa e lotu ʻa ʻIlaisá peá ne fokotuʻu hake fakaemana ʻa e tamasiʻí. ʻI he sio ʻa e faʻeé ʻoku moʻui ʻa ʻene tamá, naʻá ne fiefia lahi! (Lau ʻa e 2 Tuʻi 4:32-37.) Mahalo pē naʻá ne manatuʻi ʻa e fakalea ʻo e lotu ʻa ʻAná. Naʻe ʻikai lava ke maʻu ʻe ʻAna ha tama ka naʻe toki tāpuakiʻi ia ʻe Sihova ʻi hono ʻoange haʻane tama, ʻa ia ko Sāmiuela. Naʻe fakahīkihikiʻi leva ai ʻe ʻAna ʻa Sihova koeʻuhí “ʻokú ne ʻohifo ki he Faʻitoká, pea ʻokú ne fokotuʻu hake.” (1 Sām. 2:6) ʻI hono fokotuʻu hake ʻa e tamasiʻi ʻi Sūnemí, naʻe fakamoʻoniʻi ai ʻe he ʻOtuá ʻokú ne maʻu ʻa e malava ke fokotuʻu hake ʻa e maté.

 9. Fakamatalaʻi ʻa e toetuʻu hono tolu ʻoku hiki ʻi he Tohi Tapú.

⁹ Ko ha toe meʻa fakaofo ʻe taha naʻe hoko ia ʻi he hili ʻa e mate ʻa ʻIlaisá. Naʻá ne ngāue ko ha palōfita ʻo laka hake ʻi he taʻu ʻe 50, pea naʻá ne “puke ʻi ha mahaki ʻa ia naʻe faai atu pē ʻo ne mate” ai. Naʻe mahili atu mei ai ha taimi, pea naʻe toe pē ʻa e ngaahi hui ʻo ʻIlaisá. ʻI he ʻaho ʻe taha, naʻe tanu ai ʻe ha kau ʻIsileli ha tangata. Fakafokifā pē, naʻa nau sio atu ʻoku haʻu ʻa e filí. Naʻe feinga ʻa e kau ʻIsilelí ke nau hola ʻi he vave taha ʻo ʻenau malavá, ko ia naʻa nau lī ai ʻa e tangata maté ki he faʻitoka pe fonualoto ʻo ʻIlaisá. ʻOku pehē ʻe he Tohi Tapú: “ʻI he lave ʻa e tangatá ki he ngaahi hui ʻo ʻIlaisá, naʻá ne toe moʻui peá ne tuʻu hake.” (2 Tuʻi 13:14, 20, 21) Ko e ngaahi talanoa ko ení naʻe fakamoʻoniʻi ai kia Māʻata ʻoku maʻu ʻe he ʻOtuá ʻa e mafai ki he maté. ʻOku totonu ke ne fakatuipauʻi foki mo koe ko e mafai ʻo e ʻOtuá ʻoku lahi fau, ʻo taʻefakangatangata.

10. Naʻe anga-fēfē hono tokoniʻi ʻe Pita ha tuofefine Kalisitiane ʻa ia naʻe mate?

¹⁰ ʻOku ʻi he Ngaahi Konga Tohi Tapu Faka-Kalisi Kalisitiané foki ʻa e ngaahi talanoa ki he fokotuʻu ʻo e maté naʻe fakahoko ʻe he kau sevāniti faitōnunga ʻa e ʻOtuá. Kuo tau ʻosi lave ki he fokotuʻu ʻo e maté naʻe fakahoko ʻe Sīsū ofi ki he kolo ko Neiní pea ʻi he ʻapi ʻo Siailosí. ʻI ha taimi ki mui ai, naʻe fokotuʻu hake ai ʻe he ʻapositolo ko Pitá ʻa Toakase, naʻe toe ui ko Tāpaitá. Naʻe haʻu ʻa Pita ki he loki naʻe ʻi ai hono sinó, ʻo ne lotu, peá ne pehē leva: “Tāpaita, tuʻu hake!” Naʻá ne moʻui ʻi he taimi pē ko iá, pea naʻe fakahā ʻe Pita ki he kau Kalisitiane kehe naʻa nau ʻi aí “kuo moʻui ʻa Tāpaita.” Ko e meʻa ko eni naʻe hokó naʻe mātuʻaki fakatupu tuipau pea “naʻe hoko ʻa e tokolahi ko e kau tui ki he ʻEikí” ʻi he kolo ko iá. Ko e kau ākonga foʻou ko ení naʻe lava ke nau tala ki he niʻihi kehé ʻa e ongoongo lelei fekauʻaki mo Sīsuú pea toe talanoa foki ki he tokotaha kotoa fekauʻaki mo e malava ʻa Sihova ke ne fokotuʻu hake ʻa e maté.​—Ngā. 9:36-42.

11. Ko e hā naʻe fakahaaʻi ʻe he toketā ko Luké fekauʻaki mo ha talavou, pea naʻe maongo fēfē ki he niʻihi kehé ʻa e meʻa ko ia naʻe hokó?

¹¹ Naʻe ʻi ai ha kau fakamoʻoni sio tonu ʻi ha toe toetuʻu kehe. ʻI he taimi ʻe taha, naʻe ʻi ha fakataha ai ʻa e ʻapositolo ko Paulá ʻi ha loki ʻi ʻolunga ʻi Taloasi, ʻa ia ko e tokelau-hihifo ia ʻo Toaké ʻi he taimí ni. Naʻe malanga ai ʻa Paula ʻo aʻu ki he tuʻapoó. Naʻe fanongo ki ai ha talavou ko ʻŪtiko, naʻá ne tangutu ʻi ha matapā-teke. Ka naʻá ne mohe peá ne tō ai ki lalo mei he fungavaka uá. Mahalo pē ko Luke ʻa e ʻuluaki tokotaha naʻe aʻu kia ʻŪtikó. ʻI hono tuʻunga ko ha toketaá, naʻá ne ʻiloʻi naʻe ʻikai ke lavea pe pongia pē ʻa e talavoú. Naʻá ne mate! Naʻe ʻalu hifo foki mo Paula. Naʻá ne fāʻofua ʻia ʻŪtiko peá ne fakaʻohovaleʻi ʻa e tokotaha kotoa, ʻi heʻene pehē: “ʻOkú ne moʻui.” Naʻe maongo lahi ʻa e mana ko ení ki he faʻahinga kotoa naʻa nau sio ʻi he meʻa naʻe hokó. ʻI hono ʻiloʻi naʻe mate ʻa e talavoú pea toki fokotuʻu haké, naʻe “taʻehanotatau ʻa ʻenau fiefiá.”​—Ngā. 20:7-12.

12, 13. Makatuʻunga ʻi he ngaahi toetuʻu kuo tau lāulea ki aí, ko e hā ʻa e ngaahi fehuʻi ʻe lava ke tau ʻeké?

¹² Ko e ngaahi toetuʻu naʻa tau lāulea ki aí ʻoku totonu ke ne ʻai koe ke ke maʻu ʻa e tuipau tatau mo ia naʻe maʻu ʻe Māʻatá. ʻOku lava ke tau tuipau ko hotau ʻOtuá, ʻa e tokotaha kuó ne foaki mai kiate kitautolu ʻa e moʻuí, ʻe lava ke ne fokotuʻu hake ha tokotaha kuo mate. ʻOku fakatupu tokangá he naʻe ʻi ai ha sevāniti faitōnunga ʻa e ʻOtuá, hangē ko ʻIlaisiā, Sīsū, pe ko Pita ʻi he toetuʻu taki taha ko iá. Pea naʻe hoko ia lolotonga ʻa e taimi naʻe fakahoko ai ʻe Sihova ʻa e ngaahi maná. Ko ia ai, fēfē ʻa e faʻahinga kuo nau mate ʻi he ngaahi taimi kehé, ʻa ia naʻe ʻikai ke fakahoko ai ʻa e ngaahi mana peheé? ʻE lava ke ʻamanekina ʻe he kau tangata mo e kau fefine faitōnungá ʻe fokotuʻu hake ʻe he ʻOtuá ʻa e kau maté ʻi he kahaʻú? ʻE lava ke nau maʻu ʻa e tuipau tatau mo ia naʻe maʻu ʻe Māʻatá ʻi heʻene lea fekauʻaki mo hono tuongaʻané: “ʻOku ou ʻilo te ne tuʻu hake ʻi he toetuʻu ʻi he ʻaho fakaʻosí”? Ko e hā naʻe lava ai ke ne tui ʻe ʻi ai ha toetuʻu ʻi he kahaʻú, pea ko e hā ʻe lava ai ke ke tui ki aí?

¹³ Ko e ngaahi fakamatala ʻe niʻihi ʻi he Folofola ʻa e ʻOtuá ʻoku fakahaaʻi ai naʻe ʻiloʻi ʻe heʻene kau sevāniti mateakí ʻe ʻi ai ha toetuʻu ʻi he kahaʻú. Tau lāulea angé ki ha fakamatala ʻe niʻihi.

14. Ko e hā ʻoku akoʻi mai ʻe he talanoa kia ʻĒpalahamé fekauʻaki mo e toetuʻú?

¹⁴ Fakakaukau angé ki he meʻa naʻe fiemaʻu ʻe Sihova ke fai ʻe ʻĒpalahame kia ʻAisaké, ʻa e foha naʻá ne tatali fuoloa ki aí. Naʻe folofola ange ʻa Sihova: “Kātaki muʻa ʻo ʻave ho fohá, ʻa ho foha pē taha ʻokú ke ʻofa lahi aí, ʻa ʻAisake, peá ke fononga ki he fonua ko Molaiá ʻo foaki hake ai ia ko ha feilaulau tutu.” (Sēn. 22:2) ʻOkú ke pehē naʻe fēfē ʻa e ongoʻi ʻa ʻĒpalahamé ʻi heʻene fanongo ki he fekau ko ení? Naʻe talaʻofa ʻe Sihova ʻe tāpuakiʻi ʻa e ngaahi puleʻanga kotoa pē fakafou ʻi he hako ʻo ʻĒpalahamé. (Sēn. 13:14-16; 18:18; Loma 4:17, 18) Pehē foki, naʻe pehē ʻe Sihova ko e tāpuakí ʻe haʻu ʻo “fou mai ia ʻia ʻAisake.” (Sēn. 21:12) Ka ʻe malava fēfē ke hoko ia kapau naʻe feilaulau ʻaki ʻe ʻĒpalahame ʻa hono fohá? Naʻe fakamānavaʻi ʻa Paula ke ne fakamatala naʻe tui ʻa ʻĒpalahame ʻoku malava ʻa e ʻOtuá ke ne fokotuʻu hake ʻa ʻAisake. (Lau ʻa e Hepelū 11:17-19.) Kae kehe, ʻoku ʻikai ke pehē ʻe he Tohi Tapú naʻe fakakaukau ʻa ʻĒpalahame ʻe moʻui ʻa ʻAisake ʻi he taimi pē ko iá, ʻi ha ngaahi houa siʻi, ʻi ha ʻaho, pe naʻa mo ha uike nai. Naʻe ʻikai lava ke ʻilo ʻe ʻĒpalahame ʻa e taimi ʻe toetuʻu ai ʻa hono fohá. Ka naʻá ne falala ʻe fokotuʻu hake ʻe Sihova ʻa ʻAisake.

15. Ko e hā ʻa e ʻamanaki naʻe maʻu ʻe he tangata faitōnunga ko Siopé?

¹⁵ Ko e tangata faitōnunga ko Siopé naʻá ne ʻiloʻi foki ʻe ʻi ai ha toetuʻu ʻi he kahaʻú. Naʻá ne ʻiloʻi kapau ʻe tā hifo ha fuʻu ʻakau, ʻe lava ke toe tupu pea hoko ʻo hangē ko ha fuʻu ʻakau foʻoú. Ka heʻikai lava ke hoko ʻa e meʻa ko iá ki ha tangata. (Siope 14:7-12; 19:25-27) Kapau ʻe mate ha tangata, heʻikai lava ke ne toe fokotuʻu hake pē ʻe ia ʻa ia tonu. (2 Sām. 12:23; Saame 89:48) Ko e moʻoni, naʻe ʻikai ʻuhinga iá heʻikai lava ke fokotuʻu hake ʻe he ʻOtuá ha tokotaha. Ko hono moʻoní, naʻe tui ʻa Siope ʻe manatuʻi ia ʻe Sihova. (Lau ʻa e Siope 14:13-15.) Naʻe ʻikai lava ke ʻiloʻi ʻe Siope ʻa e taimi ʻe hoko ai eni ʻi he kahaʻú. Neongo ia, naʻe falala ʻa Siope ko e Tokotaha-Fakatupu ʻo e moʻui fakaetangatá te ne malava pea te ne manatuʻi ia ʻo ne fokotuʻu hake ia.

16. Ko e hā ʻa e fakalototoʻa naʻe fai ʻe ha ʻāngelo kia Taniela?

¹⁶ Fakakaukau ki ha tangata faitōnunga ʻe taha, ʻa Taniela. Ko ha sevāniti mateaki ia ʻa Sihova ʻi he kotoa ʻo ʻene moʻuí, pea naʻe tokoniʻi ia ʻe Sihova. ʻI he taimi ʻe taha, naʻe ui ai ʻe ha ʻāngelo ʻa Taniela ko ha ‘tangata mahuʻinga ʻaupito’ peá ne tala ange kiate ia “ke ke maʻu ʻa e melinó” pea “ke ke loto-toʻa.”​—Tan. 9:22, 23; 10:11, 18, 19.

17, 18. Ko e hā naʻe talaʻofa ange ʻe Sihova kia Tanielá?

¹⁷ ʻI he meimei taʻu 100 ʻa Tanielá pea ʻi he ofi ki he ngataʻanga ʻo ʻene moʻuí, naʻá ne fakakaukau nai pe ko e hā ʻe hoko kiate iá. Naʻe ʻamanekina ʻe Taniela te ne toe moʻui? ʻAupito! ʻI he ngataʻanga ʻo e tohi Tanielá, ʻoku tau lau ai ʻa e talaʻofa ʻa e ʻOtuá kiate iá: “Ko e meʻa kiate koé, ʻalu atu ke aʻu ki he ngataʻangá. Te ke mālōlō.” (Tan. 12:13) Naʻe ʻiloʻi ʻe Taniela ko e kau maté ʻoku nau mālōlō pea ʻoku ʻikai ha “palani pe ha ʻilo pe ha poto ʻi he Faʻitoká,” ʻa ia kuo vavé ni ke ne ʻi aí. (Tml. 9:10) Kae kehe, ʻe ʻikai ko e ngataʻanga ia kia Tanielá. Naʻe ʻoange ʻe Sihova kiate ia ha talaʻofa fisifisimuʻa ki he kahaʻú.

¹⁸ Naʻe pehē ange ʻe he ʻāngelo ʻa Sihová kiate ia: “Te ke tuʻu hake ʻo maʻu ho ʻinasí ʻi he ngataʻanga ʻo e ngaahi ʻahó.” Naʻe ʻikai ke ʻiloʻi ʻe Taniela ʻa e taimi tofu pē ʻe hoko ai iá. Naʻá ne mahinoʻi te ne mate pea te ne mālōlō. Ka ʻi he fanongo ʻa Taniela ki he talaʻofa, “Te ke tuʻu hake ʻo maʻu ho ʻinasí,” naʻá ne mahinoʻi ai te ne toetuʻu ʻi he kahaʻú. ʻE hoko ia ʻi ha taimi fuoloa hili ʻene maté, “ʻi he ngataʻanga ʻo e ngaahi ʻahó.” Pe, fakatatau ki he lau ʻa e Jerusalem Bible: “Te ke toetuʻu hake ʻo maʻu ho ʻinasí ʻi he ngataʻanga ʻo e taimí.”

19, 20. (a) Ko e hā ʻa e kaunga ʻo e ngaahi meʻa kuo tau lāulea ki aí ki he lea naʻe fai ʻe Māʻata kia Sīsuú? (e) Ko e hā te tau lāulea ki ai ʻi he kupu hono hokó?

¹⁹ ʻOku hā mahino, naʻe maʻu ʻe Māʻata ʻa e ngaahi ʻuhinga lelei ke ne fakapapauʻi ai ko hono tuongaʻane faitōnungá, ʻa Lāsalosi, te ne “tuʻu hake ʻi he toetuʻu ʻi he ʻaho fakaʻosí.” Ko e talaʻofa ʻa Sihova kia Tanielá, pea pehē ki he tui mālohi ʻa Māʻata ki ha toetuʻu ʻi he kahaʻú, ʻoku totonu ke ne ʻai kitautolu ke tau tuipau ʻi he ʻahó ni. ʻE ʻi ai ha toetuʻu.

²⁰ Kuo tau ako fekauʻaki mo e ngaahi toetuʻu moʻoni naʻe hoko ʻi he kuohilí. ʻOku fakamoʻoniʻi ʻe he ngaahi meʻá ni ʻe lava ke toe moʻui ʻa e kau maté. Kuo tau toe ʻiloʻi foki ko e kau tangata mo e kau fefine naʻa nau tauhi faitōnunga ki he ʻOtuá naʻa nau ʻamanekina ha toetuʻu ʻi he kahaʻú. Kae kehe, ʻoku ʻi ai ha fakamoʻoni ʻe lava ke hoko ha toetuʻu ʻi ha taimi fuoloa ʻi he hili hono fai ʻa e talaʻofá? Kapau ko ia, ʻe ʻomai ʻe he meʻa ko iá ha toe ʻuhinga lahi ange ke tau fakatuʻamelie atu ai ki ha toetuʻu ʻi he kahaʻú. Ka ʻe hoko ia ʻi he taimi fē? Te tau lāulea ki he ngaahi poini ko ení ʻi he kupu hono hokó.