Ko e Hā ʻa e Puleʻanga ʻo e ʻOtuá?

 1. Ko e hā ʻa e lotu ʻiloa ʻe sivisiviʻi he taimi ní?

KO E kakai ʻe laui miliona ʻi māmani lahi ʻoku nau maheni mo e lotu ʻoku ui ʻe he tokolahi ko ʻEtau Tamaí, pe ko e Lotu ʻa e ʻEikí. Ko e ongo kupuʻi leá fakatouʻosi ʻoku ʻuhinga iá ki ha lotu ʻiloa naʻe fai ʻe Sīsū Kalaisi tonu ko ha sīpinga lotu. Ko ha lotu mohu ʻuhinga ʻaupito ia, pea ko ha lāulea ki heʻene ʻuluaki kole ʻe tolú ʻe tokoniʻi ai koe ke ke ʻilo ʻa e meʻa lahi ange fekauʻaki mo e meʻa ʻoku akoʻi moʻoni ʻe he Tohi Tapú.

 2. Ko e hā ʻa e meʻa ʻe tolu naʻe akoʻi ʻe Sīsū ʻa ʻene kau ākongá ke nau lotu ki aí?

² ʻI he kamataʻanga ʻo e sīpinga lotu ko ení, naʻe fakahinohino ai ʻe Sīsū ki heʻene kau fanongó: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa, ke hoko [mai] hoʻo Pule, ke fai ho Finangalo, hange ko ia ʻi he langi ke pehe foki ʻi māmani.” (Mātiu 6:​9-13) Ko e hā ʻa e ʻuhinga ʻo e kole ko eni ʻe tolú?

 3. Ko e hā ʻoku fiemaʻu ke tau ʻiloʻi fekauʻaki mo e Puleʻanga ʻo e ʻOtuá?

³ Kuo tau ʻosi ako ha meʻa lahi ʻo fekauʻaki mo e huafa ʻo e ʻOtuá, ʻa e Sihová. Pea kuo tau lāulea ʻi ha tuʻunga ki he finangalo ʻo e ʻOtuá—ʻa e meʻa kuó ne faí mo ia te ne toki fai maʻá e faʻahinga ʻo e tangatá. Ko ia ai, ko e hā naʻe ʻuhinga ki ai ʻa Sīsū ʻi heʻene tala mai ke tau lotu: “Ke hoko [mai] hoʻo Pule”? Ko e hā ʻa e Puleʻanga ʻo e ʻOtuá? ʻE anga-fēfē hono fakatāpuhaaʻi ʻe heʻene hoko maí ʻa e huafa ʻo e ʻOtuá, pe ʻai ia ke māʻoniʻoní? Pea ʻoku anga-fēfē ʻa e felāveʻi ʻa e hoko mai ʻa e Puleʻangá ki hono fai ʻa e finangalo ʻo e ʻOtuá?

 4. Ko e hā ʻa e Puleʻanga ʻo e ʻOtuá, pea ko hai ʻa hono Tuʻí?

⁴ Ko e Puleʻanga ʻo e ʻOtuá ko ha founga-pule ia kuo fokotuʻu ʻe Sihova ko e ʻOtuá fakataha mo ha Tuʻi kuo fili ʻe he ʻOtuá. Ko hai ʻa e Tuʻi ʻo e Puleʻanga ʻo e ʻOtuá? Ko Sīsū Kalaisi. Ko Sīsū ko e Tuʻí ʻoku lahi ange ia ʻi he kotoa ʻo e kau pule fakaetangatá pea ʻoku ui ia “ko e Tuʻi ʻo kinautolu ʻoku tuʻi, mo e ʻEiki ʻo kinautolu ʻoku ʻeiki.” (1 Timote 6:15) ʻOkú ne maʻu ʻa e mālohi ke fai ʻa e meʻa ʻoku lelei mamaʻo ange ʻi ha faʻahinga pule fakaetangata pē, naʻa mo e lelei taha ʻi honau lotolotongá.

 5. ʻE pule mei fē ʻa e Puleʻanga ʻo e ʻOtuá, pea ʻe pule mai ia ki fē?

⁵ Ko fē ʻe pule mei ai ʻa e Puleʻanga ʻo e ʻOtuá? Sai, ʻoku ʻi fē ʻa Sīsū? Te ke manatuʻi naʻá ke ako naʻe tāmateʻi ia ʻi ha ʻakau fakamamahi, pea toki fokotuʻu hake leva ia. Taimi nounou mei ai, naʻá ne ʻalu hake ki hēvani. (Ngāue 2:33) Ko ia ai, ko e feituʻu ia ʻoku ʻi ai ʻa e Puleʻanga ʻo e ʻOtuá—ko hēvani. Ko e ʻuhinga ia ʻoku ui ai ia ʻe he Tohi Tapú ko ha “puleʻanga fakalangi.” (2 Timote 4:18) Neongo ko e Puleʻanga ʻo e ʻOtuá ʻoku ʻi hēvani, ʻe pule mai ia ki he māmaní.—Fakahā 11:15.

6, 7. Ko e hā ʻokú ne ʻai ʻa Sīsū ko ha Tuʻi tuʻu-ki-muʻá?

⁶ Ko e hā ʻokú ne ʻai ʻa Sīsū ko ha Tuʻi tuʻu-ki-muʻá? Ko e meʻa ʻe taha, ʻe ʻikai ʻaupito te ne mate. ʻI hono fakahoa ʻa Sīsū ki he ngaahi tuʻi fakaetangatá, ʻoku ui ia ʻe he Tohi Tapú ko e tokotaha “ʻoku aʻana toko taha pe ʻa e taʻefaʻamate, heʻene ʻafio ʻi he maama taʻefaʻafotuaki.” (1 Timote 6:16) ʻOku ʻuhinga ení ko e lelei kotoa pē ʻoku fai ʻe Sīsuú ʻe tuʻuloa. Pea te ne fai ʻa e ngaahi meʻa lahi mo lelei.

⁷ Fakakaukau angé ki he kikite Fakatohitapu ko eni fekauʻaki mo Sīsuú: “E nofo iate ia ae Laumalie o Jihova, ae laumalie oe boto moe faa ilo, ae laumalie oe akonaki moe malohi, ae laumalie oe ilo bea moe manavahe kia Jihova; Bea e ilo vave eia ae manavahe kia Jihova: bea e ikai te ne fakamāu i he vakai a hono fofoga, be valoki o hage koe fanogo a hono teliga: Ka i he maonioni te ne fakamāu ae majiva, bea valoki i he tae filifilimanako ma ae agavaivai oe fonua.” (Aisea 11:​2-4, PM) Ko e ngaahi lea ko iá ʻoku fakahaaʻi ai ko Sīsuú ʻe hoko ko ha Tuʻi māʻoniʻoni mo manavaʻofa ki he kakai ʻi he māmaní. Te ke saiʻia ke maʻu ha pule hangē ko iá?

 8. Ko hai ʻe pule fakataha mo Sīsuú?

⁸ Ko e toe moʻoni eni ʻe taha fekauʻaki mo e Puleʻanga ʻo e ʻOtuá: ʻE ʻikai ke pule toko taha pē ʻa Sīsū. ʻE ʻi ai hono kaungāpule. Ko e fakatātaá, naʻe tala ʻe he ʻapositolo ko Paulá kia Tīmote: “Kapau ʻoku tau kataki, te tau kaungā-tuʻi foki mo ia.” (2 Timote 2:11 [2:​12, PM]) ʻIo, ko Paula, Tīmote, mo e faʻahinga faitōnunga kehe ʻa ia kuo fili ʻe he ʻOtuá, te nau pule fakataha mo Sīsū ʻi he Puleʻanga fakahēvaní. Ko e toko fiha te nau maʻu ʻa e monū ko iá?

 9. Ko e toko fiha te nau pule fakataha mo Sīsuú, pea naʻe kamata ʻanefē hono fili kinautolu ʻe he ʻOtuá?

⁹ Hangē ko ia naʻe fakahaaʻi ʻi he Vahe 7 ʻo e tohí ni, ko e ʻapositolo ko Sioné naʻe ʻoange kiate ia ha vīsone ʻa ia naʻá ne sio ai “naʻe tuʻu ʻa e Lami [Sīsū Kalaisi] ʻi he funga moʻunga ko Saione [ko hono tuʻunga fakatuʻi ʻi hēvaní], pea naʻe ʻiate ia ha toko taha kilu ma toko fa mano ma toko fa afe, ʻa ia kuo tohi ki honau laʻe ʻa hono huafa, mo e huafa oʻene Tamai.” Ko hai ʻa e toko 144,000 ko iá? Ko Sione tonu ʻokú ne tala mai kiate kitautolu: “Ko kinautolu ʻeni ʻoku nau muimui ki he Lami, neongo pē ko e fe ha potu ʻoku ne ʻalu ki ai. Ko kinautolu ia naʻe fakatau mei he kakai, ko e fuatapu maʻa e ʻOtua mo e Lami.” (Fakahā 14:​1, 4) ʻIo, ko e kau muimui faitōnunga kinautolu ʻo Sīsū Kalaisi ʻa ia kuo fili makehe ke nau pule ʻi hēvani fakataha mo ia. Hili hono fokotuʻu hake mei he maté ki he moʻui fakahēvaní, te nau “pule ko e ngaahi tuʻi ki he māmaní” fakataha mo Sīsū. (Fakahā 5:​10, NW) Talu mei he ngaahi ʻaho ʻo e kau ʻapositoló, kuo fili ai ʻe he ʻOtuá ha kau Kalisitiane faitōnunga koeʻuhí ke fakakakatoʻaki ʻa e fika 144,000.

10. Ko e hā ko ha fokotuʻutuʻu anga-ʻofa ai kia Sīsū mo e toko 144,000 ke nau pule mai ki he faʻahinga ʻo e tangatá?

¹⁰ ʻOku mātuʻaki anga-ʻofa ʻa e fokotuʻutuʻu kia Sīsū mo e toko 144,000 ke nau pule mai ki he faʻahinga ʻo e tangatá. Ko e meʻa ʻe taha, ʻoku ʻiloʻi ʻe Sīsū ʻa e anga ʻo e hoko ko ha tangatá pea faingataʻaʻiá. Naʻe pehē ʻe Paula ko Sīsuú “oku ikai . . . taemanavaofa ki he e tau gaahi vaivai; ka nae ahiahiʻi tatau be ia i he mea kotoabe, ka nae ikai haane agahala.” (Hepelu 4:​15, PM; 5:8) Ko hono kaungāpulé foki kuo nau faingataʻaʻia pea kātekina ʻa e hoko ko e tangatá. Tānaki atu ki ai, kuo nau fāinga mo e taʻehaohaoá pea fekuki mo e faʻahinga alangamahaki kotoa pē. Ko e moʻoni, te nau mahinoʻi ʻa e ngaahi palopalema ʻoku fetaulaki mo e faʻahinga ʻo e tangatá!

11. Ko e hā naʻe pehē ai ʻe Sīsū ʻoku totonu ke lotu ʻa ʻene kau ākongá ke fai ʻa e finangalo ʻo e ʻOtuá ʻi hēvaní?

¹¹ ʻI he taimi naʻe pehē ai ʻe Sīsū ʻoku totonu ke lotu ʻa ʻene kau ākongá ke hoko mai ʻa e Puleʻanga ʻo e ʻOtuá, naʻá ne toe pehē ai ʻoku totonu ke nau lotu ke fai ʻa e finangalo ʻo e ʻOtuá “hange ko ia ʻi he langi ke pehe foki ʻi mamani.” Ko e ʻOtuá ʻoku ʻi hēvani, pea kuo fai maʻu pē ʻi ai ʻe he kau ʻāngelo faitōnungá ʻa hono finangaló. Kae kehe, ʻi he Vahe 3 ʻo e tohí ni, naʻa tau ako ai naʻe tuku ʻe ha ʻāngelo fulikivanu ʻa hono fai ʻa e finangalo ʻo e ʻOtuá peá ne fakatupunga ʻa ʻĀtama mo ʻIvi ke na faiangahala. ʻI he Vahe 10, te tau ako ai ʻa e meʻa lahi ange fekauʻaki mo e meʻa ʻoku akoʻi ʻe he Tohi Tapú ʻo kau ki he ʻāngelo fulikivanu ko iá, ʻa ē ʻoku tau ʻiloʻi ko Sētane ko e Tēvoló. Ko Sētane mo e ngaahi meʻamoʻui laumālie fakaeʻāngelo naʻa nau fili ke muimui ʻiate iá—ʻoku ui ko e kau tēmenioó⁠—naʻe fakaʻatā kinautolu ke nau nofo ʻi ha kiʻi taimi ʻi hēvani. ʻI he meʻá ni, naʻe ʻikai ke fai ai ʻi he taimi ko iá ʻe he faʻahinga kotoa ʻi hēvaní ʻa e finangalo ʻo e ʻOtuá. Naʻe pau ke liliu ia ʻi he taimi ʻe kamata pule ai ʻa e Puleʻanga ʻo e ʻOtuá. Ko e Tuʻi fakanofo foʻoú, ʻa Sīsū Kalaisi, naʻe pau ke ne faitau mo Sētane.—Fakahā 12:​7-9.

12. Ko e hā ʻa e ongo meʻa mahuʻinga ʻe ua naʻe hoko ʻoku fakamatalaʻi ʻi he Fakahā 12:10?

¹² Ko e ngaahi lea fakaekikite ko ení ʻoku fakamatalaʻi ai ʻa e meʻa ʻe hokó: “Naʻa ku fanongo ki ha fuʻu leʻo ʻi he langi naʻe pehe, Kuo hoko ʻeni ʻa e fakamoʻui, mo e malohi, mo e puleʻanga ʻo hotau ʻOtua, pea mo e pule ʻa ʻEne Kalaisi: he kuo kapusi ʻa e tukuaki ʻo hotau kainga [Sētane], ʻa ia ʻoku ne tukuakiʻi kinautolu ʻi he ʻao ʻo hotau ʻOtua, ʻi he ʻaho mo e po.” (Fakahā 12:10) Naʻá ke fakatokangaʻi ʻa e ongo meʻa mahuʻinga ʻaupito ʻe ua naʻe hoko ʻa ia naʻe fakamatalaʻi ʻi he veesi Tohi Tapu ko iá? ʻUluakí, ko e Puleʻanga ʻo e ʻOtuá ʻi he malumalu ʻo Sīsū Kalaisí ʻoku kamata ia ke pule. Ko hono uá, ʻoku lī hifo ʻa Sētane mei hēvani ki he māmaní.

13. Ko e hā kuo hoko ko e ola ia ʻo hono lī hifo ʻo Sētane mei hēvaní?

¹³ Ko e hā ʻa e ola ʻo e ongo meʻa ko ia naʻe hokó? Fekauʻaki mo e meʻa naʻe hoko ʻi hēvaní, ʻoku tau lau: “Ko ia mou fiefia ʻa e ngaahi langi, mo kimoutolu ʻoku nofo tapanekale ʻi ai!” (Fakahā 12:12) ʻIo, ko e kau ʻāngelo faitōnunga ʻi hēvaní ʻoku nau fiefia, koeʻuhi ʻi he puli atu ʻa Sētane mo ʻene kau tēmenioó, ʻoku faitōnunga ai ʻa e tokotaha kotoa pē ʻi hēvaní kia Sihova ko e ʻOtuá. ʻOku ʻi ai ʻa e melino kakato, hokohoko pea mo e feongoongoi ʻi ai. ʻOku fai leva ai ʻa e finangalo ʻo e ʻOtuá ʻi hēvani.

14. Ko e hā kuo hoko koeʻuhi ko hono lī hifo ʻa Sētane ki he māmaní?

¹⁴ Ko ia ai, ʻoku fēfē leva ʻa e māmaní? ʻOku pehē ʻe he Tohi Tapú: “ʻOiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.” (Fakahā 12:12) ʻOku ʻita ʻa Sētane fekauʻaki mo hono lī hifo mei hēvaní pea ʻi heʻene maʻu ha taimi nounou pē ʻoku toé. ʻI heʻene ʻitá ʻokú ne fakatupunga ʻa e mamahi, pe “ʻoiaue,” ʻi he māmaní. Te tau ako ʻa e meʻa lahi ange fekauʻaki mo e “ʻoiaue” ko iá ʻi he vahe hokó. Ka ʻi he fakakaukau atu ki he meʻa ko iá, ʻe lava ke tau ʻeke, ʻE lava fēfē ke fakatupunga ʻe he Puleʻangá ʻa e finangalo ʻo e ʻOtuá ke fai ʻi he māmaní?

15. Ko e hā ʻa e finangalo ʻo e ʻOtuá ki he māmaní?

¹⁵ Sai, manatuʻi ʻa e finangalo ʻo e ʻOtuá ki he māmaní. Naʻá ke ako fekauʻaki mo ia ʻi he Vahe 3. ʻI ʻĪteni, naʻe fakahaaʻi ai ʻe he ʻOtuá ko hono finangalo ki he māmani ko ení ke hoko ko ha palataisi ʻoku fakafonuʻaki ha matakali taʻemate mo māʻoniʻoni ʻo e faʻahinga ʻo e tangatá. Naʻe fakatupunga ʻe Sētane ʻa ʻĀtama mo ʻIvi ke na faiangahala, pea naʻe uesia ʻe he meʻa ko iá ʻa e fakahoko ʻo e finangalo ʻo e ʻOtuá ki he māmaní ka naʻe ʻikai te ne liliu ia. ʻOku kei fakataumuʻa pē ʻe Sihova “ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.” (Sāme 37:29) Pea ʻe fakahoko ia ʻe he Puleʻanga ʻo e ʻOtuá. ʻI he founga fē?

16, 17. Ko e hā ʻoku tala mai ʻe he Taniela 2:44 kiate kitautolu ʻo fekauʻaki mo e Puleʻanga ʻo e ʻOtuá?

¹⁶ Fakakaukau angé ki he kikite ʻoku maʻu ʻi he Taniela 2:44. ʻOku tau lau ai: “ʻI he taimi ʻo e ngaahi tuʻi ko ia, ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” Ko e hā ʻoku tala mai ʻe he meʻá ni kiate kitautolu ʻo fekauʻaki mo e Puleʻanga ʻo e ʻOtuá?

¹⁷ ʻUluakí, ʻokú ne tala mai ko e Puleʻanga ʻo e ʻOtuá ʻe fokotuʻu ia “ʻi he taimi ʻo e ngaahi tuʻi ko ia,” pe ʻi he lolotonga ʻoku kei ʻi ai ʻa e ngaahi puleʻanga kehé. Uá, ʻokú ne tala mai ko e Puleʻangá ʻe tuʻu ʻo taʻengata. ʻE ʻikai ikunaʻi ia pea fetongi ʻe ha toe founga-pule kehe. Tolú, ʻoku tau ʻiloʻi ʻe ʻi ai ʻa e tau ʻi he vahaʻa ʻo e Puleʻanga ʻo e ʻOtuá mo e ngaahi puleʻanga ʻo e māmani ko ení. Ko e Puleʻanga ʻo e ʻOtuá ʻe ikuná. Faifai atu pē, ʻe hoko ia ko e founga-pule pē ʻe taha ki he faʻahinga ʻo e tangatá. ʻE maʻu leva ai ʻe he faʻahinga ʻo e tangatá ʻa e tuʻunga-pule lelei taha kuo faifai ange pea nau ʻilo ki aí.

18. Ko e hā ʻa hono ui ʻo e tau fakaʻosi ʻi he vahaʻa ʻo e Puleʻanga ʻo e ʻOtuá mo e ngaahi founga-pule ʻo e māmani ko ení?

¹⁸ ʻOku lahi ʻa e meʻa ʻoku leaʻaki ʻe he Tohi Tapú ʻo fekauʻaki mo e tau fakaʻosi ʻi he vahaʻa ʻo e Puleʻanga ʻo e ʻOtuá mo e ngaahi founga-pule ʻo e māmani ko ení. Ko e fakatātaá, ʻokú ne akoʻi ʻo pehē ʻi he fakaofiofi mai ʻa e ngataʻangá, ʻe fakamafola ai ʻe he ngaahi laumālie fulikivanú ʻa e ngaahi loi ke kākaaʻi ʻaki ʻa e “ngaahi tuʻi ʻo mamani kātoa.” Ki he taumuʻa ko e hā? “Ke fakataha kinautolu [ʻa e ngaahi tuʻí] ki he tau ʻo e ʻaho lahi ʻo e ʻOtua Aoniu.” Ko e ngaahi tuʻi ʻo e māmaní ʻe fakatahatahaʻi fakataha ki he “potu ʻoku ui ʻi he lea faka-Hepelu ko Hamaketone.” (Fakahā 16:​14, 16) Koeʻuhi ko e meʻa ʻoku leaʻaki ʻi he ongo veesi ko iá, ko e fepaki fakaʻosi ʻi he vahaʻa ʻo e ngaahi founga-pule fakaetangatá mo e Puleʻanga ʻo e ʻOtuá ʻoku ui ia ko e tau ʻo Hāmaketoné, pe ʻĀmaketone.

19, 20. Ko e hā ʻokú ne taʻofi ʻa e finangalo ʻo e ʻOtuá mei hono fai he taimí ni ʻi he māmaní?

¹⁹ Ko e hā ʻe lavaʻi ʻe he Puleʻanga ʻo e ʻOtuá fakafou ʻi ʻĀmaketoné? Toe fakakaukau angé fekauʻaki mo e finangalo ʻo e ʻOtuá ki he māmaní. Naʻe fakataumuʻa ʻe Sihova ko e ʻOtuá ke fakafonu ʻa e māmaní ʻaki ha matakali haohaoa mo māʻoniʻoni ʻo e tangatá ʻo nau tauhi kiate ia ʻi Palataisi. Ko e hā ʻokú ne taʻofi ʻa e meʻa ko iá mei heʻene hoko he taimi ní? ʻUluakí, ʻoku tau angahalaʻia pea ʻoku tau hoko ʻo puke pea mate. Kae kehe, naʻa tau ako he Vahe 5, naʻe pekia ʻa Sīsū maʻatautolu koeʻuhi ke tau lava ʻo moʻui taʻengata. Ngalingali ʻokú ke manatuʻi ʻa e ngaahi lea naʻe lēkooti ʻi he Kōsipeli ʻa Sioné: “Naʻe ʻofa pehe ʻa e ʻOtua ki mamani, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.”—Sione 3:16.

²⁰ Ko e toe palopalema ʻe taha ko hono fai ʻe he kakai tokolahi ʻa e ngaahi meʻa fulikivanú. ʻOku nau loi, kākā mo fai ʻa e ʻulungāanga taʻetaau. ʻOku ʻikai te nau loto ke fai ʻa e finangalo ʻo e ʻOtuá. Ko e kakai ʻoku nau fai ʻa e ngaahi meʻa fulikivanú ʻe fakaʻauha kinautolu lolotonga ʻa e tau ʻa e ʻOtuá ko ʻĀmaketoné. (Sāme 37:10) Ka ko e toe ʻuhinga ʻe taha ʻoku ʻikai ke fai ai ʻa e finangalo ʻo e ʻOtuá ʻi māmaní ko e ʻikai fakalototoʻaʻi ʻe he ngaahi founga-pulé ʻa e kakaí ke nau fai iá. Ko e ngaahi founga-pule lahi kuo nau vaivai, anga-fakamamahi, pe kākā. ʻOku tala moʻoni ʻe he Tohi Tapú: “ʻI he taimi naʻe pule ai ha tangata ki he kakai ke nau kovi ai.”—Koheleti 8:9.

21. ʻE anga-fēfē hono fakatupunga ʻe he Puleʻangá ke fai ʻa e finangalo ʻo e ʻOtuá ʻi he māmaní?

²¹ Hili ʻa ʻĀmaketoné, ʻe hoko ai ʻa e faʻahinga ʻo e tangatá ʻo ʻi he malumalu ʻo e founga-pule pē ʻe taha, ko e Puleʻanga ʻo e ʻOtuá. Ko e Puleʻanga ko iá te ne fai ʻa e finangalo ʻo e ʻOtuá pea ʻomai ʻa e ngaahi tāpuaki fakaofo. Ko e fakatātaá, te ne toʻo atu ʻa Sētane mo ʻene kau tēmenioó. (Fakahā 20:​1-3) Ko e mālohi ʻo e feilaulau ʻa Sīsuú ʻe ngāueʻaki ia koeʻuhi ke ʻoua ʻe kei puke mo mate ʻa e faʻahinga faitōnunga ʻo e tangatá. ʻI hono kehé, ʻi he malumalu ʻo e pule ʻa e Puleʻangá te nau malava ai ke moʻui taʻengata. (Fakahā 22:​1-3) ʻE ngaohi ʻa e māmaní ko ha palataisi. Ko ia ʻe fakatupunga ai ʻe he Puleʻangá ke fai ʻa e finangalo ʻo e ʻOtuá ʻi māmani pea te ne fakamāʻoniʻoniʻi ʻa e huafa ʻo e ʻOtuá. ʻOku ʻuhinga ení ki he hā? ʻOku ʻuhinga iá ʻe faifai atu pē ʻo fakalāngilangiʻi ʻi he malumalu ʻo e Puleʻanga ʻo e ʻOtuá ʻe he faʻahinga kotoa pē ʻoku moʻuí ʻa e huafa ʻo Sihová.

22. Ko e hā ʻoku tau ʻiloʻi ai naʻe ʻikai hoko mai ʻa e Puleʻanga ʻo e ʻOtuá ʻi he taimi naʻe ʻi māmani ai ʻa Sīsuú pe ʻi he hili pē ʻene toetuʻú?

²² ʻI he taimi naʻe tala ai ʻe Sīsū ki hono kau muimuí ke nau lotu, “Ke hoko [mai] hoʻo pule,” naʻe hā mahino naʻe ʻikai ke hoko mai ʻa e Puleʻangá ʻi he taimi ko iá. Naʻe hoko mai ia ʻi he taimi naʻe ʻalu hake ai ʻa Sīsū ki hēvaní? ʻIkai, koeʻuhí ko Pita mo Paula fakatouʻosi naʻá na pehē ʻi he hili ʻa e toetuʻu ʻa Sīsuú, naʻe fakahoko ai ʻiate ia ʻa e kikite ʻi he Sāme 110:1: “Folofola ʻa Sihova ki hoku ʻEiki, ‘Nofo koe ʻi hoku toʻomataʻu ni, kae ʻoua ke u ʻai ho fili fuape ke hoko ko ho tuʻungavaʻe.’” (Ngāue 2:​32-35; Hepelu 10:​12, 13) Naʻe ʻi ai ha vahaʻa taimi tatali.

23. (a) Naʻe kamata ʻanefē ke pule ʻa e Puleʻanga ʻo e ʻOtuá? (e) Ko e hā ʻe lāulea ki ai ʻi he vahe hokó?

²³ Ko e hā hono lōloá? Lolotonga ʻa e senituli hono 19 mo e 20, naʻe ʻiloʻi māmālie ai ʻe ha kau ako Tohi Tapu loto-moʻoni ʻo nau pehē ko e vahaʻa taimi tatalí ʻe ngata ia ʻi he 1914. (Fekauʻaki mo e taʻu ko ení, sio ki he ʻApenitiki “1914​—Ko ha Taʻu Mahuʻinga ʻi he Kikite ʻa e Tohi Tapú.”) Ko e ngaahi meʻa naʻe kamata hoko ʻi he māmaní ʻi he 1914 ʻoku fakapapauʻi ai ko e mahino ʻa e kau ako Tohi Tapu loto-moʻoni ko ení naʻe tonu. Ko e fakahoko ʻo e kikite Fakatohitapú ʻoku fakahaaʻi ai ʻi he 1914, naʻe hoko ai ʻa Kalaisi ko e Tuʻí pea naʻe kamata pule ai ʻa e Puleʻanga fakahēvani ʻo e ʻOtuá. Ko ia ai, ʻoku tau moʻui ʻi he ‘toesiʻi pe ʻa e taimi’ ʻoku toe kia Sētané. (Fakahā 12:12; Sāme 110:2) ʻOku lava ke tau toe leaʻaki papau kuo vavé ni ke ngāue ʻa e Puleʻanga ʻo e ʻOtuá ke fakatupunga ke fai ʻa e finangalo ʻo e ʻOtuá ʻi he māmaní. ʻOkú ke ʻiloʻi ko e ongoongo fisifisimuʻa eni? ʻOkú ke tui ʻoku moʻoni ia? Ko e vahe hokó ʻe tokoniʻi ai koe ke ke ʻiloʻi ʻoku akoʻi moʻoni ʻe he Tohi Tapú ʻa e ngaahi meʻa ko ení.