Vahe 10

Ko ha Puleʻanga “ʻE ʻIkai ʻAuha”

 1, 2. (a) Ko e hā ʻa e moʻoniʻi meʻa ʻoku fakamamafaʻi fakaʻaho ʻe he ngaahi meʻa ʻoku hoko ʻi he māmaní, pea ʻoku anga-fēfē? (e) Ko e hā pē ʻa e fakaleleiʻangá?

ʻOKU fakamamafaʻi ʻe he ngaahi meʻa ʻoku hoko ʻi he ʻaho taki taha ʻi he māmaní ʻa e moʻoniʻi meʻa ko ia kuo ʻikai maʻu ʻe he faʻahinga ʻo e tangatá ʻa e fiefiá ʻi heʻenau siʻaki ʻa e tuʻunga-hau ʻo Sihová pea mo ʻenau feinga ke pule pē kiate kinautolu. Kuo ʻikai ha faʻahinga founga-pule ʻa e tangatá kuó ne ʻomai ha ngaahi ʻaonga ki he faʻahinga ʻo e tangatá ʻo taʻefilifilimānako. Neongo kuo fakalakalaka ʻa e ʻilo fakaesaienisi ʻa e tangatá ki ha tuʻunga taʻe hano tatau, kuo teʻeki ai ke nau malava ke taʻaki-fuʻu atu ʻa e angahalá, ikuʻi ʻa e mahamahakí pea fakangata ʻa e maté, ʻo aʻu pē ki ha taha ʻo honau kakaí. Ko hono kehe ʻaupitó, he ʻoku hokohoko atu ʻa e ngaahi puleʻangá ke faʻu ha ngaahi meʻatau foʻou mo toe fakalilifu ange. ʻOku tupulekina ʻa e faihia fakamālohí. ʻOku hanga ʻe he ngaahi meʻa fakatekinikalé, mānumanú mo e taʻeʻiló ʻo ʻuliʻi ʻa e fonuá, vaí pea mo e ʻeá. ʻOku ʻai ʻe he hikihiki vave ʻo e totongi ʻo e koloá mo e taʻemaʻu ngāué ke mātuʻaki faingataʻa ki he tokolahi ke nau maʻu ʻa e ngaahi meʻa ʻoku mātuʻaki fiemaʻu ki he moʻuí. ʻOku mātuʻaki fekumi ʻa e kakaí ki ha founga ke hao mei ai.​—Koh. 8:9.

² Ko e hā ʻa e fakaleleiʻangá? Ko e Puleʻanga ʻo e ʻOtuá, ʻa ia naʻe akoʻi ʻe Sīsū ki hono kau muimuí ke nau lotu ʻo fekauʻaki mo ia. (Mt. 6:9, 10) Ko ha houngaʻia lahi ē ʻoku totonu ke tau maʻu he ko e fakafiemālie te ne ʻomaí ʻoku vavé ni ʻaupito he taimí ni!

 3. (a) Ko e hā naʻe hoko ʻi hēvani ʻi he 1914 T.S. ʻo fekauʻaki mo e Puleʻanga ko ʻení? (e) Ko e hā ʻoku mahuʻinga ai ia kiate kitautolú?

³ Kuo ʻosi ngāue ʻa e Puleʻanga ʻo e ʻOtuá ʻi he mafai ʻo Sīsū Kalaisí talu mei he taʻu 1914 T.S.a ʻI he taʻu ko iá naʻe hoko ai ʻi hēvani ʻa e ngaahi meʻa naʻe mātā ʻe Tāniela ʻi ha vīsone fakaekikite. Naʻe foaki ʻe “Talumeimuʻa”, ko Sihova ko e ʻOtuá, ki he Fanautama ʻa tangatá, ko Sīsū Kalaisi, ha “hau, mo ha langilangi, mo ha pule [“puleʻanga,” NW], koeʻuhi ke tauhi kiate ia ʻe he ngaahi kakai, matakali, mo e faʻahinga lea kehekehe.” ʻI he fakamatala ʻo fekauʻaki mo e vīsoné, naʻe tohi ʻe Tāniela: “Ko hono hau ko e hau taʻengata, ʻa ia ʻe ʻikai liua, pea ko hono puleʻanga ko e taha ʻe ʻikai ʻauha.” (Tān. 7:13, 14) ʻOku makatuʻunga ʻi he Puleʻangá ni ʻe ʻai ai ʻe he ʻOtuá ʻa e kau ʻofa ki he māʻoniʻoní ke nau fiefia ʻi he ngaahi meʻa lelei taʻealafaʻalaua ʻa ia naʻá ne taumuʻa ki ai ʻi he taimi naʻá ne tuku ai ʻa ʻetau ʻuluaki ongo mātuʻa fakaetangatá ʻi Palataisí.

 4. Ko e hā ʻa e ngaahi fakaikiiki ʻo fekauʻaki mo e Puleʻangá ʻoku mahuʻinga ʻaupito kiate kitautolu, pea ko e hā hono ʻuhingá?

⁴ Ko e kakai ʻofa-mateaki ko ia ʻi he malumalu ʻo e Puleʻangá ʻoku nau mahuʻingaʻia ʻaupito ʻi he faʻunga mo e founga ngāue ʻa e founga-pulé ni. ʻOku nau fie ʻilo ki he meʻa ʻokú ne fai ʻi he taimi ní, ʻa e meʻa te ne fakahoko ʻi he kahaʻú pea mo e meʻa ʻokú ne fiemaʻu meiate kinautolú. ʻOku nau sivisiviʻi fakaʻāuliliki ia, pea ʻi heʻenau fai peheé, ʻoku tupulaki ai ʻa ʻenau houngaʻia ki ai pea ʻoku nau teuʻi kinautolu ke nau lea ki ha niʻihi kehe ʻo kau ki ai.​—Sāme 48:12, 13.

Ko ha Fakatotolo Fakaueʻi-Loto

 5. (a) ʻOku fakahaaʻi ʻe he Tohitapú pe ko e tuʻunga-hau ʻo hai ʻoku fakahaaʻi ʻaki ʻa e Puleʻanga Faka-Mīsaiá? (e) ʻI he founga fē ʻoku ueʻi ai kitautolu ʻe he meʻa ʻoku tau ako ʻo kau ki he Puleʻangá?

⁵ Ko e taha ʻo e ngaahi ʻuluaki meʻa ʻoku fakahā ʻe he sivisiviʻi peheé ko e Puleʻanga Faka-Mīsaia ko ʻení ko hano fakahā ia ʻo e tuʻunga-hau ʻo Sihová tonu. Ko ia ʻa e tokotaha naʻá ne foaki ʻa e “hau, mo ha langilangi, mo ha pule” ki hono ʻAló. Ko ia ai, ʻi he hili ʻa e kamata ke pule ʻa e Puleʻanga ko ʻení, naʻe feʻungamālie ʻa hono fanongonongo ʻe ha ngaahi leʻo ʻi hēvani ʻo pehē: “Ko e puleʻanga ʻo mamani kuo hoko ko e puleʻanga ʻo hotau ʻEiki [ko Sihova ko e ʻOtuá] mo ʻEne Kalaisi: pea te ne [Sihova] pule ʻo lauikuonga ʻo taʻengata.” (Fkh. 11:15) Ko ia ko e meʻa kotoa pē ʻoku tau ako ʻo kau ki he Puleʻanga ko ʻení pea mo e meʻa ʻokú ne fakahokó ʻokú ne tohoaki kitautolu ke tau vāofi ange kia Sihova tonu. ʻOku fokotuʻu ʻe he meʻa ko iá ʻiate kitautolu ha holi ke moʻulaloa ki hono tuʻunga-haú ʻo taʻengata.

 6. Ko e hā ke mahuʻinga makehe ai kiate kitautolu ʻa e hoko ʻa Sīsū Kalaisi ko e pule tokoni ʻa Sihová?

⁶ Ko e meʻa lelei ē ʻa hono fokotuʻu ʻe Sihova ʻa Sīsū Kalaisi ki he taloní ke hoko ko Hono pule tokoni! ʻI hono tuʻunga ko e Tufunga Lahí ʻa ia naʻe ngāueʻaki ʻe he ʻOtuá ki hono ngaohi ʻo e māmaní mo e tangatá, ʻoku ʻiloʻi lelei ange ai ʻe Sīsū ʻiate kitautolu ʻa e ngaahi meʻa ʻoku fiemaʻu kiate kitautolú. ʻIkai ngata ai, naʻá ne fakahāhaaʻi mei he kamataʻanga ʻo e hisitōlia ʻo e tangatá ʻa ʻene ‘fiefiaʻanga ko e fānau ʻa e tangatá.’ (Pal. 8:30, 31; Kol. 1:15-17) ʻOkú ne ʻofa lahi pehē fau he naʻá ne hifo tonu ki he māmaní peá ne foaki ʻene moʻuí ko ha huhuʻi maʻá e kakai. Ko ia naʻá ne ʻai ke tau ala maʻu ʻa e fakatauʻatāinaʻi mei he angahalá mo e maté, pea mo e faingamālie ki he moʻui taʻengatá.​—Mt. 20:28.

 7. (a) ʻI he kehe ʻaupito mei he tuʻunga-tuʻi ʻa ha tangata, ko e hā ʻe tuʻuloa ai ʻa e founga-pule ko ení? (e) Ko e hā ʻa e felāveʻi ʻa e “tamaioeiki agatonu mo boto” ki he founga-pule fakahēvaní?

⁷ Ko e founga-pule tuʻumaʻu mo tuʻuloa ia. Ko ʻene tuʻuloá ʻoku fakapapauʻi ia ʻe he moʻoniʻi meʻa ko Sihova tonu ʻoku ʻikai malava ke mate. (Hap. 1:12; Sāme 146:3-5, 10) ʻI he kehe ʻaupito mei he ngaahi tuʻi fakaetangatá, ʻoku taʻe faʻa mate foki ʻa Sīsū Kalaisi, ʻa e tokotaha ko ia kuo tuku ki ai ʻa e tuʻunga-tuʻí. (Loma 6:9; 1 Tīm. 6:15, 16) ʻE toe ʻi ai mo e toko 144,000 kehe ke nau kaungā-kau mo Kalaisi ʻi he ngaahi taloni fakahēvaní, ko e kau sevāniti ʻofa-mateaki ʻa e ʻOtuá kuo toʻo mei he “matakali fulipē mo e lea, mo e faʻahinga mo e puleʻanga.” ʻOku toe ʻoange foki ki he faʻahingá ni ʻa e moʻui taʻe faʻa maté. (Fkh. 5:9, 10; 1 Kol.1Ko 15:42-44, 53) Ko e konga lahi taha ʻo kinautolu kuo nau ʻosi ʻi hēvani, pea ko e toenga ʻo kinautolu ʻoku kei ʻi he māmaní ʻoku fokotuʻuʻaki ʻa e “tamaioeiki agatonu mo boto”, ʻa ia ʻokú ne poupouʻi mateaki ʻa e ngaahi meʻa ʻo fekauʻaki mo e Puleʻanga ko iá ʻi heni.​—Mt. 24:45-47, PM.

 8, 9. (a) Ko e hā ʻa e ngaahi tākiekina fakatupu-mavahevahe mo fakatupu-fakameleʻi ʻe toʻo atu ʻe he Puleʻangá? (e) Ko ia, ke tau fakaʻehiʻehi ke ʻoua ʻe hoko ko e ngaahi fili ʻo e Puleʻanga ʻo e ʻOtuá, ko e hā ʻa e ngaahi kautaha mo e ngaahi ngāue te tau fakaʻehiʻehi mei ai ke ʻoua naʻa tau fihia ai?

⁸ ʻI he taimi kotofa ʻa Sihová, ʻa ia kuo vavé ni mai, ʻe ngāue mai ʻa ʻene kongakau fakahoko tauteá ke fakamaʻa ʻa e foʻi māmaní. Te nau fakaʻauha taʻengata ʻa e faʻahinga ʻo e tangata ʻa ia koeʻuhi ko ʻenau fili pē ʻanautolu ke ʻoua te nau ʻilo ʻa e ʻOtuá, ʻoku nau fakafisi ke tali ʻa hono tuʻunga-haú, pea ʻoku nau paetaku ʻa e ngaahi tokonaki ʻofa ko ia ʻokú ne fai ʻo fakafou mai ʻia Sīsū Kalaisí. (2 Tes. 1:6-9) ʻE hoko eni ko e ʻaho ʻo Sihová, ʻa e taimi kuo fuoloa ʻa e fakatatali ki ai ke ne fakatonuhiaʻi ai ʻa hono Tuʻunga-Hau Fakalevelevá.

⁹ ʻE fakaʻauhamālie ʻo taʻengata ʻa e kotoa ʻo e ngaahi lotu loí, pea pehē ki he ngaahi founga-pule fakaetangatá kotoa mo ʻenau kau taú, ʻa ia kuo ngaohi kākaaʻi ʻe he tokotaha pule anga-fulikivanu taʻe hā mai ʻo e māmani ko ʻení. ʻE tuʻusi ʻi he mate ʻa e faʻahinga kotoa pē ʻoku nau fakafekauʻaki kinautolu ko e konga ʻo e māmani ko ʻení ʻi heʻenau tuli ki he founga moʻui siokita, taʻefaitotonu, mo taʻetaaú. ʻE toʻo atu ʻa Sētane mo ʻene kau tēmeniō ʻo tuku pōpulaʻi maʻu ʻi ha taʻu ʻe taha afe ke ʻoua naʻa nau toe fetuʻutaki mo e kau nofo ʻi he māmaní. Ko ha fiemālie lahi ē ʻe hoko kiate kinautolu kotoa ʻoku nau ʻofa ki he māʻoniʻoní!​—Fkh. 18:21, 24; 19:11-16, 19-21; 20:1, 2.

Ko Hono Ngaahi Taumuʻá​—Founga ʻo Hono Aʻusia

10. (a) ʻE anga-fēfē ʻa hono fakahoko ʻe he Puleʻanga Faka-Mīsaiá ʻa e taumuʻa ʻa Sihova ki he foʻi māmaní? (e) Ko e hā leva ʻa e ola ʻo e meʻá ni ki he kakai te nau nofo ʻi he foʻi māmaní?

¹⁰ ʻE fakahoko kakato ʻe he Puleʻanga Faka-Mīsaia ko ʻení ʻa e fuofua taumuʻa ʻa e ʻOtuá ki he foʻi māmaní. (Sēn. 2:8, 9, 15; 1:28) ʻI he aʻu mai ki he ʻaho ní, kuo ʻikai malava ʻe he tangatá ke fakahoko ʻa e taumuʻa ko iá. Kaekehe, kuo fakamoʻulaloaʻi “ae mama ka haʻu” ki he Fanautama ʻa tangatá, ko Sīsū Kalaisi. Ko kinautolu kotoa ʻe hao moʻui atu ʻi hono fakahoko ʻo e fakamaau ʻa Sihová ki he tuʻu motuʻa ko ʻení te nau ngāue fāʻūtaha ʻi he malumalu ʻo Kalaisí ko e Tuʻi, ʻo nau fai fiefia ha faʻahinga meʻa pē te ne fakahinohino koeʻuhi ke hoko ʻa e foʻi māmaní ko ha Palataisi fakalūkufua. (Hep. 2:5-9, PM) ʻE fiefia ʻa e faʻahinga kotoa ʻo e tangatá ʻi he ngāue ʻa honau nimá pea maʻu ʻa e ʻaonga kakato mei he hulu fau ʻo e meʻa ʻe fakatupu mai ʻe he foʻi māmaní.​—Sāme 72:1, 7, 8, 16-19; fehoanaki mo ʻAisea 65:21, 22.

11. (a) ʻE anga-fēfē ʻa hono fakahoko ʻa e tuʻunga haohaoa ʻi he ʻatamaí mo e sinó ki he faʻahinga ʻi he malumalu ʻo e Puleʻangá? (e) Ko e hā ʻe kau ki he meʻá ni?

¹¹ ʻI he taimi naʻe fakatupu ai ʻa ʻĀtama mo ʻIví naʻá na haohaoa, pea ko e taumuʻa ia ʻa e ʻOtuá ki he foʻi māmaní ke fakafonuʻaki ʻa ʻena fānau, ʻa ia ko e kotoa ʻo kinautolu te nau maʻu ʻa e tuʻunga haohaoa ʻi he ʻatamai mo e sino. ʻI he malumalu ʻo e pule ʻa e Puleʻangá, ʻe hoko ko ha moʻoniʻi meʻa lāngilangiʻia ʻa e taumuʻa ko iá. ʻOku fiemaʻu ki he meʻá ni ʻa hono toʻo atu ʻo e ngaahi nunuʻa kotoa ʻo e angahalá, pea ke fakahoko ení ʻe ʻikai ngata pē ʻa e hoko ʻa Kalaisi ko e Tuʻí ka te ne toe hoko foki ko e Taulaʻeiki Lahi. ʻI he anga-kātaki te ne tokoniʻi ai ʻa e faʻahinga talangofua ʻi hono malumalú ke nau maʻu ʻa e ʻaonga mei he mahuʻinga fakaefakamolemole angahala ʻo e feilaulau ʻaki ʻa ʻene moʻui fakaetangata ʻaʻaná. ʻE ʻā ʻa e ngaahi mata ʻoku kuí. ʻE fakaava ʻa e ngaahi telinga ʻoku tulí. Ko e sino ʻoku fakamatamatakoviʻi ʻe he hoholo ki he motuʻá pe mahamahakí ʻe hoko ia ʻo foʻou ange ʻi ha sino ʻo ha kiʻi tama. Ko e ngaahi alangamahaki kotoa pē ʻe fetongiʻaki ia ʻa e moʻui lelei. ʻE hoko mai ʻa e ʻaho ʻa ia ʻe ʻikai ha ʻuhinga ke toe pehē ai ʻe ha taha, “ʻOku ou mahaki,” koeʻuhi ʻe vete ange mei he faʻahinga ʻo e tangata ʻa ia ʻoku manavahē-ʻOtuá ʻa e mafasiaʻanga ko ia ko e angahalá pea mo hono ngaahi nunuʻa fakatupu loto-mamahí.​—Fehoanaki mo ʻAisea 33:22, 24; 35:5, 6; Siope 33:25; Luke 13:11-13.

12. (a) Ko e hā ʻa e toe meʻa kehe ʻoku fiemaʻu ki he tuʻunga haohaoa ʻo e faʻahinga ʻo e tangatá? (e) ʻE maʻu fēfē ia, pea ko e hā ʻa e ola ʻe maʻu mei aí?

¹² Kaekehe, ʻe kau ki hono aʻusia ʻa e tuʻunga haohaoá ha meʻa lahi ange ia ʻi he maʻu pē ʻa e sino mo e ʻatamai moʻui leleí. ʻOku kau ai ʻa hono fakahāhā totonu ʻa e ngaahi ʻulungaanga ʻo Sihová, koeʻuhi naʻe ngaohi ʻa e tangatá ‘ʻi he ʻīmisi ʻo e ʻOtuá, ʻo fakatatau ki hono angá.’ (Sēn. 1:26) ʻE fiemaʻu ha ako lahi ke fakahoko ʻa e meʻá ni. Ko e Fokotuʻutuʻu Foʻou eni ʻa ia ʻe “nofoʻanga ai ʻa maʻoniʻoni.” Ko ia, hangē ko ia naʻe kikiteʻi ʻe he palōfita ko ʻAiseá, “e toki ako ae kakai o mamani ki he maonioni.” (2 Pita 3:13; ʻAi. 26:9, PM) ʻOku taki atu ʻa e ʻulungaanga ko ʻení ki he melino​—ʻi he vahaʻa ʻo e kakai ʻo e ngaahi puleʻanga kotoa pē, ʻi he lotolotonga ʻo e ngaahi kaungāmeʻa ofí, ʻi he loto fāmilí, pea ʻoku hiliō ai ʻa hoto vā mo e ʻOtuá tonu. (ʻAi. 32:17; Sāme 85:10-13) Ko e faʻahinga ko ia te nau ako ki he māʻoniʻoní ʻe fakautuutu ʻenau ako ki he finangalo ʻo e ʻOtuá kiate kinautolú. ʻI he hoko ʻa e ʻofa ki he ngaahi founga ʻa Sihová ʻo tō loloto ʻi honau lotó, te nau muimui ai ki he ngaahi meʻá ni ʻi he tafaʻaki kotoa pē ʻo ʻenau moʻuí. Naʻe malava ʻe he tangata haohaoa ko Sīsuú ke ne pehē, ‘ʻOku ou fai maʻu ai pē ʻa e ngaahi meʻa ʻoku hōhōʻia ai ʻeku Tamaí.’ (Sione 8:29) Ko ha moʻui fakafiefia lahi ē ʻe hoko ʻi he taimi ʻe moʻoni ai ʻeni ʻo fekauʻaki mo e faʻahinga kotoa ʻo e tangatá!

Kuo ʻOsi Hā Mahino ʻa e Ngaahi Lavameʻa

13. Ngāueʻaki ʻa e ngaahi fehuʻi ʻi ʻolungá ke fakaeʻa ʻa e ngaahi lavameʻa ʻa e Puleʻangá pea mo e meʻa ʻoku totonu ke tau fai leva.

¹³ Kuo ʻosi hā mahino ki he faʻahinga ʻoku nau maʻu ʻa e mata ʻo e tuí ʻa e ngaahi lavameʻa fakaofo ʻa e Puleʻangá. ʻE fakamanatu kiate koe ʻe he ngaahi fehuʻi mo e ngaahi konga Tohitapu ʻoku ʻi laló ʻa e niʻihi ʻo e ngaahi meʻá ni, pea pehē ki he ngaahi meʻa ʻoku malava pea ʻoku totonu ke fai he taimí ni ʻe he faʻahinga kotoa ʻoku nau ʻi he malumalu ʻo e Puleʻangá:

Ko hai naʻe ʻuluaki fai ha ngāue ki ai ʻe he Tuʻí, pea naʻe iku ia ki he hā? (Fkh. 12:7-10, 12)

Ko hono fakatahatahaʻi fakaʻosi ʻo e faʻahinga fē naʻe fai ki ai ʻa e tokanga fakavave ʻi he hili ʻa hono fakanofo ke tuʻi ʻa Kalaisí? (Mt. 24:31; Fkh. 7:1-4)

Ko e hā ʻa e toe ngāue kehe naʻe kikiteʻi ʻe Sīsū ʻia Mātiu 25:31-33 te ne fai ʻi he hili ʻa ʻene hoko ki hono taloní pea mo e ki muʻa ʻi hono fakaʻauha ʻo e kakai anga-fulikivanú?

ʻOku anga-fēfē ʻa hono fakahoko ʻo e ngāué ni? Ko hai ʻoku kau ki aí? (Mt. 24:14; Sāme 110:3; Fkh. 14:6, 7)

Ko e hā kuo ʻikai malava ai ʻe he kau fakafepaki fakapolitikalé mo fakalotú ke taʻofi ia? (Ng. 5:38, 39; Sāk. 4:6)

Tupu mei he ngāue fakaeako kuo fakahokó, ko e hā ʻa e ngaahi liliu kuo ʻosi hoko ʻi he moʻui ʻa e faʻahinga kuo nau anganofo ki he pule ʻa e Puleʻangá? (ʻAi. 2:4; 1 Kol.1Ko 6:9-11)

Ko e Tuʻunga Tuʻuloa ʻo e Puleʻangá

14. (a) Ko e hā hono fuoloa ʻe pule ai ʻa Kalaisí? (e) Ko e hā ʻe fakahoko ʻi he lolotonga ʻo e vahaʻa taimi ko iá?

¹⁴ ʻI he hili ʻa hono lī ʻa Sētane mo ʻene kau tēmenioó ki he luo taʻe hano takelé, ʻe pule leva ʻa Sīsū Kalaisi fakataha mo hono kaungāʻea ʻe toko 144,000 ʻi ha taʻu ʻe taha afe. (Fkh. 20:6) ʻE fakafoki mai ʻa e faʻahinga ʻo e tangatá ki he tuʻunga haohaoá ʻi he lolotonga ʻo e vahaʻa taimi ko iá. ʻE toʻo atu ʻa e ngaahi founga-pule mo e ngaahi mafai mo e ngaahi mālohi kotoa ʻoku fakafepaki kia Sihová. ʻI he ʻosi ʻa hono fai ʻo e ngaahi meʻa ko iá, ʻe fakafoki leva ʻe Sīsū ʻa e Puleʻangá ki heʻene Tamaí, “koeʻuhiā ke tāfataha ʻa e ʻOtua ʻi he meʻa kotoa pe.”​—1 Kol.1Ko 15:24, 28.

15. ʻI he ʻuhinga fē ʻe moʻoni ai ʻa e pehē ʻe ‘ʻikai ʻaupito ʻauha’ ʻa e Puleʻangá?

¹⁵ Ko ia ʻe liliu ʻa e tuʻunga ʻo Sīsū tonu ki he māmaní. Ka neongo ia, ʻe “taʻengata” ʻa hono tuʻunga-pulé pea “ʻe ʻikai ʻauha” ʻa hono Puleʻangá. (Tān. 7:14) ʻI he ʻuhinga fē? ʻI he ʻuhinga heʻikai ke hiki ʻa e mafai ke pulé ki ha niʻihi kehe ʻa ia ʻoku ʻi ai haʻanau ngaahi taumuʻa kehe. ʻE ‘ʻikai ʻaupito ʻauha’ ʻa e ngaahi lavameʻa kuo fakahoko ʻe he Puleʻangá. ʻE tuʻu ʻo taʻengata ʻa e meʻa ʻoku fai ʻe he Puleʻangá ke fakatonuhiaʻi ʻa e huafa ʻo Sihová pea mo ʻene taumuʻa ʻo fekauʻaki mo e māmaní.

[Fakamatala ʻi lalo]

Fetalanoaʻaki ʻo Fakamanatu

● Ko e hā hono ʻuhinga ko e Puleʻanga ʻo e ʻOtuá ko e fakaleleiʻanga pē ia ʻe taha ki he ngaahi palopalema ʻo e faʻahinga ʻo e tangatá? Naʻe kamata ʻene pulé ʻanefē?

● Ko e hā ʻa e meʻa ʻoku tautefito ʻa ʻene fakamānako kiate koe fekauʻaki mo e Puleʻanga ʻo e ʻOtuá pea mo e meʻa te ne fakahokó? Ko e hā hono ʻuhingá?

● Ko e hā ʻa e ngaahi lavameʻa ʻa e Puleʻangá kuo malava ke tau ʻosi mātā? Ko e hā ʻetau kaunga ʻi he ngaahi meʻá ni?

[Fakatātā ʻi he peesi 84, 85]

ʻE ako ʻa e kakaí ki he māʻoniʻoni