Ko Hai “ʻE Hao”?

“Ko ia te ne tautapa ki he huafa ʻo e ʻEiki [“Sihová,” NW] ʻe fakamoʻui.” ​—NGĀUE 2:21.

 1. Ko e hā ko ha ʻaho mahuʻinga ai ʻa e Penitekosi ʻo e 33 T.S. ʻi he hisitōlia ʻo e māmaní?

PENITEKOSI ʻo e 33 T.S. ko e ʻaho mahuʻinga ia ʻi he hisitōlia ʻo e māmaní. Ko e hā hono ʻuhingá? Koeʻuhi ʻi he ʻaho ko iá naʻe fanauʻi ai ha puleʻanga foʻou. ʻI he kamatá, naʻe ʻikai ko ha fuʻu puleʻanga lahi ia​—ko ha kau ākonga pē ʻe toko 120 ʻa Sīsū ʻa ia naʻa nau fakatahataha ʻi ha loki ʻi ʻolunga ʻi Selusalema. Ka ʻi he ʻahó ni, ʻi he ngalo atu ʻa e konga lahi taha ʻo e ngaahi puleʻanga naʻe ʻi ai ʻi he taimi ko iá, ʻoku kei ʻi heni pē mo kitautolu ʻa e puleʻanga naʻe fanauʻi ʻi he loki ko ia ʻi ʻolungá. ʻOku mahuʻinga laulōtaha ʻa e moʻoniʻi meʻa ko ʻení kiate kitautolu kotoa, koeʻuhi ko e puleʻanga ʻeni naʻe fokotuʻu ʻe he ʻOtuá ke hoko ko ʻene fakamoʻoni ki he faʻahinga ʻo e tangatá.

 2. Ko e hā ʻa e ngaahi meʻa naʻe hoko fakaemana naʻá ne fakaʻilongaʻi ʻa hono fanauʻi ʻo e puleʻanga foʻoú?

² ʻI he taimi naʻe kamata ai ke tuʻu ʻa e puleʻanga foʻou ko iá, naʻe hoko ʻa e ngaahi meʻa mahuʻinga ʻo fakahoko ai ʻa e ngaahi lea fakaekikite ʻa Sioelí. ʻOku tau lau fekauʻaki mo e ngaahi meʻá ni ʻi he Ngāue 2:​2-4: “Fakafokifā naʻe hoko mei he langi ha meʻa, ʻo hangē ko e mumuhu ʻo ha fuʻu tuʻoni matangi ʻoku to mai, pea naʻe fāʻofale ʻi he loki naʻa nau nofo ai. Pea naʻe hā kiate kinautolu ha ngaahi ʻelelo hange ha afi, ʻo mavahevahe, ʻo nofo hifo kiate kinautolu taki taha. Pea fāʻofale ʻiate kinautolu katokātoa ʻa e Laumālie Maʻoniʻoni; pea nau hanga ʻo lea ʻi he ngaahi lea kehe, ʻo fakatatau ki he fakaleaʻi kinautolu ʻe he Laumālie.” ʻI he foungá ni naʻe hoko ai ʻa e kau tangata mo e kau fefine anga-tonu ʻe toko 120 ko ha puleʻanga fakalaumālie, ko e ʻuluaki kau mēmipa ia ʻo e meʻa naʻe ui ki mui ʻe he ʻaposetolo ko Paulá ko e “Isileli faka-ʻOtua.”​—Kaletia 6:16.

 3. Ko e hā ʻa e kikite ʻa Sioeli naʻe fakahoko ʻi he Penitekosi ʻo e 33 T.S.?

³ Naʻe fakatahataha mai ha fuʻu kakai ko e vakai ki he “mumuhu ʻo ha fuʻu tuʻoni matangi,” pea naʻe fakamatala ange ʻe he ʻaposetolo ko Pitá kiate kinautolu ʻo pehē naʻe fakahoko ai ʻa e taha ʻo e ngaahi kikite ʻa Sioelí. Ko e kikite fē? Sai, fanongo ki he meʻa naʻá ne leaʻakí: “ʻOku meʻa mai ʻa e ʻOtua, Pea ʻe hoko ʻo pehē ʻi he kuonga fakamui, te u lilingi ha meʻa mei hoku Laumālie ki he kakano kotoa pē; pea ʻe toki palōfisai ʻe homou ngaahi foha mo homou ngaahi ʻofefine pea ko e kau talavou ʻomoutolu te nau mata visone, pea ko e mātuʻa ʻomoutolu te nau faʻa misi: ʻio, naʻa mo ʻeku kau tamaioʻeiki mo ʻeku kau kaunanga, te u lilingi ha meʻa mei hoku Laumālie kiate kinautolu foki ʻi he kuonga ko ia, pea te nau palōfisai. Pea te u ʻai ha ngaahi meʻa fakaofo ʻi he langi ʻi ʻolunga, mo ha ngaahi fakaʻilonga ki māmani ʻi lalo, ko e toto, mo e afi mo e ngaahi pou kohu: ʻe liliu ʻa e laʻa ʻo poʻuli, mo e māhina ʻo toto, ʻi he tei hoko ʻa e ʻaho ʻo e ʻEiki, ʻa e ʻaho lahi mo ʻilonga: pea ʻe hoko ai ʻo pehē, ko ia te ne tautapa ki he huafa ʻo e ʻEiki [“Sihová,” NW] ʻe fakamoʻui.” (Ngāue 2:​17-21) Ko e ngaahi lea naʻe fai ʻe Pitá ʻoku hā ia ʻi he Sioeli 2:​28-32, pea ko honau fakahokó naʻe ʻuhinga ia ki he ngata ʻa e taimi ʻo e puleʻanga faka-Siú. Ko e “ʻaho ʻo e ʻEiki [“Sihová,” NW] ʻa e ʻaho lahi mo ʻilonga,” ko ha taimi ʻo e hilifaki-tautea ki ʻIsileli taʻeangatonú, naʻe ofi. Ka ko hai ʻe fakahaofí, pe ʻe haó? Pea ko e hā naʻe tomuʻa fakatātaaʻi ʻe he meʻá ni?

Ongo Fakahoko ʻo e Kikité

 4, 5. ʻI he vakai ki he ngaahi meʻa naʻe tuʻunuku atú, ko e hā ʻa e akonaki naʻe fai ʻe Pitá, pea ko e hā naʻe toe mahulu atu ai ʻa e kaunga ia ʻa e akonaki ko iá mei hono taimí?

⁴ ʻI he ngaahi taʻu hoko atu ʻi he 33 T.S., naʻe lakalakaimonū ai ʻa e ʻIsileli fakalaumālie ʻo e ʻOtuá, ka naʻe ʻikai pehē ʻa e puleʻanga ia ʻo e ʻIsileli fakakakanó. ʻI he 66 T.S., naʻe tau ai ʻa ʻIsileli fakakakano mo Loma. ʻI he 70 T.S., naʻe ofi ke ʻikai toe ʻi ai ʻa ʻIsileli, pea naʻe tutu ʻo ʻauha ʻa Selusalema mo hono temipalé. ʻI he Penitekosi ʻo e 33 T.S., naʻe fai ai ʻe Pita ha akonaki lelei ʻi he vakai ki he meʻa fakamamahi ko ia naʻe tuʻunuku atú. ʻI hono toe hiki meia Sioelí, naʻá ne pehē: “Ko ia te ne tautapa ki he huafa ʻo e ʻEiki [“Sihová,” NW] ʻe fakamoʻui.” Ko e tokotaha Siu tāutaha naʻe pau ke ne fai ha fili fakafoʻituitui ke tautapa ki he huafa ʻo Sihová. Naʻe kau heni ʻa e tokanga ki he toe fakahinohino ko ʻeni ʻa Pita: “Mou fei mo fakatomala, pea taki taha papitaiso ʻi he huafa ʻo Sīsū ko e Misaia, ki he fakamolemole ʻo hoʻomou ngaahi angahala.” (Ngāue 2:38) Naʻe pau ke tali ʻe he kau fanongo kia Pitá ʻa Sīsū ko e Mīsaiá ia, ʻa ia naʻe liʻaki ʻe ʻIsileli ʻi hono tuʻunga ko ha puleʻangá.

⁵ Naʻe maongo lahi ki he kau anga-vaivai ʻi he ʻuluaki senitulí ʻa e ngaahi lea fakaekikite ko ia ʻa Sioelí. Kae kehe, ʻoku toe maongo lahi ange ia ʻi he ʻahó ni koeʻuhí, ʻo hangē ko ia ʻoku fakahaaʻi ʻe he ngaahi meʻa ʻoku hoko ʻi he senituli hono 20, kuo ʻi ai ha fakahoko hono ua ʻo e kikite ʻa Sioelí. Tau sio angé pe ʻoku anga-fēfē.

 6. Naʻe anga-fēfē ʻa e kamata ke ʻai ke hā mahino ʻa e ʻiloʻanga ʻo e ʻIsileli ʻo e ʻOtuá ʻi he fakaofi mai ki he 1914?

⁶ ʻI he hili ʻa e mate ʻa e kau ʻaposetoló, naʻe hoko leva ʻa e ʻIsileli ʻo e ʻOtuá ʻo fakapuliki ʻe he tea ko e lotu faka-Kalisitiane loí. Kae kehe, ʻi he lolotonga ʻa e taimi ʻo e ngataʻangá, ʻa ia naʻe kamata ʻi he 1914, naʻe toe hoko ʻo hā mahino mai ʻa e ʻiloʻanga ʻo e puleʻanga fakalaumālie ko ʻení. Ko e kātoa ʻo e ngaahi meʻá ni ko e fakahoko ia ʻo e talanoa fakatātā ʻa Sīsū ki he uité mo e teá. (Mātiu 13:​24-30, 36-43) ʻI he fakaofi ki he 1914, naʻe kamata ai ʻa e kau Kalisitiane paní ke fakamavaheʻi kinautolu mei Puleʻanga-Haʻa-Kalisitiane taʻeangatonu, ʻo siʻaki loto-toʻa ʻa ʻene ngaahi tokāteline loí pea malangaʻi ʻa e tuʻunuku ʻa e ngataʻanga ʻo e “ngaahi kuonga ʻo e Senitaile.” (Luke 21:24) Ka ko e ʻuluaki tau ʻa e māmaní, ʻa ia naʻe kamata ʻi he 1914, naʻe langaʻi hake ai ʻa e ngaahi ʻīsiu ʻa ia naʻe ʻikai te nau teuteu ki ai. ʻI he malumalu ʻo e fakafaingataʻaʻia lahi, naʻe hōloa ʻa e niʻihi, pea fakangaloku hifo ʻa e niʻihi. ʻI he 1918 naʻe fai mai pē ʻo tuku ʻenau ngāue fakamalangá.

 7. (a) Ko e hā ʻa e meʻa naʻe hoko ʻi he 1919 ʻoku meimei tatau mo e Penitekosi ʻo e 33 T.S.? (e) Kamata ʻi he 1919, ko e hā ʻa hono ola ʻo hono lilingi hifo ʻa e laumālie ʻo e ʻOtuá ki he kau sevāniti ʻa Sihová?

⁷ Ka, naʻe ʻikai ke tolonga ia ʻo fuoloa. Kamata ʻi he 1919, naʻe kamata ke huaʻi hifo ʻe Sihova ʻa hono laumālié ki hono kakaí ʻi ha founga ne fakamanatu ai ki he ʻatamaí ʻa e Penitekosi ʻo e 33 T.S. Ko hono moʻoní, ʻi he 1919 naʻe ʻikai ke fai ai ha lea kehekehe pea naʻe ʻikai ke mumuhu ai ha tuʻoni matangi ia. ʻOku mahino kiate kitautolu mei he ngaahi lea ʻa Paula naʻe hiki ʻi he 1 Kolinito 13:8 ko e taimi ki he ngaahi maná naʻe fuoloa pē ʻene ʻosi atu ʻana. Ka neongo ia, naʻe hā mahino ʻa e laumālie ʻo e ʻOtuá ʻi he 1919, ʻi ha fakataha-lahi ʻi Cedar Point, Ohio, U.S.A., ʻi hono toe fakaivimālohiʻi ai ʻa e kau Kalisitiane anga-tonú pea toe kamata ai ʻa e ngāue ko hono malangaʻi ʻa e ongoongo lelei ʻo e Puleʻangá. ʻI he 1922 naʻa nau foki ai ki Cedar Point pea naʻe fakalotomāfanaʻi ai ʻe he kole “Tuʻuaki, tuʻuaki, tuʻuaki, ʻa e Tuʻí mo hono puleʻangá.” Hangē pē ko ia naʻe hoko ʻi he ʻuluaki senitulí, naʻe pau ai ki he māmaní ke nau lāuʻilo ki he ngaahi ola ʻo hono huaʻi hifo ʻa e laumālie ʻo e ʻOtuá. Ko e kau Kalisitiane ʻosi fakatapui kotoa pē​—tangata mo e fefine, taʻumotuʻa mo e kei siʻi—naʻe kamata ke nau “palōfisai,” ʻa ia, ko hono talaki “ʻa e ngaahi meʻa lalahi ʻa e ʻOtua.” (Ngāue 2:11) ʻI he hangē ko Pitá, naʻa nau enginaki ki he kau anga-vaivaí: “Mou tuku kimoutolu ke fakamoʻui mei he faʻahinga angakehe ko eni.” (Ngāue 2:40) Naʻe lava fēfē ke fai ia ʻe he faʻahinga naʻa nau talí? ʻAki ʻa e tokanga ki he ngaahi lea ʻa Sioeli ʻoku hā ʻi he Sioeli 2:32: “Ko ia ʻoku tautapa ki he huafa ʻo Sihova ʻe fakahaofi.”

 8. Kuo anga-fēfē ʻa e fakalakalaka ʻa e ngaahi meʻá ki ʻIsileli ʻo e ʻOtuá talu mei he 1919?

⁸ Talu mei he muʻaki ngaahi taʻu ko iá, mo e laka ki muʻa ʻa e ngaahi meʻa ʻa e ʻIsileli ʻo e ʻOtuá. ʻOku hā naʻe laka lelei ki muʻa ʻa hono silaʻi ʻo e kau paní, pea talu mei he 1930 tupu mo e hā mai ai ha fuʻu kakai lahi ʻo e kau anga-vaivaí mo ha ʻamanaki ki he māmaní. (Fakahā 7:​3, 9) ʻOku ongoʻi ʻe he faʻahingá ni kotoa ha ongoʻi ʻo e fakavavevavé, he ʻoku fakahaaʻi ʻe he fakahoko hono ua ʻo e Sioeli 2:​28, 29 ʻoku tau ofi ki ha toe ʻaho fakalilifu lahi ange ʻo Sihova, ʻa ia ʻe fakaʻauha ai ʻa e fokotuʻutuʻu ʻo e ngaahi meʻa fakalotu, fakapolitikale, mo e fakakomēsiale ʻi māmani lahí. ʻOku tau maʻu ʻa e ʻuhinga kotoa ke ‘tautapa ki he huafa ʻo Sihová’ ʻi he tui kakato te ne fakahaofi kitautolu!

Anga-Fēfē ʻEtau Tautapa ki he Huafa ʻo Sihová?

 9. Ko e hā ʻa e niʻihi ʻo e ngaahi meʻa ʻoku kau ʻi he tautapa ki he huafa ʻo Sihová?

⁹ Ko e hā ʻoku kau ʻi he tautapa ki he huafa ʻo Sihová? ʻOku tokoniʻi kitautolu ʻe he potutohi ʻo e Sioeli 2:​28, 29 ke tali ʻa e fehuʻi ko iá. Ko e fakatātaá, ʻoku ʻikai fakaongo mai ʻa Sihova ki he tokotaha kotoa pē ʻoku ui kiate ia. Fakafou ʻi ha palōfita ʻe taha, ko ʻAisea, naʻe pehē ʻe Sihova ki ʻIsileli: “Ka mou ka fola nima hake, te u hanga kehe meiate kimoutolu; ʻio, ka mou ka fakalahi lotu, ʻe ʻikai te u fakaongo.” Ko e hā naʻe fakafisi ai ʻa Sihova ke fakaongo mai ki hono puleʻangá tonu? ʻOku fakamatalaʻi mai ʻe ia tonu: “Ko homou nima na ʻoku totoʻia.” (Aisea 1:15) ʻE ʻikai ke fakaongo mai ʻa Sihova ki ha taha pē ʻoku halaia ʻi he totó, pe ʻoku faiangahala. Ko e ʻuhinga ia naʻe tala ai ʻe Pita ki he kau Siu ʻi he Penitekosí ke nau fakatomalá. ʻI he potutohi ʻo e Sioeli 2:​28, 29, ʻoku tau ʻilo ai ʻoku toe fakamamafaʻi ʻe Sioeli ʻa e fakatomalá. Ko e fakatātaá, ʻi he Sioeli 2:​12, 13, ʻoku tau lau ai: “Pea naʻa mo e taimi ni​—ko Sihova ia mei he Taʻehamai​—mou matuʻaki tafoki kiate au ʻaki ʻa e kotoa ʻo homou loto, pea ʻaki ʻa e ʻaukai, pea ʻaki ʻa e tangi, pea ʻaki ʻa e tangilaulau: pea hae homou loto, ʻo ʻikai ko homou kofu, pea mou foki kia Sihova ko homou ʻOtua; he ko e Angalelei ia mo e ʻAloʻofa, Tuai-ki-he-houhau, pea Fonu-ʻi-he-kelesi.” Kamata ʻi he 1919, naʻe ngāue ai ʻa e kau Kalisitiane paní ʻo fehoanaki mo e ngaahi leá ni. Naʻa nau fakatomala mei heʻenau ngaahi tōnounoú pea fakapapauʻi ke ʻoua ʻaupito naʻa toe hoko ʻo fakangaloku pe hōloa. Naʻe fakaava ai ʻe he meʻá ni ʻa e hala ki he laumālie ʻo e ʻOtuá ke lilingi hifo. Ko e tokotaha tāutaha kotoa pē ʻoku loto ke tautapa ki he huafa ʻo Sihová pea ke ongoʻi, kuo pau ke muimui he ʻalunga tatau.

10. (a) Ko e hā ʻa e fakatomala moʻoní? (e) ʻOku anga-fēfē ʻa e tali ʻa Sihova ki he fakatomala moʻoní?

¹⁰ Manatuʻi, ko e fakatomala moʻoní ʻoku mahulu hake ia mei he pehē pē, “ʻOku ou kole fakamolemole atu.” Naʻe faʻa angaʻaki ʻe he kau ʻIsilelí ke hae hifo honau ngaahi kofú ke fakahaaʻi ʻa hono lahi ʻo ʻenau ongoʻí. Ka ʻoku pehē ʻe Sihova: “Hae homou loto, ʻo ʻikai ko homou kofu.” Ko e fakatomala moʻoní ʻoku haʻu ia mei he lotó, mei he loloto ʻo ʻetau moʻuí. ʻOku kau ki ai ʻa ʻetau sītuʻa mei he faihalá, ʻo hangē ko ia ʻoku tau lau ʻi he Aisea 55:7: “Ke liʻaki ʻe he angahala hono ʻalunga, mo e tangata kovi ʻene ngaahi fakakaukau: Pea ke ne foki ki he ʻEiki [“Sihova,” NW].” ʻOku kau ai ʻa e fehiʻa ki he angahalá, ʻo hangē tofu pē ko ia naʻe fai ʻe Sīsuú. (Hepelu 1:9) Hili iá, ʻoku tau falala leva kia Sihova te ne fakamolemoleʻi kitautolu ʻo fakatuʻunga ʻi he feilaulau huhuʻí koeʻuhi ko Sihová ʻoku “angalelei ia mo e ʻaloʻofa, tuai-ki-he-houhau, pea fonu-ʻi-he-kelesi.” Te ne tali ʻetau founga-lotú, ʻetau feilaulau-meʻakaí mo e feilaulau-meʻainú. Te ne fakaongo ʻi he taimi ʻoku tau tautapa hake ai ki hono huafá.​—Sioeli 2:14.

11. Ko e hā ʻa e tuʻunga ʻoku totonu ke ʻi ai ʻa e lotu moʻoní ʻi heʻetau moʻuí?

¹¹ ʻI he Malanga ʻi he Moʻungá, naʻe ʻomai ai ʻe Sīsū kiate kitautolu ha toe meʻa ke tau manatuʻi, ʻi heʻene pehē: “Mou kumi muʻa ki hono puleʻanga, mo e maʻoniʻoni aʻana.” (Mātiu 6:33) Ko ʻetau founga-lotú ʻoku ʻikai ko ha meʻa ke vakai fakamaʻamaʻa ki ai, ʻo hangē ha meʻa ke kehe pē ke fai ke fakafiemālieʻi ai hotau konisēnisí. Ko hono tauhi ʻa e ʻOtuá ʻoku tuha ia ke fakamuʻomuʻa ʻi heʻetau moʻuí. Ko ia, fakafou ʻia Sioeli, ʻoku hoko atu ʻa Sihova ʻo pehē: “Mou ifi talupite ʻi Saione . . . Fakatefua mai ʻa e kakai, tuʻutuʻuni ha fakataha fakasiasi; tanaki ʻa mātuʻa, fakatefua mai ʻa e tamaiki mo e kei huhu: Ke haʻu ʻa e tangata taʻane mei hono loki, mo e taʻahine mei hono leke.” (Sioeli 2:​15, 16) ʻOku fakaenatula pē ia ki he ongo meʻa toki mali foʻoú ke na fetākiekinaʻaki, ʻo na fetokangaʻaki pē kiate kinaua. Ka naʻa mo kinaua, kuo pau ke muʻomuʻa ʻa e tauhi ia ʻo Sihová. ʻOku ʻikai totonu ke toe muʻomuʻa ha meʻa ia ʻi heʻetau hoko ʻo fakatahatahaʻi ki hotau ʻOtuá, ʻi he tautapa ki hono huafá.

12. Ko e hā ʻa e tupu ʻoku ʻamanekina ʻa ia ʻoku hā ʻi he fakamatala ʻo e Fakamanatu ki he taʻu kuo ʻosí?

¹² ʻI he fakakaukau ki he meʻá ni, tau vakai ange ki ha fika ʻoku fakahaaʻi ʻe he Fakamatala Ngāue Fakataʻu ʻa e Kau Fakamoʻoni ʻa Sihová he 1997. Naʻe aʻusia ha tumutumu foʻou ʻi he taʻu kuo ʻosí ko e toko 5,599,931 ʻa e kau malanga ʻo e Puleʻangá​—ko ha fuʻu kakai tokolahi moʻoni ʻo e kau fakahīkihikí! Ko e maʻu ʻo e Fakamanatú naʻe toko 14,322,226​—ko e toko valu mo e konga miliona nai ʻoku lahi hake ʻaki ʻi he tokolahi ʻo e kau malangá. ʻOku fakahaaʻi ʻe he fika ko iá ha tupulahi fakaofo ʻoku ʻamanekina. Ko e tokolahi ʻo e toko valu mo e konga miliona ko iá ʻoku nau ʻosi ako ʻa e Tohitapú mo e Kau Fakamoʻoni ʻa Sihová ʻi he tuʻunga ko e faʻahinga mahuʻingaʻia, pe ko e fānau ʻa e ngaahi mātuʻa ʻosi papitaiso. Ko e fuʻu tokolahi, ko ʻenau ʻuluaki maʻu fakatahá ia. Ko ʻenau ʻi aí naʻe maʻu ai ʻe he Kau Fakamoʻoni ʻa Sihová ha faingamālie lelei ke ʻilo lelei ange ai kiate kinautolu mo tuʻuaki atu ke tokoniʻi kinautolu ke nau fai ha fakalakalaka lahi ange. Pea, naʻe ʻi ai mo e faʻahinga ʻoku nau maʻu ʻa e Fakamanatú ʻi he taʻu taki taha pea maʻu nai mo e ngaahi fakataha kehé, ka ʻoku ʻikai te nau fai ha fakalakalaka lahi ange. Ko hono moʻoní, ko e faʻahinga peheé ʻoku mātuʻaki talitali lelei kinautolu ke nau maʻu ʻa e ngaahi fakatahá. Ka ʻoku tau enginaki kiate kinautolu ke nau fakalaulauloto fakalelei ki he ngaahi lea fakaekikite ʻa Sioelí pea fakakaukau ki he toe ngaahi sitepu lahi ange kuo pau ke nau fou ai ke fakapapauʻi ʻe fakaongo mai ʻa Sihova ʻi he taimi ʻoku nau tautapa hake ai ki hono huafá.

13. Kapau kuo tau ʻosi tautapa ki he huafa ʻo Sihová, ko e hā ʻa e fatongia ʻoku tau maʻu ke fai ki he niʻihi kehé?

¹³ Naʻe fakamamafaʻi ʻe he ʻaposetolo ko Paulá ʻa e toe tafaʻaki ʻe taha ʻo e tautapa ki he huafa ʻo e ʻOtuá. ʻI heʻene tohi ki he kau Lomá, naʻá ne hiki ai ʻa e ngaahi lea fakaekikite ʻa Sioelí: “ʻIlonga ʻa ia ʻe tautapa ki he huafa ʻo e ʻEiki [“Sihová,” NW] ʻe fakamoʻui.” Naʻá ne fakaʻuhinga leva: “Te nau lava fefe ke tautapa ki ha toko taha ʻoku teʻeki ke nau tui ki ai? pea te nau lava fefe ke tui ki ha toko taha kuo teʻeki ke nau fanongo ki ai? pea fefe haʻanau fanongo ʻoka ʻikai ha taha ke malanga?” (Loma 10:​13, 14) ʻIo, ko e tokolahi kehe ko ia ʻoku aʻu mai ki he taimí ni kuo teʻeki ke nau hoko ʻo ʻilo kia Sihová ʻoku fiemaʻu ke nau tautapa ki hono huafá. Ko e faʻahinga kuo nau ʻosi ʻilo ʻa Sihová ʻoku nau maʻu ʻa e fatongia ʻo ʻikai ko e malanga pē, ka ke toe kakapa atu ʻo foaki kiate kinautolu ʻa e tokoni ko iá.

Ko ha Palataisi Fakalaumālie

14, 15. Ko e hā ʻa e ngaahi tāpuaki fakapalataisi ʻoku fiefia ai ʻa e kakai ʻa Sihová koeʻuhi ko ʻenau ui ki hono huafá ʻi ha founga ʻoku fakahōifua kiate iá?

¹⁴ Ko e anga ia ʻo e vakai fakatouʻosi ʻa e kau paní mo e fanga sipi kehé ki he ngaahi meʻá, pea ko hono olá, ʻoku tāpuakiʻi kinautolu ʻe Sihova. “Toki kamata fuaʻa ʻa Sihova koeʻuhi ko hono fonua, ʻo ne manavaʻofa ki hono kakai.” (Sioeli 2:18) ʻI he 1919, naʻe fakahāhā ai ʻe Sihova ʻa e fuaʻa mo e manavaʻofa ki hono kakaí ʻi heʻene toe fakafoki kinautolu mo ʻomai kinautolu ki hono nofoʻanga ʻo e ngāue fakalaumālié. Ko ha palataisi fakalaumālie moʻoni ʻeni, naʻe fakamatalaʻi lelei ʻe Sioeli ʻi he ngaahi leá ni: “Kelekele, ʻoua ʻe manavahe; tomeʻe mo fakafiefia; he ʻoku fai meʻa lalahi ʻe Sihova. Fanga manu ʻo e vao, ʻoua ʻe manavahe; he ʻoku fisiki mai ʻa e ngaahi kaikaiʻanga ʻi he toafa; seuke, ʻoku fakatupu fua ʻa e ʻakau, ʻoku tukuna atu ʻe he fiki mo e vaine ʻenau malohi. Mo siʻi hako ʻo Saione, mou tomeʻe mo fakafiefia ʻia Sihova ko homou ʻOtua: he ʻoku ne ʻatu kiate kimoutolu ʻa Vaimuʻa ʻi he totonu, ʻio te ne hifo kiate kimoutolu ʻa e ʻuha, ʻa Vaimuʻa mo Vaimui he ʻuluaki mahina. Pea ʻe fonu uite ʻa e ngaahi ʻauʻauʻanga, pea ʻe fonu mahua ʻa e ngaahi sima ʻi he uaine mo e lolo.”​—Sioeli 2:​21-24.

¹⁵ He fakamatala fakaefakatātā mālie ē! Ko e ngaahi tokonaki ʻo e maʻuʻanga tefito ʻe tolu ʻo e moʻui ʻi ʻIsilelí​—uite, lolo ʻōlive, mo e uaine—fakataha mo e ngaahi tākanga lahi fakaʻulia. ʻOku fakahoko moʻoni ʻi hotau taimí ʻa e ngaahi lea fakaekikite ko iá ʻi ha founga fakalaumālie. ʻOku tokonaki mai ʻe Sihova kiate kitautolu ʻa e meʻakai fakalaumālie kotoa ʻoku fiemaʻu kiate kitautolú. ʻIkai ʻoku tau fiefia kotoa ʻi ha foaki lahi fau pehē mei he ʻOtuá? ʻOku moʻoni, ʻo hangē ko ia naʻe tomuʻa tala ʻe Malakaí, ko hotau ʻOtuá kuó ne ‘tangaki ʻa e ngaahi katupa ʻo e langí, ʻo vakili ʻa e tapuaki kiate kitautolu, kaeʻoua ke ʻikai hao.’​—Malakai 3:10.

Ko e Ngataʻanga ʻo ha Fokotuʻutuʻu ʻo e Ngaahi Meʻá

16. (a) Ko e hā ʻoku fakahaaʻi ki hotau taimí ʻe he lilingi hifo ʻo e laumālie ʻo Sihová? (e) Ko e hā ʻoku tukutauhi mai ʻe he kahaʻú?

¹⁶ Ko e hili ia ʻo hono tomuʻa tala ʻa e tuʻunga fakapalataisi ʻo e kakai ʻa e ʻOtuá pea kikite ʻa Sioeli ʻo fekauʻaki mo hono lilingi hifo ʻo e laumālie ʻo Sihová. ʻI he taimi naʻe lave ai ʻa Pita ki he kikite ko ʻení ʻi he Penitekosí, naʻá ne pehē naʻe fakahoko ia “ʻi he kuonga fakamui.” (Ngāue 2:17) Ko hono lilingi hifo ʻo e laumālie ʻo e ʻOtuá ʻi he taimi ko iá naʻe ʻuhinga ia naʻe kamata ai ʻa e ngaahi ʻaho fakaʻosi ki he fokotuʻutuʻu ʻo e ngaahi meʻa faka-Siú. Ko hono huaʻi hifo ʻa e laumālie ʻo e ʻOtuá ki he ʻIsileli ʻo e ʻOtuá ʻi he senituli hono 20 ʻoku ʻuhinga iá ʻoku tau moʻui ʻi he ngaahi ʻaho fakaʻosi ʻo e fokotuʻutuʻu ʻo e ngaahi meʻa ʻi māmani lahí. ʻI he vakai atu ki he meʻá ni, ko e hā ʻoku tukutauhi mai ʻe he kahaʻú? ʻOku hoko atu ʻa e kikite ʻa Sioelí ʻo tala mai kiate kitautolu: “Te u ʻai ʻa e ngaahi meʻa fakaofo ʻi he langi pea ʻi mamani, ko e toto, mo e afi, mo e ngaahi pou kohu. ʻE liliu ʻa e laʻa ʻo poʻuli, mo e mahina ʻo toto, ʻi he tei hoko ʻa e ʻaho ʻo Sihova, ʻa e ʻaho lahi mo fakalilifu.”​—Sioeli 2:​30, 31.

17, 18. (a) Ko e hā ʻa e ʻaho fakalilifu ʻo Sihova naʻe hoko ki Selusalemá? (e) ʻOku hanga ʻe he papau ʻo e ʻaho fakalilifu ʻo Sihova ʻi he kahaʻú ʻo ueʻi kitautolu ke fai ʻa e hā?

¹⁷ ʻI he 66 T.S., naʻe kamata ke hoko ʻo moʻoni ai ʻa e ngaahi lea fakaekikité ni ʻi Siutea ʻi he ngaʻunu mālohi atu ʻa e ngaahi meʻá ki he tumutumu ko e ʻaho fakalilifu ʻo Sihová ʻi he 70 T.S. He fakamanavahē ē ka ko e taimi ko iá ke ʻi he lotolotonga ai ʻo e faʻahinga ʻoku ʻikai te nau fakahīkihikiʻi ʻa e huafa ʻo Sihová! ʻI he ʻahó ni, ʻoku fakamanavahē pehē tofu pē ʻa e ngaahi meʻa ʻoku toka mai mei muʻá, ʻi he taimi ʻe fakaʻauha ai ʻi he toʻukupu ʻo Sihová ʻa e fokotuʻutuʻu ʻo e ngaahi meʻa ʻo e māmaní fakalukufua. Ka, ʻoku kei malava pē ke hao mei ai. ʻOku hoko atu ʻa e lau ʻa e kikité: “ʻE hoko ʻo pehe, ko ia ʻoku tautapa ki he huafa ʻo Sihova ʻe fakahaofi: he ai ha kau hao ʻi Moʻunga Saione mo Selusalema, ʻo hange ko e folofola ʻa Sihova, pea ʻe ʻi he kau toe ʻa kinautolu ʻoku ui ʻe Sihova.” (Sioeli 2:32) ʻOku houngaʻia moʻoni ʻa e Kau Fakamoʻoni ʻa Sihová ʻi he ʻilo ki he huafa ʻo Sihová, pea kuo nau maʻu ʻa e falala kakato te ne fakahaofi kinautolu ʻi he taimi te nau tautapa hake ai kiate iá.

¹⁸ Neongo ia, ko e hā ʻe hokó ʻi he taimi ʻe patō ai ʻi he māmani ko ʻení ʻa e ʻaho lahi mo ʻilonga ʻo Sihová ʻi he kotoa ʻo hono houhaú? ʻE lāulea ki ai ʻi he kupu ako fakaʻosí.

ʻOkú Ke Manatuʻi?

◻ Naʻe ʻuluaki huaʻi hifo ʻe Sihova ʻa hono laumālié ki heʻene kakaí ʻanefē?

◻ Ko e hā ʻa e niʻihi ʻo e ngaahi meʻa ʻoku kau ʻi he tautapa ki he huafa ʻo Sihová?

◻ Naʻe hoko hifo ʻanefē ʻa e ʻaho lahi mo ʻilonga ʻo Sihová ki ʻIsileli fakakakanó?

◻ ʻOku anga-fēfē ʻa hono tāpuakiʻi ʻe Sihova ʻa e faʻahinga ʻoku nau tautapa ki hono huafá he ʻaho ní?

[Fakatātā ʻi he peesi 15]

Naʻe fanauʻi ha puleʻanga foʻou ʻi he Penitekosi ʻo e 33 T.S.

[Fakatātā ʻi he peesi 16, 17]

ʻI he kamata mai ʻa e senituli ko ʻení, naʻe toe lilingi hifo ai ʻe Sihova ʻa hono laumālié ki heʻene kakaí ʻi hono fakahoko ʻo e Sioeli 2:​28, 29

[Fakatātā ʻi he peesi 18]

Kuo pau ke tokoniʻi ʻa e kakaí ke nau tautapa ki he huafa ʻo Sihová