Kau Tauhi-Sipi ʻe Toko Fitu, Kau Tangata Tuʻu-ki-Muʻa ʻe Toko Valu—Ko ʻEne ʻUhinga kia Kitautolu he ʻAho Ní

“Te tau fokotuu kiate ia ae kau tauhi sibi e toko fitu, moe kau tagata tuu ki mua e toko valu.”—MAI. 5:5, PM.

ʻE LAVA KE KE TALI?

Naʻe anga-fēfē hono fakahaaʻi ʻe Hesekaia, ʻAisea, Maika, mo e kau tangata tuʻu-ki-muʻa ʻo Selusalemá ko ha kau tauhi-sipi lelei kinautolú?

Ko hai ʻa e kau tauhi-sipi ʻe toko fitu mo e kau tangata tuʻu-ki-muʻa ʻe toko valú he ʻahó ni? ʻI he ngaahi founga fē ʻoku nau tokoniʻi ai ʻa e kakai ʻa e ʻOtuá?

Ko e hā ʻa e meʻa mahuʻinga taha ʻe lava ke ke fai he taimí ni ke mateuteu ai ki he ʻohofi ʻi he kahaʻú ʻo e kakai ʻa e ʻOtuá?

 1. Ko e hā naʻe ʻikai lavameʻa ai ʻa e palani ʻa e tuʻi ʻo Sīlia mo ʻIsilelí?

ʻI HE senituli hono valu ki muʻa ʻia Kalaisí, ʻi he vahaʻa ʻo e taʻu 762 mo e 759 nai, ko e tuʻi ʻo ʻIsilelí mo e tuʻi ʻo Sīliá naʻá na kamata ha faitau mo e puleʻanga ʻo Siutá. Naʻá na loto ke ʻohofi ʻa Selusalema, toʻo ʻa ʻĀhasi mei he tuʻí, pea fakanofo ha tangata ʻe taha ke tuʻi, ko ha taha nai naʻe ʻikai mei he fāmili ʻo Tuʻi Tēvitá. (ʻAi. 7:5, 6) Ka ko e palani ko iá naʻe ʻikai lavameʻa. Naʻe talaʻofa ʻe Sihova ʻe ʻi ai maʻu pē ha taha mei he fāmili ʻo Tēvitá ke pule ko ha tuʻi. Pea ko e meʻa ʻoku folofolaʻaki ʻe Sihová ʻe hoko moʻoni maʻu pē.—Sios. 23:14; 2 Sām. 7:16.

2-4. Naʻe anga-fēfē hono fakahoko ʻa e ʻAisea 7:14, 16 (a) ʻi he senituli hono valu ki muʻa ʻia Kalaisí? (e) ʻi he taimi ʻo Sīsuú?

² ʻI he kamatá, naʻe hā ngali ʻe ikuna ʻa Sīlia mo ʻIsileli ʻi he taú. ʻI he foʻi faitau ʻe taha, naʻe mole ai ʻa e kau sōtia ʻe toko 120,000 ʻa ʻĀhasi! Pea ko hono foha tonu ko Maʻaseiá naʻe tāmateʻi. (2 Kal. 28:6, 7) Ka naʻe ʻafioʻi ia ʻe Sihova. Naʻá ne manatuʻi ʻene talaʻofa kia Tēvitá pea naʻá Ne ʻoatu ʻa e palōfita ko ʻAiseá mo ha pōpoaki mātuʻaki fakalototoʻa.

³ Naʻe pehē ʻe ʻAisea: “Vakai, e tuituia ae tāuboou, bea e faeleʻi ae tama, bea e ui hono huafa ko Imanuela.” Naʻá ne tānaki mai: “I he heeki ke ilo e he tamajii ke jiaki ae kovi, bea fili ae lelei, e mole mei he fonua oku ke fehia ki ai a hono ogo tuʻi e toko ua.” (ʻAi. 7:14, 16, PM) Ko e moʻoni ko e ʻuluaki konga ʻo e kikite ko ení ʻoku ʻuhinga ia ki hono fanauʻi ʻo e Mīsaiá. (Māt. 1:23) Ka naʻe ʻikai ke ʻohofi ʻe he tuʻi ʻo Sīlia mo ʻIsilelí ʻa Siuta ʻi he taimi ʻo Sīsuú, ko ia ko e kikite fekauʻaki mo ʻImānuelá kuo pau pē naʻe toe ʻi ai hano fakahoko ʻi he taimi ʻo ʻAiseá. Ko e hā ia?

⁴ Hili pē hono fai ʻe ʻAisea ʻa e fanongonongo ko iá, naʻe feitama hono uaifí. Naʻe fakahingoa hona fohá ko Meha-sala-hase-pase. Ko e kiʻi tama ko ení ko e “Imanuela” nai ia naʻe lea ʻa ʻAisea fekauʻaki mo iá.a ʻI he ngaahi taimi ʻo e Tohi Tapú, ʻe ʻoange nai ki ha kiʻi tama ha hingoa ʻe taha ʻi hono fanauʻí, ko ha fakamanatu nai ʻo ha meʻa makehe ʻe niʻihi, kae uiʻaki ia ha hingoa kehe ʻe heʻene ongo mātuʻá mo e ngaahi kāingá. (2 Sām. 12:24, 25) Heʻikai lava ke tau pehē naʻe faifai ange ʻo uiʻaki ʻa Sīsū ʻa e ʻImānuelá.—Lau ʻa e ʻAisea 7:14, PM; 8:3, 4.

 5. Ko e hā ʻa e fili fakavalevale naʻe fai ʻe Tuʻi ʻĀhasí?

⁵ Lolotonga ʻa e hangataha ʻa ʻIsileli mo Sīlia ki Siutá, naʻe toe palani mai mo e puleʻanga ʻAsīliá ia ke ikunaʻi ʻa e vahefonuá. Ko ʻAsīliá ko ha puleʻanga fakaaoao pea naʻe fakaʻaʻau ke nau toe mālohi ange. Fakatatau ki he ʻAisea 8:3, 4, ʻe lava ke ikunaʻi ʻe ʻAsīlia ʻa Sīlia mo ʻIsileli ki muʻa ke ʻohofi ʻa Siutá. Ko ʻĀhasi, ʻa e tuʻi ʻo Siutá, naʻe totonu ke ne falala ki he folofola ʻa e ʻOtuá fakafou ʻia ʻAiseá. ʻI hono kehé, naʻá ne fai ha aleapau fakavalevale mo e kau ʻAsīliá. Ko hono olá, naʻe hoko ki mui ʻa e kau ʻAsīliá ko ha kau pule anga-kakaha ki Siuta. (2 Tuʻi 16:7-10) ʻI he tuʻunga ko ha tauhi-sipi, pe taki ʻo Siutá, naʻe totonu ke maluʻi ʻe ʻĀhasi ʻa hono kakaí. Ka naʻe ʻikai ke ne pehē. ʻE lava ke tau ʻeke hifo kia kitautolu, ‘ʻI he taimi ʻoku ʻai ai ke u fai ha ngaahi fili mahuʻinga, ʻoku tuku ʻeku falalá ʻi he ʻOtuá pe ʻi he tangatá?’—Pal. 3:5, 6.

KO HA TAUHI-SIPI FOʻOU ʻOKU KEHE ʻENE NGĀUÉ

 6. Naʻe anga-fēfē ʻa e kehe ʻa Hesekaia meia ʻĀhasí?

⁶ Naʻe mate ʻa ʻĀhasi ʻi he taʻu 746 ki muʻa ʻia Kalaisí, pea naʻe hoko hono foha ko Hesekaiá ʻo fetongi ia ʻi he tuʻí. Naʻe masiva he taimi ko ení ʻa e kakai ʻo Siutá, pea tuku ʻenau lotu kia Sihová. Ko e hā ʻa e fuofua meʻa ʻe fai ʻe Hesekaia ʻi he tuʻunga ko ha tuʻí? Te ne feinga ke ʻai ʻa e puleʻangá ke toe tuʻumālie? ʻIkai. Naʻe ʻofa ʻa Hesekaia kia Sihova pea ko ha tauhi-sipi lelei ia ʻo e puleʻangá. Ko e fuofua meʻa naʻá ne faí ko ʻene tokoniʻi ʻa e kakaí ke nau toe lotu kia Sihova. ʻI he taimi naʻá ne mahinoʻi ai ʻa e meʻa naʻe fiemaʻu ʻe he ʻOtuá ke ne faí, naʻe talangofua leva ʻa Hesekaia. Naʻá ne fokotuʻu mai ai ha faʻifaʻitakiʻanga lelei ʻaupito kia kitautolu!—2 Kal. 29:1-19.

 7. Ko e hā naʻe fiemaʻu ai ʻe he kau Līvaí ʻa e poupou ʻa e tuʻi foʻoú?

⁷ Naʻe maʻu ʻe he kau Līvaí ʻa e fatongia mafatukituki ke tokoniʻi ʻa e kakaí ke nau toe lotu kia Sihova. Ko ia naʻe fakataha ʻa Hesekaia mo e kau Līvaí pea palōmesi ange te ne poupouʻi kinautolu. Ko e kau Līvai faitōnunga ʻi he fakataha ko iá naʻa nau tangi fiefia nai ʻi heʻenau fanongo ki he meʻa naʻe leaʻaki ʻe he tuʻí: “Kuo fili kimoutolu ʻe he ʻEiki he taka ʻi hono ʻao, ke fai hono tauhi; ʻio, ke mou hoko ko ʻene kau tauhi.” (2 Kal. 29:11) Naʻe maʻu ʻe he kau Līvaí ha fekau māʻalaʻala ke tokoniʻi ʻa e kakaí ke nau lotu ki he ʻOtua moʻoní!

 8. Ko e hā ha toe meʻa naʻe fai ʻe Hesekaia ke tokoni ki he kakaí ke nau toe lotu kia Sihova? Ko e hā ʻa e olá?

⁸ Naʻe fakaafeʻi ʻe Hesekaia ʻa e kakai kotoa ʻo Siuta mo ʻIsilelí ki ha fuʻu kātoanga Pāsova. Hili ʻa e Pāsová, naʻe kātoangaʻi ʻe he kakaí ʻa e Kātoanga ʻo e Mā Taʻelēvaní, ʻa ia naʻe feʻunga mo e ʻaho ʻe fitu. Naʻa nau fiefia ʻaupito ʻi he kātoangá ʻo nau kātoangaʻi ia ʻi ha toe ʻaho ʻe fitu. ʻOku tala mai ʻe he Tohi Tapú: “Naʻe lahi ʻa e fiefia ʻi Selusalema; he talu ʻa e taimi ʻo Solomone foha ʻo Tevita ko e Tuʻi Isileli kuo teʻeki ha meʻa pehe ʻi Selusalema.” (2 Kal. 30:25, 26) Kuo pau pē naʻe hoko ʻa e kātoanga ko iá ʻo mātuʻaki fakalototoʻa ki he kakaí kotoa. ʻOku tau lau ʻi he 2 Kalonikali 31:1 ʻi he ʻosi pē ʻenau kātoangá, naʻa nau “laiki ʻa e ngaahi pou, mo taaʻi ʻa e ngaahi asela, mo holoki ʻa e ngaahi ʻesi mo e ngaahi olita.” Naʻe foki ʻa e puleʻangá kia Sihova. Naʻe tokoniʻi heni kinautolu ke nau hoko ʻo mateuteu ki he ngaahi faingataʻa naʻe vave ke hokó.

TEUTEU ʻA E TUʻÍ KI HA FAINGATAʻA

 9. (a) Naʻe fakangata fēfē ʻa e ngaahi palani ʻa e kau ʻIsilelí? (e) ʻI he kamatá, ko e hā ʻa e lavameʻa ʻa Senakalipe ʻi Siutá?

⁹ Hangē ko ia naʻe leaʻaki ʻe ʻAiseá, naʻe ikunaʻi ʻe he kau ʻAsīliá ʻa e puleʻanga ʻo ʻIsilelí pea ʻave ʻa e kakaí mei honau fonuá ko ha kau pōpula. Naʻe fakangata heni ʻa e teu palani ʻa e kau ʻIsilelí ke fili ha tuʻi ki Siuta ʻa ia naʻe ʻikai mei he fāmili ʻo Tēvitá. Ka ko e hā ʻa e ngaahi palani ia ʻa e kau ʻAsīliá? Naʻa nau haʻu he taimí ni ke ikunaʻi ʻa Siuta. ʻOku pehē ʻe he Tohi Tapú: “ʻI he hongofulu ma fa taʻu ʻo Kingi Hesekaia naʻe ʻalu hake ʻa Senakalipe ko e Tuʻi Asilia ke tauʻi ʻa e ngaahi kolo Siuta naʻe ʻāʻi, ʻo ne puke ia.” Naʻe ikunaʻi ʻe Senakalipe ʻa e kolo ʻe 46 ʻo Siuta. Sioloto atu ki he anga hoʻo ongoʻí kapau naʻá ke nofo ʻi Selusalema ʻi he taimi ko iá. Naʻe ikunaʻi vave ʻaupito ʻe he kau tau ʻAsīliá ʻa e ngaahi kolo ʻo Siutá pea fakaofiofi ʻaupito atu ki ho ʻapí!—2 Tuʻi 18:13.

10. Ko e hā naʻe fakalototoʻa nai ai kia Hesekaia ʻa e kikite ʻa Maiká?

¹⁰ Naʻe ʻiloʻi ʻe Hesekaia ʻa e fakatuʻutāmakí, ka naʻe ʻikai te ne manavasiʻi mo kole tokoni ki ha puleʻanga pangani, ʻo hangē ko ia naʻe fai ʻe heʻene tamai taʻefaitōnungá, ʻa ʻĀhasi. Naʻe falala ʻa Hesekaia kia Sihova. (2 Kal. 28:20, 21) Kuo pau pē nai naʻá ne ʻiloʻi ʻa e ngaahi lea ʻa e palōfita ko Maiká, ʻa ia naʻá ne leaʻaki ki he filí, ʻa “Asilia”: “Te tau fokotuu kiate ia ae kau tauhi sibi e toko fitu, moe kau tagata tuu ki mua e toko valu. Bea te nau maumau aki ae heleta ae fonua o Asilia.” (Mai. 5:5, 6, PM) Kuo pau pē naʻe fakalototoʻa kia Hesekaia ʻa e ngaahi lea ko eni meia Sihová. ʻOku fakahaaʻi ai ʻe ngāueʻaki ʻe Sihova ha kau tau ʻikai anga-maheni ke nau ikunaʻi ʻa ʻAsīlia.

11. ʻE fai hono fakahoko mahuʻinga taha ʻa e kikite fekauʻaki mo e kau tauhi-sipi ʻe toko fitu mo e kau tangata tuʻu-ki-muʻa ʻe toko valú ʻafē?

¹¹ Ko e kikite fekauʻaki mo e kau tauhi-sipi ʻe toko fitu mo e kau tangata tuʻu-ki-muʻa ʻe toko valú ʻe fai hono fakahoko mahuʻinga tahá ʻi he hili hono fanauʻi ʻa Sīsuú, ʻa e “pule ʻo Isileli; pea ko ʻene ngaahi ʻalu atu ʻoku talu mei muʻa, mei he ngaahi ʻaho ʻo itaniti.” (Lau ʻa e Maika 5:1, 2.) Ko e moʻoni, ko e fakahoko ko ení ʻoku ʻi he kahaʻú ia, ʻi he taimi ʻe ʻohofi ai ʻe “Asilia,” pe ko e filí ʻa e kau sevāniti ʻa Sihová. Ko e hā ʻa e kau tau ʻoku taki ʻe hono ʻAló ʻe ngāueʻaki ʻe Sihova ke nau ikunaʻi ʻa e filí? Te tau tali ʻa e fehuʻi ko ení ki mui ange ʻi he kupú. Ka ko e ʻuluakí, tau sio angé ki he meʻa ʻe lava ke tau ako mei he meʻa naʻe fai ʻe Hesekaia ʻi he taimi naʻe ʻohofi ai ia ʻe he kau ʻAsīliá.

NGĀUE FAKAPOTOPOTO ʻA HESEKAIA

12. Ko e hā naʻe fai ʻe Hesekaia mo e faʻahinga naʻe ʻiate iá ke maluʻi ʻa e kakai ʻa e ʻOtuá?

¹² ʻI he taimi ʻoku tau ongoʻi ai heʻikai lava ke tau fakaleleiʻi ha palopalema, ʻoku loto-lelei maʻu pē ʻa Sihova ke ʻomai ʻa e tokoni ʻoku tau fiemaʻú. Ka ʻokú ne ʻamanekina ke tau fai ʻa e kotoa te tau malavá fekauʻaki mo e palopalemá. Naʻe fai ʻe Hesekaia ʻa e meʻa naʻá ne malavá. ʻOku tala mai ʻe he Tohi Tapú naʻá ne maʻu faleʻi mei hono “houʻeiki mo ʻene kau mafi,” pea naʻá ne fili “ke fufū ʻa e vai naʻe tafe mei he ngaahi matavai naʻe ʻi tuaʻa kolo.” Ko Hesekaiá naʻá ne toe “fakatoʻotoʻa, ʻo toe langa hake ʻa e ngaahi feituʻu ʻo e ʻa kuo holoki, pea ne ngaohi ʻi hono fungá ʻani taua, pea pehe mo e ʻa ʻe taha ki tuʻa.” Naʻe aʻu ʻo ne “ngaohi mahafu ke lahi, kaeʻumaʻa ʻa e ngaahi pa.” (2 Kal. 32:3-5) Lolotonga ʻa e taimi ko ení, naʻe ngāueʻaki ʻe Sihova ʻa Hesekaia, ko ʻene kau houʻeikí, mo e kau palōfita faitōnungá ke maluʻi mo tauhi ʻEne kakaí.

13. Ko e hā ʻa e meʻa mātuʻaki mahuʻinga naʻe fai ʻe Hesekaia ke teuteuʻi ʻa e kakaí ki he ʻohofi ʻa e kau ʻAsīliá? Naʻe anga-fēfē tokoni ʻa e ngaahi lea ʻa Hesekaiá ki he kakaí?

¹³ Hokó, naʻe fai ʻe Hesekaia ha meʻa naʻe mātuʻaki mahuʻinga ange ʻi hono maluʻi pē ʻa e vai naʻe tafe mei he ngaahi matavaí pe ʻai ke mālohi ʻa e ngaahi ʻā ʻo e koló. Koeʻuhí ko ha tauhi-sipi lelei ia, naʻá ne fakatahatahaʻi mai ʻa e kakaí pea fakalototoʻaʻi ʻaki ʻa e ngaahi leá ni: “ʻOua ʻe manavahe, pea ʻoua ʻe lotosiʻi koeʻuhi ko e Tuʻi Asilia, pe koeʻuhi ko e fuʻu hosite ʻoku haʻu mo ia; he ʻoku lahi hoʻotautolu ʻi hoʻona. ʻOku ʻiate ia ha nima kakano pe, ka ʻoku ʻiate kitautolu ʻa Sihova ko hotau ʻOtua ke tokoni kiate kitautolu, pea ke fai ʻetau tau.” Naʻe fakamanatu ʻe Hesekaia ki he kakaí ko Sihova te ne tau maʻanautolú. Naʻe tokoniʻi heni kinautolu ke nau maʻu ʻa e tui ki he ʻOtuá pea hoko ʻo loto-toʻa. Naʻe fakahaaʻi ʻe Hesekaia mo ʻene kau houʻeikí mo e kau mafí, pehē foki ki he palōfita ko Maika mo ʻAiseá ko ha kau tauhi-sipi lelei kinautolu, ʻo hangē pē ko e talaʻofa ʻa Sihova fakafou ʻi heʻene palōfitá.—2 Kal. 32:7, 8; lau ʻa e Maika 5:5, 6, PM.

14. Ko e hā naʻe leaʻaki ʻe Lapisaké? Naʻe anga-fēfē tali ʻa e kakaí?

¹⁴ Naʻe fokotuʻu ʻapitanga ʻa e tuʻi ʻo ʻAsīliá mo ʻene kau taú ʻi Lākisi, ʻi he tonga-hihifo ʻo Selusalemá. Mei aí, naʻá ne fekau atu ha talafekau ʻe toko tolu ki Selusalema ke tala ki he kakaí ke nau tukulolo. Ko e talafekau tefitó, naʻe ui ko e Lapisaké, naʻá ne lea ki he kakai ʻo Selusalemá ʻi heʻenau leá tonu. ʻUluakí naʻá ne feinga ke fakatuipauʻi kinautolu ke ʻoua te nau fanongo kia Hesekaia kae talangofua ki he kau ʻAsīliá. Pea naʻá ne loi leva ʻaki ʻene palōmesi ange ke ʻave kinautolu ki ha fonua ʻa ia ʻe lava ke nau maʻu ai ha moʻui fiemālie. (Lau ʻa e 2 Tuʻi 18:31, 32.) Naʻe toe tala ange ʻe Lapisake ko e ngaahi ʻotua ʻo e ngaahi puleʻanga kehé naʻe ʻikai malava ke nau maluʻi ʻene kau lotú pea heʻikai malava foki ʻe Sihova ke maluʻi ʻa e kau Siú. Ko e meʻa fakapotopotó, naʻe fili ʻa e kakaí ke tukunoaʻi ʻa e ngaahi loi mo e ngaahi tukuakiʻi hala ko ení. ʻI he ʻahó ni, ʻoku muimui maʻu pē ʻa e kau sevāniti ʻa Sihová ki heʻenau faʻifaʻitakiʻangá.—Lau ʻa e 2 Tuʻi 18:35, 36.

15. Ko e hā naʻe fiemaʻu ke fai ʻe he kakai ʻo Selusalemá? Naʻe anga-fēfē hono fakahaofi ʻe Sihova ʻa e koló?

¹⁵ Ko e moʻoni, naʻe loto-mamahi ʻa Hesekaia. Ka ʻi he ʻikai kole tokoni mei ha puleʻangá, naʻá ne kole tokoni kia Sihova fakafou ʻia ʻAisea. Naʻe tala ange ʻe he palōfita ko ʻAiseá kia Hesekaia: “ʻOku pehe ʻa e folofola ʻa Sihova ʻi he Tuʻi Asilia, ʻe ʻikai te ne aʻu ki he kolo ni, pea ʻe ʻikai te ne fanaʻi ha ngahau ki ai.” (2 Tuʻi 19:32) Ko e meʻa pē naʻe fiemaʻu ki he kakai ʻo Selusalemá ke nau hoko ʻo loto-toʻa pea ʻoua ʻe foʻi. ʻE tau ʻa Sihova maʻanautolu. Pea naʻá ne fai pehē! “ʻI he po ko ia naʻe ʻalu atu ʻa e angelo ʻa Sihova, ʻo ne taaʻi ʻi he ʻapitanga Asilia ha toko taha kilu ma valu mano ma nima afe.” (2 Tuʻi 19:35) Naʻe fakahaofi ʻa e kakai ʻo Selusalemá, ʻo ʻikai ʻi he meʻa naʻe fai ʻe Hesekaia ke maluʻiʻaki ʻa e koló, ka ʻi he mālohi ʻo Sihová.

LĒSONI KI HE ʻAHÓ NI

16. Ko hai ʻi he ʻahó ni ʻoku nau fakafofongaʻi (a) ʻa e kakai ʻo Selusalemá (e) ʻa “Asilia” (f) ʻa e kau tauhi-sipi ʻe toko fitu mo e kau tangata tuʻu-ki-muʻa ʻe toko valú?

¹⁶ Ko e kikite fekauʻaki mo e kau tauhi-sipi ʻe toko fitu mo e kau tangata tuʻu-ki-muʻa ʻe toko valú ʻoku fai hono fakahoko mahuʻinga tahá ʻi hotau taimí. ʻI he kuohilí, naʻe ʻohofi ʻe he kau ʻAsīliá ʻa e kakai ʻo Selusalemá. ʻE vavé ni ke toe ʻohofi ʻa e kakai ʻa Sihová ʻe “Asilia,” pe ko e filí, te ne feinga ke fakaʻauha kinautolu. ʻOku lave ʻa e Folofolá ki he ʻohofi ko iá pehē foki ki he ʻohofi ʻo ‘Koki ʻo Mekoki,’ ko e ʻohofi ʻo e “tuʻi tokelau,” mo e ʻohofi ʻo e “ngaahi tuʻi ʻo e māmaní.” (ʻIsi. 38:1 [38:2, PM], ʻIsi. 38:10-13; Tan. 11:40, 44, 45; Fkh. 17:14; 19:19) ʻOku kehekehe ʻa e ngaahi ʻohofi ko ení? ʻOku ʻikai ke tau ʻiloʻi. ʻE lava ke ngāueʻaki ʻe he Tohi Tapú ʻa e ngaahi hingoa kehekehe ke fakamatalaʻiʻaki ʻa e ʻohofi tatau. Ko e hā ʻa e kau tau ʻoku pehē ʻi he kikite ʻa Maiká ʻe ngāueʻaki ʻe Sihova ke fakafepakiʻi ʻa e fili anga-fakamamahi ko ení, ʻoku ui ko “Asilia”? Ko ha kau tau ʻikai anga-maheni ʻaupito. ʻOku pehē ʻe he Tohi Tapú ko e kau tau ko ení ʻoku faʻuʻaki ia ʻa e “kau tauhi sibi e toko fitu, moe kau tagata tuu ki mua e toko valu.” (Mai. 5:5, PM) Ko hai kinautolu? Ko e kau mātuʻa ʻi he fakatahaʻangá. (1 Pita 5:2) ʻI he ʻahó ni, ʻoku ngāueʻaki ʻe Sihova ʻa e kau mātuʻa faitōnunga tokolahi ke nau tauhi mo fakaivimālohiʻi ʻene kakaí ki he ʻohofi ʻi he kahaʻú ʻa “Asilia.”b ʻOku tala mai kia kitautolu ʻe he kikite ʻa Maiká “te nau maumau aki ae heleta ae fonua o Asilia.” (Mai. 5:6, PM) Ko e taha ʻo e ngaahi meʻatau ʻoku nau ngāueʻaki ke ikunaʻi ʻa e filí ko e “heletā ʻo e laumālié,” ʻa e Folofola ʻa e ʻOtuá.—ʻEf. 6:17; 2 Kol. 10:4.

17. Ko e hā ʻa e lēsoni ʻe fā ʻe lava ke ako ʻe he kau mātuʻá mei he fakamatala kuo tau lāulea ki aí?

¹⁷ Kau mātuʻa, ʻe lava ke ke ako ha lēsoni ʻaonga mei he meʻa kuo tau toki lāulea ki aí: (1) Ko e meʻa lelei taha ʻe lava ke ke fai ke mateuteu ai ki he ʻohofi ʻi he kahaʻú ʻa “Asilia,” ko hono fakaivimālohiʻi hoʻo tui ki he ʻOtuá pea tokoniʻi ho fanga tokouá ke nau fai ʻa e meʻa tatau. (2) ʻI he taimi ʻe ʻohofi ai kitautolu ʻe “Asilia,” kuo pau ke ke tuipau kakato ʻe fakahaofi kitautolu ʻe Sihova. (3) ʻI he taimi ko iá, ko e fakahinohino te ke maʻu mei he kautaha ʻa Sihová ʻe hā ngali kehe pe ʻikai anga-maheni. Ka ko kitautolu kotoa kuo pau ke tau mateuteu ke talangofua ki ha fakahinohino pē te tau maʻu nai, tatau ai pē pe ʻoku tau loto-tatau mo ia pe ʻikai, koeʻuhí ko e talangofua ki he ngaahi fakahinohino ko ení te ne fakahaofi ʻetau moʻuí. (4) Kapau ʻoku tuku ʻe ha niʻihi ʻenau falalá ʻi he ako fakamāmaní, ngaahi meʻa fakamatelié, pe ngaahi kautaha fakaetangatá, kuo pau ke nau liliu ʻa e anga ʻenau fakakaukaú he taimí ni. Kuo pau ke ke mateuteu ke tokoniʻi ha niʻihi pē ʻoku ʻikai nai ke tuku kakato ʻenau falalá kia Sihova.

18. ʻE lava fēfē ke tokoniʻi kitautolu ʻi he kahaʻú ʻi hono manatuʻi ʻa e fakamatala ko ení?

¹⁸ ʻE hoko mai ha taimi te tau hā ngali ʻikai ha tokoni hangē ko e kakai ʻo Selusalema ʻi he taimi ʻo Hesekaiá. ʻI he taimi ʻe hoko ai iá, ko e ngaahi lea ʻa Hesekaiá ʻe lava ke ne tokoniʻi kitautolu ke tauhi ʻetau tuí ke mālohi. Tuku ke tau manatuʻi ko hotau ngaahi filí “ʻoku ʻiate ia ha nima kakano pe, ka ʻoku ʻiate kitautolu ʻa Sihova ko hotau ʻOtua ke tokoni kiate kitautolu, pea ke fai ʻetau tau”!—2 Kal. 32:8.

[Fakamatala ʻi lalo]

[Fakatātā ʻi he peesi 16]

[Fakatātā ʻi he peesi 18]

Naʻe fakalototoʻaʻi ʻe Hesekaia ʻa e kakaí ke nau maʻu ʻa e tui pea hoko ʻo loto-toʻa (Sio ki he palakalafi 12, 13)