ʻE Lava Fēfē ke Tau Tauhi Maʻu “ha Fakakaukau Faʻa Tatali”?

“Te u fakahāhā ha fakakaukau faʻa tatali.”—MAI. 7:7, NW.

ʻE FĒFĒ HAʻO TALI?

Ko e hā ʻe lava ke tau ako mei he faʻifaʻitakiʻanga ʻa Maiká?

Ko e hā ʻa e ngaahi meʻa ʻoku tatau tatali ki aí?

Ko e hā ʻa e founga ʻe niʻihi ke fakahaaʻi ai kia Sihova ʻoku tau houngaʻia ʻi heʻene anga-kātakí?

 1. Ko e hā ʻe lava ke ne ʻai kitautolu ke tau taʻekātakí?

KO E ngaahi ʻaho fakaʻosi ʻo e fokotuʻutuʻu ʻa Sētané naʻe kamata ia ʻi he 1914 ʻi he taimi naʻe fakanofo tuʻi ai ʻa Kalaisi ʻi hēvaní. ʻI he taʻu ko iá, naʻe kamata ha tau ʻi hēvani, pea ʻi he tuʻunga ko iá naʻe lī hifo ʻe Sīsū ʻa e Tēvoló mo ʻene kau tēmenioó ki he māmaní. (Lau ʻa e Fakahā 12:7-9.) ʻOku ʻilo ʻe Sētane “ʻoku toe siʻi pē hono taimí.” (Fkh. 12:12) Ka ko e “toe siʻi” ko ení kuo lōloa atu ia ʻi he meʻa ʻoku ʻamanekina ʻe he niʻihi ʻo kitautolu. Kuo tau hoko ʻo taʻekātaki lolotonga ʻetau tatali kia Sihova ke fakangata ʻa e fokotuʻutuʻu ʻa Sētané?

 2. Ko e hā ʻa e ngaahi fehuʻi ʻe tali ʻi he kupu ko ení?

² ʻE lava ke hoko ʻo fakatuʻutāmaki ʻa e taʻekātakí. Ko e hā hono ʻuhingá? Koeʻuhí ʻi he taimi ʻoku tau taʻekātaki aí, te tau fai nai ha ngaahi meʻa ʻo ʻikai tomuʻa fakakaukau fakalelei. Ko ia, ko e hā ʻe lava ke ne tokoniʻi kitautolu ke tau maʻu ha fakakaukau faʻa tatalí? ʻE tokoniʻi kitautolu ʻe he kupu ko ení ke tali ʻa e ngaahi fehuʻi hoko haké. (1) Ko e hā ʻe lava ke tau ako fekauʻaki mo e anga-kātakí mei he faʻifaʻitakiʻanga ʻa e palōfita ko Maiká? (2) Ko e hā ʻa e ngaahi meʻa ʻe hoko ko e fakaʻilonga ia ʻo e ofi ʻa e ngataʻangá? (3) ʻE lava fēfē ke tau fakahaaʻi ʻoku tau houngaʻia ʻi he anga-kātaki ʻa Sihová?

KO E HĀ ʻE LAVA KE TAU AKO MEI HE FAʻIFAʻITAKIʻANGA ʻA MAIKÁ?

 3. Naʻe fēfē ʻa e ngaahi tuʻunga ʻi ʻIsilelí he lolotonga ʻa e taimi ʻo Maiká?

³ Lau ʻa e Maika 7:2-6. Naʻe sio ʻa e palōfita ʻa Sihova ko Maiká ki he hoko ʻa e kau ʻIsilelí ʻo hōloa ʻenau faitōnunga kia Sihová, pea lolotonga ʻa e pule ʻa Tuʻi ʻĀhasí, naʻa nau hoko ʻo mātuʻaki taʻefaitōnunga. Naʻe fakahoa ʻe Maika ʻa e kau ʻIsileli taʻefaitōnungá ki ha fuʻu ʻakau talatala ʻa ia ʻe lava ke lavea ai ha taha. Ko e kau ʻIsileli ko iá naʻa nau hangē ko e fuʻu ʻakau ko iá koeʻuhí naʻa nau ngaohikoviʻi ʻa e niʻihi kehé, ʻo fakatupu maumau kia kinautolu. Naʻe fuʻu kovi ʻa e tuʻungá naʻa mo e ngaahi mēmipa ʻo e fāmilí naʻe ʻikai te nau toe feʻofaʻaki. Naʻe mahinoʻi ʻe Maika heʻikai lava ke ne liliu ʻe ia tonu ʻa e tuʻungá, ko ia naʻá ne lotu kia Sihova ʻaki hono lotó kotoa. Naʻá ne tatali anga-kātaki leva ke ngāue mai ʻa e ʻOtuá. Naʻe fakapapauʻi ʻe Maika ʻe fakatonutonu ʻe Sihova ʻa e tuʻungá ʻi Heʻene taimi pē ʻaʻana.

 4. Ko e hā ʻa e ngaahi faingataʻa ʻoku tau maʻú?

⁴ Hangē ko Maiká, ʻoku tau moʻui foki ʻi he haʻohaʻonga ʻo e kakai siokita. Ko e tokolahi ʻoku nau “taʻehoungaʻia, taʻemateaki, ʻikai maʻu ʻa e ʻofa fakanatulá.” (2 Tīm. 3:2, 3) ʻOku ʻai nai ʻetau moʻuí ke mātuʻaki fakamafasia ʻi he taimi ʻoku fakahāhā ai ʻe hotau kaungāngāué, kaungāakó mo e kaungāʻapí ha fakakaukau siokita. Ka ko e niʻihi ʻo kitautolu ʻoku ʻi ai ha pole lahi ange. Naʻe pehē ʻe Sīsū ko hono kau muimuí ʻe fakafepakiʻi ʻe honau fāmilí. Ko ʻene ngaahi leá ʻoku meimei tatau mo e meʻa ʻoku tau lau ʻi he Maika 7:6. Naʻe pehē ʻe Sīsū: “Naʻá ku haʻu ke fakatupunga ha māvahevahe, ʻi ha tangata mo ʻene tamaí pea mo ha taʻahine mo ʻene faʻeé pea mo ha uaifi kei siʻi mo e faʻē ʻa hono husepānití. Ko e moʻoni, ʻe hoko ko e ngaahi fili ʻo ha tangata ʻa e faʻahinga ʻi hono falé tonu.” (Māt. 10:35, 36) ʻE lava ke fuʻu faingataʻa ʻi he taimi ʻoku fakakataʻaki ai mo fakafepakiʻi kitautolu ʻe he ngaahi mēmipa ʻo e fāmilí ʻa ia ʻoku ʻikai te nau tauhi kia Sihová. Kapau ko hotau tuʻungá eni, ʻoku totonu ke ʻoua te tau foʻi ʻi he tenge ko ení. Ka, kuo pau ke tau hanganaki mateaki kia Sihova pea tatali anga-kātaki kiate ia ke ne fakatonutonu ʻa e tuʻungá. Kapau ʻoku tau lotu maʻu pē ki heʻene tokoní, te ne ʻomai kia kitautolu ʻa e mālohi mo e poto ʻoku tau fiemaʻú ke hanganaki faitōnunga kiate ia.

5, 6. Naʻe anga-fēfē hono tāpuakiʻi ʻe Sihova ʻa Maiká? Ko e hā naʻe ʻikai sio ʻa Maika hono fakahokó?

⁵ Naʻe fakapaleʻi ʻe Sihova ʻa Maika ʻi heʻene anga-kātakí. Naʻe sio ʻa Maika ki he ngataʻanga ʻo e tuʻi fulikivanu ko ʻĀhasí mo ʻene pulé. Naʻá ne sio kia Hesekaia, ko e foha ʻo ʻĀhasí, ʻi heʻene hoko ʻo tuʻi pea tokoniʻi ʻa e kau ʻIsilelí ke toe fakafoki mai ʻa e lotu maʻá. Naʻe toe sio ʻa Maika ki hono fakahoko ʻa e kikite naʻá ne hiki fekauʻaki mo Samēliá ʻi he taimi naʻe ʻohofi ai ʻe he kau ʻAsīliá ʻa e puleʻanga fakatokelau ʻo ʻIsilelí.—Mai. 1:6.

⁶ Ka naʻe mate ʻa Maika ki muʻa ke ne lava ʻo sio ki hono fakahoko ʻa e kotoa ʻo e ngaahi kikite naʻe fakamānavaʻi ʻe Sihova ke ne hikí. Ko e fakatātaá, naʻe tohi ʻe Maika: “ʻI he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ia ʻi he ngaahi foʻi maʻolunga; pea ʻe tafe ki ai ʻa e ngaahi kakai. ʻIo, ʻe ōange ʻa e ngaahi puleʻanga lahi, pea te nau pehe, Haʻuā, ka tau ʻalu hake ki he moʻunga ʻo Sihova.” (Mai. 4:1, 2) Naʻe fakapapauʻi ʻe Maika ke hanganaki mateaki kia Sihova naʻa mo e maté, ʻo tatau ai pē pe ko e hā ʻa e meʻa naʻe fai ʻe he kakai takatakai ʻiate iá. Naʻá ne tohi: “Ko e ngaahi kakai katoa ʻoku nau ʻaluʻaki taki taha ʻa e huafa ʻo hono ʻotua, pea ko kitautolu te tau ʻaluʻaki ʻa e huafa ʻo Sihova ko hotau ʻOtua, ʻo lauikuonga pea taʻengata.” (Mai. 4:5) Naʻe tatali anga-kātaki ʻa Maika lolotonga ʻa e ngaahi taimi faingataʻá koeʻuhí he naʻá ne fakapapauʻi ʻe fakahoko ʻe Sihova ʻa e kotoa ʻo ʻEne ngaahi talaʻofá. Naʻe falala ʻa e palōfita faitōnungá kia Sihova.

7, 8. (a) Ko e hā ʻa e ʻuhinga ʻoku tau maʻu ke falala ai kia Sihová? (e) Ko e hā te ne ʻai ʻa e taimí ke hā ngali ʻoku vave ange ʻene ʻalú?

⁷ ʻOku tau falala kia Sihova ʻo hangē ko Maiká? ʻOku tau maʻu ʻa e ʻuhinga lelei ke fai pehē. Kuo tau sio ki hono fakahoko ʻa e kikite ʻa Maiká. Lolotonga ʻa e ngaahi ʻaho fakaʻosi ko ení, ko e kakai ʻe laui miliona mei he kotoa ʻo e ngaahi puleʻanga mo e ngaahi matakali mo e ngaahi lea kuo nau haʻu ki he “moʻunga ʻo e fale ʻo Sihova.” Neongo ʻoku nau haʻu mei he ngaahi puleʻanga ʻoku nau faʻa fetauʻaki, ko e kau lotu ko ení kuo nau “tuki huotoho ʻaki ʻenau ngaahi heleta,” pea ʻoku nau fakafisi ke “fai ha akotau.” (Mai. 4:3) Ko ha monū lahi ia ke hoko ko e taha ʻo e kakai melino ʻa Sihová!

⁸ ʻOku tau loto kotoa ke fakangata vave ʻe Sihova ʻa e fokotuʻutuʻu fulikivanu ko ení. Ka ke tau tatali anga-kātakí, ʻoku fiemaʻu ke tau fakakaukau ki he anga ʻo e fakakaukau ʻa Sihová. Kuó ne fili ʻa Sīsū Kalaisi ke fakamāuʻi ʻa e kakaí, pea kuó Ne ʻosi fokotuʻu ha ʻaho ke fai eni. (Ngā. 17:31) Ka ki muʻa ke hoko mai ʻa e ʻaho ko iá, ʻoku ʻoange ʻe he ʻOtuá ki he kakai kotoa pē ʻa e faingamālie ke maʻu “ha ʻilo totonu ki he moʻoní,” ke ngāueʻaki ʻa e meʻa ʻoku nau akó, pea hoko ʻo hao. ʻOku fiemaʻu ke tau manatuʻi ʻoku ʻi he tuʻunga fakatuʻutāmaki ʻa e ngaahi moʻuí. (Lau 1 Tīmote 2:3, 4.) ʻE vavé ni ke hoko mai ʻa e ngataʻangá. Kapau ʻoku tau femoʻuekina ʻi hono tokoniʻi ʻa e kakaí ke hoko ʻo ʻiloʻi ʻa Sihová, ʻe hā ngali ko e taimi ko ia ʻoku toé ʻoku vave ange ʻene ʻalú. Pea ʻi he taimi ʻe hoko mai ai ʻa e ngataʻangá, te tau fiefia ʻi heʻetau hanganaki femoʻuekina ʻi he ngāue fakamalangá!

KO E HĀ ʻA E NGAAHI MEʻA ʻE HOKO KO E FAKAʻILONGA IA ʻO E OFI ʻA E NGATAʻANGÁ?

9-11. Kuo fakahoko ʻa e 1 Tesalonaika 5:3? Fakamatalaʻi.

⁹ Lau ʻa e 1 Tesalonaika 5:1-3. ʻE vavé ni ke pehē ʻe he ngaahi puleʻangá “Melino mo e malu!” Kapau ʻoku ʻikai ke tau loto ke kākaaʻi kitautolu ʻe he meʻá ni, ʻoku fiemaʻu ke tau “nofoʻaki ʻāʻā mo tauhi maʻu ʻetau fakakaukau leleí.” (1 Tes. 5:6) Te tau lāulea he taimí ni ki he ngaahi meʻa ʻe niʻihi ʻoku hoko ʻa ia kuó ne teuteu ʻa e hala ki he fanongonongo mahuʻinga ko ení.

¹⁰ Hili ʻa e ongo tau ʻe ua ʻa māmaní, naʻe fiemaʻu vivili ʻe he ngaahi puleʻangá ʻa e melinó. Hili ʻa e tau ʻuluaki ʻa māmaní, naʻe fokotuʻu ʻa e Kautaha ʻa e Ngaahi Puleʻangá ke nau ʻomai ʻa e melinó. Ki mui ai, hili ʻa e tau ua ʻa māmaní, naʻe ʻamanaki ʻa e kakaí ʻe lava ke ʻomai ʻe he Ngaahi Puleʻanga Fakatahatahá ʻa e melinó. Ko e kau taki ʻo e puleʻangá mo e ngaahi lotú naʻa nau falala ki he ongo kautaha ko iá. Ko e fakatātaá, naʻe talaki ʻe he Ngaahi Puleʻanga Fakatahatahá ko e 1986 ko ha Taʻu Fakavahaʻapuleʻanga ʻo e Melinó. Ko e taʻu ko iá, naʻe fakataha ai ʻa e tokolahi ʻo e kau taki fakapolitikale mo fakalotú mo e taki ʻo e Siasi Katoliká ke lotu ki ha melino.

¹¹ Kae kehe, ko e fanongonongo ko iá mo e fanongonongo kehe hangē ko iá naʻe ʻikai ke fakahoko ai ʻa e kikite ʻi he 1 Tesalonaika 5:3 fekauʻaki mo e “melino mo e malu.” Ko e hā hono ʻuhingá? Koeʻuhí kuo teʻeki ke ‘hoko fakafokifā mai ʻa e fakaʻauhá.’

12. Ko e hā ʻoku tau ʻiloʻi fekauʻaki mo e fanongonongo ʻo e “Melino mo e malu”?

¹² Ko hai te ne fai ʻa e fanongonongo mahuʻinga ko eni ʻi he kahaʻú ʻo fekauʻaki mo e “Melino mo e malu”? Ko e hā ʻa e ngafa ʻo e kau taki lotu ʻo e Puleʻanga-Haʻa-Kalisitiané mo e ngaahi lotu kehé ʻi he meʻá ni? ʻE anga-fēfē ʻa e kaunga ki ai ʻa e ngaahi puleʻangá? ʻOku ʻikai ke tala mai ia ʻe he Tohi Tapú. Ko e meʻa ʻoku tau ʻiloʻí tatau ai pē pe ʻe anga-fēfē hono fai mo ʻene ongo fakatuipau ʻa e fanongonongo ko ení, ʻe ʻikai hoko moʻoni ʻa e “melino mo e malu.” ʻE kei puleʻi pē ʻe Sētane ʻa e fokotuʻutuʻu ko ení. ʻOku kovi fakaʻaufuli ia pea ʻe ʻikai ke liliu. ʻE hoko ʻo fakalotomamahi ʻaupito kapau ʻoku tau tui ki he fakamatala fakangalilelei fakasētane ko ení pea ʻikai hanganaki tuʻu-ʻataá!

13. Ko e hā ʻoku puke ai ʻe he kau ʻāngeló ʻa e ngaahi matangi ʻo e fakaʻauhá?

¹³ Lau ʻa e Fakahā 7:1-4. Lolotonga ʻetau tatali ke fakahoko ʻa e 1 Tesalonaika 5:3, ʻoku puke ʻe he kau ʻāngelo mālohí ʻa e ngaahi matangi fakaefakaʻauha ʻo e mamahi lahí. Ko e hā ʻoku nau tatali ki aí? Naʻe tohi ʻe he ʻapositolo ko Sioné ko e kau paní “ʻa e kau tamaioʻeiki ʻa hotau ʻOtuá” kuo pau ke nau maʻu honau silaʻi fakaʻosí.a ʻI he taimi ʻe ʻosi ai ʻa e meʻa mahuʻinga ko ení, ʻe tukuange atu ʻe he kau ʻāngeló ʻa e ngaahi matangi ʻo e fakaʻauhá. Ko e hā leva ʻe hoko aí?

14. Ko e hā ʻokú ne fakahaaʻi mai ko Pāpilone ko e Lahí ʻe vavé ni ke fakaʻauha?

¹⁴ Ko Pāpilone ko e Lahí, ʻa ia, ko e ʻemipaea ʻi māmani ʻo e lotu loí, ʻe fakaʻauha, he ko hono tuhá ia. ʻI he taimi ʻe hoko ai iá, heʻikai ha taha ʻe malava ke ne tokoniʻi ia. Kuo tau ʻosi sio ki he ofi hono ngataʻangá. (Fkh. 16:12; 17:15-18; 18:7, 8, 21) Kuo lava ke tau sio he taimí ni ki he hōloa ʻa e poupoú ʻi hono fakaangaʻi ʻe he ongoongó ʻa e ngaahi lotú mo honau kau takí. Neongo eni, ʻoku ʻikai ongoʻi ʻe he kau taki lotú ʻoku nau ʻi ha tuʻunga fakatuʻutāmaki moʻoni. ʻOku nau maʻuhala ʻaupito! Hili ʻa e fanongonongo ʻo e “Melino mo e malu!” ʻe ʻohofi fakafokifā ʻe he ngaahi puleʻangá ʻa e lotu loí pea fakaʻauha ʻosi ia. ʻE mole taʻengata atu ʻa Pāpilone ko e Lahi! Ko e moʻoni ʻoku tuha ʻa e tatali anga-kātaki ki he ngaahi meʻa fakahisitōlia ko ení.—Fkh. 18:8, 10.

ʻE LAVA FĒFĒ KE TAU FAKAHAAʻI ʻOKU TAU HOUNGAʻIA ʻI HE ANGA-KĀTAKI ʻA E ʻOTUÁ?

15. Ko e hā kuo tatali anga-kātaki ai ʻa Sihová?

¹⁵ Neongo hono taʻefakalāngilangiʻi ʻe he kakaí ʻa e huafa ʻo Sihová, kuó ne tatali anga-kātaki ki he taimi totonu ke ngāue mai ai. ʻOku ʻikai finangalo ʻa Sihova ke ʻauha ha taha pē ʻo e kakai loto-totonú. (2 Pita 3:9, 10) ʻOku tau ongoʻi pehē? Ki muʻa ke hoko mai ʻa e ngataʻangá, ʻoku ʻi ai ʻa e ngaahi founga kehekehe ke fakahaaʻi ai kia Sihova ʻoku tau houngaʻia ʻi heʻene anga-kātakí.

16, 17. (a) Ko e hā ʻoku totonu ai ke tau loto ke tokoniʻi ʻa e faʻahinga kuo tuku ʻenau tauhi kia Sihová? (e) Ko e hā ʻoku fakavavevave ai ki he faʻahinga ko ia kuo tuku ʻenau tauhi kia Sihová ke foki kiate ia he taimi ní?

¹⁶ Tokoniʻi ʻa e faʻahinga ʻoku nau hoko ʻo ʻikai longomoʻuí. Naʻe pehē ʻe Sīsū ʻe ʻi ai ʻa e fiefia ʻi hēvani ʻi he taimi ʻoku maʻu mai ai ha sipi mole pē ʻe taha. (Māt. 18:14; Luke 15:3-7) ʻOku tokanga lahi ʻa Sihova fekauʻaki mo e faʻahinga naʻa nau fakahaaʻi ʻenau ʻofa ʻiate ia, neongo kapau ʻoku ʻikai ke nau tauhi kiate ia he taimí ni. ʻOku ʻai ke fiefia ʻa Sihova mo e kau ʻāngeló ʻi he taimi ʻoku tau tokoniʻi ai ʻa e kakaí ke foki kia Sihova.

¹⁷ ʻOkú ke ʻi he haʻohaʻonga ʻo e faʻahinga ʻoku ʻikai tauhi ki he ʻOtuá he taimí ni? Mahalo pē ʻoku tuku hoʻo ʻalu ki he ngaahi fakatahá koeʻuhí ko ha taha ʻi he fakatahaʻangá naʻá ne fakalotomamahiʻi koe. Mahalo pē kuo mahili atu ha taimi talu mei ai. Ko ia ʻeke hifo kiate koe: ‘ʻOku lelei ange ʻeku moʻuí he taimí ni, mo u fiefia ange? Naʻe fakaʻitaʻi au ʻe Sihova, pe ko ha tangata taʻehaohaoa? Kuo faifai ange ʻo fai ʻe Sihova ko e ʻOtuá ha meʻa ke u mamahi ai?’ ʻOku fakafeangai lelei mai maʻu pē ʻa Sihova kia kitautolu. Neongo ʻi he taimi ko ení ʻoku ʻikai nai ke tau fai ki heʻetau palōmesi ke tauhi kiate iá, ʻokú ne kei tuku pē ke tau fiefia ʻi he ngaahi meʻa lelei ʻokú ne foaki maí. (Sēm. 1:16, 17) Kae kehe, ʻe vavé ni ke hoko mai ʻa e ʻaho ʻo Sihová. Ko e taimi eni ke tau foki ai ki heʻetau Tamai ʻofá, ʻa Sihova, pea ki he fakatahaʻangá. Ko e feituʻu malu pē eni ke tau ʻi ai ʻi he ngaahi ʻaho fakaʻosí ni.—Teu. 33:27; Hep. 10:24, 25.

18. Ko e hā ʻoku totonu ai ke tau poupouʻi ʻa e faʻahinga ʻoku takimuʻá?

¹⁸ Poupouʻi mateaki ʻa e faʻahinga ʻoku takimuʻá. ʻI he tuʻunga ko ha Tauhi-Sipi ʻofá, ʻoku tataki mo maluʻi kitautolu ʻe Sihova. Kuó ne fakanofo hono ʻAló ke hoko ko e Tauhi-Sipi Lahi ʻo e tākangá. (1 Pita 5:4) Ko e kau mātuʻa ʻi he ngaahi fakatahaʻanga laka hake ʻi he 100,000 ʻoku nau vaheʻi ʻa e taimi ke tokangaʻi ʻa e sipi taki taha ʻa e ʻOtuá. (Ngā. 20:28) ʻI he taimi ʻoku tau poupouʻi mateaki ai ʻa e faʻahinga ʻoku takimuʻá, ʻoku tau fakahaaʻi ai kia Sihova mo Sīsū ʻoku tau houngaʻia ʻi he meʻa kotoa kuó na fai maʻatautolú.

19. ʻE lava fēfē ke tau ʻunuʻunu ke vāofi angé?

¹⁹ ʻUnuʻunu ofi ki ho fanga tokouá. ʻOku ʻuhinga iá ki he hā? ʻI he taimi ʻoku ʻohofi ai ʻe he filí ha kongakau kuo akoʻi, ko e kau sōtiá ʻoku nau ʻunuʻunu ke toe vāofi ange koeʻuhí ke ʻoua ʻe ʻi ai ha foʻi ava ʻi he laine taú. Ko e founga ko iá te nau faʻu ai ha maluʻi ʻe ʻikai lava ke avangi. ʻOku fakalahi ʻe Sētane ʻene ʻohofi ʻa e kakai ʻa e ʻOtuá. ʻOku ʻikai ko e taimi eni ke tau kē ai mo hotau fanga tokouá. Ko e taimi eni ke tau ʻunuʻunu ke ofi ange, ke fakangaloʻi ʻa e ngaahi taʻehaohaoa hotau fanga tokouá, pea falala kia Sihova.

20. Ko e hā ʻoku totonu ke tau fai he taimi ní?

²⁰ Ko ia tau tauhi hotau vahaʻangatae mo Sihová ke mālohi pea fakahaaʻi ha fakakaukau faʻa tatali. Tau tatali anga-kātaki ki he fanongonongo ʻo e “Melino mo e malu!” mo hono silaʻi fakaʻosi ʻo e kau paní. Hili iá, ʻe tuku ange mai ʻe he kau ʻāngelo ʻe toko faá ʻa e ngaahi matangi ʻo e fakaʻauhá, pea ʻe fakaʻauha ʻa Pāpilone ko e Lahi. Lolotonga ʻetau tatali ki hono fakahoko ʻo e ngaahi meʻa fakahisitōlia ko ení, tau muimui ki he fakahinohino mei he faʻahinga kuo vaheʻi ke takimuʻa ʻi he kautaha ʻa Sihová. Tau ʻunuʻunu ke ofi ange ʻo fakafepakiʻi ʻa e Tēvoló mo e fanga tēmenioó! Ko e taimi eni ke muimui ai ki he akonaki ʻa e tokotaha-tohi-sāmé: “Mou lototoʻa, ʻo tuʻu kalikali, ʻa haʻa tatali ki he ʻEiki.”—Saame 31:24.

[Fakamatala ʻi lalo]

[Fakatātā ʻi he peesi 10]

[Fakatātā ʻi he peesi 12]

ʻOku fai ʻe he kakai ʻa Sihová ʻa e lahi taha te nau malavá ke tokoniʻi ʻa e faʻahinga ʻoku ʻikai longomoʻuí ke nau foki kia Sihova (Sio ki he palakalafi 16, 17)

[Fakatātā ʻi he peesi 14]

Ko e taimi eni ke tau ʻunuʻunu ke ofi ange ʻo fakafepakiʻi ʻa Sētane mo e fanga tēmenioó (Sio ki he palakalafi 19)